گه‌له‌ك كه‌س ب ده‌هان جاران نڤیسینه‌ كو هێزێن كوردان ل رۆژهه‌لاتا ناڤین بووینه‌ سه‌ربازێن ئه‌مریكا و رۆسیا و ب ناڤێ وان شه‌رى دكه‌ن و لاوێن كورد دكه‌نه‌ قوربانی به‌رژه‌وه‌ندێن ده‌وله‌تێن مه‌زن یێن وه‌ك رۆسیا و ئه‌مریكا، لێ دهێته‌ ژبیركرن كو چ ماف و ئازادى و داخوازى ب روونشتن و ئاخافتنێ ناهێته‌ بجهكرن و هه‌ر مافه‌ك ئانكو هه‌ر ده‌سكه‌فته‌ك قوربانیه‌كێ دخوازیت ئانكو به‌ده‌لا خوه‌ هه‌یه‌. به‌ده‌لا به‌ر مالا كوردان ژى شه‌رێ داعشێ و تیرۆرستێن سه‌له‌فى بوو كو هێزێن كوردى ب سه‌ركه‌فتى ئه‌ركێن خوه‌ بجهئینان و بۆ هه‌موو جیهانێ سه‌لماند كو ئه‌و ژى وه‌ك هه‌موو نه‌ته‌وێن مه‌زن لایقى ئازادیێ و ده‌وله‌ته‌كا سه‌ربخوه‌نه‌. گه‌لێ كورد ب هێزا خوه‌ و ره‌وشا رۆژهه‌لاتا ناڤین و ل دووڤ نه‌خشێ نوو یێ جیهانێ دبیته‌ خودان جهه‌كى گرنگ و ده‌وله‌تبوونا هه‌رێما باشوور و فه‌دراسیۆنا رۆژئاڤا كوردستانێ ئێدى ب جدى د رۆژه‌ڤا جیهانێ دایه‌.
ل باشوور ب سه‌ركێشیا پێشمه‌رگێن عه‌گید و ب پێشبینیه‌كا مه‌زن یا بارزانى هێزێن كورد شیان ب یه‌كرێزى د شه‌رێ دژى داعشێ دا جه بگرن و وه‌ك ئه‌نجامێ یه‌كگرتنێ سه‌ركه‌فتنێن مه‌زن د گۆراپانا شه‌ر و دپلۆماسیێ دا ب خوه‌ را ئینا و ئه‌ڤجا ژى دڤێت سه‌ركرداتیا سیاسى خالا هه‌رى لاواز یا كوردان یا پارچه‌بوونا ناڤ مالا كوردى ژ هۆلێ راكه‌ن و یه‌كگرتنا د چه‌په‌رێن شه‌رى دا ل سه‌ر مێزا سیاسى ژى دروست بكه‌ن و خه‌ونا قوربانیان بجه بینن كو ئه‌و ژى یه‌كرێزى و ئاڤاكرنا ده‌وله‌تا سه‌ربخوه‌ یا كوردستانێ یه‌.
گه‌له‌ك جاران مه‌ هه‌موویان بهیستیه‌ یان ژى مه‌ ب خوه‌ ژى گۆتیه‌ كو هێزێن كوردى د شه‌ڕی دا شێر و عه‌گیدن، لێ ده‌مێ روونشتنا سه‌ر مێزا دانوستاندنان ره‌به‌نن و ته‌په‌سه‌رن، د قووناغا نها دا ب پێشه‌نگیا ب رێز بارزانى گاڤه‌كا مه‌زن بۆ نه‌هێلانا ره‌به‌نى، ئانكو ته‌په‌سه‌ریێ هاتیه‌ هاڤێتن و سه‌ركه‌فتن و جۆشا ئه‌ڤرۆ بنه‌ما خوه‌ ژ پێنگاڤا بارزانى وه‌ردگریت كو ئه‌و ژى یه‌ك چه‌په‌ریا هێزێن پێشمه‌رگه‌ی د بن ئالایێ كوردستانێ دایه‌ و نها رۆلێ ل سه‌ر سه‌ركرداتیا سیاسى یه‌كخستنا سیاسه‌تا نه‌ته‌وى یا د به‌رژه‌وه‌ندا كوردستانێ دایه‌.
ل رۆژئاڤا كوردستانێ ژى گه‌لێ كورد ب هێزا خوه‌ یا گه‌ڵه‌رى و ب عه‌گیدیا شه‌رڤانان شیان ژ ره‌وشا ئالۆز یا سووریێ مفای وه‌ربگرن و رێكخستنا خوه‌ یا ب ده‌هان سالان ڤه‌گه‌رینه‌ ده‌سكه‌فتان و ئه‌ڤرۆ ب رێیا سیاسه‌تا هێلا سێیه‌م خوه‌ نێزیكى سه‌ركه‌فتنێ كریه‌ و شیانه‌ هه‌م ب ئه‌مریكا و هه‌م ژى ب رۆسیا را په‌یوه‌ندیان دروست بكه‌ن و رۆژ بۆ رۆژ خوه‌ بگه‌هیننه‌ ئارمانجێن نه‌ته‌وى و ژ ئه‌ڤرۆ پێڤه‌ پێنگاڤێن فه‌دراسیۆنێ دهێنه‌ هاڤێتن.
د قووناغا نها دا یا گرنگ ئه‌وه‌ ئه‌رێ ئه‌م دێ شێین قوربانیدانێن ل باشوور و رۆژئاڤا بگه‌هیننه‌ خه‌ونا سه‌دان سالان یان نه‌؟. راسته‌ ئه‌مریكا و هه‌ڤپه‌یمانان هێزێن كوردى ل هه‌ردو پشكێن كوردستانێ وه‌ك هه‌ڤپه‌یمانیا سه‌ر عه‌ردێ دبینن و ل دووڤ هزرا من دخوازن كورد ل هه‌رێمێ و پارچێن خوه‌ ده‌ستهه‌لاتدار بن، لێ یا گرنگ ره‌وشا ناڤمالا كوردیه‌، وه‌ك ماك گورك نوونه‌رێ ره‌سمى یێ ئۆبامای بۆ شه‌رێ داعشێ گۆت: مه‌ترسیا وێ یه‌كێ هه‌یه‌ كورد ده‌لیڤا زێرین ژ ده‌ست بده‌ن و سه‌رنج راكێشانده‌ سه‌ر پارچه‌بوونا ناڤ مالا كوردی. نوونه‌رێ ئۆبامای به‌حسێ دو پارچه‌بوونان دكه‌ت یا یه‌كێ پارچه‌بوونا ل ناڤا باشوورێ كوردستانێ، یا دویێ ژى پارچه‌بوونا ل رۆژئاڤایه‌، ژ خوه‌ د ئاستێ كوردستانا مه‌زن دا ئه‌م نه‌شێن به‌حسێ یه‌كگرتن و حه‌تا ل هه‌ڤ گوهداركرنێ ژى بكه‌ین، چونكی حه‌تا نها ژى وه‌ك پێدڤى هێزێن كوردى ژ هه‌ڤدو دترسن و زێده‌تر ژ دوژمنان دژاتیا هه‌ڤدو دكه‌ن.
ئه‌ڤجا وه‌كو مه‌ د ده‌ستپێكا نڤیسینێ دا دیار كری كو هه‌ڤپه‌یمانان، ئانكو ئه‌مریكا و رۆسیا رازینه‌ و دخوازن كورد بگه‌هنه‌ مافێن خوه‌ و ل سه‌ر پیا بن، لێ پارچه‌بوونا د ناڤمالا كوردى دا ئه‌و هنده‌ دژواره‌ دشێت وه‌سا بكه‌ت كو كورد د دیزاینا نوو دا بێ بار ببن.
د ڤێ قووناغێ دا بێ بریاره‌كا هه‌ڤپشك چوونا ل گه‌ل مالكى، ئیرانێ، توركیا و یان هه‌ر وه‌لاته‌كى دى نه‌ د خزمه‌تا نه‌ته‌وێ كورد دایه‌ ژ به‌ر كو ئیران، توركیا و مالكى ب تنێ بۆ دژاتیا كوردان كار دكه‌ن و ناخوازن كورد ببنه‌ خودان ده‌سكه‌فتێن هه‌رى بچووك ژی. ل ڤێده‌رێ یا گرنگ ده‌نگێ كوردستانیانه‌ كو دڤێت بێ پاراستنا چ پارته‌كێ بهێته‌ كرن هه‌ر كه‌س ل دژى بزاڤێن پارچه‌كرنێ راوه‌ستیت و پشته‌ڤانیا یه‌كرێزیا ناڤمالا كوردى بكه‌ت.

د ڤان رۆژان دا سه‌ركردێن كورد ل باكور، باشوور، رۆژئاڤا و هه‌روه‌سا سیاسته‌مه‌دار، هونه‌رمه‌ند، رۆژنامه‌ڤان، ئه‌كاده‌مسیه‌ن، زانایێن سیاسه‌تێ و حه‌تا كولانێن كوردستانێ وه‌ك كو هه‌ڤسۆز بن به‌حسێ گرنگیا قووناغا نها ئانكو سه‌د سالا ٢١ێ دكه‌ن و دبێژن كو ئه‌ڤ سه‌د سال یا كوردایه‌! نه‌ كو ب تنێ ل كوردستانێ، ل ده‌رڤه‌ی وه‌لات و سیاسه‌تمه‌دارێن ب باندۆرێن جیهانێ ژى هه‌مان په‌یڤێ دكه‌ن و داخواز ژ كوردان دكه‌ن كو ده‌لیڤا زێرین ژ ده‌ستێ خوه‌ نه‌كه‌ن. نها پرسیار ئه‌ڤ ده‌لیڤا زێرین چی یه‌؟ و چما نها ده‌لیڤا زێرین د مه‌ترسیێ دایه‌؟ سه‌د سالیا مه‌یه‌، لێ گه‌لۆ ئه‌م یێ ڤێ سه‌د سالیێ نه‌؟، گه‌لۆ ئه‌ڤ پارچه‌بوونا د ناڤ مالا كوردى دا ئه‌م دێ چه‌وا مفایێ ژ ڤێ سه‌د سالیێ وه‌رگرین و خوه‌ بگه‌هیننه‌ ئارمانجێن پیرۆز كو ب ده‌هان هزاران لاوێن كورد د رێكا وێ دا گیانێ خوه‌ كرینه‌ قوربانى و ئه‌ڤرۆ ژى دیسا خوه‌ فیدایێ كوردستانێ دكه‌ن.
مه‌ كوردان چ ده‌مه‌كی ئاریشه‌ د شه‌ركرنێ دا نه‌بوویه‌ و د شه‌ری دا لاوێن كورد ئه‌ركێن خوه‌ ب زێده‌یى بجه ئینانه‌ و ته‌پێ دهاڤێنه‌ د ناڤ مالا سیاسه‌تمه‌دار، سه‌ركرده‌ و پارتێن كوردى دا، ئه‌ڤجا بلندكرنا سه‌ركه‌ڤتنا د شه‌رى دا بۆ گه‌هاندنا ئارمانجێن نه‌ته‌وى د ده‌ستێ سه‌ركرده‌ و پارتێن كوردى دایه‌ و تاكه‌ تاوانبارێن ژ ده‌ستدانا ده‌لیڤا زێرین، ئانكو ڤێ سه‌د سالیێ ژى ئه‌و كه‌سن كو ب ناڤێ گه‌لێ كورد بریارێ دده‌ن، وه‌ك پێنگاڤا ده‌ستپێكێ راكرنا مۆرا پارتاتى ل سه‌ر په‌شمه‌رگه‌ د شه‌رێ دژى تیرۆرزمێ دا و ئه‌و ده‌ستپێشخه‌ریا ب رێز بارزانى گلۆپا كه‌سك یا د ناڤا د دلێ هه‌ر تاكه‌ كه‌سه‌كێ كورد دا پێخست و خه‌لك و پێشمه‌رگێن كوردستانێ په‌یامێ ب هزره‌كا مه‌زن قه‌بوول كریه‌ و سه‌ركه‌ڤتنا د رزگاركرنا ئۆپه‌راسیۆنا مووسلێ و بلندبوونا مه‌عنه‌ویێن كوردستانیان ب ڤێ په‌یاما راكرنا مۆرا پارتاتى ل سه‌ر پێشمه‌رگه‌ی دا هه‌یه‌ و دڤێت مۆرا پارته‌تى ل سه‌ر هه‌موو به‌رژه‌وه‌ندێن نه‌ته‌وى بهێته‌ راكرن.
پارتێن كوردستانى ته‌كید بۆ رێكخستن و گه‌هاندنا ئارمانجا پیرۆز گه‌له‌ك پێدڤینه‌، لێ ئه‌و پارتێن كوردستانى یێن كو بشێن د ده‌مێ پێدڤى دا ئانكو د قووناغێن وه‌سا هه‌ستیار دا ده‌ست ژ به‌رژه‌وه‌ندێن پارتایه‌تى، ئانكو پارچه‌گه‌رى به‌رده‌ن بۆ گه‌لێ كورد و كوردستانێ پێدڤینه‌، به‌لێ ده‌لیڤه‌كا زێرین ل به‌ر ده‌رێ مالا كوردایه‌، ئه‌مریكا و هه‌ڤپه‌یمانیا ناتۆ ئالیه‌كى و رۆسیا و هه‌ڤپه‌یمانیا شه‌نگاى ل ئالیێ دى دخوازن رۆژهه‌لاتا ناڤین ژ نووڤه‌ دیزاین بكه‌ن و ئه‌ڤه‌ نێزیكى شه‌ش ساله‌ حه‌تا ژ سالا ٢٠٠٣ ڤه‌ به‌رێ بنگه‌هێ رۆژهه‌لاتا ناڤین یا نوو هاڤێتنه‌ و ئه‌ڤرۆ ژى بجهكرنا دیزاینا نوو د ره‌وشا خوه‌ یا هه‌رى هه‌ستیار دایه‌ و پاشه‌رۆژا مه‌ ب ڤێ دیزاینا نووڤه‌ گرێدایه‌، ئه‌م بنێرین د درێژیا دیرۆكا كوردان دا چ ده‌مه‌ك كورد ئه‌و هنده‌ وه‌ك نها ل ناڤخۆ و ل ده‌رڤه‌ ب هێز نه‌بووینه‌، ل باشوور ئانكو هه‌رێما كوردستانێ د هه‌ر وارى دا بنه‌ما سه‌رفرازى دروست بوویه‌ و ب تنێ یه‌ك ئاسته‌نگ مایه‌ ئه‌و ژى پارچه‌بوونا ناڤ مالا كوردیه‌، ژ به‌ر ڤێ یه‌كێ په‌یاما ب رێز بارزانى یا ل سه‌ر راكرنا مۆرا پارتایه‌تى ل سه‌ر پێشمه‌رگه‌ی پێنگاڤه‌كا گه‌له‌ك مه‌زنه‌ د یه‌كخستنا د ناڤ مالا كوردى دا و ل گه‌ل ڤێ پێنگاڤێ هاڤێتنا پێنگاڤێن ب هێزكرنا په‌رله‌مانى و سیسته‌مێ دادوه‌رى و ئاسایشا ناڤخۆ دێ هه‌رێما كوردستانێ بگه‌هینیته‌ ئارمانجا پیرۆز و باندۆرا خوه‌ ل باكور و رۆژئاڤا ژى بكه‌ت و ببیته‌ پالپشت بۆ رۆژهه‌لاتێ كوردستانێ ژی. د هه‌مان ده‌مى دا ل رۆژئاڤا كوردستانێ ژى (90%) ژ ئاخا كوردستانێ هاتیه‌ رزگاركرن و هێزه‌كا مه‌زنا شه‌رى هه‌یه‌ و رێكخستنا دام و ده‌زگه‌هێن رێڤه‌به‌ریا خوه‌سه‌ر ژى رۆژئاڤا گه‌له‌ك نێزیكى ئازادیێ كریه‌ و هه‌م ل باكور و هه‌م ژى ل باشوور پشته‌ڤانیه‌كا مه‌زن بۆ رۆژئاڤا هه‌یه‌، پێنگاڤا یه‌ك هێزا سه‌ربازى ل رۆژئاڤا گه‌له‌ك د جه دایه‌ لێ د هه‌مان ده‌مى دا پارچه‌بوونا سیاسه‌تێ و دژبه‌ریا ته‌ڤده‌م و ئه‌نكس دێ زیانه‌كا مه‌زن دده‌ته‌ ده‌سكه‌ڤتێن رۆژئاڤا و برینا ناڤمالا كوردى كورتر دكه‌ت. ل باكور ژى ته‌ڤگه‌را ئازادیا ژ هه‌ر ده‌مێ زێده‌تر بهێزه‌ و ده‌ستهلاتا توركیا رۆژ ب رۆژ شاشیێن گه‌له‌ك مه‌زن دكه‌ت و دڤێت سه‌ركرداتیا باكور مفای ژ شاشیێن توركیا وه‌ربگریت و خودان به‌رنامه‌كێ ده‌مدرێژ یێ سیاسى و نه‌ته‌وى بیت، ل دووڤ هزرا من ئاڤاكرنا كۆنگره‌كێ نه‌ته‌وى گه‌له‌ك پێدڤیه‌، لێ د قووناغا نها دا پێنگاڤا هه‌رى گونجاى و پێدڤى ل هه‌ر پارچه‌كا كوردستانێ ئاڤاكرنا كۆنگرێ ئانكو مه‌جلسێن نه‌ته‌ویه‌ و هه‌ر ده‌مێ كۆنگرێ نه‌ته‌وى یا پارچێن كوردستانێ دروست بوو ئاڤاكرنا كۆنگره‌كێ گشتى یێ كوردستانا مه‌زن ئانكو كۆنفه‌ده‌رالیا كۆنگرێ نه‌ته‌وى یا كوردستانێ گونجایه‌.

سه‌رجان مه‌حمود
جۆگرافیا رۆژهه‌لاتا ناڤین بوویه‌ ئاگر و ئاگرێ هه‌رى زێده‌ باندۆرا خوه‌ ل كوردستانێ دكه‌ت و كلیلا خورتكرن ڤه‌مراندنا ئاگری ل ناڤ مالا كوردی یه‌ و كورد ژى یاریێ ب ئاگر دكه‌ن.
ل دووڤ به‌رنامێ دارێشتى یێ ئه‌مریكا ل ده‌ستپێكا سالا ٢٠١٠ ل تونسێ بهارا عه‌ره‌بى ده‌ست پێ كر و گه‌له‌ك ئالیان و ب تایبه‌ت ژى سه‌له‌فى و كۆمێن ئیسلامى گه‌له‌ك حه‌ز ژناڤێ بهارا عه‌ره‌بى كر. ئه‌مریكا د چارچوڤێ پلانا خوه‌ دا سه‌رهلدانێن ل دژى دكتاتۆرێن ل وه‌لاتێن عه‌ره‌بى ده‌ست پێ كر و ئاگر كره‌ د ده‌ستێ سه‌رهلده‌رێن عه‌ره‌بان دا و په‌نزینێ ژى كره‌ د ده‌ستێ خوه‌ دا.
نها ل هه‌رێمێ ب تایبه‌ت ژى ل سووریێ و عیراقێ، ئانكو ل باشوور و رۆژئاڤایێن كوردستانێ ده‌رفه‌ته‌كا گه‌له‌ك مه‌زن هاتیه‌ به‌ر ده‌ستێ كوردان، هه‌موو جیهان و ب تایبه‌ت دوژمنێن كوردان ڤێ ده‌رفه‌تا مه‌زن و بجهبوونا خه‌ونا كوردان دبینن، لێ مخابن حه‌تا نها هێزێن كوردى نابینین كو د چ قووناغه‌كێ دا دژین و د دیرۆكێ دا تاكه‌ ئالیێ سه‌ركه‌ڤتیێ خوه‌ دوباره‌ دكه‌ن كو ئه‌و ژى ره‌وش چ دبیت بلا ببیت رژدی یا ل سه‌ر یه‌ك نه‌گرتنێ یه‌.
ئه‌م وه‌ك كورد هه‌ڤسۆزن ل سه‌ر پارچه‌بوونا وه‌لاتێ خوه‌، ئه‌م وه‌ك كورد هه‌ڤسۆزن ل سه‌ر یه‌كنه‌گرتن و دژاتیا هه‌ڤدو، وه‌كو دوژمنێن مه‌ دبێژن كوردێن عیراقێ، سووریێ، توركیا و ئیرانێ ئه‌م ژى وه‌كى وان دبێژین ئه‌م كوردێن خه‌لكینه‌ و نه‌كوردێن خوه‌ینه‌!. یان ژى ئه‌م وه‌سا دبێژین ئه‌م كوردێن پارتاینه‌ و نه‌ یێن كوردستانێ نه‌!. گه‌له‌ك راسته‌ و چ گۆمان نینه‌ كو كورد شۆره‌شكه‌ره‌، شه‌ركه‌ره‌، فیده‌كاره‌، عه‌گیده‌. هه‌روه‌سا راسته‌ كورد خودان رێكخستنێن گه‌له‌ك ب هێزن، هه‌ر پارته‌كا مه‌ وه‌ك ده‌وله‌ته‌ك ب هێزه‌ و ئه‌م وه‌ك وه‌لاتیێن كورد ژى هه‌ر یه‌ك بوویه‌ ئالیگر، شه‌ركه‌ر ئانكو هه‌ڤالبه‌ندێ پارته‌كا كوردی.
ب راستى ئه‌م گه‌له‌ك د پارته‌یاتیا خوه‌ دا ب هێزین ئه‌م دلسۆزین و چ بریارێن پارتێن خوه‌ گه‌نگه‌شه‌ ناكه‌ین ئانكو ئه‌م كورد گه‌له‌ك باش یێن پارتیانه‌ و ئه‌م دشێن بۆ پارتا خوه‌، خوه‌ بده‌ینه‌ كوشتنێ و شه‌رێ به‌رانبه‌رى خوه‌ بكه‌ین.
لێ مخابن ئه‌م نه‌بووینه‌ كورد و ئه‌م نه‌بوونه‌ نه‌ته‌وا كورد، به‌لكى گه‌له‌ك كه‌س ژ ڤێ شرۆڤێ و نرخاندنا من تۆره‌ ببن. لێ ده‌مێ ڤێ یه‌كێ هاتیه‌ كو ئه‌م ره‌خنێ ل پارتێن خوه‌ بگرین و بۆ وان بێژین ئێدى به‌سه‌ و كارتا هشیاریێ نیشا وان بده‌ین، ئانكو ده‌مێ وێ هاتیه‌ ئه‌م ببینه‌ كورد و كوردستانى و ئه‌م ل سه‌ر پارتێن كوردى فه‌رز بكه‌ین كو به‌رژه‌وه‌ندێن گشتى یێن كوردستانێ به‌رز رابگرن و ده‌مێ پێدڤى كر پارتایه‌تیێ قوربانى نه‌ته‌وا كورد بكه‌ین.
د قووناغه‌كا وه‌سا هه‌ستیار دا نابیت ئه‌م به‌حسێ پارتایه‌تیێ و به‌رژه‌وه‌ندێن پارتان بكه‌ین. د شۆره‌شێن چ وه‌لاتێن جیهانێ دا نه‌ته‌وه‌په‌ره‌ستێن پارتایه‌تیێ دروست نه‌بووینه‌، لێ ل هه‌ر چار پارچێن كوردستانێ ژى پارتایه‌تى و ئارمانجێن پارتان بوویه‌ ئارمانجا سه‌ره‌كى و به‌رژه‌وه‌ندێن نه‌ته‌وى به‌رزه‌ بووینه‌.
بلا كه‌س تۆره‌ نه‌بیت، مخابن پارتێن مه‌ كوردێن نه‌ساخ دروست دكه‌ن و جیلێن داهاتى ژى ب سایا وان نه‌ساخان مه‌زن دبن و ژ هه‌ستێن نه‌ته‌وى دوور و ب خه‌ونا ره‌ڤا ژ كوردستانێ رۆژێن خوه‌ ده‌رباز دكه‌ن و د ده‌لیڤه‌یه‌كا بچووك دا گیانێ خوه‌ ژى دده‌ن به‌ر چاڤێن خوه‌ و خوه‌ ل سنووران، ده‌ریایان و كارڤانێن قه‌چاخ دده‌ن.
ره‌وشه‌نبیرێن مه‌ ژى هه‌ر یه‌ك بوویه‌ پشته‌ڤانێ پارته‌كێ و ل سه‌ر تۆرێن ئه‌نترنێتێ ب ره‌شكرنا هه‌ڤدو مژوولن و حه‌تا دگه‌هیته‌ وى ئاستى كو هه‌ڤدو تیرۆرست ل قه‌له‌م دده‌ن و زماندرێژیێ ل خوینا شه‌هیدان ژى دكه‌ن و ئێدى وه‌سا لێ هاتیه‌ كو ره‌خنه‌كرنا ل سه‌ر پارته‌كێ وه‌ك خیانه‌ت دهێته‌ ب ناڤكرن و مێشك بوویه‌ ره‌ش و سپی. ل ده‌مه‌كی مێشكێ مه‌ بۆ دوژمنان ره‌نگا و ره‌نگه‌ و بۆ ناڤخۆ ره‌ش و سپی یه‌ و مه‌ژیه‌كێ نه‌ساخه‌، ئه‌و ته‌حه‌مولا مه‌ بۆ دوژمنان هه‌ی، مخابن مه‌ بۆ هه‌ڤدو نینه‌! و ئه‌م گه‌له‌ك چاڤره‌شین ل دژى هه‌ڤدو و گه‌له‌ك نه‌رم و لێبۆرینێ بۆ دوژمنێن نه‌ته‌وا خوه‌ دكه‌ین. ئانكو ئه‌م ژ دلێ خوه‌، دیرۆكا خوه‌ و پاشه‌رۆژا خوه‌ گه‌له‌ك دوورین و چاره‌نڤیس د ده‌ستێ مه‌ دایه‌، لێ مخابن مه‌ خوه‌ كریه‌ د ده‌ستێ خه‌لكى دا، باشه‌ ما ده‌مێ كو ئه‌م ببینه‌ كورد نه‌هاتیه‌؟.