ئه‌م ب هنده‌ك پرسیاران ده‌ست ب نڤیسا خوه‌ بكه‌ن و خوه‌ بگه‌هینن هنده‌ك راستیان، سه‌ده‌مێن رێك نه‌كه‌ڤتنا پارت و ئالیێن سیاسى یێن هه‌رێما كوردستانێ چنه‌؟. پارتێن مه‌ ل پشت په‌ردا چ د ئاخفن؟. ره‌وشا ناڤخوه‌ ئاسته‌نگه‌ یان هێزێن ده‌رڤه‌ ده‌سته‌وه‌ردانێ دكه‌ن دا كۆ رێكه‌ڤتن چێنه‌بیت؟. به‌رسڤا ڤان پرسیاران حه‌تا ئاسته‌كى دیارن و وه‌سا خوه‌یا دكه‌ت دیسا ئه‌قلێ ئێكێ یێ كوردى ل سه‌ر كاره‌ و حه‌تا نها ژ بلى سه‌رۆكێ هه‌رێمێ چ كه‌سه‌كى دى ل هه‌رێما كوردستانێ بزاڤا بكارئینانا عه‌قلێ دویێ نه‌كریه‌ و حسابێن ل سه‌ر كورسیان و پارڤه‌كرنا ده‌هاتان ل پێش هه‌موو به‌رژه‌وه‌ندیێن نه‌ته‌وى و نشتیمانى راوه‌ستیایه‌. سه‌رۆكێ هه‌رێما كوردستانێ د ره‌وش و ده‌مه‌كى گه‌له‌ك گونجاى دا و پشتى سه‌ركه‌ڤتنا هێزێن پێشمه‌رگه‌ ل هه‌مبه‌رێ تیرۆرستێن ده‌اشێ، هزرێن خوه‌ ل سه‌ر پاشه‌رۆژا كوردستانێ ئینا زمان و هه‌ژماره‌ك پێشنیاز و رێچاره‌یان دا پێشیا پارت و ئالیێن سیاسی. ئه‌ڤجا ژ ده‌ستدانا ده‌لیڤا زێرین و ژناڤچوونا خه‌یالا ئاڤاكرنا ده‌وله‌تا كوردى دبیته‌ تاوانا پارت و ئالیێن سیاسى و چو ده‌مه‌كى نه‌شێن خوه‌ ژ بن بارێ ژ ده‌ستچوونا ڤێ ده‌لیڤا گرنگ و دیرۆكى رزگار بكه‌ن. شاند ل دووڤ شاندێن گرنگ و بریارده‌ر سه‌ره‌دانا هه‌رێما كوردستانێ دكه‌ن و به‌حسا رۆلێ گرنگ یێ كوردان د شه‌ڕێ ل دژى تیرۆرێ دا دكه‌ن و ب ئاشكرا یان ب زمانه‌كى دى ژ مه‌ دخوازن كۆ ئه‌م ئێكبگرن و ب ئێكگرتى ژ ره‌وشا هه‌ى مفایێ وه‌ربگرن، نها ئه‌ز باوه‌ر دكه‌م هه‌ر تاكه‌كى كوردستانێ ل هه‌مبه‌ر رێك نه‌كه‌ڤتنا پارتێن سیاسى گه‌له‌ك دلگرانن و ل به‌ندا ئێكگرتنا ناڤمالا كوردینه‌ و هه‌ر كه‌س دزانیت سه‌ده‌مێ ره‌وشا خراب یا ئابووریێ و نه‌بوونا په‌رله‌مانێ و حوكمه‌تێ ژ هه‌ڤ دووربوونا پارتێن كوردى و به‌رژه‌وه‌ندیێن ته‌نگ یێن پارتایه‌تیێ یه‌ و شه‌ر بۆ كورسیانه‌ و نه‌ بۆ دانینا پاشه‌رۆژه‌كا گه‌ش بۆ كورد و كوردستانێیه‌. مخابن حه‌تا نها ژى پارتێن مه‌ نه‌شیانه‌ په‌یوه‌ندیێن خوه‌ یێن ل گه‌ل وه‌لاتێن بیانى ل سه‌ر بنگه‌هه‌كا نشتیمانى دروست بكه‌ن و دوور ژ هێلێن سۆر خوه‌ نێزیكى وه‌لاتێن داگیركه‌ر دكه‌ن و نه‌ ب ئاشكرا بیت ژى دژاتیێ پارتێن دى دكه‌ن. ژ خوه‌ وه‌لاتێن داگركه‌ر ژى ناخوازن سنۆرێن هه‌یى بهێنه‌ گوهۆرین و ده‌وله‌ته‌كا كۆ باندۆرا خوه‌ ل وان بكه‌ت بهێته‌ راگه‌هاندن، لێ مه‌سه‌له‌ نه‌ خوه‌سته‌كا توركان، ئیرانێ یان ئیراقی یه‌ مه‌سه‌له‌ ئه‌م وه‌ك كورد چه‌ند دخوازن ده‌وله‌ته‌ك ئاڤا بكه‌ن و د ره‌وشا نها یا گونجاى دا بۆ راگه‌هاندنا ده‌وله‌تا كوردى مه‌ چ به‌رنامه‌ هه‌یه‌. وه‌ك كۆ نوونه‌رێ ئۆباما و وه‌زیرێ به‌رێ یێ ده‌رڤه‌ یێ فره‌نسا ژى گۆتن كورد ب ئێكگرتنا خوه‌ دشێن ژ ره‌وشا هه‌ى موفایێ وه‌ربگرن و خوه‌ بگه‌هینن خه‌یالێن خوه‌ و ب ئاشكرا ژى دیار كرن كۆ نه‌ ئوروپا، ئه‌مریكا یان وه‌لاته‌كى دى بۆ كوردان ده‌وله‌ت دروست ناكه‌ت و هه‌كه‌ كورد خوه‌ بكه‌ن یه‌ك ژى چ ده‌وله‌ت و هێزه‌كى نینه‌ بشێت ئاسته‌نگیێ ل هه‌مبه‌ر ئاڤاكرنا ده‌وله‌تا كوردى دروست بكه‌ت. یانى ئێدى به‌سه‌ بلا پارتێن مه‌ خوه‌ و گه‌لێ كورد نه‌ خاپینن و هه‌ما جاره‌كا ب تنێ بیت ژى ئه‌م خوه‌ ژ هزرێن پارتاتى دور بخه‌ن و گۆهداریا ئاغا خوه‌، ئه‌نفالان، شه‌هیدان و خه‌یالێن خوه‌ بكه‌ن. مافێ چ پارته‌كى نینه‌ خیانه‌تێ ل گه‌ل خه‌یالێن گه‌لێ كورد بكه‌ت، بلا ئێدى كه‌س چیرۆكان نه‌بێژیت و هه‌ر تشت ل مه‌یدانێیه‌ و سه‌رۆكێ هه‌رێمێ ب رێنماى و پێشنیارێن خوه‌ رێ ل به‌ر هه‌موو ده‌ره‌وان داخستیه‌ و یێن نه‌هێته‌ ناڤ ئێكرێزیێ مافێ وێ نینه‌ به‌حسا كورد و كوردستانێ ژى بكه‌ت. پارچێن دى یێن كوردستانێ د ره‌وشێن جودا جودا ژیان دكه‌ن، رۆژاڤا هێشتا ل ده‌ستپێكا قۆناغا پاراستنا ده‌سكه‌ڤتانه‌ و بجیهكرنا فه‌ده‌رالیزمێ حه‌تا ئۆتۆنۆمیێ ژى سه‌ركه‌ڤتنه‌كا مه‌زنه‌، ل باكۆر ب ده‌ستخستنا مافێن نه‌ته‌وى و نشتیمانى د چارچووڤا دستورێ دا مرۆڤ دشێت وه‌ك پێنگاڤا ئێكێ قه‌بوول بكه‌ت و پشته‌ڤانى لێ بكه‌ت، دیسان ل رۆژهه‌لاتێ كوردستانێ وه‌ك پێنگاڤا ئێكێ دروستكرنا به‌ره‌یه‌كى نشتیمانى ل پێشیا هه‌ر كاره‌كى دیه‌، لێ ره‌وشا باشۆرێ كوردستانێ ئانكۆ هه‌رێمێ یا ئاڤاكرنا ده‌وله‌ته‌كا سه‌ربخوه‌یه‌ و ژ بلى راگه‌هاندنا ده‌وله‌تا كوردى چ سیسته‌مه‌كى دى یان چاره‌كا دى نه‌ گونجاییه‌ و د ڤێ قووناغێ دا ناڤێ سه‌رفرازى راگه‌هاندنا ده‌وله‌تا كوردیه‌ و ئه‌ڤ ده‌وله‌ت دێ وێره‌كیێ بده‌ته‌ رۆژاڤا، باكۆر و رۆژهه‌لات و ب هه‌بوونا خوه‌ ده‌وله‌ته‌كا سه‌ربخوه‌ ل باشۆرێ كوردستانێ وه‌ك سروشت دێ پارچێن دى هان بده‌ت بۆ ئێكگرتنێ و به‌رێ وان بده‌ته‌ ئارمانجا پیرۆز یا گه‌لێ كوردستانێ. وه‌ك پێنگاڤا ئێكێ بلا ناسناما ده‌وله‌تا كوردى بكه‌ڤیته‌ د به‌ریكا هه‌ر كورده‌كى دا، پشتره‌ هه‌كه‌ ده‌سهلات نه‌ دیمۆكراتیك بوو و به‌رده‌وامى دا گه‌نده‌لیێ و ده‌رفه‌تا كار و سیسته‌ما خوه‌ندنێ پێشنه‌خست و ژیانا هه‌ر تاكه‌كى نه‌كره‌ گه‌ره‌نتیێ وێ ده‌مێ مافێ هه‌ر وه‌لاتیه‌كى كورده‌ ئه‌ڤجا ل دژى ده‌سهلاتداران سه‌رهلدانێ بكه‌ت. بلا مه‌ ده‌وله‌ت هه‌بیت هه‌كه‌ پێدڤى كر ئه‌م ل دژى ده‌وله‌تا خوه‌ ژى راوه‌ستن لێ كا ده‌ستپێكێ ئه‌م خوه‌ ژ ئه‌بدبوونا عه‌ره‌بان، تورك و فارسان ده‌رخن، یا دى مافێ مه‌ یێ وه‌شارتیه‌ و مافێ مه‌یێ هه‌رى دیمۆكراتیكه‌.

ل جیهانا پێشكه‌ڤتى به‌لكى ژى كارێ هه‌رى زه‌حمه‌ت و هه‌ستیار ئاڤاكرنا مرۆڤه‌كیه‌، ئاڤاكرنا مرۆڤ هه‌ر ژ دیرۆكێ ڤه‌ ل دوڤ هه‌مو باوه‌ریان كاره‌كى پیرۆز و خێرێیه‌. هه‌ر وه‌لاته‌ك پاشه‌رۆژا خوه‌ ب زارۆیێن خوه‌ را گرێ دده‌ت و ب وى هزرى هه‌ر ژ ده‌ما ره‌وزا یێ ڤه‌ ده‌ست ب په‌روه‌رده‌ كرنا زارۆیان دكه‌ن و هه‌م ژ ئالیێ كه‌لتور و هه‌م ژى ژ ئالیێ زانستى ڤه‌ دخوازن جیله‌كى ئانكۆ تاكه‌كى ئاڤاكرى دروست بكه‌ن كو چاوێن وان ل پشت نه‌مینیت. ئه‌م ژى وه‌ك نه‌ته‌وا كورد خوه‌دان چاند ئانكۆ كه‌لتۆره‌كى گه‌له‌ك دێرین و كه‌ڤنارن، هه‌ر چه‌نده‌ ژ ئالیێ ئۆلى و ده‌سهلاتدار و داگركه‌ران ڤه‌ هنده‌ك تایبه‌تمه‌ندیێن دور ژ چاندا مه‌ كه‌ڤتبیته‌ د ناڤ ژیان و ئه‌قلێ مه‌ دا ژى لێ دیسان ئه‌م دشێن بێژن ئه‌م خوه‌دان چه‌نده‌كا دێرین و ب هێزن. چاند ژیانه‌، هزركرنه‌، حه‌زكرنه‌ و ناسكرنه‌، چاندا مه‌ كوردان وه‌ك ژ ناڤێ خوه‌ دهێت چاندا چاندنیێیه‌. ئه‌م ڤه‌گه‌رن ده‌ستپێكا بابه‌تێ، ئاڤاكرنا تاكه‌ كه‌سى ئانكۆ مرۆڤه‌كى كاره‌كى گه‌له‌ك پیرۆزه‌ و ل وه‌لاتێن پێشكه‌ڤتى په‌روه‌رده‌ ژ هه‌مو كاران گرینگتره‌. په‌روه‌رده‌ وه‌ك ژێرخانا ئابۆرى، سیاسه‌ت، پیشه‌ و جڤاكه‌كا مۆده‌رن یا ل سه‌ر چاندا خوه‌ یا ره‌سه‌ن دهێته‌ دیتن و د ڤێ چارچووڤێ دا نێزیكى ئاڤاكرنێ دبه‌ن. ل وه‌لاتێ مه‌ ژى ئاڤاكرنا تاكى ل هێڤیا خوه‌دێیه‌، تاكه‌ وه‌ك ره‌نگ و شێوه‌ تشته‌كییه‌ و وه‌ك هزر و ئه‌قل ژى تشته‌كى گه‌له‌ك جودایه‌ یانى د ناڤ كه‌ساتیكى دا دو كه‌س هه‌یه‌. ئه‌م وه‌سا بێژن خوه‌دنا بێ پلان ئانكۆ نه‌بوونا ستراتیژیا ده‌م درێژ یا خوه‌دنێ فێربوونه‌ك دده‌ت لێ زانستیێ چێ ناكه‌ت و ڤالاهیه‌ك د مێژسك و شیانێن مرۆڤان دا دهێلیت و تاكه‌ كه‌س ڤێ ڤالاهیێ ب ته‌له‌ڤیزیۆن و ئینته‌رنه‌تێ تژى دكه‌ت. گه‌له‌ك جاران كه‌سێن كو ب وه‌لاتیێن كورد را سه‌ره‌ده‌ریێ دكه‌ن و هه‌ڤالتیا كوردان دكه‌ن، دبێژن خه‌لكێ وه‌ ژ ئالیێ خه‌یالى ڤه‌ گه‌له‌ك ب هێزن لێ هزر و فێربونێن وان ل گه‌ل جڤاكێ ئاسته‌نگه‌ ل هه‌مبه‌ر پێنگاڤ ئاڤێتنا وان، ئه‌ڤ یه‌ك راسته‌خۆ ب په‌روه‌رده‌ و ئاڤاكرنا تاكه‌ كه‌سى ڤه‌ گرێداییه‌ و سیسته‌ما خوه‌دن و ژیانا جڤاكى و مالباتێ نه‌ ئاڤاكه‌ره‌ و كه‌سان به‌ر ب خه‌یالان ڤه‌ هان دده‌ن و ته‌له‌ڤیزیۆن و ئینه‌ته‌رنه‌ت ژى رێ خۆش دكه‌ت بۆ خه‌یالێن دور و كور. مه‌ گه‌له‌ك جاران د نڤیسێن خوه‌ دا به‌حسا چاند، دیرۆك و زانستیێ كریه‌، ئه‌ڤ هه‌رسێ بابه‌ت پێكڤه‌ گرێداینه‌ و هه‌ڤودو بهێز دكه‌ن، یانى چاندا ره‌سه‌ن، دیرۆكا كه‌ڤنار و زانستا سه‌رده‌مێ…. یا یه‌كێ ب هه‌بوونا خوه‌ مله‌ته‌ك دكه‌ته‌ مله‌ت و ره‌نگه‌، ژیانه‌، زمانه‌ و ناسنامه‌یه‌، یا دویێ خوه‌ زانینه‌، دیرۆكه‌، ده‌رسه‌، ئه‌زمۆنه‌ و هه‌بوونه‌، یا سێیێ پێشڤه‌چوون، خوه‌ گیهاندنا جیهانێ و بكارئینانا ئه‌قلێیه‌، ئه‌ڤ هه‌رسێ تایبه‌تمه‌ند هه‌كه‌ ب دروستى هه‌ڤدو خوه‌دان بكه‌ن و ل خوه‌ندنێ بهێنه‌ چاندن دێ ئاڤاكرنا تاكه‌ كه‌سى ل گه‌ل خوه‌ دا بهینیت. سیسته‌مێن هه‌ر وه‌لاته‌كى پێشكه‌ڤتى هانده‌ره‌ د ئاڤاكرنا تاكه‌ كه‌سى دا، سیسته‌م ده‌رفه‌تا كار، خوه‌ندنێ، ژیانه‌كا باش و ئافرینه‌ریێ دده‌ته‌ پێشیا تاكه‌ن خوه‌، ده‌ما گه‌نجه‌ك ل سیسته‌ما وه‌لاتێ خوه‌ بنێریت و خوه‌ د سیسته‌مێ دا ببینیت و هه‌ست پێ بكه‌ت ژیانا وى د گه‌ره‌نتیێ دایه‌ و پیشه‌ و خوه‌ندنا وى ب رێزدارى ڤه‌ دهێته‌ پێشوازى كرن ب ره‌نگه‌كى ئه‌كتیڤ خوه‌ دكه‌ته‌ د ناڤا سیته‌مێ دا و دبیته‌ مۆتۆرا سه‌ركه‌ڤتنا سیسته‌ما خوه‌. دبێژن هه‌رێما كوردستانێ ژى سیسته‌مه‌ك هه‌یه‌ لێ كه‌س نزانه‌ چ سیسته‌مه‌ و وه‌سا دیاره‌ سیسته‌مه‌كا ڤه‌شارتییه‌، مرۆڤ دشێت وه‌سا ژى بێژیت سیسته‌مه‌كا مه‌ یا پلاستیكى هه‌یه‌، وه‌ك قایشێیه‌ به‌ر ب هه‌ر ئالیكى ڤه‌ دچیت، مه‌ ژى خوه‌ندنگه‌ه هه‌نه‌، ره‌وزا هه‌نه‌، زانكۆ هه‌نه‌ و تژییه‌ خوه‌نده‌كار، سالێن ده‌ستپێكێ ب كوردیه‌ و پشتره‌ ل زانكۆ زمانێ خوه‌ندنێ دبیته‌ ئینگیلیز و عه‌ره‌بى و ئه‌م ل به‌ندێ نه‌ پیسپۆر ژێ ده‌ركه‌ڤن. ده‌ما خوه‌ندن ته‌مام ژى دبیت ژ به‌ر ده‌لیڤێن كارى نینه‌ و كه‌رتێ ته‌یبه‌ت هه‌ر ب ئاڤاكرنا قه‌سران را مژوله‌ خوه‌نده‌كار به‌رێ خوه‌ دده‌ن چایخانه‌ یان چاوێن خه‌ به‌ردده‌ن چونا ده‌رڤه‌یێ وه‌لاتی. ژ ئه‌نجاما ڤێ یه‌كێ ژى رۆژ ب رۆژ ده‌رمانخانه‌، نه‌خوه‌شخانه‌، چایخانه‌، كافى و سۆمنخانه‌ و خوارنگه‌ه زێده‌ دبه‌ن. وه‌ك كو براده‌ره‌كى دگۆت، مه‌ ده‌رمانخانه‌ و نه‌خوه‌شخانه‌ گه‌له‌كن ژ به‌ر كو ئه‌م ژ ئالیێ ده‌رونى ڤه‌ نه‌ساخن، مه‌ گه‌له‌ك زێده‌ چایخانه‌ و كافى هه‌نه‌ ژ به‌ر كو ئه‌م بێكارن و به‌تالن و مه‌ گه‌له‌ك سۆمنخانه‌ و خوارنگه‌ه هه‌نه‌ ژ به‌ر كو ئه‌م چاڤ برسى نه‌ و تێربونا مه‌ زه‌حمه‌ته‌. وه‌ك ئاخاڤتنا داوى هێڤیدارم ئه‌م لاوێن كورد، زارۆیێن كورد ئاڤا بكه‌ن نه‌ كو بده‌ن كوشتنێ و فێرى كوشتنا برایێن خوه‌ بكه‌ن. نا بۆ براكوژى و خوه‌كوژی… ئالیێ مافدار یێ براكوژیێ، خوه‌كوژیێ نینه‌.

رۆژێن گه‌رم یێن كۆ باندۆرا خوه‌ ل پێشه‌رۆژا مه‌ بكه‌ت نێزیك دبه‌ن و د ڤێ قۆناغێ دا ئه‌مێ بریارێ بده‌ن و راگه‌هینن كا ئه‌م چنه‌ و ئه‌م چ دخوازن و هێژایێ چ ژیانه‌كى نه‌. راسته‌ وه‌لاتێن زلهێز و داگركه‌رێن كوردستانێ هه‌ر یه‌ك خوه‌دان پرۆژه‌ و پلانه‌كى نه‌ و هه‌ر یه‌ك ژ وان ل دوڤ پلانێن خوه‌ پاشه‌رۆژه‌ك بۆ كورد و كوردستانێ دیار كرنه‌ و حه‌تا ژ ده‌ستێ وان بهێت دێ بزاڤێ بكه‌ن دا كۆ پلانا وان ل سه‌ر كوردان بهێته‌ بجیه كرن، ده‌ما ئه‌م ل ره‌وشا پارچه‌ى و حسابێن بچوك یێن پارتێن خوه‌ دنێرن گه‌له‌ك هێسان ئه‌م دشێن بێژن كۆ ره‌وشا ناڤخۆ یا مه‌ زه‌مینه‌ بۆ داگركه‌ران خۆش دكه‌ت دا كۆ بریارێ ل سه‌ر ناڤێ مه‌ بده‌ن.
ئه‌م مه‌راق دكه‌ن، ب راستى پرۆژه‌ و پلانێن پارتێن كوردى بۆ پاشه‌رۆژێ چنه‌؟ گه‌لۆ پارتێن مه‌ دێ كینگێ خوه‌ سپى بكه‌ن و ره‌ش و كرێتى و گه‌مارێن داگركه‌ران ژ سه‌ر خوه‌ باڤێژن؟ پرسیارا داوى ژى ئه‌ڤه‌ سه‌رۆكێ هه‌رێمێ پێشنیاره‌ك و پلانه‌ك گه‌له‌ك رۆن و ئاشكرا دا پێشیا هه‌مو ئالیێن سیاسى و ئه‌ز دشێم بێژم ب وێره‌كانه‌ ته‌پا ئاڤێته‌ ناڤ گۆراپانێ، ئه‌ڤجا چ بیانۆیه‌ك ل به‌ر ده‌ستێ چ ئالیه‌كى دا نه‌مایه‌ و دڤێت پارتێن كوردى د زوترین ده‌م دا به‌رسڤا سه‌رۆكاتیا هه‌رێم بده‌ن و هه‌لویستێن خوه‌ ئاشكرا بكه‌ن. یانى هه‌كه‌ هه‌بیت نه‌خشه‌چاره‌یه‌ك بۆ پاشه‌رۆژا كوردان دڤێت ب زه‌لالى راگه‌هینن، تشتێ كۆ ئه‌ز دبینم چ نه‌خشه‌رێیه‌ك بۆ پاشه‌رۆژا كوردستانێ ل به‌ر ده‌ستێن ئالیێن سیاسى یێن كوردستانێ دا نینه‌ و هه‌ر ئالیه‌ك ل ده‌ڤێ داگركه‌رێن كوردستانێ دنێرن و نه‌شێن رویێن خوه‌ سپى بكه‌ن. یانى ب تنێ دو رۆژ هه‌ما دو رۆژ به‌سن بلا هزر بكه‌ن كۆ كوردن و باوه‌ر بكه‌ن هه‌كه‌ به‌س دو رۆژ پارتێن مه‌ هه‌ست ب كوردبونا خوه‌ بكه‌ن و سۆز و په‌یمانێن كۆ دانه‌ شه‌هیدان و گه‌لێ كورد ببیر بهینن دێ گه‌له‌ك زه‌لال یه‌كگرتنا ناڤ مالا كوردى دروست ببیت و وێ ده‌مێ ئه‌مێ بشێن ب سه‌ر بلندى ل هه‌مبه‌ر داگركه‌ران و وه‌لاتێن زلهێز ب ده‌نگه‌كى بلند راگه‌هینن كۆ ئه‌م ده‌وله‌تا خوه‌ یا سه‌ربخوه‌ رادگه‌هینن و دیسان باوه‌ر بكه‌ن ده‌ما ده‌وله‌تێ راگه‌هینن چ هێزه‌ك نه‌شێت ببیته‌ رێگر و ده‌سته‌وه‌ردانێ بكه‌ت. یانى ئاریشا مه‌ یا سه‌ره‌كى ئه‌وه‌ كۆ مه‌ كوردبونا خوه‌ ژ بیر كریه‌ و تنێ پاراتایه‌تیا مه‌ د ئه‌قلێ مه‌ دا مایه‌ و ئه‌قلێ پارتایه‌تى د پرسێن چاره‌نیوساز دا كێمه‌ و نه‌ساخیه‌ و بچوكه‌.
ده‌ما په‌یڤ دهێته‌ سه‌ر راگه‌هاندنا ده‌وله‌تا كوردى ژ هه‌ر سه‌ریه‌ك هزره‌كى نه‌ساخ و ژ هه‌ر ده‌وى ئاخاڤتنه‌كا بریندار ده‌ردكه‌ڤیت و سه‌ده‌مێ وێ ژى نه‌بونا ئه‌قلێ باسیت و ره‌سه‌ن یێ كوردبونێیه‌، هه‌كه‌ نا بۆ چ د قۆناغه‌كى وه‌سا دا كۆ ئه‌م ژ هه‌ر ده‌مێ زێده‌تر نێزیكى خه‌ونا شه‌هیدان و هه‌ر تاكه‌كى كورد بونه‌ كۆ ئه‌و ژى ده‌وله‌تا كوردیه‌، ئه‌م نه‌شێن پێكڤه‌ دانشن و ب یه‌ك ده‌نگى و یه‌ك هه‌لویستى ب ده‌نگه‌كى بلند ده‌وله‌تا خوه‌ یا سه‌ربخوه‌ راناگه‌هینن. هه‌كه‌ ده‌ستێ ده‌وله‌تێن داگركه‌ر د ناڤا مه‌ دا نه‌بیت بۆ چ هزر و به‌رنامێن پارتێن مه‌ ئه‌و هنده‌ شێلى نه‌.
د ئاستێ نێڤده‌وله‌تى دا تشتێ كۆ خوه‌یا دكه‌ت ژ بلى ده‌وله‌تێن داگركه‌ر یێن پارچێن كوردستانێ چ رێگرى ل به‌رده‌م كوردان دا نه‌مایه‌ و د ره‌وشا نها دا ده‌وله‌تێن زلهێز ژى د ناڤ دا پرانیا وه‌لاتێن ئوروپا ده‌ما ده‌وله‌ته‌كا كوردى بهێته‌ راگه‌هاندن دێ نه‌ ل دژ بن، لێ هه‌كه‌ ئه‌م ب یه‌كگرتى ده‌وله‌تا خوه‌ دروست نه‌كن نه‌ ئوروپا و نه‌ ژى وه‌لاتێن زلهێز چ ئالیه‌ك بۆ مه‌ ده‌وله‌ته‌كا سه‌ربخوه‌ دروست ناكن.
دو رێ ل پێشیا مه‌ هه‌یه‌، رێكا یه‌كێ یه‌كگرتنا ناڤ مالا كوردى و یه‌ك هه‌لویستییه‌، ئه‌ڤ رێك دێ مه‌ به‌ر ب ده‌وله‌تا كوردستانێ ڤه‌ ببیت و بۆ گهیشتنا ڤێ رێكێ وه‌ك مه‌ ده‌ستپێكێ گۆت ب تنێ دو رۆژ به‌سن و به‌س دێ هزر ل كوردبونا خوه‌ بكه‌ن نه‌ كۆ ل پارتایه‌تی. رێكا دویێ به‌رده‌وامى دانا ره‌وشا نها یا پارچه‌كرى و شێلى بونا هه‌لویستان و گۆهدارى كرنا داگركه‌رانه‌ كۆ ئه‌ڤ رێك ژى دێ ده‌لیڤا زێرین ژ به‌ر ده‌ستێ ب فرینیت و به‌لكى ب سه‌دان سالێن دى ده‌لیڤه‌كا وه‌سا بۆ مه‌ دروست نابیت. ئه‌ڤجا ته‌پ ل گۆراپابا پارتێن سیاسى یێن كوردستانێیه‌، دشێن ته‌پا باڤێژن گۆلا خوه‌ و توشى خوساره‌ته‌كى دیرۆكى ببه‌ن و دشێن ب هه‌ڤرێزى پاساتان بده‌ن هه‌ڤدو و ب زیره‌كانه‌ گۆلێ بۆ خوه‌ تۆمار بكه‌ن و سه‌ركه‌ڤن.

هه‌ر ساله‌كا نوو ل پرانیا جیهانێ نووبوونان ل گه‌ل خوه‌ دا دهینیت و هنده‌ك گوهۆرین د ژیان، ره‌وش و هزر دا دروست دكه‌ت. ل گه‌ل مه‌ كوردان نه‌ ساله‌كى نوو نه‌ ژى سه‌دساله‌كى نوو ژى چ گوهۆرینێن وه‌سا مه‌زن ب خوه‌ را ناهینیت و ئه‌قل و ژیان و شێوازێ هزرا مه‌ هه‌ر یا ل سه‌ر هێلا باڤك و باپیرانه‌. ده‌ما كو ئه‌م ل دیرۆكا خوه‌ دزڤرن و خوه‌ندنێ د رۆپه‌لێن دیرۆكێ دا دكه‌ن گه‌له‌ك ئاشكرا ده‌ردكه‌ڤیته‌ هۆلێ كو ژ ده‌ما ئیمپاراتۆریا مه‌زنا كوردان مه‌دان ڤه‌ بگره‌ حه‌تا ده‌وله‌تا مه‌زنا مه‌روانیان و سه‌رداما سولتانێ ئۆسمانیان یاووز سولتان سه‌لیم و هه‌رى داوى د ده‌ما شه‌ڕێ جیهانا ئیكێ د قۆناغا پارچه‌بوونا ئۆسمانیان دا ده‌لیڤێن زێرین كه‌ڤتنه‌ د ده‌ستێ كوردان دا و ئه‌و ده‌لیڤێن زێرین ژ ئالیێ سه‌ركردێن وێ ده‌مێ یێن كوردان ڤه‌ نه‌هاتیه‌ دیتن ئانكو ژ به‌ر نه‌بوونا ئێكگرتنه‌كا ناڤمالا كوردى ده‌لیڤێن زێرین ژ به‌ر ده‌ستێن كوردان هه‌لیایه‌ و چوویه‌. د رۆپه‌لێن دیرۆكێ دا هه‌رجار شه‌رێن ئاشیره‌تێن كورد ئانكۆ هه‌ڤدو قه‌بوولنه‌كرنا سه‌رۆك عه‌شیران بوویه‌ سه‌ده‌مێ لاوازبوونا ناڤمالا كوردى و دوژمنێن كوردان شیانه‌ ژ ره‌وشا و پارچه‌ یێ كوردان مفایێ وه‌ربگرن و كوردان بخه‌ن ژێر بنده‌ستێن خوه‌. د ده‌ما مه‌دان دا ئاشیرێن كورد چوونه‌ گه‌ل دوژمنێن خوه‌ و ژ ناڤمالێ ڤه‌ ده‌ریێ ژ ناڤبرنا ئیمپاراتۆریا مه‌دیا بۆ دوژمنان ڤه‌كرنه‌، هه‌ر سه‌ده‌مێ ژناڤچوونا ده‌وله‌تا مه‌روانیان ژى هه‌مان سه‌ده‌مه‌. دیسا خیانه‌تا شێخ ئیدریسێ به‌دلیس ژى ب هه‌مان ره‌نگیه‌ و ئه‌ڤرۆ ژى مخابن ئه‌م دیسا به‌ر ب دیرۆكا باڤك و كالان ڤه‌ دچن. هنده‌ك ئالیێن سیاسى مافێ ده‌وله‌تبوونا كوردان وه‌ك تاوانه‌كى مه‌زن دبینن و ژیانا خولامتى ئانكو ئه‌بدبوون وه‌ك قه‌ده‌را كوردان قه‌بوول دكه‌ن و ئه‌و مافێ ده‌وله‌تبوونێ بۆ هه‌ر نه‌ته‌وه‌كى ماف دبینن، لێ ده‌ما كورد دخوازن ببه‌ن ده‌وله‌ت وه‌ك قه‌باحه‌ت ئانكو تاوان دبینن و ناڤێ ڤێ ئێكێ ژى وه‌ك پێكڤه‌ژیانا نه‌ته‌وان ب ناڤ دكه‌ن. گه‌له‌ك باشه‌ هه‌موو نه‌ته‌و پێكڤه‌ژیان بكه‌ن، لێ بۆ چ ناڤێ وێ ده‌وله‌تا كو نه‌وته‌وێن مه‌زۆپۆتامیا و كوردستانێ پێكڤه‌ژیان بكه‌ن نه‌ كوردستان بیت. بۆ چ كوردستانى بوون و ئاڤاكرنا ده‌وله‌تا كوردان تاوانه‌؟ ئه‌ڤ چه‌ند نڤیسه‌ ئه‌م باحسا هێلێن سۆر دكه‌ن، من ئێك مه‌ره‌م ژ هێلێن سۆر یێن نه‌ته‌وى هه‌یه‌ ئه‌و ژى پاراستنا ده‌سكه‌ڤت و خوه‌ گه‌هاندنا ئارمانجێن پیرۆز یێن نه‌ته‌وى نه‌. دڤێت هێلێن سۆر چبن؟ هێلێن سۆر نرخ و روومه‌تێن نه‌ته‌وینه‌، نرخێن نه‌ته‌وى ئاخ، ئال، سنۆر، خوین و پاراستنا ده‌وله‌مه‌دیێن كوردستانێ نه‌. هێلێن سۆر ژى هه‌ر ل سه‌ر نرخێن نه‌ته‌وى دهێته‌ دیار كرن. یانى هێلا سۆر پاراستنا ئاغا كوردستانێ، بلد راگرتنا ئالا كوردستانێ، خوه‌دى ده‌ركه‌ڤتنا ده‌سكه‌فت و هه‌ر بهۆسته‌ك سنۆرێ كوردستانێ و ده‌وله‌مه‌ندیێن ژێر عه‌رد و سه‌ر عه‌ردێ یێن كوردستانێ نه‌. وه‌رن ئه‌م ب ره‌نگه‌كى دى ل پرسا نه‌ته‌وى و پرسگرێكێن ده‌وله‌تبوونێ راوه‌ستن. نها پرسیار ئه‌ڤه‌ مافێ كوردان یا ده‌وله‌تبوونێ هه‌یه‌ یان نا؟ بۆ هه‌ر نه‌ته‌وه‌كى ئاڤاكرنا ده‌وله‌تێ مافه‌كى ره‌وایه‌ لێ بۆ چ داخوازا ئاڤاكرنا ده‌وله‌ته‌ك سه‌ربخوه‌ بۆ كوردان تاوانه‌؟ گه‌لۆ به‌رناما وان ئالیێن سیاسى چیه‌، چ بۆ كوردان دخوازن و خوینا لاوێن كورد ب ده‌هان سالان بۆ چ دانه‌ رژاندن؟. جیهان ئاماده‌یه‌ ده‌وله‌ته‌كا كوردى ل باشۆر و رۆژئاڤا كوردستانێ هه‌مبێز بكه‌ت و ب ده‌هان سه‌ركرده‌ و بریارده‌رێن جیهانێ ئیشاره‌تا وێ ئێكێ دده‌ن كو دێ كورد ل هه‌رێما باشورێ كوردستانێ و رۆژئاڤا كوردستانێ ببه‌ن دو ده‌وله‌تێن سه‌ربخوه‌. ئه‌ڤ ئیشاره‌تا یه‌ك واته‌یا خوه‌ هه‌یه‌، ئه‌ى كورد خوه‌ رێك بخه‌، یه‌كگرتنا ناڤمالا خوه‌ دروست بكه‌ت و هه‌وپه‌یمانیه‌كا دژوار یا نیشتمانى ئاڤا بكه‌ت، ئه‌زێ رێز ل داخوازا ته‌ بگرم. لێ هنده‌ك ئالیێن سیاسى ل باشۆر، باكۆر و رۆژئاڤا وه‌ك كو ئاڤاكرنا ده‌وله‌تا سه‌ربخوه‌ یا كوردستانێ خیانه‌ت بیت خوه‌ ژێ ددزن و ژ دوژمن زێده‌تر دژاتیا ده‌وله‌تا كوردى دكه‌ن. پرسیارا من ژى ئه‌ڤه‌ ئاڤاكرنا ده‌وله‌تا كوردى خیانه‌ته‌ یان دژاتیا ئاڤاكرنا ده‌وله‌تا كوردى؟ ئه‌ز ڤێ پرسێ ژ وژدانێ هه‌ر تاكه‌ كه‌سه‌كى كوردان دپرسم؟ هه‌روه‌سا داخواز ژ وان ئالیێن سیاسى دكه‌م كو بچن سه‌را مالباتێن شه‌هیدان بده‌ن و ژ وانرا بێژن مه‌ زارۆیێن وه‌ بۆ ده‌ره‌وێن دیمۆكراسیێ و دژاتیا ده‌وله‌تا كوردى دایه‌ كوشتن، كا دێ به‌رسڤا كه‌سوو كارێن شه‌هیدان چبیت؟. وه‌ك كورده‌ك وه‌ك رۆژنامه‌ڤانه‌ك ژ پرچا سه‌رێ خوه‌ حه‌تا خوینا د گیانێ خوه‌ دا ل گه‌ل ئاڤاكرنا ده‌وله‌تا كوردى مه‌ و ژ عه‌رد حه‌تا ئه‌زمان پشته‌ڤانێ پێشمه‌رگه‌، گه‌ریلا و شه‌رڤانێن كوردم. ب هه‌موو گیانا خوه‌ و ئوژدانێ خوه‌ ڤه‌ دۆست و هه‌ڤالێ ده‌وله‌تا كوردى و پارێزڤانێ ده‌سكه‌ڤتێن باشۆر، باكۆر و رۆژئاڤا كوردستانێ مه‌ و بێ جوداهى ژ باكۆر حه‌تا باشۆر ژ رۆژئاڤا حه‌تا رۆژهه‌لات شه‌هیدان وه‌ك قبلا خوه‌ دبینم. دیسا براكوژى یان خوه‌كوژى وه‌ك مرنا خوه‌ دبینم. هێڤى دكه‌م هه‌ر تاكه‌ كه‌سه‌ك كوردستانێ بێ هه‌ماسه‌تا هه‌ڤالتیا ئالیه‌ك سیاسى هنده‌ك هزر ل دیرۆك و مافێن خوه‌ بكه‌ت و پرسیارێ ژ ئوژدانێ خوه‌ بكه‌ت. گه‌لۆ چ دخوازیت و ئوژدانێ وى چ بۆ وى دبێژیت.

ل هه‌ر هه‌رێم ئه‌یه‌له‌ت ئانكۆ ده‌وله‌ته‌ك سیته‌ما برێڤه‌برنا ده‌وله‌تێ و دستوورا بنگه‌هین هه‌یه‌ و ئه‌و ده‌ستوور و سیسته‌م رویێ وه‌لات د وارێن جڤاكى، سیاسى و ئابوورى دا نیشادده‌ت و هه‌ر وه‌لات ئانكۆ هه‌رێمه‌ك ناڤه‌ك ل سیسته‌ما خوه‌ دكه‌ت. ل هه‌رێما كوردستانێ ژى سیسته‌مه‌ك ڤه‌شارتى هه‌یه‌ لێ سیته‌ما هه‌رێمێ بێ ناڤه‌ و تو ب كیژان ئالڤه‌ بكشینى به‌ر ب وى ئالڤه‌ دچیت و مرۆڤ دشێت ناڤێ سیسته‌ما به‌نیشت لێ بكه‌ت، یان ژى سیسته‌ما كێفی. هه‌ر كه‌س دزانیت كو كوردستان ژ چ كاره‌ساتێن مه‌زن جینۆساید و ئه‌نفالان ده‌رباز بوویه‌ و نێزیكى سه‌د ساله‌كى به‌رده‌وام تێكۆشین هاتیه‌ كرن و ب ده‌ه هزاران قوربانى هاتیه‌ دان، ئه‌ڤرۆ مافێ ڤى مله‌تیه‌ كو خوه‌دان ده‌وله‌ت و سیسته‌مه‌كا سه‌ربخوه‌ بیت و ئه‌ركێ برێڤه‌برن كوردستانێیه‌ كۆ ئه‌ڤرۆ د وارێ ژیانێ دا به‌رسڤا خه‌لكێ بده‌ن. سیسته‌ما هه‌رى خراب ژى ژ بێ سیسته‌مى باشتره‌ و ده‌ستوورێ هه‌رى خراب ژ بێ ده‌ستوورى باشتره‌ و حوكمه‌ت و په‌رله‌مانێ هه‌رى خراب ژ بێ حوكمه‌تى و په‌رله‌مانى باشتره‌، ئه‌ڤجا دڤێت رێڤه‌به‌ر و پارتێن كورد بێ مه‌رج بهێنه‌ گه‌ل هه‌ڤ و چاره‌كا گونجاى ژ ره‌وشا نها را په‌یدا بكه‌ن و به‌ریا هه‌ر تشتى خوه‌ ئێك ئالى بكه‌ن و سیسته‌مه‌كا برێڤه‌برنێ بهه‌لبژێرن و چ دبیت بلا ببیت گرێداى سیسته‌مێ بمینن. نها ئه‌م بنێرن ل كوردستانێ ژ جڤاكێ بگره‌ حه‌تا خوه‌ندنگه‌هان ژ په‌رله‌مانێ بگره‌ حه‌تا حوكمه‌تێ، ژ سپۆره‌ بگره‌ حه‌تا په‌یوه‌ندیێن ده‌رڤه‌ ژ بازرگانیێ بگره‌ حه‌تا ماشێ كارمه‌ندان چ تشته‌ك نه‌ دیاره‌ و خشتا كارى شێلییه‌. ئه‌ڤ شێلیبوون وه‌سا دكه‌ت كو هه‌ر ئالیه‌ك ل دووڤ به‌رژه‌وه‌ندیێن خوه‌ ب وه‌لاتێن ده‌رڤه‌را بكه‌ڤیته‌ د ناڤ په‌یوه‌ندیان را و د ناڤخوه‌ دا دوور ژ سیاسه‌ته‌كا نه‌ته‌وى كار بكه‌ت و گه‌له‌ك هێسان ل گه‌ل داگركه‌ران گۆڤه‌ندێ بگه‌رینیت. یانى مه‌ به‌ریا هه‌رى تشتان ل گه‌ل ده‌ستوور و سیسته‌م پێدڤیه‌ كو ئه‌ڤ سیسته‌م هێلێن خوه‌ یێن سۆر هه‌بن و هێلێن سۆر گه‌ل، وه‌لات و بنه‌مایێن هه‌رێمێ بپارێزیت. نها ئه‌م هه‌رێمه‌كا چاوانن نه‌ دیاره‌، چه‌ند هه‌رێم د ناڤا هه‌رێمه‌كى دا هه‌نه‌ ئه‌و ژى نه‌ دیاره‌ و دیسا د وارێن هه‌والگیرى، ئاسایش، ئارتێش و په‌یوه‌ندیێن ده‌رڤه‌ ڤه‌ ئه‌م چه‌ند پشكن ئه‌و ژى نه‌ دیاره‌. ئه‌و پارچه‌بوونێن د ناڤا هه‌رێمێ دا چ هێلێن سۆر ناهێلن و هه‌ر ئالیه‌ك ئانكۆ هه‌ر هه‌رێمه‌ك د ناڤا هه‌رێمێ دا هێلێن سۆر ل دووڤ به‌رژه‌وه‌ندیێن خوه‌ دروستكرنه‌ كو دووره‌ ژ به‌رژه‌وه‌ندیێن نه‌ته‌وى و ئه‌ڤ یه‌ك ل هه‌مبه‌ر ئێرشێن ده‌رڤه‌ مه‌ گه‌له‌ك لاواز دكه‌ت و د دپلۆماسیا ده‌رڤه‌ دا چ جددییه‌ت بۆ مه‌ ناهێلیت. ئه‌م دیسا بزڤرن سه‌ر هێلێن سۆر یێن نه‌ته‌وى، به‌لكى ژى بنگه‌ها دانینا سیسته‌مێ دێ ب دیاركرنا هێلێن سۆر بهێته‌ دانین و ب دانینا ده‌ستوورێ ژى سیسته‌مێ برێڤه‌برنێ ده‌ركه‌ڤیته‌ هۆلێ و ئه‌ڤ یه‌ك ناڤێ ده‌وله‌تا مه‌ ئانكۆ هه‌رێما دیار بكه‌ت كا ئه‌م ده‌وله‌ته‌كا كۆمارینه‌، دیمۆكراتیكن، سۆسیالیست یان ئاشیره‌تگه‌رى نه‌. یانى وه‌ك مه‌ ده‌ستپێكێ دیاركر سیسته‌ما هه‌رى خراب ژ بێ سیسته‌مى باشتره‌ و هیچ نه‌بیت دێ ئاوایێ برێڤه‌ برنێ و ده‌ستووره‌كا وێ یا بنگه‌هین هه‌بیت. گه‌له‌ك هه‌رێم هه‌نه‌ به‌ریا بریارا ده‌وله‌تبوونێ بده‌ن بۆ خوه‌ ده‌ستووره‌كا گشتى و سیسته‌مه‌كا برێڤه‌برنێ دیار دكه‌ن و ده‌ما دبه‌ن ده‌وله‌ت هه‌موو بنه‌مایێن وێ یێن سیاسى، ئابوورى، جڤاكى، سه‌رباز، په‌روه‌رده‌هى، ته‌ندورستى ئاماده‌نه‌، وه‌ك نموونه‌ هه‌رێما كاتالۆنیا، هه‌رێما باسك، كۆسۆڤۆ، شانسته‌یله‌ر و سۆدانا باشور و هتد. لێ ئه‌م ژ سالا ١٩٩١ ڤه‌ وه‌ك هه‌رێم حه‌تا وه‌ك ده‌وله‌ته‌ك ب سه‌رێ خوه‌نه‌ لێ ئه‌م ژ بلى دروستكرنا خالێن سه‌رى یێن هه‌رێمبوون و ده‌وله‌تبوونێ ئه‌م ب هه‌موو كاران را مژیلبوونه‌ و بۆ ڤێ یه‌كێ ژى مه‌ د درێژیا ٢٥ سالێن بوورى دا تشته‌كا ل به‌ر ده‌ست نینه‌. ها ته‌مام ئه‌م تێگهیشتن ژ ١٩٩٢ حه‌تا ١٩٩٨ ئه‌م ب شه‌رێ براكوژى ئانكۆ خوه‌كوژى را مژوول بوون. لێ پشتى سالا ٢٠٠٣ ڤه‌ و نه‌مانا رژیما سه‌دام حه‌تا نها ئه‌ڤ ١٣ سالن ب سه‌ر ده‌ربازبوونه‌ و د ناڤا ڤان ١٣ سالان دا ژى دیسا مه‌ تشته‌كى خومالى چێنه‌كریه‌ و د ره‌وشا نها یا كو ئه‌م دبێژن ئه‌مێ ده‌وله‌تا خوه‌ راگه‌هینن ژى تشته‌ك ل به‌ر ده‌ستێ مه‌ نینه‌ كو ئه‌م ل سه‌ر وێ برێڤه‌ بچن. ب سایا سیسته‌ما مه‌ یا به‌نیشت ئانكۆ سیسته‌ما بێ سیسته‌م حه‌تا نها ژى ئه‌م نه‌شێن یه‌ك به‌رهه‌مێن خومالى دروست بكه‌ن و خوه‌ندنا مه‌ حه‌تا نها ژى بێ سه‌روبه‌ره‌ و دو ئیداره‌ى نه‌ ب فه‌رمى بیت ژى به‌رده‌وام دكه‌ت و ئیدارا سوله‌یمانیێ ژى د ناڤا خوه‌ دا بوویه‌ دو ئیدارێن دى و هێشتا هزرا عیراقیبوون زاله‌، ئه‌ڤجا ب ڤى حالێ خوه‌ گه‌لۆ دێ كى پشته‌ڤانى ل ده‌وله‌تبوونا مه‌ بكه‌ت؟ گه‌لۆ حه‌تا نها ژى د په‌یوه‌ندیێن ده‌رڤه‌ دا بنه‌ما سیاسه‌تا مه‌ چیه‌ كى دزانیت؟ ها هه‌كه‌ هزرا مه‌ ئه‌و بیت كۆ ده‌وله‌تا هه‌رى خراب ژى ژ بێ ده‌وله‌تبونێ باشتره‌ وێ ده‌مێ ئه‌و تشته‌كى دییه‌ و حسابه‌كا دییه‌. د قۆناغا نها دا ده‌ستپێكرنا دیالۆگان ل گه‌ل هه‌موو پارت و ئالیێن سیاسى ژ ئالیێ پارتا دیمۆكراتا كوردستانێ ڤه‌ پێنگاڤه‌كا گه‌له‌ك ئه‌ره‌نیه‌ و ئه‌نجاما باش یا ڤان هه‌ڤدیتنان دێ باندۆره‌كا گه‌له‌ك باش ل پاشه‌رۆژا هه‌رێما كوردستانێ ژى بكه‌ت. وه‌سا كو دێ مه‌ ل به‌رچاڤێن جیهانا ده‌رڤه‌ به‌رزتر بكه‌ت و هنده‌كى دى داخوازێن مه‌ ب رژدى وه‌ربگرن.