BBC: ئیرانێ هندەک ژ داخوازیێن ئەمریکا قەبوول کرینە
بی بی سی فارسی د راپۆرتەکێ دا ئاماژە ب هندێ کریە، د ئەنجاما دانوستاندنێن نهێنی یێن د ناڤبەرا ئیرانێ و ئەمریکا دا، ئەمریکا بریار دایە گۆژمەک ژ وی پارێ ئیرانێ یێن د هندەک بانکێن وەلاتێن جودا دانە بۆ ئیرانێ ڤەگەرینیت و ل هەمبەر دا ئیران ژی دێ هندەک گرتیێن ئەمریکا ئازاد کەت و هەروەسا ئیرانێ سۆز ژی دایە ئەمریکا بابەتێ دەولەمەندکرنا یۆرانیۆمێ ژی ب رێژەیا ٦٠٪ کێم کەت و نها دانوستاندنێن هەر دو وەلاتان ب رێیا وەلاتێ عومانێ بەردەوام دکەن.
د ڤێ دەربارێ دا د. حەسەن فەتحی بسپۆرێ کاروبارێن ئیرانێ ژی دیار کریە، ئیران د قەیرانەکا گەلەک مەزن یا ئابووری دایە، هەروەسا دهێتە پێشبینیکرن جارەکا دی وەلاتی ل ئیرانێ ل دژی رەوشا خراب یا ژیانێ دەست ب خوەنیشادانان بکەن، ل ئالیێ دی رۆژ ب رۆژێ پارێ ئیرانێ ل هەمبەر دۆلاری بهایێ خوە ژ دەست ددەت و ئەوێ یەکێ ژی کاریگەریە ل ژیانا رۆژانە یا وەلاتیان کریە، دەولەتێ چو پرۆژە بۆ باشکرنا ژیانا خەلکی نینە، نها ئیرانێ دڤێت هندەک پارەیێن خوە یێن بلۆک کری ئازاد بکەت دا بشێت رەوشا ئابووری باش بکەت، لێ ئەزموونێن بەری چەند سالان نیشا ددەن بەرپرسێن ئیرانێ وی پارەی بۆ باشترکرنا رەوشا ژیانا وەلاتیان بکار نائینن، بەلکو دێ دەنە هێزێن چەکدارێن ل ئیراقێ، لوبنانێ و وەلاتێن دی دا بشێن ئالۆزیان بۆ ئەمریکا و نەیارێن خوە دروست بکەن، ژ بەر هندێ ژی بابەتێ نها د ناڤبەرا ئەمریکا و ئیرانێ دا چو کاریگەریا ل سەر باشترکرنا رەوشا ژیانا وەلاتیان ل ئیرانێ ناکەت و دێ رەوشا ناڤخوەیی یا ئیرانێ پتر ئالۆز بیت، چونکی باوەریا وەلاتیان ب سیاسەتا نها یا بەرپرسێن ئیرانێ نەمایە.
