ئەڤرۆ نیوز ، زنار تۆڤی:

ئەڤرۆ چارشەمبی 19 ئیلۆنا 2018 سۆپایێ تورکیا دەڤەرا کانی ماسێ یا سەر ب قەزا ئامێدیێ ڤە تۆپ باراکریە و وەلاتیەکێ گوندێ دوورێ ب سڤکی برینداربوویە.

سەربەست سەبری ئاکرەیی رێڤەبەرێ ناحیا کانی ماسێ بۆ ئەڤرۆ نیوز دیارکر: ئەڤرۆ چارشەمبی هێزێن پەکەکێ تەقە ل رەبیێن سۆپایێ تورکیا یێن ل سەر سنۆرێ تورکیا و هەرێما کوردستانێ کرینە ل ناحیا کانی ماسێ و پاشی شەر دناڤبەرا پەکەکێ و سۆپایێ تورکیا دا پەیدابوویە و لدووڤدا سۆپایێ تورکیا دەڤەرا کانی ماسێ تۆپ بارانکریە و ژ ئەنجامێ وێ تۆپ بارانێ توپەکا لەشکەرێ تورکیا نێزیکێ 100 مەتران نێزیکی مالێن وەلاتیێن گوندێ دوورێ کەفتیە ئاگر بەردایە دورمانێن گوندی، ناڤهاتی گۆت ژی:  ژ ئەنجامێ وێ چەندێ وەلاتیەکێ مەسیحی ب ناڤێ زادوق ئەسنیێل کو خەلکێ گوندێ دوورێ ب سڤکی بریندار بوویە و وێ تۆپ بارانێ ترسەکا مەزن ل دەف خەلکێ دوورێ و گوندێن دەوروبەر پەیداکریە.

ئه‌ڤرۆ نيوز:

ژ بەر دانووستاندنا ل گەل کۆمپانیایەکە فرۆکەڤانی یا ئیرانێ، کو ناڤێ وی د لیستەیا ‏جەزایێن ئەمریکایێ دا بوو، وەزارەتا خەزینەیا ئەمریکایێ کۆمپانیایەکە تایلاندێ جەزا ‏کر.

وەزارەتا خەزینەیا ئەمریکایێ ب داخویانیەکێ ئەشکەرە کر، کو ژ بەر کارکرنا ل گەل ‏کۆمپانیایا ئیرانی یا ب ناڤێ ھێلا ماھان، کۆمپانیایەکە ب بنگەھ تایلاندی ھاتیە ‏جەزاکرن.‏

د داخویانیێ دە تێ گۆتن، کو ھێلا ماھان یا ئیرانێ ژ دەستپێکا شەرێ سووریێ ڤە چەک و ‏لەشکەران ژ بۆ ئەسەد ڤەدگوھەزە و ئالیکاری ددە پێشخستنا کریارێن تەرۆریستی یێن ل ‏ھەرێمێ.ل گۆری داخویانیێ چەندین جار ئەمریکایێ ھشیاری دایە کۆمپانیایا تایلاندی لێ ‏وێ کۆمپانیایێ ئەڤ ھشیاری پشتگوە خستنە.‏

ھەروھا جارەکە دن ھشیاریێ ددە وێ کۆمپانیایێ داکو ئێدی ب ناڤێ کۆمپانیا فرۆکەڤانی ‏یا ماھان کەرەستەیان بار نەکە و قازانجێ ژ وان وەرنەگرە.‏

وەزارەتا خەزینە یا ئەمریکایێ دبێژە: “ژ دەستپێکا شەرێ سووریێ ڤە ژ بۆ ھاندانا ‏حوکوومەتا ئەسەد کۆمپانیایا فرۆکەڤانی یا ماھان ب بەردەوامی چەکدار و کەرەستەیان ‏ڤەدگوھەزە سووریێ.”ئەمریکا حوکوومەتا ئەسەد ب کوشتنا ب ھەزاران کەسێن سووری و ‏کۆمکوژیان تۆمەتبار دکە.‏

ل گۆری زانیاریێن وەزارەتا خەزینە یا ئەمریکایێ، ژ ئیلۆنا 2017ێ ڤە ھێلا ماھان ‏‏170 گەشتێن ئەسمانی ژ بۆ سووریێ ئەنجام دانە.ھێزەر ناوێرت دەستنیشان کر، کو ‏ھەلوەستا وەزارەتا خەزینایا ئەمریکایێ ژ بۆ ھندێ یە کو چوو کۆمپانیایەکە دن ئێ ‏فرۆکەڤانیێ مفای ژ تیرۆرێ وەرنەگرە.‏

ئه‌ڤرۆ نيوز:

تیمێن شاره‌داریا سۆرانێ هه‌لمه‌تا ژێڤه‌كرنا وان وێنه‌ و درووشمێن پارتی و نامزه‌دێن كو نه‌ ل گۆر رێنماییێن كۆمیسیۆنا بلند یا سه‌ربخوه‌ یا هه‌لبژارتن و راپرسیێ نه‌ و دبن زێده‌گاڤی ل سه‌ر ملكێ گشتی دا ده‌ستپێ كرن.

رێڤه‌به‌ریا شاره‌داریا سۆرانێ ب داخویانیه‌كێ راگه‌هاند كو ئاگاهداری دانه‌ هه‌موو پارتی, ئالیێن سیاسی و نامزه‌دان كو پێبه‌ند بن ب رێنماییێن پرۆپاگاندایا كۆمیسیۆنێ و وێنه‌ و پۆسته‌ران ل جیهێن كو رێ نایێ داین كو ل وان ده‌ڤه‌ران ڤه‌ بێن ڤه‌كرن، هشیار بن.

هه‌رواها هات گۆتن, كو مخابن زێده‌گاڤی ل هه‌لاویستنا وێنه‌ و درووشمێن پارتی و نامزه‌دان ده‌ ل ناڤه‌ندا باژارێ سۆرانێ و شه‌قامێن گشتی هه‌بوونه‌ و تیمێن شاره‌داریا سۆرانێ هه‌لمه‌تا ژێڤه‌كرنا وان وێنه‌ و درووشمێن هه‌لبژارتنێ یێن پارتی و نامزه‌دان دایه‌ ده‌ستپێ كرن.

ئه‌ڤرۆ نيوز:

ژ به‌ر باهۆزا فلۆررینسا‌ كو رۆژا ئه‌ینێ گه‌هشتبوو قه‌راخێن كارۆلینا، ل ئەیاله‌تێن باكوور و باشوورێ كارۆلینا 11 كه‌سان جانێ خوه‌ ژ ده‌ست دا.

سه‌رۆكێ ئه‌مریكایێ دۆنالد تره‌مپ كارۆلینا باكوور وه‌كه‌ ده‌ڤه‌را كاره‌ساتێ راگه‌هاند بوو و تێ راگهاندن دبه‌ هه‌فتیا بێ سه‌ردانا وێ ئەیاله‌تێ بكه‌.

ل هه‌ردو ئەیاله‌تێن كارۆلینا زێده‌تری ملیۆنه‌ك كه‌س بێ كاره‌ب مانه‌. ژ به‌ر باهۆزا زێده‌تری دو هه‌زار گه‌شتێن ئەسمانی هاتن به‌تالكرن.

تێ چاڤه‌رێكرن ئەڤ باهۆزا ‌ باندۆرێ ل سه‌ر زێده‌تری 10 ملیۆن كه‌سان بكه‌ و ببه‌ سه‌ده‌ما زیانێن مادی ب قاسی170 ملیار دۆلاران

ئه‌ڤرۆ نيوز

ھەلمەتا گرتنا خوەپێشاندەران ل پارێزگەھا بەسرە ل سەر شەوتاندنا کونسولخانەیا ‏کۆمارا ئیسلامی یا ئیرانێ ل وێ پارێزگەھێ د خوەپێشاندانێن ڤێ داویێ ژبۆ باشترکرنا ‏رەوشا خزمەتگوزاریێ دەستپێکر.

کەنالا سکای نیوز عەرەبیە ل سەر زارێ ئەندامەکی ژ ‏ھەڤپەیمانیا سائیرون بەلاڤ کریە کو ھێزێن ئەمنی نیزیکی 30 کەسان ژ خوەپێشاندەرێن ‏بەسرە گرتنە و ژبۆ جھەکی نەدیار برنە.‏

ھەروەھا چاڤکانیێن خوەجھی ئەشکەرە کرنە کو ھژمارەک ژ وان خوەپێشاندەرێن ھاتنە ‏گرتن تاوانبارن ب شەوتاندنا کونسولخانەیا ئیرانێ ل پارێزگەھا بەسرە د ‏خوەپێشاندانێن حەفتێ ڤێ مەھێ دە.‏

ل گۆری رێخکەرێن خوەپێشاندانان ل باژارێ بەسرە کو مەدیایێن ئیرانی چەند لیست ب ‏ناڤێ وان خوەپێشاندەرێن ڤێ داویێ بەلاڤ کرنە کو ب تۆمەتا ھەڤکاریا وان دگەل ‏بالیۆزخانەیا ئەمەریکا ل عێراقێ ژبۆ شەوتاندنا کونسولخانەیا ئیرانێ ل بەسرە.‏

د داوی خوەپێشاندانا خەلکێ پارێزگەھا بەسرە د حەفتێ ڤێ مەھێ دە کو ژبۆ پەیداکرنا ‏دەرفەتێن کار و خزمەتگوزاریێن سەرەکە دەردکەڤن ب تایبەت ئاڤا ڤەخوارنێ و د ئەنجاما ‏توندوتیژیا ھێزێن ئەمنی بەرامبەر خوەپێشاندەران، ھەژمارەک خوەپێشاندەر ئاڤێتن سەر ‏ئاڤاھیا کونسولخانەیا ئیرانێ ل بەسرە و شەوتاندن.‏

ئه‌ڤرۆ نيوز:

ئیسرائیلێ ب مووشه‌كان فرۆكخانه‌یا شامێ یا ناڤده‌وله‌تی ئارمانج گرت، سووریه‌ ژی دبێژه‌ كو وێ هه‌ژماره‌ك ژ مووشه‌كان رووخاندنه‌.

روانگه‌ها سووری یا مافێن مرۆڤان به‌لاڤ كر, شه‌ڤا بووری ده‌مژمێر 22:00 هه‌ژماره‌ك ژ مووشه‌كان كو تێ پێشبینیكرن كو ژ ئیسرایلێ ئاڤێتبن ل نێزیكی فرۆكخانه‌یا شامێ یا ناڤده‌وله‌تی كه‌تنێ, د ئەنجامێ زیانێن مادی یێن مه‌زن بوون.

ژ ئالیێ خوه‌ ئاژانسا “سانا” ئا سووری یا فه‌رمی به‌لاڤ كر, ئیسرایلێ ئێریشی فرۆكخانه‌یا شامێ یا ناڤده‌وله‌تی كر، لێ سیسته‌مێن وێ یێن به‌ره‌ڤانیا ئەسمانی كارین هه‌ژماره‌ك ژ مووشه‌كێن ئیسرایلی ژناڤ ببن. رۆژا 4ێ ڤێ مه‌هێ ژی فرۆكه‌یێن شه‌ر یێن ئیسرایلێ ده‌ڤه‌را د ناڤبه‌را باژارۆكێ مسیاف و وادی یۆن یا پارێزگه‌ها حه‌مایێ و باژارێ بانیاسێ ل پارێزگه‌ها ته‌رتووسێ بۆمبه‌باران كرن, كو پێگه‌هێن هێزێن ئیرانی ل ده‌ڤه‌رێ هه‌نه‌.

ده‌مه‌كە فرۆكه‌یێن ئیسرایلی پێگه‌هێن له‌شكه‌ری ل سووریێ بۆمبه‌باران دكه‌ و دبێژه‌ ئەو ناڤه‌ندێن ئیرانی یێن ل سووریێ ئارمانج دكه‌. ئارتێشا ئیسرائیلی به‌ری چه‌ند رۆژان راگه‌هاند كو فرۆكه‌یێن وێ د ناڤا دو سالێن ده‌رباسبوویی ده‌، 200 جاری ئێریشی بنگه‌هێن ئیرانی ل ناڤ سووریێ كرنه‌.

نێچیرڤان بارزانی سەرۆک وەزیرێن ھەرێما کوردستانێ تەڤی “جۆن وێڵکس” باڵیۆزێ ‏بەریتانیا ل ئیراقێ و شاندا ‌پێرە جڤیا.

د ڤێ جڤینێ دە، داوی پێشھات و دانوستاندنێن ‏پێک ئانینا کابینەیا نوو یا حوکومەتا ئیراقێ گوتوبێژ کرن. د ڤێ دەربارێ دە شاندا ‏مێھڤان تەکەز لسەر پێویستیا رۆلا ھەرێما کوردستانێ د پێکئانین و ھەڤبەشی د بریارێن ‏حوکومەتا بێ و چارەسەرکرنا پرسگرێکێن ھەولێرێ و بەغدا ب رێیا دیالۆگێ رە کر و ‏دەست خوەشی ل دەستپێشخەریێن سەرۆک وەزیران نێچیرڤان بارزانی کرن.

شاندا مێھڤان ‏کەیفخوەشیا خوە، ژبۆ ئەنجامدانا ھەلبژارتنێن ھەرێمێ د دەمێ خوە یێ دیارکری دە ‏نیشان دا و ھیڤیا ب رێڤەچوونا ھەلبژارتنەکە سەرکەفتی ژبۆ ھەرێما کوردستانێ خوەست.

ژبال خوە ‌ڤە نێچیرڤان بارزانی ئاماژە ب گفتگویێن ھێزێن سیاسی یێن ھەرێما کوردستانێ ‏و ئیراقێ کرن. تەکەز ل سەر یەک دەنگی و یەک ریزیا فراکسیۆنێن کوردستانی و بھێزیا ‏پێگەیا ھەرێما کوردستانێ ل بەغدا کرن و بەشداری و رۆلا ئەرێنی یا ھەرێما کوردستانێ ‏د پەرلەمێنتۆیا حوکومەتا بێت یا ئیراقێ دە ژبۆ چارەسەرکرنا پرسگرێکێن ئیراقێ و یێن ‏ھەولێرێ و بەغدایێ ب گرنگ وەسف کرن. و کەیفخوەشیا خوە ژبۆ بەشداری کرنا پرانیا ‏ھێزێن سیاسی یێن ھەرێما کوردستانێ ژبۆ پەرلەمێنتۆیا کوردستانێ دیار کر و ئاماژە ب ‏دەستپیکرنا بانگەشەیا ھەلبژارتنێ کر، کو ھەتا نھا ب رەنگەکێ باش ب رێڤەدچە و ھیڤی ‏ژی خوەست کو پشتی ھەلبژارتنان حوکومەتەکە وەھا بێ پێک ئانین، ئەو پلانا ژبۆ ‏رێفراندۆما ھەرێمێ دانابو جیبجی بکەن.

گوتوبێژ کرنا رەوشا دەڤەرێ و د واری ئەولەھی ‏و سیاسی دە ئالیەکێ دن یێ ڤێ ھەڤدیتنێ بوو.‏

ئه‌ڤرۆ نيوز:

بالیۆزخانەیا ئیران ل بەغدایێ, دوبارە کونسولخانەیا وەلاتێ خوە ل باژارێ بەسرا یێ ‏باشوورێ ئیرقێ ڤەکر، کو بەری چەند رۆژان ژ ئالیێ خوەپێشاندەران ڤە ھاتبوو ‏شەوتاندن‎.‎‏

بالیۆزێ ئیرانێ ل ئیراقێ (ئیرەج مەسجدی), د دەما ڤەکرنا کونسولخانەیا ‏وەلاتێ خوە دە ل بەسرایێ گۆت:.ئێریشا ل سەر کونسولخانەیا مە باندۆرە ل پێوەندیێن د ‏ناڤبەرا ھەردو وەلاتان دە ناکە، ژ بەر کو دوژمنێن مە یێن ھەڤبەش ھەنە و دخوازن ‏پێوەندیێن مە تێک بدن، ئەم ناخوازن کونسولخانەیا مە، رۆژەکێ ژی، ژ پێشکێشکرنا ‏خزمەتکاریان راوەستە‏‎.‎

ئیرەج مەسجدی دیار کر، کو ئەو چوو ئالیەکی دەستنیشانکری ب ‏شەوتاندنا کونسولخانەیێ ئیرانی ل بەسرا تۆمەتبار ناکن، لێ ژ ئەرکێ بەرپرسێن ئیراقێ ‏یە ئەو کەسێن ئێریش کرنە دەستنیشان بکن, ئەوێن ئێریش کرنە چوو پێوەندیا وان ب ‏گەلێ ئیراقێ یێ دۆستێ ئیرانێ رە توونەیە‏‎.‎

مەسجدی زەلال کر, کو چوو پێوەندیا ئیرانێ ‏ب نەبوونا ئاڤێرە ل بەسرا تنە یە و گۆت: ناڤچە ب گشتی راستی کریزا زوھابوونێ ھاتیە ‏و ل ناڤچەیێن باشوورێ ئیرانێ ژی ھەمان کێشە ھەیە.

ژ ئالیێ خوە ڤە، پارێزگارێ بەسرا ‏‏(ئەسعەد ئیدانی) راگەھاند, کو ڤەکرنا کونسولخانەیا ئیرانێ ب ڤی ئاوایێ لەزگین، ‏نیشانا پێوەندیێن بھێز یێن د ناڤبەرا ئیراق و ئیرانێ دە یە.‏

وه‌زیرێ ده‌رڤه‌ یێ سووریێ وه‌لید موه‌لیم راگه‌هاند هه‌گه‌ر ده‌ستوه‌ردانێن ده‌رڤه‌ د ناڤ كارووبارێن سووریێ ده‌ بێن راوه‌ستاندن، ئەو ئاماده‌نه‌ ل گه‌ل دژبه‌ریێ گۆتووبێژان بكن.

وه‌لید موه‌لیم د هه‌ڤپه‌یڤینه‌كێ ده‌ ب رۆژنامه‌یه‌كه‌ رووسی ره‌ گۆت: پرسگرێكا مه‌ نه‌ ب دژبه‌ریا سووری ب خوه‌ ره‌یه‌، لێ ب ئالیان ره‌ یه‌, كو دژبه‌رێ برێڤه‌ دبن.

موه‌لیم دیار كر كو ل سووریا دژبه‌ریه‌كه‌ هه‌ڤگرتی تنه‌ یه‌ و هه‌ر كۆمه‌ك هه‌لوه‌ست و داخوازێن وێ ژ یێن كۆمه‌كه‌ دن جودا نه‌.ناڤهاتی ته‌كه‌ز كر, كو حكوومه‌تا سووریێ ئاماده‌ یه‌ ل گه‌ل دژبه‌ریێ دیالۆگێ بكه‌، لێ ب مه‌رجێ كو ده‌ستوه‌ردانێن ده‌رڤه‌ د ناڤ سووریێ ده‌ بێن راوه‌ستاندن.