ئەڤرۆ نیوز، عەلی حاجی:

ب گورەی ژێدەرەکێ تایبەت یێ ئەڤرۆ نیوز نێزیکی چار مامۆستاێن ئایینی ل زاخۆ پشتی خانەنشینکرنێ ژ لایێ حکومەتا ھەرێما کوردستانێ ڤە، ھێشتا ل سەر کارێ خوەیێ پێشنڤێژ و گۆتاربێژیێ بەردەوامن.

ملا سەعید عەبدولرەحمان، رێڤەبەرێ ئەوقاف و کاروبارێن ئایینی ل زاخۆ ئەڤ چەندە بۆ ئەڤرۆ نیوز پشتڕاست کر و گۆت: “ژ بەر کێمیا میلاکی و نەبوونا دامەزراندنێ چەندین گۆتارخوین و پێشنڤێژ و بانگھەلدێر پشتی خانەنشینکرنێ ژی ل سەر کارێ خوە بەردەوامن، مە ل وەزارەتا ئەوقاف و کاروبارێن ئایینی ھەڤبەستەک بۆ وان چار مامۆستاێن ئایینی دروستکریە، بەلێ پڕانیا کەسێن دیتر وەکو خێر ب خوەبەخشی کار دکەن، ھەر ژ ھەیڤا پێنج ل سالا ۲۰۱۳ ھەتا نوکە ئێک دامەزراندن ل سەر میلاکێ رێڤەبەریا مە نەبوویە، ڤێ چەندێ ژی وەکریە ڤالاھیەک د میلاکێ مە دا دروست ببیت”.

ناڤھاتی گۆتژی: “مە ل سنوورێ قەزا زاخۆ ڤالاھیەکا مەزن د ناڤ میلاکێ مامۆستاێن ئایینی و گۆتارخوین و بانگھەلدێران دا ل سنوورێ قەزا زاخۆ ھەیە، ل زێدەتری ٤۰ مزگەفتان چو کەسەک نینە تێدا کار بکەت چو وەکو گرێبەست چو ژی وەکو دامەزراندن چو وەکو گۆتارخوین و چو وەکو بانگھەلدێر، ئەگەر ۱۰۰ گۆتارخوین ھەبن ب زۆری تێرا مزگەفتێن مە ھەبن، سەرەرای ھندێ ژی سالانە مزگەفتێن نوو دھێنە دروستکرن و دامەزراندن و ھەتا گرێبەستێن نوو ژی نینن، ئەم نەشێین داخوازا چو دامەزراندنێ ژی بکەین، ژ بەرکو دەرگەھێ وێ نەھاتیە ڤەکرن”.

ئەڤرۆ نیوز، رێوار مزیری:

بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ دیار کر کو د روودانەکا هاتنوچوونێ دا ل شەڤە 2 ل سەر 3/7/2019 ل سەر جادا سێمێل بۆ کۆمەلگەها خانکێ دو کەسان گیانێ خۆ ژ دەست دا.

موقەدمێ مافپەروەر ئازاد تەها، بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز ئاشکرا کر ژ ئەگەرێ پەیدابوونا روودانەکا هاتنووچوونێ دناڤبەرا دو ترۆمبێلان دا ژ جۆرێن (BMW تایبەت) و (پیک ئاب دێر بارهەلگر) ل سەر جادا سێمێل بۆ کۆمەلگەها خانکێ دو کەسان گیانێ خوە ژ دەست دا، هەروەسا زیانێن ماددی یێن مەزن ژی ب هەر دو ترۆمبێلان کەتن.

ئەڤرۆ نیوز، عەلی حاجی:

پڕانیا وەلاتیێن تاخێن زاخۆ گازندان ژ رانەکرنا بەرمایکێن بەر مالێن خوە دکەن و پڕاینا وان تاخان ژی بەرمایک بەرەڤ زێدەبوونێ ڤە چووینە و ھەتا نوکە چو کەسەکێ ئەو بەرمایک رانەکرینە.

نزار عیسا وەلاتیەکێ دەڤەرا زاخۆیە بۆ ئەڤرۆ نیوز ئاشکرا کر، ل تاخێن تلکەبەر و فرقێ ھەتا سەر جاددا گشتی ژی و گۆت: “ئەڤە زێدەتری ھەشت رۆژایە ئەو بەرمایکە نەھاتینە راکرن ژ لایێ کۆپارنیا پاقژکەرڤە و ل ھندەک مالان بەرمایکێن وان ھند زێدە بووینە ئێدی نزانن دێ چو ل بەرمایکێن خوە کەن، ھەکە چارەسەریەکا زوو بۆ نەھێتە دیتن ئەڤ مالە دێ د ڤ بەرمایکان دا مینن، لەورا داخواز دکەین بلەز چارەک ل ڤێ ئاریشێ بھێتە کرن و ئەم ژ بێھنێ و بەرمایکان رزگار ببین”.

ژێدەرەکی ژ کۆمپانیا ھیزل یا ب پاقژکرنا باژێرێ زاخۆ رادبیت کو نەڤیا ناڤێ خوە ئاشکرا بکەت بۆ ئەڤرۆ نیوز گۆت: “ئەڤە ماوەیێ دو رۆژایە ل زاخۆ دەست ب کار بین و ئەو بەرمایکە یێ ڤان دو رۆژا نینە و یێ کەڤنە و کۆمپانیا بەری نوکە ب کارێ پاقژکرنا باژێری رابووی بەری ژڤانێ کاری ب دووماھی بھێت ب چەند رۆژەکان ترۆمبێلێن خوە ڤەکێشاینە و کار نەدکر ژ بەر ڤێ چەندێ ئەڤ ئاریشە د ناڤ باژێری دا سەرھەلدایە، بەلێ ترۆمبێلێن مە ئەڤە ماوەیێ دو رۆژایە بەردەوام کار دکەن ھەتا دەمژمێر ئێکی شەڤێ، ئەم خەلکێ خوە پشتڕاست دکەین د دەمەکێ نێزیک دا ئەو بەرمایکێ مایی ژی دێ ھێتەراکرن، ل دووڤ پلانا مە یا نوو ھاتیە دارێشتن ھەر دو رۆژان جارەکێ دێ بەرمایکێن وەلاتیان ژ لایێ ترۆمبێلێن مەڤە ھێنە راکرن”.

وی ژێدەری گۆتژی: “ل دووڤ وێ ھەڤبەستا ھاتیە ئیمزاکرن د ناڤبەرا رێڤەبەریا گشتی یا باژێرڤانیان ل پارێزگەھا دھۆکێ و کۆمپانیا ھیزل، کۆمپانیا ناڤبری دێ ب کارێ پاقژکرنا باژێری رابیت ل بەرامبەر زێدەتری نەە ملیار دیناران بۆ سالانە”.