ئەڤرۆ نیوز، عەلی حاجی:

پشتی زێدەتری ھەیڤەکێ چار کەس د ناڤ خابیری دا خەندقین، ھەتا نوکە ب تنێ تەرمێ کەسەکی ھاتیە دیتن، بەرەڤانیا باژێری ژی ل زاخۆ ھەوەکا لێگەڕیانا گشتی دەست پێکر بۆ ڤەدیتنا تەرمێ وان سێ وەلاتیێن کەڤتینە د خابیری دا و ھەتا نوکە تەرمێ وان نەھاتیە دیتن.

رائیدێ مافپەروەر بێوار عەبدولعەزیز، بەرپرسێ راگەھاندنابەرەڤانیا باژێری ل پارێزگەھا دھۆکێ ل دۆر ڤێ چەندێ بۆ ئەڤرۆ نیوز ئاشکرا کر، زێدەتری ھەیڤەکێ یە چار کەس د ناڤ خابیری دا خەندقینە و کەسەک ژ وان زارۆیەکێ باکوورێ کوردستانێ یە ل گوندێ بێرمانێ ل وەلاتێ تورکیا خەندقی یە و دو کەسێن دیتر ژی خەلکێ زاخۆنە و گۆت: “ژ بەر ڤێ چەندێ مە ھەوەکا مەزن یا لێگەڕیانێ دەست پێکریە، چار تیمێن مە ل سنوورێ پارێزگەھا دھۆکێ نوکە کارێ لێگەڕیانێ د ناڤ خابیرێ زاخۆ دا دکەن؛ ب درێژاھیا ١٥ کێلۆمەتران و زێدەباری وێ چەندێ ژی تیمەکا فڕۆکەڤانان ژی پشکدارە د ڤێ ھەوێ دا، د گەل دا ھەموو فەرمانبەرێن مە ب پیادە ھاریکارن د گەل دا بۆ ڤەدیتنا تەرمێ وان سێ کەسان”.

ناڤھاتی ئاماژە ب وێ چەندێ ژی کر کو ل گورەی پێشبینیان ئەو زارۆیێ ل گوندێ بێرمانێ خەندقی و ئاڤا خبیری ئەو تەرمە ژ تورکیا ئینایە ناڤ ئاخا ھەرێما کوردستانێ و ژ بەر ڤێ چەندێ ژی لێگەڕیان ل سەر تەرمێ وی ژی بەردەوامە ھەتا کو تەرمێ وان بھێتە دیتن، ھەردیسا ژی ل حەفتیا بۆری تەرمێ کەسەکێ دیتر ژی بناڤێ (کاروان) ھاتبوو دیتن و د نوکە دا ب تنێ تەرمێ سێ کەسان نەھاتیە دیتن.

ئەڤرۆ نیوز، مەحمود نھێلی:

رێڤەبەرێ چاندنا ئامێدیێ بۆ ئەڤرۆ نیوز دیا کر کو ھژمارەکا ئەندازیارێن چاندنێ یێن پارێزگەھا دھۆکێ نوکە ل ئەلمانیانە بۆ پشکداریکرنێ د خۆلەکا چاندنێ دا ل سەر چاوانیا بەرھەمئینانا دەرامەتی د ناڤ خانیێن شووشەی.

ئەندازیار ھەکار ئامێدی، رێڤەبەرێ چاندنا قەزا ئامێدیێ دیار ژی کر کو ئەڤ خۆلە ژ لایێ وەزارەتا چاندنێ یا حوکمەتا ئەلمانیا ب ھەڤکاریا رێکخراوا (GIZ) یا ئەلمانی ڤە ھاتیە ڤەکرن و تێدا چار ئەندازیارێن چاندنێ و مامۆستایەکێ زانینگەھا دھۆکێ تێدا پشکدارن و گۆت: “ئێک ژ وانا ئەندازیاران یێ دەڤەرا ئامێدیێ یە کو بەرپرسێ شیرەتکاریا چاندنا دێرەلۆکێ یە و دیار کریە کو وان مفایەکێ باش ژ ڤێ خۆلێ وەرگرتیە”.

ئەندازیار ھەکار ئامێدی ئاماژە ب وێ چەندێ ژی کر کو ئەڤ خۆلە بۆ دەمێ حەفتیەکی یا بەردەوام بوو و باوەرنامێن دەرچوونێ ژ لایێ جێگرا وەزیرا چاندنێ یا شتوتگار یا ئەلمانیا ل سەر پشکدارێن خۆلێ ھاتینە بەلاڤکرن و گۆت: “ئەم د وێ باوەریێ داینە کو دێ شێن ئەزموونا وەلاتێ ئەلمانیا د بیاڤێ چاندنێ دا ل وەلاتێ مە ژی بجھئینن و دێ شێن مفایەکێ باش گەھیننە جۆتیارێن مە ل دەڤەرێ”.

ئەڤرۆ نیوز، عەلی حاجی:

سەرۆکێ باژێرڤانیا زاخۆ بۆ ئەڤرۆ نیوز ئاشکرا کر، بڕیارە ل دەست پێکا ھەیڤا بھێت ل تاخێ کریستیانان ل زاخۆ دەست ب سەخبێریکرن و دروستکرنا پشکا مایی ژ پارکا وی تاخی بھێتەکرن و ئەو دکانێن نەقانوونی ھاتینە ئاڤاکرن ژی دێ ھێنە راکرن.

بژار مونیب، سەرۆکێ باژێرڤانیا قەزا زاخۆ خویا کر، ل تاخێ کریستیانان ل سالا ٢٠٠٣ پارکەک ژ لایێ باژێرڤانیا زاخۆ ھاتبوو دروستکرن، د گەل دا ژی پشکەکا دکانان ب نەیاسایی ل سەر جاددەیا سەرەکی ھاتبوونە دروستکرن و گۆت: “د نوکە دا مە دووماھی ئاگەھداری دایە خودانێن وان دکانان، ل دووماھیا ڤێ ھەیڤێ وان دکانان ڤالا بکەن، داکو دەست بکارێ وێ پشکا مایی ژ پارکێ ب کەین، ژ بەر کو ئەو پارکە د نەخشەی دا ل سەر رووبەرێ ١٥ ھزار مەترێن چارگوشە دھێتە دروستکرن، بەلێ وان دکانان ئەو نەخشە تێک دا بوو، لەورا د نوکە دا مە ل بەرە وێ پارکێ دروست بکەینەڤە”.

بژاری ئاماژە ب وێ چەندێ ژی کر کو ھەر چەندە ئەو پارکە دکەڤیتە تاخێ کریستیانان، بەلێ دڤێت خزمەتا وی تاخی بھێتە کرن و گۆت: “د دەمەکێ نێزیک دا دێ کار د دووماھی ئینانا وێ پارکێ دا کەین و دگەل دا ژی چەندین یاریێن زارۆیان ژی د ناڤ وێ پارکێ دا دێ ھێنە دانان، دیسا ل وێ جاددەیا دکان دکەڤنە سەر، ژ ئەگەرێ وان دکانان روۆانە چەندین روودانێن ترۆمبێلان دروست دبن، بەلێ پشتی ئەو پشکە دروست دبیت دێ روودان ژی ل سەر وێ جاددەیێ کێم بن و ئەو دکانە ئەگەربوون پار دیار نەبیت”.

ئەڤرۆ نیوز، نەوزاد ھلۆری:

ژ ئەگەرەکێ نەدیارە ئاگر بەربوویە چەند گوندێن سنوورێ ناحیا گرعەزێر یا سەر ب قەزا شنگالێ و ھەتا نوکە ژی نەھاتیە کونترولکرن، رێڤەبەرێ ناحیا گرعوزێر ژی بو ئەڤرۆ نیوز دیارکر کو ھەتا نوکە نێزیکێ ھزار خانیان ھاتینە سوتن.

جەلال خەلو، رێڤەبەرێ ناحیا گرعوزێر بو ئەڤرۆ نیوز گۆت: (ژئەگەرەکێ نەدیار ئاگر ب چەند گوندەکێن سنوورێ ناحیا گرعوزێر یا سەر ب قەزا شنگالێ کەفتیە و ھەتا نوکە ژی بەردەوامە و نەھاتیە کونترولکرن).

زێدەتر گۆت: (ژ ئەنجامێ ئەوی ئاگری، ئاگر گەھشتیە دناڤا گوندان دا و نێزیکێ ھزار خانیێن وەلاتیان ھاتینە سوتن، ئاگر نێزیکێ ھژمارەکا زور ژ خانیێن دن دبیت، ئەڤە زێدەباری وێ یەکێ کو ریژەیەکا زورا گەنمی ھاتیە سوتن و پوش و پاوان و ژینگەھا دەڤەرێ ژی ھەمی ھاتە سوتن و بەردەوامە ژ سوتنێ).

ناڤبری ھەلویستێ حوکمەتا عیراقێ شەمبزارکر کو ھەتا نوکە چو تیمەکا ڤەمراندنا ئاگری رەوانەیێ دەڤەرێ نەکرینە و زێدەتر گۆتک (پێدڤی یە جھێن شولەژێ ب زوترین دەم بگەھنە دەڤەرێ ئەگەر دێ زیانێن ئاگری گەلەک زێدەتر بو و بیتە ئەگەرێ ئاوارە بوونا ھژمارەکا زورا خەلکی، نوکە خەلک بزاڤێ دکەت ئاگری کونترول بکەت کو نەگەھیتە گوندێن وان بەلێ جھێ داخێ یە ل گوندێ خەرباتێ قەوالا و گرعوزێر ھژمارەکا زورا خانیان سوتن)

ئەڤرۆ نیوز، ئەمیر ئەترووشی:

ل کەمپا شاریا یا ئاوارێن شنگالێ پرتووکخانەک ھاتیە ڤەکرن و رۆژانە ھژمارەکا زۆرا خەلکی سەرەدانا وێ دکەن بۆ خواندنا پرتووکان، بزاڤ دھێنە کرن ھەمان پرتووکخانە ب شێوەکێ گەرۆک ل چەند کەمپ و دەڤەرێن دی بھێنە گێڕان و ڤەکرن.

خەلیل پوکو، بەرپرسێ پرتووکخانا کەمپا شاریا بۆ ئەڤرۆ نیوز خویا کر، خواندن ژێدەرێ رەوشەنبیریێ یە، پشتی داخوازیەکا زۆر ژ لایێ گەنجان ڤە ھاتیە کرن ل سەر ڤەکرنا پرتووکخانەکێ، ب پشتەڤانیا چەند سەنتەر و رێکخراوان پرتووکخانەک ھاتە ڤەکرن کو ھەموو جۆرێن پرتووکان وەک (سیاسی، قانوونی، رۆمان، ھۆنەری) ب زمانێن عەرەبی و کوردی و ئینگلیزی و لاتینی تێدا ھەنە، ھەروەسا دێ بزاڤێ کەین پرتووکخانێن گەرۆک ژی ل ناڤ کەمپان و دەڤەرێن دی ڤەکەین و بگێڕین، دا کو خەلکێ مە یێن حەزا خواندنێ ھەین ل چ دەڤەران بن مفای ژێ وەرگرن.

گۆتژی: “وەک ھەر تشتەکی دی یێ گرنگ خەلکێ مە پێدڤی ب خواندنا پرتووکان ھەیە، نە ب تنێ ئاواران، بەلکو گەنجێن جڤاکی ھەموو پتر بزاڤێ بکەن دەمێ خوە ب خواندنا پرتووکان ڤە ببۆرینن و نە ب تشتێن بێ مفا ڤە، دا کو ئاستێ وان یێ رەوشەنبیری پێش بکەڤیت و بھێز بکەڤیت”.

ئەڤرۆ نیوز، عەلی حاجی:

پشتی دەست ب سەر رێژەکا مێلاکا مریشکێ یا وەلاتێ تورکیا دا ل باژێرێ زاخۆ ھاتیە گرتن، بنگەھێ چاڤدێریا بازرگانی وێ مێلاکا دەست ب سەر دا ھاتیە گرتن دھاڤێژیتە د ناڤ خابیری دا ل سەنتەرێ باژێری.

جەگەر، بەرپرسێ بنگەھێ چاڤدێریا بازرگانی ل زاخۆ بۆ ئەڤرۆ نیوز ئاشکرا کر، پشتی وان دەست ب سەر ٧٠ کیلۆیێن مێلاکا مریشکێ یا وەلاتێ تورکیا دا گرتی و گۆت: “وەکو پشتەڤانیکرن ل بەرھەمێ ناڤخوەیی ئەو بەرھەمە ھاتیە قەدەغەکرن کو بھێتە د ناڤ ئاخا ھەرێما کوردستانێ دا، پشتی مە دەست ب سەردا گرتی، مە پەیوەندی ب لژنا ھەڤپشکا زاخۆ کر بۆ وێ چەندێ ب چ رەنگ سەرەدەریێ دگەل وێ مێلاکێ بکەین، وان ژی بۆ مە دیار کر، ئەم وێ مێلاکێ بھاڤێژینە د ناڤ ئاڤا خابیری دا، داکو ماسی مفای ژێ ببینن، لەورا مە ژی ھەمان پێنگاڤ ھاڤێژت و ئەو مێلاکە ھاڤێتە د ناڤ ئاڤا خابیرێ زاخۆ دا”.

گۆتژی: “ئەو مێلاکا دەست ب سەر دا ھاتیە گرتن، ب چو رەنگا یا دەم ب سەرڤەچووی نەبوو، ژ ئەگەرێ نەبوونا بەڕادان مە نەشیا وێ مێلاکێ د ناڤ عمبارێن خوە دا بھێلین، ژ بەر کو دا بھێن کەڤیتە وێ میلاکێ”.