ئەڤرۆ نیوز، عەلی حاجی:

ب ھەلکەفتا 43 سالیا شەھیدکرنا رێبەر مەلا حسێن کو ل 23/4/1976 ژ لایێ رژێما بەعسڤە ھاتبوو شەھیدکرن، لقێ ھەشت یێ پارتی ل زاخۆ رێورەسمەکێ رێزگرتنێ ل بنەمالا شەھیدێ ناڤبری بەرھەڤ کر.

شڤان شێخو، بەرپرسێ پشکا جەماوەری ل لقێ ھەشتێ پارتی دیموکراتی کوردستان بۆ ئەڤرۆ نیوز دیار کر، شەھید (رێبەر مەلا حسێن) شانەکا نھێنی د ناڤ سەنتەرێ باژێرێ زاخۆ دا ھەبوو و د ھەمان دەم دا پێشمەرگێ شۆڕەشا گولانێ ژی بوو و گۆت: “ژ بەر وێ خەباتا شەھیدێ ناڤبری کری، مە وەکو لقێ ھەشت ب فەر زانی ب ھەلکەفتا شەھیدکرنا وی رێورەسمەکێ رزگرتنێ ل بنەمالا وی ساز بکەین و خێزانا شەھیدی خەلات بکەین، دیسا ھەر د رێورەسمێ دا پرتووکەکا تایبەت ب خەباتا شەھیدێ ناڤبری و ب پشتەڤانیا لقێ ھەشت ھاتیە چاپکرن؛ ھاتە بەلاڤکرن و تێدا بەحس ل چەندین قووناغێن ژیانا وی و خەباتا وی یا نەتەوی ھاتیە کرن، ئەم پشتەڤانیێ ل وێ چەندێ ژی دکەین پەیکەرەک بۆ شەھید رێبەر مەلا حسێن و شەھید کوردستان سالحی ل باژێرێ زاخۆ بھێتە دانان”.

ئەحمەد سەعید، بەرپرسێ لقێ زاخۆ یێ ئێکەتیا قوتابیێن کوردستانێ بۆ ئەڤرۆ نیوز گۆت: “ئەم شەھید رێبەر مەلا حسێن ب شەھیدێ ئێکەتیا قوتابیێن کوردستانێ و سمبۆلا وێ دزانین، ژ بەرکو د بیاڤێ قوتابیان دا خزمەتەکا بەرچاڤ ھەبوویە، مە پێشنیار کری یە د ناڤ زانکۆیا زاخۆ دا پەیکەرەک بۆ شەھیدان (رێبەر مەلا حسێن) و (کوردستان سالحی) ب شێوەکێ جوان و رێکوپێک بھێتە دانان، د نوکە دا مە پێدڤی ب رازیبوونا زانکۆیا زاخۆ ھەیە ھەتا بشێین کارەکێ ب ڤی رەنگی ئەنجام بدەین”.

ئەڤرۆنیوز، عەلی حاجی:

دو وەلاتیێن گوندێ بێرمانێ ل باکوورێ کوردستانێ د خابیری دا خەندقین و ھەتا نوکە لاشێ وان نەھاتیە دیتن، لەو وەلاتیێن گوندێ ناڤبری داخواز ژ خەلکێ باتیفا کریە ھەردەما لاشێ وان ھەردو کەسان دیت؛ ئاگەھدار بکەن.

محەمەد موراد ئاکنجیێ ناحیا باتیفا بۆ ئەڤرۆ نیوز دیار کر، گوندێ بێرمانێ نێزیکی سنوورێ گوندێ مە یە و بەری سێ رۆژان گەنجەکێ ژیێ وی د ناڤبەرا 30 ھەتا 35 سالیێ و زارۆیەکا 12 سالی د ئاڤا خابیری دا ل سنوورێ وەلاتێ تورکیا خەندقینە و لاشێ وان نەھاتیە دیتن، ژ بەرکو ئاڤ یا بۆشە، لەو رەنگە لاشێ وان ھات بیتە د سنوورێ کوردستانێ دا و گۆت: “ژ بەر ڤێ چەندێ گوندیێن گوندێ بێرمانێ داخواز ژ مە کری یە ھەردەما لاشێ وان ھەردو کەسا ھاتە دیتن؛ وان ئاگەھدار بکەین، داکو لاشێ وان بۆ گوندی َوان بھێتە ڤەگوھاستن”.

گۆتژی: “مە پۆلیس و جھێن پەیوەندیدار و خەلکێ دەڤەرێ ل سەر ڤێ روودانێ ئاگەھدار کرینە و دێ دھاریکار بین بۆ لێگەڕیانا تەرمێ وان ھەردو کەسان ھەتا کو دبینین”.

ئەڤرۆ نیوز، بارزان مزووری:

رێڤەبەرێ باژێرڤانیا قەزا شێخان دیار کر، پشتی ٢٠٠٣ حەتا نوکە ١٠ ھزار پارچێن ئەردی ل شێخان ھاتینە بەلاڤکرن و دبێژیت: ھەتا نوکە پرۆژێن خزمەتگۆزاری نەگەھشتینە زێدەتری حەفت ھزار چارچێن ئەردی.

ئەندازیار خالد نەرمۆ، رێڤەبەرێ باژێرڤانیا قەزا شێخان بۆ ئەڤرۆ نیوز دیار کر، پشتی دەست بکاربوونا باژێرڤانیا قەزا شێخان، پشتی سالا ٢٠٠٣ دەست ب بەلاڤکرنا پارچێن ئەردی ھاتە کرن بۆ فەرمانبەر و پێشمەرگە و مالباتێن شەھیدان و گۆت: “گەلەک ژ پارچێن ئەردی ژی ھاتبوونە دان ژ پێش قەرەبوویا وان مەلاکێن ئەردێ وان دکەڤتە بەر پرۆژان، ھەتا نوکە ل قەزا شێخان ١٠ ھزار پارچێن ئەردی ھاتینە بەلاڤکرن و ھەتا نوکە پرۆژێن خزمەتگۆزاری نەگەھشتینە زێدەتری حەفت ھزار چارچێن ئەردی”.

ناڤھاتی خویا کر، پشکەکا کێم یا وان پارچێن ئەردی خزمەتگۆزاری یێن گەھشتینێ و گۆت: “پشتی سالا ٢٠١٣ ھەتا ٢٠١٤ پارێزگەھا نەینەوا چ پرۆژە بۆ قەزا شێخان ئەنجام نەداینە، حوکمەتا ھەرێما کوردستانێ ژی ژ بەر قەیرانا دارایی، ب تنێ پرۆژێن بچووک ئەنجام داینە”.

ئەندازیار خالد نەرمۆ ئاشکرا ژی کر، ئەو جھێن پارچێن ئەردی لێ ھاتینە بەلاڤکرن، ژ لایێ باژێرڤانیا شێخانڤە ڤەدیتن بۆ ھاتیە کرن و گۆت: “ئەم پێدڤی ب حەفت ملیار دیناراینە ھەتا ھەموو جۆرێن خزمەتگۆزاریان بگەھینینە وان پارچێن ئەردی، رۆژانە خودانێن وان سەرەدانا مە دکەن و سەرەرای نەگەھاندنا خزمەتگۆزاریا ئەم مۆلەتا ئاڤاکرنێ ددەینە ھندەک خودانێن وان کو ئاڤا بکەن، دیسا ژ بەر وێ رەوشا ڤێ دووماھیێ پەیدا بووی نوکە کڕین و فرۆتن ب وان پارچێن ئەردی دھێتە کرن و ئەو ئاوارێن ئەو پارچە بۆ خوە کرین دخوازن مۆلەتێ بدەینێ داکو بۆ خوە ئاڤا بکەن”.