ئه‌ڤرۆ:
هه‌ڤسه‌رۆكا جڤاتا سووریا دیموكرات راگه‌هاند كو بزاڤێن رۆسیا یێن بۆ ده‌ستپێكرنا دانوستاندنان د ناڤبه‌را شامێ و كوردان دا بێی ئه‌نجام مان، چونكو شامێ دڤێت وه‌كو جاران هه‌موو سووریێ برێڤه ببه‌ت و ئه‌و یه‌ك ژ ئالیێ كوردان و پێكهاتێن دی یێن سووریێ ڤه ناهێته قه‌بوولكرن.
ئیلهام ئه‌حمه‌د هه‌ڤسه‌رۆكا جڤاتا سووریا دیموكرات بۆ ده‌زگه‌هێن راگه‌هاندنێ دیار كر كو بزاڤێن رۆسیا یێن بۆ ده‌ستپێكرنا دانوستاندنان د ناڤبه‌را شامێ و كوردان دا بێی ئه‌نجام مان، چونكو شامێ دڤێت ڤه‌گه‌ریته ڤه قۆناغا به‌ری سالا ٢٠١١ و دڤێت وه‌كو به‌رێ حوكمێ ل هه‌موو سووریێ بكه‌ت، بێگومان نه كورد و نه ژی پێكهاتێن دی یێن ل باكورێ سووریێ قه‌بوول ناكه‌ن وه‌كو به‌رێ شام حوكمێ ل وان بكه‌ت و گۆت: (كوردان د شه‌رێ ل دژی داعشێ دا ب هزاران قوربانی داینه و بێگومان دڤێت كوردان رۆله‌ك سه‌ره‌كی د رێڤه‌برنا سووریێ دا هه‌بیت، ل ئالیێ دی دڤێت سیسته‌مێ رێڤه‌به‌ریێ ل سووریێ بهێته گوهۆرین، ژ به‌ر هندێ ژی نها چو دانوستاندنان د ناڤبه‌را شامێ و كوردان دا نینن).
ناڤهاتیێ ئه‌و یه‌ك ژی دیار كر كو وان به‌ری نها سه‌ره‌دانا رۆسیا و ئه‌مریكا كرینه و ل گه‌ل به‌رپرسێن هه‌ر دو وه‌لاتێن زلهێز به‌حسێ چاره‌سه‌ریا پرسا كوردی و پرسێن دی یێن سووریێ كرینه و گۆت: (ئه‌مریكا و رۆسیا پشته‌ڤانیێ ل مافێن كوردان دكه‌ن، هه‌ر دو وه‌لاتێن زلهێز پشته‌ڤانیا خوه بۆ ده‌ستپێكرنا دانوستاندنان د ناڤبه‌را كوردان و شامێ دا دیار كرن، لێ مخابن هه‌لوه‌ستێ شامێ ل هه‌مبه‌ر كوردان وه‌كو به‌رێ یه و دانپێدانێ ب مافێن كوردان ناكه‌ن، ژ به‌ر هندێ ژی بزاڤێن رۆسیا یێن بۆ چاره‌سه‌ریێ ل سووریێ نه‌گه‌هشتنه چو ئه‌نجامان و ئه‌و یه‌ك دێ كارتێكرنا خوه ل پاشه‌رۆژا سووریێ ژی كه‌ت، چونكو بۆ هه‌ر كه‌سه‌كێ ئاشكرایه هه‌تا پرسا كوردی ل سووریێ نه‌هێته چاره‌سه‌ركرن و كورد نه‌گه‌هنه مافێن خوه دێ قه‌یرانا نها ل سووریێ ژی به‌رده‌وام بیت، چونكو كورد ل سووریێ قه‌بوول ناكه‌ن وه‌كو به‌رێ بێی ماف بژین و كوردان ب هزاران شه‌هید داینه دا د سووریایه‌ك نوو و دیموكرات دا بژین).
ئه‌و یه‌ك د ده‌مه‌كێ دایه كو حه‌فتیا بۆری چاڤدێره‌كێ سیاسی یێ رۆژئاڤایێ كوردستانێ ژی بۆ رۆژناما ئه‌ڤرۆ دیار كربوو كو د هه‌ڤدیتنا هه‌ری دووماهیێ یا د ناڤبه‌را شاندێ رێڤه‌به‌ریا خوه‌سه‌ر و رژێما سووریێ دا به‌رپرسه‌كێ شامێ بۆ كوردان دیار كربوو كو ئه‌و ژ به‌ر فشارێن ئیرانێ و توركیا نه‌شێن هه‌موو داخوازیێن كوردان قه‌بوول بكه‌ن و دڤێت كورد ئاستێ داخوازیێن خوه كێم بكه‌ن و هه‌روه‌سا هه‌مان به‌رپرسێ رژێما سووریێ داخواز ژ كوردان ژی كربوو كو هه‌موو ده‌ڤه‌رێن ل ژێر كۆنترۆلا خوه راده‌ستی له‌شكرێ سووریێ بكه‌ن كو ئه‌و یه‌ك ژی ب توندی ژ ئالیێ شاندێ كوردی ڤه هاتبوو ره‌تكرن.
ل گۆر باوه‌ریا چاڤدێرێن سیاسی پرسا كوردی ل سووریێ ئێدی بوویه پرسه‌كا نێڤده‌وله‌تی و به‌شار ئه‌سه‌د ب تنێ نه‌شێت بریارێ ل دۆر چاره‌سه‌ركرنا پرسا كوردی بده‌ت، دڤێت ئه‌مریكا و رۆسیا پێكڤه پرۆژه‌كێ بۆ چاره‌سه‌ركرنا قه‌یرانا سووریێ و د ناڤ دا ژی پرسا كوردی ئاماده بكه‌ن و هه‌روه‌سا دڤێت توركیا ژی رازی بیت، چونكو نها توركیا پشكه‌ك ژ ئاخا سووریێ داگیر كریه و بێی رازیبوونا توركیا قه‌یرانا نها ل سووریێ ژی ناهێته چاره‌سه‌ركرن و ژ بۆ هندێ ژی دڤێت رێڤه‌به‌ریا خوه‌سه‌ر ب ته‌مامی خوه ژ په‌كه‌كێ دوور بكه‌ت و دڤێت هه‌ر دو جڤاتێن كوردی ژی پێكڤه ده‌ست ب قۆناغه‌كا نوو بكه‌ن.
نيشاندان