ئەڤرۆ نيوز:

سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک ل بارەگایێ لقێ پێشوازیا ل (مەتران رەبان ئەلقەس) مەترانێ کەنیسێن (دھوک، زاخو، ئامێدی)یێ کر.

د روونشتنەکێ دا مەتران رەبان پیرۆزباھیا خەلکێ دھۆکێ و کوردستانێ کر ب ھەلکەفتا ھاتنا ھەیڤا رەمەزانا پیرۆز و ھیڤی خواست ئەڤ ھەیڤە ھەیڤا خێر و بەرەکەتێ بیت بۆ ھەمی خەلکێ کوردستانێ و گۆت: “ب ڤێ پێکڤەژیانا ل کوردستانێ ھەی ئەم شیاینە ب ئازادانە ھەلکەفت و بیرەوەریێن خوە بگێرین و ب ڤێ تەبایی و ئێک رێزیا د ناڤبەرا مە دا ھەیی رۆژ بۆ رۆژێ کوردستانێ جوانتر بکەین”.

ژ ئالیێ خوە ڤە سەربەست تروانشی، ئەندامێ ئەنجومەنێ سەرکردایەتیا پارتی و بەرپرسێ لقا ئێک سۆپاسی و بخێرھاتنا مەتران رەبانی کر بۆ ڤێ سەرەدانێ و گوت ” ژمێژەیە کوردستانی د کەد و خەباتێ دانە بۆ ئازادی و سەربەستیا گەلێن کوردستانی کرستیان ژی ئێک ژ پێکھاتێن سەرەکی نە د ناڤ کوردستانێ دا وان ژی د دەمێ شۆرەشێ دا مالێن وان حەشارگەھا بارەگایێن پێشمەرگا بوون و شیان خزمەتەکا گەلەک مەزن ژ بلی روحا خوە ب نان و ئاڤێن خوە ژی پارزینکێن پێشمەرگەیان تژی بکەن”.

ئەڤرۆ نیوز:

سەرۆکێ دەستەیا ژینگەھێ دیار کر کو ل ھەرێما کوردستانێ چەندین ئەگەر ھەنە دبنە ئەگەرێ پیسبوونا ژینگەھێ، ژ بەر ڤێ چەندێ وان دڤێت ئەو ئەگەر نەمینن و رێژا کەسکاتیێ ژی بۆ 25% ستانداردێ جیھانی بلند بکەن.

د. ھەلۆ عەسکەری، سەرۆکێ دەستەیا ژینگەھێ ل ھەرێما کوردستانێ دیار کر کو وان داخواز کریە کۆمپانیێن بەرمایکان ل ھەولێرێ بھێنە دانان و ئەو بەرمایکێن دھێنە کۆمکرن بۆ وان کۆمپانیان بھێنە ڤەگوھاستن و ل وێرێ مفا ژێ بھێتە وەرگرتن و بۆ مالپەرێ فەرمیێ پارتی دیموکراتی کوردستان گۆت: “نوکە ژی حوکمەت بزاڤان بۆ دابینکرنا وان کۆمپانیان دکەت، چونکی ب ڤێ چەندێ دێ ئاریشەکا مەزن ھێتە چارەسەرکرن”.
ناڤھاتی ئاماژە دا وێ چەندێ کو چەندین ئەگەر بۆ پیسبوونا ژینگەھا باژێران ھەنە، ژ وان پارزینگەھێنە نەقانوونی و ھەبوونا رێژەکا مەزن یا ترۆمبێلان ژ بەر ڤێ چەندێ وان دڤێت ھاتنا ترۆمبێلان بۆ ناڤ باژێران بھێتە سنووردارکرن و موەلیدە ژی بھێنە گوھۆڕین ب یێن مودێرن و بێ دەنگ و دووکێل، چونکی ئەڤە دبنە ئەگەرێ وێ چەندێ ژینگەھا باژێران گەلەک باشتر بیت”.

د. ھەلۆ عەسکەری خویا کر کو نوکە رێژا کەسکاتیێ ل ھەرێما کوردستانێ 15% و وان دڤێت ڤێ رێژێ بگەھیننە ئاستێ ستانداردێ نێڤدەولەتی کو 25% یە، چونکی ل وی دەمی ژینەگەھا ھەرێما کوردستانێ دێ گەلەک باش و پاقژ بیت.

ئەڤرۆ نیوز:

بڕیارە بۆ دانا دەستووریا شۆفێریێ، چەند گوھۆڕینەک بھێنە کرن، پشکەک ژ وان کەسێن مامەلا نووکرنا دەستووریا شۆفێریێ دکەن، وانێن ھاتنوچوونێ دێ خوینن، دیسا شێوازێ دانا دەستووریا ھاژۆتنا ترۆمبێلێ ژی دێ ھێتە وەکھەڤکرن.

عەقید ئەسعەد مەلا کەریم، رێڤەبەرێ پلاندانانێ ل رێڤەبەریا گشتی یا ھاتنوچوونا ھەرێمێ ئاشکرا کر، لژنا رێکخستنا سیستەمێ دانا دەستووریا شۆفێریێ ل ھەرێما کوردستانێ دێ کۆم بیت و بۆ باس گۆت: “دانوستاندنێ ل سەر دانانا سیستەمەکێ نوو یێ دانا دەستووریا شۆفێریێ و دەرخستنا چەند راسپاردە و رێنمایان بۆ ڤێ چەندێ دێ کەت”.

خویا ژی کر، ھندەک ئاستەنگ ل ھەمبەر وان ھەنە، لێ ئەو دێ بزاڤێ کەن ئاریشێن ھەین چارە بکەن و گوھۆڕینێ د سیستەمێ دانا مۆلەتا شۆفێریێ دا بکەن و گۆت: “نوکە دانا دەستووریا شۆفێریێ ل پارێزگەھێن ھەرێما کوردستانێ یا جودایە، لێ ئەم دێ بزاڤێ کەین د پاشەڕۆژێ دا سیستەمێ دانا دەستووریا شۆفێریێ وەکھەڤ بکەین و بێخینە د وارێ ب جھئینانێ دا”.

ئەڤرۆ نیوز:

بەرپرسەکێ حوکمەتا ھەرێما کوردستانێ دیار کر کو حوکمەتا ھەرێما کوردستانێ ل سەر ئاستەکێ بلند بزاڤان بۆ چارەسەرکرنا رێ و بانان ل ھەرێما کوردستانێ دکەت و گۆت: “داھاتێ رێ و بانان دێ د سندوقەکێ دا ھێتە کۆمکرن”.

سدقی ئامێدی، بریکارێ وەزارەتا ئاڤەدانکرن و رێ و بانان دیار کر کو ل گەلەک جھان داھات ب ناڤێ رێ و بانان دھێتە وەرگرتن، بەلێ ھەتا نوکە ژ بلی داھاتێ قەپانان چو داھاتێن دی بۆ وەزارەتا ئاڤەدانکرنێ و کرتێ رێ و بانان ناھێتە مەزاختن.

ناڤھاتی ئاماژە دا وێ چەندێ کو بەری نوکە بڕیاربوو سندوقەک بۆ نووژەنکرنا کرنا رێ و بانان بھێتە دانان، بەلێ ب مخابنی ڤە ل سالێن بۆری ئەڤ پێنگاڤە نەھاتە ھاڤێتن و بۆ مالپەرێ فەرمیێ پارتی دیموکراتی کوردستان گۆت: “بڕیارە نوکە ئەو سندوق بھێتە دانان و دەست ب کار بیت”.

بریکارێ وەزارەتا ئاڤەدانکرن و رێ و بانان خویا کر کو ل دووڤ بڕیارێ ھەموو داھات دێ چنە د ناڤ وێ سندوقێ دا، ژ داھاتێ ھاتنوچوونێ ئەوێ بۆ رێ و بانان دھێتە وەرگرتن و ئەو پارێ وەزارەتا سامانێن سرۆشتی ب ناڤێ نووژەنکرنا رێ و بانان بۆ ھەر تەنەکی کۆژمەکێ پارەی وەردگریت ل گەل یێ وەزارەتێ دێ داھاتەکێ باش ھێتە کۆمکرن و دێ شێن ب وی داھاتی ژ نوکە وێڤە رێگریێ ل تێکچوونا رێ و بانان کەن.