ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل شانده‌كێ بلند یێ رێكخراوا LDS یا خێرخوازی یا ئه‌مریكی كر.

د دیداره‌كێ دا، مه‌سرور بارزانی سوپاسیا رێكخراوا LDS كر كو د چه‌ند سالێن بۆری دا، ب هه‌ماهه‌نگی ل گه‌ل ده‌زگه‌هێ خێرخوازی یێ بارزانی دا، چه‌ندین پرۆژێن هه‌ڤپشك بۆ هاریكاریكرنا ئاواره‌ و په‌نابه‌ران و خه‌لكێ هه‌ژار و كێم ده‌رامه‌ت ل هه‌رێما كوردستانێ، ئه‌نجامداینه‌.

شاندێ رێكخراوا LDS، دیارك ركو هه‌رێما كوردستانێ سه‌ره‌رای ره‌وشا ئابووری یا دژوار، یا به‌رده‌وامه‌ ل حه‌واندنا زێده‌تر ژ ملیۆن ئاواره‌ و په‌نابه‌ران ژ پێكهاتێن جودا.

د ته‌وه‌ره‌كێ دی یێ كۆمبوونێ دا، دووپاتی ل گرنگیا هاریكاریكرنێ و زه‌مینه‌ خوه‌شكرنێ بۆ زڤراندنا ئاوارێن شنگالێ بۆ جهێن وان هاته‌ كرن.

ئه‌ڤرۆ:

به‌رپرسێ لقێ پێنج یێ پارتی ل به‌غدا، شوان محه‌مه‌د تاها، راگه‌هاند، دبیت پێكئینانا حوكمه‌تا ئیراقی یا نوو گیرو ببیت، چونكه‌ گه‌له‌ك لایه‌نان سكالا ل سه‌ر كۆمسیۆنا هه‌لبژارتنان ل ئیراقێ تۆمار كرینه‌ دیاركرژی كو پێكئینانا حوكمه‌تێ دێ بگره‌ و ڤه‌كێشانه‌كا زۆر دناڤ لایه‌نێن شیعی دا هه‌بیت و دخوازین ناكۆكێ ب ئاشتی بهێنه‌ ده‌ربازكرن تاكو حوكمه‌ته‌كا باش بهێته‌ پێكئینان.

شوان محه‌مه‌د تاها، د دیداره‌كێ دا ل گه‌ل رادیوا (ده‌نگێ ئه‌مریكا) دا ، ل دۆرگه‌فێن گرۆپێن چه‌كدار و نه‌رازیبوونا وان ژ ئه‌نجامێن هه‌لبژارتنان، گۆت ” ئالۆزی ل ئیراقێ تشته‌كێ نوو نینه‌، به‌رده‌وام ره‌وشا ئیراقێ ژ روویێ سیاسی و ئه‌منی و جڤاكی یێ ئالۆزه‌ و هه‌كه‌ ئالۆزی درێژ ببن كو ئه‌گه‌رێن وان ناكۆكیا سیاسی یه‌، دێ ره‌نگڤه‌دانا خراب هه‌بیت ل سه‌ر واقعێ ئه‌منی و جڤاكی و ئابووری”.

شوانی گۆت ژی” ئه‌نجامێن هه‌لبژارتنان دێ لیستا مه‌زن بۆ پێكئینانا حوكمه‌تێ دیاركه‌ت و نوكه‌ لیستا مه‌زن ب رۆهنی یا دیاره‌ ئه‌وژی لیستا سه‌دری یه‌، به‌لێ پێكئینانا حوكمه‌تێ دێ چه‌ند ئالۆزێ بۆ هه‌بن، ئه‌و بابه‌ته‌كێ دی یه‌، كورد وسوننه‌یان ژی پێ باشه‌ لایه‌نێن شیعی رێكبكه‌ڤن تاكو ناكۆكیێن وان ره‌نگڤه‌دان نه‌بیت ل سه‌ر پاشه‌رۆژا حوكمه‌تێ”.

سه‌باره‌ت بێ ده‌نگیا كوردان و نه‌چوونا پێش بۆ ئه‌نجامدانا هه‌ڤپه‌یمانیێ ل گه‌ل لایه‌نه‌كێ شیعی، به‌رپرسێ لقێ پێنج یێ پارتی گۆت” كورد د بێ ده‌نگ نینن و هه‌لویستێ وان یێ رۆهنه‌، كورد داخواز دكه‌ن لیستێن شیعی كێشێن خوه‌ ئێكلا بكه‌ن، تاكو حوكمه‌تا داهاتی ب شێوه‌كێ ساخله‌م بهێته‌ پێكئینان”.

ل دۆر شه‌نسێ مسته‌فا كازمی بۆ مانا وی د پۆستێ سه‌رۆك وه‌زیران دا، گۆت” دبیت پشتی ئێكلاكرنا ئه‌نجامێن هه‌لبژارتنان دیارببیت كا لایه‌نێن شیعی دێ رێككه‌ڤن یان نه‌، وی ده‌می شه‌نسێ كازمی بۆ مانێ د پۆستێ خوه‌ دا دێ دیار بیت”.

شوان محه‌مه‌د تاها ئاماژكر كو پارتی ل گه‌ل پتریا لایه‌نان لێكتێگه‌هشتن یا هه‌ی و به‌رژه‌وه‌ندیێن خه‌لكی بنه‌مایێ وان لێكتێگه‌هشتنایه‌، به‌لێ ره‌تكر هه‌تا نوكه‌ رێككه‌فتنه‌كا سیاسی هه‌بیت.

ئه‌ڤرۆ:

سه‌رۆك مه‌سعود بارزانی ل سه‌لاحه‌دین پێشوازی ل مارك برایسن ریچاردسۆن، بالیۆزێ بریتانیا ل ئیراقێ و شانده‌كێ دگه‌لدا كر.

د دیداره‌كێ دا، ره‌وشا سیاسی یا ئیراقێ و ب رێڤه‌چوونا هه‌لبژارتنێن جڤاتا نوونه‌رێن ئیراقێ و قۆناغا پشتی هه‌لبژارتنان هاتنه‌ به‌حسكرن.

هه‌ر د وێ كۆمبوونێ دا هه‌ردولا پرۆسا هه‌لبژارتنان ب سه‌ركه‌فتی هژمارت و هیڤیا وێ چه‌ندێ خواستن كو ئه‌نجامێن هه‌لبژارتنان ببیته‌ ده‌ستپێكا قۆناغه‌كا نوو كو تێدا سه‌قامگیریا سیاسی بده‌ستڤه‌ بهێت و به‌رژه‌وه‌ندیا گشتی و خواستێن وه‌لاتیان و ده‌نگده‌ران بهێنه‌ بجهئینان.

د پشكه‌كا دی یا وێ دیداری دا بالیۆزێ بریتانیا ل ئیراقێ پشته‌ڤانیا وه‌لاتێ خوه‌ بۆ هه‌رێما كوردستانێ و چاكسازیێن وه‌زاره‌تا پێشمه‌رگه‌ و هه‌ماهه‌نگی د ناڤبه‌را هێزا پێشمه‌رگێ كوردستانێ و هێزێن ئیراقێ دووپات كر.

ئه‌ڤرۆ:

ب هه‌لكه‌فتا سه‌ركه‌فتنا به‌ربژارێن پارتی دیموكراتی كوردستان ل پارێزگه‌ها نه‌ینه‌وا و ده‌ڤه‌را شنگالێ، سه‌رۆك بارزانی په‌یامه‌كا پیرۆزباهیێ ئاراسته‌ی ئه‌ندام و لایه‌نگر و رێكخستنێن هه‌ردو لقێن 17 و 14 یێن پارتی كر.

ده‌قێ په‌یاما سه‌رۆك بارزانی…

ب هه‌لكه‌فتا سه‌ركه‌فتنا به‌ربژارێن پارتی دیموكراتی كوردستان ل پارێزگه‌ها نه‌ینه‌وا و ده‌ڤه‌را شنگالێ، پیرۆزباهیێ ل ئه‌ندام و لایه‌نگر و رێكخستنێن لقێ 17 و لقێ 14 یێ پارتی دیموكراتی كوردستان دكه‌م. ده‌ستخوه‌شیێ ل وه‌ستیان و پێگیریا وان دكه‌ مكو بوونه‌ ئه‌گه‌رێ سه‌رخستنا پارتی د هه‌لبژارتنێن جڤاتا نوونه‌رێن ئیراقێ دا ل وێ ده‌ڤه‌رێ.

هه‌روه‌سا من سوپاسی و پێزانینێن تایبه‌ت یێن هه‌ین بۆ خۆراگریا جه‌ماوه‌رێ ده‌شتا نه‌ینه‌وا و ده‌ڤه‌را شنگالێ و خوشك و برایێن ئێزدی و پێكهاتێن دی كو به‌رسڤا هه‌لویست و قوربانیدانا پارتی دای و په‌یامه‌كا رۆهن و ئاشكرا ژی دا هه‌موو لایه‌كی كا وان كی دڤێت و چ دڤێت.وان پشتراست ژی دكه‌م كو پارتی ل گه‌ل ب دووماهی ئینانا ئازار و نه‌هامه‌تیا خه‌لكێ وان ده‌ڤه‌ران دایه‌ وه‌كو به‌رده‌وام پشته‌ڤان و پارێزه‌رێ ماف و ژیان و سه‌ربلندیا وان دێ مینیت.

ئه‌ڤرۆ:

سه‌رۆكێ هه‌رێما كوردستانێ، نێچیرڤان بارزانی ل گه‌ل جینین پلاسخارت نوونه‌را تایبه‌ت یا سكرتێرێ گشتیێ نه‌ته‌وێن ئێكگرتی ل ئیراقێ كۆمبوو.

د كۆمبوونێ دا ب رێڤه‌چوونا پرۆسا ده‌نگدانێ بۆ هه‌لبژارتنێن جڤاتا نوونه‌رێن ئیراقێ و ئه‌نجامێن وان، ره‌وشا ئیراقێ ب گشتی و پێشبینیێن قۆناغا داهاتی یا پرۆسا سیاسی ل ئیراقێ، هاته‌ به‌حسكرن.

هه‌ردو لایه‌نان هیڤی خواستن ئه‌نجامێن هه‌لبژارتنان، دامه‌زراندنا حوكمه‌ته‌كێ بیت كو به‌رسڤا خواست و هیڤیێن هه‌موو پێكهاتان بیت و ئارامیێ و سه‌قامگیریێ و خزمه‌تگوزاریان بۆ ئیراقیان دابین بكه‌ت، هه‌روه‌سا د هه‌ڤرا بوون كو پێدڤیه‌ هه‌ر تانه‌ك و تێبینیه‌ك ل سه‌ر ئه‌نجامێن هه‌لبژارتنان، ب رێیێن قانوونی بهێنه‌ ئێكلاكرن.

ژلایێ خوه‌ڤه‌ نێچیرڤان بارزانی، سوپاسی و ده‌ستخوه‌شی ل پلاسخارت و تیما نه‌ته‌وێن ئێكگرتی ل ئیراقێ (یونامی) كر بۆ رۆلێ وان یێ به‌رچاڤ د چاڤدێریكرنا پرۆسا ده‌نگدانێ و هاریكاری و پشته‌ڤانیكرنا ئیراقێ دا.

ئه‌ڤرۆ:

ب هه‌لكه‌فتا سه‌ركه‌فتنا پرۆسا هه‌لبژارتنێن ئیراقێ و سه‌ركه‌فتنا پارتی دیموكراتی كوردستان د وان هه‌لبژارتنان دا، سه‌رۆك بارزانی په‌یامه‌ك به‌لاڤكر و تێدا پیرۆزباهی ل گه‌لێ كوردستانێ و هه‌موو كادر و ئه‌ندام و لایه‌نگرێن پارتی كر.

ده‌قێ په‌یاما سه‌رۆك بارزانی:

ب هه‌لكه‌فتا سه‌ركه‌فتنا پرۆسا هه‌لبژارتنێن جڤاتا نوونه‌رێن ئیراقێ و سه‌ركه‌فتنا پارتی دیموكراتی كوردستان د وان هه‌لبژارتنان دا پیرۆزباهیێ ل گه‌لێ كوردستانێ دكه‌م.

پیرۆزباهیێ ل كادر و ئه‌ندام ولایه‌نگرێن پارتی دكه‌م كو شیاین د هه‌ڤركیه‌كا مه‌ده‌نی و ئارام دا سه‌ركه‌فتنه‌كا مه‌زن بۆ پارتی مسۆگه‌ر بكه‌ن و گیانێ شه‌هیدان ئارام بكه‌ن. سه‌ركه‌فتنا پارتی د وان هه‌لبژارتنان دا ب رامانا سه‌ركه‌فتنا پره‌نسیب و بها ووان بنه‌مانه‌ كو گه‌لێ كوردستانێ خه‌بات بۆ كری و په‌یامه‌كه‌ بۆ هه‌موو لایه‌كی كو گه‌لێ كوردستانێ د هیچ ره‌وشه‌كێ دا ده‌ستبه‌رداری دیرۆك و بهایێن خوه‌ نابیت، پێدڤیه‌ ئه‌و سه‌ركه‌فتنا پارتی ببیته‌ ئه‌گه‌رێ وی چه‌ندێ به‌رپرس و كادر و ئه‌ندامێن پارتی زێده‌تر خزمه‌تا خه‌لكی بكه‌ن و به‌رده‌وام ئه‌و شیره‌تا بها یێ بارزانیێ نه‌مر ل بیرا وان بیت ئه‌وژی (ل سه‌ركه‌فتنا مه‌غروور نه‌بن و ل شكه‌ستنا بێ ئومێد نه‌بن).

هه‌ر ب ڤێ هه‌لكه‌فتێ سوپاسیا كۆمسیۆنا بلند یا هه‌لبژارتنان و ده‌زگه‌هێن ئه‌منی و هه‌موو لایه‌نێن په‌یوه‌ندیدار یێن هه‌رێما كوردستانێ و ئیراقا فیدرال دكه‌ مكو ب وه‌ستیانا وان بوو ئه‌گه‌رێ سه‌ركه‌فتنا پرۆسا هه‌لبژارتنێن جڤاتا نوونه‌رێن ئیراقێ و ده‌ستخوه‌شیێ لێ دكه‌م، هه‌روه‌سا رۆلێ به‌رێز مسته‌فا كازمی سه‌رۆكێ وه‌زیران د ئه‌نجامدانا هه‌لبژارتنان دا ب بلند دنرخینین.

سه‌ركه‌فتنا پرۆسا هه‌لبژارتنان سه‌ركه‌فتنا ئیرادا ملله‌تی یه‌ و سه‌ركه‌فتنا دیموكراسیێ یه‌، له‌وما هیڤیدارم پشتی هه‌لبژارتنان لایه‌نێن كوردستانێ د ئێكرێز و تمامكارێن هه‌ڤدوو بن، هیڤیدارم هه‌موو لایه‌ن پێكڤه‌ و بۆ ئێك ئارمانجا هه‌ڤپشك و ژ پێخه‌مه‌ت به‌رژه‌وه‌ندیێن بلند یێن كوردستانێ و به‌رگریكرن ژ ماف و ده‌سكه‌فتێن گه‌لێ كوردستانێ كار بكه‌ن و ل سه‌ر بنه‌مایێ هه‌ڤپشكیا راسته‌قینه‌ په‌یوه‌ندیێن هه‌رێما كوردستانێ و ئیراقا فیدرال بهێنه‌ ئاڤاكرن.

جاره‌كا دی سوپاس بۆ گه‌لێ كوردستانێ و سوپاسیه‌كا تایبه‌ت بۆ خوه‌شك و برایێن خۆراگر و خودان بیروباوه‌ر ل كه‌ركووكا دلێ كوردستانێ.

ئه‌ڤرۆ:

سه‌رۆكێ هه‌رێما كوردستانێ راگه‌هاند، هیڤیدارم ئه‌ڤ هه‌لبژارتنه‌ ب خێر و خوه‌شی بۆ هه‌موو ئیراقێ ب ڤه‌گه‌ریت، هیڤیدارم ئه‌م هه‌موو وه‌كو مافه‌كێ قانوونی و دیموكراسی ئه‌ركێ خوه‌ بجهبینن.

نێچیرڤان بارزانی، سه‌رۆكێ هه‌رێما كوردستانێ، پشتی ده‌نگێ خوه‌ ل بنگه‌هه‌كێ ده‌نگدانێ دای د هه‌لبژارتنێن جڤاتا نوونه‌رێن ئیراقێ دا،  د كۆنگره‌كێ رۆژنامه‌ڤانی دا گۆت” هیڤیدارم ئه‌ویچن دچنه‌ جڤاتا نوونه‌رێن ئیراقێ ژ هه‌موو لایه‌كی ڤه‌ بشێن به‌رگریێ ژ مافێن هه‌موو ئیراقێ بكه‌ن و ژ نوكه‌ و وێڤه‌ دیده‌ڤانێن وێ چه‌ندێ بین كو ژ هه‌موو روویه‌كی ڤه‌ ره‌وشا هه‌رێما كوردستانێ، ره‌وشا هه‌موو ئیراقێ به‌ر ب باشتر بچیت”.

نێچیرڤان بارزانی، زێده‌تر گۆت” ئه‌وا ئه‌م ل هه‌رێما كوردستانێ دخوازین ئه‌وه‌ كو هه‌موو هێزێن كوردستانێ پێكڤه‌ ل به‌غدا هه‌ڤده‌نگ بن بۆ به‌رگریكرنێ ل مافێن هه‌رێما كوردستانێ د چارچۆڤێ ئیراقا فیدرالی دا، هه‌روه‌سا هیڤیدارین حوكمه‌ت و جڤاتا نوونه‌رێن ئیراقێ یێن داهاتی زۆر ب جدی بزاڤا چاره‌كرنا كێشێن هه‌موو ئیراقیان بكه‌ن، ئه‌وا مه‌ هه‌رێما كوردستانێ دڤێت و پشتی ب دووماهی هاتنا هه‌لبژارتنان هیڤیا بۆ دخوازین ئه‌وه‌ كو هه‌موو هێزێن كوردستانێ پێكڤه‌ ل به‌غدا      د هه‌ڤده‌نگ بن.

سه‌باره‌ت پاشه‌رۆژا په‌یوه‌ندیێن د ناڤبه‌را به‌غدا و هه‌ولێرێ پشتی هه‌لبژارتنان، نێچیرڤان بارزانی گۆت” هه‌رێما كوردستانێ وه‌كو هه‌رێمه‌كا دستووری یه‌ د چارچۆڤێ ئیراقێ دا، هه‌رێم دخوازیت ئه‌و كێشێن هه‌تا نوكه‌ ماین ب دانوستاندنێ ل گه‌ل به‌غدا بهێنه‌ چاره‌سه‌ركرن، هه‌رێما كوردستانێ دزانیت هه‌م ئه‌رك و هه‌م ماف یێ هه‌ی د چارچۆڤێ حوكمه‌تا فیدرالی یا ئیراقێ دا، ئه‌وا بۆ هه‌رێما كوردستانێ گرنگ سه‌قامگیریا سیاسی یا ئیراقێ یه‌ و ب دیتنا مه‌ ب چاره‌سه‌ركرنا وان كێشان دێ شێین گه‌هینه‌ وێ ئارمانجێ كو ئارمانجه‌كا هه‌موو گه‌لێ ئیراقێ مفای ژێ بینن”.

سه‌باره‌ت كاریگه‌ریا كوردان ل سه‌ر پێگه‌هێ كوردان ل ده‌ڤه‌رێن كێشه‌دار، گۆت” هه‌رێما كوردستانێ دخوازیت مادێ 140 یێ دستووری د چارچۆڤێ ئیراقێ دا بهێته‌ بجهئینان كو بجهئینانا وێ مادێ دێ سه‌قامگیری ل وان ده‌ڤه‌ران زێده‌تر بیت و خه‌لكێ ئیراقێ ژی دێ خوه‌شحال بن كو كێشه‌ بهێنه‌ چاره‌سه‌ركرن”.

ئه‌ڤرۆ:

جێگرێ سه‌رۆكێ پارتی دیموكراتی كوردستان د هه‌وا هه‌لبژارتنێن پارتی ل هه‌ولێرێ كو بۆ پشته‌ڤانی ل به‌ربژارێن پارتی ل كه‌ركووكێ ب رێڤه‌چووی، راگه‌هاند” پشتی دروستكرنا ده‌وله‌تا ئیراقێ خه‌لكێ كه‌ركووكێ یێن دهێنه‌ ئازاردان و بزاڤا گوهۆرینا دیمۆگرافیا وی باژێری دهێته‌ كرن و دهێته‌ ب ئه‌ره‌بكرن، كوردستانی بوون و كه‌ركووكی بوون گه‌له‌ك یا ب زه‌حمه‌ته‌، ژ به‌ر وێ چه‌ندێ ئه‌م هه‌موو ب هه‌ست و سۆز و مێشك ڤه‌ كه‌ركووكینه‌.

نێچیرڤان بارزانی، جێگرێ سه‌رۆكێ پارتی، گۆت” دخوازین په‌ترۆل و سامانێن سروشتی ببنه‌ ئه‌گه‌رێ پێشكه‌فتنێ و دروستكرنا ده‌لیڤێن كاری بۆ گه‌نجێن كه‌ركووكێ، نه‌كو ببنه‌ جهێ ته‌ماحكاریێ و گوهۆرینا ناسناما كه‌ركووكێ، شه‌رێ مه‌ شه‌ر بوو ل سه‌ر ناسناما نیشتمانی و دیرۆكا كه‌ركووكێ، وه‌كو خانه‌قینێ و شنگالێ و مه‌خموورێ، بێ كو ئه‌م دژی هیچ نه‌ته‌وه‌كی بین. داخوازا مه‌ بۆ په‌ترۆلا كه‌ركووكێ نینه‌، داخوازا مه‌ ل سه‌ر ناسناما كه‌ركووكێ یه‌، مه‌ نه‌ڤێت شه‌ره‌كێ نه‌ته‌وی ب كه‌ركووكیان بكه‌ین، ناخوازین شه‌ری نه‌ته‌وی ل كه‌ركووكێ بهێته‌ كرن، كو به‌رۆڤاژی هه‌موو شۆفینیه‌كی، دخوازین ئارامی، خزمه‌تگوزاری، ئاڤه‌دانی و هه‌ڤپشكیا راسته‌قینه‌ ل كه‌ركووكێ هه‌بیت”.

گۆت ژی” ناخوازین ب شه‌ری و كوده‌تایێ چاره‌نڤیسێ كه‌ركووكێ بهێته‌ ئێكلاكرن، به‌لكو ب رێیا مادێ 140 ئێكلا ببیت”.

جێگرێ سه‌رۆكێ پارتی راگه‌هاند ژی” ئه‌م ژ ره‌وشا نوكه‌ یا كه‌ركووكێ و ئیدارا وێ گه‌له‌ك نه‌ د رازی نه‌، چونكه‌ ئیداره‌كا سه‌پاندیه‌ و یا هه‌لبژارتی نینه‌”.

پتر رۆهنكر” تاكو وی ده‌مێ ئیدارا شه‌رعی ل كه‌ركووكێ هه‌ی، ل سه‌ر فه‌رمانا سه‌رۆك بارزانی مه‌ شیا گه‌له‌ك پرۆژێن خزمه‌تگوزاری ل سه‌ر بودجا هه‌رێما كوردستانێ ل كه‌ركووكێ بجهبینین، هه‌ڤده‌م ئیدارا وی ده‌می یا كه‌ركووكێ ل سه‌ر پارێ پترۆدۆلار گه‌له‌ك پرۆژه‌ ئه‌نجامدابوون”.

ئاماژه‌ كر” مه‌ نه‌ڤێت هیچ نه‌ته‌وه‌ك ل كه‌ركووكێ بشكێت، به‌لكو مه‌ دڤێت پێكڤه‌ بژین و ئه‌وژی سه‌ركه‌فتنه‌ بۆ هه‌موویان، هه‌ر ئه‌وژی بۆچوونا سه‌رۆكێ پارتی یه‌ بۆ چاره‌سه‌ركرنا كێشا كه‌ركووكێ”.

هه‌روه‌سا گۆت” كه‌س نینه‌ به‌حسێ دیرۆكا خه‌باتا كه‌ركووكێ و كوردایه‌تیێ ل كه‌ركووكێ بكه‌ت و ناڤێ شه‌هیدێن پارتی نه‌زانیت”.

نێچیرڤان بارزانی خویاكر” پێدڤیه‌ كاری بۆ چه‌سپاندنا ناسناما كه‌ركووكێ بكه‌ین، هندی پارتی، سه‌ركردایه‌تی و سه‌رۆكێ وێ هه‌بن، نابیت هیچ كه‌ركووكیه‌ك هه‌ست ب بێ كه‌سیێ بكه‌ت” گۆت ژی” ئه‌م د پشت راستین هیچ ئه‌شیره‌ته‌كا ئه‌ره‌ب ناخوازیت ببیته‌ پشكه‌ك ژ سیاسه‌تا شوڤینی و ب ئه‌ره‌بكرنێ ل كه‌ركووكێ”.

ل دووماهیێ نێچیرڤان بارزانی بۆ خه‌لكێ كه‌ركووكێ گۆت” بزاڤێ دكه‌ین ئیدارا داهاتی یا كه‌ركووكێ ب دلێ هه‌وه‌ و هه‌موو پێكهاتان بیت و ئیداره‌كا هه‌ڤپشك بیت، پشتی ژناڤچوونا رژێما به‌رێ ل ئیراقێ وه‌كو مافه‌كێ ره‌وا پارێزگه‌رێ كه‌ركووكێ كورد بوو، ئه‌وا نوكه‌ ل كه‌ركووكێ هه‌ی باره‌كێ نه‌ئاسیی یه‌ و پێدڤیه‌ پارێزگه‌رێ داهاتی كورد بیت و خزمه‌تكارێ هه‌موو پێكهاتێن كه‌ركووكێ بیت”.

ئه‌ڤرۆ:

د هه‌وا هه‌لبژارتنێن پارتی ل هه‌ولێرێ كو دوهی دوشه‌مبی 4/10/2021 ب رێڤه‌چووی، مه‌سرور بارزانی گۆتاره‌ك پێشكێش كر و راگه‌هاند، ئه‌ز شانازیێ دكه‌ مكو ئه‌ندامێن پارتی و خه‌لكێ كوردستانێ ئه‌و باوه‌ریا دایه‌ مه‌، كو پۆستێ سه‌رۆكایه‌تیا حوكمه‌تا هه‌رێما كوردستانێ ب مه‌ بهێته‌ به‌خشین، به‌لێ ئه‌ڤرۆ ئه‌ز ل ڤێرێ د خزمه‌تا هه‌وه‌ دامه‌ وه‌كو ئه‌ندامه‌كێ پارتی دیموكراتی كوردستان.

مه‌سرور بارزانی رۆهنكر ژی، ل ده‌ستپێكێ ئارمانجا پارتی بۆ پاراستنا ئاخ و ناسناما نه‌ته‌وی و هه‌موو پێكهاتێن كوردستانێ بوو، پارتی دخوازیت خزمه‌تگوزاریان بگه‌هینیته‌ هه‌موو خه‌لكێ كوردستانێ ب هه‌موو پێكهاتان ڤه‌ و ل هه‌موو ده‌ڤه‌رێن كوردستانێ.

ئه‌و ژی به‌رچاڤكر، كو ل ده‌مێ بۆری پارتی بزاڤ كریه‌ چه‌ند ئه‌ركێن خوه‌ بجهبینیت و خه‌مساریێ ناكه‌ت به‌رامبه‌ر وان سۆزێن ب ده‌نگده‌ر و جه‌ماوه‌رێ خوه‌ داین.

مه‌سرور بارزانی زێده‌تر گۆت” پارتی وه‌كو ستراتیژیه‌ت دنێریته‌ پێشخستنا هه‌رێما كوردستانێ، نا سه‌حكه‌ت كو ئابوور تنێ بۆ ته‌خه‌كێ بیت، یان ده‌ڤه‌ره‌كێ و چینه‌كێ بیت و گرنگیێ پێ بده‌ت، به‌لكو ئه‌ڤه‌ ستراتیژیه‌ته‌كه‌ بۆ وێ چه‌ندێ ژێرخانه‌كا ئابووری یا ب هێز ل كوردستانێ بهێته‌ دروست كرن، تاكو هوون و نفشێن داهاتی ژی بشێن ژیانه‌كا ئاسوده‌تر و باشتر و سه‌قامگیرتر ببنه‌ سه‌ر”.

دووپات كر ژی” پارتی هه‌موو بزاڤه‌كێ دكه‌ت بۆ وێ ئێكێ ب وان رێیێن د شیانێن وێ دایه‌ خزمه‌تا وه‌لاتیان و وان ئه‌جیندایان بكه‌ت، كو بشێن هه‌موو ده‌ڤه‌ره‌كێ ل كوردستانێ پێشبێخیت و هیچ كه‌موكوریه‌ك نه‌مینیت، به‌لێ وه‌كو دزانن د ده‌مێ بۆری دا تووشی چه‌ندین قه‌یرانان بووین، به‌لێ ئه‌و ب خۆراگریا خه‌لكێ كوردستانێ و تایبه‌ت جه‌ماوه‌رێ خه‌باتكه‌رێ پارتی بوو”.

ئاماژه‌ كر ژی” هه‌ر ده‌مه‌كی پێدڤی كربیت، به‌رگریێ ژ ئاخ ووه‌لاتێ بكه‌ین، سه‌رۆكێ مه‌ یێ خوه‌شتڤی سه‌رۆك بارزانی و پێشمه‌رگێن قه‌هره‌مان ل سه‌نگه‌رێن به‌راهیێ بوون و نه‌هێلا هیچ داگیركه‌ره‌ك تبلا خوه‌ بۆ ڤێ ئه‌زموونێ درێژ بكه‌ت”.

خویاكر” په‌یاما پارتی ل ده‌ستپێكێ ئاشتی بوو و پارتی چو جاران نه‌خواستیه‌ ژێك دوور بوون ل كوردستانێ روو بده‌ت و ل گه‌ل وێ چه‌ندێ داینه‌ ئاشتیبوونا نیشتمانی دروست ببیت و هه‌موو ئایین و مه‌زه‌ب پێكڤه‌ بژین و به‌رده‌وام بین ل سه‌ر وێ رێ”.

مه‌سرور بارزانی ئاماژه‌ ب وێ چه‌ندێ ژی كر كو پێدڤیه‌ هه‌موو كه‌سه‌ك یێ ئازاد بیت د ده‌ربرینا خوه‌ دا و یێ ئازاد بیت د وێ ئێكێ كی نوونه‌رایه‌تیا وی دكه‌ت، له‌وما بۆ هیچ كه‌سه‌كی نینه‌ ب زۆری كه‌سه‌كی نه‌چار بكه‌ت فۆرمێ پر بكه‌ت، یان ب زۆری ده‌نگی بۆ لایه‌نه‌كی بده‌ت، هه‌موو تاكه‌كێ كوردستانێ بهایێ وێ چه‌ندێ د ئازادیێ یێ گه‌هشتی كو بزانیت ده‌نگ ب كێ بده‌ت، ژبه‌ر وێ چه‌ندێ ب هیچ شێوه‌كی ئه‌م قه‌بوول ناكه‌ین ژبه‌ر بیروبۆچوونێن سیاسی، گه‌ف ل هیچ فه‌رمانبه‌ره‌كی یان هیچ تاكه‌كی بهێته‌ كرن، كو ژ كاری وی بهێته‌ دوورخستن چونكه‌ دێ ده‌نگ ب لایه‌نه‌كێ دی ده‌ت، ئه‌ڤه‌ پرنسیبه‌كه‌ و باوه‌ریا پارتی یه‌، كو ئازادیا راده‌ربرینێ یا پێدڤیه‌ بۆ هه‌موو وه‌لاتیه‌كی بهێته‌ ده‌سته‌به‌ر كرن، به‌لێ داخوازێ ژ هه‌موویان دكه‌م و روو ل وان دكه‌م كو هێشتا خوه‌ ئێكلا نه‌كریه‌، ده‌نگ ب به‌ربژارێن پارتی بده‌ن.