پارتێن كوردستانی ل هه‌ر چار پارچێن كوردستانێ نه‌رازیبوونا خوه‌ ل هه‌مبه‌ر هێرشا په‌كه‌كێ و شه‌هیدكرنا پێشمه‌رگێن كوردستان دیار كرن و راگه‌هاندن كو كریارێن په‌كه‌كێ د خزمه‌تا دوژمنێن كوردستانێ دایه‌ و دڤێت په‌كه‌كه‌ هێزێن خوه‌ ژ هه‌رێما كوردستانێ ڤه‌كێشیت و رێزێ ل هه‌رێما كوردستانێ بگریت.

پارتا ئازادی یا كوردستانێ ل باكور د داخۆیانیه‌كێ دا راگه‌هاند كو دڤێت په‌كه‌كه‌ هه‌موو هێزێن خوه‌ ژ هه‌رێما كوردستانێ ڤه‌كێشیت و رێ نه‌ده‌ت كو توركیا هێرشی هه‌رێما كوردستانێ بكه‌ت، چونكو په‌كه‌كه‌ به‌هانان دده‌ته‌ ده‌ستێ ده‌وله‌تا توركیا دا هێرشی هه‌رێما كوردستانێ بكه‌ت، ژ به‌ر هندێ ژی دڤێت به‌ری هه‌ر تشته‌كێ په‌كه‌كه‌ رێزێ ل سه‌روه‌ریا هه‌رێما كوردستانێ بگریت و هه‌موو چه‌كدارێن خوه‌ ژ ئاخا هه‌رێما كوردستانێ ڤه‌كێشیت، چونكو یا نها په‌كه‌كه‌ دكه‌ت ب ته‌مامی د خزمه‌تا دوژمنێن كوردستانێ دایه‌.

پارتا ئازادی هه‌روه‌سا هێرشا ڤێ دووماهیێ یا چه‌كدارێن په‌كه‌كێ ل سه‌ر هێزێن پێشمه‌رگێن كوردستانێ ژی ب توندی شه‌رمزار كر و داخواز ژ په‌كه‌كێ كر كو ده‌ستان ژ وێ سیاسه‌تا خوه‌ به‌رده‌ت كو دبیته‌ ئه‌گه‌رێ شه‌ره‌كێ كو د خزمه‌تا دوژمن و داگیركه‌رێن كوردستانێ دایه‌.

ل ئالیێ دی پارتا سوسیالیست یا باكورێ كوردستانێ ژی هێرشا په‌كه‌كێ و شه‌هیدكرنا پێشمه‌رگێن كوردستانێ ب ده‌ستێ چه‌كدارێن په‌كه‌كێ ب توندی شه‌رمزار كر و راگه‌هاند كو دڤێت په‌كه‌كه‌ ده‌ستان ژ سیاسه‌تا خوه‌ یا دوژمناتیا هه‌رێما كوردستانێ به‌رده‌ت، دڤێت په‌كه‌كه‌ ئاخا هه‌رێما كوردستانێ بۆ مه‌ره‌مێن خوه‌ بكار نه‌ئینیت و به‌هانان ژی نه‌ده‌ته‌ ده‌ستێ ده‌وله‌تا توركیا دا ده‌ڤه‌رێن سنوری یێن هه‌رێما كوردستانێ داگیر بكه‌ت.

پارت و ئالیێن سیاسی یێن رۆژهه‌لاتێ كوردستانێ ژی ب توندی هێرشا په‌كه‌كێ و شه‌هیدكرنا پێشمه‌رگێن كوردستانێ ب ده‌ستێ چه‌كدارێن په‌كه‌كێ شه‌رمزار كرن و راگه‌هاندن كو دڤێت ئێدی كورد شه‌رێ هه‌ڤدو نه‌كه‌ن، چونكو شه‌رێ د ناڤبه‌را كوردان دا تنێ د خزمه‌تا داگیركه‌رێن كوردستانێ دایه‌، داگیركه‌رێن كوردستانێ دخوازن كورد شه‌رێ هه‌ڤدو بكه‌ن دا لاواز بن، ژ به‌ر هندێ ژی كریارا ڤێ دووماهیێ یا په‌كه‌كێ جهێ شه‌رمزاریێ یه‌ و دڤێت په‌كه‌كه‌ رێزێ ل هه‌رێما كوردستانێ بگریت و ره‌وشا نها یا ل هه‌رێما كوردستانێ به‌رچاڤ وه‌ربگریت و به‌هانان نه‌ده‌ته‌ ده‌ستێ ده‌وله‌تا توركیا كو هێرشی هه‌رێما كوردستانێ بكه‌ت.

ئه‌نجوومه‌نێ نشتیمانی یێ كوردی ل سووریێ كو ژ گه‌له‌ك پارتێن كوردی یێن رۆژئاڤایێ كوردستانێ پێك دهێت د داخۆیانیه‌كا فه‌رمی دا هێرشا په‌كه‌كێ ب توندی شه‌رمزار كر و راگه‌هاند كو په‌كه‌كه‌ ژی وه‌كو دوژمنێن كوردان بوویه‌ مه‌ترسی ل سه‌ر هه‌رێما كوردستانێ، نها پارچه‌یه‌ك ژ ئاخا كوردستانێ ئازاد بوویه‌ و بۆ هه‌ر كورده‌كێ ژی بوویه‌ جهێ شانازیێ، لێ مخابن په‌كه‌كه‌ ب كریارێن خوه‌ هه‌رده‌م مه‌ترسیێ ل سه‌ر ئه‌زموونا هه‌رێما كوردستانێ دروست دكه‌ت، په‌كه‌كه‌ بوویه‌ ئه‌گه‌ر و به‌هانان دده‌ته‌ ده‌ستێ توركیا كو هێرشی ئاخا هه‌رێما كوردستانێ بكه‌ت، ژ به‌ر هندێ ژی دڤێت په‌كه‌كه‌ د زووترین ده‌م دا هه‌موو هێزێن خوه‌ ژ ئاخا هه‌رێما كوردستانێ ڤه‌كێشیت.

ل ئالیێ دی ره‌وشه‌نبیر و سیاسه‌تمه‌دارێن كورد ل ئورۆپا ژی ب رێیێن جودا جودا نه‌رازیبوونا خوه‌ ل هه‌مبه‌ر شه‌هیدكرنا ٥ پێشمه‌رگێن كوردستانێ ب ده‌ستێ چه‌كدارێن په‌كه‌كێ دیار كرن و داخواز ژ په‌كه‌كێ كرن كو ئێدی ئاخا هه‌رێما كوردستانێ بۆ به‌رژه‌وه‌ندیێن خوه‌ بكار نه‌ئینیت و رێزێ ل هه‌موو سازی و ده‌زگه‌هێن هه‌رێما كوردستانێ بگریت، چونكو كریارێن په‌كه‌كێ بووینه‌ مه‌ترسی ل سه‌ر هه‌موو كوردان و دڤێت كورد ژی ل هه‌مبه‌ر په‌كه‌كێ ئێك هه‌لویست بن.

ئه‌میر ئه‌ترووشی

ماوه‌یێ‌ چه‌ند رۆژانه‌ توركیا ئۆپه‌راسیۆنه‌ك بۆ سه‌ر سنوورێن هه‌ردوو ده‌ڤه‌رێن سنووری یێن قه‌زا ئامێدیێ‌ بۆ سه‌ر گه‌ریلایێن په‌كه‌كێ‌ ده‌ستپێكریه‌ و ب ناڤێ‌ ئۆپه‌راسیۆنا په‌نجا بریسیێ‌ ب ناڤكریه‌ و ئه‌ڤ ئۆپه‌راسیۆنا بوویه‌ ئه‌گه‌ر كو ره‌وش گه‌له‌ك ئالۆز ببیت و شه‌ره‌كێ‌ به‌رده‌وام دناڤبه‌را سۆپایێ‌ توركیا و گه‌ریلایێن په‌كه‌كێ‌ دا په‌یداببیت.

رزگار به‌شیر، ئێك ژ هاوولاتیێن ده‌ڤه‌را كانی ماسێ‌ بۆ ئه‌ڤرۆ دیار كر، ماوێ‌ چه‌ند رۆژانه‌ سۆپایێ‌ توركیا ب رێكا فرۆكه‌یێن له‌شكه‌ری و سه‌ربازان، ئۆپه‌راسیۆنه‌كا به‌رفره‌هـ ل سنوورێ‌ هه‌ردوو ده‌ڤه‌رێن كانی ماسێ‌ و باتیفا ده‌ستپێكریه‌ و ل گۆره‌ی زانیاریان ئه‌ڤ ئۆپه‌راسیۆنه‌ ب ناڤێ‌ ئۆپه‌راسیۆنا په‌نجا بریسیێ‌ هاتیه‌ بناڤكرن و ئه‌ڤ ئۆپه‌راسیۆنه‌ ژی بوویه‌ ئه‌گه‌ر كو مه‌ترسیه‌كا مه‌زن ل سه‌ر گۆندێن هه‌ردوو ده‌ڤه‌ران په‌یدابوویه‌.

خویاژی كر كو د ماوێ‌ چه‌ند رۆژێن بۆری دا و هه‌تا نها دوو گۆندێن ده‌ڤه‌را كانی ماسێ‌ هاتینه‌ چۆلكرن و ئه‌گه‌ر ئه‌ڤ شه‌ره‌ ب ڤی ره‌نگی یێ‌ به‌رده‌وام بیت، پێشبینی دهێته‌ كرن هژماره‌كا دی یا گۆندێن ئاڤه‌دان یێن ده‌ڤه‌رێ‌ بهێنه‌ چۆلكرن و گۆت ژی: بڕیاره‌ سۆپایێ‌ تۆركیا هنده‌ك بنگه‌هێن خوه‌ یێن له‌شكه‌ری ل سه‌ر گۆپیتكا چیایێن كانی ماسێ‌ و باتیفا دانیت، دا كو ب تمامی هه‌ردوو ده‌ڤه‌ران بێخیته‌ بن كۆنترۆلا خوه‌.

سه‌ربه‌ست ئاكره‌یی، رێڤه‌به‌رێ‌ ناحیا كانی ماسێ‌ بۆ ئه‌ڤرۆ دیار كر، د ماوێ‌ چه‌ند رۆژێن بۆری دا ئۆپه‌راسیونه‌كا توركی ب هێز بۆ سه‌ر گه‌ریلایێن په‌كه‌كێ‌ بۆ سنوورێ‌ ناحیا كانی ماسێ‌ ڤه‌گرتیه‌ و ئه‌ڤه‌ ژی بوویه‌ ئه‌گه‌ر كو گۆندێ‌ (ئه‌دنێ‌) بهێته‌ چۆلكرن و مه‌ترسی ل سه‌ر هژماره‌كا زۆر یا گۆندێن دی ژی هه‌یه‌.

ل گۆره‌ی زانیاریێن ئه‌ڤرۆ، نوكه‌ تۆركیا كاردكه‌ت بۆ ڤه‌كرنا رێیه‌كا له‌شكه‌ری ژ لایێ باكوریڤه‌ ل گوندێ نزورێ، گوندێ نزورێ گونده‌كێ هه‌ڤسنوره‌ دگه‌ل كوردستانا باكور و ل سالا 1996 وه‌ره‌ یێ چۆلكرییه‌ و ئه‌ڤه‌ ده‌مه‌كه‌ له‌شكه‌رێ توركیا رێك ئینایه‌ گوندێ نزورێ و ب شێوه‌یێ له‌شكه‌ری سه‌ره‌دانا وی گوندی دكه‌ن.

به‌غدا وه‌كو پارێزگه‌ دنێریته‌ هه‌رێما كوردستانێ

ئه‌ندامه‌كێ خۆلا پێشتر یا په‌رله‌مانێ كوردستانێ راگه‌هاند، حوكمه‌تا هه‌رێما كوردستانێ ئێك ستراتیژیا دانوستاندنێ ل گه‌ل حوكمه‌تا عیراقێ یا هه‌ی و به‌غدا ژی وه‌كو پارێزگه‌ دنێریته‌ هه‌رێما كوردستانێ.

عه‌بدولسه‌لاك به‌رواری، كه‌سایه‌تیێ ئه‌كادیمی و ئه‌ندامێ پێشتر یێ په‌رله‌مانێ كوردستانێ ره‌شنڤیسێ پرۆژه‌ قانوونه‌كێ به‌رهه‌ڤكریه‌ بۆ چاوانیا رێكخستنا په‌یوه‌ندیا دارایی یا هه‌رێم و پارێزگه‌هێن عیراقێ ل گه‌ل حوكمه‌تا فیدرالی ، بۆ وێ چه‌ندێ سالانه‌ دانوستاندنێن ل سه‌ر بودجه‌ی نه‌ هند ده‌م پێ بچیت، نه‌ هند ژی ب نه‌ دروستی بهێته‌ بجهئینان.

به‌رواری دبێژیت” شه‌ش حه‌فت بودجا دبینین، شه‌ش حه‌فت سالێن دانوستاندنێ دبینین، ئه‌نجام ژی ل وان هه‌موو سالان دبیت چار پێنج هه‌یڤ هاتبنه‌ هنارتن، ئه‌وژی ب نیڤی، له‌وما لۆژیك ئه‌وه‌ ژمه‌ دهێته‌ خواستن بزانین كێشه‌ ل كیرێ یه‌؟ ئایا رێیه‌كا دی یا جودا هه‌یه‌ ژ وێ رێیا ئه‌م ره‌فتارێ ل گه‌ل كێشێن دكه‌ین؟”.

ب دیتنا عه‌بدولسه‌لام به‌رواری” حوكمه‌تا هه‌رێما كوردستانێ هه‌موو سالان ب ئێك شێواز ره‌فتار ل كه‌ل وی بابه‌تی كریه‌، پرسیار ئه‌وه‌ ئایا دشیان دایه‌ شێوازه‌كی دی تاقی بكه‌ین؟”.

خویاكر ژی” كێشا بودجه‌ی بۆ چه‌ند هۆكاران دزڤریت ژ وان پتریا په‌رله‌مانتار و ده‌سته‌ بژێرێن عیراقی باوه‌ری ب هزرا فیدرالیه‌تێ نینه‌، به‌رده‌وام وه‌كو هه‌ر پارێزگه‌هه‌كێ ل هه‌رێما كوردستانێ د نێرن، ناكۆكیا د ناڤبه‌را به‌غدا و هه‌رێما كوردستانێ دا ل سه‌ر ب رێڤه‌برنا دۆسێیا په‌ترۆلێ، ئه‌وژی گرێدایه‌ وه‌كو مه‌رج ب بودجه‌ی ڤه‌”.

سه‌باره‌ت پرسا بودجه‌ی ژی دبێژیت” په‌ترۆل هژماره‌، ئه‌و په‌ترۆله‌ چاوان دهێته‌ ب رێڤه‌برن و كی ده‌ردكه‌ت و كی دفرۆشیت، بابه‌ته‌كێ دی یه‌ و پێدڤیه‌ ل جهه‌كێ دی بهێته‌ چاره‌سه‌ركرن، به‌لێ دناڤ بودجه‌ی داه ژمار دهێت، به‌سرا ژی په‌ترۆلێ به‌رهه‌م دئینیت و هه‌رێما كوردستانێ ژی په‌ترۆلێ به‌رهه‌م دئینیت، به‌لێ هیچ مه‌رجه‌ك بۆ به‌سرا نه‌هاتیه‌ دانان بێژیت هه‌كه‌ هندێ راده‌ست نه‌كه‌ت، دێ بودجه‌ ژێ هێته‌ برین”.

ل دۆر چاره‌سه‌ركرنا وێ گرفتێ ب رێیا وێ ره‌شنڤیسا پرۆژه‌ قانوونا وی به‌رهه‌ڤكری، ناڤبری نموونان ل دۆر ئه‌زموونا ده‌وله‌تێن فیدرالی دئینیت كو هژماره‌كا هه‌رێمان ب خوه‌ڤه‌ دگرن و دبێژیت” سالانه‌ به‌ری به‌رهه‌ڤكرنا پرۆژه‌ قانوونا بودجه‌ی، ل هه‌یڤا (9) كۆنگره‌ك بهێته‌ سازكرن، وه‌زاره‌تا پلاندانانێ و دارایی ل گه‌ل هه‌رێمان روونیت، هه‌رێم ژی بودجێن خوه‌ به‌رهه‌ڤ بكه‌ن، ئه‌و هه‌رێمێن د زه‌نگین داهاته‌كی دانن ب گۆره‌ی ریّا ئاكنجیێن خوه‌، ئه‌و هه‌رێما زه‌نگین و داهاتێ وێ زێده‌تره‌، ژ پشكا خوه‌ بده‌ت وان پارێزگا یان هه‌رێمێن كو داهاتێ وان كێمتره‌ ژ وی داهاتێ وان ب خوه‌ پێدڤی پێ هه‌ی”.

ل دووڤ گۆتنا ڤی ئه‌ندامێ پێشتر یێ په‌رله‌مانێ كوردستانێ” هه‌موو پارێزگه‌هێن عیراقێ دێ پێ خوه‌ش بیت ب قانوون ئه‌ڤ بابه‌ته‌ بهێته‌ رێكخستن، ل سالا 2003 ژبه‌ر گه‌نده‌لیێ و نه‌زانینێ و عه‌قلیه‌تا به‌رێ، وه‌لێهاتبوو د ناڤبه‌را 40% هه‌تاكو 60% و هنده‌ك جاران ژی 70% نه‌دهاته‌ مه‌زاختن، ل سه‌رێ هه‌یڤێ  دزڤری بۆ عیراقێ، ئه‌ڤه‌ كێشه‌ك، پاره‌ ب هژمار بۆ پارێزگه‌هان هاتیه‌ مه‌زاختن و نه‌زڤریه‌، به‌لێ چ لێهاتیه‌، كه‌س ناچیت بپرسیت كو ب ملیاران دۆلارانه‌، هه‌كه‌ ئه‌و پاره‌ نه‌هێنه‌ زڤراندن، به‌لكو وبۆ پارێزگه‌هێ بمینن د سندووقه‌كا تایبه‌ت دا بۆ باشتركرنا ژێرخانا پارێزگه‌هێ و پێشكێشكرنا خزمه‌تێن گشتی”.

هه‌ولێر، قائید میرۆ

بریاره‌ ئه‌ڤرۆ رۆژا ئێك شه‌مبی شانده‌كێ هه‌رێما كوردستانێ سه‌ره‌دانا به‌غدا بكه‌ت و په‌رله‌مانتاره‌كێ كورد ژی ل به‌غدا ئاشكراكر، هه‌ردو حوكمه‌تێن هه‌رێمێ و به‌غدا لدۆر قانوونا بودجه‌ی دێ پێگیربن، چونكه‌ ژبلی بجهئینانا وێ قانوونێ، چ چاره‌سه‌ریێن دی نینن و تنێ هوورده‌كاری ماینه‌ بۆ هنارتنا پشكا هه‌رێما كوردستانێژ بودجه‌ی.

د. جوتیار عادل، په‌یڤدارێ حوكمه‌تا هه‌رێما كوردستانێ ب ده‌زگه‌هێن راگه‌هاندنێ یێن عێراقی راگه‌هاند، ئه‌ڤرۆ رۆژا ئێك شه‌مبی دێ شانده‌كێ هه‌رێما كوردستانێ سه‌ره‌دانا به‌غدا كه‌ت، كو مه‌ره‌م ژ ڤێ سه‌ره‌دانێ بۆ پتر لێك تێگه‌هشتنێ یه‌ د ناڤبه‌را هه‌ردولا و هنارتنا پشكا بودجێ هه‌رێما كوردستانێ ژلایێ به‌غداڤه‌، چونكه‌ ب گۆره‌ی رێكه‌فتنا هاتیه‌كرن، هه‌تا نوكه‌ حوكمه‌تا فیدرال پشكا هه‌رێما كوردستانێ نه‌ هنارتیه‌ و حوكمه‌تا هه‌رێما كوردستانێ ژی یا رژده‌ ل سه‌ر پێگیربوونا خوه‌ لدۆر بجهئینانا قانوونا بودجێ گشتیێ عیراقێ ووێ رێكه‌فتنا به‌ری نوكه‌ لسه‌ر بودجه‌ی هاتیه‌كرن.

دانا شه‌هید جه‌زا، ئه‌ندامێ جڤاتا نوونه‌رێن عیراقێ ژ فراكسیۆنا پارتی بۆ رۆژناما (ئه‌ڤرۆ) گۆت” هه‌تا نوكه‌ حوكمه‌تا عیراقێ كار ب قانوونا بودجه‌ی نه‌كریه‌، چونكه‌ پێدڤی ب ده‌ركرنا رێنما و هورده‌كاریان هه‌یه‌، له‌ورا ل رۆژێن بهێت دێ ده‌ست ب رێكارێن به‌لافكرنا بودجێ عیراقێ هێته‌كرن و پشكا هه‌رێما كوردستانێ ژی دێ هێته‌ ئێكلاكرن، له‌ورا ژی بریاره‌ شانده‌كێ هه‌رێما كوردستانێ ل دۆر هوورده‌كاریێن ناڤا ماده‌یێن ١١ و ١٢ یێن قانوونا بودجه‌ی دانوستاندنان دگه‌ل به‌غدا بگه‌ت، هه‌تا بزانین دێ چه‌وا هه‌ردولا پێگیربن و پشكا هه‌رێما كوردستانێ هێته‌ هنارتن، كو ئه‌ز باوه‌رم به‌غدا دێ هه‌ر پشكا هه‌رێمێ هنێریت، به‌لێ هێشتا دیار نینه‌ دێ چه‌ند بیت، چونكه‌ پارێ داهاتێ په‌ترۆلێ و داهاتێ ناڤخوه‌ دێ هێته‌ لێبرین و چه‌ند دمینیت دێ هێته‌ هنارتن، هه‌تا یێن پێنج هه‌یڤێن بۆری ژی دێ چاره‌سه‌ری بۆ هێته‌كرن و هێته‌ هنارتن.

دانای ئاماژه‌كر” ژبلی ڤێ رێكه‌فتنا هاتیه‌كرن چ چاره‌سه‌ریێن دی نینن، له‌ورا ئه‌ز یێ گه‌شبینم دێ پشتی سه‌ره‌دانا شاندێ هه‌رێما كوردستانێ رێكه‌فتن هێته‌ بجهئینان، هه‌تا دوماهیا ئه‌ڤ ساله‌ ژی دێ كار ب قانوونا بودجه‌ی هێته‌كرن، چونكه‌ ئه‌و قانوون بۆ ساله‌كێ یه‌ هه‌ر ژ ده‌ستپێكا هه‌یڤا ئێك هه‌تا دوماهیا هه‌یڤا 12، تنێ بۆ هنارتنا پاره‌ی هنده‌ك هوورده‌كاری هه‌نه‌ ژلایێ تیمێن شاره‌زا بهێنه‌ دیاركرن، دیاره‌ هه‌ردولا ژی به‌رهه‌ڤی ژی بۆ وان هوورده‌كاریان یێن كرین”.

ئه‌ڤرۆ:

شیره‌تكارێ مه‌كته‌با سیاسی یا پارتی دیموكراتی كوردستان راگه‌هاند، كۆنگرێ پارتی دێ ل ژڤانێ بۆ هاتیه‌ ده‌ستنیشانكرن ل هه‌یڤا داهاتێ ل پارێزگه‌ها دهۆكێ دێَ هێته‌ ئه‌نجامدان و به‌رهه‌ڤی ژی بۆ كۆنگره‌ یێن ب دووماهی هاتین .

عارف روشدی، شیره‌تكارێ مه‌كته‌با سیاسی یا پارتی دیموكراتی كوردستان، گۆت” هه‌تا نوكه‌ ژڤانێ ئه‌نجامدانا كۆنگرێ نوو یێ پارتی دیموكراتی كوردستان وه‌كو خوه‌ یێ مای ودێ ل ده‌مێ خوه‌ یێ دیاركری دا هێته‌ ئه‌نجامدان كو ئه‌و ژڤانێ بۆ كۆنگره‌ی هاتیه‌ ده‌ستنیشانكری ژی 26 گۆلانێ یه‌”.

عارف روشدی گۆت ژی” پارتی دیموكراتی كوردستان به‌رده‌وام مژوولی به‌رهه‌ڤیان بوو ژبۆ ئه‌نجامدانا كۆنگره‌ی و ئاماده‌كاریێن تمام ژی بۆ هاتینه‌ كرن و تنێ چاڤه‌رێ ژڤانی دكه‌ین، بۆ وێ چه‌ندێ ده‌ست ب ئه‌نجامدانا كۆنگره‌ی بهێته‌ كرن، چونكی كۆنگره‌ گه‌له‌ك یێ پێدڤیه‌”.

وی شیره‌تكارێ مه‌كته‌با سیاسی یا پارتی به‌حس ل وێ چه‌ندێ ژی كر كو بریاره‌ كۆنگرێ پارتی هه‌روه‌كو چاوان پێشتر بریار ل سه‌ر هاتبوو دان، ل دهۆكێ بهێته‌ ئه‌نجامدان.

بریار بوو سالا 2020 كۆنگرێ پارتی دیموكراتی كوردستان بهێته‌ ئه‌نجامدان، به‌لێ ژبه‌ر به‌لاڤبوونا نه‌خوه‌شیا كرۆنا، بۆ ئه‌ڤ ساله‌ هاته‌ پاشخستن و هه‌تا نوكه‌ بریار ئه‌وه‌ ل هه‌یڤا داهاتی ب رێڤه‌ بچیت.