ئەڤرۆ، ھۆشەنگ تاجر:

چاڤدێرێن سیاسی دیار دکەن کو دەمەکە ئیران و ھێزێن دی کار بۆ لاوازکرنا پێگەھێ ھەرێما کوردستانێ دکەن و ھەموو کارتێن ھەی ل دژی ھەرێما کوردستانێ بکار دئینن و نھا ژی ب رێیا گرۆپێن سەر ب حەشدا شەعبی کار بۆ تێکدانا ئارامیا ھەرێما کوردستانێ دکەن کو ئارمانجا سەرەکی ژی لاوازکرنا پێگەھێ ھەرێما کوردستانێ یە.

سدیق مەحمودی چاڤدێرێ سیاسی یێ رۆژھەلاتێ کوردستانێ بۆ ئەڤرۆ دیار کر کو ئاشکرایە ھەرێما کوردستانێ بوویە جھێ گرنگ د ھەڤسەنگیێن سیاسی یێن ل دەڤەرێ و ب تایبەتی ژی پشتی ریفراندۆما ھەرێما کوردستانێ د ئاستێ رۆژھەلاتا ناڤین دا ب تایبەتی ژی ھەر دو وەلاتێن ئیران و تورکیا کار بۆ لاوازکرنا پێگەھێ ھەرێما کوردستانێ دکەن، ئیران و تورکیا رۆژانە دەڤەرێن سنوری یێن ھەرێما کوردستانێ بۆردومان دکەن و گۆت: (ب تایبەتی ئیران گەلەک کارتان ل دژی ھەرێما کوردستانێ بکار دئینیت، بەری نھا ب رێیا بەلاڤکرنا فلمەکێ خواستن وەسا نیشا بدەن کو وان ھەرێما کوردستانێ پاراستیە، نھا ل بەغدا ب رێیا ھێزێن شیعە ب ھەموو رەنگەکێ کار دکەن دا بابەتێ بۆدجەی و موچێ فەرمانبەرێن ھەرێما کوردستانێ وەکو کارتەکا فشارێ ل دژی ھەرێما کوردستانێ بکار بینن و دخوازن ھەرێما کوردستانێ ھەموو نەفتا خوە رادەستی بەغدا بکەت).

ناڤھاتی ئەو یەک ژی دیار کر کو ھەری دووماھیێ ژی گرۆپێن سەر ب ئیرانێ ب موشەکان ھێرشی ھەولێرێ کرن کو ھێرشا دو رۆژێن بۆری یا ل سەر ھەولێرێ پەیامەکا ئاشکرایە ژ ئالیێ ئیرانێ و گرۆپێن سەر ب وێ یێن ل عیراقێ، وان دڤێت ئارامیا ل ھەرێما کوردستانێ تێک بدەن، چونکو ھەرێما کوردستانێ تنێ دەڤەرا ئارامە ل عیراقێ و خوەدان پێگەھەکێ خوە یێ ب ھێزە و گۆت: (پرانیا کارتێن کو ئیرانێ و گرۆپێن سەر ب وێ ل دژی ھەرێما کوردستانێ بکار ئینان بێی ئەنجام مان و نھا ژی دخوازن ئارمیا ھەرێما کوردستانێ تێک بدەن، ئارمانجا سەرەکی ژی بێگومان بۆ لاوازکرنا پێگەھێ گرنگ یێ ھەرێما کوردستانێ یە).

سەعید مورادی ئەندامێ رێکخراوا مافێن مرۆڤی یا رۆژھەلاتێ کوردستانێ ژی بۆ ئەڤرۆ دیار کر کو ھەبوونا ھەرێما کوردستانێ وەسا کریە کو رۆژانە د ئاستێ نێڤدەولەتی دا بەحسێ مافێن کوردان بھێتە کرن، ب سەدان کەنالێن تەلەفزیونی و دەزگەھێن راگەھاندنێ ل ھەرێما کوردستانێ ھەنە کو رۆژانە بەحسێ کوردان ل ھەموو جیھانێ دکەن، ئەو یەک ب دلێ دوژمنێن گەلێ کوردستانێ نینە وان دڤێت دەنگ و ئیرادا گەلێ کوردستانێ ژناڤ ببەن و ژ بەر ھندێ ژی ب ھەموو رەنگەکێ کار بۆ لاوازکرن و ژناڤبرنا قەوارێ ھەرێما کوردستانێ دکەن و گۆت: (ئیران ل بەغدا ھێزێن شیعە ل دژی ھەرێما کوردستانێ بکار دئینیت، نھا ژی میلیشاتێن شیعە بووینە مەترسیەکا گەلەک مەزن بۆ ھەرێما کوردستانێ، ئیران د بیاڤێ ھەوالگیری و کەلتوری ژی ب ھەموو رەنگەکێ ل دژی ھەرێما کوردستانێ کار دکەت، گرنگە ھەموو ھێزێن کوردی پێکڤە کار بۆ پاراستنا ھەرێما کوردستانێ بکەن، چونکو براستی ژی ھێرشا ڤێ دووماھیێ ل سەر ھەولێرێ مەترسیەکا گەلەک مەزنە).

خەلیل ئیسماعیلی چاڤدێرێ سیاسی یێ رۆژھەلاتێ کوردستانێ ژی دیار کر کو دوژمنێن گەلێ کوردستانێ ب ھەموو رەنگەکێ کار دکەن دا قەوارێ ھەرێما کوردستانێ لاواز بکەن و ژناڤ ببەن، ب ھەموو رەنگەکێ کار بۆ ھندێ دکەن، دورپێچەکا گەلەک مەزن ل سەر ھەرێما کوردستانێ ھەیە، چەندین سالن ئیران ناھێلیت بەغدا بودجێ ھەرێما کوردستانێ فرێکەت و گرۆپێن سەر ب ئیرانێ و ئەو میلیشاتێن ل عیراقێ ژی بووینە مەترسیەکا گەلەک مەزن و گۆت: (دڤێت ئەمریکا و ھێزێن ھەڤپەیمانیا نێڤدەولەتی ل ھەمبەر ھێرشا ڤێ دووماھیێ ل سەر ھەولێرێ بێدەنگ نەمینن، چونکو ئیرانێ دڤێت بزانیت کا دێ ھەلویستێ ئەمریکا چ بیت، بێگومان ھەکە ھەلویستێ ئەمریکا توند بیت ئێدی ئەو جارەکا دی ھێرشێن وەسا ناکەن لێ ھەکە ھەلویستێ ئەمریکا نەرم بیت بێگومان دێ ھێرشێن وەسا د بەردەوام بن).

ئەڤرۆ:

دوھی شەمبیێ ١٣/٢/٢٠٢١ ب پشکداریا مەسرور بارزانی، سەرۆکێ حوکمەتا ھەرێما کونسۆل و نوونەرێن وەلاتان، ھەروەسا ١٠ گەنجێن خودان ھزرێن نوو، پێنجەمین کۆنفرانسێ کوردستانێ و نێڤدەولەتی (تێدیکس نیشتیمان) دەستپێکر.

د وی کۆنفرانسی دا، مەسرور بارزانی گۆتارەک پێشکێش کر و ئەڤە دەقێ وێ یە:

ئەز ئەڤرۆ یێ لڤێرێ بۆ نیشادانا پشتەڤانیا خوە و حوکمەتا ھەرێما کوردستانێ بۆ وان گەنجێن ئەڤرۆ ل ڤێرە کۆمبووین، ھەروەسا بۆن یشادانا پشتەڤانیا خوە بۆ گەنجیچن مە ب گشتی، ژ زاخۆ ھەتا خانەقینێ کو ل چەند ھەیڤێن بۆری دا، ژ نێزیک ئاگەھداری  بیر و بۆچوون و ھزر و پەرۆشی و گەشبینیا وان بووم، بۆ باشتربوونا رەوشا کوردستانێ. چ ئەو گەنجێن ل ھەولێرێ کاری بۆ بەرفرەھکرنا کارێ بەرگدروویاخوە و ھناردەکرنێ بۆ بازارێ نوو دکەن، یان ئەو خانما رزگار بووی یا ئازا یا ئیزدی، ل دھۆکێ دوکانەکا شریناھیان یا بچووک ڤەکریە و ب رێیا وێ چەندێ ھاریکاریا خێزانا خوە دکەت.

ئەوان بازرگانیەکا بچووک کریە و خەلکێ خوەجە ب کارخستینە، کو ب عەقلیەتەکا نوو و ل سەر بنەمایێ پشت ب خوە بەستنێ و داھێنانێ کار دکەن. ژ بەر ڤێ چەندێ ژی ئەز ئەڤرۆ یێ ل ڤێرێ، تاکو دەستپێکەکا نوو د ناڤبەرا حوکمەتا ھەرێما کوردستانێ و ھەوە دەست پێ بکەین، کو پەیوەندیەک بیت، ل سەر بنەمایێ باشترکرنا رەوشا کوردستانێ ژ لایەکی، و پەیداکرنا دەلیڤێن راستەقینە بۆ گەنجان ژ لایەکی دی ڤی، ئەڤە ژی دەرفەتەکە بۆ زێدەتر لێک نێزیکبوونا مە ژ ھەڤدوو.

ئەز دزانم ئەو ئاستەنگێن ل بەردەم ھەوە ھەین، د دژوارن و ھندەک ژ وان، بۆ چەندین نەڤیە یێن ھەین، بەلێ د ھەمان دەم دا دزانم، ئەو دەلیڤێن نوکە ھەین ب ساناھی ب دەستڤە نەھاتینە.

ئەز ژی وەکو پتریا خەلکێ کوردستانێ د خێزانەکێ دا یێ ژدایک بوویم، بەردەوام د ژیانەکا نە سەقامگیر دا بوو و ل ئاوارەییێ ژیاینە و مە ھەست ب راستیێن تەحل یێن ژیانێ کریە و بەردەوام ب حەسرەت خواستا مە زڤرین بوو بۆ نیشتیمانی، ئەز دزانم خواندن و پەروەردا باش، دشێت چ گۆرانکاریەکا مەزن د ژیانا مرۆڤی داد روست بکەت. ھوون بەختەوەرن کوپ تریا ھەوە ئەو زەحمەتیە نەدیتیە، کود ایک و باب و باپیرێن ھەوە، ل چەرخێ بۆری دیتین و روو ب روو بووین.

ئەز دزانم کو نوکە چاڤەریێن ھەوە د جودانە. (ئارین) ێ کورێ من گەلەک جاران دبێژیتە من” بیر و بۆچوونێن گەنجان نوکە د جوداترن و خواست و داخوازیێن وان د زێدەترن، لەوما دڤێت زێدەتر دەلیڤێن کاری بۆ گەنجان پەیدا بکەین”.

تێ دگەھم کو نابیت ئەم بۆریێ خوە، بەردەوام وەکو بیانویەک، بکاربینین بۆ لێکدانا وێ ڤالاھیا د ناڤبەرا گەنجان و حوکمەتێ دا دروست بووی، بەلێ بۆ وێ چەندێ مفای ژ دەلیڤا راستەقینە یا ب ھێزکرنا ڤێ پەیوەندیێ وەربگرین، دڤێت ل پێدڤی و پێگەھێ ھەڤددوو تێبگەھین. لەوما ب راشکاوی بۆ ھەوە دبێژم: ئەز ب خوە یێ پێگیرم ب پەیداکرنا دەلیڤێ بۆ گەنجێن مە. بێگومان حوکمەتێ رۆلەکێ گرنگ یێ ھەی د پەیداکرنا وێ دەلیڤێ دا و پێدڤیە حوکمەت چارچۆڤێ قانوونی و ئابووری بۆ گەشەپێدان و ھاندانا ھەڤپشک و ھەڤپشکیا کەرتێ گشتی و تایبەت دیار بکەت، بۆ وێ چەندێ خودان کار و بازرگان، گەشێ بکەن و ھەروەسا ھاریکاریا گەشەپێدانا بزنسا بچووک ژی بکەن.

ھەروەسا دزانم کود بیت مەشق و پەروەردا دروست ھەبیت، بۆ وێ چەندێ زوورترین دەلیڤە بۆ گەنجێن مە پەیدا ببن، بەلێ بێگومان رێیەکا درێژ یا ل بەراھیا مە بۆ ئەنجامدانا ڤان گۆرانکاریان، دەم دڤێت و ھندەک جاران ھندەک کەس خودان بەرژەوەندیێن تایبەتن و رێگریێ ل ئەنجامدانا چاکسازیێ دکەن.

پێدڤیە ئابوورەکی ئاڤا بکەین کو کێمتر پشتبەستنێ ب کەرتێ گشتی بکەت، ئابوورەک بیت، زێدەتر پشت ب ھەماھەنگیێ  و ھاریکاریێ د ناڤبەرا کەرتێ گشتی و تایبەت ببەستیت بۆ پێشخستنا ژێرخانا ئابووری و پشتەڤانیکرنا بازرگانیا بچووک و ناڤین کو بشێن زوورترین دەلیڤێن کاری پەیدا بکەن.

ئەز یێ پشت راستم ل سالێن داھاتی، بازرگانی و بزنسا بچووک و ناڤین، ئەوێن ژ لایێ گەنجێن وەکو ھەوە دھێنە ب رێڤەبرن، دێ گەشێ کەت و بیتە پشکەک ژ وەرچەرخانەکا گەلەک پێدڤی، ل ئابوورەکێ پشت بەستی ب بھایێ نەجھگیر یێ پەترۆلێ، بۆ ئابوورەکێ گەشگیر، کو ژ جڤاکەکێ بکارئێنەر ببینە جڤاکەکێ بەرھەمھینەر.

ئەز یێ ب پەرۆشم بۆ وێ چەندێ بزانم ئەم دشێن چ بدەستڤە بینین ژ وزا کەسک و نووکەر، ل پیشەسازیا تەکنەلۆژیا پێشکەفتی، د بوارێ گەشتیاری، د کارێن داھێنەرانە و پتریا بوارێن دی یێن ئابوورێ مە. ئەڤە دێ وەرچەرخانەک بیت د دەمێ درێژخایەن دا، کو دەلیڤێن کاری دێ پەیداکەت و ھاریکارە بۆ وێ چەندێ، ھەرێما مە پێشبەرگیێ بکەت، پشت راستم ئەم د ئاراستەکێ راست دا گاڤان د ھاڤێژین، کو خوەشبەختانە ھەرێما کوردستانێ د جیھانێ دا، یا ناڤدارە ب وێ چەندێ کو پەناگەھەکا ئارام و لێبۆدە بوو و ئەم ژی پەرە ب وان بھایان ددەین، لەوما ئەز د وێ باوەریێ دا مە کو ھەرێما کوردستانێ، کو خودانا ئاکنجیێن گەنج و بەرھرەمەند و ھیوا بەخشە نەکو تنێ دشێت ببیتە سەنتەرەکێ بازرگانی ل کوردستانێ، بەلکو دێ بیتە مەلبەندەکێ ئابووری و بازرگانی و وەبەرئێنانێ یا گرنگ ل عیراقێ و ل دەڤەرێ.

ئەز ب تایبەتی پەرۆشێ پەیداکرنا دەلیڤێ بۆ ب دیجیتالکرنا کوردستانێ مە، کو گەلەک یا پێدڤی و گرنگە بۆ بدەستڤەئینانا وان پێشکەفتنێن ئەم دخوازین د کاروبارێن حوکمەتێ دا بدەستڤەبینین، کو پشکەکا سەرەکی یا کارناما چاکسازیا کابینا نەھێ یا حوکمەتا ھەرێما کوردستانێ یە، ب ئاراستەیا بدەستڤەئینانا دادپەروەریێ و شەفافیەتێ. د راست یدا مە سیستەمەکێ تمام دیجیتالی بۆ داراییا گشتی یا حوکمەتا ھەرێما کوردستانێ دەستپێکریە، کو ب تمامی ژلایێ کارمەندێن گەنج یێن خودان شیانێن کوردستانی دناڤ حوکمەتێ دا، ھاتیە دروستکرن و گەشە پێ ھاتیە دان. ھەروەسا مە مفا ژ گەنجێن گەشەپێدەرێن خوە وەرگرتیە بۆ دانانا خزمەتگوزاریێن دیجیتالی یێن دی، ب تایبەتی د پۆرتال و وێبسایتێ حوکمەتا ھەرێمێ کو ئارمانجا وێ پێشکێشکرنا خزمەتگوزاریێن گشتی یە.

د دەمەکی دا ئەڤ پێنگاڤە دێ بنە ئەگەرێ زێدەکرنا شەفافیەتێ و کاراکرنێ د خزمەتا گشتی دا، ھەروەسا ھاریکارە بۆ ھەوە ژی د گەھاندنا ھزرێن ھەوە بۆ بازاری و ب ساناھی تۆمارکرنا براند و کۆمپانیان و کاروبارێن پێدانا باجێ ژی دێ ب ساناھیتر کەت.

بەلێ ھەوە ھەموویان رۆلەکێ گەلەک مەزن د پێشڤەبرنا حوکمرانیێ یێ ھەی و بێگومان حوکمەتا ھەرێمێ ب تنێ نەشێت وی رۆلێ بگێریت، لەوما مە پێدڤی ب پشتەڤانیێ یا ھەی، مە دڤێت ھوون پشکەک بن ژ دیالۆکێ و دانوستاندنێ، ب ئارمانجا باشترکرن و ب ھێزترکرنا نیشتمانێ مە، بۆ وێ چەندێ کوردستان ب ھێزتر بیت، پێدڤیە ھوون گەنج خوە رێکبێخن و ل پیناڤی پێشخستنا کوردستانێ دا ھزرێن نوو بەرچاڤ بکەن.

ھیڤیدارم گوە ل وان دەنگ و پرۆپاگندا نەکەن، کوب ۆ ھەوە دبێژن ئەم نەشێین بەر ب پێشڤە گاڤا بھاڤێژین و پێشبکەڤین. گوھێ خوە نەدەنە وان کەسان، کو بەردەوام گومان ھەیە و ب رەشبینی دبێژن، ئەم ھەر ل بەرێ یێن راوەستیاین، بەلێ بەردەوام ئەو بۆچوونە یێن ھاتینە پۆچەلکرن، لەوما داخوازێ ژ ھەوە دکەم ھەوە باوەری ب خوە و شیانێن خوە ھەبیت، چونکی ھوون دشێن گورانکاریان دروست بکەن و پشت راست بن کاریگەریا ھەوە یا بێ سنورە.

ل رۆژێن بۆری ل گەل ھژمارەکا خودانکاران کۆمبووم، خوەشحال بووم کو من گوھێ خوە دا ئەزموونێن وان د چاوانیا دروستکرنا کارێن خوە دا و پەرەپێدان ب مارکێن خوە و ئەو ئاستەنگێن روو ب روو بووین. بۆ من گەلەک جھێ سەرنجێ بوو گوھێ خوە بدەمە پەرۆشیا وان و د ھەمان دەم د اگوە ل پێشنیازێن وان بگرم کا حوکمەت دشێت چ بکەت ل پیناڤی ئاسانکاریان بۆ گەشەپێدانا کارێن بازرگانی.

دخوازم پرەکێ دروست بکەم بۆ زێدەتر گەھشتنا دەنگێ گەنجان ب حوکمەتێ، کو ب دیتنا من ئەڤە کارەکێ گەلەک گرنگە، لەوما دخوازم گوھێ خوە بدەمە ھەوە و حوکمەتا ھەرێمێ مفای ژ شیانێن ھەوە وەرگریت.

من داخواز کریە کو گرۆپەکێ نوونەراتیا گەنجان بھێتە دروستکرن بۆ وێ چەندێ نیگەرانی و خواست و داخواز و ھزرێن گەنجان راستەوخوە بگەھنە نڤیسینگەھا من، خوەشحالم کو تیما من یا پێکھاتیە ژ چەندین گەنجێن خودان شیان و ژێھاتی کو گەلەک ب وەستیان کاردکەن بۆ وێ چەندێ ھاریکار بن بۆ بدەستڤەئینانا ڤان ئارمانجان.

ئەڤرۆ:

بەرپرسێ مەکتەبا پەیوەندیێن دەرڤە یا پارتی دیموکراتی کوردستان راگەھاند، سەرۆکێ ئەمریکی یێ نوو و ئیدارا وی، پەیوەندیێن باش ل گەل ھەرێما کوردستانێ و بەرپرسێن ھەرێمێ، ب تایبەتی ژی ل گەل سەرۆک بارزانی یێن ھەین و ئەمریکا ل گەل وێ چەندێ یە ھەرێما کوردستانێ یا ب ھێز بیت و پشتەڤانیێ لێ دکەن.

ھشیار سێوەیلی، بەرپرسێ مەکتەبا پەیوەندیێن دەرڤە یا پارتی، گۆت” دەمێ ئیدارەکا نوو یا ئەمریکی دەست بکاردبیت، شرۆڤەکرنەکێ بۆ ستراتیژیەتا ئایسایشا نەتەوی یا خوە دکەن و ل وێ ستراتیژیێ ژی ھێلێن گشتی یێن ئاسایشا نەتەوی و ستراتیژیەتا دەرڤە دادرێژن، کو جارێ ئیدارا نوویە و مژوولی دارێشتنا وێ ستراتیژیەتێ یە بۆ چار سالێن داھاتی، کو بۆچوونێن خوە بەرامبەر جیھانێ و روودانێن جیھانی دیار دکەن، رۆژھەلاتا ناڤەراست ژی پشکەک بوو ژ ستراتیژیەتا ئاسایشا نەتەوی یا ئەمریکی و چاڤەرێ دکەین ئەو ستراتیژیەتا بھێتە دارێشتن بۆ شێوازێ مامەلەکرنا وان بەرامبەر رۆژھەلاتا ناڤین، بەلێ ئەوا ئەم دبینین، جۆ بایدن سەرۆکێ نووی یێ ئەمریکا و ئیدارا وی، دێ جوداھیەکا مەزن ل گەل سەرۆک و ئیدارا بەرێ ھەبیت، ب تایبەت د پەیوەندیێن نێڤدەولەتی و شێوازێ مامەلا وان ل گەل رۆژھەلاتا ناڤەراست”.

سێوەیلی گۆت ژی” بایدن کەسەکێ شارەزایە د سیاسەتا پەیوەندیێن دەرڤە و ئالۆزیێن رۆژھەلاتا ناڤەراست و چەندین جاران ژی سەرەدانا عیراقێ و ھەرێما کوردستانێ کریە و ژ نێزیک ڤە پەیوەندیێن باش ل گەل بەرپرسێن ھەرێمێ و ب تایبەت ل گەل سەرۆک بارزانی یێن ھەین، ھەروەسا د چەندین کۆمبوونان دا بایدنی بەحسێ داخوازیێن کوردان ل عیراقێ کریە و تێگەھشتنەکا باش بۆ کێشێن مە یا ھەی، بەلێ نوکە ئەو سەرۆک و دبیت جوداھی ھەبیت، بەلێ د بەرژوەندیا کوردان دایە و تێگەھشتنەکا باش بۆ دۆزا کوردی یا ھەی”.

دیارکر” ئەمریکا یا پێگیرە بەرامبەر عیراقێ و دو ھزار و ٥٠٠ سەربازێن ئەمریکی ل عیراقێ یێن ھەین، باوەرناکەم ھژمارا وان کێم بکەت و زێدەبوونا ھژمارا وان ژی گرێدایە ب رەوشا ئەمنی و زێدەبوونا داعشێ، لەوما جارێ ھێزێن وان دێ ب وی شێوەی مینن”.

ئاماژەکر” بایدنی و شیرەتکارێن وی شارەزاییەکا باش ل دۆر ھەرێما کوردستانێ یا ھەی و پەیوەندیێن باش ل گەل بەرپرسێن ھەرێمێ یێن ھەین و ئەمریکا پشتەڤانیێ ل ھەرێمەکا ب ھێز ل عیراقێ دکەت و حەز دکەت ھەرێم یا ب ھێز بیت”.

ھەولێر، قائید میرۆ

دانوستاندێن د ناڤبەرا ھەرێما کوردستانێ و بەغدا  ل دۆر پڕۆژە قانوونا بودجێ گشتیێ عیراقێ بەردەوامن و پەرلەمانتارەکێ پارتی ژی ئاشکراکر، ھیڤیەک ھەیە ئەڤرۆ یان سبەی رێککەفتن بھێتە ئەنجامدان و دبێژیت، پێشنیازەکا باش ھاتیەکرن ل دۆر پرسا پەتڕۆلا ھەرێما کوردستانێ و ھەردولا نێزیکی ئێکن.

دانا جەزا،  پەرلەمانتارێ فڕاکسیۆنا پارتی ل جڤاتا نوونەرێن عیراقێ بۆ رۆژناما ئەڤرۆ دیارکر” ل رۆژا دوشەمبی لێک تێگەھشتنا زێدەتر ھەبوویە ل دۆر پشکا ھەرێما کوردستانێ دناڤا پڕۆژە قانوونا بودجێ گشتیێ عیراقێ دا، سەرۆکێ لژنا دارایی ل جڤاتا نوونەران ئاشکراکریە ل ڤان دو رۆژان دێ ھەموو بابەتان ئێکلاکەن، سەرۆک وەزیرێن عیراقێ و وەزیرێ پەترۆلا عیراقێ ژی پشکداری کۆمبوونا لژنا دارایی بووینە و پیشنیازەک بۆ چارەسەرکرنا پرسا پەترۆلا ھەرێما کوردستانێ کریە ئەوژی ئەو پتڕۆلا بۆ بەرھەمێ نافخوە، کریا کۆمپانیا دھێتە بکارئینان، بھێتە جوداکرن و تنێ پەتڕۆلا ھەرێما کوردستانێ ٢٥٠ ھزار بەرمیل دمینن ئەو ٢٥٠ ھزار بەرمیل بھێنە رادەستکرن ژلایێ حوکمەتا ھەرێما کوردستانێ ڤە، ھەردولا نێزیک بووینە ژ رێککەفتنێ لدۆر ئەڤێ پێشنیازێ تنێ ھندەک ھووردەکاری ماینە، لەوڕا نێزیک بووینە بگەھنە رێککەفتنێ ودشێم بێژم تنێ لسەر قەبارێ بەرھەمئینانا پەتڕۆلێ ماینە، ھیڤیەک ھەیە بۆ رێککەفتنێ و ئەز باوەرم رێککەفتن نێزیکترە ژ نەگەھشتن ب رێککەفتنێ”.

دانا جەزا ئاماژەکر” حوکمەتا ھەرێما کوردستانێ چەندین پێشنیاز داینە بەغدا بۆ رێککەفتنێ، مخابن پێشنیازێن بەغدا زێدەتر ئەو پێشنیازن کو رێککەفتن لسەر نەھێتەکرن، بەلێ ئەڤا دوماھیێ من ئاماژە بۆ کری جھێ دانوستاندنێ یە ئەڤرۆ ھەتا سبەی رێککەفتن لسەر بھێتەکرن، سیاسەتا ھەرێما کوردستانێ ب حوکمەت و لایەنێن سیاسی و فڕاکسیۆنێن پەرلەمانی ڤە ھەموو بزاڤەکێ دکەن بۆ گەھشتن ب رێککەفتنێ، ل دەف مە رێککەفتنێ چو بەدیل نینە و ئەم د گەشبینین ب بزاڤێن رۆژا دوشەمبیا بۆری ھاتینەکرن بۆ گەھشتن ب رێککەفتنێ، لایەنێ سیێ ژی چو رۆل نەبوویە دناڤا دانوستاندنان دا، ئەم باوەرین لایەنێن عیراقی د ناڤبەرا خوە رێککەڤن باشترە چونکی رێککەفتن باشترین چارەسەریە”.

ئەڤرۆ: عەزیز ھەورامی:

کۆمەکا کەسێن بەرژەوەندیخواز و خوە فرۆش کار بۆ وێ چەندێ دکەن پارێزگەھا سلێمانیێ ژ ھەرێما کوردستانێ جودا بکەن و بێخنە ژێر دەستھەلاتا عەرەبان، سەرکردەکێ بزاڤا ئیسلامی ل کوردستانێ دبێژیت، دێ بەرھنگاریا ھەر گاڤەکێ کەین کو  دبیتە مەترسی ل سەر ئێک پارچەیا ئاخا کوردستانێ.

سەلام کەریم، ئەندامێ سەرکردایەتیا بزاڤا ئیسلامی ل کوردستانێ، بۆ رۆژناما ئەڤرۆ گۆت” مە وەکو بزاڤا ئیسلامی باوەری ب سەربخوەیا کوردستانێ یا ھەی و بۆ وێ چەندێ ژی مە شەرێ رژێما بەعس کریە، ب ھەموو شێوەکی ژی پارچەکرنا کوردستانێ و جوداکرنا سلێمانیێ ژ قەوارێ ھەرێما کوردستانێ رەت دکەین”.

گۆت ژی” ئاخڤتنێن ل سەر جوداکرنا پارێزگەھا سلێمانیێ ژ قەوارێ ھەرێما کوردستانێ ب فشارەکا سیاسی دبینین، باوەریا مە ئەوە کو دڤێت داھاتێ وەلاتی یێ زەلال بیت و چ حزبەک جورئەتێ نەکەت بەحس ل جوداکرنا سلێمانیێ ژ قەوارێ دستووری یێ ھەرێما کوردستانێ بکەت”.

دیارکر ژی” ئەو گەندەلی و نە زەلالی و نە شەفافیەتا ل عیراقێ ھەی ب دەھان جااران ژ ئەوا ھەرێمێ ھەی پترە، پێدڤیە ل ھەرێما کوردستانێ چاکسازی ببیتە بنەمایەکێ سەرەکی و پێگەھێ ھەرێما کوردستانێ ب وێ چەندێ ب ھێز ببیت”.

خویاکر” گرنگە کۆمبوونا ھەموو لایەنێن سیاسی بھێتە ئەنجامدان و ب ئێکگرتی ل ھەمبەر بەغدا ب راوەستین، چونکە بەردەوام زێدەبوونا داخوازیێن بەغدا ل دانوستاندنێن ل گەل شاندێ ھەرێما کوردستانێ ل دەرڤەی دستووری، پەیوەندی ب پەرت و بەلاڤیا ل ناڤخوەیا ھەرێما کوردستانێ ھەی و پێدڤیە ب تایبەتی پارتی و ئێکەتی پەیوەندیێن خوە باشتر بکەن”.

ل دووماھیێ گۆت” د کۆمبوونێن خوە دا ل گەل پارتی و ئێکەتی و حوکمەتا ھەرێمێ ئەوبوو مە بەردەوام پشتەڤانیێ خوە بۆ ئێک پارچەییا کوردستانێ دیارکریە و رێ نەھێتە دان ژبەر گەندەلیا ھندەک کەسان، قەوارێ ھەرێما کوردستانێ بکەڤیتە د مەترسیێ دا”.