ئالان حه‌مه سه‌عید وه‌زیرێ په‌روه‌رده‌یا حكومه‌تا هه‌رێما كوردستانێ د پرێسكۆنفرانسه‌كێ دا راگه‌هاند: رۆژا ئێكشه‌مبێ 7ى شواتێ دێ پرۆسه‌یا خواندنێ ده‌ستپێكه‌ته‌ڤه.
وه‌زیرێ په‌روه‌ردێ گۆت ژى: رۆژا شه‌مبی 6ى شواتێ مامۆستا و رێڤه‌به‌ریێن قوتابخانه‌یان دێ ده‌ست ب ده‌وامێ كه‌ن و دێ به‌رهه‌ڤیێ بۆ رۆژا دووڤدا و ده‌واما قوتابییان كه‌ن.
ئالان حه‌مه سه‌عید وه‌زیرێ په‌روه‌رده‌یا حكومه‌تا هه‌رێما كوردستانێ ئه‌ڤرۆ رۆژا چوارشه‌مبى 3-2-2021 ل دانێ ئێڤارى د پرێسكونفرانسه‌كى دا بریار دا كو ده‌رگه‌هێن خواندنگه‌هان دێ ل حه‌فتییا بهێت ل رۆژا ئێكشه‌مبى 7ى شواتێ هێنه ڤه‌كرن، ئه‌و ژى ل دووڤ رێنمایێن خۆ پاراستنێ كو ئه‌ڤ رێنمایه دێ گه‌له‌ك د توند بن.
ئالان حه‌مه سه‌عیدى گۆت ژى: ئه‌ڤ بریارا وان ژى هات ل دووڤ وان داتایێن وه‌زاره‌تا ساخله‌میێ هات كو رێژا كورۆنایێ كێم بوویه، و ئه‌گه‌ر وان زانى دێ كۆرۆنانا د ناڤ خواندنگه‌هان دا زێده‌بیت دێ ب زوو ترین ده‌م ده‌رگه‌هێن خواندنگه‌هان گرنه‌ڤه و دێ وان به‌دیلێن دى هه‌بن بۆ خواندنێ و ئارمانجا وان ژى ئه‌و كو پرۆسێسا خواندنێ یا به‌رده‌وام بیت.
د لایه‌كێ دیێ پرێسكۆنفرانسێ دا وه‌زیرێ په‌روه‌ردێ ئاماژه ب هندێ دا: كو ل حه‌فتیا ئێكێ دایك و باب دشێن فۆرما داگرن بۆ زارۆكێن خۆ ئه‌وێن كو نه‌ڤێن زارۆكێن وان بهێنه خواندنێ و ب ئه‌لكترونى بخوینن، دێ ب تنێ ل رۆژا ئه‌زموونان چنه خواندنگه‌هێ، ئاشكرا ژى كر هه‌ر خێزانه‌كا تووشبوویه‌كێ كۆرۆنایێ د ناڤ مالا وان دا هه‌بیت بلا زارۆكێن خۆ فرێنه‌كه خواندنگه‌هێ، ژبه‌ر ساخله‌میا قوتابیێن دى.
ناڤهاتى ئاماژه ب هندێ ژى دا كو هه‌ر قوتابییه‌كێ د ناڤ پوله‌كێ دا تووشى كۆرۆنایێ بوو، ئه‌و پۆل هه‌موو دێ هێته گرتن، و دێ لژنه هێنه دانان و دێ دووڤچوونا قوتابییان كه‌ن.
وه‌زیرێ په‌روه‌ردێ ل دۆر رۆژێن ده‌وامێ دیاركر: هه‌ر قوناغه‌ك د ناڤ باژێران دا دێ د هه‌فتیێ دا 3 رۆژان ده‌وامێ كه‌ن، و خواندنگه‌هێن حكومى و نه‌حكومى دڤێت سیسته‌مێ ته‌ناوب (نوره) په‌یره‌و بكه‌ن.
ئالان حه‌مه ئاشكرا ژى كر: بۆ وان بریارێن نوكه مه داین دێ ل 23-2-2021ێ كومبین بۆ هه‌لسه‌نگاندنا وان بریاران.
هه‌ر ل گۆرێ وێ كۆنفرانسێ: فرۆشگه‌هـ ژى د ناڤ خواندنگه‌هان دا دێ هێنه ڤه‌كرن و دێ ل دووڤ رێنمایان بن، و دێ هه‌ماهه‌نگى د ناڤبه‌را وه‌زاره‌تا په‌روه‌ردێ و وه‌زاره‌تا ساخله‌میێ دا هه‌بیت.
ل دووماهیێ وه‌زیرى سوپاسییا هه‌موو مامۆستا و رێڤه‌به‌ر و سه‌رپه‌رشتان كر، كو ب هیمه‌تا وان دێ پروسا خواندنێ یا به‌رده‌وام و سه‌ركه‌فتى بیت.
نيشاندان