ئه‌ڤرۆ نیوز:
سوپایێ عیراقێ ده‌ست ب ئوپراسیونه‌كێ ل دژی چه‌كدارێن رێكخراوا تیرۆریستی یا داعشێ ل باكورێ رۆژهه‌لاتا به‌غدا كر.
فه‌رمانده‌یێ ئوپراسیونێن هه‌ڤبه‌شێن سوپایێ عیراقێ راگه‌هاند ئوپراسیون سپێده‌هیا ئێك شه‌مبی رۆژا 26/7/2020 ل سێ ئالیان ڤه ل توخیبێ پارێزگه‌ها دیالا ده‌ست پێكریه.
ئوپراسیون ل بن ناڤێ قوناغا سیێ یا قاره‌مانێن عیراقێ یه، بۆ لێگه‌ریان دووڤ چه‌كدارێن داعشێ كۆ به‌رده‌وام ل ئه‌ڤان ده‌ڤه‌ران كردارێن تیرۆریستی ئه‌نجام دده‌ن.
ئه‌ڤرۆ نیوز:
په‌رله‌مانێ كوردستانێ دێ ب مێڤانداریا پێنج وه‌زیرێن حوكمه‌تا هه‌رێما كوردستانێ كۆم بیت و ته‌وه‌رێ كۆمبوونێ ژی ده‌نگدانه ل سه‌ر ده‌ست ژ كارڤه‌كێشانا سوران عومه‌ر ئه‌ندامێ فراكسیونا كومه‌لا ئیسلامی بیت.
بریاره ئه‌ڤرۆ ده‌مژمێر 11 نیڤرۆ رۆژا ئێك شه‌مبی 26/7/2020 په‌رله‌مانێ كوردستانێ رینشتنا ژماره 6 یا ئاسایی یا خۆلا بهاری سالا دوێ ژ خۆلا هه‌لبژارتنێن پێنجێ هێته سازكرن.
د كۆمبوونا ئه‌ڤرۆدا پێنج پرۆژه یاسایان و بابه‌تان شرۆڤه كه‌ن ب مێڤانداریا وه‌زیرێ ناڤخۆ و ساخله‌میێ و كارۆبارێن پێشمه‌رگه‌ی و دارایی و ئابووری و پلاندانان و وه‌زیرێ هه‌رێم بۆ كارۆبارێن دانوستاندنا هه‌ریمێ ل گه‌ل عیراقێ ئیته‌كرن.
ئه‌ڤرۆ نیوز:
ئه‌ڤرۆ ب هزاران كه‌س چوونه ئایا سوفیا ل ئیسته‌نبولێ ب مه‌به‌ستا پشكداریكرنێ ل ئه‌نجامدانا نڤێژا ب كۆما ئه‌ینیێ.
میدیایێن توركیا به‌لاڤكرن كۆ ب هزاران كه‌س چووبوونه هه‌مبه‌ر ئایا سوفیا ئه‌ڤه ژی ب مه‌به‌ستا پشكداریكرن ل نڤێژا ب كۆم یا ئه‌ینیێ كۆ ئه‌ڤه 86 ساله و بۆ جارا ئێكێ ل ئایا سوفیا بهێته‌كرن.
ل 10 هه‌یڤا ته‌موزا ئیسال دادگه‌ها كارگێریا بلندا توركیا بریارا جڤاتا وه‌زیرێن توركیا هه‌لوه‌شاند كۆ ل 24 تشرینا دوێ یا سالا 1934 بریار هاتبوو دان ئایا سوفیا ژ مزگه‌فتێ ب بیته موزه‌خانه، پشتی بریارا دادگه‌هێ، سه‌رۆكێ كارۆبارێن ئاینی ل توركیا، عه‌لی ئه‌رباش راگه‌هاند ل رۆژا ئه‌ینی 24/7/2020 رۆژانه هه‌ر پێنج نڤێژ ل مزگه‌فتا ئایاسیوفا هێنه‌كرن.
ئه‌ڤرۆ نیوز:
ئومێد ئه‌حمه‌د په‌یڤدارێ وه‌زاره‌تا كاره‌با حوكمه‌تا هه‌رێما كوردستانێ راگه‌هاند د چارچوڤه‌یێ بزاڤێن حوكمه‌تێ بۆ زێده‌كرنا به‌رهه‌م ئینانا غازا سروشتی و به‌رهه‌م ئینانا كاره‌بێ، 24/7/2020 بۆ ماوه‌یێ سێ بۆ چار ده‌مژمێران به‌رهه‌م ئینانا غازا زه‌ڤیێن كورموله كێم كه‌ت، ئه‌ڤه ژی ب مه‌به‌ستا بجهكرنا پرۆسه‌یا ته‌كنیكی و زێده‌كرنا غازێ و پاشی ره‌وش دێ ئاسایی بیته ڤه و 100 مێگاواتێن دی یێن كاره‌بێ دێ زێده‌بن، بڤێ چه‌ندێ رێژا به‌رهه‌م ئینانێ بۆ 3200 مێگاواتێن كاره‌بێ دهێته بلندكرن.
په‌یڤدارێ وه‌زاره‌تا كاره‌با هه‌رێما كوردستانی ئه‌و چه‌نده ژی راگه‌هاند تانوكه 3200 مێگاواتێن كاره‌بێ به‌رهه‌م دئینیت ب ته‌ڤایی خواست بۆ 4800 مێگاواتان بلند بوویه، كۆ رۆژانه 15 بۆ 16 ده‌مژمێران كاره‌با نیشتمانی هه‌یه، ل هه‌رێما كوردستانێ ب رێكا 10 پاوه‌ران ل هه‌ولێری یا غازی و دهۆك یا غازی و سلیمانێ یا غازی و خورمه‌له و بازیان و پترۆلێ یا باعه‌درێ هه‌تا دوماهێ 4300 مێگاواتێن كاره‌بێ به‌رهه‌م دئینن.
ئه‌ڤرۆ نیوز:
سه‌رۆكێ حوكمه‌تا هه‌رێما كوردستانی پێشوازی ل راوێژكارێ تایبه‌ت و سه‌رۆكێ تیما ڤه‌كۆلینێن نێڤ ده‌وله‌تی یێن تاوانێن داعشێ كر.
ئه‌ڤرۆ مه‌سرور بارزانی سه‌رۆكێ حوكمه‌تا هه‌رێما كوردستانێ پێشوازی ل كه‌ریم ئه‌حمه‌د خان راوێژكارێ تایبه‌ت و سه‌رۆكێ تێما ڤه‌كۆلینێن نێڤ ده‌وله‌تی ل تاوانێن داعشێ كر، د دیداره‌كی دا دانوستاندن ل سه‌ر به‌رهه‌ڤكاریێن دادگه‌هكرن و سزادانا تاوانبارێن رێكخراوا تیرۆریستیا داعشێ كرن.
راوێژكارێ تایبه‌ت و سه‌رۆكێ تیما ڤه‌كۆلینێن نێڤ ده‌وله‌تی ل تاوانێ داعشێ راگه‌هاند رێكارێن یاسایی و ته‌كنیكی یێن دادگه‌هیكرنا تاوانبارێن داعشێ ل سه‌ر ئه‌و تاوانێن هه‌مبه‌ر مرۆڤاتیێ ئه‌نجامداینه، ب تایبه‌تی پرۆسه‌یا كۆمڤه‌كرنا گرۆڤ و ب دیجیتالكرنا ئه‌رشیڤێ تاوانێن داعشێ و سوپاسیا هه‌ماهه‌نگی و پشته‌ڤانیا حوكمه‌تا هه‌رێمێ كر بۆ ئه‌ڤێ چه‌ندێ.
سه‌رۆكێ حوكمه‌تا هه‌رێما كوردستانێ ته‌ئكید ل سه‌ر گرنگیا بله‌زكرنا رێكارێن دادگه‌هكرنا تاوانبارێن داعشێ كر، چونكو ئه‌ڤ دادگه‌هكرنه پێنگاڤه‌كا گرنگه بۆ بده‌سته ئینانا دادپه‌روه‌ریێ و رێگرتنه ژ دووباره بوونا وێ پاشه‌رۆژێ دا.
ئه‌ڤرۆ نیوز:
لگۆری دوماهی ئامارێن توشبوویێن ڤایرۆسێ كورونایێ ل سه‌ر ئاستێ جیهانێ گه‌هشته 15 ملیۆن و 380 هزار و 140 كه‌سان.
ژ 15 ملیۆن و 380 هزار و 140 كه‌سان شه‌ش سه‌د و 30 هزار و 343 كه‌سان ژی گیانێ خوه ژ ده‌ست دایه.
ل سه‌ر ئاستێ جیهانێ، ئه‌مریكا زۆرترین رێژه‌یا توشبوویێن ڤایرۆسێ كورونایێ تێدا هاتیه توماركرن، كۆ گه‌هشتیه چار ملیۆن و 100 هزار و 875 كه‌سان ژ ئه‌ڤێ ژماره‌یێ ژی 146 هزار و 183 كه‌سان ژی گیانێ خوه ژ ده‌ست دایه.
ڤایرۆسێ كورونایێ نه‌خوشیه‌كا كۆژه‌كه ل هه‌یڤا 12 یا سالا بوری ل باژێرێ ئوهان یێ چینێ سه‌رهلدایه و نوكه ل ته‌ڤایا جیهانی به‌لاڤ بوویه.
ئه‌ڤرۆ نیوز:
شرین حسێن رێڤه‌به‌را گشتی یا به‌نك و بسپوریان ل وه‌زاره‌تا دارای و ئابووری راگه‌هاند بریار هاتیه دان ئه‌وێن قه‌ر ل سه‌ر هه‌ین، وه‌كو قه‌رێن ئاڤاهیان و چاندنێ و پیشه‌سازی و گه‌شتیاری و قه‌رێن دی كۆ ب ئه‌گه‌رێ ئه‌ڤێ ره‌وشا نوكه نه‌شیان ل ده‌مێ خودا بزڤرینن، ل ده‌مێ ڤه‌گه‌راندنا وان ژی دا دێ حوكمه‌ت ژ 15% یا ئه‌وان قه‌ران خوش بن.
رێڤه‌به‌را گشتی یا به‌نك و بسپوریان ل وه‌زاره‌تا دارای و ئابووری ئه‌و چه‌نده ژی راگه‌هاند ئه‌و بریار دو برگه‌یان بخوڤه دگریت كو ئاڤاهی و پیشه‌سازی و چاندن كو ئه‌و برگه‌یه د بێژیت ئه‌و هه‌ڤ نیشتمانیێ قه‌ر ل سه‌ر و سزایێن گیرۆبوونێ ژی چووینه سه‌ر ژ ئه‌وێ غراما ل سه‌ر تانوكه دێ 15% لی خوش بن، ب مه‌رجه‌كی د وی ماوه‌یێ دیاریكری به‌رهه‌ڤ بیت و پاره‌یی ب كاش بده‌ت.
هه‌ر وه‌لاتیه‌كێ قه‌ر ل سه‌ر و ده‌مێ دانا قه‌رێ وی ژی مایی هه‌كه به‌رهه‌ڤ بیت ئه‌وی پاره‌ی ڤه‌گه‌رینیت ب كاش ل ئه‌وی ده‌مێ دیاریكری، ئه‌ڤه حوكمه‌ت ژ 15% بۆ داشكاندنێ كه‌ت.
شرین حسێن رێڤه‌به‌را گشتی یا به‌نك و بسپوریان ل وه‌زاره‌تا دارای و ئابووری راگه‌هاند ژی حوكمه‌تێ زێده‌تری چار تریلیۆن دینار وه‌كو پێشینه قه‌ر دایه وه‌لاتیان، نوكه نێزیكی دو تریلیۆن دیناران د ستویێ ئه‌وان كه‌سان دا مایه و نه‌ڤه‌گه‌راندینه و پاره نیڤا وێ ژی ڤه‌گه‌ریت هه‌ر باشه بۆ حوكمه‌تێ.
ئه‌ڤرۆ نیوز:
بریاره ئه‌ڤرۆ ده‌سته‌یا سه‌رۆكاتیا په‌رله‌مانێ كوردستانێ كۆمبیت بۆ شرۆڤه‌كرنا پرسا ده‌ستپێكرنا رینشتنێن په‌رله‌مانی.
كۆمبوونا ده‌سته‌یا سه‌رۆكاتیا په‌رله‌مانێ كوردستانێ دده‌مه‌كی دایه، كۆ یه‌كه‌تیا نیشتمانیا كوردستانێ بریار دایه سه‌رۆكا په‌رله‌مانی و فراكسیونا وان پشكداری رینشتنێن په‌رله‌مانی نا‌بیت تا ئه‌وی ده‌می كۆمبوونا وان ل گه‌ل پارتی دیموكراتی كوردستان دهێته‌كرن بۆ چاره‌كرنا ئاریشه‌یێن دناڤبه‌را وان دا.
به‌ریا نها ئومێد خوشناو سه‌رۆكێ فراكسیونا پارتی راگه‌هاند بوو ئه‌و ناچنه بن فشارێن بریارێن سه‌ركردایه‌تیا یه‌كه‌تیێ دێ به‌رده‌وامیێ ده‌نه رینشتنێن په‌رله‌مانی.
فراسكیونا گۆڕان ژی داخازاكریه په‌رله‌مان ب ئه‌گه‌رێ ئاریشه‌یێن حزبایه‌تیێ نه ئێته راوه‌ستاندن ژ كاری و رینشتن بلا ده‌ست پێ بكه‌ن.
ئەڤرۆ نیوز:
بڕیارده‌رێ لژنا دارایی ل په‌رله‌مانێ كوردستانێ ئاشكرا کر: برینا مووچێ پلێن بلند دێ به‌رده‌وام بیت، به‌لێ ڤێ هەیڤێ مووچێ فه‌رمانبه‌ران لدووڤ قانوونا چاكسازیێ دێ هێته دابه‌ش کرن و وه‌ك هەیڤا بوری نابیتت، مووچێ پلێن بلند دێ ب رێژا 50٪ هێتە برین.
محه‌مه‌د ئیلخانی بڕیارده‌رێ لژنا دارایی ل په‌رله‌مانی كوردستانێ دیار کریە:حوکمه‌تا ھه‌رێما كوردستانێ دێ د د دابه‌شكرنا مووچەی دا یا به‌رده‌وام بیت و وه‌ك هەیڤا پێشی دێ مووچێ پلێن بلند ب رێژا 50٪ هێتە برین و دێ به‌رده‌وام بیت ب وی شێوه‌ی، به‌لێ مووچێ فه‌رمانبه‌ران وه‌ك هەیڤا پێشی ناهێتە دابه‌ش کرن، ڤێ هەیڤێ حوکمه‌تا ھه‌رێما كوردستانێ وەک هەیڤا بوری مووچهی دابه‌ش ناكەت و دێ لدووڤ قانوونا چاكسازیێ مووچه هێتەدان، چونكی نوکە حوکمه‌ت دێ كار ب قانوونا چاكسازیێ کەت.
ئەڤرۆ نیوز:
وەزیرێ نافخۆ راگەهاند، بۆ هاتنوچوونا پارێزگەهان دەستهەلات دایە پارێزگازان و هاتنوچوونا دناڤبەرا پارێزگەهێن هەرێما کوردستانێ و پارێزگەهێن عیراقێ دێ وەکو خوە مینیت، بەلێ دێ رێک ب هاتنوچوونا بازرگانی هێتەدان.
رێبەر ئەحمەد، وەزیرێ نافخۆ یێ هەرێما کوردستانێ گۆت ژی: وان دەستهەلات دایە پارێزگاران ئاسانکاریێن زێدەتر بکەن بۆ هاتنوچوونا وەلاتیان دناڤبەرا پارێزگەهان دا.
سەبارەت گەشتێن فرۆکخانێن سلێمانیێ و هەولێرێ وەزیرێ نافخۆ داخواز کر، هەتا 1 تەباخێ فرۆکخانە ئامادەکاریان بکەن بۆ پێشوازیکرنێ ل گەشتیارێن نافخۆیی و بیانی و رێکار ژی دێ پشتی وی دەمی هێنە دیار کرن.
نيشاندان