ئەڤرۆ نیوز:

وەزارەتا نافخۆ یا حوکمەتا هەرێما کوردستانێ راگەهاند، ژ پێخەمەت رێگریکرن ژ بەلاڤبوونا ڤایرۆسێ کۆرۆنا داخوازێ ژ وەلاتیێن هەرێما کوردستانێ دکەت، گەشتێن خوا بۆ چینێ پاشبێخن.

وەزارەتا نافخۆ د نڤیسارەکێ دا کو بۆ فڕۆکخانان هنارتیە ئاماژێ ب هندێ دکەت، هاتنا ژوور ل دەرگەهێن سنۆری یێن هەرێما کوردستانێ بۆ وان کەسێن بیانی یێن کو ل 14-1-2020 سەرەدانا چینێ کرین قەدەغەیە.

هەروەسا گۆتیە، ئەو وەلاتیێن ژ چینێ ڤەدگەرن، دێ ئێخینە ژێر چاڤدێریێ و پێدڤیە تیمێن نۆشداری ل سەرجەم دەروازێن سنووری یێن هەرێما کوردستانێ بهێنە دانان، دیسان حوکمەتا عیراقێ پێدانا ڤیزا ئەلکترۆنی ب وەلاتیێن چینی قەدەغە کریە.

ئه‌ڤرۆ نیوز:

په‌یڤدارێ وه‌زاره‌تا ساخله‌میا هه‌رێما كوردستانێ راگه‌هاند: هه‌ر كۆمپانیه‌كا ده‌رمانان رێنماییان بجهـ نه‌كه‌ت دێ هێته‌گرتن، گرتنا كۆمپانیێ ژی كارتێكرنێ‌ سه‌ر كێمبون و گرانبوونا ده‌رمانان ل بازارێن هه‌رێما كوردستانێ ناكه‌ت.

د. محه‌مه‌د قادر په‌یڤدارێ وه‌زاره‌تا ساخله‌میا حوكمه‌تا هه‌رێما كوردستانێ راگه‌هاند: ب ئه‌گه‌رێ پێگیر نه‌بوون ب رێنمایێن وه‌زاره‌تا ساخله‌میێ چه‌ند كۆمپانیه‌كێن بیاڤێ ده‌رمانان هاتنه‌ گرتن، چ كارتێكرنا خو ژی ل بازاری ناكه‌ن و جهـ گرتیێن وان ل بازاری هاتینه‌ دیتن.

په‌یڤدارێ وه‌زاره‌تا ساخله‌میا حوكمه‌تا هه‌رێما كوردستانێ دیاركر د پیخه‌مه‌تا پاراستنا ساخله‌میا وه‌لاتیان به‌رده‌وام چاڤدێری و دووڤ چوون ئه‌نجام داینه‌، هه‌ر كۆمپانیه‌كا پیگیر نه‌بیت ب نووكرنا موله‌تێ و مه‌رج و رینمایێن وه‌زاره‌تێ، پێرابوونێن یاسایی ل هه‌مبه‌ر دهێنه‌ بكار ئینان.

ئەڤرۆ نیوز، زنار تۆڤی:

وەسا بریارە ئەڤرۆ پێنجشەمبی پەرلەمانێ كوردستانێ شایستێن دارایی یێن جوتیارێن كوردستانێ گوتۆبێژ بکەت و دوماهیێ ب خولا پاییزێ بینیت.

لدووڤ داخوازناما دەستەیا سەرۆكاتیا پەرلەمانێ كوردستانێ کو ئاراستەی ئەندامێن پەرلەمانی كریە، ئەڤرۆ دەمژمێر 11 بەری نیڤرۆ پەرلەمانێ كوردستانێ دێ كۆم بیت، تەوەرێن كۆمبوونێ دێ پێکهێن ژ گوتۆبێژکژنا شایستێن دارایی یێن جوتیارێن ھەرێما كوردستانێ، كو چەند سالە ژ ئالیێ عێراقێ ڤە ناهێنە دان بۆ جوتیارێن كوردستانێ، هەر چەندە گەلەک بزاڤ هاتینە کرن، لێ هەتا نوکە د بێ ئەنجام نەبووینە.

پەرلەمانتار هیڤیدار ئەحمەد ژ فراکسیۆنا پارتی دیموکراتی کوردستان ل پەرلەمانێ کوردستانێ بۆ ئەڤرۆ نیوز گۆت: ئەڤرۆ دێ پەرلەمانێ كوردستان دوماهیێ ب خولا پاییزی ئینیت و دێ هەیڤەکێ کەڤیتە بهێنڤەدانێ، هەر چەندە دێ لژنێن پەیوەندیدار کارێ خوە ئەنجادەن، لێ ب تنێ د ڤی دەمی دا، کۆمبوونێن پەرلەمانی ناهێنە ئەنجامدان.

دیار کر ژی: پێشتر ب ئەگەرێ پڕۆژە قانوونا چاكسازیێ، پەرلەمانێ كوردستانێ خولا پاییزێ درێژكربوو، لێ ئەڤرۆکە دێ خولا پاییزی ب دوماهی هێت.

ئه‌ڤرۆ نیوز:
رۆژنامه‌كا سعودی به‌لاڤكر كو ئه‌مریكا دانوستاندان ل گه‌ل هه‌رێما كوردستانێ دكه‌ت ب مه‌ره‌ما دانانا بنگه‌هێن سه‌ربازی و زێده‌كرنا سه‌ربازێن خوه‌ ل هه‌رێمێ.
رۆژناما شه‌رقولئه‌وست ژ زارێ چه‌ند به‌رپرسێن رۆژئاڤایی” هنده‌ك پێشنیاز بۆ زێده‌كرنا هه‌بوونا له‌شكرێ یێن هه‌ین، ژوان ژی هه‌ر دانوستاندنه‌كا ل گه‌ل به‌غدا بهێته‌ ئه‌نجامدان دڤێت ل سه‌ر پرسێن دی ژی بهێنه‌ كرن نه‌ تنێ بیاڤێ له‌شكری، به‌لكو ل دۆر په‌یوه‌ندیێن ئابووری ژی، زێده‌باری هاندانا قۆلپا ناتۆی كو رۆله‌كێ كاریگه‌رتر د شه‌رێ دژی داعشێ دا هه‌بیت”.
دیاركر ژی” ژ وان پێشنیازان، ئه‌نجامدانا دانوستاندنان ل گه‌ل سه‌رۆكایه‌تیا هه‌رێما كوردستانێ ل دۆر دانانا بنگه‌هێن له‌شكری ل نێزیك سلێمانیێ و ل باشوورێ هه‌ولێرێ و ل نێزیك هه‌له‌بجه‌ و زێده‌كرنا هژمارا سه‌ربازێن ژ 500 سه‌ربازان بۆ دو هزار سه‌ربازان، زێده‌باری وان پێنج هزار سه‌ربازێن ل عیراقێ ب خوه‌ هه‌ین”.
وێ رۆژناما ل سه‌ر زارێ هژماره‌كا دبلۆماتكاران به‌لاڤكر ژی كو نوكه‌ هه‌بوونا له‌شكری یا ئه‌مریكی ل رۆژئاڤایێ عیراقێ و ل رۆژهه‌لاتا سووریێ یا هه‌ی، ژ به‌ركو پتریا هێزێن ئه‌مریكی ئه‌وێن ژ رۆژهه‌لاتا فوراتێ ل ده‌ستپێكا ئه‌ڤ ساله‌ هاتینه‌ ڤه‌كێشان، ل هه‌رێما كوردستانێ ماینه‌ و هژمارا سه‌ربازێن ئه‌مریكی ل نێزیك بیرێن په‌ترۆلێ ژ هزار سه‌ربازان بووینه‌ 500 سه‌رباز”.
ژلایه‌كێ دی ڤه‌ لایه‌نێن سیاسی یێن شیعی د به‌رده‌وامن ل سه‌ر داخوازا ڤه‌كێشانا هێزێن ئه‌مریكی ژ عیراقێ، ریاز مه‌سعودی، ئه‌ندامێ په‌رله‌مانێ عیراقێ ژ لیستا سائیروون راگه‌هاند” عیراق پێدڤیه‌ ب هه‌بوونا بنگه‌هێن له‌شكری یێن ئه‌مریكی نینه‌ و پێدڤیه‌ لایه‌نێن سیاسی له‌زێ بكه‌ن د ده‌ستنیشانكرنا سه‌رۆكێ نوو یێ وه‌زیران تاكو حوكمه‌تا داهاتی بشێت بریارا په‌رله‌مانێ عیراقێ یا ده‌ركرنا هێزێن بیانی و ب تایبه‌تی یێن ئه‌مریكی بجهبینیت و نه‌خشه‌ رێیه‌كێ بۆ بجهئینانا وێ بریارێ دانیت”.
ناڤبری دیاركر” ئه‌م ل عیراقێ نوكه‌ پێتڤی نینین ب هه‌بوونا بنگه‌هێن له‌شكری یێن ئه‌مریكی و بیانی و ده‌ركه‌فتنا وان ژ عیراقێ یا گرنگه‌ و پێدڤیه‌ لایه‌نێن سیاسی ل سه‌ر كه‌سایه‌تیه‌كی بۆ پۆستێ سه‌رۆَكێ وه‌زیران ب رێككه‌ڤن تاكو حوكمه‌ته‌كا ب هێز پێك بینیت كو ئه‌و حوكمه‌ت بشێت بریارا په‌رله‌مانی ل دۆر ده‌ركرنا هێزێن بیانی بجهبینیت و عیراق نه‌ بیته‌ مه‌یدانا شه‌رێ هه‌رێمایه‌تی”.

ئه‌ڤرۆ نیۆز، ئه‌میر ئه‌ترووشی:

ئه‌ندامێ‌ لیژنا پێشمه‌رگه‌ی ل په‌رله‌مانێ‌ كوردستانێ‌ راگه‌هاند، پێنگاڤ هاتینه‌ هاڤێتن بۆ هندێ‌ هێزێن پێشمه‌رگه‌ی ل كوردستانێ‌ بهێنه‌ ئێكگرتن و سۆپایه‌كێ‌ نشتیمانی بهێته‌ پێكئینان و گۆت: ل نێزیك دێ‌ ده‌رماله‌ و پارێن باوه‌رنامێ‌ بۆ هه‌موو هێزێن پێشمه‌رگه‌ی هێنه‌ خه‌رجكرن.
رێڤینك هرۆری، ئه‌ندامێ‌ لیژنا پێشمه‌رگه‌ی ل په‌رله‌مانێ‌ كوردستانێ‌ بۆ ئه‌ڤرۆ نیۆز دیار كر، وه‌زاره‌تا پێشمه‌رگه‌ی ل حۆكمه‌تا هه‌رێما كوردستانێ‌ پلانه‌ك دانایه‌ بۆ هندێ‌ هه‌موو هێزێن پێشمه‌رگه‌ی ل كوردستانێ‌ ئێكبگرن و ببنه‌ ئێك و سۆپایه‌كێ‌ نشتیمانی ژێ‌ بهێته‌ پێكئینان و ئه‌ز پێشبینی دكه‌م ل ده‌مه‌كێ‌ نێزیك ئه‌ڤ پێنگاڤه‌ سه‌ربگریت.
هرۆری ئاماژه‌ ب هندێ‌ دا، ئه‌ڤ سۆپایه‌ دێ‌ ل ژێر فه‌رمانا وه‌زاره‌تا پێشمه‌رگێ‌ كوردستانێ‌ دا بیت و پشتی پلان دهێته‌ بجهئینان، هیچ هێزه‌ك ژ ده‌رڤه‌ی سنوورێ‌ سیسته‌مێ‌ وه‌زاره‌تێ‌ دا نامینیت و دێ‌ ژ هه‌مو حزبان دووركه‌ڤیت و سسته‌مێ‌ جلۆبه‌رگان ژی ئێكگریت.

ئەڤرۆ نیوز:

دەقێ راگەهاندنا سەرۆکێ هەرێما کوردستانێ:

ئیدانا وێ هێرشا مووشەکی دکەین، یا کو ل شەڤا بوری باڵیۆزخانا ئەمریکا ل بەغدا کریە ئارمانج، ئەڤ کریارە مەترسیا راستەقینە ل سەر دۆخ و سەقامگیرى و بەرژەوەندیێن عێراقێ دروست دکەن، دوبارەبوون و بەردەوامیا وان، دێ لێکەفت و ئەنجامێن خراب بۆ سەر وەلاتی هەبیت.

پاراستنا ئاسایشا بالیۆزخانا و هنارتیێن دبلۆماسی ئەرکێ لایەنێن بەرپرسە و نابیت رێک بهێتە دان قانوون و رێسایێن نێڤدەولەتی بهێنە پێشێل کرن و دبلۆماتکار و هنارتیێن دبلۆماسی بکەنە ئارمانج، ئەم دوپات دکەین، کو نابیت عێراق ببیتە گۆڕەپانا ئێکلاکرنا ململانێ یا هێزێن هەرێمى و نێڤدەولەتی.

نێچيرڤان بارزانى
سەرۆکێ هەرێما کوردستانێ
27/1/2020

ئەڤرۆ نیوز:

سوپاسالارێ پێشمەرگەی راگەهاند، ئەمریکا دێ 14 لیوایێن پێشمەرگەی پڕچەك کەت و دێ ئۆتۆمبیل و پێدڤیێن سەربازی ژی بۆ وان لیوان دابین کەت، لژنا پێشمەرگەی ژی رادگەهینیت، کو کارێن هەڤپەیمانان و حکومەتا هەرێما کوردستانێ دەبارەی یەکخستنا هێزێن پێشمەرگەی گەهشتینە قۆناغا جێبەجێکرنێ.

جه‌مال ئێمینكی، سوپاسالارێ پێشمه‌رگه‌ی دوپاتكر‌، پێنگاڤان دەست پێکریە د پێنگاڤا ئێکێ دا 109 ئۆتۆمبێلێن جۆرێ هەمەر گەهشتینە وەزارەتا پێشمەرگەی.
گۆتیه ژی: ل دەستپێکێ ژ لیوایێن 14و 16 دەستپێکریە و پاشی دێ 12 لیوایێن دیتر پڕچه‌ك کەت، ئەو لیوانە دێ ژ ئالیێ ئەمریکا ڤە هێنە پڕچه‌ك کرن.

عوسمان سێده‌ری، جێگرێ سەرۆکێ لژنن پێشمەرگەی ل په‌رله‌مانێ كوردستانێ گۆت، کارێن هەڤپەیمانان و حکومەتا هەرێما کوردستانێ دەربارەی یەکخستنا هێزێن پێشمەرگەی گەهشتینە قۆناغا جێبەجێکرنێ.

ئەڤرۆ نیوز:

ئەڤرۆ سەرۆکێ هەرێما کوردستانێ پێشوازی ل شاندەکێ ئەلمانی کر، ل هەمبەری بڕیارا وی وەلاتی بۆ دەستپێکرنا مەشق و ڕاهێنانان ب هێزین پێشمەرگەی و هەروەسا ل هەمبەری مانا هێزێن هەڤپەیمانیا نێڤدەولەتیا دژی داعشێ و سوپاسیا ئەلمانیا و هەڤپەیمانان کر و مانا وان ژی ب گرنگ زانی.

ئەڤرۆ دوشەمبی، نێچرڤان بارزانی سەرۆکێ هەرێما کوردستانێ پێشوازی ل یۆرگن هارت و مارکۆس گڕۆبل، پەڕلەمانتارێن ئەلمانیا ل پارتا دیموکراتا مەسیحی( CDU) کر.

د دیدارێ دا پەڕلەمانتارێن ئەلمانیا سوپاسیا حکومەت و گەلێ کوردستانێ کر، ل هەمبەری ڤەحەواندنا ئاوارە و پەنابەران ب تایبەت پێکهاتێن مەسیحیان، گۆتژی ژی، دێ هەموو بزاڤان کەین وەک بەری نوکە ژی کو ئەلمانیا د هاریکاریکرنا حکومەت و گەلێ کوردستانێ دا یا بەردەوام بیت.
پرسا پەیوەندیێن هەرێما کوردستانێ و عێراقێ، ڕەوشا عێراقێ و سوریا و دەڤەرێ ب گشتی، مەترسیا تیرۆرێ و پێدڤیا عێراقێ ب مانا هێزێن هەڤپەیمانیا ناڤدەولەتی دژی تیرۆرێ، چەند تەوەرێن دیێن وێ دیدارێ بوون.