ئه‌ڤرۆنیۆز، ئه‌میر ئه‌ترووشی

به‌شداربوویێن هێلا كوره‌ك تێلیكوم ب رێیا پارێزه‌ره‌كی سكالایه‌ك ل سه‌ر كۆمپانیا كۆره‌ك تۆماركر ب تۆمه‌تا فێلبازیێ‌ ب رێیا هنارتنا نامه‌یه‌كێ‌.
ئه‌ڤرۆ رۆژا ئێكشه‌مبی 18/1/2020 پارێزه‌ر هێرش ره‌شید، ل دادگه‌ها دهۆكێ‌ ب رێكا داواكارێ‌ گشتی، ب شێوه‌یه‌كێ‌ فه‌رمی سكالایه‌ك ل سه‌ر كۆمپانیا كۆره‌ك تێلیكوم تۆماركر، پشتی ب هزاره‌ها خه‌لكێ‌ دهۆكێ‌ گله‌ی ل سه‌ر نامه‌یه‌كا كۆره‌ك تێلیكه‌م كری كو ب رێكا وێ‌ نامێ‌ كۆمپانیا كۆره‌ك داخواز ژ به‌شداربوویێن خوه‌ كریه‌ هێلێن خوه‌ ب كۆژمێ‌ 8000 دیناران بكه‌ته‌ (اشتراك)، پشتی ئه‌ڤ پێنگاڤه‌ دهێته‌ هاڤێتن، (8000) دینار ژی دچن و نابیته‌ (اشتراك).
پارێزه‌ر هێرش زێده‌تر بۆ ئه‌ڤرۆ نیۆز گۆت: ب هزاره‌كا نامه‌ بۆ به‌شداربووێن كوره‌ك ل دهۆكێ‌ هاتینه‌ و ب تنێ‌ بۆ به‌شداربوویێن دهۆكێ‌ و هه‌موویان گازنده‌ كرینه‌ و مه‌ ژی ڤیایه‌ ب رێیا دادگه‌هێ‌ مافێ‌ هاوولاتیان ژ كۆمپانیێ‌ وه‌رگرین.

ئه‌ڤرۆ نیوز:

سه‌رۆكێ هه‌رێما كوردستانێ، نێچیرڤان بارزانی د دیدارره‌كا رۆژنامه‌ڤانی دا ل گه‌ل مالپه‌رێ (مونیتۆر) یێ فره‌نسی راگه‌هاند، بریارا په‌رله‌مانێ عیراقێ ل دۆر ده‌ركرنا هێزێن ئه‌مریكی ژ عیراقێ بریاره‌كا د جهێ خوه‌ دا نه‌بوو و ژلایێ شیعان ب تنێ هاتیه‌ ده‌ركرن بێ راوێژ ل گه‌ل پێكهاتێن دی یێن سه‌ره‌كی ل وه‌لاتی.
نێچیرڤان بارزانی ئاماژه‌ كر” یا باش ئه‌وه‌ دانوستاندن د ناڤبه‌را عیراقێ و ئه‌مریكا دا بهێنه‌ كرن ل دۆر شێوێ پاشه‌رۆژێ یێ به‌لاڤكرنا هێزێن ئه‌مریكی ل عیراقێ، ژبه‌ركو هه‌بوونا هێزێن ئه‌مریكی و هه‌ڤپه‌یمانان یا گرنگه‌ بۆ هه‌موو عیراقێ”.
ل دۆر كارتێكرنا كوشتنا قاسم سلێمانی وئه‌بو مه‌هدی موهه‌ندس ل سه‌ر عیراقێ و كوردستانێ، سه‌رۆكێ هه‌رێمێ گۆت” ڤێ روودانێ له‌هیه‌كا هه‌ستان ل عیراقێ و ئه‌مریكا په‌یداكر وه‌كو كارڤه‌دانا په‌رله‌مانێ عیراقێ و سه‌رۆكێ وه‌زیران و به‌رسڤا ئه‌مریكا ژی دای ل دۆر مانا هێزێن وێ ل عیراقێ سه‌ره‌رای بریارا په‌رله‌مانی و حوكمه‌تا عیراقێ، ب دیتنا من دڤێت هه‌ست و كارڤه‌دانا دانینه‌ لایه‌كی، ژ به‌ركو ئه‌م نوكه‌ پێدڤی ب ڤه‌گرتنا هه‌لویستینه‌، بۆ كونترۆلكرنا وی”.
گۆت ژی” ب دیتنا مه‌ ئه‌و بریارا په‌رله‌مانێ عیراقێ ل دۆر ده‌ركرنا هێزێن ئه‌مریكی ده‌ركری، بریاره‌كا د جهێ خوه‌ دا نه‌بوو و كورد و سوننه‌یان پشكداری د ده‌ركرنا وێ بریارێ دا نه‌كربوو، هه‌روه‌سا ئه‌و بریاره‌ پێشینه‌كا خرابه‌، چونكه‌ ژلایێ لیستا شیعی ڤه‌ هاتیه‌ ده‌ركرن بێ راوێژكرن ل گه‌ل پێكهاتێن سه‌ره‌كی یێن ڤی وه‌لاتی ئه‌وژی كورد و سوننه‌نه‌ و گاڤه‌كا ئێكلاكه‌ر بوو هاتیه‌ هاڤێتن بێ بزاڤكرن بۆ بده‌ستڤه‌ئینانا تێكراییێ و ئه‌ڤ چه‌نده‌ ژی سه‌رپێچیه‌ ل دستوورێ عیراقێ و ئه‌ڤ بریاره‌ ژی یا باش نینه‌ بۆ عیراقێ چ ل نوكه‌ و چ ل پاشه‌رۆژێ”.
گۆت ژی” دڤێت ئه‌ڤ هه‌ردو پرسیاره‌ بهێته‌ كرن: بۆچی هێزێن ئه‌مریكی ل عیراقێ نه‌؟ یێن ل ڤێرێ ل سه‌ر داخوازا حوكمه‌تا عیراقێ ل سالا 2014 و ب راوێژكرن ل گه‌ل جڤاتا ئاسایشا نێڤده‌وله‌تی ده‌مێ داعش نێزیكی به‌غدا دبوو، و ئایا ره‌وشا نوكه‌ ل عیراقێ دخوازیت هێزێن ئه‌مریكی و هه‌ڤپه‌یمان خوه‌ ڤه‌كێشن كو ئه‌ركێ وان شكاندانا داعشێ بوو؟ ب دیتنا مه‌ ل هه‌رێما كوردستانێ به‌رسڤ ب رۆهنی دێ (نه‌خێر) بیت، چونكی هه‌موو پێزانینێن هه‌والگیری ئاماژێ دكه‌ن كو داعشێ دووباره‌ رێزێن خوه‌ یێن رێكخستین و رۆژانه‌ هێرشان دژی ئارمانجێن عیراقی ئه‌نجام دده‌ت، ل ڤێرێ به‌رژه‌وه‌ندیا هه‌رێما كوردستانێ یا گرنگه‌ بۆ هێزێن ئه‌مریكی وه‌كو چاوان به‌رژوه‌ندیا هه‌موو عیراقێ یا گرنگ”.
سه‌باره‌ت وان فشارێن دهێنه‌ كرن بۆ ده‌ركرنا هێزێن ئه‌مریكی ژ عیراقێ، دبێژیت” د سه‌ره‌دانا ڤێ دووماهیێ سا عه‌بدولمه‌هدی بۆ كوردستانێ، مه‌ ل ده‌ف دیت كو دخوازیت ڤێ پرسێ ب رێیا دانوستاندنێ ل شوونا روو ب رووبوونێ چاره‌كه‌ت، ئه‌وژی گه‌هشتن بۆ شێوه‌كێ نوو بۆ دووباره‌ رێكخستنا هه‌بوونا هێزێن ئه‌مریكی و هه‌ڤپه‌یمانان ل عیراقێ” گۆت ژی” هه‌بوونا هێزێن ئه‌مریكی و هه‌ڤپه‌یمانان پێدڤیه‌كه‌ بۆ هه‌موو عیراقێ”.
ل دۆر هێرشا مووچه‌كی یا ئیرانێ ل سه‌ر ئه‌مریكیان كو ئێك ژ بنگه‌هێن ئه‌مریكی ل هه‌ولێرێ ببوو ئارمانج، نێیرڤان بارزانی گۆت” ئه‌و هێرشه‌ په‌یامه‌كا رۆهن بوو ژلایێ ئیرانێ ڤه‌ بوو هه‌موویان كو وێ ئیراده‌ و شیانێن لێدانێ ل هه‌ر جهه‌كی ل عیراقێ یێن هه‌ین” دیاركر ژی” ئه‌م ناخوازین عیراق ببیته‌ مه‌یدانا شه‌ری د ناڤبه‌را ئیرانێ و ئه‌مریكا دا، د هه‌مان ده‌م دا ئیران جیرانا مه‌ یا كه‌ڤنه‌، هه‌روه‌سا سه‌رۆك وه‌زیرێن عیراقێ هه‌ر ژ ده‌ست بكاربوونا وی كاركریه‌ كو عیراق نه‌كه‌ڤیته‌ د هه‌ڤركیا وان هه‌ردو وه‌لاتان دا”.
سه‌باره‌ت داخوازناما سه‌رۆكێ ئه‌مریكی دۆنالد ترامب بۆ سه‌رۆكێ هه‌رێما كوردستانێ بۆ كۆمبوونه‌كێ ل كۆچكا سپی كو ژلایێ جێگرێ سه‌رۆكێ ئه‌مریكی مایك بینس ل مه‌ها چریا دوویێ 2019 هاتبوو هاتبوو گه‌هاندن، نێچیرڤان بارزانی گۆت” داخوازنامه‌كا به‌رده‌وام یا هه‌ی به‌لێ هه‌تا نوكه‌ چو ژڤان بۆ كۆمبوونێ نه‌هاتینه‌ دیاركرن، ئه‌و داخوازنامه‌ هاتبوو به‌ری روودانێن ده‌ست ژكاركێشانا عه‌بدولمه‌هدی و كوشتنا قاسم سلێمانی، ئه‌مریكا مه‌ پشكه‌ك ژ عیراقێ دبینیت و ره‌فتارێ ل سه‌ر ڤی بنه‌مای ل گه‌ل مه‌ دكه‌ت”.
ل دۆر پێشبینیا هه‌ڤدیتنا وی و ترامپی ل كۆپیتكا دافۆس ل سویسرا گۆت” یا دیار نینه‌ ترامپ دێ ل دافۆس به‌رهه‌ڤ بیت یان نه‌، به‌لێ دێ ل گه‌ل جێگرێ وی بینس ل دافۆس كۆم بم”.
سه‌باره‌ت په‌یوه‌ندیێن ئه‌مریكا و هه‌رێما كوردستانێ پشتی كوشتنا قاسم سلێمانی، گۆت” هه‌رێما كوردستانێ ب چارچۆڤێ خوه‌ یێ قانوونی و دستووری گرنگیه‌كا تایبه‌ت دناڤ هه‌ڤكێشا عیراقی و سیاسه‌تا ئه‌مریكا به‌رامبه‌ر عیراقێ یا هه‌ی، ئانكو سیاسه‌ته‌كا عیراقی یا ئێكگرتی”.
ل دۆر بۆچوونا سه‌رۆكێ هه‌رێمێ ل سه‌ر ئه‌نجامدانا رێككه‌فتنه‌كێ د ناڤبه‌را كوردێن سووریێ و حوكمه‌تا سووری، گۆت” ب دیتنا مه‌ پرسا كوردی دڤێت دناڤ سنوورێ سووریێ دا بهێته‌ چاره‌كرن و پێدڤیه‌ حوكمه‌تا سووری پتر یا به‌رهه‌ڤ بیت بۆ ڤێ چه‌ندێ، كورد ل سووریێ پشكه‌كن ژ وی وه‌لاتی، دبیت رووسیا بشێت كاره‌كی بكه‌ت، ده‌مێ ل گه‌ل وه‌زیرێ ده‌رڤه‌یێ رووسیا كۆمبوویم، من داخواز ژێ كر هاریكاریێ بكه‌ت د پێشكێشكرنا رێككه‌فتنه‌كێ د ناڤبه‌را كوردان و رژێما سووریێ دا، ب دیتنا من پێدڤیه‌ ل سه‌ر سه‌رۆكێ رووسی پۆتینی پتر بزاڤان د ڤی بیاڤی دا بكه‌ت” زێده‌تر گۆت” شیره‌تا مه‌ ل ده‌مێن بۆری و نوكه‌ و ل پاشه‌رۆژێ ئه‌وه‌ كوردێن سووریێ رێیه‌كێ بۆ گه‌هشتنێ ب رێككه‌فتنه‌كێ ل گه‌ل رژێما سووریێ ببینن، هه‌روه‌سا من چه‌ندین جاران داخواز ژ وان كریه‌ په‌یوه‌ندیێن خوه‌ ل گه‌ل پارتیا كاركه‌رێن كوردستانێ (په‌كه‌كێ) ل قندیلی قوت بكه‌ن”.
نێچیرڤان بارزانی ل دۆر په‌یوه‌ندیێن هه‌رێمێ و توركیا گۆت” په‌یوه‌ندیێن مه‌ ل گه‌ل توركیا به‌رده‌وام د گرنگ و باشن، سه‌رۆك وه‌زیرێن هه‌رێما كوردستانێ، مه‌سرور بارزانی، كۆمبوونه‌كا باش ل گه‌ل سه‌رۆكێ توركی ئه‌ردۆگان ئه‌نجامدایه‌، و ئه‌م دێ د به‌رده‌وام بین ل سه‌ر وێ ریێ” گۆت ژی” نابیت رێ بده‌ین كوردستانا عیراقێ ببیته‌ بنگه‌هه‌ك بۆ هێرشكرنێ ل سه‌ر چو وه‌لاتێن جیران و پێدڤیه‌ ئه‌ڤ كێشه‌ ل توركیا ب ریێن ئاشتیانه‌ بهێته‌ چاره‌كرن و چ ده‌مێ من هه‌ڤدیتن ل گه‌ل به‌رپرسێن توركی ئه‌نجامداین، بیرا وان ب ڤێ چه‌ندێ دئینم، ئه‌ڤ كێشه‌ پێدڤیه‌ ب دانوستاندنێ بهێته‌ چاره‌كرن نه‌ كو ب رێیا له‌شكری، ژ به‌ركو ئه‌و چه‌نده‌ د به‌رژه‌وه‌ندیا هه‌ردو لایه‌نان دا نینه‌”.
هه‌روه‌سا گۆت” هه‌رێما كوردستانێ چارچۆڤێ خوه‌ یێ قانوونی و دستووری د ناڤ عیراقێ دا یێ هه‌ی، ئه‌ڤه‌ راستیه‌كه‌ و یا دانپێدان كریه‌ ل عیراقێ و جڤاكێ نێڤده‌وله‌تی، و ب ده‌لیڤه‌ دبینم ده‌ستخوه‌شیێ ل خوشك و برایێن رۆژئاڤا بكه‌م ل سه‌ر قوربانیدان و خوراگریا وان یا مه‌زن د شه‌رێ دژی داعشێ دا و ئه‌و قوربانیێن وان داین نه‌ ب تنێ به‌رگری ژ خوه‌ و سووریێ بوو، به‌لكو به‌رگری ژ مرۆڤایه‌تیێ بوو و ئه‌م قه‌رادارێن وانین و پێدڤیه‌ مافێن وان ب شێوه‌كێ دستووری د چارچۆڤێ سووریا ئێكگرتی دا بهێنه‌ پاراستن”.
ل دۆر رێككه‌فتنێ ل گه‌ل به‌غدا ل سه‌ر بودجه‌ی و په‌ترۆلێ، گۆت” ل دووماهیا هه‌یڤا ئه‌یلوولا بۆری ئه‌م یێن گه‌هشتینه‌ رێككه‌فتنێ، پێدڤیه‌ ئه‌م پتر ژ 25 هزار به‌رمیلێن په‌ترۆلێ راده‌ستی كۆمپانیا په‌ترۆلێ یا نیشتمانی (سۆمۆ) بكه‌ین ل ویستگه‌هێن هنارتنێ ل به‌نده‌رێ جه‌یهان یێ توركی كو ب رێیا (سۆمۆ) بهێته‌ هنارتن و داهاتیێ وان ژی بۆ گه‌نجینا عیراقێ بچیت و به‌هرا حوكمه‌تا هه‌رێما كوردستانێ بهێته‌ دان”.
دیاركر ژی” هه‌ر ژ ئادارا سالا بۆری پشكه‌ك ژ مووچێن فه‌رمانبه‌رێن هه‌رێمێ ژ لایێ حوكمه‌تا ناڤه‌ندی ل به‌غدا ب شێوه‌كێ رێكخستی دهێنه‌ دان كو دبیته‌ 55%، ئه‌م به‌حسێ 380 ملیۆن دۆلاران هه‌یڤانه‌ دكه‌ین كو به‌هرا هه‌موو مووچان ناكه‌ت، سه‌رجه‌مێ مه‌زاختیێن مه‌ بۆ مووچێن فه‌رمانبه‌ران و دابینكرنا جڤاكی هه‌یڤانه‌ 700 ملیۆن دۆلارن و ملیۆنه‌ك و 200 هزار كه‌س مووچان ژ حوكمه‌تێ وه‌ردگرن ژوان 700 هزار فه‌مانبه‌ر ب شێوه‌كێ ئێكسه‌ر ل ده‌ف حوكمه‌تێ كاردكه‌ن زێده‌باری پێشمه‌رگه‌ و فه‌رمانبه‌رێن خزمه‌تا مه‌ده‌نی”.
ل دۆر هه‌لسه‌نگاندنا وی بۆ كارێ سه‌رۆكێ حوكمه‌تا هه‌رێمێ، گۆت” د حوكمه‌تا به‌رێ دا پتر ئه‌م د ره‌وشا ب رێڤه‌برنا كێشان دا بووین زێده‌باری هه‌بوونا ناكۆكیا بودجێ ل گه‌ل به‌غدا و پاشی هاتنا داعشێ، ل 10 سالێن بۆری دا گه‌له‌ك تشت یێ هاتیه‌ بده‌ستڤه‌ئینان، به‌لێ شاشی ژی هاتینه‌ ئه‌نجدان، حوكمه‌تا نوو ده‌ست ب په‌یوه‌ندیێن باشتر ل گه‌ل به‌غدا كریه‌ وب هێز ژی ده‌ست ب پرۆسا چاكسازیێ كریه‌ و ب دیتنا من سه‌رۆك وه‌زیرێن كوردستانێ یێ كاره‌كێ باش ئه‌نجام دده‌ت و هه‌ڤسه‌نگیه‌كا باش ل جڤاتا وه‌زیران په‌یداكریه‌، ئه‌و یێ كاره‌كێ باش دكه‌ت”.

ئه‌ڤرۆ نیوز:

په‌رله‌مانێ كوردستانی ب زۆرینه‌یا ده‌نگان پرۆه‌ژیێ یاسایا چاكسازیێ ل مووچه‌ و ده‌رماله‌ و خانه‌نشینیێ په‌سندكر.

پشتی پرۆژه‌یێ یاسایا چاكسازیێ ژلایێ جڤاتا وه‌زیران یا حوكمه‌تا هه‌رێما كوردستانێ ره‌وانه‌ی په‌رله‌مانێ كوردستانێ هاتیه‌كرن، خاندنا ئیكێ ژلایێ په‌رله‌مانێ كوردستانێ كر و لژنه‌یێن په‌رله‌مانی چه‌ندین كۆمبوون ل سه‌ر پرۆژه‌ی ئه‌نجام دان، پاشی خاندنا دویێ بۆ هاته‌كرن و پاشی ئه‌ڤرۆ هاته‌ په‌سندكرن.

ئه‌ڤرۆ 16/1/2020 ل كۆمبوونا په‌رله‌مانێ كوردستانێ ب ده‌نگێ 89 په‌رله‌مانتاران پرۆژه‌یێ یاسایا چاكسازیێ ب زۆرینه‌ هاته‌ په‌سندكرن.

جوتیار عادل په‌یڤدارێ فه‌رمیێ حوكمه‌تا هه‌رێما كوردستانێ راگه‌هاند: حوكمه‌تێ بریار دایه‌ د پرۆژه‌یێ چاكسازیێ به‌رده‌وام دبیت و ئه‌ڤ یاسایا چاكسازیێ پێنگاڤا ئیكێ یه‌.

ئومید خوشناو سه‌رۆكێ فراكسیونا پارتی ل په‌رله‌مانێ كوردسنانێ راگه‌هاند: په‌سندكرنا یاسایا چاكسازیێ ده‌ستپێكه‌كه‌ ژ پێنگاڤه‌كا مه‌زنا په‌یوه‌ندیێن ناڤبه‌را په‌رله‌مانی و حوكمه‌تێ و بده‌ستڤه‌ ئینانا ئارمانجان ل پاشه‌رۆژێ كاره‌كێ مه‌زنتر بكه‌ین.

عه‌لی حه‌مه‌ سالح سه‌رۆكێ فراكسیونا گۆرانێ دیاركر ژبلی دروستكرنا ژماریا به‌نكی بتنێ هاتیه‌ بنه‌جیهكرن، خانه‌نشینا پله‌ بالا كۆ به‌ریا نها 6 ملیۆن و 400 هه‌زار دینار بوون، نوكه‌ 15 سه‌دیێ داكه‌تی یه‌، هه‌كه‌ به‌كالریوس هه‌بیت 21% زێده‌بیت.

جه‌مال حه‌ویز سه‌رۆكێ فاركسیونا ئیكه‌تیێ راگه‌هاند: پێنگاڤه‌كا مه‌زن هاته‌ هاڤێتن، زۆر گرنگه‌ پرۆزباهیێ ل كه‌س و كارین شه‌هیدان بكه‌ین بێ ده‌ستكاری یا مووچه‌یێن وان و چاكسازی قوناغ ب قوناغ دێ چیته‌ بیاڤێ بجهكرنێ.

ئه‌ڤرۆ نیوز:

سه‌رۆكا په‌رله‌مانێ كوردستانێ بۆ جڤینا سوبه‌هی رۆژا پێنجشه‌مبێ داخازیا ته‌ڤایا ئه‌ندامان دكه‌ن بۆ به‌رهه‌ڤبوونێ.

رێواز فایه‌ق سه‌رۆكا په‌رله‌مانێ كوردستانێ دخازنامه‌یه‌ك به‌لاڤكر و تێدا هاتیه‌ كو داخازێ ژ هه‌موو ئه‌ندامێن په‌رله‌مانێ دكه‌ت  بۆ به‌رهه‌ڤبوونێ د ریشنتنا ژماره‌ 15 ئاسایی سالا ئێكێ، ل خۆلا هه‌لبژارتنا پێنجێ یا په‌رله‌مانی ده‌مژمێر 11 سپێده‌هیا پێنجشه‌مبی 16/1/2020 .

ئه‌ڤرۆ نیوز:

په‌رله‌مانێ كوردستانێ دوماهی  ب كۆمبوونا په‌رله‌مانی ئینا و كۆ زێده‌تر ژ دو رۆژان به‌رده‌وام بوو تێدا خاندنا دوێ بۆ هه‌موو برگه‌ و ماده‌یێن پرۆژه‌یێ یاسایا چاكسازیێ هاته‌كرن.

لگۆری راپۆرتا مالپه‌رێ فه‌رمیێ یێ په‌رله‌مانێ كوردستانێ، رێواز فایه‌ق سه‌رۆكا په‌رله‌مانا كوردستانێ راگه‌هاند: رۆژا پێنجشه‌مبا بهێت په‌رله‌مانێ كوردستانی دێ ده‌نگ دانێ ل سه‌ر پرۆژه‌یێ یاسای چاكسازیێ ده‌ت.

رۆژا دوشه‌مبێ 16/1/2019 په‌رله‌مانێ كوردستانێ خاندنا ئێكێ بۆ پرۆه‌ژیێ چاكسازیێ كر ب زۆرینه‌یا ده‌نگدانێ ب سیفه‌تێ بله‌زكرنێ دایه‌ پرۆه‌ی تاكو ل ده‌مه‌كێ كێم دا بهێته‌ په‌سندكرن.

رۆژا چارشه‌مبێ 11/12/2019 جڤاتا وه‌زیرێن حوكمه‌تا هه‌رێما كوردستانێ ب سه‌رپه‌رشتیا مه‌سرور بارزانی كۆمبوو و پرۆه‌ژیێ چاكسازیێ په‌سندكر.

رۆژا پێنجشه‌مبێ 12/1/2019 حوكمه‌تا هه‌رێما كوردستانێ ب رێا ڤالا فه‌رید وه‌زیرا هه‌رێمێ بۆ كارۆبارێن په‌رله‌مانی پرۆژه‌یێ یاسایی هنارته‌ په‌رله‌مانێ كوردستانێ.

ئه‌ڤرۆ نیوز:

په‌رله‌مانێ كوردستانێ ئه‌ڤرۆ دانوستاندنا پرۆژه‌یێ یاسایا چاكسازیێ ل مووچه‌ و ده‌رماله‌ و ئیمتیازاتان بكه‌ت.

بریاره‌ ده‌مژمێر 11 به‌ری نیڤرۆیا ئه‌ڤرۆ كۆ رۆژا 12/1/2020 په‌رله‌مانێ كوردستانێ خاندنا دوێ بۆ پرۆژه‌یێ یاسایا چاكسازیێ ل مووچه‌ و ده‌رماله‌ و به‌خشین و ئیمتیازاتان بكه‌ت.

رۆژا دو شه‌مبێ 16/12/2019 په‌رله‌مانێ كوردستانێ خاندنا ئیكێ بۆ پرۆژه‌یێ یاسایا چاكسازیێ كر و ب زۆرینه‌ ده‌نگ پێ دا، تاكو ل ده‌مه‌كێ كورت دا بهێته‌ په‌سندكرن.

رۆژا چارشه‌مبی 11/12/2019 جڤاتا وه‌زیرێن هه‌رێما كوردستانێ پرۆه‌ژیێ یاسایا چاكسازیێ په‌سند كر.

رۆژا 12/12/2019 حوكمه‌تا هه‌رێما كوردستانێ ب رێا ڤالا فه‌رید وه‌زیرا هه‌رێمێ بۆ كارۆبارێن په‌رله‌مانی پرۆژه‌یێ یاسایا چاكسازیێ ره‌وانه‌ی په‌رله‌مانێ كوردستانێ هاته‌كرن.

مه‌حسن دۆسكی ئه‌ندامێ په‌رله‌مانێ كوردستانێ راگه‌هاند رینشتنا په‌رله‌مانێ كوردستانێ كۆ بریاره‌ ئه‌ڤرۆ بهێته‌كرن یا ڤه‌كری بیت ل میدیایێ بهێته‌ په‌خشكرن و لگۆری په‌یره‌وێ ناخۆیێ په‌رله‌مانێ كوردستانێ هه‌كه‌ بهێته‌ پێشنیازكرن رینشتنا په‌رله‌مانی ڤه‌كری بیت، ئه‌ڤه‌ دڤێت ب ده‌نگێ 56 په‌رله‌مانتران هه‌یه‌.