ئه‌ڤرۆ:

سه‌رۆكێ حوكمه‌تا هه‌رێما كوردستانێ ب مه‌به‌ستا پشكداریكرنێ د كۆنفرانسێ داڤۆس، دوهی شه‌مبیێ به‌ر ب وه‌لاتێ سویسرا ب رێكه‌فت.

ب گۆره‌ی به‌یاننامه‌كێ حوكمه‌تا هه‌رێما كوردستانێ، سه‌رۆكێ حوكمه‌تا هه‌رێمێ د چارچۆڤێ كۆربه‌ندی دا دێ چه‌ندین دیدار و كۆمبوون هه‌بن.

ل دووڤ وێ به‌یانناما حوكمه‌تا هه‌رێمێ كو دوهی شه‌مبیێ به‌لاڤكری، مه‌سرور بارزانی، سه‌رۆكێ حوكمه‌تا هه‌رێما كوردستانێ بۆ پشكداریكرنێ د كۆربه‌ندێ داڤۆس ییچ ئابووری یێ جیهانی دا به‌ر ب سویسرا ب رێكه‌فت و بریاره‌ د چارچۆڤێ چالاكیێن كۆربه‌ندی دا، پشكداریێ د پانێله‌كی دا بكه‌ت ب ناڤونیشانێ (پێكهاته‌یه‌كێ نووی ێ ئاسایشێ ل رۆژهه‌لاتا ناڤین دا).

هه‌روه‌سا د په‌راویزا كۆربه‌ندی دا كو دێ ل رۆژێن 22 هه‌تا 26 گۆلانێ ب رێڤه‌چیت، هه‌روه‌كو د به‌یانناما حوكمه‌تا هه‌رێمێ ژی دا هئاماژه‌ پێ هاتیه‌ كرن، سه‌رۆكێ حوكمه‌تا هه‌رێما كوردستانێ دێ چه‌ندین دیدار و كۆمبوون ل گه‌ل به‌رپرسێن بلند و خودانكار و ئابووریناسێن ده‌ڤه‌رێ و جیهانێ هه‌بن.

هه‌روه‌سا د به‌یانناما حوكمه‌تا هه‌رێمێ دا هاتیه‌” د كۆمبوونان دا، ژبلی باسكرنا دووماهی گورانكاری و پێشهاتێن ئیراقێ و ده‌ڤه‌رێ، دانوستاندن ل دۆر هه‌مه‌جۆركرنا ئابووری و ژێده‌رێن داهاتی، گرنگیا پێشخستن و چاكسازیكرنێ د سیسته‌مێ به‌نكی، دیتنا بازارێ نووب ۆ به‌رهه‌مێن چاندنێ ل كوردستانێ، پێشڤه‌برنا ئالوگۆریا بازرگانی و وه‌به‌رئێنانێ هێته‌ كرن”.

هه‌ولێر، قائید میرۆ

وه‌زاره‌تا په‌ترۆلا ئیراقێ به‌یاننامه‌یه‌كا دی لدۆر باده‌كا په‌ترۆلا هه‌رێما كوردستانێ به‌لاڤكر و تێدا جاره‌كادی كه‌رتێ په‌ترۆل و غازا هه‌رێما كوردستانێ ب نه‌قانوونی هه‌ژمارت، شاره‌زایه‌كێ قانوونی ژی دبێژیت، بڕیارێن ئێك لایه‌نه‌ ئاریشێ چاره‌سه‌ر ناكه‌ن و پێدڤیه‌ بۆ چاره‌سه‌ریا ئێكجاری ب رێیا دانوستاندنان بگه‌هنه‌ رێككه‌فتنێ هه‌روه‌سا دیاركر، باشترین چاره‌سه‌ری ده‌ركرنا قانوونا په‌ترۆل و غازێ یه‌ ب گۆره‌ی دستوورێ ئیراقێ.

هه‌لوێست میرانی، شاره‌زایێ قانوونی بۆ رۆژناما (ئه‌ڤرۆ) دیاركر” هه‌ڤڕكیێن دناڤبه‌را حوكمه‌تا هه‌رێما كوردستانێ و حوكمه‌تا فیدڕال دا لدۆر بابه‌تێ په‌ترۆل  و غازێ گرێدای خه‌مساریا حوكمه‌تا ئیراقێ یه‌ ل هه‌مبه‌ر  ده‌ركرنا قانوونا په‌ترۆل  و غازێ دده‌مێ پازده‌ سالێن بۆری دا، ل سالا ٢٠٠٧ێ وه‌ره‌ د چارچۆڤێ ره‌شنڤیسا ڤێ قانوونێ ژئالیێ وه‌زاره‌تا په‌ترۆلا ئیراقێ و جڤاتا وه‌زیرێن ئیراقێ ڤه‌ هاتیه‌ هنارتن بۆ جڤاتا نوونه‌رێن ئیراقێ، به‌لێ ب بهانه‌یا راستڤه‌كرنێ دیسان ژئالیێ جڤاتا نوونه‌ران بۆ سه‌رۆكایه‌تیا جڤاتا وه‌زیران هاتیه‌ هنارتن، دوماهی راستڤه‌كرنا ره‌شنڤیسێ پڕۆژه‌ قانوونا په‌ترۆل و غازێ ل هه‌یڤا ئادارا ٢٠٢١ێ ژئالیێ جڤاتا وه‌زیرێن ئیراقێ هاتیه‌ هنارتن بۆ پجڤاتا نوونه‌رێن ئیراقێ، ب دیتنا من گیرۆبوونا ده‌ركرنا قانوونا په‌ترۆل و غازێ بۆ وێ چه‌ندێ ڤه‌دگه‌ریت باوه‌ری د ناڤبه‌را هه‌ردو حوكمه‌تان دا نینه‌، چونكه‌ ئه‌وا تایبه‌ته‌ ب سه‌ره‌ده‌ریا دگه‌ل هه‌رێما كوردستانێ ده‌ستهه‌لاتا حوكمه‌تا فیدڕال ئه‌وه‌ یاكو د ناڤه‌ڕۆكا ڤی پڕۆژه‌ی دا هه‌ی ب گۆره‌ی مادێ ١١٢ یێ دستووری نه‌هێته‌ داڕێشتن، لسه‌ر بابه‌تێ په‌ترۆل و غازا هه‌رێما كوردستانێ هه‌مان سه‌ره‌ده‌ری دگه‌ل باژێڕێن دی یێن ئیراقێ بۆ بهێته‌كرن، ئه‌ڤه‌ژی رامانا وێ چه‌ندێ دده‌ت وه‌زاره‌تا په‌ترۆلا ئیراقێ هه‌موو ده‌ستهه‌لات د كه‌رتێ په‌ترۆلا هه‌رێما كوردستانێ دا هه‌بن”.

هه‌لوێست میرانی ئاماژه‌كر” ئه‌ز باوه‌رم هه‌رێما كوردستانێ هیچ ده‌مه‌كی رازی نابیت وه‌زاره‌تا په‌ترۆلا ئیراقێ هه‌موو ده‌ستهه‌لات لسه‌ر كه‌رتێ په‌ترۆل  و سامانێن سرۆشتی یێن هه‌رێما كوردستانێ هه‌بن، ژ به‌ر كو ئه‌وا د واقع دا هه‌ی حوكمه‌تا هه‌رێما كوردستانێ حسابه‌كادی بۆ دهێته‌كرن و ب گۆره‌ی دستووری ژی هه‌رێما كوردستانێ تایبه‌تمه‌ندیا خوه‌ هه‌یه‌، ئه‌رك و مافێن سیاسی و كارگێڕی و ئابووری دناڤا دستووری دا هاتینه‌ دیاركرن، بڕیارا دادگه‌ها فیدڕال لدۆر باده‌كا په‌ترۆلا هه‌رێما كوردستانێ دێ بیته‌ ئه‌گه‌ره‌كێ سه‌ره‌كی بۆ وێ چه‌ندێ هه‌ردو حوكمه‌ت له‌زێ بكه‌ن دانوستاندنان لدۆر چاره‌سه‌ركرنا بابه‌تێ په‌ترۆلێ بكه‌ن، ئانكو رێككه‌فتن بهێته‌كرن لسه‌ر باده‌كا په‌ترۆل و غازێ، ژ به‌ر كو تاكو چاره‌سه‌ری بۆ به‌رژه‌وه‌ندیا هه‌ردو ئالیان، ژبلی رێككه‌فتنێ هیچ رێیه‌كا دی نابیته‌ چاره‌سه‌ریا دوماهیێ لدۆر بابه‌تێ په‌ترۆل و غازێ، بڕیارێن ئێك ئالی دێ زێده‌تر ره‌وشێ ئالۆزكه‌ن و ئاریشه‌ دێ هێشتا مه‌زنتربیت و هه‌رێما كوردستانێ یا به‌رهه‌ڤ نابیت بچیته‌ ژێر بجهئینانا هیچ بڕیاره‌كا حوكمه‌تا ئیراقێ”.

ئه‌ڤرۆ، عه‌زیز هه‌ورامی:

پشتی چه‌ندین ئالیێن سیاسی دبن چه‌ندین بیانوویان دا دخواست كورسیێن كێمه‌ ئایین و نه‌ته‌وان ل په‌رله‌مانێ كوردستانێ كێم بكه‌ن و بزاڤا پشت گوه هاڤێتنا وان بكه‌ن كو ل په‌رله‌مانێ كوردستانێ خودانێن 11 كورسیانه‌، توركمان و مه‌سیحی وی پرۆژه‌ی ب دژی خوه‌ دبینن و دبێژن هه‌كه‌ پارتی نه‌بیت دێ دووماهی ب مه‌هێت.

كلارا ئودیشۆ، سه‌رۆكا فاركسیۆنا كلدانی سریانی ئاشووری ل په‌رله‌مانێ كوردستانێ بۆ رۆژناما (ئه‌ڤرۆ) گۆت” هنده‌ك حزب و ئالیێن سیاسی ل هه‌رێما كوردستانێ دژی پێكڤه‌ژیانێ نه‌ و باوه‌ری ب مافێن كه‌مه‌ ئایین و نه‌ته‌وان نینه‌ كو ئه‌و مافه‌ د قانوونی و دستووری نه‌، ئه‌و ئالی باس ل وێ چه‌ندێ دكه‌ن كو كۆتا نوونه‌راتیا گه‌لێ خوه‌ ناكه‌ن و كاری بۆ وێ چه‌ندێ دكه‌ن كورسیێن كۆتا كێم بكه‌ن یان دابه‌ش بكه‌ن، بۆ نموونه‌ دوو كورسیێن كۆتا مه‌سیحی بۆ پارێزگه‌ها سلێمانیێ و دوو بۆ پارێزگه‌ها هه‌ولێرێ و ئێك بۆ پارێزگه‌ها دهۆكێ، ئه‌م وێ چه‌ندێ قه‌بوول ناكه‌ین و رێ ب هیچ ئالیه‌كی سیاسی ژی ناده‌ین ده‌ستكاریێ د كورسیێن كۆتا بكه‌ت و كه‌سێ ئه‌و ماف نینه‌ بریارێ ل سه‌ر كورسیێن مه‌ بده‌ت”.

كلارا ئودیشۆ گۆت ژی” مه‌ پشته‌ڤانیا سه‌رۆك بارزانی و فراكسیۆنا پارتی دیموكراتی كوردستان یا هه‌ی كو 45 كورسێ یێن هه‌ین و به‌رده‌وام پشته‌ڤانێن مه‌نه‌، ئه‌م پرسیارێ ژ وان حزب و ئالیێن سیاسی دكه‌ین ئایا رێژا مه‌سیحیێن كلدانی سریانی ئاشووری ل پارێزگه‌ها سلێمانیێ چه‌نده‌ هه‌تاكو دو كورسیێن كۆتا بۆ بهێنه‌ دانان؟!”.

سه‌رۆكا فاركسیۆنا كلدانی سریانی ئاشووری ل په‌رله‌مانێ كوردستانێ، دیاركر ژی” ئه‌م ل گه‌ل ئێك بازنه‌یا هه‌لبژارتناینه‌ و ل هه‌ر شێوازه‌كێ قانوونی یێ هه‌لبژارتنان، پێدڤیه‌ كورسیێن كۆتا ل سه‌ر ئاستێ هه‌رێما كوردستانێ ئێك بازنه‌ بیت، تنێ مه‌سیحیان ده‌نگ ب من نه‌دایه‌ به‌لكو من ده‌نگێ موسلمانان ژی بده‌ستڤه‌ئینایه‌، فره‌بازنه‌یی بۆ ده‌نگده‌رێن كه‌مه‌ ئایین و نه‌ته‌وان دێ بیته‌ ئاریشه‌، مه‌ پشته‌ڤانیا سه‌رۆك بارزانی یا هه‌ی و د پشت راستین ئه‌و رێ ناده‌ت مافێن مه‌ بهێنه‌ پێشێلكرن”.

ژئالیێ خوه‌ڤه‌، ئازاد ئه‌كره‌م، سه‌رۆكێ فراكسیۆنا (ملله‌ت) یا توركمانی ل په‌رله‌مانێ كوردستانێ بۆ رۆژناما (ئه‌ڤرۆ) گۆت” كورسیێن كۆتا یێن كه‌مه‌ ئایین و نه‌ته‌وان مافێن وانن و پێ هاتیه‌ دان، نوكه‌ هنده‌ك حزب و ئالیێن سیاسی یێن په‌شێمان بووین ژ هه‌ژمارا وان كورسیێن كۆتا، ب دیتنا مه‌ كێمكرنا كورسیێن كۆتا جهێ قه‌بوولكرنێ ننیه‌ و بۆ هه‌رێما كوردستانێ ژی یا جوان نینه‌ ئه‌و كاره‌ بهێته‌ كرن، ئێك ژوان كارێن ل هه‌رێما كوردستانێ شانازیێ پێ دكه‌ین پێدانا مافێن پێكهاتانه‌ هه‌كه‌ بهێت و په‌شێمان بوون ژ هه‌ژمارا كورسیێن كۆتا بهێته‌ كرن رامانا وێ چه‌ندێ بۆ جیهانا ده‌رڤه‌ ئه‌وه‌ كو هه‌رێما كوردستانێ نه‌شیا پارێزه‌ریا مافێن كۆتا بكه‌ت و ئه‌و مافێن ب وان هاتیه‌ دان یێ زێده‌بوو”.

ئازادی دیاركر ژی” فراكسیۆنا مه‌ ل گه‌ل سیسته‌مێ فره‌بازنه‌ییێ د هه‌لبژارتنان دا نینه‌ و ئه‌و سیسته‌مه‌ بۆمه‌ یێ باش نینه‌، ل هنده‌ك جهان هه‌ژمارا مه‌ یا كێمه‌ و ل هنده‌ك جهێن دیتر ژی هه‌ژمارا مه‌ گه‌له‌كه‌، له‌وما د سیسته‌مێ ئێك بازنه‌یی یێ هه‌لبژارتنان دا دێ شێین ده‌نگێن خوه‌ كۆمڤه‌ بكه‌ین”.

ئه‌وژی گۆت” هزره‌كا شاشه‌ بێژین كورسیێن كۆتا نێزیكی ئالیه‌كێ سیاسی نه‌، بۆچی بۆ بزاڤا گۆران و بۆ ئێكه‌تی نیشتمانی كوردستان هه‌یه‌ بۆ پێكئینانا حوكمه‌تێ هه‌ڤپه‌یمانیێ ل گه‌ل پارتی دیموكراتی كوردستان بكه‌ن و بۆچی بۆمه‌ نابیت؟ ده‌مێ رێككه‌فتنه‌كێ دكه‌ی پێدڤیه‌ ژ روویێ ئه‌خلاقی ڤه‌ پێگیری رێككه‌فتنێ بی، ئه‌م ده‌مێ ل گه‌ل حوكمه‌تێ دا بین ئانكو ل گه‌ل وان ئالیێن پشكدارن د حوكمه‌تێ دا، نوكه‌ گۆران و ئێكه‌تی خوه‌ ب نیڤا حوكمه‌تێ دهه‌ژمێرن، لێ ئه‌و د ناڤا حوكمه‌تێ دانه‌ و ره‌فتارێن ئۆپۆزسیۆنێ دكه‌ن”.

ناڤبری ئاماژه‌ ب وێ چه‌ندێ ژی كر” هه‌كه‌ پارتی نه‌بیت، ئانكو كورسیێن مه‌ یێن كۆتا نامینن، فراكسیۆنا ئێكه‌تی نیشتمانی كوردستان هاتیه‌ ده‌ف مه‌ و ب مه‌ راگه‌هاندیه‌ كو وان پرۆژه‌ك یێ هه‌ی ل دۆر كورسیێن كۆتا توركمانان كو دوو كورسی بۆ پارێزگه‌ها سلێمانیێ و سێ كورسی بۆ پارێزگه‌ها هه‌ولێرێ، مه‌ ژی ب وان راگه‌هان هه‌كه‌ هوین پشته‌ڤانیا توركمانان دكه‌ن وه‌رن كورسیێن كۆتا زێده‌ بكه‌ن نه‌كو پشت گوه ب هاڤێژن و كێم بكه‌ن و پارتی ب سه‌ركێشیا سه‌رۆك بارزانی و فراكسیۆنا پارتی ل په‌رله‌مانێ كوردستانێ پارێزه‌رێن مه‌نه‌”.

ئه‌ڤرۆ، سالار محه‌مه‌د دۆسكی:

چاڤدێره‌كێ سیاسی ئاشكراكر كو pkk وه‌كر ژبلی لێدانێن له‌شكرێ‌ توركیا، بۆ ئه‌گه‌رێ‌ هاتنا هێزه‌كا مه‌زن یا ئیراقی بۆ ده‌ڤه‌را شنگالێ و ئه‌ڤ هێزه‌ زوو ب زوو ژ ده‌ڤه‌رێ‌ ناهێته‌ ڤه‌كێشان.

عه‌بدوالرحمان شنگالی، چاڤدێرێ سیاسی مامۆستایێ‌ زانكۆیێ‌ بۆ رۆژناما (ئه‌ڤرۆ) گۆت:” ره‌وشا شنگالێ نوكه‌ گه‌له‌ك یا خراب و مه‌ترسیداره‌ كو ژئالیێ جڤاكی ڤه‌ نه‌یا باشه‌ و ژئالیێ له‌شكری ڤه‌ ئێمناهی وئارامی نینه‌ ئانكو ب گشتی شنگالی یا دكاودانه‌كێ‌ نه‌باش دا دبۆریت،ب درێژاهیا دیرۆكا خوه‌ به‌رده‌وام شنگال دئه‌ڤان كاودانان دا ده‌ربازبوویه‌، د ناڤبه‌را سالێن 2005 هه‌تا 2014 شنگالێ گه‌شه‌ ب خوه‌ ڤه‌ دیت وه‌كو ئاڤه‌دانكرن و خزمه‌تگوزاریێن باش بۆ ده‌ڤه‌رێ‌ ب گشتی و شنگالێ ب تایبه‌تی هاتنه‌كرن و هه‌تا ژ روویێ‌ دامه‌زراندنێ‌ ژی حوكمه‌تا هه‌رێما كوردستانێ‌ رووله‌كێ‌ به‌رچاڤ بۆ خه‌لكێ‌ ده‌ڤه‌رێ‌ گێرا  و هه‌تا حوكمه‌تا ناڤه‌ندی یا به‌غدا ژی هنده‌ك لڤین كرن و هنده‌ك خه‌لك دامه‌زراند و هه‌تا راده‌كی باش بوو، لێ‌ پشتی 2014 ئه‌و كاره‌سات روودا و تشتێ‌ نه‌باش دووڤ  خوه‌ دا هێلا”.

عه‌بدولره‌حمانی گۆت ژی” هێزێن هه‌رێمایه‌تی و تایبه‌ت وه‌لاتێن جیران وه‌كو ئیران و توركیا گه‌له‌ك باندور ل سه‌ر شنگالێ هه‌یه‌ و ئه‌ڤه‌ بۆ  جهێ‌ وێ‌ یێ‌ جوگرافی ڤه‌دگه‌ریت و پێگه‌هێ‌ شنگالێ ل سه‌ر سنورێ‌ دو وه‌لاتێن مه‌زن وه‌كو سووریێ و توركیا و پێشتر رێیێن بازرگانی هه‌بووینه‌ و رێیا ئارمیشی ژی بوویه‌ و ئیران بزاڤا  دكه‌ت هیلالا شیعی ب سووریێ‌ و لوبنانێ‌ ڤه‌ ته‌مام بكه‌ت و توركیا ناهێلیت ئه‌ڤ چه‌نده‌ دروست ببیت و گه‌له‌ك مایتێكرن ل سه‌ر ده‌ڤه‌رێ‌ هه‌یه‌ و هه‌ر وه‌لاته‌ك ل دووڤ به‌رژوه‌ندیا خوه‌ كار دكه‌ت “.

شنگالی زێده‌تر ژی گۆت” كاره‌ساتا 2014 ل شنگالێ چێبووی هه‌ر تشته‌كێ‌ مه‌ژی نه‌بینیت و هزر نه‌كه‌ت ل شنگالێ دروست بوو ژ كوشتن و تالانكرنێ‌ و ره‌ڤاندنا كچ و ژنان و برنا مال و ملكێن خه‌لكی ژ ئالیێ تیرۆرستێن داعشێ ڤه‌ و ئه‌ڤه‌ هه‌شت ساله‌ خه‌لكێ‌ ده‌ڤه‌رێ‌ دناڤا كه‌مپان دا دژیت و دیسا رۆلێ‌ حوكمه‌تا هه‌رێما كوردستانێ‌ چاڤدانا خه‌لكی كر و خه‌لكێ‌ شنگالێ دیت كو هه‌ر حوكمه‌تا هه‌رێمێ‌ بوویه‌ خوه‌ ب خودانا ڤی خه‌لكی زانی”.

ئاماژه‌كر” كۆمه‌كا هێزێن چه‌كدار و هه‌مه‌جۆر ل شنگالێ‌ یێن هه‌ین و كه‌سه‌ك خوه‌ ناده‌ته‌ ب یێ دی و رێگریێ‌ دكه‌ن  و هه‌ر تشته‌كێ‌ رووده‌ت هه‌ما دبۆریت و كه‌سه‌ك نوزانیت چ چێبوویه‌ و ئه‌ڤێ‌ چه‌ندێ‌ ره‌وشا شنگالێ ئالۆزتر لێكریه‌،گه‌له‌ك هێزێن حه‌شدێ‌ هه‌نه‌ و گه‌له‌ك تا هه‌نه‌ و دروستبوونا حه‌شدێ‌ ل سه‌ر بنه‌مایێ‌ تایفگه‌ری بوو ، تشتێ‌ خرابتر هه‌بوون و ده‌ست درێژیا  pkk ل شنگالێ و كارێن خراب ئه‌نجام ده‌ت و  كو پتر ژ 1200 كچ و كورێن خه‌لكێ‌ شنگالێ بۆ  قه‌ندیلی ره‌وانه‌كرینه‌، خولێن  كادران و فێركرنا چه‌كی و ئایدولوژیا   pkk ڤه‌دكه‌ت و پتر كاودان تێكداینه‌ و بووینه‌ رێ خوه‌شكه‌ر بۆ هاتنا هێزێن توركی بۆ ده‌ڤه‌رێ‌ و دیسا خه‌لكێ‌ بیانی ئیناینه‌ ده‌ڤه‌را شنگالێ و ده‌ستهه‌لاتێ‌ ل ده‌ڤه‌رێ‌ دكه‌ن و خوه‌ ئاخڤتنا وان ژی وه‌كو یا خه‌لكێ‌ شنگالێ نینه‌، ب گشتی كاودان د باش نینن و دتونێله‌كا تاری دا ده‌ربازدبن”.

سه‌باره‌ت چاره‌سه‌ریا وێ پرسێ دبێژیت” چاره‌سه‌ری ئه‌وه‌ ل دووڤ وێ‌ رێككه‌فتنا دناڤبه‌را هه‌ولێرێ‌ و به‌غدا هاتیه‌كرن كو سێ‌ خالان ب خوه‌ ڤه‌ دگریت، ئه‌وژی هێزێن له‌شكری بچنه‌ ده‌رڤه‌ی باژێری و شنگالێ ب پارێزن و هێزێن ناڤخوه‌ وه‌ك پولیس و هاتنوچوون و ئاسایش هه‌ر خه‌لكێ‌ شنگالێ بیت و پێشتر ژی  ئه‌ڤه‌ بوو و دیسا خالا سیێ‌ ئاڤه‌دانكرنا شنگالێ بهێته‌كرن چونكه‌ هه‌كه‌ جه و ده‌وام نه‌بن خه‌لك نه‌شێت ڤه‌گه‌ریته‌ سه‌ر جه و مالێن خوه‌”.

ل دور هێزێن ئیراقێ ژی، ئه‌وێن نوكه‌ ل شنگال ێبنه‌جه بووین، دبێژیت” PKK وه‌كر ژبلی لێدانێن له‌شكرێ‌ توركیا،  بۆ ئه‌گه‌رێ‌ هاتنا ڤێ‌ هێزا مه‌زنا ئیراقێ بۆ ده‌ڤه‌رێ‌ و ئه‌ڤ هێزه‌ زوو ب زوو ژ ده‌ڤه‌رێ‌ ناهێته‌ ڤه‌كێشان”.

ل دووماهیێ‌ گۆت” ئه‌م شنگالی وه‌ستیاین و دڤێت ئه‌ڤ كاودانه‌ بهێنه‌ ئارامكرن و ئێدی خه‌لكی هه‌دار نه‌ما و  دڤێت ڤه‌گه‌رنه‌ سه‌ر مال و مولك و چاندنا خوه‌ و تاكه‌ چاره‌سه‌ری بۆ ئه‌ڤان كاودانان ئه‌وه‌ كو هێزێن بیانی ژ شنگالێ ده‌ركه‌ڤن و خه‌لكێ‌ ده‌ڤه‌رێ‌ جهێ‌ خوه‌ برێڤه‌ببه‌ن و بۆ ئاڤه‌دانكرنێ‌ پاره‌كێ‌ مه‌زن بۆ دڤێت چونكه‌ شنكال هه‌موو یا ژ ناڤچووی”.

ئه‌ڤرۆ، له‌زگین جوقی

قایمقامێ قه‌زا شنگالێ ب وه‌كاله‌ت راگه‌هاند، گه‌له‌ك جاران به‌غدا به‌غدا راگه‌هاندیه‌ pkk ل شنگالێ نه‌مایه‌ لێ‌ چو راستی بۆ وێ چه‌ندێ نینه‌ وهه‌تا نوكه‌ pkk  یا د شنگالێ دا مای وئه‌ڤه‌ چه‌ندین رۆژن خه‌لكێ‌ شنگالێ خوه‌نیشادانان دكه‌ن ودخوازن گرۆپێن نه‌شه‌رعی ژ شنگالێ ده‌ركه‌ڤن به‌لێ هه‌تا نوكه‌ رێز ل بریار و داخوازیێن خه‌لكێ‌ شنگالێ نه‌هاتیه‌ گرتن..

نایف سه‌یدۆ, قایمقامێ‌ قه‌زا شنگالێ ب وه‌كاله‌ت گۆت” گاڤه‌كا باشه‌ كو خه‌لكێ‌ شنگالێ ده‌ست ب خوه‌نیشادانان دكه‌ن بۆ ده‌ركرنا گرۆپێن نه‌شه‌رعی ژناڤ مالێن وه‌لاتیان وخه‌لك دخوازن گرۆپێن نه‌شه‌رعی ژ شنگالێ ده‌ركه‌ڤن چونكو ئه‌و جهێ‌ ئه‌و گرۆپ لێ هه‌ین ئارامیێ لێ تێك دده‌ن وئه‌م دگه‌ل خه‌لكێ‌ خوه‌نه‌ ومه‌ دڤیت گرۆپێن نه‌شه‌رعی شنگالێ چۆل بكه‌ن وله‌شكرێ ئیراقێ پاراستنا سنۆری شنگالێ دگه‌ل رۆژئاڤایێ‌ كوردستانێ‌ بكه‌ت وئێدی ته‌قه‌ نه‌هێته‌ كرن دناڤ مالێن خه‌لكی دا چونكو هه‌كه‌ شه‌ر یێ‌ به‌رده‌وام بیت دێ‌ هه‌موو خه‌لك ئاواره‌بن وكه‌س ل شنگالێ نامینیت و مخابن هه‌تا نوكه‌ گرۆپێن نه‌شه‌رعی گوهداریا داخوازیێن خه‌لكێ‌ شنگالێ نه‌كریه‌”.

ئاماژه‌كر” ل هه‌لبژارتنێن ڤێ دووماهیێ یێن جڤاتا نوونه‌رێن ئیراقێ خه‌لكێ‌ شنگالێ ب ده‌نگێن خوه‌ ئه‌و گرۆپێن نه‌ شه‌رعی سزادان وده‌نگ پێ نه‌دان و پێدڤی بوو ئه‌و گرۆپ رێزێ‌ ل بریارا خه‌لكێ‌ بگرن وشنگالێ چۆل بكه‌ن و هه‌تا نوكه‌ ژی خه‌لكێ شنگالێ خوه‌نیشادانان دكه‌ت ودبێژیته‌ وان گرۆپان پێدڤیه‌ هوون شنگالێ چۆل بكه‌ن”.

نایف سه‌یدۆ گۆت ژی” پشتی هه‌ست سالان ئه‌و خه‌لكێ ژ شنگالێ ئاواره‌بووین نوكه‌ بتنێ‌ دخوازن گرۆپێن نه‌شه‌رعی شنگالێ چۆل بكه‌ن ژبه‌ر وی خه‌لكی ته‌ناهی دڤێت وئه‌ڤه‌ هه‌شت سالن ژبه‌ر نه‌بوونا ته‌ناهیێ‌ نه‌شیاینه‌ ڤه‌گه‌رنه‌ سه‌ر جهێن خوه‌ وپشتی جینوسایدا شنگالێ یا رۆژا 3/8/2014ێ‌ ل سه‌ر ده‌ستێن تیرۆرستێن داعشێ روودایێ‌ وخه‌لك ئاواره‌بووین، نوكه‌ جاره‌كا دێ‌ خه‌لكێ شنگالێ یێ‌ ئاواره‌دبن وئه‌ڤه‌ شه‌رمه‌زاریه‌ بۆ حكومه‌تا ئیراقێ كو حوكمه‌ته‌كا خودان خۆدان سه‌روه‌ری بیت و نه‌شێت پاراستنا خه‌لكێ‌ خوه‌ بكه‌ت  كو سه‌روه‌ریا ئیراقێ هاتیه‌ بنپێكرن ل شنگال وپێدڤیه‌ به‌غدا بێده‌نگ نه‌مینیت و سه‌روه‌ریا ئیراقێ بپارێزیت ژ گرۆپێن نه‌شه‌رعی یێن كو رێگریێ‌ ل بجهئێنانا داخوازیێن خه‌لكێ‌ شنگالێ دكه‌ن”.

ئاشكه‌را كركو شه‌رێ‌ د ناڤبه‌را pkk  و له‌شكرێ ئیراقێ دا بوویه‌ ئه‌گه‌ر پتر  ژ هزار و 700 خێزانان دووباره‌  ژ شنگالێ ئاواره‌ببن هه‌تاكو كارتێكرن ل سه‌ر بجهئێنانا پرۆژه‌یێن خزمه‌تگوزاری كریه‌ هه‌روه‌سا بوو ئه‌گه‌ر داموده‌زگه‌هیێن خزمه‌تگوزارێ‌ نه‌شێن كارێن خوه‌ ئه‌نجام بده‌ن وئه‌و شه‌ر بوویه‌ ئه‌گه‌ر خه‌لكێ‌ شنگالێ هزر ل كوچبه‌ریا ده‌رڤه‌ی وه‌لاتی بكه‌ن وئیراقێ بجه بهێلن”.

قایمقامێ شنگالێ ب وه‌كاله‌ت رۆهنكر ژی ” ئه‌ز د وێ‌ باوه‌ریێ  دا مه‌ هه‌كه‌ ره‌وشا شنگالێ چاره‌سه‌ر نه‌بیت دێ‌ گه‌له‌ك خێزانێن شنگالێ قه‌ستا ده‌رڤه‌ی وه‌لاتی كه‌ن چونكو خه‌لكێ‌ باوه‌ری ب به‌غدا نه‌مایه‌ و ئه‌ڤه‌ هه‌شت سالن هێشتا حوكمه‌تا ئیراقێ نه‌شیایه‌ ره‌وشا شنگالێ چاره‌سه‌ربكه‌ت”.

ل دووماهیێ گۆت”  ئه‌م ژی تێناگه‌هین بۆجی ب رۆژێ‌ شه‌ری دكه‌ن وپشتی ئێڤاریان پێكڤه‌ دروونن قه‌هوێ دگه‌ل ئێك ڤه‌دخۆن ئه‌ز دبینم بریارا PKKنه‌ ده‌ستێ‌ PKK دایه‌ و بریارا له‌شكرێ ئیراقێ ژی نه‌ ده‌ستێ‌ له‌شكری دایه‌”.

ئه‌ڤرۆ:

ئه‌ندامه‌كێ هه‌ڤپه‌یمانیا (چارچۆڤێ هه‌ماهه‌نگیێ) یا شیعی راگه‌هاند، د رۆژێن داهاتی دا مه‌سعود بارزانی دێ رۆله‌كێ مه‌زن و كاریگه‌ر د پرۆسا سیاسی دا ل ئیراقێ گیریت و ئاماژه‌كر كو بارزانی دێ پرۆسا سیاسی ل ئیراقێ قورتال كه‌ت ژبه‌ر سه‌نگ و كاریگه‌ریا وی ل سه‌ر هه‌ڤپشكێن سیاسی.

عائید هیلالی، ئه‌ندامێ هه‌ڤپه‌یمانیا (چارچۆڤێ هه‌ماهه‌نگیێ) گۆت” رێبه‌رێ ره‌وتێ سه‌دری موقته‌دا سه‌در باش دزانیت كو پرۆسا پێكئینانا حوكمه‌تا ئیراقی یا نوو ژ كارێن ئه‌سته‌مه‌ و ئه‌ڤ چه‌نده‌ ژی دزڤریت ئه‌گه‌رێ هه‌بوونا هه‌ژماره‌كا مه‌زن یا ئه‌ندامێن جڤاتا نوونه‌ران ژ هه‌ڤپه‌یمانیا سێ قۆلی (سه‌در، پارتی، سوننه‌) له‌وما پرۆسا پێكئینانا حوكمه‌تێ ژ ئالیێ (چارچۆڤێ هه‌ماهه‌نگیێ) ڤه‌ یا ب ساناهی نینه‌، لێ یا ئه‌سته‌م ژی نینه‌”.

ناڤبری دیاركر كو ل گه‌ل هه‌بوونا ده‌ستپێشخه‌ریا چارچۆڤێ هه‌ماهه‌نگیێ و یا ره‌وتێ سه‌دری ژی، دبیت ده‌ستپێشخه‌ریه‌كا دی ژی هه‌بیت ژئالیێ مه‌سعود بارزانی ڤه‌ پشتی جه‌ژنا ره‌مه‌زانێ كو دوور نینه‌ ئه‌و ده‌ستپێشخه‌ریا بارزانی ببیته‌ ئه‌گه‌رێ نێزیكبوونا بیروبۆچوونان د ناڤبه‌را هه‌ڤپشكێن سیاسی و د ئه‌نجام دا دبیت ببیته‌ ئه‌گه‌رێ په‌یداكرنا لێكتێگه‌هشتنێن نوو ل سه‌ر بنه‌مایێ هه‌ڤپشكیێ، نه‌كو ل سه‌ر بنه‌مایێ ل هه‌ڤهاتنان.

عائید هیلالی زێده‌تر گۆت” هه‌موو چاڤدێرێن پرۆسا سیاسی ل ئیراقێ، دزانن كو موقته‌دا سه‌در بریاران دده‌ت ل سه‌ر بنه‌مایێ باوه‌ریێن كه‌سایه‌تی و رێزێ ل بریارێن دی دگریت و بزاڤێ دكه‌ت فشارێ ل سه‌ر ئالیێن دی بكه‌ت (هه‌ڤپه‌یمانیا سه‌روه‌ری یا سوننی و پارتی دیموكراتی كوردستان) ب رێیا سه‌نگا خوه‌ یا سیاسی، به‌لێ ئه‌ڤه‌ رامانا وێ چه‌ندێ نینه‌ كو هه‌ڤپه‌یمانیا سه‌روه‌ری و پارتی دیموكراتی كوردستان بۆچوون نینن، به‌لكو وان بۆچوونێن هه‌ژی یێن هه‌ین ب رێیا سه‌نگا وان یا سیاسی”.

هه‌روه‌سا گۆت” مه‌سعود بارزانی سه‌نگ و كاریگه‌ریا خوه‌ ل سه‌ر هه‌ڤپشكێن سیاسی یا هه‌ی و ل رۆژێن داهاتی دێ بارزانی رۆله‌كێ مه‌زن و كاریگه‌ر د پرۆسا سیاسی دا گێریت و دێ پرۆسا سیاسی قورتال كه‌ت”.

ئه‌ڤرۆ:

گاری كێنت، په‌رله‌مانتارێ بریتانی ل دۆر سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ بۆ بریتانیا دووپاتكر كو ئه‌و سه‌ره‌دانا سه‌رۆكێ حوكمه‌تا هه‌رێمێ گاڤه‌كا گرنگه‌ بۆ پێشڤه‌برنا په‌یوه‌ندیان دناڤبه‌را هه‌رێما كوردستانێ و بریتانیا.

وی په‌رله‌مانتارێ بریتانی گۆت ژی” د ده‌مێ 31 سالێن بۆری دا كورد بووینه‌ خودان پێگه‌هه‌كێ گه‌له‌ك گرنگ و دیار د سیاسه‌تا ده‌رڤه‌ و وه‌زاره‌تا ده‌رڤه‌ یا بریتانیا دا و د وی چارچۆڤه‌ی دا مه‌ ئاماده‌بوونه‌كا باش ل هه‌ولێرێ یا هه‌ی و هه‌رێما كوردستانێ هه‌ڤپه‌یمانه‌كا گرنگ یا مه‌یه‌”.

دووپاتكر ژی” سه‌ره‌دانا سه‌رۆكێ حوكمه‌تا هه‌رێما كوردستانێ بۆ بریتانیا و سه‌ره‌دانێن پێشتر، دێ بنه‌ هۆكار بۆ دیاربوونا هه‌رێما كوردستانێ ل سه‌ر نه‌خشێ جیهانێ و گاڤێن باش ب وی ئاراسته‌ی یێن هاتینه‌ هاڤێتن و هه‌رێما كوردستانێ جهه‌كه‌ كو پێكڤه‌ژیانا ئایینی یا تێدا هه‌ی و شه‌رێ تیرۆرێ دكه‌ت، هه‌تا نوكه‌ ژی قه‌ربانیدانا پێشمه‌رگێ كوردستانێ یا ل پێش چاڤ كا چاوان به‌رامبه‌ر تیرۆرستان كوردستان و ئه‌م و ده‌ڤه‌ر ژی پاراست”.

گاری گێنت زێده‌تر گۆت” ئه‌وا پێدڤی ل سه‌ر هه‌رێما كوردستانێ د ڤێ ره‌وشێ دا ئه‌وه‌ كو دڤێت پشته‌ڤانیێ ژ دۆست و هه‌ڤپه‌یمانان وه‌ربگریت، ب تایبه‌تی ژ بریتانیا و شیانێن خوه‌ بلند بكه‌ت و ببیته‌ هه‌ڤپه‌یمانه‌كا گه‌له‌ك باش و پێدڤی یا رۆژئاڤای”.

خویاكر” كورد د شه‌رێ دژی تیرۆرێ دا ژ پێخه‌مه‌ت پاراستنا مه‌ قوربانیێن مه‌زن دان، نوكه‌ ژی ده‌مێ وێ چه‌ندێ یه‌ كو بریتانیا وه‌كو دۆسته‌كێ باوه‌رپێكریا كوردان خوه‌ دیاربكه‌ت و هاریكاریا كوردان بكه‌ت و پێدڤیه‌ ئیراق ژی هاریكاریا كوردان بكه‌ت و پێدڤیه‌ كێشا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بهێته‌ چاره‌سه‌ركرن و بریتانیا دشێت هاریكار بیت بۆ چاره‌سه‌ركرنا هه‌موو ئه‌و كێشێن ژ سالا 2005 ب هه‌لاویستی ماین د ناڤبه‌را هه‌رێما كوردستانێ و ئیراقێ”.

هه‌روه‌سا دیاركر” هه‌موو په‌یوه‌ندیێن مه‌ د بوارێن جودا دا ئابووری، بازرگانی، سیاسی و دبلۆماسی ل گه‌ل هه‌رێما كوردستانێ، هۆكارێن گرنگن بۆ ب هێزبوونا پێگه‌هێ هه‌رێما كوردستانێ و پێدڤیه‌ هه‌رێم كاری ل سه‌ر كه‌رتێن پیشه‌سازی و چاندنێ و هه‌موو وان كه‌رتان بكه‌ ت یێن دبنه‌ هۆكارێن ب هێزكرنا ژێرخانا وێ یا ئابووری”.

دووپاتكر ژی” من پێشنیاز كریه‌ كو هه‌له‌بجه‌ ببیته‌ كه‌سكترین پارێزگه‌ه ل سه‌ر ئاستێ ئیراقێ و هه‌رێما كوردستانێ، بۆ وێ مه‌به‌ستێ ژی پێدڤیه‌ هاریكاریێ ژ بریتانیا وه‌ربگرن”.

هه‌ولێر، قائید میرۆ

ئه‌ندامه‌كا لژنا قانوونی ل په‌رله‌مانێ كوردستانێ ئاشكراكر، راگرتنا كۆمبوونێن په‌رله‌مانی ژئالیێ سه‌رۆكا په‌رله‌مانی ڤه‌ بۆ مه‌ره‌مێن حزبی و سیاسیه‌ و نابیت په‌رله‌مان بهێته‌ راگرتن و به‌رۆڤاژی هه‌رێما كوردستانێ یا د قۆناغه‌كا نازك دا ده‌رباز دبیت و پێدڤی ب كۆمبوونێن په‌رله‌مانی هه‌یه‌ هه‌روه‌سا دیاركر، پێدڤیه‌ د كۆمبوونا په‌رله‌مانی دا پرسا هه‌لبژارتنان و كاراكرنا كۆمسیۆنێ بهێته‌ ئێكلاكرن.

سارا دلشاد، ئه‌نداما لژنا قانوونی ل په‌رله‌مانێ كوردستانێ بۆ رۆژناما (ئه‌ڤرۆ) گۆت” پشتی وه‌رزێ نوو یێ په‌رله‌مانێ كوردستانێ هاتیه‌ ده‌ستپێكرن هه‌تا نوكه‌ تنێ ئێك كۆمبوونا په‌رله‌مانی هاتیه‌ ئه‌نجامدان، ب گۆره‌ی په‌یڕه‌وێ نافخوه‌یێ په‌رله‌مانی، ئه‌ركێ سه‌رۆكا په‌رله‌مانیه‌ داخوازا كۆمبوونێن په‌رله‌مانی بكه‌ت، به‌لێ دیاره‌ سه‌رۆكا په‌رله‌مانی داخوازا كۆمبوونێن په‌رله‌مانی نه‌كریه‌، دیاره‌ ئه‌و وه‌كی حزب مه‌ره‌مێن تایبه‌تێن خوه‌ هه‌نه‌، مخابن راگرتنا كۆمبوونێن په‌رله‌مانی دێ كاریگه‌ری لسه‌ر خه‌لكێ كوردستانێ هه‌بن، بتایبه‌تی قانوونا چاكسازیێ ژئالیێ سه‌رۆكایه‌تیا حوكمه‌تا هه‌رێما كوردستانێ هاتیه‌ هنارتن بۆ په‌رله‌مانی، هه‌روه‌سا هه‌رێم یا دده‌مه‌كێ نازك دا ده‌رباز دبیت به‌ر ب ئه‌نجامدانا هه‌لبژارتنێن ئه‌ڤساله‌ كو ١ی هه‌یڤا ئۆكتۆبه‌رێ ژئالیێ سه‌رۆكێ هه‌رێما كوردستانێ ڤه‌ هاتیه‌ دیاركرن بۆ ئه‌نجامدانا هه‌لبژارتنان، داخوازێ ژ سه‌رۆكا په‌رله‌مانێ كوردستانێ دكه‌ین بۆ ئه‌نجامدانا كۆمبۆنێن په‌رله‌مانی و ئێكلاكرنا بابه‌تێ رێڤه‌چوونا هه‌لبژارتنێن هه‌رێما كوردستانێ د ده‌مێ خوه‌ یێ قانوونی دا، نابیت سه‌رۆكا په‌رله‌مانی ئیڕاده‌یا خوه‌ بسه‌ر مه‌زنترین ده‌زگه‌هێ قانوونی بسه‌پینیت و مافێ خه‌لكێ كوردستانێ و ئه‌ندامێن په‌رله‌مانی بخوت.

سارا دلشاد ئاماژه‌كر” كۆمسیۆنا سه‌ربخوه‌یا هه‌لبژارتنان پێدڤی ب شه‌ش هه‌یڤان هه‌یه‌ بۆ به‌رهه‌ڤیێن ئه‌نجامدانا هه‌لبژارتنان، دیاره‌ ده‌م یێ د بۆریت و  پێدڤیه‌ كۆمسیۆنا هه‌لبژارتنان بڕیارێ بده‌ت ده‌م هێشتا مایه‌ یان ژی نه‌شێن به‌رهه‌ڤیان بكه‌ن بۆ ئه‌نجامدانا هه‌لبژارتنێن ئه‌ڤساله‌، چونكه‌ رێكارێن قانوونی یێن هه‌ین بۆ ئه‌نجامدانا هه‌لبژارتنان، ئه‌م داخوازێ دكه‌ین له‌ز بهێته‌كرن بۆ به‌رهه‌ڤیێن ئه‌نجامدانا هه‌لبژارتنێن داهاتی و كۆمسیۆنا هه‌لبژارتنان ژئالیێ په‌رله‌مانی ڤه‌ بهێته‌ كاراكرن وقانوونا به‌رێ یا هه‌لبژارتنان بهێته‌ بجهئینان، چونكه‌ ئه‌م باوه‌رین قانوونا هه‌لبژارتنان چو ئاریشه‌ تێدا نینن و به‌ری نوكه‌ ژی هه‌لبژارتنێن بۆری هه‌موو ب گۆره‌ی ڤێ قانوونێ هاتینه‌ ئه‌نجامدان، وه‌ك پێكهاته‌ ژی دخوازین هه‌رێما كوردستانێ بۆ هه‌لبژارتنێن داهاتی هه‌موو ئێك بازنه‌ بیت، هه‌تا ده‌نگێن مه‌ به‌لاف نه‌بن و ئێك بازنه‌یی د به‌رژه‌وه‌ندیا مه‌یه‌، رێژا بۆ پێكهاته‌یێن هه‌رێما كوردستانێ هاتیه‌ دیاركرن نابیت ده‌ستكاری تێدا بهێته‌كرن و ئه‌م باوه‌رین هێشتا كێمه‌ژی نه‌كو بهێنه‌ كێمكرن وه‌كو هنده‌ك ئالی دبێژن، پێكهاته‌یێن هه‌رێما كوردستانێ بووینه‌ سومبۆله‌ك بۆ ده‌ڤه‌رێ و پێكڤه‌ژیانێ، هه‌روه‌سا رۆل هه‌بوویه‌ د ئاڤاكرن و به‌ر ب پێشڤه‌برنا هه‌رێما كوردستانێ و هه‌ر ده‌ستكاریه‌ك هه‌بیت، بێگومان دێ كاریگه‌ریێن خراپ بۆ هه‌بن.

ئه‌ڤرۆ:

سه‌رۆك مه‌سعود بارزانی، دسالڤه‌گه‌را  تاوانا ئه‌نفالێ په‌یامه‌ك به‌لاڤكر و رادگه‌هینیت، تاوانا ئه‌نفالێ ئێك ژ نه‌ مروڤانه‌ترین و تاریترین قۆناغێن ده‌وله‌تا ئیراقێ یه‌.

سه‌رۆك بارزانی د پێگه‌هێ خوه‌ ل سه‌ر تۆرا جڤاكی یا (تویته‌ری) په‌یامه‌ك ل سالڤه‌گه‌را كاره‌ساتا ئه‌نفالێ به‌لاڤكر و د په‌یامێ دا هاتیه‌، هه‌وا جینۆسایدا ئه‌نفالێ ئێك ژ نه‌ مرۆڤانه‌ترین زنجیرێن دیرۆكا ئیراقێ یه‌ ل چه‌رخێ بۆری.

سه‌رۆك بارزانی ب پێدڤی زانی ده‌وله‌تا ئیراقێ قه‌ره‌بوویا كه‌سوكارێن ئه‌نفالكریان بكه‌ت و رادگه‌هینیت، پێدڤیه‌ ده‌وله‌تا ئیراقێ ده‌ست ب پرۆسا قه‌ره‌بووكرنا مالباتێن قوربانیێن وێ تاوانێ بكه‌ت.

ئه‌ڤرۆ:

ئه‌ندامه‌كێ په‌رله‌مانێ كوردستانێ ژ فراكسیۆنا پارتی دیموكراتی كوردستان راگه‌هاند، دیموكراسی پرۆسه‌كه‌ و هه‌لبژارتن ژی به‌لگه‌یه‌ بۆ وێ چه‌ندێ بشێین كار و ئه‌رك بهێنه‌ بكارئینان، پارتی دیموكراتی كوردستان باوه‌ریا یا ب وێ پرۆسێ هه‌ی و هه‌لگرا به‌رپرسیاره‌تیێ یه‌، مه‌ كێم ئاخڤتن یێن كرین به‌لێ به‌رده‌وام مه‌ كارێن زۆر كرینه‌، به‌لێ حزبێن دی كو هنده‌ك ب ناڤێ ئۆپۆزسیۆنێ و پشكه‌ك ژی كو دپشكدارن د حوكمه‌تێ دا، دژ ب دیموكراسیه‌تێ فاكته‌ره‌كێ تێكده‌ر بووینه‌ ودژی ئاخێ و نیشتمانی نه‌.

رزگار عیسا سوار، ئه‌ندامێ په‌رله‌مانێ كوردستانێ ژ قراكسیۆنا پارتی گۆت” ئۆپۆزسیۆن باسێ بودجه‌ی و خزمه‌تگوزاریان دكه‌ت، كه‌س وه‌كو پارتی واقعێ ڤی جڤاكی نزانیت، ئه‌وێن بووینه‌ ئه‌گه‌رێ برینا بودجه‌ی، رێ بۆ دوژمنی خوه‌ش كریه‌ بۆ وێ چه‌ندێ هه‌رێما كوردستانێ تووشی كێشه‌ و گرفتان بكه‌ن، به‌لێ ئه‌و به‌رپرسیاره‌تیا كابینا نوو یا حوكمه‌تێ ب سه‌رۆكایه‌تیا مه‌سرور بارزانی سه‌رۆكێ جڤاتا وه‌زیران شیا ل ره‌وشه‌كا گه‌له‌ك دژوار دا گاڤێن گه‌له‌ك باش بهاڤێژیت ژ روویێ خزمه‌تگوزاریان و به‌رده‌وام بوون ب پێشخستن و به‌رده‌وامیا پرۆژان.

رزگار ئاماژێ دكه‌ت” ئه‌و حزبێن دژایه‌تیا پارتی دكه‌ن سیاسه‌تا دوژمنێن كوردان په‌یره‌و دكه‌ن، به‌لێ پێدڤیه‌ خه‌لكێ كوردستانێ یێ هشیار بیت”.

دیاركر ژی” ئه‌و پارێ دهێته‌ هنارتن بۆ سلێمانیێ ژ ئالیێ هه‌ولێرێ و دهۆكێ ڤه‌، دیار نامینیت، جهێ داخێ یه‌، ئه‌و به‌رپرسیاره‌تیا خوه‌ وه‌كو خوه‌ بجهنائینن، بۆ پۆست و پایه‌ وه‌رگرتن ل حوكمه‌تێ یێن ل گه‌ل پارتی، به‌لێ د هه‌لگرتنا به‌رپرسیاره‌تیێ دا د خه‌مسارن، بلا بۆمه‌ دیار بكه‌ن هه‌تا نوكه‌ سه‌رۆك كۆماری ل ده‌مێن بۆری چ هه‌لویسته‌كێ ئه‌رێنی هه‌بوو بۆ هه‌رێما كوردستانێ؟”.

ژ ئالیێ خوه‌ڤه‌ خدر كه‌ریم، شرۆڤه‌كارێ سیاسی دبێژیت” ئۆپۆزسیۆن رامانا وێ هشیاركرنا ده‌ستهه‌لاتێ یه‌ ژبۆ ب هێزكرنا ده‌ستهه‌لاتێ و پێدڤیه‌ د خزمه‌تا گه‌ل و نیشتمانی دا كاربكه‌ن نه‌كو ب دووڤ به‌رژه‌وه‌ندیا حزبی یا خوه‌ گاڤان بهاڤێژن”.

زێده‌تر گۆت” هه‌موو ئه‌و حزب دپشكدارن د هه‌ر خه‌مساریه‌كێ دا هه‌كه‌ هه‌بیت، به‌لێ ئه‌و دخوازن خوه‌ ده‌ربێخن، به‌لێ پارتی باجێ دده‌ت، هه‌كه‌ سه‌حكه‌ینه‌ ئیراقێ سه‌ره‌رای كێماسیان به‌لێ ئۆپۆزسیۆن ب ڤی شێوه‌ی ره‌فتار نه‌كریه‌، به‌لێ ئۆپۆزسیۆن ل هه‌رێما كوردستانێ و هنده‌ك نه‌یارێن كوردان ب هه‌موو شێوه‌كی بزاڤا شێواندنا راستیان دكه‌ن و دژایه‌تیا هه‌رێما كوردستانێ

دكه‌ن”.