ئهڤرۆ نیوز:
ئهڤرۆ سێشهمبى 5/11/2019 نێچیرڤان بارزانى، سهرۆكێ ههرێما كوردستانێ، مهسرور بارزانى، سهرۆكێ حوكمهتا ههرێما كوردستانێ و رێواز فایق، سهرۆكا پهرلهمانێ كوردستانێ و بهرپرسێن بلند یێن ههرسێ سهرۆكایهتیان كۆمبوون.
د وێ كۆمبوونێ دا بریار هاته دان، د حالهتا راستڤهكرنا دستوورێ عیراقێ، نابیت د هیچ برگه و مادهكێ دا دهستكارى د مافێن كوردان و ههرێما كوردستانێ بهێته كرن.
ئهڤرۆ نیوز:
سەرۆكێ هەرێما كوردستانێ پشتی كۆمبوونا ل گەل سەركردایهتیێن لایهنێن سیاسی یێن كوردستانێ د كۆنگرەكێ رۆژنامەڤانی دا راگەهاند، هەكە ئارمانج ژ راستڤەكرنا دستوورێ عیراقێ سەقامگیریە، دڤێت بزانن ب دەست لێدانا مافێن گەلێ كوردستانێ سەقامگیری پەیدا نابیت.
نێچیرڤان بارزانی گۆت ژی” مە كۆمبوونەكا گرنگ ئەنجامدا، مە دوپاتی ل وێ چەندێ كر كو پشتەڤانیا داخوازێن خوەنشادەران دكەین و هەر گاڤەكا عیراق بۆ چاكسازیێ بهاڤێت پشتەڤانیێ لێ دكەین و ئەم ب تێكچوونا رەوشا عیراقێ ژی د خوەشحال نینین”
سەرۆكێ هەرێما كوردستانێ گۆت” باوەرناكەم هێزێن عیراقی بخوازن دەستكەفتێن هەرێما كوردستانێ كێم بكەن”.
سەرۆكێ هەرێمێ ئاماژە ب وێ چەندێ ژی كر كو مەترسی ل سەر هەرێما كوردستانێ یا هەی و ئێكرێزی مەرجێ سەرەكی یێ دەرچوونێ یە ژ رەوشا نوكە و كۆمبوونا مە ژی رەنگڤەدانا وێ ئێكهەلویستیێ یە.
نێچیرڤان بارزانی راگەهاند، پەیاما خەلكێ عیراقێ و خۆنیشادەران گەهشتە سەركردێن عیراقێ كو داخوازا ژیانەكا باشتر و خزمەتكاریێن زێدەتر دكەن، هەموو بزاڤێن هەرێما كوردستانێ و سەركرداتیا سیاسی یا هەرێمێ ژی بۆ ئاسایكرنا ڤێ رەوشێ و بجهئینانا داخوازیێن خوەنیشادەرانە.
ئەڤرۆ نیوز، زنار تۆڤی:
ئەڤرۆ سێشەمبی گازا سپی ل سەر وەلاتیێن ناحیا کانی ماسێ هاتە دابەشکرن و رۆژانە دو تانکێن گازێ دێ گازێ دابەشکەن.
سەربەست سەبری ئاکرەیی رێڤەبەرێ ناحیا کانی ماسێ بۆ رۆژناما ئەڤرۆ دیار کر: ئەڤرۆ سێشەمبی گازا سپی ل سەر وەلاتیێن ناحیا کانی ماسێ هاتە دابەشکرن و رۆژانە دێ دو تانکێن گازێ ل سەر وەلاتیان هێنە دابەشکرن و د نوکە دا 1585 سەرۆک خێزان ل ناحیا کانی ماسێ هەنە و بهایێ هەر پلێتەکا گازێ 41 هزار دینارن و ل رۆژانێن بهێن، هەموو خێزانێن ڤێ دەڤەرێ دێ گازا سپی وەرگرن و هەر خێزانەک دێ 200 لیتران وەرگریت.
ئهڤرۆ نيوز:
ل شهڤا بۆرى سهرۆك وهزيرێن عيراقێ، عادل عهبدولمههدى راگههاند، ژ ئهگهرێ خوهنيشادان پهسهندكرنا پرۆژێ قانوونا بودجا گشتى يا عيراقێ بۆ سالا 2020 دێ هێته پاشخستن. ئهندامهكێ پهرلهمانێ عيراقێ ژى دبێژيت، گيروبوونا پهسهندكرنا پرۆژێ قانوونا بودجهى، هيچ كاريگهريهك ل سهر وى پارهى نابيت ئهوێ حوكمهتا عيراقێ ههيڤانه بۆ ههرێما كوردستانێ دهنێريت.
رێبوار هادى، ئهندامێ پهرلهمانێ عيراقێ گۆت” ب گۆرهى وان پێزانينێن ژ جڤاتا وهزيرێن عيراقێ گههشتينه پهرلهمانى، پرۆژێ قانوونا بودجا گشتى يا عيراقێ بۆ سالا 2020 يێ بهرههڤه، بهلێ ژ بهر خوهنيشادانان نههاتيه هنارتن بۆ پهرلهمانێ”.
ناڤبرى زێدهتر بۆ مالپهرێ فهرميێ پارتى گۆت” گيروبوونا پهسهندكرنا پرۆژێ قانوونا بودجهى، هيچ كاريگهريهكێ ل سهر وێ پارێ حوكمهتا عيراقى ههيڤانه دهنێريته كوردستانێ، ههتا وێ دهمێ كو پرۆژه قانوونا بودجهى پهسهند دبيت، هنارتنا وى پارهى دێ بهردهوام بيت”.
دياركر” هێشتا دو ههيڤ يێن ژ سالا 2019 ماين، لهوما ژ روويێ قانوونى پرۆژێ قانوونا بودجێ 2020 گهلهك گيرو نهبوويه، بۆ نموونه ل سالا بۆرى پرۆژێ قانوونا بودجا گشتى يا عيراقێ د ناڤ سالا 2019 هاته پهسهندكرن، لهوما بۆ ئهڤ ساله ژى دبيت پهسهندكرنا پرۆژێ قانوونا بودجا سالا داهاتى بكهڤيته د دهستپێكا وێ سالێ”.
ئهڤرۆ نيوز:
سهرۆك مهسعود بارزانى ئهڤرۆ دوشهمبى 4/11/2019 ل گهل شاندهكێ ناڤهندا ديالۆكا رافيدهين كۆمبوو، كو ژ هژمارهكا كهسايهتى و نوخبا ئهكاديمى و فهرههنگى يا عيراقى پێكهاتبوو.
د وێ كۆمبوونێ دا كو ب مهرهما گوهۆرينا بير و بۆچوونان ل دۆر خوهنيشادانێن وهلاتيان و رهوشا سياسى يا عيراقێ و پاشهرۆژا پرۆسا سياسى هاتبوو سازكرن، شاندێ مێهڤان سهرنجێن خوه ل دۆر رهوشێ بهرچاڤكر و پلانا ناڤهندا ديالۆكا رافيدهين بۆ ڤهكۆلينێ ژ رهوشا نوكه و بهرچاڤكرنا پێشنيازێن خوه بۆ گاڤێن پێدڤى بۆ چارهسهريێ، بۆ سهرۆك بارزانى شرۆڤهكر.
سهرۆك بارزانى سهرهراى دهربرينا پشتهڤانيێ بۆ داخوازيێن رهوا يێن خهلكى، رۆهنكر كو مافێ خهلكى يه داخوازا ژيانهكا ئاسووده و سهربهرزانه بكهت و ئهو رهوشا بوويه ئهگهرێ نهرازيبوونا خهلكى ئهنجامێ سياسهتا شاش يا سالێن بۆرى يه و نابيت بهرپرسيارهتيا وێ ب ستوويێ سهرۆك وهزيرێن نوكه ب تنێ دابيت و هندهك كو ئهو ب خوه ئهگهرێن كهم و كوتريان و شكهستنێن سالێن بۆرى بوون، نوكه يێن سيارى پێلا نهرازيبوونا خهلكێ دبن.
سهرۆك بارزانى گۆت ژى” ههكه دستوورێ نوكه يێ عيراقێ وهكو خوه هاتبا بجهئينان، پتريا كێشان نهدهاته روودان و مافێن وهلاتيان دا هێته پاراستن، بهلێ ژ ئهنجامێ پشتگوهاڤێتنا دستوورى و بزاڤێن تاكرهويێ و خوهسهپاندنێ، عيراق گههشته ڤێ رهوشێ و چارهسهركرنا وێ ژى پێدڤى ب نههێلانا ئهگهران ههيه”.
سهرۆك بارزانى رۆهنكر ژى كو دانوستاندنێن د ناڤبهرا ههرێمێ و بهغدا ب ئاراستهيا چارهسهركرنا كێشان گاڤێن باش هاڤێتنه و د بهردهوامن ژى، ب راشكاوانه ژى ب شاندێ مێهڤان راگههاند كو ئهو داخوازيێن ب ناڤێ خوهنيشاندهران بۆ گوهۆرينا سيستهمێ حوكمى و دهستكاريكرنا دستوورى دهێته بهرچاڤكرن، ههتا وى راهى د رهوا و قبوولكرى نه كو دژى مافێن دستوورى و شهرعى يێن گهلێ كوردستانێ نهبن و بنهمايێن ديموكراسى يێن تهوافوقێ و پێكڤهژيانى يێن ههموو پێكهاتان بپارێزيت.
سهرۆك بارزانى پێشوازى ل ئارمانجێن ناڤهندا ناڤبرى بۆ ديالۆكێ و گوهۆرينا بير و بۆچوونان و پێشنيازكرنا چارهسهريا گونجاى بۆ كێشان كر و ب گاڤهكا گهلهك باش زانى بۆ لێكتێگههشتن و گههشتن ب ئهنجامێن ب مفا.
ئهڤرۆ نيوز:
نڤيسينگهها راگههاندنا بارهگايێ بارزانى ئهڤرۆ ئێكشهمبى 3/11/2019 رۆهنكرنهك ل دۆر دهنگوباسێن بێ بنهما يێن هندهك دهزگههێن راگههاندنێ دهركر.
د رۆهنكرنا نڤيسينگهها راگههاندنا بارهگايێ بارزانى هاتيه” پشكهك ژ كهنالێن راگههاندنێ دهنگوباسهكێ بێ بنهما بهلاڤكريه كو ل دووماهى ديدارا سهرۆك بارزانى و ئهياد عهلاوى، بهحسێ دهستكاريكرنێ د مادێ 140 يێ دستوورێ عيراقێ و ئهگهرێن گوهۆرينا دستوورى هاتيه كرن كو سهرۆك بارزانى رازيبوون ل سهر وێ چهندێ دهربريه كو دهستكارى د مادێ 140 دا بهێته كرن”.
نڤيسينگهها راگههاندنێ يا بارهگايێ بارزانى دياركر” د دهمهكى دا ئهم ڤى دهنگوباسى رهت دكهين، وێ چهندێ ژى رۆهن دكهين كو خهلكێ كوردستانێ دزانن سهرۆك بارزانى داكۆكيكار و خهمخورێ راستهقينهيێ ئاخ و گهلێ كوردستانێ و مافێن وى يێن رهوايه و چو جاران داگيرانێ ژ وان ماف و دهستكهفتان ناكهت”.
د وێ رۆهنكرنێ دا هاتيه ژى” سهرۆك بارزانى د چهندين ههلكهفتان دا ب رۆهنى راگههانديه كو ههر گوهۆرينهكا د دستوورى دا بهێته كرن، نابيت ژ مافێن رهوا يێن گهلێ مه و تايبهتمهنديا ههرێما كوردستانێ كێم بكهت، ههموو خهلكێ كوردستانێ ژى باش دزانيت كينه ئهوێن داگيرانێ دكهن”.
ئهڤرۆ نيوز:
سهرۆكا لژنا راپهراندنێ ل جڤاتا سووريا ديموكرات ئهڤرۆ شهمبيێ 2/11/2019 راگههاند كو د بهرههڤن دانوستاندنێ ل دۆر چوونا هێزێن كوردى بۆ ناڤ رێزێن لهشكرێ سوورى دا بكهن.
ئيلهام ئهحمهد، سهرۆكا لژنا راپهراندنێ ل جڤاتا سووريا ديموكرات گۆت ژى” هێزێن كوردى دێ پشكداريێ دانوستاندنان دا كهن ههكه ديمهشق پێشنيازهكا فهرمى بهرچاڤ بكهت”.
دووپاتكر ژى كو كوردێن سووريێ دخوازن ل گهل ديمهشقێ ل سهر مێزا دانوستاندنێ ل دۆر وى بابهتى روونن.
ئهڤرۆ نيوز:
پهيڤدارێ فهرميێ پارتى ديموكراتى كوردستان ئهڤرۆ شهمبيێ راگههاند، پارتى سياسهتهكا بێهن فرهه پهيرهوكريه و گازنده ژ وێ چهندێ كر كو بابهتێ بجهئينانا رێككهفتنان دبيته بابهتهكێ راگههاندنێ.
مهحموود محهمهد، پهيڤدارێ فهرميێ پارتى گۆت ژى” ههتا نوكه ئێكهتيێ ناڤێن بهربژارێن خوه بۆ بههرا خوه د پۆستێن خوار وهزيران دا نهداينه حوكمهتێ كو ڤێ چهندێ كهم و كورتى ژ روويێ ئيدارى ڤه دروست كريه”.
دياركر”مهسرور بارزانى، سهرۆكێ حوكمهتا ههرێما كوردستانێ ل گهل شاندهكێ ئێكهتيێ دانوستاندنێن جدى بۆ چارهسهركرنا وێ كێشێ كريه”.
ل دۆر وێ چهندێ كو بهرپرسێن ئێكهتيێ بهحس دكهن كو رێككهفتنا وان ل گهل پارتى بۆ پێكئينانا حوكمهتێ نههاتيه بجهئينان، مهحموود محهمهد راگههاند” مه پێ باش بوو گوتبا كا ل كيرێ نههاتيه بجهئينان”.
پهيڤدارێ پارتى ئاماژه كر كو ل ههيڤا 8 يا بۆرى پارتى داخواز ژ ئێكهتيێ كربوو كۆمبوونهكێ بكهن و ل سهر دهم و جهى ژى رێككهفتن، بهلێ ئێكهتيێ داخوازكر كۆمبوون بهێته پاشخستن و ههتا نوكه ژى ئهو كۆمبوون نههاتيه ئهنجامدان”.
خوياكر ژى” سهردهمێ فيفتى فيفتى يێ پارتى و ئێكهتيێ يێ ب دووماهى هاته و ئێكهتيێ ژى ئهو چهنده قبوول كريه”.
ئەڤرۆ نیوز، رێوار محەمەد رەشید:
بهرپرسێ پشكا ئهزموونان ل رێڤهبهریا پهروهردا دهۆك رۆژههلات دیار كر كو دهرگههێ وهرگرتنا قوتابیێن دهرهكی بۆ پۆلا 12 ئامادهیی هاته ڤهکرن.
نزار عهلی، بهرپرسێ پشكا ئهزموونان ل رێڤهبهریا پهروهردهیا دهۆك رۆژههلات ئاشکرا کر کو ههر ژ سوبەهی رۆژا 3/11/2019 قوتابیێن ئێک بابهت و دو بابهت ل گهل چاككرنا تێكرایی و پشکداریا ئێکسهر (وزاری، دخول مباشر) و ئهزموونێن بهرایی (تمهیدی) دشێن داخازیێن خوە پێشکێش بکهن و گۆت: “پێشکێشکرن بو دەمێ ههیڤهکێ دێ یا بهردهوام بیت و پشتی 1/12/2019 قوتابی مافێ پێشکێشکرنێ نامینیت”.
هەژی گۆتنێ یە کو ههر قوتابیهک دێ سهرهدانا پهروهردا خو کهت، قوتابيين مافێ ئهزموونێن دهرهکی هەیى ل پۆلا 12 زانستى وێژهیی دڤێت دو سالان كهفتن ههبیت د پۆلا خوە دا، یان ژی مافێ دهوامێ نه مابيت ئانکو ( ژیێ قوتابی رێگر بیت)، هەروەسا ئەو قوتابیێن مافێ عبوورێ ههیی پێدڤیە ناڤێ قوتابى د بوردێ سالا خاندنێ ( 2018-2019 ) ههبیت، یان عبور ئێک بابهته يان دو بابهته و عبوور بو قوتابيێن تحسين معدل یێ پار ساڵ نینه، هەروەسا قوتابيێن مافێ تحسين معدل ههیی دڤێت دهرچوویێ سالا خاندنێ( 2018-2019 ) بيت و بتنێ بۆ سالەکێ یە، هەروەسا قوتابيێن مافێ ئێکسهر ههیی (دخول مباشر ) دڤێت ل سالا خاندنێ (2018-2019) داخلى ئهزموونان بیت و دهرنهچوو بیت.
ئەڤرۆ نیوز، رێوار محەمەد رەشید:
بەرپرسێ پشکا راگەهاندنێ ل رێڤەبەریا هاتنوچوونا پارێزگەها دهۆکێ دیار کر کو د روودانەکا هاتنوچوونێ دا ل سنوورێ کومەلگەها قەدشێ دو کەسان گیانێ خوە ژ دەست دا و دو کەسێن دی ژی ب گرانی برینداربوون.
موقەدمێ مافپەروەر ئازاد تەها، بەرپرسێ پشکا راگەهاندنێ ل رێڤەبەریا هاتنوچوونا پارێزگەها دهۆکێ ئاشکرا کر ژ ئەگەرێ پەیدابوونا روودانەکا هاتنوچوونێ دناڤبەرا دو ترۆمبێلان دا ژ جۆرێن (تایبەت ئوپل) و (بارهەلگر کیا) ل سەر جادا گرێ بووتێ ل سنوورێ کومەلگەها قەدشێ دو کەسان گیانێ خوە ژ دەست دا و دو کەسێن دی ژی ب گرانی برینداربوون.
نيشاندان