ئه‌ڤرۆ نیوز:

ئه‌ڤرۆ چارشه‌مبى 23/10/2019 جڤاتا وه‌زیرێن هه‌رێما كوردستانێ ب سه‌رپه‌رشتیا مه‌سرور بارزانى سه‌رۆكێ جڤاتا وه‌زیران و ب به‌رهه‌ڤبوونا قوباد تاله‌بانى جێگرێ سه‌رۆكێ جڤاتا وه‌یزران كۆمبوو.

ل ده‌ستپێكا كۆمبوونێ سه‌رۆكێ جڤاتا وه‌زیران ئاماژه‌ كر كو ل رۆژێن داهاته‌ و پشتى ب دووماهى هاتنا 100 رۆژێن كاركرنا كابینا نه‌هێ یا حوكمه‌تا هه‌رێما كوردستانێ، راپۆرته‌كا به‌رفرهه‌ دێ هێته‌ به‌لاڤكرن و تێدا دێ ئاماژه‌ ب وان كار و پرۆژان هێته‌ كرن كو هاتینه‌ ئه‌نجامدان و ئه‌وێن دشیان دا نه‌بوون بهێنه‌ ئه‌نجامدان ل گه‌ل رۆهنكرنا ئه‌گه‌رێن ئه‌نجام نه‌دانا وان، ل دۆر ڤێ چه‌ندێ سه‌رۆكێ جڤاتا وه‌زیران گۆت” حوكمه‌ت یا خه‌لكى یه‌ و پێدڤیه‌ د خزمه‌تا خه‌لكى دا بیت و مافێ وه‌لاتیانه‌ بزانن حوكمه‌تێ هه‌تا نوكه‌ چ كریه‌”.

پاشى سه‌رۆكێ جڤاتا وه‌زیران رۆناهى خسته‌ سه‌ر گوهۆرینێن عیراقێ و ئاماژه‌ ب وێ چه‌ندێ كر كو ئه‌م ل گه‌ل داخوازیێن ره‌وا و قانوونى یێن خه‌لكێ خوه‌نیشانده‌رێن عیراقێ نه‌، به‌لێ ب هیچ شێوه‌كى ل گه‌ل توندوتیژیێ دا نینین، ئه‌ڤجا ژ هه‌ر لایه‌كى بیت، پشته‌ڤانیێ ژى ل گاڤێن چاكسازیێ یێن حوكمه‌تا عیراقێ دكه‌ین، به‌لێ دخوازین وه‌لاتى ب شێوه‌كێ ئاشتیانه‌ داخوازیێن خوه‌ به‌رچاڤ بكه‌ن و داموده‌زگه‌هێن حوكمه‌تا عیراقێ ژى به‌رپرسیارانه‌ به‌رسڤا داخوازیێن ئاشتیخوازانه‌ یێن خوه‌نیشانده‌ران بده‌ن”.

هه‌روه‌سا گۆت” سه‌قامگیربوونا ره‌وشا عیراقێ د به‌رژه‌وه‌ندیا هه‌موو خه‌لكێ عیراقێ دا یه‌ ب هه‌رێما كوردستانێ ژى ڤه‌، هه‌روه‌سا هیڤیدارین كێشێن د ناڤبه‌را هه‌رێما كوردستانی و حوكمه‌تا فیدرال ب گۆره‌ى دستوورى بهێنه‌ چاره‌سكرن و به‌غدا به‌رسڤه‌كا ئه‌رێنى بۆ پێشنیازێن حوكمه‌تا هه‌رێما كوردستانێ بده‌ت”.

سه‌باره‌ت ره‌وشا رۆژئاڤایێ كوردستانێ و باكوورێ رۆژهه‌لاتا سووریێ ژى، مه‌سرور بارزانى نیگه‌رانیا خوه‌ ژ ره‌وشا ل وان ده‌ڤه‌ران نیشان دا و ئاماژه‌ ب ڤه‌رێژێن خراب بۆ سه‌ر هه‌رێما كوردستانێ كر كو هه‌تا نوكه‌ زێده‌تر ژ 8 هزار په‌نابه‌ران ژ به‌ر وێ ره‌وشێ به‌ر ب هه‌رێما كوردستانێ هاتینه‌ و دیاركر ژى كو حوكمه‌تا هه‌رێما كوردستانێ هه‌ر چ یا پێدڤى بیت بۆ هاریكاریا وان، دێ ئه‌نجام ده‌ت، به‌لێ پێدڤی ب هاریكاریا حوكمه‌تا فیدرال و جڤاكێ نێڤده‌وله‌تى یه‌ ژى كو د ڤى وارى دا هاریكاریا حوكمه‌تا هه‌ریما كوردستانێ بكه‌ن”.

پاشى جڤاتا وزیران دانوستاندن ل دۆر پێداچوونێ ب پێكهاتێ كارگێرى و دارایى یێ وه‌زاره‌ت و ده‌سته‌ و لایه‌نێن نه‌ گرێداى ب وه‌زاره‌تان ڤه‌ كر ل دووڤ به‌رچاڤ وه‌رگرتنا ره‌وشا نوكه‌، بۆ ڤێ مه‌ره‌مێ ژى بریار هاته‌ دان هه‌ر وه‌زاره‌ته‌ك ژ لایێ خوه‌ڤه‌ ب هوورى پێداچوونێ د پێكهاتێ وه‌زاره‌تێ و ده‌زگه‌هێن وێ دا بكه‌ت ل دووڤ پلان و خشته‌كێ دیاركرى ب ئاراسته‌یا زێده‌تر ب دامه‌زراییكرن و كێمكرنا مه‌زاختیان هه‌روه‌كو د هێلێن گشتى یێن كارناما كابینا نوو یا حوكمه‌تێ دا هاتی.

ئەڤرۆ نيوز:
محەمەد حەمید، زارۆیێ‌ بریندارێ‌ رۆژئاڤایێ‌ كوردستانێ‌ ژ دهۆكێ‌ ب فرۆكەكا دژەتیرۆرا كوردستانێ‌ هاتە ڤەگۆهاستن بۆ هەولێرێ‌ و ل سەر راسپاردا سەرۆك مەسعود بارزانی دوهی بۆ چارەسەریێ‌ رەوانەی وەلاتێ‌ فرەنسا هاتە كرن.
حەمید بابێ‌ محەمەدی گۆت” سەرۆك بارزانی بۆ پرسیارا رەوشا وی و چارەسەریێ‌ پەیوەندی ب من كر و گەلەك سوپاسیا سەرۆك بارزانی و بەرپرسێن هەرێما كوردستانێ‌ دكەم”.
بابێ‌ محەمەدی بۆ كوردستان 24 گۆت ژی” كۆرێ‌ من قوتابیێ‌ پێنجێ‌ بنەرەتی بوو”.

ئه‌ڤرۆ نیوز:

هێمن هه‌ورامى جێگرێ سه‌رۆكێ په‌رله‌مانێ كوردستانێ د به‌رپه‌رێ خوه‌ دا ل سه‌ر تۆرا جڤاكى یا فه‌یسبووكى به‌لاڤكر كو ئه‌ڤرۆ دوشه‌مبى 21/10/2019 سه‌ره‌دانا كونسۆلخانا رووسیا ل هه‌ولێرێ كر.

هه‌ورامى راگه‌هاند” مه‌ سه‌ره‌دانا كونسۆلخانا رووسیا كر بۆ گه‌هاندنا په‌یامه‌كا تایبه‌ت یا سه‌رۆك بارزانى ل سه‌ر ره‌وشا رۆژئاڤا بۆ به‌رپرسێن بلند یێن رووسیا”.

ئه‌ڤرۆ نيوز:

وه‌زيرێ ناڤخوه‌ ل هه‌رێما كوردستانێ راگه‌هاند، دێ هه‌موو بزاڤان كه‌ين كو ب باشترين شێوه‌ پێشوازيێ ل په‌نابه‌ران بكه‌ين، ئه‌وژى ل سه‌ر راسپارده‌يا سه‌رۆكێ حوكمه‌تا هه‌رێمێ.

رێبه‌ر ئه‌حمه‌د، وه‌زيرێ ناڤخوه‌ ل هه‌رێما كوردستانێ ئه‌ڤرۆ ئێكشه‌مبى 20/10/2019 د كۆنگره‌كێ رۆژنامه‌ڤانى دا گۆت”هه‌رێما كوردستانێ وه‌كو هه‌موو جاران دێ په‌ناگه‌هه‌كا ئارام بيت بۆ په‌نابه‌ران و سه‌رۆكێ حوكمه‌تا هه‌رێما كوردستانێ ژى ئه‌م راسپاردينه‌ كو ب باشترين شێوه‌ خزمه‌تا په‌نابه‌ران بهێته‌ كرن”.

ئه‌ڤرۆ نیوز:

ژێده‌ره‌كى ژ فه‌رمانگه‌ها هه‌ماهه‌نگى و قه‌یرانان ل حوكمه‌تا هه‌رێما كوردستانێ راگه‌هاند، ب گۆره‌ى دووماهى ئامار، ژ 9 ڤێ هه‌یڤێ هه‌تا نوكه‌ سێ هزار و 56 په‌نابه‌رێن رۆژئاڤایێ كوردستانێ یێن هاتینه‌ هه‌رێما كوردستانێ و تنێ ل شه‌ڤا بۆرى زێده‌تر ژ 700 په‌نابه‌رێن رۆژئاڤا یێن هاتین، كو پێدڤیێن سه‌ره‌كى یێن بۆ هاتینه‌ دابینكرن.

عه‌لى عیسا، رێڤه‌به‌رێ داتا و پێزانینان ل فه‌رمانگه‌ها هه‌ماهه‌نگیێ و قه‌یرانان ل حوكمه‌تا هه‌رێمێ گۆت” ژ 9 ڤێ هه‌یڤێ هه‌تا نوكه‌ 3056 په‌نابه‌رێن رۆژئاڤایێ كوردستانێ به‌ر ب هه‌رێما كوردستانێ هاتینه‌ و ل قه‌زا به‌رده‌ره‌ش كو كه‌مپ لێ هه‌یه‌ یێن تێدا هاتینه‌ ئاكنجیكرن، چونكى كه‌مپ یا ئاماده‌یه‌ و تنێ پێویستى ب هنده‌ك پێدڤیان هه‌بوو و ئه‌و ژى ل گه‌ل هاریكاریان بۆ هاتنه‌ دابینكرن”.

ناڤبرى زێده‌تر بۆ مالپه‌رێ فه‌رمى یێ پارتى دیموكراتى كوردستان گۆت” تنێ ل شه‌ڤا بۆرى 725 په‌نابه‌رێن رۆژئاڤا هاتینه‌ هه‌رێما كوردستانێ، هه‌كه‌ شه‌ر ژى ل رۆژئاڤا به‌رده‌وام بیت، دێ په‌نابه‌رێن زێده‌تر به‌ر ب هه‌رێما كوردستانێ ڤه‌ هێن”.

رۆهنكر ژى” مه‌ په‌یوه‌ندیا به‌رده‌وام ل گه‌ل رێكخراوێن نێڤده‌وله‌تى یا هه‌ى بۆ وێ چه‌ندێ هاریكاریا په‌نابه‌ران بهێته‌ كرن، چونكى هژمارا ئاواران یا زۆره‌ و پێدڤیه‌ حوكمه‌تا عیراقێ و  رێكخراوێن نێڤده‌وله‌تى هاریكاریا مه‌ بكه‌ن، سۆز ژى یا داى كو د هاریكار بن و دڤێت چاڤه‌رێ بین تاكو بزانین دێ چه‌ند د هاریكار بن”.

ئه‌ڤرۆ نیوز:

هه‌لیكوپته‌ره‌كا له‌شكرێ توركى ل سه‌ر سنورێ د ناڤبه‌را توركیا و سووریێ دا (باكوور و رۆژئاڤایێ كوردستانێ) كه‌فته‌ خوار.

ئاژانسا سانا یا سوورى بۆ ده‌نگوباسان به‌لاڤكر كو هه‌لیكوپته‌را توركى د ناڤ ئاحا سووریێ دا كه‌فتیه‌ خوار و دیاركر ژى كو ئه‌گه‌رێ كه‌فتنا وى دزڤریت بۆ گرفته‌كا ته‌كنیكى.

 ئەڤرۆ نیوز، زنار تۆڤی:

سەرۆکێ حوکمەتا هەرێما کوردستانێ 500 ملیار دیناران بۆ چەندین پرۆژێن خزمەتگوزاری تەرخان دکەت.

ئەڤرۆ پێنجشەمبی 17-10-2019، مەسرور بارزانی، سەرۆکێ حوکمەتا هەرێما کوردستانێ ل تۆرا جڤاکی یا (تویتەر)، راگەهاند، ئەڤرۆ بڕیارا مەزاختنا 500 ملیار دیناران بۆ چەندین پرۆژان دایە.

هەروەسا مەسرور بارزانی ئاماژە ب ژێرخانەکا نوو و بناغێ ئابوورەکێ نوو بۆ کوردستانەکا ب هێز دایە، دیسان گۆت، ئەو گۆژمێ پارەی بۆ پرۆژێن رێک و پران و سایلۆیان، هێلێن کارەبێ و تۆرێن دابەشکرنا ئاڤێ هاتینە تەرخان کرن. هەروەسا ئەڤرۆ ئێڤاری دێ سەرۆکێ حوکمەتێ بەرێ بنیاتێ بۆ ئۆڤەر پاسا جادا بارزان دانیت.

ئه‌ڤرۆ نيوز:

جڤاتا وه‌زيرێن هه‌رێما كوردستانێ ئه‌ڤرۆ چارشه‌مبى 16/10/2019 ب سه‌رپه‌رشتيا مه‌سرور بارزانى سه‌رۆكێ جڤاتا وه‌زيرێن هه‌رێنا كوردستانێ كۆمبوو.

نڤيسنگه‌ها راگه‌هاندنا جڤاتا وه‌زيران د به‌ياننامه‌كێ دا ئاماژه‌كر كو ل ده‌ستپێكا كۆمبوونێ دانوستاندن ل دۆر بابه‌تێ دامه‌زراندنا هه‌رسێ ئێكه‌مێن زانكۆيێن حكومى بۆ سالا خواندنێ 2015- 2016 هاته‌ كرن و پشتى كو ئارام محه‌مه‌د وه‌زيرێ خواندنا بلند راپۆرته‌ك پێشكێشكرى، جڤاتا وه‌زيران بريارا دامه‌زراندنا وان وه‌كو قۆناغا ئێكێ يا دامه‌زراندنا ئێكه‌مێن زانكۆيان ده‌ركر.

به‌لاڤكر ژى” پاشى بێگه‌رد تاله‌بانى، وه‌زيرا چاندنێ و ژێده‌رێن ئاڤێ پرۆژه‌ك ل دۆر ب بازاركرنا ناڤخوه‌يى يێ گه‌نمێ به‌رهه‌مئيناى ل هه‌رێما كوردستانێ به‌رچاڤكر، سه‌رۆكێ جڤاتا وه‌زيرێن هه‌رێمێ ئاماژه‌ كر كو گرنگيدان ب كه‌رتێ چاندنێ ئێك ژ ئه‌ركێن به‌راهيێ يێن كارناما كابينا نه‌هێ يا حوكمه‌تا هه‌رێما كوردستانێ يه‌، ب جۆره‌كى كو پێدڤيه‌ كار ل سه‌ر دابينكرنا ئاسايشا خوراكى بكه‌ين و بزاڤێ بكه‌ين بازارى بۆ به‌رهه‌مێن چاندنێ يێن ناڤخوه‌يى ل هه‌رێما كوردستانێ ببينين، جڤاتا وه‌زيران ژى ل دۆر وى بابه‌تى بريار دا چه‌ند وه‌زاره‌ت و فه‌رمانگه‌ و ده‌سته‌يێن حوكمه‌تێ راسپێريت بۆ ئه‌نجامدانا ڤه‌كۆلينێن زێده‌تر ل دۆر پرۆژه‌ى بۆ وێ چه‌ندێ بريارا پێدڤى بهێته‌ دان”.