ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ مه‌سرور بارزانى پێشوازى ل شانده‌كێ بلند يێ له‌شكرێ بريتانى ب سه‌رۆكاتيا سێر (جۆن لۆريمه‌ر) شيره‌تكارێ بلند يێ له‌شكرێ بريتانى ل رۆژهه‌لاتا ناڤه‌راست و باكوورێ ئه‌فريقيا كر.

د ديداره‌كێ دا ره‌وش و پێشهاتێن مه‌يدانا عيراقێ و سووريێ هاته‌ به‌حسكرن، دووپاتى ل سه‌ر وێ چه‌ندێ هاته‌ كرن كو شه‌ر و توندوتيژى د به‌رژه‌وه‌نديا چو لايه‌كى دا نينه‌ و پێدڤيه‌ ب دانوستاندنێ كێشه‌ بهێنه‌ چاره‌سه‌ركرن، هه‌روه‌سا ئاماژه‌ هاته‌ دان كو زێده‌تر ئالۆزكرنا ره‌وشا ده‌ڤه‌رێ دێ دێ ئه‌نجامێن نه‌رێنى و نه‌خوازراو يێن ئه‌منى و مرۆڤايه‌تى بۆ هه‌بن.

د كۆمبوونێ دا دانوستاندن ده‌رباره‌ى گوهۆرينێن عيراقێ ژى هاتنه‌ كرن و دووپاتى ل چاره‌سه‌ركرنا بنه‌ره‌تى يا كێشێن هه‌رێما كوردستانێ و حوكمه‌تا فيدرالى هاته‌ كرن، چونكى د به‌رژه‌وه‌نديا هه‌موو خه‌لكێ عيراقێ دايه‌.

شاندێ بريتانى ستايشيا گاڤێن حوكمه‌تا هه‌رێما كوردستانێ كر بۆ ئه‌نجامدانا چاكسازيێ د داموده‌زگه‌هێن حوكمه‌تێ دا، ب تايبه‌تى د وه‌زاره‌تا پێشمه‌رگه‌ دا.

ئه‌ڤرۆ نيوز:

ليندسى گراهام مه‌زنه‌ سيناتۆرێ كۆمارى ل كۆنگرێسێ ئه‌مريكى راگه‌هاند، ئه‌و هێرشێن توركيا ل باكوورێ سووريێ (رۆژئاڤايێ كوردستانێ) ئه‌نجام دده‌ت، تنێ مفا بۆ داعش، ئيران و رووسيا هه‌يه‌.

گراهام د زنجيره‌ تويته‌كێ دا، نووترين هه‌لويستێ خوه‌ ل دۆر ره‌وشا رۆژئاڤا به‌رچاڤكر و پێشوازى ل دووماهى داخۆيانيا دونالد ترامپ سه‌رۆكێ ئه‌مريكا دكه‌ت، كو بۆ سه‌پاندنا سزايان ل سه‌ر توركيا، كارى ل گه‌ل كۆنگرێسى دكه‌ت.

گۆت ژى” سه‌رۆك ترامپ برياره‌كا باش دايه‌ بۆ كاركرنێ ل گه‌ل كۆنگرێسى بۆ سه‌پاندنا سزايان ل سه‌ر توركيا ژبه‌ر هێرش و داگيركارى و تاوانێن شه‌رى كو ل سووريێ ئه‌نجام دده‌ت”.

ل دۆر سزايێن چاڤه‌رێكرى ل سه‌ر توركيا، دبێژيت” ره‌شنڤيسێ سزايان ل سه‌ر ئاستێ هه‌ردو پارتێن كۆمارى و ديموكراتى پشته‌ڤانيا باش لێ دهێته‌ كرن”.

خوياكر ژى”پێدڤيه‌ رێ ب وێ چه‌ندێ نه‌ده‌ين هێرشێن توركيا ببنه‌ ئه‌گه‌رێ شكاندنا هه‌ڤپه‌يمانه‌كێ بهادار وه‌كو كوردان و نه‌بيته‌ ئه‌گه‌رێ دووباره‌ په‌يدابوونا داعشێ”.

ئه‌ڤرۆ نيوز:

د شه‌ر و پێكدانان و بۆردۆمانێن سه‌رێ كانيێ ل رۆژئاڤايێ كوردستانێ هه‌تا دره‌نگيا شه‌ڤا بۆرى د به‌رده‌وامبوون و سپێده‌هيا ئه‌ڤرۆ ژى دووباره‌ ده‌ست پێ كريه‌ڤه‌.

ميدايێن هێزێن سوريا ديموكرات (هه‌سه‌ده‌) راگه‌هاند، دره‌نگى شه‌ڤا بۆرى (شه‌مبى 12-10-2019) توركيا و چه‌كدارێن ئۆپۆزسيۆنا سوريا كو توركيا پشته‌ڤانيا وان دكه‌ت، ل ده‌ڤه‌را پێشه‌سازى ل سه‌رێ كانيێ هێرشه‌كا به‌رفره‌هـ ده‌ست پێ كريه‌. شه‌رڤانێن هه‌سه‌دێ به‌رسينگێ هێرشێ داينه‌ و سه‌ر و پێكدادانێن دژوار د ناڤبه‌را وان دا روودايه‌.

توركيا ل گه‌ل ده‌ستپێكا هێرشێ ل چارشه‌مبيا بوورى ل ئۆپه‌راسيۆنا كانيا ئاشيێ، سه‌رێ كانيێ بۆردۆمان دكه‌ت و “ژ ئه‌گه‌رێ به‌رسينگگرتنا هێزا شه‌رڤانان، فرۆكێن شه‌رى يێ سۆپايێ توركيا ب سه‌ر ده‌ڤه‌رێ دا د گه‌ريێن و ده‌ڤه‌را وان بۆردۆمان دكه‌ن”.

ئه‌ڤرۆ نيوز:

وه‌زاره‌تا خواندنا بلند و ڤه‌كۆلينێن زانستى ل هه‌رێما كوردستانێ د رۆهنكرنه‌كێ دا ده‌مێ ( تۆماركرنا سكالان) و (دابه‌زين) و (گوهۆرينا جهى) بۆ ده‌رچوويێن 12 ئاماده‌يى درێژ دكه‌ت.

عه‌باس ئه‌كره‌م، په‌يڤدارێ وه‌زاره‌تا خواندنا بلند و ڤه‌كۆلينێن زانستى ئه‌ڤرۆ شه‌مبيێ 12/10/2019 راگه‌هاند”  پێشكێشكرنا سكالايان بۆ ده‌رچوويێن 12 ئاماده‌يى بۆ ده‌مێ 48 ده‌مژمێران هاته‌ درێژكرن، ئانكو هه‌تا ده‌مژمێر 12 شه‌ڤا دوشه‌مبى 14/10/2019 و تۆماركرنا سكالايان ب شێوێ ئۆنلاين ل ويب سايتێ  (www.regayzanko.com) دێ بەردەوام بيت”.

دياركر ژى” (دابه‌زين) و (گوهۆرينا جهى) هه‌تا دووماهيا ڤێ حه‌فتيێ دێ به‌رده‌وام بيت، ئانكو هه‌تا دووماهيا ده‌واما فه‌رمى ل رۆژا پێنجشه‌مبيا داهاتى كو پرۆسا دابه‌زين و گوهۆرينا جهى د ناڤبه‌را تۆمارا زانكۆيان ب خوه‌ دا دێ هێنه‌ ئه‌نجامدان”.

ئه‌ڤرۆ نیوز:

وه‌زاره‌تا به‌رگریا توركى ئه‌ڤرۆ ئه‌ینیێ 11/10/2019 د به‌یاننامه‌كێ دا ب فه‌رمى راگه‌هاند، د هێرشێ دا ل سه‌ر باكوورێ سووریێ هه‌تا نوكه‌ ئێك سه‌رباز یێ هاتیه‌ كوشتن و سێ سه‌رباز ژى بریندار بووینه‌.

ژ لایێ خوه‌ڤه‌ ره‌وانگه‌ها سوورى بۆ مافێن مرۆڤى به‌لاڤكر” ژ ئه‌نجامێ هێرشا توركیا هه‌تا نوكه‌ 10 وه‌لاتیێن سڤیل گیانێ خوه‌ ژ ده‌تسدایه‌، هه‌روه‌سا 29 شه‌رڤانێن هێزێن سووریا دیموكرات (هه‌سه‌ده‌) ل به‌ره‌یێن شه‌رى دژى له‌شكرێ توركى گیانێ خوه‌ ژده‌ستدایه‌”.

ل رۆژا چارشه‌مبى 9/10/2019 بسه‌رپه‌رشتیا ره‌جه‌ب ته‌یب ئه‌ردۆگان سه‌رۆك كۆمارا توركیا، هێرشا له‌شكرێ توركی و گرۆپێن توندره‌وێن ئۆپۆزسیۆنا سوورى بۆ سه‌ر رۆژئاڤایێ كوردستانێ ده‌ستپێكر.

هه‌سه‌ده‌ هێزه‌كا له‌شكرى یه‌ ب پشته‌ڤانیا ئه‌مریكا بۆ رزگاركرنا ده‌ڤه‌رێن داگیركرى یێن رۆژئاڤایێ كوردستانێ و سووریێ ژ رێكخراوا داعش یا تیرۆرستى هاتبوو پێكئینان، یه‌كینه‌یێن پاراستنا گه‌ل (یه‌په‌كه‌) كو بالێ له‌شكرى یێ پارتیا كرێكارێن كوردستانێ (په‌كه‌كه‌) ل رۆژئاڤایێ كوردستانێ بالێ سه‌ره‌كى یێ هێزێن هه‌سه‌دێ یه‌.

ئه‌ڤرۆ نيوز:

سه‌رۆكێ حوكمه‌تا هه‌رێما كوردستانێ مه‌سرور بارزانى ئه‌ڤرۆ چارشه‌مبى 9/10/2019 ل گه‌ل فوئاد مه‌عسوم سه‌رۆكێ به‌رێ يێ كۆمارا عيراقێ كۆمبوو.

فوئاد مه‌عسوم زێده‌بارى هيڤيا سه‌ركه‌فتنێ بۆ كابينا نه‌هێ يا حوكمه‌تا هه‌رێما كوردستانێ، پشته‌ڤانيا خوه‌ ژى بۆ دانوستاندنێن د ناڤبه‌را هه‌ولێرێ و به‌غدا و گه‌هشتن بۆ چاره‌سه‌ريه‌كێ د چارچۆڤێ دستوورى ده‌ربرى.

سه‌رۆكێ به‌رێ يێ عيراقێ دووپاتى ل وێ چه‌ندێ ژى كر كو پێدڤيه‌ هه‌رێما كوردستانێ رۆلێ خوه‌ يێ گرنگ د ئارامكرنا ره‌وشا عيراقێ و ده‌ڤه‌رێ بگێريت.