سوباهى مه‌سرور بارزانى دێ كارناما حوكمه‌تێ راده‌ستى وه‌زیران كه‌ت

10/07/2019 19:20

ئه‌ڤرۆ نیوز:

سه‌رۆكێ حوكمه‌تا هه‌رێما كوردستانێ ل ئاڤاهیێ جڤاتا وه‌زیران دێ ل گه‌ل وه‌زیرێن كاینا نه‌هێ یا حوكمه‌تا هه‌رێما كوردستانێ كۆمبیت.

سوباهى پێنجشه‌مبى 10/7/2019 مه‌سرور بارزانى سه‌رۆك وه‌زیرێن هه‌رێما كوردستان دێ ل گه‌ل وه‌زیرێن كابینا نه‌هێ یا حوكمه‌تا هه‌رێما كوردستانێ كۆمبیت وكارناما حوكمه‌تێ ب هه‌موو وه‌زیرێن حوكمه‌تێ دێ هێته‌ دان وبه‌رنامێ كارێ ئێكه‌مین كۆمبوونا جڤاتا وه‌زیرێن هه‌رێمێ دێ دارێژیت.

هه‌روه‌سا بریاره‌ ل رۆژا دوشه‌مبیا داهاتى 15/7/2019 ئێكه‌مین كۆمبوونا كابینا نوو یا حوكمه‌تێ بهێته‌ ئه‌نجامدان.

مه‌سرور بارزانى كى يه‌؟

10/07/2019 11:07

330

ئه‌ڤرۆ نيوز، نيوار محه‌مه‌د سه‌ليم:

بڕياره‌ پشتى ده‌مه‌كێ كێم بڕياره‌ مه‌سرو بارزانى سه‌رۆك وه‌زيرێن راسپاردى بۆ كابينا نه‌هێ يا حوكمه‌تا هه‌رێما كوردستانێ باوه‌ريا ئه‌ندامێن په‌رله‌مانى ب ده‌ست ڤه‌ بينيت و سووندا قانوونى ب خوينيت.

گرنگترين ويستگه‌هێن ژيانا مه‌سرور بارزانى، سه‌رۆك وه‌زيرێن حوكمه‌تا هه‌رێما كوردستانێ:

مه‌سرور مه‌سعود مسته‌فا بارزانى ل 2ى ئادارا 1969ێ ل گۆندێ ديلمان ل ده‌ڤه‌را باله‌كايه‌تى چاڤ ب دونيايێ كه‌فتينه‌.
ل هاڤينا سالا 1985ێ ژ يێ 16 ساليێ دا په‌يوه‌ندى ب رێزێن له‌شكرێ پێشمه‌رگه‌يێ كوردستانێ كريه‌ و پشكدارى د شوره‌شا گۆلانێ دا كريه‌.
سالا 1988ێ پشكداريا مه‌ديانى د داستانا ب ناڤوده‌نگا خواكورك دا كريه‌ ل دژى سۆپايێ رژێما دكتاتورايه‌تا به‌عس و ب كاميرا تايبه‌ت يا خوه‌، پشكه‌ك ژ قاره‌مانيا پێشمه‌رگه‌يى تۆمار كريه‌ كو ب ئێك ژ فلمێن دێكيۆمێنتى يێن شوره‌شا چه‌كدارى يا گه‌لێ كوردستانێ دهێته‌ دانان.
سالا 1991ێ پشتى شه‌رێ ئێكێ يێ كه‌نداڤى پشكدارى د سه‌رهلدانا گه‌لێ كوردستانێ دا كريه‌.
سه‌ره‌راى وێ چه‌ندێ كو ژ ئه‌گه‌رێ شوره‌ش و به‌رخودانا گه‌لێ كورد ژيانا زارۆيا خوه‌ د ئاواره‌يێ دا ب سه‌ر بڕيه‌، به‌لێ قووناغێن خواندنا سه‌ره‌تايى و ناڤنجى و ئاماده‌يى ل ئيرانێ ب سه‌ركه‌فتى ب رێڤه‌ بريه‌.
سالا 1992ێ بۆ فێربوون و شاره‌زابوون د زمانێ ئنگليزى دا، چوويه‌ له‌نده‌ن يا پايته‌ختێ بريتانيا بۆ ماوێ ساله‌كێ ل وێرێ خوانديه‌.
پاشان بۆ درێژاهى دان ب خواندنێ چوويه‌ ئه‌مريكا و ل زانكۆيا ئه‌مريكى ل واشنتۆن دى سى 1993 بۆ 1997 ده‌ست ب خواندنێ كريه‌ و باوه‌رناما به‌كالريوس د زانستێن سياسى دا ب ده‌ست ڤه‌ ئينايه‌.
پاشان د هه‌مان زانكۆ دا بۆ ب ده‌ست ڤه‌ ئينانا باوه‌رناما ماسته‌ر د وارێ ئاشتى و چاره‌كرنا هه‌ڤركيان دا خوانديه‌.
سالا 1998ێ ڤه‌گه‌ريايه‌ كوردستانێ و پشكدارى كونگرێ 12 يێ پارتى ديموكراتى كوردستان كريه‌ و ب ده‌نگێ پشكداربوويێن گۆنگره‌يى ب ئه‌ندامێ كۆميتا ناڤه‌ندى و مه‌كته‌با سياسى هاتيه‌ هه‌لبژارتن و ئه‌ركێ رێڤه‌برنا ئاژانسا پاراستن و هه‌والگه‌ريێ پێ هاتيه‌ راسپاردن.
سالا 2005ێ ل به‌رامبه‌ر رۆلێ خه‌بات و پره‌نسيپێن مسته‌فا بارزانى د ژيانێ دا، ده‌زگه‌ێ خێرخوازى يێ بارزانى دامه‌زرانديه‌ و وه‌كو ده‌زگه‌هه‌كێ مرۆڤى، خيرخوازى بێ قازانج بۆ پێشكێشكرنا هاريكاريان ب ئاواره‌ و په‌نابه‌ر و كه‌سانێن خۆجهى كو ب پێدڤى ب هاريكاريانه‌.
د كۆنگرێ 13ێ يێ پارتى ديموكراتى كوردستان دا كو ل سالا 2010ێ ب رێڤه‌ چوويه‌، ده‌نگێن ئێكێ يێن پشكداربوويێن كۆنگره‌يى ب ده‌ست ڤه‌ ئينان دووباره‌ ب ئه‌ندامێ جڤاتا سه‌ركرداتيێ و مه‌كته‌با سياسى هاتيه‌ هه‌لبژارتن.
ب فه‌رمانا سه‌رۆك مه‌سعود بارزانى و ب بڕيارا ژماره‌ (68) ل 30 نيسانا 2012ێ بۆ سه‌رپه‌رشتيكرنا ده‌زگه‌هێ ئاسايش، هه‌والگه‌ريا له‌شكرى و دامه‌زراوێن هه‌والگه‌رى، ب شيره‌تكارێ جڤاتا ئاسايشا هه‌رێما كوردستانێ هاتيه‌ راسپاردن.
پشتى ته‌باخا 2014ێ د به‌رسينگگرتنا هێرش و په‌لامارێن تيرۆرستێن داعش بۆ سه‌ر هه‌رێما كوردستانێ و ده‌ڤه‌رێن كوردستانى يێن ده‌رڤه‌يى ئيدارا هه‌رێما كوردستانێ ژوورا ئۆپه‌راسيۆنێن هه‌ڤپشك ل گه‌ل هه‌ڤپه‌يمانان پێكئينا كو ئه‌ڤ بزاڤا هه‌ڤپشك رۆله‌كێ كاريگه‌ر د ئاراسته‌كرنا هێرشێن ئه‌سمانى و ب رێڤه‌برنا ئۆپه‌راسيۆنێن مه‌يدانى ل دژى تيرۆرستان هه‌بوويه‌.
مه‌سرور بارزانى ل گه‌ل سه‌رۆك بارزانى ب ره‌نگه‌كێ مه‌يدانى ل به‌ره‌يێن شه‌رى ئاماده‌ بوو، پشكدارى د سه‌رپه‌رشتيكرنا پتريا ئۆپه‌راسيۆنێن ل دژى داعش كريه‌.
دامه‌زرێنه‌ر و سه‌رۆكێ بۆردا زانكۆيا ئه‌مريكى كوردستانه‌ ل دهۆك كو ل كانوونا ئێكێ يا 2013ێ به‌رێ بناغه‌ى بۆ هاتيه‌ دانان.
3ى كانوونا ئێكێ 2018 ژ لايێ جڤاتا سه‌ركرداتيا پارتى ديموكراتى كوردستان بۆ پۆستێ سه‌رۆكێ حوكمه‌تا هه‌رێما كوردستانێ هاتيه‌ به‌ربژاركرن.
11ى خزيرانا 2019ێ وه‌كو سه‌ركه‌فتيێ ئێكێ يێ هه‌لبژارتنێن گشتى ل 30ى ئيلۆنا 2018ێ ژ لايێ فراكسيۆنا پارتى ديموكراتى كوردستان، ناڤێ وى پێش كێشى سه‌رۆكاتيا په‌رله‌مانێ كوردستانێ هاتيه‌ كرن و د ده‌نگدانه‌كا ئێكسه‌ر دا، ب ده‌نگێ 89 په‌رله‌مانتاران د ئاماده‌بوونا 97 په‌رله‌مانتاران دا بوويه‌ به‌ربژار بۆ پێكئينانا كابينا نه‌هێ يا حوكمه‌تا هه‌رێما كوردستانێ.
12ى خزيرانا 2019ێ ب فه‌رمانا هه‌رێمى يا ژماره‌ (1 يا سالا 2019)ێ ژ لايێ سه‌رۆكێ هه‌رێما كوردستانێ بۆ پێكئينانا كابينا نوو يا حوكمه‌تا هه‌رێما كوردستانێ راسپارديه‌.
خێزانداره‌ و خودانێ سێ كوڕ و كچه‌كايه‌ ب ناڤێن (ياسه‌مين، ئارين، به‌رزين و ئاران)
ژبلى زمانێ كوردى يێ دايك، زمانێن فارسى و ئنگليزى و عه‌ره‌بى ب باشى دزانيت.
حه‌زا خواندن و شێوه‌كارى و هه‌سپسوراى و مه‌له‌ڤانيێ هه‌يه‌.

دۆسێیا پله‌بلندكرنا نه‌قانوونى یا هزاران فه‌رمانبه‌ران دێ راده‌ستى كابینا نوو هێته‌كرن

09/07/2019 19:28

426

ئه‌ڤرۆ نیوز:

ده‌سته‌یا ده‌ستپاكیێ دۆسێیا پله‌ بلندكرنا نه‌ قانوونى یا هزاران فه‌رمانبه‌ران دێ ده‌ته‌ كابینا نوو یا حوكمه‌تا هه‌رێما كوردستانێ.

د وێ دۆسێیێ دا 1557 فه‌رمانبه‌ر ب شێوه‌كێ نه‌ قانوونى هاتینه‌ پله‌ بلندكرن بۆ پلێن بلند كو د ناڤ وان دا نه‌ خوینده‌وار وبێ باوه‌رنامه‌ یێن هه‌ین، به‌لێ یێن بووینه‌ راوێژكار.

هه‌روه‌سا 1077 فه‌رمانبه‌رێن ده‌رچوویێن قۆناغا سه‌ره‌تایى وبێ باوه‌رنامه‌ یێن هه‌ین ول ده‌زگه‌هێن حوكمه‌تێ پله‌یا(رێڤه‌به‌رێ پێشكه‌فتى) پێ هاتیه‌ دان.

دیسا 470 كه‌س كو ده‌رچوویێن قۆناغێن ئاماده‌یى وناڤه‌ندى وسه‌ره‌تایى وبێ باوه‌رنامه‌ نه‌ وپلێن (شاره‌زا، جێگرێ رێڤه‌به‌رێ گشتى) پێ هاتینه‌ دان.

مشیر رەشید ئیبراهیم، رێڤه‌به‌رێ گشتیێ فه‌رمانگه‌ها كاروبارێن قانوونى وڤه‌كۆلینێ ل ده‌سته‌یا ده‌ستپاكیێ ل هه‌رێما كوردستانێ بۆ باس راگه‌هاند كو ئێكه‌م كارێ ده‌سته‌یا ده‌ستپاكیێ ل گه‌ل كابینا نوو یا حوكمه‌تێ، دێ تایبه‌ت بیت ب دۆسێیا نه‌ قانوونى یا پله‌ بلندكرنا فه‌رمانبه‌ران وگۆت” پێدڤیه‌ پێداچوون ب دۆسێیا هه‌موو فه‌رمانبه‌ران دا بهێته‌ كرن وئێك ب ئێك بهێنه‌ سه‌حكرن، كا چاوان خزمه‌ت بۆ هاتیه‌ هژماركرن وچاوان پله‌ پێ هاتیه‌ دان وهه‌ر كه‌س مافێ وى پێ بهێته‌ دان”.

گۆت ژى” ب به‌لگه‌ ل ده‌ف مه‌ یا هه‌ى كو چه‌ندین هزار فه‌رمانبه‌ر بێ ل به‌رچاڤ وه‌رگرتنا باوه‌رنامێ، ناڤونیشانێ نه‌ قانوونى و 3 بۆ 5 پله‌یان ب جاره‌كێ بۆ هاتینه‌ دان و نه‌ دادپه‌روه‌ریه‌كا زۆر هاتیه‌ كرن”.

زێده‌تر گۆت” ل ناڤ په‌رله‌مانێ كوردستانێ وده‌زگه‌هێن حوكمه‌تا هه‌رێما كوردستانێ، هزار و 557 كه‌س مووچێ پله‌ سێ هه‌تا پلا بلند ئه‌لیف وه‌ردگرن وباوه‌رنامێن وان د گونجاى نینن، زێده‌بارى وێ چه‌ندێ 9 كه‌سان پله‌ بلند پێ هاتیه‌ دان وچو باوه‌رنامه‌ نینن، د ده‌مه‌كى دا نابیت هه‌لگرێ باوه‌رناما ئاماده‌یى ژى بچیته‌ پلا بلند

ئاشكراكر ژى” هه‌كه‌ حوكمه‌ت وێ دۆسییێئێكلا بكه‌ت، ژ لایه‌كى دێ پاره‌كێ مه‌زن بۆ ڤه‌گه‌ریت، ژ لایه‌كێ دى ژى دێ بنه‌مایێ دادپه‌روه‌ریێ د ناڤ فه‌رمانبه‌ران دا زڤریت و مه‌ ئومێد یا ب كابینا نوو هه‌ى”.

رێنمايێن وه‌رگرتن ڤه‌گوهاستنا قوتابيان هاتنه‌ راگه‌هاندن

09/07/2019 19:25

790

ئه‌ڤرۆ نيوز:

رێنمايێن وه‌رگرتن ڤه‌گوهاستنا قوتابيان ل زانكۆ و په‌يمانگه‌هێن كوردستانێ هاتنه‌ راگه‌هاندن ، كو ب رێيا لينكێ ل خوارێ تو دشێى ده‌قێ رێنماييان ببينى

لينك

لیژنا بلند یا ساخلەمیا گشتی ل دھۆکێ: دەستووریێن ھەموو ترۆمبێلێن ماسیان د فرۆشن ھاتینە ھەلوەشاندن

09/07/2019 19:16

284

ئەڤرۆ نیوز:

د کومبوونا لیژنا بلند یا ساخلەمیا گشتی دا ل پارێزگەھا دھۆکێ بڕیار ھاتیە دان ھەموو مۆلەتێن ترۆمبێلێن ماسیان د فرۆشن بھێنە ھەلوەشاندن، ھەروەسا ب چو رەنگەکی نابیت دەستووری ب فرۆتنا گۆشتێ جەمەدگرتی، ژبلی یێ بەرازیلی بھێتە دان و پێدڤیە دووڤچوونا بۆریێن شکەستی یێن ئاڤێ بھێتە کرن.

ب سەرپەرشتیا جەھوەر عەلی عەزیز، قایمقامێ دھۆکێ و ب ئامادەبوونا د. نزار عسمەت، رێڤەبەرێ گشتیێ ساخلەمیا پارێزگەھا دھۆکێ، کۆمبوونا ھەیڤانە یا لیژنا بلند یا ساخلەمیێ ل دھۆکێ ھاتە ئەنجامدان.

د کومبوونێ دا کو نوونەرێن ھەموو رێڤەبەریێن پەیوەندیدار ل پارێزگەھا دھۆکێ ئامادەبوون، قایمقامێ دھۆکێ دیار کر کو پشتی زێرەڤانیا بازاری ھاتیە گڤاشتن، رەوش بەر ب باشتر چوویە و گۆت: ئارمانجا مە ئەوە خرابیان کێم بکەین و باشیان زێدە بکەین.

د کومبوونێ دا تەوەرێن خوپاراستن ژ نەخۆشیێن ھاڤینێ، ئامارێن ھەیڤێن بۆری، چاوانیا پاراستنا ژینگەھێ و ژناڤبرنا بەرمایکێن نۆشداری و چاندنێ و ڤیتەرنەریێ و رەوشا مەلەڤانگەھان، ھاتنە گەنگەشەکرن و بڕیار ھاتە دان کو پێدڤیە ب زووترین دەم کارێ ژناڤبرنا بەرمایکان بھێتە رێکخستن و ل سۆتنگەھان بھێنە کۆمکرن و ژناڤبرن.

ھەروەسا ئەندامێن لیژنێ دیار کر کو دەستووریێن ترۆمبێلێن ماسیان د فرۆشن ھەموو ھاتینە ڤەکێشان و ھەلوەشاندن و ل ھەر جھەکێ ترۆمبێلێن فرۆشیارێن ماسیان بھێنە دیتن دێ پێرابوون دگەل دا ھێنە وەرگرتن.

چار کەس د روودانەکا هاتنوچوونێ دا برینداربوون

09/07/2019 10:38

192

ئەڤرۆ نیوز، رێوار مزیری:

بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ دیار کر کو چار کەس د روودانەکا هاتنوچوونێ دا ل شەڤا ۸ ل سەر ۹/۷/۲۰۱۹ ل سەر جادا کومەلگەها باگێرا برینداربوون.

موقەدمێ مافپەروەر ئازاد تەها، بەرپرسێ پشکا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز ئاشکرا کر کو ژ ئەگەرێ پەیدابوونا روودانەکا هاتنوچوونێ دناڤبەرا دو ترۆمبێلان دا ژ جورێن (هوندای تکسون) و (شۆفرلێت ئوبترا) ل سەر جادا کومەلگەها باگێرا چار کەس برینداربوون و بۆ نەخۆشخانا تەنگاڤیان ل دهۆکێ هاتنە ڤەگوهاستن.

بزاڤه‌كا برینا شایستێن دارایى یێن كوردستانێ سه‌رنه‌گرت

08/07/2019 22:27

303

ئه‌ڤرۆ نیوز:

سه‌رۆكا فراكسیۆنا پارتى دیموكراتى كوردستان ل په‌رله‌مانێ عیراقێ راگه‌هاند، ئه‌ڤرۆ راستڤه‌كرنا بودجا گشتى یا عیراقێ هاته‌ كرن ول وێ برگا به‌حسێ پلێن تایبه‌ت دكر، ده‌مێ وێ بۆ دو هه‌یڤێن دى هاته‌ درێژكرن وبزاڤ هاته‌ كرن برینا شایستێن دارایى یێن هه‌رێما كوردستانێ بچیته‌ د ناڤ به‌رنامێ كارى دا، به‌لێ ده‌نگێن پێدڤى نه‌ئینان وشكه‌ستن ئینا.

ڤیان سه‌برى، سه‌رۆكا فراكسیۆنا پارتى دیموكراتى كوردستان ل په‌رله‌مانێ عیراقێ گۆت” د كۆمبوونا ئه‌ڤرۆ یا په‌رله‌مانێ عیراقێ دا قانوونا بودجێ، برگا تایبه‌تب پلێن تایبه‌ت هاته‌ راستڤه‌كرن وده‌مێ دو هه‌یڤان بۆ هاته‌ درێژكرن، چونكى 30/6/2019 دووماهى ده‌مێ كاركرنا وان بوو، ئه‌ڤ چه‌نده‌ ژى بۆ وێ ئێكێ بوو تاكو لایه‌نێن سیاسى د ڤى ده‌مى دا ل سه‌ر وان پۆستان بگه‌هنه‌ رێككه‌فتنێ”.

ڤیانێ زێده‌تر بۆ مالپه‌رێ فه‌رمى یێ پارتى گۆت” د كۆمبوونا په‌رله‌مانى دا ل سه‌ر داخوازا په‌رله‌مانتاره‌كى داخواز هاته‌ كرن كو برینا شایستێن دارایى یێن هه‌رێما كوردستانێ بهێته‌ زێده‌كرن د به‌رنامێ كارى دا وئه‌و داخوازیه‌ چو ده‌نگدانێ وژ سه‌رجه‌مێ 208 ده‌نگان تنێ 49 ده‌نگ بده‌ستڤه‌ئینان له‌وما ئه‌و بزاڤا هاتیه‌ كرن بۆ برینا شایستێن دارایى یێن كوردستانێ شكه‌ستن ئینا”.

ئێدێ داھاتێ رێ و رێبارێن ھەرێمێ دێ ل وان ھێتە مەزاختن

08/07/2019 21:20

404

ئەڤرۆ نيوز:

بەرپرسەکێ وەزارەتا ئاڤەندانکرن و ئاکنجیکرنێ ل حوکمەتا ھەرێما کوردستانێ دیار کر کو پشتی وان داخوازکری کو داھاتێ رێ و رێبارێن ھەرێما کوردستانێ یێ کو ژ شۆفێران دھێتە وەرگرتن ل رێ و رێباران بھێتە مەزاختن حوکمەتێ رازەمەندیا دەستپێکی ل سەر دامەزراندنا سندوقا داھاتێ رێ و بانان دیار کریە.

فەرھەنگ سابر، رێڤەبەرێ نڤیسینگەھا وەزارەتا ئاڤەدانکرن و ئاکنجیکرنێ ل حوکمەتا ھەرێما کوردستانێ دیار کر کو سالانە ژ لایێ وەزارەتێن ناڤخۆ و سامانێن سرۆشی یێن حوکمەتا ھەرێما کوردستانتێ ل بەرامبەر ب کارئینانا رێ و رێباران کوژمەکێ پارەی ژ شۆفێران دھێتە وەرگرتن کو پێدڤیە بۆ بۆ چێکرنا رێ و رێباران بھێتە مەزاختن، بەلێ مخابن ژ ئەگەرێ نەبوونا سندوقەکێ بۆ بۆ کۆمکرنا وی داھاتی ئەڤ کارە نەھاتیە بجە ئینان و بۆ باسنیۆز گۆت: “د ھەیاما بۆری دا وان داخوازەک دایە جڤاتا وەزیرێن ھەرێما کوردستانێ بۆ وێ چەندێ سندوقەک بۆ کۆمکرنا وی داھاتی بھێتە مەزاختن و حوکمەتێ رازەمەندیا دەستپێکی ژی ل سەر دیار کریە”.

ناڤھاتی ئاماژە دا وێ چەندێ کو نوکە میکانزما بجھئینانا ڤێ بڕیارێ ھاتیە دانان کو دێ ب رێیا کەرتێ تایبەت بیت و گۆت: “ئەم دگەشبینین د کابینا نوو یا حوکمەتا ھەرێما کوردستانێ دا ئەڤ بڕیارە بھێتە بجە ئینان”.

پەرلەمان رۆھنکرنەکێ ل دۆر کێمکرنا مووچێ فەرمانبەران ددەت

08/07/2019 21:05

4016

ئەڤرۆ نیوز:

لژنا قانوونی ل پەرلەمانێ عیراقێ دوھی ٨/٧/٢٠١٩ رۆھنکرنەک ل دۆر وێ گۆتگۆتکا ل سەر کێمکرنا مووچێ فەرمانبەران بەلاڤ بووی؛ بەلاڤ کر و ئاشکرا کر کو چو راستی بۆ ڤێ گۆتگۆتکێ نینن.

دۆھی رۆژا دوشەمبی ٨/٧/٢٠١٩ گۆتگۆتکەک لعیراقێ ھاتبوو بەلاڤکرن ل دۆر کێمکرنا مووچێ فەرمانبەرێن دەولەتێ د پرۆژەقانوونا خزمەتا مەدەنی یا فیدرال دا.

ل دۆر ڤێ گۆتگۆتکێ، حەنین قەدۆ، ئەندامێ لژنا قانوونی ل پەرلەمانێ عیراقێ بۆ دەزگەھێن راگەھاندنێ یێن عیراقێ خویا کر کو ھەر زوو زوو گۆتگۆتکێن نەراست ل دەزگەھێن میدیایی و تۆرێن جڤاکی ل دۆر مووچەی بەلاڤ دبن و گۆت: “ئەم ڤێ گۆتگۆتکا ل دۆر کێمکرنا مووچێ فەرمانبەران رەت دکەین و د راستی ژی دا نوکە چو بزاڤەک بۆ کێمکرنا مووچێ فەرمانبەرێن دەولەتێ د ھەبوونێ دا نینە”.
ئاماژە ب وێ چەندێ ژی کر کو د قانوونا خزمەتا مەدەنی یا فیدرال دا ب چو رەنگەکی دەستکاریا مووچێ فەرمانبەران نەھاتیە کرن و پەسەندکرنا وێ ژی چو کارتێکرنێن نەرێنی ناکەتە سەر مووچێ فەرمانبەران.

زێدەتری ھزار دەلیڤێن کاری ل زاخۆ ھاتینە دیتن

08/07/2019 20:51

476

ئەڤرۆ نیوز، عەلی حاجی:

بەرپرسێ ئاواران ل قایمقامیا زاخۆ بۆ ئەڤرۆ نیوز دیار کر ئەو شیاینە ب رێیا رێکخراوێن نێڤدەولەتی ل سنوورێ دەڤەرا زاخۆ زێدەتری ھزار دەلیڤێن کاری بۆ ئاوارە و خوەجھێن دەڤەرێ ببینن.

خەلات ئوسمانی، بەرپرسێ ئاواران ل قایمقامیا زاخۆ ئاشکرا کر کو ب رێیا رێکخراوێن بیانی یێن ل سنوورێ دەڤەرا زاخۆ کار دکەن ئەو شیاینە د دەمێ حەفت ھەیڤان دا ھزار و ١٨ دەلیڤێن کاری بۆ خەلکێ ئاوارە و خوەجھێن دەڤەرا زاخۆ پەیدا بکەن و گۆت: “پرانیا کەسێن دەلیڤێن کاری بۆ وان ھاتینە دیتن خوەجھێن دەڤەرێ بووینە و زێدەباری وێ چەندێ ژی چەندین خول بۆ ئاوارە و خوەجھێن دەڤەرێ ھاتینە ڤەکرن و ب رێیا وان خولان ژی پشتەڤانیا ماددی ل وان گەنجان ھاتیە کرن بۆ ڤەکرنا جھەکێ بازرگانی یان ژی یێ کاری، رێژا کچ و کوران بۆ دیتنا دەلیڤێن کاری ل زاخۆ وەکو ئێکە و ھیچ جوداھیەک نەھاتیە کرن، کەسێن جھێن کاری بۆ خوە ڤەکرین د ناڤ کەمپێن زاخۆ و سەنتەرێ باژێری دا بووینە و مە زێدەتر بزاڤ کریە دەلیڤێن کاری بۆ کەسێن خوە جھێن زاخۆ ببینین”.

ناڤھاتی ئاماژە دا وێ چەندێ کو ٦٩ ئاوارە بتنێ ل سنوورێ دەڤەرا زاخۆ بجە ھێلاینە و ڤەگەریاینە سەرجھێن خوەیێن رەسەن، پرانیا وان کەسێن ڤەگەریاین جھێن خوە دەڤەرێن وان ب خوە بووینە، پشکەکا دی ژی ھەر د ناڤ سنوورێن ھەرێما کوردستانێ دا ئاکنجی بووینە و گۆت: “رێژەکا کێم دخوازن ڤەگەڕنە د ناڤ ئاخا کوردستانێ دا، ژ بەر کو ل وان دەڤەرێن نوکە د ئاکنجی ھەست ب ئارامیێ ناکەن، لەوڕا دخوازن د ناڤ کەمپان دا ل زاخۆ ئاکنجی ببن”.

نيشاندان 1...9899100...120 زێده‌تر

لاپه‌ر 99 ژ 120