NO IORG
نووترين نووچه
هه‌لبژارتى2

ئه‌ڤرۆ:

ئه‌ندامه‌كێ كۆمیته‌یا ناڤین یا پارتی دیموكراتی كوردستان ڕاگه‌هاند، پشتی تمامكرنا كارێن ئۆرگانێن پارتی، شانده‌ك بۆ دانوستاندنێ ل گه‌ل ئالیێن سیاسی دێ هێته‌ پێكئینان.

ئومێد خوشناو، ئه‌ندامێ كۆمیته‌یا ناڤین یا پارتی دیموكراتی كوردستان گوت” هه‌ر وه‌كو د ده‌مێ ئه‌نجامدانا كۆنگره‌یێ 14 یێ پارتی دووپاتی لێ هاتیه‌ كرن، پارتی پشتی كۆنگره‌ی دێ به‌رپه‌ره‌كێ نوو ل گه‌ل ئالیێن سیاسی ڤه‌كه‌ت و دێ سه‌ره‌دانا هه‌موو وان ئالیان كه‌ت كو دناڤ ده‌ستهه‌لاتێ دانه‌ و هه‌تا ئه‌وێن ژ ده‌رڤه‌ی ده‌ستهه‌لاتێ ژی”.

ئومێد خوشناو دیاركر” ل ده‌مه‌كێ نێزیك شاندێ پارتی دێ سه‌ره‌دانا ئالیێن سیاسی یێن هه‌رێما كوردستانێ و ئیراقێ ژی كه‌ت و دێ سیاسه‌تا به‌رپه‌ره‌كێ نوو ل گه‌ل ئالیان ڤه‌كه‌ت”.

سه‌باره‌ت ده‌مێ سه‌ره‌دانا شاندێ پارتی بۆ ئالیێن سیاسی یێن هه‌رێما كوردستانێ و ئیراقێ، گوت” شاند دێ پشتی تمامكرنا كارێن ئۆرگانێن پارتی هێته‌ پێكئینان بۆ وێ چه‌ندێ سه‌ره‌دانا ئالیێن سیاسی بكه‌ت”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل شانده‌كێ كۆنگرێسێ ئه‌مریكی ب سه‌رۆكایه‌تیا مارك تاكانۆ و ئه‌ندامه‌تیا ئه‌لیسا سلۆتكین و كۆلین ئۆلرێد كر.

د كۆمبوونه‌كێ دا كو ئه‌لینا رۆمه‌ناوسكی بالیۆزا ئه‌مریكا ل ئیراقێ به‌رهه‌ڤ بووی، دانوستاندن ل دۆر پێشڤه‌برنا په‌یوه‌ندیێن هه‌رێما كوردستانێ و ئه‌مریكا و دووماهی گوهۆرین و پێشهاتێن ئیراقێ و ده‌ڤه‌رێ و گرنگیا پاراستنا سه‌روه‌ری و ئایابس و سه‌قامگیریا ئیراقێ و هه‌رێما كوردستانێ هاتنه‌ كرن.

شاندێ كۆنگرێسێ ئه‌مریكی ئاماژه‌ ب په‌یوه‌ندیێن ب هێز و تایبه‌ت د ناڤبه‌را هه‌رێما كوردستانێ وئه‌مریكا كر و ب ناڤێ كۆنگرێسی پشته‌ڤانیا خوه‌ بۆ هه‌رێما كوردستانێ وه‌كو ئه‌زموونه‌كا دیموكراسی یا سه‌ركه‌فتی ل ئیراقێ دووپاتكر، هه‌روه‌سا ڕه‌وشا ئازادیا ئایینی و پێكڤه‌ژیانا ئاشتیانه‌ یا پێكهاته‌یێن جودا یێ هه‌رێما كوردستانێ و باشی هه‌لسه‌نگاند.

سه‌رۆكێ حوكمه‌تا هه‌رێما كوردستانێ سوپاسیا پشته‌ڤانیا به‌رده‌وام یا ئه‌مریكا كر و دووپاتی ل وێ چه‌ندێ كر كو هه‌رێما كوردستانێ، وه‌كو به‌رده‌وام دێ فاكته‌ره‌كێ سه‌قامگیریێ و ئارامیێ بیت ل ئیراقێ و ده‌ڤه‌رێ. دووپاتكر ژی كو نوكه‌ ده‌لیڤه‌یه‌كا نوو یا هه‌ی بۆ وێ چه‌ندێ حوكمه‌تا فیدرالی، خزمه‌تا پێكهاته‌یێن جودا یێ ئیراقێ بكه‌ت و ل سه‌ر بنه‌مایێ دستووری كارنامه‌یا وه‌زاری، كێشه‌یێن د ناڤبه‌را حوكمه‌تا فیدرالی و هه‌رێما كوردستانێ دا ب شێوه‌یه‌كێ بنه‌ره‌تی چاره‌سه‌ر بكه‌ت.

چاكسازیێن كابینه‌یا نه‌هێ یا حوكمه‌تا هه‌رێما كوردستانێ، ب تایبه‌تی چاكسازی و پرۆسه‌یا یه‌كخستنا هێزێن پێشمه‌رگه‌ی و گرنگیا هه‌ڤهه‌لویستی و ئێكڕێزیا ئالیێن كوردستانی بۆ داكۆكیكرنێ ژ مافێن دستووری یێن هه‌رێما كوردستانێ، ته‌وه‌ره‌كێ دی یێ دانوستاندنێ بوو.

ئه‌ڤرۆ:

مه‌كته‌با سیاسی یا پارتی دیموكراتی كوردستان د كۆمبوونه‌كێ دا چه‌ندین پۆستێن بلند ئێكلاكرن و ب ڤی شێوه‌یی ل سه‌ر ئه‌ندامێن مه‌كته‌با سیاسی و كۆمیته‌یا ناڤین هاتنه‌ به‌لاڤكرن:

 

په‌یڤدارێ پارتی / مه‌حموود محه‌مه‌د

 

پشكێن مه‌كته‌با سیاسی:

 

ڕێبوار یه‌لدا/ به‌رپرسێ پشكا هه‌لبژارتنان

هێمن هه‌ورامی/ به‌رپرسێ پشكا ڕێكخستنێ

جه‌عفه‌ر ئیبراهیم/ پشكا په‌یوه‌ندیان

چنار سه‌عه‌د/ پشكا دیراسات و ڤه‌كۆلینان

سالار عوسمان/ پشكا ڕه‌وشه‌نبیری و ڕاگه‌هاندن

زاگرۆس فه‌تاح/ پشكا كارگێری و دارایی

هیوا ئه‌حمه‌د مسته‌فا/ به‌رپرسێ پشكا ڕێكخراوێن جه‌ماوری و پیشه‌یی

ئاراس حه‌سۆ/ به‌رپرسێ پشكا وه‌به‌رئێنانێ

ئامینا زكری/ به‌رپرسا ده‌سته‌یا چاڤدێریێ و دووڤچوونێ

سه‌ربه‌ست له‌زگین/ به‌رپرسێ مه‌كته‌با ڕێكخستنا پارێزگه‌ها هه‌ولێرێ

پشتیوان سادق/ به‌رپرسێ مه‌كته‌با ڕێكخستنا پارێزگه‌ها دهۆكێ

عه‌لی حسێن/ به‌رپرسێ مه‌كته‌با ڕێكخستنا پارێزگه‌ها سلێمانیێ

نه‌وزاد هادی/ به‌رپرسێ مه‌كته‌با ڕێكخستنا پارێزگه‌ها نه‌ینه‌وا

كه‌مال كه‌ركووكێ/ به‌رپرسێ مه‌كته‌با ڕێكخستنا پارێزگه‌ها كه‌ركووكێ

فوئاد حسێن/ به‌پرسێ مه‌كته‌با ڕێكخستنا پارێزگه‌ها به‌غدا

ئه‌ڤرۆ:

حوكمه‌تا هه‌رێما كوردستانێ د به‌یاننامه‌یه‌كێ دا سه‌باره‌ت هێرشێن ئیرانێ بۆ سه‌ر هه‌رێما كوردستانێ ڕادكه‌هینیت، پێشێلكاریێن به‌رده‌وام یێن سه‌روه‌ریا ئیراقێ و هه‌رێما كوردستانێ ژئالیێ ئیرانێ ڤه‌ هیچ بیانوویه‌ك بۆ نینه‌.

حوكمه‌تا هه‌رێما كوردستانێ د به‌یاننامه‌یا خوه‌ دا ب توندترین شێوه‌ هێرشا ڤێ دووماهیێ یا كۆمارا ئیسلامی یا ئیرانێ بۆ سه‌ر هه‌رێما كوردستانێ شه‌رمزار دكه‌ت.

هه‌روه‌سا د به‌یاننامه‌یا حوكمه‌تا هه‌رێما كوردستانێ دا هاتیه‌” پێشێلكاریێن به‌رده‌وام یێن سه‌روه‌ریا ئیراقێ و هه‌رێما كوردستانێ ژ ئالیێ ئیرانێ ڤه‌، پێشێلكرنه‌كا ئاشكرا یا قانوون و ڕێنمایێن نێڤده‌وله‌تی و په‌یوه‌ندیێن جێرانیێ یه‌” .

حوكمه‌تا هه‌رێما كوردستانێ داخواز ژ كۆمارا ئیسلامی یا ئیرانێ دكه‌ت، ڤێ هه‌وا ل دژی هه‌رێما كوردستانێ ڕابگریت، چونكه‌ سه‌قامگیری، چو جاران ب ڕێیا توندوتیژیێ بده‌ستڤه‌ ناهێت”.

ل دووماهیا به‌یاننامه‌یا خوه‌ دا، حوكمه‌تا هه‌رێما كوردستانێ، داخواز ژ دۆست و هه‌ڤپشكێن خوه‌ د حوكمه‌تا فیدرالی و نه‌ته‌وه‌یێن ئێكگرتی و جڤاكێ نێڤده‌وله‌تی ب گشتی دكه‌ت، كو هه‌لویسته‌كێ ڕۆهن به‌رامبه‌ر هێرشێن به‌رده‌وام یێن ئیرانێ هه‌بیت.

دهێته‌ زانین ل سپێده‌ییا ڕۆژا دوشه‌مبیا بۆری، ئیرانێ ب ڕێیا فرۆكه‌یێن درۆن و مووشه‌كان چه‌ند كه‌مپێن ئاكنجیبوونێ و باره‌گه‌هێن حزبێن ڕۆژهه‌لاتا كوردستانێ ل هه‌رێما كوردستانێ كرنه‌ ئارمانج.

هه‌ولێر، قائید میرۆ

په‌رله‌مانتاره‌كێ فڕاكسیۆنا پارتی دیموكراتی كوردستان ل جڤاتا نوونه‌رێن ئیراقێ ئاشكراكر، مه‌ترسیێن مه‌زن لسه‌ر وه‌لاتیێن ئیراقێ و هه‌رێما كوردستانێ یێن هه‌ین و به‌رده‌وام ژئالیێ وه‌لاتێن ده‌وروبه‌ر گه‌ف و مه‌ترسی یێن هه‌ین، له‌وڕا مه‌ سه‌رۆكایه‌تیا جڤاتا نوونه‌رێن ئیراقێ نه‌چاركریه‌ ڕۆژا سێشه‌مبی كۆمبوونه‌كا تایبه‌ت لدۆر مه‌ترسیێن سه‌ر ئاخا ئیراقێ بهێته‌ گرێدان و دبێژیت، پێدڤیه‌ بڕیارێن پێدڤی ژی بهێنه‌ ده‌ركرن.

سیپان شێروانی، ئه‌ندامێ جڤاتا نوونه‌رێن ئیراقێ ژ فڕاكسیۆنا پارتی بۆ ڕۆژنامه‌یا (ئه‌ڤرۆ) كوت” مه‌ وه‌كی په‌رله‌مانتارێن كورد و بتایبه‌تی په‌رله‌مانتارێن فڕاكسیۆنا پارتی ڕێگری ل كارنامه‌یا كۆمبوونا جڤاتا نوونه‌رێن ئیراقێ كر، چونكه‌ به‌رده‌وام مه‌ترسی و گه‌ف لسه‌ر سه‌روه‌ریا ئاخا ئیراقێ و هه‌رێما كوردستانی یا هه‌ی و جڤاتا نوونه‌ران یا به‌رهه‌ڤ نه‌بوو ڤان مه‌ترسیێن مه‌زن باس بكه‌ت، ڕۆژانه‌ وه‌لاتێن ده‌وروبه‌ر ئاخا هه‌رێما كوردستانێ دكه‌نه‌ ئارمانج، هه‌تا نوكه‌ جڤاتا نوونه‌ران و حوكمه‌تا ئیراقێ چو هه‌لویستێن ڕژد نه‌بووینه‌ لسه‌ر ڤان گه‌فێن لسه‌ر هه‌رێما كوردستانێ، چونكه‌ گه‌ف و مه‌ترسیێن لسه‌ر وه‌لاتیێن ئیراقێ و هه‌رێما كوردستانێ ژ هه‌موو بابه‌تێن دی گرنگتره‌، و پێدڤیه‌ جڤاتا نوونه‌رێن ئیراقێ دڤێت هه‌لویست هه‌بیت و كار لسه‌ر بكه‌ت، له‌وڕا ئه‌م نه‌چاربووینه‌ گڤاشتنان بكه‌ینه‌ سه‌ر جڤاتا نوونه‌ران و مه‌ په‌یاما خوه‌ گه‌هانده‌ ده‌سته‌یا سه‌رۆكایه‌تیا جڤاتا نوونه‌ران و بڕیاره‌ ئێك ژ مژارێن كۆمبوونا ڕۆژا سێشه‌مبی دانوستاندن بیت لسه‌ر بابه‌تێ تۆپبارانكرنا ئاخا ئیراقێ كو دڤێت بڕیارێن پێدڤی ژی ل دۆر ڤی بابه‌تی  بهێنه‌ ده‌ركرن”.

سیپان شێروانی ئاماژه‌كر” ڕۆژا سێشه‌مبی دێ كۆمبوونا جڤاتا نوونه‌رێن ئیراقێ یا تایبه‌ت بیت ب گه‌ف و مه‌ترسیێن ئیرانێ و توركیا لسه‌ر خه‌لكێ هه‌رێما كوردستانێ، چونكه‌ ژ زاخۆ هه‌تا به‌سرا ئه‌ركێ حوكمه‌تا ئیراقێ یه‌ ب گۆره‌ی دستوورێ به‌رگریێ ژ ئاخ و خه‌لكێ خوه‌ بكه‌ت و سه‌روه‌ریا ئیراقێ یا پاراستی بیت ژهه‌ر گه‌ف و مه‌ترسیه‌كا ده‌ره‌كی، ئانكو قۆناغا ئێكێ تنێ ئه‌م دخوازین مه‌ترسی نه‌مینن، به‌لێ بێگومان قۆناغێن ددوڤدا دێ كار لسه‌ر قه‌ره‌بووكرنا وان كه‌سان بیت یێن ژبه‌ر هێرش و گه‌فێن وه‌لاتێن ده‌وروبه‌ر زیان گه‌هشتینی، ئه‌ڤجا ئه‌و زیانه‌ چ گیانی بن یان ژی زیانێن مادی بن، مافه‌كێ قانوونی و دستووریێ وه‌لاتیانه‌ بهێنه‌ قه‌ره‌بووكرن ژهه‌ر زیانه‌كا هه‌بیت لسه‌رده‌ستێ ده‌ره‌كی، ئه‌م دبینین سالانه‌ خه‌لكێ مه‌ ل هه‌رێما كوردستانێ دبیته‌ قوربانی و زیانێن مادی ژی هه‌ر ناهێنه‌ هه‌ژمارتن ئه‌وژی ژبه‌ر هێرشێن توركیا و ئیرانێ، مخابن هه‌تا نوكه‌ مه‌ترسی لسه‌ر ده‌ڤه‌رێن سنوری بوو  به‌لێ نوكه‌ مه‌ترسی لسه‌ر هه‌موو ده‌ڤه‌ران یا هه‌ی”.

دهۆك، نه‌وزاد هلۆری:

ئه‌ندامه‌كا كۆنگره‌یێ‌ 14 یێ پارتی دیموكراتی كوردستان ڕاگه‌هاند، د كۆنگره‌یێ‌ 14ێ‌ پارتی دا ڕێژه‌یا پشكداریا ئافره‌تان د پرۆسه‌یا ده‌نگدانێ‌ یا تایبه‌ت ب هه‌لبژارتنا  كومێتا ناڤه‌ندی یا نوو ژی دا ب رێژه‌یه‌كا به‌رچاڤ هه‌مبه‌ر كۆنگره‌یێن به‌رێ‌ زێده‌بویه‌، ئه‌ڤ چه‌ندێ ژی دێ‌ ڕه‌نگڤه‌دانه‌كا هه‌ری باش د پێشڤه‌برنا ئافره‌تان دا د پرۆسه‌یا سیاسی دا كه‌ت.

جوان رۆژبه‌یانی، ئه‌نداما كۆنگره‌یێ‌ 14ێ‌ یێ پارتی دیموكراتی ل كوردستان گوت” پێگه‌هێ‌ پارتی و بهێزبوونا وێ‌ دڤی ده‌می دا پێدڤیه‌كا هه‌ری گرنگه‌ بۆ پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.

ئاماژه‌كر ژی”ژبه‌ر چه‌ندین ئاریشه‌یێن هه‌رێمی و نێڤده‌وله‌تی و شه‌ڕ و ئالۆزی و قه‌یرانێن كو ب سه‌ر جیهانێ و ئیراقێ و هه‌رێما كوردستانێ‌ دا هاتین، پارتی نه‌شیا دده‌مێ خوه‌ دا كۆنگره‌ی بگێریت، به‌لێ‌ سوپاس بۆ خودێ‌ جاره‌كا دی پارتی كۆنگره‌یێ‌ خوه‌ ئه‌نجام دا ڤه‌ و سوپاسیا هه‌موو ئه‌ندامێن كۆنگره‌ی دكه‌ین وهیڤی دكه‌ین كۆنگره‌ ژ هه‌موو ئالیه‌كی ڤه‌ یێ سه‌ركه‌فتی بیت”.

زێده‌تر گۆت” د ڤی كۆنگره‌ی دا  چه‌ندین گوهۆڕین ل په‌یكه‌ر و سیاسه‌تا پارتی دیموكراتی كوردستان دا هاتینه‌كرن كو د به‌رژوه‌ندییا پارتی و گه‌لێ‌ كوردستانێ‌ دایه‌، ئێك ژ وان گوهۆڕینان بلندگرنا ڕێژه‌یا پشكداریا ئافره‌تایه‌ بۆ ڕێژه‌یا 15% كو ئه‌ڤ چه‌نده‌ ژی گاڤه‌گا باشه‌ و دێ‌ خزمه‌ته‌كا باشتر بۆ ڕه‌وشا ئافره‌تان كه‌ت ب تایبه‌ت پشكداریا ئافره‌تێ د كارێ‌ سیاسی دا ل هه‌رێما كوردستانێ‌، هه‌روه‌سا د كۆنگره‌ی دا ئه‌ندام و سه‌ركرده‌یێن باش و نایاب دێ هێنه‌ دیاركرن كو ب شێوه‌یه‌كێ‌ باشتر و ڕێكخستی كار بكه‌ن”.

جوانێ دیاركر ژی كو ده‌نگدان ل سه‌ر هه‌لبژارتنا ئه‌ندامێن كومێته‌یا ناڤه‌ندی یا پارتی بشێوه‌یه‌كێ سه‌ركه‌فتی هاته‌ ئه‌نجامدان  وپارتی دیتنه‌كا به‌رفرهه‌ بۆ هه‌موو سكته‌رێن سیاسی یا هه‌ی و ڤه‌خواندنه‌كا باشتر بۆ ڕه‌وشا سیاسی لسه‌ر ئاستێ‌ كوردستانێ و جیهانێ‌ یا هه‌ی، له‌وما بهێزبونا پێگه‌هێ‌ پارتی ئانكو پاراستنا قه‌وارێ‌ هه‌رێما كوردستانێ‌ و ده‌ستكه‌فتنێن وێ‌”.

ئه‌ڤرۆ:

سه‌رۆكێ هه‌رێما كوردستانێ ڕاگه‌هاند، نابیت زۆنێن كه‌سك و زه‌ر هه‌بن، پێدڤیه‌ زۆنا كوردستان هه‌بیت. ل دۆر سه‌رۆك وه‌زیرێن نووی ێ ئیراقێ، دیاركر، هه‌ژی وێ چه‌ندێ یه‌ كو پشته‌ڤانی لێ بهێته‌ كرن و داخواز دكه‌ت ده‌لیڤه‌ پێ بهێته‌ دان بۆ وێ چه‌ندێ هنده‌ك ژ وان كێشه‌یێن ل ئیراقێ هه‌ین، چاره‌سه‌ریان بۆ ببینیت.

نێچیرڤان بارزانی، سه‌رۆكێ هه‌رێما كوردستانێ، د كڤانێ پشكداریێ د دیدارا (مێری) دا ل هه‌ولێرێ، گوت” نابیت زۆنێن كه‌سك و زۆر هه‌بن، پێدڤیه‌ زۆنا كوردستان هه‌بیت، ئه‌ز گه‌له‌ك دژی بكارئینانا وان ده‌سته‌واژامه‌”.

سه‌باره‌ت كێشه‌یێن د ناڤبه‌را پارتی و ئێكه‌تیێ دا، نێچیرڤان بارزانی، گوت” وه‌سا یێ ڕه‌شبین نینم بێژم كێشه‌یێن پارتی و ئێكه‌تی ناهێنه‌ چاره‌سه‌ركرن، به‌لێ ئه‌و یا گرنگه‌ كا چاوان ل هه‌ڤدو دنێرن، پێدڤیه‌ هه‌ردو ئالی دانپێدانێ ب شاشیێن خوه‌ بكه‌ن و بگه‌هینه‌ تێكگه‌هه‌شتنه‌كا هه‌ڤپشك”.

سه‌باره‌ت بڕێڤه‌نه‌چوونا هه‌لبژارتنێن په‌رله‌مانێ كوردستانێ د ده‌مێ خوه‌ دا، سه‌رۆكێ هه‌رێما كوردستانێ گوت” گه‌له‌ك بزاڤ هاتنه‌ كرن هه‌لبژارتن د ده‌مێ خوه‌ دا بهێنه‌ ئه‌نجامدان، به‌لێ مخابن ئالیێن سیاسی لسه‌ر تشتێن گه‌له‌ك بێ ڕامان نه‌گه‌هشتنه‌ ئه‌نجامه‌كی، سه‌رۆكایه‌تیا په‌رله‌مانی ژی نه‌دخواست ده‌مێ په‌رله‌مانی بهێته‌ درێژكرن”.

ل دۆر ڕه‌وشا ئه‌منی ل ئیراقێ، نێچیرڤان بارزانی گوت” هه‌كه‌ ڕه‌وشا ئه‌منی یا ئیراقێ تێكبچیت، ل هه‌رێما كوردستانێ ژی دێ تێكچیت، هیڤیدارم ئیراق و هه‌رێما كوردستانێ وانه‌یان ژ قۆناغێن بۆری وه‌ربگرن”.

سه‌رۆكێ هه‌رێما كوردستانێ ئاماژه‌كر” مام جه‌لالی و سه‌رۆك بارزانی ئه‌وا دشیانێن وان دابوو بۆ ڤێ ئیراقێ كر” گوت ژی” سه‌قامگیریا ئیراقێ گرێدای ب هه‌رێما كوردستانێ ڤه‌یه‌، هه‌كه‌ هه‌رێما كوردستانێ ژ ڕوویێ سیاسی ڤه‌ یا سه‌قامگیر بیت، ئه‌ڤه‌ ده‌ستكه‌فت و سه‌ركه‌فتنه‌ بۆ به‌غدا، مه‌رجێ ئێكێ یێ سه‌قامگیریا ئیراقێ ژی چاره‌سه‌ركرنا كێشه‌یێن ل گه‌ل هه‌رێما كوردستانێ یه‌”.

نێچیرڤان بارزانی به‌رچاڤكر” بۆ به‌غدا باشتره‌ كێشه‌یێن خوه‌ ل گه‌ل هه‌رێما كوردستانێ چاره‌سه‌ر بكه‌ت و هه‌ولێر ژی داخوازا چاره‌سه‌ركرنا كێشه‌یان ب گۆره‌ی دستووری دكه‌ت”.

گوت ژی” هه‌تا نوكه‌ ئه‌و سیسته‌مێ ئیراقێ بڕێڤه‌دبه‌ت چیه‌؟ ئایا ناڤه‌ندیه‌، فیدرالیه‌، ئه‌وا د دستووری دا پێناسه‌ بۆ هاتیه‌ كرن، فیدرالیه‌، پرسیار بۆ به‌غدا ئه‌وه‌، ئایا ب ڕاستی سیسته‌م فیدرالیه‌؟ به‌رسڤ یا ساده‌یه‌ كو نه‌خێره‌. گه‌له‌ك مخابن هه‌تا نوكه‌ عه‌قلیه‌ته‌كا ناڤه‌ندی یا بهێز ئیراق بڕێڤه‌دبر”.

ڕۆهنكر” به‌ری سالا 2003 مه‌ حوكمه‌ت و پێشمه‌رگ و پۆلیس هه‌بوون، ئه‌مریكا گوته‌ مه‌ ئیراقه‌كا نوو یا په‌یدا بووی، بدیتنا من پێدڤیه‌ ژ نوو ده‌ستپێبكه‌ین، دره‌نگ ژی نینه‌”.

ئه‌وژی گوت” سه‌رۆك وه‌زیرێن نوكه‌ یێ ئیراقێ هه‌ژی وێ چه‌ندێ پشته‌ڤانی لێ بهێته‌ كرن و هاریكاریا وی بهێته‌ كرن، بۆ وێ چه‌ندێ چاره‌سه‌ریان بۆ گرفتێن ئیراقێ ببینیت، هه‌كه‌ ئه‌م هه‌موو هاریكاریا هه‌ڤدو بكه‌ین و پشتبه‌ستنێ ب دستووری بكه‌ین، دێ كێشه‌ چاره‌سه‌ر بن”.

خویاكر” حوكمه‌تا محه‌مه‌د شیاع سودانی پشته‌ڤانیه‌كا باش ژ ئالیێ شیعه‌ و كوردان و سوننه‌یان ڤه‌ یا هه‌ی، كو یا جودایه‌ ژ حوكمه‌تێن پێشتر، چاڤه‌ڕانیا مه‌ ژی بۆ چاره‌سه‌ركرنا كێشه‌یان ژ ڤی سه‌رۆك وه‌زیرێن ئیراقێ، جوداتره‌، ئیراق یا د قۆناغه‌كا ڤه‌گوهاستنێ دا، ئه‌ڤ حوكمه‌تا ئیراقێ ب ئێك ژ دووماهی ده‌لیڤێن خوه‌ دزانین بۆ چاره‌سه‌ركرنا كێشه‌یێن د ناڤبه‌را به‌غدا و هه‌رێما كوردستانێ دا”.

خویاكر ژی” ژ سالا 2004 ێ  وێڤه‌ هه‌ر حوكمه‌ته‌كا ل ئیراقێ هاتبیته‌ پێكئینان، هیچ ده‌قه‌كێ نڤیسای دناڤبه‌را به‌غدا و هه‌رێمێ نه‌بوو ، به‌لێ نوكه‌ بۆ جارا ئێكێ یه‌ ڕێككه‌فتنه‌كا ئیمزاكری یا هه‌ی”.

سه‌باره‌ت نه‌بوونا دستووری ل هه‌رێما كوردستانێ، نێچیرڤان بارزانی گوت” دبیت ل پاشه‌ڕۆژێ دادگه‌ها فیدرالی بڕیاره‌كێ دژی هه‌رێما كوردستانێ ده‌ربكه‌ت و بێژیت، بۆچی هه‌وه‌ دستوور نینه‌؟ هیڤیدارم د وی ده‌مێ په‌رله‌مانی ژیێ خوه‌ درێژكری، بشێت ببینه‌ خودان دستوور”.

ئێكگرتنا هێزێن پێشمه‌رگێ كوردستانێ ته‌وه‌ره‌كێ دی یێ ئاخڤتنێن سه‌رۆكێ هه‌رێما كوردستانێ بوو، ل دۆر وێ چه‌ندێ گوت” كارێ باش یێ هاتیه‌ كرن، ئه‌و دووپاتیا هه‌ڤپه‌یمان ل دۆر ئێكگرتنا هێزێن پێشمه‌رگه‌ی دكه‌ن، بۆ دلسۆزیا وانه‌ بۆ هه‌رێما كوردستانێ، پرۆسه‌ ب سیستی یا بڕێڤه‌دچیت”.

نێچیرڤان بارزانی داخوازا لێبۆرینێ ژ ئێزدیان و خه‌لكێ شنگالێ كر و گوت” ئه‌وا مه‌ بۆ وان كری، ئه‌ركێ مه‌یه‌، ژبه‌ر ئایینێ خوه‌ وه‌سا ب سه‌رێ وان هات، كو ب درێژیا دیرۆكێ چه‌ندین فه‌رمان دژی وان هاتینه‌ ئه‌نجامدان، برینا ئێزدیان گه‌له‌ك یا كویره‌، نابیت پرسا ئێزدیان وه‌كو كارتا فشارا سیاسی بهێته‌ بكارئینان، ئه‌وان ته‌حه‌مولا هه‌موو نه‌خوه‌شیان كریه‌، ئه‌و دخوازن ب ئاشتیانه‌ ل گه‌ل هه‌موو پێكهاته‌یێن دی بژین، له‌وما ڕێككه‌فتنا شنگالێ د ناڤبه‌را هه‌رێما كوردستانێ و به‌غدا هاتیه‌ ئه‌نجامدان، پێدڤیه‌ ئه‌وا د ڕێككه‌فتنا شنگالێ دا ئاماژه‌ بۆ هاتیه‌ كرن بهێته‌ بجهئینان”.

هه‌ولێر، قائید میرۆ

پێنج سال لسه‌ر خیانه‌تا ١٦ی ئۆكتۆبه‌را سالا ٢٠١٧ێ ده‌رباز دبن كو تێدا پشكه‌كا سه‌ركردایه‌تیا ئێكه‌تی نیشتیمانی كوردستان خیانه‌ت ل هه‌رێما كوردستانێ كری و ڕێككه‌فتن ل گه‌ل ئیراقێ كری بۆ داگیركرنا كه‌ركووكێ و ده‌ڤه‌رێن كوردستانی، سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیداره‌یا هه‌رێما كوردستانێ ل په‌رله‌مانێ كوردستانێ ژی دبێژیت، هه‌ر ئه‌و ئالیێن  خیانه‌ت كری ڕێگرن لهه‌مبه‌ر ئاساییكرنا ڕه‌وشا ده‌ڤه‌رێن كوردستانی.

جوان ڕۆژبه‌یانی، سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیداره‌یا هه‌رێما كوردستانێ ل په‌رله‌مانێ كوردستانێ بۆ رۆژنامه‌یا (ئه‌ڤرۆ) گوت” ل رۆژا ١٦ی ئۆكتۆبه‌را 2017 ئالیه‌كێ سیاسی به‌رهه‌ڤیا خوه‌ نیشادا كه‌ركووكێ و ده‌ڤه‌رێن كوردستانی ڕاده‌ستی له‌شكرێ ئیراقێ و هێزێن حه‌شدا شه‌عبی بكه‌ت، كو ئه‌وژی ئێكه‌تی نیشتیمانی كوردستان بوو، مخابن كورد خیانه‌تێ ل كوردان بكه‌ت و به‌رهه‌ڤبیت ئاخا خوه‌ و باژێڕێن خوه‌ ڕاده‌ستی نه‌یارێ خوه‌ بكه‌ت، چونكه‌ چه‌ندین ساله‌ ملله‌تێ كورد خه‌باتێ دكه‌ت و قوربانیان دده‌ت بۆ ئازادكرنا ئاخا خوه‌، به‌لێ ب ساناهی ژئالیێ هێزه‌كا كوردی ڤه‌ ئه‌و ئاخ ڕاده‌ستی دۆژمنی بهێته‌ كرن”.

ئاماژه‌كر” ده‌ڤه‌رێن كوردستانی یێن ده‌رڤه‌ی ئیداره‌یا هه‌رێما كوردستانێ پشتی پرۆسه‌یا ئازادیا ئیراقێ دچارچۆڤێ ماده‌یێ ١٤٠ یێ دستووری چاره‌سه‌ری بۆ هاتیه‌ دیتن و بزاڤێن مه‌زن هاتنه‌كرن بۆ وێ چه‌ندێ چاره‌نڤیسێ وان ده‌ڤه‌ران بهێته‌ ئێكلاكرن و ڤه‌گه‌ڕن سه‌ر هه‌رێما كوردستانێ، به‌لێ هه‌موو ئه‌و خه‌بات و خزمه‌تا كوردان و هه‌رێما كوردستانێ بۆ ده‌ڤه‌رێن كوردستانی كری ل خیانه‌تا ١٦ی ئۆكتۆبه‌رێ ب هه‌روه‌ چو وكوردان ب ئه‌گه‌رێ ڤێ خیانه‌تا دیرۆكی ٥١%ێ ئاخا خوه‌ ژ ده‌ستدا، ئه‌ڤه‌ژی ب ساناهی ڤه‌ناگه‌ڕیت و كاریگه‌ریا وان روودانان هند زۆره‌ باجه‌كا مه‌زن دڤێت، ژبه‌ركو فرۆتنا ئاخێ كاره‌كێ ب ساناهی نینه‌ و دیرۆك دێ ڤێ چه‌ندێ بۆمه‌ كوردان خویاكه‌ت و كه‌سێن بووینه‌ خیانه‌تكار رووی ڕه‌شكه‌ت”.

جوان ڕۆژبه‌یانی گوت ژی” پشتی روودانێن خیانه‌تا ١٦ی ئۆكتۆبه‌رێ چه‌ندین بزاڤ هاتنه‌كرن بۆ ئاساییكرنا ڕه‌وشا ده‌ڤه‌رێن كوردستانێ یێن ده‌رڤه‌ی ئیداره‌یا هه‌رێما كوردستانێ و ئه‌نجامدانا ڕێككه‌فتنان، به‌لێ دیسان هێزه‌كا كوردی ڕێگره‌ ل ئه‌نجامدانا ڕێككه‌فتنێ و ئاساییكرنا ڕه‌وشا وان ده‌ڤه‌ران، ده‌ڤه‌رێن كوردستانێ به‌رده‌وام ئارمانج بووینه‌ هه‌تا ئیراق بشێت وان ده‌ڤه‌ران داگیر بكه‌ت، له‌وڕاژی ١٦ی ئۆكتۆبه‌رێ بۆ ئه‌گه‌رێ داگیركرنا وان ده‌ڤه‌ران”.

دیاركر” پرسا خیانه‌تا ١٦ی ئۆكتۆبه‌رێ وه‌سایه‌، كورد بده‌ستێ كوردان هاتنه‌ ده‌ركرن و هه‌ژماره‌كا مه‌زن یا خه‌لكی ئاواره‌بوون و كاره‌سات ئه‌وه‌ یا ئه‌ره‌بێن شۆفێنی به‌ری نوكه‌ نه‌شیان بكه‌ن كورد بخوه‌ بوونه‌ ئه‌گه‌ر بهێته‌ ئه‌نجامدان، نه‌بوونا ئێكڕێزیێ ڕێگره‌ ل ئاسایی نه‌بوونا ڕه‌وشا ده‌ڤه‌رێن كوردستانی و داگیركرنا به‌رده‌وام یا ئه‌ره‌بێن شۆڤێنێ، ژبه‌ركو پیلانا ئینانا ئه‌ره‌بێن شۆفێنی زۆر بشێوه‌یه‌كێ به‌رفرهه‌ بڕێڤه‌دچیت و كورد دهێنه‌ ده‌كرن و ئه‌ره‌ب ژی به‌رده‌وام دهێنه‌ سه‌ر ئه‌ردێ وان”.

ئه‌ڤرۆ:

سه‌رۆك مه‌سعود بارزانی په‌یامه‌ك ل دۆر هه‌لبژارتنا سه‌رۆكێ نوو یێ كۆمارا ئیراقێ بۆ رایا گشتی به‌لاڤكر و دبێژیت، ڕێ نه‌هاته‌ دان ئیراده‌یا خه‌لكێ كوردستانێ بهێته‌ پشتگوه هاڤێتن.

باره‌گه‌هێ بارزانی په‌یاما سه‌رۆك مه‌سعود بارزانی به‌لاڤكر كو ل دۆر پرۆسه‌یا سیاسی یا ئیراقێ و هه‌لبژارتنا سه‌رۆكێ نوو یێ كۆمارا ئیراقێ بوو كو تێدا دبێژیت” هه‌ر ژ پشتی ڕاگه‌هاندنا ئه‌نجامێن هه‌لبژارتنان ل ئۆكتۆبه‌را سالا بۆری هه‌تا نوكه‌ بزاڤێن مه‌زن هاتینه‌ كرن بۆ وێ چه‌ندێ ده‌ست ب سه‌ر ئیراده‌ و ئیستیحقاقێن گه‌لێ كوردستانێ بهێته‌ گرتن و كه‌سه‌ك ژ ده‌رڤه‌ی كۆده‌نگی و ئیراده‌یا گه‌لێ كوردستانێ وه‌كو سه‌رۆك كۆمار بهێته‌ سه‌پاندن”.

د پشكه‌كا دی یا په‌یاما سه‌رۆك بارزانی دا هاتیه‌” به‌لێ وان بزاڤان سه‌رنه‌گرت و ڕێ نه‌هاته‌ دان ئیراده‌یا خه‌لكێ كوردستانێ بهێته‌ پشتگوه هاڤێتن”.

سه‌رۆك بارزانی دبێژیت” بۆمه‌ به‌رده‌وام پره‌نسیپ گرنگتره‌ ژ پۆست و پله‌یان، دووماهی جار ژی ئه‌و پره‌نسیپه‌ بسه‌ركه‌فت كو نابیت كه‌سه‌ك ب سه‌ر ئیراده‌یا گه‌لێ كوردستانێ بهێته‌ سه‌پاندن و ببیته‌ سه‌رۆك كۆمار”.

هه‌ر د وی په‌یامیدا، سه‌رۆك بارزانی هیڤی خواست” گاڤێن داهاتی د ناڤ پرۆسه‌یا سیاسی یا ئیراقێ دا د خزمه‌تا به‌رژه‌وه‌ندیێن ئیراقا فیدرال و هه‌رێما كوردستانێ دا بن و سه‌قایه‌كێ نوو یێ ژیانا سیاسی هه‌بیت و دووماهی ب كێشه‌ و ئاسته‌نگ و قه‌یرانێن بۆری بهێت”.

ل رۆژا پێنجشه‌مبی یا بۆری 13/10/2022، ل گه‌را دوویێ یا هه‌لبژارتنا سه‌رۆك كۆمارا ئیراقێ ل جڤاتا نوونه‌رێن ئیراقێ، له‌تیف ره‌شید شیا 162 ده‌نگان بده‌ستڤه‌ بینیت، ب وێ چه‌ندێ ژی ده‌نگێن پێدڤی بده‌سڤه‌ئینان و ب سه‌ر به‌رهه‌م سالح دا بسه‌ركه‌فت كو 99 ده‌نگ بده‌ستڤه‌ئینابوون. هه‌ڤده‌م هه‌شت ده‌نگێن به‌تال ژی هه‌بوون.

ئه‌ڤرۆ:

سه‌رۆكێ جڤاتا نوونه‌رێن ئیراقێ رۆژا پێنجشه‌مبی 13/10/2022 وه‌كو ده‌مێ كۆمبوونا جڤاتا نوونه‌رێن ئیراقێ بۆ هه‌لبژارتنا سه‌رۆك كۆمارا ئیراقێ دیاركر.

دوهی سێشه‌مبی 11 ئوكتۆبه‌را 2022، محه‌مه‌د حه‌لبووسی، سه‌رۆكێ جڤاتا نوونه‌رێن ئیراقێ سوباهی رۆژا پێنجشه‌مبی ده‌ستنیشانكر وه‌كو ده‌مێ روونشتنا جڤاتا نوونه‌ران بۆ هه‌لبژارتنا سه‌رۆك كۆمارا ئیراقێ.

ئه‌ڤ بڕیاره‌ د ده‌مه‌كی دایه‌، ل رۆژا دوشه‌مبیا بۆری، موحسن مه‌نده‌لاوی، جێگرێ ئێكێ یێ سه‌رۆكێ جڤاتا نوونه‌رێن ئیراقێ راگه‌هاندبوو، 170 ئیمزا یێن هاتینه‌ پێشكێشكرن بۆ جڤاتا نوونه‌ران، بۆ وێ چه‌ندێ رۆژا چارشه‌مبی جڤاتا نوونه‌ران كۆمبیت و ده‌نگی ل سه‌ر به‌ربژارێ سه‌رۆك كۆماری بده‌ت.

سیپان عه‌زیز، ئاندامێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان گوت” ل دوماهیا كۆمبوونا دوهی سێشه‌مبی یا جڤاتا نوونه‌ران، محه‌مه‌د حه‌لبووسێ ڕاگه‌هاند كو ل سه‌ر داخوازا وان په‌رله‌مانتارێن ل رۆژا 10/10/2022 داخوازی پێشكێشكری، كۆمبوونا پێنجشه‌مبی 13/10/2022 دێ یا تایبه‌ت بیت ب هه‌لبژارتنا سه‌رۆك كۆمارا ئیراقێ و ده‌مژمێر 11 سپێدێ دێ ئه‌و كۆمبوون ده‌ستپێكه‌ت”.

دهێته‌ زانین ل ڕۆژا 10 ڤێ هه‌یڤێ 170 ئه‌ندامێن جڤاتا نوونه‌رێن ئیراقێ كو پتریا وان سه‌ر ب هه‌ڤپه‌یمانیا چارچۆڤه‌یێ هه‌ماهه‌مگیێ بوون داخوازیا خوه‌ پێشكێشی سه‌رۆكایه‌تیا جڤاتا نوونه‌ران كر بۆ وێ چه‌ندێ هه‌لبژارتنا سه‌رۆك كۆمارا ئیراقێ بهێته‌ ئه‌نجامدان.

ڤیان سه‌بری، سه‌رۆكا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ دبێژیت” هه‌موو ئالیێن سیاسی یێن سه‌ركه‌فتی د هه‌لبژارتنێن گشتی ل ئیراقێ به‌ربژارێن پۆستێن بلند یێن دیاركرین و دناڤ كوردان دا ژی پارتی سه‌ركه‌فتیا ئێكێ یه‌ و پێدڤیه‌ به‌ربژارێ سه‌رۆك كۆمارا ئیراقێ بۆ پارتی بیت”.

ڤیانێ گوت ژی” ئه‌م ناخوازین سیناریۆیا سالا 2018 دووباره‌ ببیت ،چونكه‌ ئه‌و كه‌سێن وی ده‌می سه‌رۆك كۆمار دیاركری كوردستانی نه‌بوون”.

ئه‌حمه‌د عیساوی، ئه‌ندامێ ده‌سته‌یا گشتی یا ڕه‌وتێ حیكمه‌ كو پشكه‌كه‌ ژ هه‌ڤپه‌یمانیا هه‌ماهه‌نگیێ گوت” په‌یوه‌ندیێن به‌رده‌وام د ناڤه‌بار ئالیێن هه‌ڤپه‌یمانیا بڕێڤه‌برنا ده‌وله‌تێ دای ێن هه‌ین ل دۆر پرسا هه‌لبژارتنا سه‌رۆك كۆمارا ئیراقێ  وهه‌تاكو ڕۆژا پێنجشه‌مبی دێ كۆمبوون د ناڤبه‌را ئالیێن هه‌ڤپه‌یمانیا بڕێڤه‌برنا ده‌وله‌تێ دا هه‌بن”.

website security
WP Facebook Auto Publish Powered By : XYZScripts.com