NO IORG
نووترين نووچه
هه‌لبژارتى2

ئه‌ڤرۆ:

ئه‌ندامه‌كێ مه‌كته‌با سیاسی یا پارتی دیموكراتی كوردستان رادگه‌هینیت، بێ مه‌رج پارتی ناچیته‌ دناڤ هیچ پرۆسه‌كا سیاسی دا و ئاماژه‌كر كو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ بۆ پێكئینانا حوكمه‌تێ.

جه‌عفه‌ر ئێمینكی، ئه‌ندامێ مه‌كته‌با سیاسی یا پارتی گوت” پارتی یا ڤه‌كریه‌ ل سه‌ر پرۆسا سیاسی ل ئیراقێ و بایكۆت ناكه‌ین و خوه‌ ژی پشت گوه ناهاڤێژین و چاره‌نڤیسێ مه‌ ل ڤی وه‌لاتی ب ڤی شێوه‌یه‌ و دڤێت به‌رده‌وام بین”.

هه‌روه‌سا گوت” ئه‌م بێ مه‌رج د ناچینه‌ دناڤ هیچ پرۆسه‌كا سیاسی دا، و ل ده‌ف مه‌ پێدڤیه‌ رێز ل دستووری بهێته‌ گرتن و سازان و هه‌ڤپشكی و هه‌ڤسه‌نگی د پاراستی بن، وی ده‌می هه‌ر ئالیه‌كێ سووننی، شیعی و كوردی هه‌ڤپشكێ مه‌یه‌ د پرۆسا سیاسی دا و دانوستاندنان دێ دگه‌لدا كه‌ین و دێ بزاڤێ كه‌ین ل گه‌ل رێكه‌ڤین”.

ئێمینكی دووپاتكر ژی” بێ هه‌بوونا حوكمه‌ته‌كا ب هێز ئه‌ڤ وه‌لاته‌ ناهێته‌ ب رێڤه‌برن و هه‌كه‌ ب ڤی شێوه‌یێ نوكه‌ به‌رده‌وام بیت، دێ هه‌رێما كوردستانێ زیاندارا ئێكێ بیت، مووشه‌ك دهێنه‌ ئاراسته‌كرن و درۆنان دهنێرنه‌ مه‌، بودجا گشتی یا ئیراقێ كو ب گۆره‌ی رێژه‌یا ئاكنجیان دهێته‌ دابه‌شكرن، تێرا هه‌رێما كوردستانێ وه‌كو پێدڤی نینه‌، له‌وما ئه‌رك و مافه‌كێ مه‌یه‌، كو به‌رهه‌ڤبوونا ل به‌غدا یا ب هێز بیت”.

ناڤبری دیاركر” بێ مه‌رج ناچینه‌ دناڤ هیچ پرۆسه‌كا سیاسی دا، به‌لكو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ و بێ وان حوكمه‌ته‌كا ب هێز ناهێته‌ پێكئینان و ب رێڤه‌برن”.

ئه‌ڤرۆ:

ده‌نگوباسه‌ك ل ده‌زگه‌هێن راگه‌هاندنا ئیراقی به‌لاڤببوو كو كۆمپانیا “په‌یكه‌ر هیوز” كو كۆمپانیه‌كا ئه‌مریكی یا تایبه‌ته‌ ب خزمه‌تگوزاریێن په‌ترۆلی ل هه‌رێما كوردستانێ خوه‌ڤه‌كێشایه‌ ژ هه‌رێمێ، به‌لێ وه‌زاره‌تا سامانێن سروشتی ل هه‌رێما كوردستانێ دبێژیت، ئاگه‌هداری خوه‌ڤه‌كێشانا هیچ كۆمپانیه‌كێ نینن، سه‌رۆكێ لژنا وزێ و سامانێن سروشتی ژی ل په‌رله‌مانێ كوردستانێ دبێژیت، ژ هیچ ژێده‌ره‌كێ كوردی ئه‌ڤ ده‌نگوباسه‌ ب شێوه‌كێ فه‌رمی ب مه‌ نه‌گه‌هشتیه‌.

ئه‌حمه‌د موفتی، بریكارێ وه‌زاره‌تا سامانێن سروشتی ل هه‌رێما كوردستانێ گۆت” سه‌باره‌ت خوه‌ڤه‌كێشانا كۆمپانیا به‌یكه‌ر هیوز هیچ پێزانینه‌ك ب مه‌ نه‌هاتیه‌ دان و ئه‌م د ئاگه‌هدار نینین و ب فه‌رمی ژی هیچ بابه‌ته‌كێ ب ڤی شێوه‌ی نه‌گه‌هشتیه‌ مه‌”.

ژ ئالیێ خوه‌ڤه‌ عه‌لی حه‌مه‌ سالح، سه‌رۆكێ لژنا وزێ و سامانێن سروشتی ل په‌رله‌مانێ كوردستانێ گۆت” من ئه‌ڤ ده‌نگوباسه‌ ل ده‌زگه‌هێن راگه‌هاندنا ئیراقی دیتیه‌، به‌لێ هه‌تا نوكه‌ ژ هیچ ژێده‌ره‌كێ كوردی من نه‌دیتیه‌ و دێ دووڤچوونا زێده‌تر بۆ كه‌ین، هه‌روه‌سا كۆمپانیێ ب خوه‌ ژی هیچ ده‌نگوباسه‌ك سه‌باره‌ت ڤی بابه‌تی به‌لاڤ نه‌كریه‌”.

كۆمپانیا به‌یكه‌ر هیوز كۆمپانیه‌كا ئه‌مریكی یا تایبه‌ته‌ ب خزمه‌تگوزاریێن په‌ترۆلی، ل هه‌رێما كوردستانێ خزمه‌تگوزاریێن په‌ترۆلی وه‌كو كارێن گرێدای ب كولانا بیرێن په‌ترۆلی و پێشڤه‌برنا كیلگێن په‌ترۆلی پێشكێشی كۆمپانیێن كاری د بلۆكێن په‌ترۆلی دا دكه‌ت”.

ژ بلی كۆمپانیا به‌یكه‌ر هیوز، ژ ئه‌گه‌رێ ڤه‌ژاندنا كه‌رتێ په‌ترۆلا هه‌رێما كوردستانێ پشتی سالا 2018 هه‌ژماره‌كا زۆر ژ كۆمپانیێن خزمه‌تگوزاریا په‌ترۆلی ل هه‌رێما كوردستانێ كاردكه‌ن كو هه‌ژمارا وان 1800كۆمپانی یه‌.

به‌یكه‌ر هیوز ل سالا 1970 ل ویلایه‌تا تێكساس یا ئه‌مریكی هاتیه‌ دامه‌زراندن و سالانه‌ نێزیكی 20 ملیار دۆلار داهاتێ وێ یه‌، ل سه‌ر ئاستێ جیهانێ 54 هزار كارمه‌ند وكاركه‌ر یێن هه‌ین، ئه‌و كۆمپانیه‌ سه‌ر ب كۆمپانیا ئه‌مریكی یا مه‌زن “جێنیرال ئێلێكتریك” ڤه‌یه‌.

ئه‌ڤرۆ:

دوهی ئێكشه‌مبی 19 خزیرانا 2022 وه‌زیرێ سامانێن سروشتی ب وه‌كاله‌ت، ل گه‌ل لژنا سامانێن سروشتی و پیشه‌سازی و بازرگانی یا په‌رله‌مانێ كوردستانێ كۆمبوو، عه‌لێ حه‌مه‌ سالح، سه‌رۆكێ لژنا سامانێن سروشتی ل په‌رله‌مانێ كوردستانێ ل دۆر كۆمبوونێ راگه‌هاند” خواستا رۆژانه‌ ل سه‌ر پانزینێ ل هه‌رێما كوردستانێ د ناڤبه‌را پێنج بۆ شه‌ش ملیۆن لترایه‌، لژنا مه‌ ب هووری باسێ كوالیتی و بها و پێدڤیا خه‌لكی كر بۆ پانزینێ و مه‌ پێداگیری كر ل سه‌ر كوالیتی و بهایێ گونجای، بریارا وه‌زاره‌تا سامانێن سروشتی ئه‌وه‌ی كو ئێك ملیۆن لیترێن پانزینا 690 دیناری ب دادپه‌روه‌ری ل سه‌ر هه‌موو پارێزگه‌هان دا به‌لاڤكه‌ت، هه‌روه‌سا بزاڤ دهێته‌ كرن ئاستێ به‌رهه‌مێ پانزینا 800 دیناری رۆژانه‌ بگه‌هیته‌ سێ ملیۆن لتران.

ژ ئالیێ خوه‌ڤه‌ گولیزار ره‌شید، ئه‌نداما په‌رله‌مانێ كوردستانێ ژ فراكسیۆنا پارتی و جێگرا سه‌رۆكێ لژنا سامانێن سروشتی ل په‌رله‌مانی گوت” وه‌زیرێ سامانێن سروشتی ب وه‌كاله‌ت كه‌مال محه‌مه‌د سالح ل دۆر بریارێن وه‌زاره‌تا په‌ترۆلا ئیراقێ راگه‌هاند كۆمپانیێن په‌ترۆلێ كو ل هه‌رێما كوردستانێ كاردكه‌ن خوه‌ ناڤه‌كێشن، وان گرێبه‌ست یا ل گه‌ل هه‌رێما كوردستانێ ئه‌نجامدای”.

جێگرا سه‌رۆكێ لژنا سامانێن سروشتی ل په‌رله‌مانێ كوردستانێ گوت ژی” ئه‌وا گرنگ ل دۆر بابه‌تێ پانزینێ، وه‌زیرێ سامانێن سروشتی دیارك ركو به‌لاڤكرنا پانزینا 800 دیناری تاكو دووماهیا ئه‌ڤساله‌ دێ به‌رده‌وام بیت و مه‌ دووپاتی ل سه‌ر وێ چه‌ندێ كر كو پانزینا 690 دیناری و 800 دیناری  نه‌مینیت و هه‌موو ببیته‌ ئێك بها”.

سه‌باره‌ت گازوایلێ، عه‌لی حه‌مه‌ سالح دبێژیت” نوكه‌ ژ بلی بلندبوونا بهایێ وێ، دۆهن و مادێن دی دهێنه‌ تێكهه‌لكرن، بكارئینان ژی ژ ئالیێ موه‌لیدێن تاخان زیانه‌كا مه‌زن گه‌هاندیه‌ ساخله‌میا وه‌لاتیان و مه‌ به‌لگێن پێدڤی ژی ل دۆر ڤێ چه‌ندێ داینه‌ وه‌زیرێ سامانێن سروشتی ب وه‌كاله‌ت”.

 

ئه‌ڤرۆ:

پشتی بڕیارا دادگه‌ها فیدڕال لدۆر كه‌رتێ په‌ترۆلا هه‌رێما كوردستانێ ئاریشێن دناڤبه‌را هه‌رێما كوردستانێ و به‌غدا لدۆر باده‌كا په‌ترۆلێ زێده‌تر ئالۆزبووینه‌ و جێگرێ سه‌رۆكێ لیژنا په‌ترۆل و غازێ ژی ل جڤاتا نوونه‌رێن ئیراقێ دبێژیت، پشتی شه‌ڕێ روسیا و ئۆكرانیا په‌ترۆل و غازێ زێده‌تر گرنگیا خوه‌ په‌یداكریه‌ و دیاركر، بێی چاره‌سه‌ركرنا باده‌كا په‌ترۆلا هه‌رێما كوردستانێ رێ ناده‌ین قانوونا په‌ترۆل و غازێ لل جڤاتا نوونه‌ران بهێته‌ ده‌ركرن.

د. سه‌باح سوبحی، جێگرێ سه‌رۆكێ لژنا په‌ترۆل و غازێ ل جڤاتا نوونه‌رێن ئیراقێ بۆ رۆژناما ئه‌ڤرۆ گۆت” كه‌رتێ په‌ترۆلێ گرنگترین كه‌رته‌ ل ئیراقێ، چونكه‌ ٩٥%ێ ژ داهاتێ ئیراقێ ژ كه‌رتێ په‌ترۆلێ یه‌، چه‌ندین بڕیارێن گرنگ ژئالیێ ئیراقێ لدۆر كه‌رتێ په‌ترۆلا هه‌رێما كوردستانێ هاتینه‌ ده‌ركرن ژوان ژی بڕیارا دادگه‌ها فیدڕال بۆ ره‌تكرنا قانوونا هه‌ژمار ٢٢ یا سالا ٢٠٠٧ێ یا په‌ترۆلا هه‌رێما كوردستانێ، كو ژئالیێ په‌رله‌مانێ كوردستانێ هاتیه‌ ده‌ركرن، له‌وڕاژی دێ ره‌نگڤه‌دان لسه‌ر كارێن مه‌ هه‌بیت وه‌كو ئه‌ندامێن كورد دناڤا لژنا په‌ترۆل و غازێ، ئه‌م دێ بزاڤان كه‌ین ژبۆ نه‌هێلانا ئاریشه‌یێن دناڤبه‌را هه‌رێما كوردستانێ و به‌غدا لدۆر كه‌رتێ په‌ترۆل و غازێ، ژبه‌ركو چاوا په‌ترۆلێ گرنگیا خوه‌ بۆ ئیراقێ هه‌یه‌ ب هه‌مان شێوه‌ گرنگیه‌كا مه‌زن بۆ هه‌رێما كوردستانێ ژی هه‌یه‌، بتایبه‌تی ش پشتی روودانا شه‌ڕێ دناڤبه‌را روسیا و ئۆكرانیا دا كو كاریگه‌ری لسه‌ر كه‌رتێ په‌ترۆلێ هه‌بوویه‌، ژوان ژی هنارتنا په‌ترۆل و غازێ بۆ ئورۆپا، ئه‌م وه‌كو لژنا په‌ترۆل و غازێ دێ كار كه‌ین مافێن هه‌رێما كوردستانێ نه‌هێنه‌ به‌رزه‌كرن”.

د. سه‌باح سوبحی ئاماژه‌كر” ئێكه‌م پڕۆژه‌ پشتی پرۆسا ئازادیا ئیراقێ لدۆر كه‌رتێ په‌ترۆلا ئیراقێ هاتیه‌ به‌رهه‌ڤكرن ل هه‌یڤا شوباتا سالا ٢٠٠٧ێ بوویه‌، هه‌تا سالا ٢٠١٠ێ به‌رده‌وام كار لسه‌ر ڤی پرۆژه‌ی هاتیه‌كرن، به‌لێ نه‌بوویه‌ قانوون و سه‌ركه‌فتن بده‌ستڤه‌ نه‌ئینایه‌، لسالا ٢٠١٠ێ سه‌رۆكایه‌تیا جڤاتا وه‌زیرێن ئیراقێ پڕۆژه‌كێ گه‌له‌ك باش به‌رهه‌ڤكریه‌، به‌لێ ب هه‌مان شێوه‌ سه‌رنه‌گرتیه‌ و هاتیه‌ په‌رت و به‌لاڤكرۆن و بوویه‌ چه‌ند پشكه‌ك، د ڤێ خۆلا جڤاتا نوونه‌رێن ئیراقێ دا ئه‌م دێ بزاڤان كه‌ین ئیراق ببیته‌ خودان قانوونه‌كا ئێكگرتی یا په‌ترۆل و غازێ، قانوونه‌كا ئێكگرتی بیت و مافێن هه‌رێما كوردستانێ ژی بهێنه‌ پاراستن د كه‌رتێ په‌ترۆل و غازێ دا، به‌روزڤاژی مافێن هه‌رێما كوردستانێ به‌رچاڤ نه‌هێنه‌ وه‌رگرتن ئه‌م رێ ناده‌ین هیچ قانوونه‌ك ل جڤاتا نوونه‌رێن ئیراقێ بهێته‌ ده‌ركرن هه‌كه‌ بهێت و مافێن هه‌رێما كوردستانێ تێدا نه‌هێنه‌ گه‌ره‌نتی كرن، تنێ ئه‌م د رازینه‌ قانوونه‌ك بهێته‌ ده‌ركرن كو ئاریشێن كه‌رتێ په‌ترۆلێ دناڤبه‌را هه‌رێما كوردستانێ و به‌غدا چاره‌سه‌ر بكه‌ت و مافێن كوردان نه‌هێنه‌ بنپێكرن، ئانكو قانوونه‌ك بهێته‌ ده‌ركرن زێده‌تر كو مفا ژ دستوورێ ئیراقێ بهێته‌ وه‌رگرتن و مادێن ١١١ و ١١٢ به‌رچاف بهێنه‌ وه‌رگرتن”.

بسپۆره‌كا زانستێن سیاسی ل زانكۆیا دهۆكێ‌، د دیداه‌ركێ‌ دا بۆ رۆژناما (ئه‌ڤرۆ) دیار دكه‌ت، مه‌ره‌ما حه‌شدا شه‌عبی ژ مۆشه‌ك بارانكرنا هه‌ولێرێ‌ ئه‌وه‌، وان دڤێت كوردستانێ‌ لاواز بكه‌ن و ئێمناهیێ‌ تێدا نه‌هێلن، د هه‌مان ده‌مدا ئه‌ڤه‌ چه‌ندین جاران وان ئالیان هه‌ولێر مۆشه‌ك بارانكر، هه‌ر ژ سالا 2014 ێ‌، هه‌تا نوكه‌ ئه‌و یێ‌ بزاڤان دكه‌ن ب رێیێن ئابووری و سیاسی ره‌وشا هه‌رێما كوردستانێ‌ تێك بده‌ن، دیسان گه‌له‌ك ده‌وله‌تێن جیهانێ‌ هاریكاریان ژی دده‌نه‌ ئیراقێ، لێ‌ ئیراق به‌هرا كوردان ژ وان هاریكاریان ناده‌ت.

د. سوزان ئامێدی،  بسپۆرا زانستێن سیاسی ل زانكۆیا دهۆكێ‌ گۆت” ئه‌و گرۆپێن شیعی یێن ب سه‌ر ئیرانێ‌ ڤه‌، بزاڤێ‌ دكه‌ن، ب هه‌موو رێیان ئێمناهیا هه‌رێمێ‌ تێك بده‌ن، پشتی هه‌لبژارتنێن سالا بۆری یێن جڤاتا نوونه‌رێن ئیراقێ، هه‌تا نوكه‌ حوكمه‌تا نوو پێكنه‌هاتیه‌، له‌وما مۆشه‌ك بارانكرنا هه‌ولێرێ‌ ژ ئالیێ‌ وان گرۆپێن شیعی ڤه‌، بۆ هندێ‌ یه‌ گڤاشتنان ل پارتی دیموكراتی كوردستان بكه‌ن، داكو حوكمه‌تا ئیراقێ نه‌هێته‌ پێكئینان، د هه‌مان ده‌مدا ئه‌و مۆشه‌كه‌ ژ ئیراقێ دهێنه‌ ئاراسته‌كرن بۆ هه‌ولێرێ‌، ب تایبه‌تی ژ وان ده‌ڤه‌ران دهێن یێن كو حوكمه‌تا ئیراقێ لێ‌ هه‌یی، هه‌روه‌سا چو ئالیێن سیاسی یێن ئیراقی، خوه‌ به‌رپرسیار نه‌كریه‌ ژ هاڤێتنا وان مۆشه‌كان، حوكمه‌تا ئیراقێ ژی ب تنێ‌ جۆره‌ نه‌رازیبوونه‌ك دیار كریه‌ و چو گاڤێن وه‌سا ناهاڤێژیت كو ڤێ‌ مۆشه‌ك بارانكرنێ‌ راوه‌ستینیت”.

گۆت ژی” جڤاتا ئاسایشا نێڤده‌وله‌تی یا به‌رپرسیاره‌ ژ ڤێ‌ چه‌ندێ‌، ب تایبه‌تی ژی پشتی ئیرانێ‌ 12 مۆشه‌ك ل ئاڤاهیه‌كێ‌ مه‌ده‌نی داین ل هه‌ولێرێ‌ و ئه‌و كارێ‌ ئیرانێ‌ كری، پێشێلكاریا سه‌روه‌ریا ده‌وله‌تا ئیراقێ بوویه‌، پێدڤی بوو، جڤاتا ئاسایشا نێڤده‌وله‌تی هه‌لویسته‌كێ‌ دژوار ل هه‌مبه‌ری ئیرانێ‌ دیاركربا، د هه‌مان ده‌مدا حه‌شدا شه‌عبی یا نێزیكی سنۆرێن هه‌رێما كوردستانێ‌ یه‌ ب پشته‌ڤانیا ئیرانێ‌ وان كریارێن تیرۆریستی دكه‌ن، له‌وما دڤێت حوكمه‌تا هه‌رێمێ‌ بێده‌نگ نه‌مینیت و هه‌روه‌سا پێدڤیه‌ حوكمه‌تا ئیراقێ ژی خودان هه‌لویست بیت و ڤێ‌ چه‌ندێ‌ قه‌بوول نه‌كه‌ت و ئێدی نه‌هێلیت هه‌ولێر بهێته‌ مۆشه‌ك باران كرن، دیسا پێدڤیه‌ حوكمه‌تا هه‌رێمێ‌ ژی ده‌نگێ‌ خوه‌ بگه‌هینیته‌ جڤاتا ئاسایشا نێڤده‌وله‌تی، ژ پێخه‌مه‌ت ئێدی هه‌ولێر ژ ئالیێ‌ وان گرۆپێن حه‌شدا شه‌عبی ڤه‌ نه‌هێته‌ مۆشه‌ك باران كرن”.

دیاركر”هه‌رێما كوردستانێ‌ چو جاران ناكه‌ڤیت، هندی هه‌ولێر بهێته‌ مۆشه‌ك بارانكرن ژی، دێ‌ هه‌ر خوه‌ راگریت، هه‌روه‌سا هندی بزاڤێن سیاسی و له‌شكری و ئابووری ژی بهێنه‌ كرن، كو شه‌رێ‌ هه‌رێما كوردستانێ‌ بكه‌ن و وان بڤێت ره‌وشا هه‌رێمێ‌ ئالۆز بكه‌ن، كوردستان لاواز نابیت و چو جاران ناكه‌ڤیت، چونكی خه‌لكێ‌ كوردستانێ‌ پشته‌ڤانێ‌ هه‌رێما كوردستانێ‌ یه‌، مه‌ دۆزه‌كا ره‌وا هه‌یه‌، هه‌روه‌سا ژ ئه‌گه‌رێ‌ لاوازیا حوكمه‌تا ئیراقێ هه‌ولێر دهێته‌ مۆشه‌ك باران كرن، ئه‌و ئالیێن شیعی یێن شكه‌ستن د هه‌لبژارتنان دا ئیناین، بزاڤێ‌ دكه‌ن گڤاشتنان ل سه‌ر هه‌رێمێ‌ دروست بكه‌ن، داكو حوكمه‌تا نوو یا ئیراقێ نه‌هێته‌ پێكئینان، هه‌روه‌سا ئه‌و ئالیێن د هه‌لبژارتنان دا سه‌ركه‌فتین، دڤێت ئه‌و حوكمه‌تا نوو پێكبینن، ب تایبه‌تی ژی ( باسكێ‌ سه‌دری، پارتی، ئالیێن سوننی)، لێ‌ ئه‌و ئالیێن شكه‌ستن د هه‌لبژاتنان دا ئیناین، ب تایبه‌تی یێن شیعی، ب هه‌موو رێیان یێن بزاڤێ‌ دكه‌ن، كو حوكمه‌تا ئیراقێ نه‌هێته‌ پێكئینان، د به‌رامبه‌ر دا ( باسكێ‌ سه‌دری، پارتی دیموكراتی كوردستان، ئالیێن سوننی)، د رژدن ل سه‌ر پێكئینانا حوكمه‌تا نوو یا ئیراقێ، له‌وما ئه‌و ئالیێن شیعی هه‌ولێرێ‌ مۆشه‌ك باران دكه‌ن”.

هه‌روه‌سا ئه‌و چه‌ند ژی دیار كر”هه‌كه‌ حوكمه‌تا ئیراقێ زوو نه‌هێته‌ پێكئینان، ڤێ‌ چه‌ندێ‌ دێ‌ كارتێكرنه‌كا خراب ل سه‌ر گه‌لێ‌ ئیراقێ هه‌بیت، هه‌ر چه‌نده‌ ئه‌و ئالیێن شكه‌ستن خواری ژ ڤێ‌ ره‌وشێ‌ د مفادارن و وان نه‌ڤێت حوكمه‌تا نوو بهێته‌ پێكئینان، ب تایبه‌تی ژی ئالیێ چارچۆڤێ‌ هه‌ماهه‌نگیا شیعی، دو چاره‌ بۆ پێكئینانا حوكمه‌تا نوو یا ئیراقێ هه‌نه‌، ئه‌و ژی دڤێت بزاڤ بهێنه‌ كرن، ئه‌و ئالیێن سه‌ربه‌خوه‌ پشكداریێ‌ د حوكمه‌تا نوو دا بكه‌ن، رێیا دیتر ئه‌وه‌، كو ده‌وله‌تێن زلهێز یێن جیهانی، مایێ‌ خوه‌ د ڤی بابه‌تی بكه‌ن و ب زووترین ده‌م حوكمه‌تا ئیراقێ پێكبینن، چونكی هه‌كه‌ حوكمه‌تا نوو نه‌هێته‌ پێكئینان، دێ‌ ره‌وشا ناڤخوه‌یی یا ئیراقێ به‌ر خرابترڤه‌ چیت و دێ‌ پتر ئاریشه‌ په‌یدا بن، د هه‌مان ده‌مدا ل ڤان رۆژێن بۆری، موقته‌دا سه‌در، داخواز ژ په‌رله‌مانتارێن باسكێ‌ سه‌دری كریه‌، كو هه‌ر گاڤا وی بریار دا، دڤێت هه‌موو په‌رله‌مانتارێن باسكێ‌ سه‌دری ده‌ستان ژ په‌رله‌مانی به‌رده‌ن، ڤێ‌ چه‌ندێ‌ دێ‌ كاریگه‌ریه‌كا خراب ل سه‌ر پرۆسا سیاسی ل ئیراقێ هه‌بیت”.

 

ئه‌ڤرۆ:

جێگرێ سه‌رۆكێ په‌رله‌مانێ كوردستانێ راگه‌هاند، ل رۆژا پێنجشه‌مبی 9 ڤێ هه‌یڤێ هه‌موو ئالیێن سیاسی یێن هه‌رێما كوردستانێ ب پشكداریا هنارتیا گشتی یا نه‌ته‌ویچن ئێكگرتی ل ئیراقێ دێ كۆمبن.

هێمن هه‌ورامی، جێگرێ سه‌رۆكێ په‌رله‌مانێ كوردستانێ د داخۆیانیه‌كێ دا دووپاتكر” هه‌كه‌ ئیراده‌كا باش ل ده‌ف هه‌موو ئالیێن سیاسی هه‌بیت، ئه‌م وه‌كو سه‌رۆكایه‌تیا په‌رله‌مانێ كوردستانێ د رژدین ل سه‌ر وێ چه‌ندێ هه‌لبژارتنێن په‌رله‌مانێ كوردستانێ ل ده‌مێ خوه‌ بهێنه‌ ئه‌نجامدان”.

هه‌ورامی گۆت ژی” كۆمبوونا پێنجشه‌مبیا داهاتی ل ده‌ف نێچیرڤان بارزانی سه‌رۆكێ هه‌رێما كوردستانێ، هه‌موو هێز و ئالیێن سیاسی ل هه‌رێما كوردستانێ ب پشكداریا (جینین پلاسخارت) هنارتیا گشتی یا رێكخراوا نه‌ته‌وێن ئێكگرتی ل ئیراقێ دێ كۆمبن، هه‌كه‌ ئیراده‌كا سیاسی یا باش هه‌بیت، بشێین بله‌ز هه‌ر راستڤه‌كرنه‌كا پێدڤی بهێته‌ كرن و كۆمسیۆن بهێته‌ كاراكرن ب دیتنا من دشیاندایه‌ ل رۆژا 1 /10 هه‌لبژارتن بهێنه‌ ئه‌نجامدان، هه‌كه‌ ژ روویێ ته‌كنیكی ڤه‌ دشیاندا نه‌بوو ل وی ژڤانی بهێنه‌ ئه‌نجامدان وی ده‌می دبیت ئاخڤتن ل سه‌ر بهێته‌ كرن بۆ وێ چه‌ندێ ل نێزیكرین ده‌م بهێنه‌ ئه‌نجامدان”.

جێگرێ سه‌رۆكێ په‌رله‌مانێ كوردستانێ پتر رۆهنكر” د نوكه‌ دا بلا هه‌موو بزاڤێن مه‌ بۆ وێ چه‌ندێ بن هه‌لبژارتنێن په‌رله‌مانێ كوردستانێ د ده‌مێ خوه‌ یێ دیاركریدا بهێنه‌ ئه‌نجامدان،      ژ به‌ر كو پاشخستنا هه‌لبژارتنان دیارده‌كا گونجای نینه‌ بۆ ناڤه‌ده‌نگی و پرۆسا سیاسی و دیموكراسی ل هه‌رێما كوردستانێ”.

هه‌روه‌سا گۆت” كۆمبوونا ئالیێن سیاسی ل ده‌ف سه‌رۆكێ هه‌رێما كوردستانێ دێ هاریكار بیت بۆ په‌رله‌مانێ كوردستانێ، بۆ وێ چه‌ندێ ئالیێن سیاسی بگه‌هنه‌ رێككه‌فتنێ”.

هه‌ولێر، قائید میرۆ

پێله‌كا دی یا ب ئه‌ره‌بكرنێ ل ده‌ڤه‌رێن كوردستانێ ل خانه‌قین هه‌تا شنگالێ ده‌ستیێكریه‌ و سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ل په‌رله‌مانێ كوردستانێ ئاشكراكر، به‌رپرسێن وان ده‌ڤه‌ران ده‌رگه‌ ل هه‌مبه‌ر پرۆسا ب ئه‌ره‌بكرنێ ڤالاكریه‌ و ب پیلان كار بۆ وێ چه‌ندێ دهێته‌كرن رێژه‌یا وه‌لاتیێن ئه‌ره‌ب هه‌مبه‌ری كوردان زێده‌ بكه‌ن، هه‌تا ل پاشه‌ڕۆژێ بكار بینن ده‌مێ سه‌رژمێری دهێته‌ ئه‌نجامدان.

جوان رۆژبه‌یانی، سه‌رۆكا لژنا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ل په‌رله‌مانێ كوردستانێ بۆ رۆژناما (ئه‌ڤرۆ) گۆت” ئه‌م چاڤدێریا ره‌وشا ده‌ڤه‌رێن كوردستانێ دكه‌ین، ب مخابنی ڤه‌ دێ بێژین پێله‌كا دژوار یا ب ئه‌ره‌بكرنێ ل ده‌ڤه‌رێن كوردستانی یێن سنورێ مادێ ١٤٠ دهێته‌ بجهئینان، كه‌س نینه‌ پارێزگاریێ ل خه‌لكێ ڤان ده‌ڤه‌ران بكه‌ت و به‌رهنگاری پیلانا ب ئه‌ره‌بكرنێ ببیت، به‌رپرسێن وان ده‌ڤه‌رێن دهێنه‌ ب ئه‌ره‌بكرن وان بخوه‌ ده‌رگه‌ ل هه‌مبه‌ر ب ئه‌ره‌بكرنێ ڤه‌كریه‌، وه‌لاتیێن بناڤێ ب ئه‌ره‌بكرنێ ژی دهێنه‌ ده‌ڤه‌رێن كوردستانی هه‌موو ئه‌ون یێن پشتی پڕۆسا ئازادیا ئیراقێ ب گۆره‌ی دستووری و ب رێیا نڤیسینگه‌هێن مادێ ١٤٠ هاتینه‌ قه‌ره‌بووكرن و ڤه‌گه‌ڕیاینه‌ ده‌ڤه‌رێن به‌رێ یێن ئه‌و ژی هاتین بۆ سه‌ر ئه‌ردێ كوردان، به‌لێ نوكه‌ پیلان هه‌یه‌ بۆ زێده‌كرنا رێژه‌یا ئه‌ره‌بێن هاورده‌ بۆ ده‌ڤه‌رێن كورد تێدا، هه‌تا دیموگرافیا وان ده‌ڤه‌ران بهێته‌ گوهۆڕین و ل پاشه‌رۆژێ هه‌ر سه‌رژمێریه‌ك بهێته‌ ئه‌نجامدان رێژه‌یا كوردان كێم ده‌ركه‌ڤیت، لژنه‌یا ده‌ڤه‌رێن كوردستانێ یێن ده‌رڤه‌ی ئیدارا هه‌رێمێ دده‌مێ نوكه‌دا هه‌ماهه‌نگی دگه‌ل جڤاتا نوونه‌رێن ئیراقێ هه‌یه‌، نوكه‌ حوكمه‌تا ئیراقێ كاربرێكه‌ره‌ و پشتی پێكئینانا حوكمه‌ته‌كا نوو ل ئیراقێ مه‌ پلان هه‌نه‌ بۆ ده‌ڤه‌رێن كوردستانی، چونكه‌ ئه‌ركێ حوكمه‌تا ئیراقێ هه‌ژماره‌ك لژنه‌ هه‌نه‌ بۆ بجهئینانا مادێ ١٤٠ یێ دستووری و ئاساییكرنا ره‌وشا وان ده‌ڤه‌ران ئه‌و لژنه‌ بهێنه‌ كاراكرن”.

جوان رۆژبه‌یانی ئاماژه‌كر” پێدڤیه‌ ئه‌ره‌بێن هاتینه‌ ده‌ڤه‌رێن كوردستانی بهێنه‌ ڤه‌گه‌ڕاندن بۆ جهێن وان، ئه‌م وه‌كی هه‌رێما كوردستانێ هندی دشیاندابیت دێ به‌رگریێ ژ ڤان ده‌ڤه‌ران و خه‌لكێ خوه‌ بكه‌ین، به‌لێ هنده‌ك تشته‌ك د ده‌ستهه‌لاتا هه‌رێما كوردستانێ دا نینن و پێدڤیه‌ حوكمه‌تا ئیراقێ كار بكه‌ت بۆ رێگریكرنێ ل پرۆسا ب ئه‌ره‌بكرنێ، به‌لێ حوكمه‌تا ئیراقێ یا به‌رهه‌ڤ نینه‌ بۆ وێ چه‌ندێ، ئه‌م چاڤه‌ڕێ دكه‌ین حوكمه‌تا ئیراقی یا نوو بهێته‌ پێكئینان، ئه‌ڤه‌ رێكارێن دی هه‌نه‌ بگرینه‌ به‌ر بۆ دژایه‌تیكرنا ب ئه‌ره‌بكرنێ، سالانه‌ دده‌مێ گه‌هشتنا به‌رهه‌مێ دان و دكاكێ جوتیارێن كورد ژئالیێ چه‌كدارێن داعشێ و خه‌لكه‌كێ شۆڤێنی ڤه‌ دهێته‌ سووتن و ئه‌ڤساله‌ ژی مه‌ترسی هه‌یه‌ بناڤێن جودا به‌رهه‌مێ جوتیارێن كورد بهێنه‌ سووتن، ئه‌م باوه‌رین ده‌ستێن چه‌په‌ل ب رێیا سووتنا به‌رهه‌مێ جوتیاران دخوازن وه‌لاتیێن كورد بێ هیڤی بكه‌ن ژ هه‌موو تشته‌كی و نه‌چار بكه‌ن ل ده‌ڤه‌رێن خوه‌ نه‌مینن، كه‌سه‌ك ژی نینه‌ ل وان ده‌ڤه‌ران خوه‌ بكه‌ته‌ خودانێن جوتیارێن كوردستانێ و وان بپارێزیت ژ هێرش و پیلانێن دژی كوردان دهێنه‌كرن”.

هه‌ولێر، قائید میرۆ

پشتی سه‌ره‌دانا نێچیرڤان بارزانی سه‌رۆكێ هه‌رێما كوردستانێ بۆ سلێمانیێ، شیایه‌ سه‌ره‌دانا ئالیێن سیاسی بكه‌ت ب مه‌ره‌ما ده‌ستپێكرنا دانوستاندنان، بسپۆره‌كێ زانستێن سیاسی ژی ئاشكراكر، نێچیرڤان بارزانی ده‌رگه‌هێ دانوستاندنان هه‌مبه‌ر ئالیێن سیاسی  ڤه‌كریه‌ و ئاریشه‌یێن د ناڤبه‌را وان دا هند د مه‌زن و ئالۆز نینن، له‌وڕا شیانێن چاره‌سه‌ركرنێ هه‌نه‌ و خالێن هه‌ڤپشك زێده‌ترن ژ خالێن ناكۆكی لسه‌ر.

سالح مه‌لا عومه‌ر، بسپۆرێ زانستێن سیاسی بۆ رۆژناما (ئه‌ڤرۆ) گۆت” به‌ری سه‌ره‌دانا نێچیرڤان بارزانی بۆ سلێمانیێ ناكۆكی دناڤبه‌را پارتی و ئێكه‌تیێ دا هه‌بوو كو كاریگه‌ری لسه‌ر ئالیێن دی ژی هه‌بوو، ره‌وشا هه‌رێما كوردستانێ رۆژ بۆ رۆژ به‌ر ب ئالۆزتر ببیت و كاریگه‌ری لسه‌ر پرۆسا سیاسی ب گشتی هه‌بیت، كۆمبوونێن په‌رله‌مانێ كوردستانێ هاتبوونه‌ راگرتن و  هه‌لبژارتن دده‌مێ خوه‌ دا نه‌دهاتنه‌ ئه‌نجامدان، به‌لێ سه‌ره‌دانا سه‌رۆكێ هه‌رێما كوردستانێ بۆ ئه‌گه‌رێ وێ چه‌ندێ ره‌وش به‌ر ب ئاسایی بوونێ بچیت و بشێوه‌یه‌كێ گشتی نوكه‌  ده‌رگه‌هه‌ك یێ هاتیه‌ ڤه‌كرن بۆ ئه‌نجامدانا دانوستاندنان دناڤبه‌را ئالیێن سیاسی دا تاكو لسه‌ر مێزێن دانوستاندنان كۆمببن و بگه‌هنه‌ خالێن هه‌ڤپشك، ئه‌ز نابێژم ب سه‌ره‌دانه‌كێ هه‌موو بابه‌ت هاتینه‌ چاره‌سه‌ركرن، به‌رۆڤاژی پێدڤی ب دانوستاندنێن زۆر هه‌یه‌ دناڤبه‌را ئالیێن سیاسی دا، به‌لیێ سه‌قایه‌ك هاتیه‌ چێكرن بۆ چاره‌سه‌ركرنا ئاریشه‌یان”.

سالح مه‌لا عومه‌ر گۆت ژی” ب دیتنا من ناكۆكیێن د ناڤبه‌را ئالیێن سیاسی دا هند د مه‌زن نینن كو نه‌هێنه‌ چاره‌سه‌ركرن، زێده‌تر فه‌زایه‌كێ سایكۆلۆژی هاتبوو چێكرن ره‌وشا هه‌رێما كوردستانێ بگه‌هیته‌ ئاسته‌كی كو دانوستاندن نه‌هێنه‌ ئه‌نجامدان، تایبه‌ت ب رێیا كه‌نالێن راگه‌هاندنێ و سۆشیال میدیایێ ره‌وشه‌كا زۆر خراپ  هاتبوو چێكرن دناڤبه‌را پارتی و ئێكه‌تیێ دا، نوكه‌ ره‌وش به‌ر ب  ئاسایی بوونێ یه‌ و شه‌ڕێ راگه‌هاندنێ ژی هاتیه‌ راگرتن و زێده‌تر ده‌لیڤه‌ بۆ سیاسه‌تمه‌داران هێلایه‌ و ئه‌ز باوه‌رم ئاریشه‌یێن د ناڤبه‌را ئالیێن سیاسی و كه‌سایه‌تیێن سیاسی دا هند دمه‌زن و زه‌حمه‌ت نینن ببنه‌ ئه‌گه‌رێ وێ چه‌ندێ نه‌گه‌هنه‌ ئه‌نجامه‌كی، بۆ نموونه‌ لدۆر پرۆسا هه‌لبژارتنان ناكۆكی هه‌بوون، به‌لێ ئه‌نجامدانا هه‌لبژارتنان پرۆسه‌كا ئالۆز نینه‌، چونكه‌ ب گۆره‌ی قانوونێ پشتی چار سالان پێدڤیه‌ هه‌لبژارتن بهێنه‌ ئه‌نجامدان، ئاریشه‌ لسه‌ر وێ چه‌ندێ یا هه‌ی كا ئایا قانوونا هه‌لبژارتنان بهێته‌ راستڤه‌كرن یان ژی نه‌،  ئه‌ڤه‌ دێ ب دانوستاندنان هێته‌ ئێكلاكرن، لدۆر پرسا كاراكرنا كۆمسیۆنێ ژی ب هه‌مان شێوه‌ی ئاریشه‌كا مه‌زن و ئالۆز نینه‌ و ده‌لیڤا رێككه‌فتنێ یا هه‌ی، ئه‌ز یێ گه‌شبینم ب چاره‌سه‌ركرنا ئاریشان و رێككه‌فتنا ئالیێن سیاسی، به‌لێ پێدڤیه‌ ده‌زگه‌هێن راگه‌هاندنێ و سۆشیال میدیا رۆله‌كێ ئه‌رێنی ببینن بۆ وێ چه‌ندێ  كو ئالیێن سیاسی بگه‌هنه‌ رێككه‌فتنێ و به‌رۆڤاژی نه‌بنه‌ ئاسته‌نگ بۆ چێكرنا ئاریشه‌یان و لێكدووركه‌فتنا ئالیێن سیاسی، نێچیرڤان بارزانی ب سه‌ره‌دانا خوه‌ شیایه‌ سه‌قایه‌كێ ئارام ل كه‌نالێن راگه‌هاندنێ و سۆشیال میدیایێ په‌یدا بكه‌ت بۆ ئاساییكرنا ره‌وشێ”.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، راگه‌هاند، پشكداریكرنا مه‌ د كۆربه‌ندێ جیهانیێ داڤۆس دا بۆ وێ چه‌ندێ بوو، هزر و بۆچوونێن حوكمه‌تا هه‌رێما كوردستانێ و خه‌لكێ كوردستانێ ل گه‌ل هه‌موو به‌رهه‌ڤبوویێن كۆربه‌ندی ئالۆگۆر بكه‌ین و گوهداریا هزر و بۆچوونێن وان بگرین.

ئه‌ڤ ئاخڤتنێن سه‌رۆكێ حوكمه‌تا هه‌رێما كوردستانێ ل داخۆیانیه‌كا رۆژنامه‌ڤانی ل داڤۆس هاتن كۆ تێدا گۆت ژی” ئارمانجه‌كا دی یا پشكداریا مه‌ د وی كۆربه‌ندی دا بۆ تێگه‌هاندنا جیهانی یه‌ ل وان ته‌حه‌دیێن روو ب روویی مه‌ دبن، بۆ وێ چه‌ندێ هه‌م بۆچوونا خوه‌ ب وان رابگه‌هینین و هه‌م ژی گوهداریا بیر و بۆچوونێن وان بكه‌ین، بۆ چاره‌سه‌ریا وان قه‌یرانێن نوكه‌ روو ب روویێ جیهانێ ب گشتی بووین”.

مه‌سرور بارزانی دووپاتكر ژی” ئه‌م ل هه‌رێما كوردستانێ دبیت بشێین تا راده‌كی مه‌ كاریگه‌ری هه‌بیت ل كێمكرنا پشكه‌ك ژ وان كێشێن د سیكته‌رێن ئاسایشا خۆراكی و ئاسایشا وزێ هه‌ین كوت  تووشی جیهانێ بووین، كو هیچ نه‌بیت بشێین بۆ ده‌ڤه‌رێن خوه‌ وێ كێماتیێ پر بكه‌ین”.

د به‌رسڤا پرسیاره‌كێ دا، ل دۆر پاشه‌رۆژا هاریكاری و هه‌ماهه‌نگیێن د ناڤبه‌را هه‌رێما كوردستانێ و وه‌لاتێن جیهانێ، مه‌سرور بارزانی، سه‌رۆكێ حوكمه‌تا هه‌رێما كوردستانێ، گۆت” ل كۆربه‌ندێ ڤێ جارێ یێ داڤۆس، ئه‌و بابه‌تێن زێده‌تر باس ل سه‌ر هاتیه‌ كرن، پێكهاتی بوون ژ كێشێن ئاسایشا خۆراكی، كێشا وزێ و هنده‌ك پرس و كێشێن سیاسی، كو ل ده‌ڤه‌رێ په‌یدابووینه‌ و ب شێوه‌كێ گشتی باس ل كاریگه‌ریێن شه‌ری ژی هاته‌ كرن، وه‌كو شه‌رێ ئۆكرانیا، كو وان كێشان چه‌ند كاریگه‌ری ل سه‌ر پرسێن دی هه‌بوو، نه‌كو تنێ ل ئورۆپا، به‌لكو ل ده‌ڤه‌رێن دی ژی”.

مه‌سرور بارزانی گۆت ژی” مه‌ ل سه‌ر وێ چه‌ندێ ئاخڤت، چاوان بشێین هاریكاریا هه‌ڤدو بین و ئه‌و چاوان بشێن هاریكاریا مه‌ بكه‌ن، مه‌ ل گه‌ل گه‌له‌ك وان كۆمپانیان ژی ئاخڤت یێن كو پشكداری د كۆربه‌ندی دا كری، ئه‌و ژی دخوازن بۆ كارێ وه‌به‌رئێنانێ بهێنه‌ هه‌رێما كوردستانێ و مفای ژی ژ ئه‌زموونا مه‌ وه‌ربگرن، كو ئه‌م شیاینه‌ سه‌ره‌رای وان هه‌موو قه‌یرانێن تووشی مه‌ بووین، چ وه‌كو روو ب رووبوونا تیرۆرێ، یان ژی ئه‌و كێشێن نوكه‌ ل ده‌ڤه‌رێ هه‌ین، كو كوردستان چاوان شیا ل سه‌ر پێ خوه‌ راوه‌ستیت و گاڤێن باشتر ژی به‌ر ب پێشڤه‌ ب هاڤێژیت”.

هه‌روه‌سا دووپاتكر” مه‌ داخواز ژ وان كۆمپانیان كر، بهێنه‌ هه‌رێما كوردستانێ و وه‌به‌رئێنانێ بكه‌ن، وان ژی به‌رهه‌ڤیا خوه‌ دیاركر، ئه‌و د وێ باوه‌ریێ دانه‌ ده‌لیڤێن زۆر ل هه‌رێما كوردستانێ یێن هه‌ین، كو بشێن مفای ژێ وه‌ربگرن، هه‌لبه‌ت بۆ وێ چه‌ندێ ئه‌م ژی مفای ژ شاره‌زاییا وان وه‌ربگرین و پێكڤه‌ بشێین هاریكارێن هه‌ڤدو بین”.

ئه‌ڤرۆ:

به‌رپرسێ لقێ دوو یێ پارتی دیموكراتی كوردستان ل هه‌ولێرێ، ده‌ستپێشخه‌ریا پارتی دیموكراتی كوردستان بۆ ئێكرێزیا ناڤمالا كوردی گرنگیه‌كا مه‌زن یا هه‌ی، چونكه‌ نوكه‌ ئه‌و بابه‌ته‌ یێ بوویه‌ بابه‌ته‌كێ نێڤده‌وله‌تی و پێدڤیه‌ بهێته‌ چاره‌سه‌ركرن و چاره‌سه‌ركرن ژی ب روونشتنا ئالیێن سیاسی دبیت، ب تایبه‌تی پارتی دیموكراتی كوردستان و ئێكه‌تی نیشتمانی كوردستان، كو ل گه‌ل بزاڤا گۆران حوكمه‌ت پێكئینایه‌ و ل گه‌ل به‌غدا ژی مه‌ كێشه‌ هه‌نه‌ و پێدڤیه‌ ئه‌و كێشه‌ ل سه‌ر بنه‌مایێن دستووری بهێنه‌ چاره‌سه‌ركرن، وان ب رێیا دادگه‌ها فیدرالی یا ژ بنه‌مایێن دستووری لادای.

ئه‌حمه‌د كانی، به‌رپرسێ لقێ دوو یێ پارتی گۆت ” ده‌ستپێشخه‌ریا پارتی دیموكراتی كوردستان گه‌له‌ك یا گرنگه‌ بۆ ئێكرێزیا ئالیێن كوردی و ناڤمالا كوردی و ئه‌وا گرنگ ژی د ڤێ قۆناغێ دا ده‌ستپێشخه‌ریه‌كا وه‌سا هه‌بیت بۆ روونشتنا هه‌موو ئالیان، ب تایبه‌ت پارتی و ئێكه‌تی و به‌ری چه‌ند رۆژان ژی د كۆمبوونا جڤاتا ئاسایشا نێڤده‌وله‌تیدا، جینین بلاسخارت نوونه‌ران سكرتێرێ گشتیێ نه‌ته‌وێن ئێكگرتی ل ئیراقێ باس ل وێ پرسێ كو ئه‌و چه‌نده‌ ژی بوویه‌ بابه‌ته‌كێ نێڤده‌وله‌تی و زیانێ ب دۆزا كوردی دگه‌هینیت، له‌وما باس ل وێ چه‌ندێ هاته‌ كرن كو هه‌رێما كوردستانێ ئێكه‌ و ئێك حوكمه‌ت وپه‌رله‌مان یێ هه‌ی و هه‌كه‌ برگه‌ك هه‌بیت، دێ بیته‌ ئاماژه‌ك بۆ دو ئیداره‌یێ، ئه‌و خرابه‌ و پێدڤیه‌ بهێته‌ چاره‌سه‌ركرن، ئه‌وژی ب روونشتنێ دێ هێته‌ كرن، ب تایبه‌ت روونشتنا ئێكه‌تی و پارتی، كو دو ئالیێن سه‌ره‌كینه‌ و ل گه‌ل بزاڤا گۆران حوكمه‌ت پێكئینایه‌”.

ئه‌حمه‌د كانی گۆت ژی” سه‌رۆكێ حوكمه‌تا هه‌رێما كوردستانێ پارتیه‌ و جێگرێ وی ئێكه‌تیه‌ و جێگرێ سه‌رۆكێ هه‌رێمێ ژ بزاڤا گۆرانه‌ و پێكڤه‌ حوكمه‌ت یا پێكئینای و پێدڤیه‌ حوكمه‌تا هه‌موویان بیت و ئه‌م هه‌موو ژی پێگیری قانوونێ و رێكاران بین بۆ به‌رژه‌وه‌ندیا گه‌لێ كورد”.

زێده‌تر رۆهنكر” ل دووماهی كۆمبوونا پارتی ژی دا باس ل وی بابه‌تی هاته‌ كرن و سه‌رۆك مه‌سعود بارزانی هه‌موو ئالیه‌ك سه‌رپشك كریه‌ بۆ وێ چه‌ندێ هه‌موو بۆ ئاساییكرنا په‌یوه‌ندیان گاڤان ب هاڤێژن، له‌وما ئاساییكرنه‌ بۆ ڤێ قۆناغێ گه‌له‌ك یا گرنگه‌، ب تایبه‌ت پشتی خواندنا راپۆرتا پلاسخارتێ د كۆمبوونا جڤاتا ئاسایشا نێڤده‌وله‌تیدا”.

به‌پرسێ لقێ دوو یێ پارتی دیاركر ژی” د وێ كۆمبوونا سه‌ركردایه‌تیا پارتی گه‌له‌ك خالێن ئه‌رێنی تێدابوون، كو كێشێن هه‌رێما كوردستانێ و به‌غدا ژی ب گۆره‌ی بنه‌مایێن دستووری بهێنه‌ چاره‌سه‌ركرن، ئه‌وژی د به‌رژه‌وه‌ندیا هه‌رێما كوردستانێ دایه‌، چونكه‌ مه‌ كێشه‌ یێن ل گه‌ل به‌غدا هه‌ین و وان ژی دڤێت ب وێ رێ ژ بنه‌مایێن دستووری لابده‌ن، كو بنه‌مایێن دستووری گه‌له‌ك د رۆهنن”.

website security
WP Facebook Auto Publish Powered By : XYZScripts.com