ئەڤرۆ نیوز، بارزان مزووری:

قایمقامێ قەزا شێخان بۆ ئەڤرۆ نیوز ئاشکرا کر، ژ بەر پێگرە نەکرن ب رێنمایان، لژنا ھەڤپشک یا چاڤدێریا بازرگانی یا ساخلەمیێ ل قەزا شێخان؛ کارگەھەکا دروستکرنا خوارنێن ئامادە ل سەنتەرێ قەزا شێخان داخست.

سەردار یەحیا عەبدولعەزیز، قایمقامێ قەزا شێخان دیار کر، ل رێکەفتی ٢٦/٦/٢٠١٩ لژنا ھەڤپشک یا چاڤدێریا بازرگانی یا ساخلەمیێ سەرەدانا کارگەھێن دروستکرنا بەرھەمێن خوارنێ یێن ب گوشتی ڤە گرێدای د ناڤ سەنتەرێ قەزا شێخان دا کر و گۆت: “لژنێ کارگەھەکا مەزن یا ڤان خوارنان ل شێخان بناڤێ”سندریلا” بۆ ماوێ سێ رۆژان داخست و بکوژمێ ١٠٠ ھزار دیناران ژی سزادا، ژ بەرکو ل دووڤ رێنمایێن لژنێ کار نەدکر و پێگری ب رێنمایان نەدکر”.

ناڤھاتی ئاماژە ب وێ چەندێ ژی کر کو د ناڤ وێ کارگەھێ دا کۆبە و قیمە و گەلەک تشتێن دی دھاتنە دروستکرن و گۆت: ” ھێشتنا د ناڤ کارگەھێ دا و ل سەر مارکێتا نەھاتینە بەلاڤکرن ماوێ وان یێ ب سەرڤەچووی، لەو ل دووڤ رێنمایێن لژنا ھەڤپشک ھاتە سزادان”.

ئەڤرۆ نیوز، عەلی حاجی:

سەرۆکێ باژێرڤانیا قەزا زاخۆ بۆ ئەڤرۆ نیوز ئاشکرا کر، ئەو د دەمەکێ نێزیک دا دێ دەست ب رێکخستنا بەرلێڤێن خابیری کەن و دبێژیت: د پلانا مە دایە دو پرێن پیادە یێن داری ل سەر خابیری دروست بکەین کو دو گەرەک و دو پارکان دێ پێکڤە گرێدەن.

بژار مونیب، سەرۆکێ باژێڕڤانیا قەزا زاخۆ د داخویانیەکێ دا دیار کر، د بەرنامێ وان دایە د دەمەکێ نێزیک دا دەست ب رێکخستنا بەرلێڤێن خابیرێ زاخۆ بکەن، ھەر ژ باژێرڤانیا زاخۆ ھەتا پرا خانی و گۆت: “بۆ ھەردو لایێن خابیری دێ ستاندجیداری دانین، ھەردیسا د پلانا مە دایە ھەر ژ پرا خانی ھەتا دگەھیتە پارکا لایێ دیێ ئاڤێ کو دبێژنێ تاخێ جوھیان، پرەکا داری یا پیادە بھێتە دروستکرن، د گەل دا ژی پرەکا دی یا پیادە ژ پارکا تاخێ جوھیان ھەتا دگەھیتە پارکا دانعەمران بھێتە دروستکرن، ب ڤی رەنگی پرا خانی و یا ناڤ بازاری و د گەل دا دو تاخ و دو پارک دێ پێکڤە ھێنە گرێدان و وەلاتی ژی دشێن ل سەر خابیری پەیاسێ بکەن، ئەڤ چەندە ژی دێ جوانیەکا دیتر دەتە وان تاخان، ژ بەکو جھێن شوونواری ژی ل وان تاخان ھەنە و ئاڤا خابیری ژی تێدا دەرباز دبیت”.

ناڤھاتی گۆتژی: “ئەم د نوکە دا چاڤەڕێی پێشینەیا ھەیڤانەینە یا باژێرڤانیا زاخۆ، ژ بەرکو ئەڤ کارە دێ ب پێشینەیا باژێرڤانیا زاخۆ ھێتە ئەنجامدان، راستەوخو ژی ئەڤ پرۆژە دێ ژ لایێ مەڤە ھێتە بجھئینان، ھەرچەندە ئەو پارێ دھێت یێ کێمە، بەلێ ب وی پارەی دێ شێین چەندین پرۆژە و کارێن باش بۆ باژێرێ زاخو َئەنجام دەین”.

ئەڤرۆ نیوز، لەزگین جوقی:

رێڤەبەرێ فەرمانگەھا ژینگەھا دھۆکێ دیار کر کو ٩٧ جھێن موەلیدێن کارەبێ ل سەرانسەری دھۆکێ ھەنە ژوان ژی ٩٤ جھێن موەلیدان د پیس بوون ئەو ژی پشتی پشکنینا گازوائیلا وان ژ لایێ رێڤەبەریا گازی و نەفتی ل دھۆکێ ھاتیە کرن د ڤان ھەر ٩٧ جھێن موەلیدان دا ٥٢٥ موەلێدین کارەبێ ھەنە و بتنێ ١٤ موەلیدە گازا پاقژ ل دووڤ ستاندەران بکاردئینن.

مەحمەد تاھر بریفکانی، رێڤەبەرێ فەرمانگەھا ژینگەھا بۆ ئەڤرۆ نیوز دیار کر کو پشتی وان دووڤچوون ل سەر جۆری گازوائیلا موەلیدە بکاردئینن کری دەرکەفت گازا پیس بکاردئینن، چونکو بھایێ وێ یێ ئەرزانە و خۆدانێن موەلیدان بکاردئینن و ئەڤە دبیتە ئەگەرێ زیانێ ل سەر ژینگەھێ و ساخلەمیا وەلاتیان و گۆت: “ھەکە نوکە زیان دیارنەبن دێ د پاشەرۆژی دا دیاربن، پێدڤیە ئەم رێگریێ ل وان بکەین بۆ پاراستنا بەژەوەندیا خەلکێ خوە و نەھێلین ژینگەھا مە بھێتە پێس کرن”.

ناڤھاتی ئاماژە دا وێ چەندێ کو ئەڤ موەلیدێن کارەبێ یێن رۆژانە ل دھۆکێ کار دکەن بۆ دابینکرنا کارەبی دێ ئاریشێن ساخلەمیێ بۆ خەلکێ دھۆکێ دروست کەن، ھەکە نوکە نەبیت دێ پاشەرۆژێ دیاربیت، چونکو پتریا وان موەلیدێن کارەبی گازوائیلا پێس بکاردئینن، ھەکە گازوائیلا وان نەھێتە کونترۆلکرن دێ گەلەک ئاریشە ژێ دروست بن و گۆت: “پشتی پشکنین ھاتیە کرن ژ سەرجەمێ ٥٢٥ موەلیدان بتنێ ١٤ موەلیدە گازوائیلا پاقژ بکاردئینن یێن دی ژی ھەموو گازوائیلا پێس بکاردئینن و دووکێلەکا سوور ژ موەلیدان دەرکەڤیت و کارتێکرنێ ل ژینگەھێ دکەن”.