ئەڤرۆ نیوز، عەلی حاجی:

رێڤەبەرێ فەرمانگەھا شوونواران ل زاخۆ بۆ ئەڤرۆ نیوز دیار کر، ل سنوورێ قەزا زاخۆ گەلەک پارچە و جھێن شوونواری ھەنە، لێ ھەتا نوکە زاخۆ یا بێ مۆزەخانەیە و دبێژیت: مە چەندین نڤیسار داینە جھێن پەیوەندیدار بۆ ڤەکرنا مۆزەخانەکێ ل زاخۆ، لێ ھەتا نوکە چو بەرسڤەک نەھاتیەدان.

محەمەد ئەحمەد، رێڤەبەرێ فەرمانگەھا شوونواران ل زاخۆ ئاشکرا کر، ھەر ژ سالا ٢٠١٤ ھەتا نوکە ئەو بەردەوام نڤیساران ددەنە لایەنێن پەیوەندیدار ل زاخۆ ب مەرەما ڤەکرنا مۆزەخانەکێ، بەلێ ھەتا نوکە چو بەرسڤەک نەھاتیەدان و گۆت: “باژێرێ زاخۆ ئێک ژ وان باژێرایە کو زێدەتری ھەموو دەڤەران جھێن شوونواری ھەنە، ل سالا ٢٠١٦ ب رێیا نڤیسارەکێ بۆ پارێزگەھا دھۆکێ مە داخواز کر کو مۆزەخانەکا بچووک د ناڤ ئاڤاھیێ فەرمانگەھا مە دا ڤەکەین، بەلێ ھێشتا رازیبون ل سەر نەھاتیەدان”.

گۆتژی: “د نوکە دا چەندین کەلوپەلێن شوونواری یێن گرێدای ب زاخۆڤە د مۆزەخانا دھۆکێ دانە و گەلەک وەلاتی ژی ھەنە دخوازن کەلوپەلێن شوونواری بکەنە د مۆزەخانەکێ دا، بەلێ ژ بەر نەبوونا مۆزەخانێ ل زاخۆ ئەو وەلاتی ئامادە نینن رادەست بکەن”.

محەمەدی خویا ژی کر، وان پارچەکا ئەردی وەرگرتیە ل خرابابکێ کو دبنەرەت دا ئەو ئەردە بۆ ئاڤاکرنا مۆزەخانێ و ئاڤاھیەکی بۆ فەرمانگەھا شوونواران ل زاخۆ ھاتیە تەرخانکرن، بەلێ ھەتا نوکە چو تشتەک دیار نینە بھێتە ئاڤاکرن.

ئەڤرۆ نیوز، ئەمیر ئەترووشی:

بەرپرسێ راگەھاندن و پەیوەندیان ل سەرۆکاتیا باژێرڤانیا دھۆکێ ئاشکرا کر کو ب کۆژمێ ٦٥٠ ملیۆن دیناران پرۆژێ ڤەکرن و قێرکرنا جادێن قەسارا دەستپێکریە و نھا ب رێژا ٤٤% پرۆژە ھاتیە ئەنجامدان.

ئیسماعیل مستەفا، بەرپرسێ راگەھاندن و پەیوەندیان ل سەرۆکاتیا باژێرڤانیا دھۆکێ بۆ ئەڤرۆ نیوز دیار کر کو ئەڤ پرۆژە ب پشتەڤانیا پارێزگەھا دھۆکێ دھێتە ئەنجامدان و ئەڤە دەمێ ھەشت ھەیڤانە دەست ب پرۆژەی ھاتیە کرن، بەلێ چەند ئاستەنگێن کارەبێ و ھێلێن ئاڤێ و قەرەبووکرنا وەلاتیان پەیدابووینە و سەرەرای ھندێ ژی نھا پرۆژە ب رێژا ٤٤% ھاتیە ئەنجامدان و نوکە ژی کا د چێکرنا ڤی پرۆژەی دا یێ بەردەوامە.

ناڤھاتی ئاماژە دا وێ چەندێ کو نھا ڤەکرنا جادان ب دووماھی ھاتیە و ل گەل ڤەکرن و قێرکرنا جادێن قەسارا دێ رێیا سەرەکی ژ زالگەھا ئالوکا و ھەتا دچیتە دناڤ گۆندی ژی دا ھێتە چێکرن و گۆت: “نھا نێزیکی ھزار و ٥٠٠ مالان ل گۆندێ قەسارا دژین و ١٣ کۆلانێن وێ دێ سەر ژ نوو ھێنە ڤەکرن و ھندەک جادە ژی دێ ھێنە قێرکرن”.

ئەڤرۆ نیوز، عەلی حاجی:

بازارێن فرۆتنا جلکان ل زاخۆ، ئێک ژ سەرەکیترین بازارایە د ناڤ سەنتەرێ قەزا زاخۆ دا، رۆژانە ھژمارەکا زۆرا وەلاتیان قەستا وی بازاری دکەن بو کڕینا جلکان، لێ ژ ئەگەرێ بچووکیا ئاڤڕێژێن وی بازاری، دکاندار و وەلاتی تووشی چەندین گرفتان دبن.

فاخر گوللی ئێک ژ دکاندارێن فرۆتنا جلکان ل وی بازاری بۆ ئەڤرۆ نیوز دیار کر، ل وەرزێ زڤستانێ، ب تایبەتی ژی د دەما بارینا بارانێ دا ئەو تووشی چەندین گرفتان دبن، ژ بەرکو ئاڤڕێژێن بازاری گەلەک دبچووکن و گۆت: “زێدەتری ١٠٠ دکان و ھۆتێل و شوقە ل سەر وان ئاڤڕێژانە، لەو دەما باران دباریت گەلەک ئاستەنگ ل ھەمبەر کارێ مە دەردکەڤن و وەلاتی نەشێن وەکو پێدڤی قەستا دوکانێن مە بکەن، ئەڤێ ژی کارتێکرنەکا نەرێنی یا ل کارێ مە کری”.

فاخری گۆتژی: “ل سالا ٢٠١٦ مە نڤیسارەک دابوو باژێرڤانیا زاخۆ و زێدەتری ١٢٠ ئیمزایان ژی کۆمکر بوون، بەلێ ھەتا نوکە دبێ دەنگن، د دەما دروستکرنا پارکا شەھیدان دا سەرۆکێ باژێرڤانیا زاخۆ سۆز دابوو مە، ھەردەما پارکا شەھیدان ب دووماھی ھات دێ ئێکسەر ئاڤڕێژێن بازاری دروستکەن، لێ ئەڤە زێدەتری سالەکێ یە ئەو پارکە ب دووماھی ھاتی و سەرۆکێ باژێرڤانیێ ژی سۆزا خوە ب جە نەئینا”.

ئەڤرۆ نیوز:

سەربەست تروانشی، ئەندامێ جڤاتا سەرکردایەتیا پارتی و بەرپرسێ لقێ ئێکێ پارتی دیموکراتی کوردستان ئەڤرۆ ٢٧/٥/٢٠١٩ ل بارەگایێ لقێ پێشوازی ل فەرھاد ئەمین ئەترووشی، پارێزگارێ دھۆکێ کر و د ھەڤدیتنەکێ ھەر دو لایان دوپاتی ل سەر ھاریکاریکرنا وەلاتی و مالباتێن شەھیدان کر.

دیسا د وێ ھەڤدیتنێ دا پارێزگەرێ دھۆکێ و بەرپرسێ لقێ ئێکێ پارتی سوپاسیا خەلکێ پاریزگەھا دھۆکێ کر ژ بۆ پێگیریکرنا وان ب رێنمایێن ھەیڤا رەمەزانا پیرۆز، دیسا دوپاتی ل سەر وێ ئێکێ کر کو د ڤان رۆژێن داھاتی دا یێن عەرەفات و جەژنێ رۆژێن خێر و بەرەکەتێ بن بۆ خەلکێ کوردستانێ و ب تایبەتی دلھینیەک و گرنژینەک بۆ مالباتێن شەھیدێن سەربلند بھێتە پەیداکرن و ھاریکاریا وان بھێتە کرن.

بەرپرسێ لقێ ئێکێ پارتی سوپاسیا پاریزگاری کر ژ بۆ وان ھاریکاریێن بۆ بەرنامێ مەھا رەمەزانێ پێشکێشکرین، ژ لایێ خوەڤە ژی پارێزگارێ دھۆکێ دەستخوشی ل بەرپرسێ لقێ کر ژ بۆ وی بەرنامێ د ھەیڤا رەمەزانێ دا دانای کو شیایە ژ نێزیک دگەل ھەموو تەخ و توێژێن سەنتەرێ پارێزگەھا دھۆکێ و سێمێلێ ب روونیت چەندین دیاری و ھاریکاری گەھاندینە وان.

ئەڤرۆ نیوز:

سەربەست تروانشی، ئەندامێ جڤاتا سەرکردایەتیا پارتی و بەرپرسێ لقێ ئێکێ پارتی دیموکراتی کوردستان ب ئامادەبوونا بەرپرسێ نڤیسینگەھا جڤاکی و کاروبارێن شەھیدان ل لقێ ئێک ئەڤرۆ ٢٧/٥/٢٠١٩ ل سنوورێ لیژنا ناوچا بەرخودان دگەل ھژمارەکا بەرچاڤ یا مالباتێن شەھیدان کومبوو و بەرپرسێ لقێ ھاریکاریێن دراڤی ل سەر وان پارڤەکرن.

ل دووڤ وی بەرنامێ لقێ ئێکێ پارتی داڕێژتی، بەرپڕسێ لقێ گوت: “ئەڤ خزمەتا ئەم پێشکێشی مالباتێن شەھیدان دکەین، ل دووڤ شیرەت و راستپاردێن جەنابێ سەرۆک مەسعود بارزانی نە ژ بۆ خوەشکرنا ژین و ژیارا مالباتێن شەھیدان”.

بەرپرسێ لقێ ئاماژە دا وێ چەندێ ژی کو د ناڤ ھەر میللەتەکی دا ھندەک مرۆڤێن ژێگرتی ھەنە و خودان سیفەتێن تایبەتن، ئەو ژی ئەو کەسن یێن بۆ ب دەستڤەئینانا سەرفەرازیێ دەست ژ ھەموو خوشیێن دونیایێ بەر ددەن و ئەو قەھرەمانن یێن ئینەتێن پاقژ و ب بیروباوەری دچنە د سەنگەرێن شەرەفێ دا و دبنە ئاشقێن خزمەت و خەبات و فیداکاریێ کو ئەو ژی شەھیدن.

ژ لایێ خوەڤە مالباتێن شەھیدان ژی سوپاسیا بەرپرسێ لقێ کر ژ بۆ خەمخوری و وێ پووتەدانا بەردەوام یا ب مالباتێن شەھیدان ددەت.