ئەڤرۆ نيوز، ئەمیر ئەترووشی:

رێڤەبەرێ سەخبێری و پاراستنا رێک و پران ل پارێزگەھا دھۆکێ راگەھاند، رازیبوون ل سەر چێکرن و سەخبێریکرنا چەپێن زرێزە ھاتیە کرن و ل دەمەکێ نێزیک دێ دەست ب چێکرنا وان ھێتە کرن و ئەو ئاریشە دێ ھێتە چارەکرن.

ئەندازیار دێوالی حەمێ بریندار، رێڤەبەرێ سەخبێری و پاراستنا رێک و پران ل پارێزگەھا دھۆکێ بۆ ئەڤرۆ نیوز دیار کر کو چەپێن زرێزە ئەڤە بۆ جارا گەلەکێ یە د ھڕیێن و ژناڤ دچن و ئەڤە بۆ ماوێ سێ ھەیڤانە ترۆمبێلێن رێڤەبەریا مە ل وێرێ ماینە بۆ ھندێ ھەر چو نەبیت رێکێ بۆ ترۆمبێلان خۆشبکەن کو ھاتنوچوونێ بۆ جھێن پێدڤی و فەر بکەن و گۆت: “رازیبوون ل سەر سەخبێریکرنا چەپێن زرێزە ھاتیە کرن و نھا ئەم چاڤەڕێی بودجەیا پێدڤی دکەین بۆ سەخبێریکرنا وان”.

رێڤەبەرێ سەخبێری و پاراستنا رێک و پران ل پارێزگەھا دھۆکێ ئاشکرا ژی کر کو ئەو نەشێن نھا چو رێیێن دی یێن پێگوھۆر ل شوونا وێ چێکەن، چونکو بودجەکا مەزن بۆ دڤێت و جە ژی نینە چو رێیێن دی بھێنە چێکرن و گۆت: “مە داخوازا ٧٠ ملیار دیناران ژ حوکمەتا ھەرێما کوردستانێ کریە بۆ سەخبێریکرنا گشت رێ و پرێن پارێزگەھا دھۆکێ”.

ئەڤرۆ نیوز، سالار دۆسکی:

ئەندامەکێ جڤاتا پارێزگەھا دھۆکێ ئاشکرا کر کو ب رێژا ٧٨% خەلکێ پارێزگەھا دھۆکێ باجا خوە د دەت، ل دووڤ دووماھی ئامارا خەلکێ پارێزگەھا دھۆکێ بۆ دانا باجێ ژ ھەر دو پارێزگەھێن ھەولێر و سلێمانیێ باشترە.

ئدریس ھەرکی، ئەندامێ جڤاتا پارێزگەھا دھۆکێ بۆ رۆژناما ئەڤرۆ دیار کر کو پرۆژێ دانا پاشکەفتێ مووچەی پرۆژە قانوونا ھەر سێ جڤاتێن پارێزگەھان بوویە و ھەر دو جڤاتێن ھەولێر و دھۆک ھاتبوونە راسپاردن کو پرۆژە قانوونەکێ بەرھەڤ بکەن و ھاتە بەرھەڤکرن، ل دەسپێکێ بۆ وەزارەتا ناڤخۆ ھاتبوو بلندکرن و گەھشت بوو وەزارەتا دارایی ئەوا دیارکر بوو کو د دەستھەلاتێن وەزارەتا دارایی دا نینە کو بەرسڤا ئەنجوومەنان بدەت و دڤێت ب رێیا ئەنجوومەنێ وەزیران بیت، لەوما جارا دویێ ئەو داخوازی ھاتە بلندکرن ب رێ یێن قانوونی.

ھەرکی ئاماژە دا وێ چەندێ کو ئەو ب ھیڤی نە ل کابینا نوو یا حوکمەتا ھەرێما کوردستانێ پرۆژە قانوونا جڤاتێن پارێزگەھێن ھەرێما کوردستانێ ل سەر پاشکەفتێ مووچەی مفا ژێ بھێتە وەرگرتن و حوکمەت دشێت ب رێ یێن قانوونی ڤی پاشکەفتی بەرامبەر دەینێن خوە بێخیت، چونکو خەلکەک ھەیە قەردارێ حوکمەتێ یە ژی وەک ئاف و کارەب و ھاتنوچوون و باج، ژ بەر ڤێ چەندێ ئەو دبینین ئەڤ پرۆژە دبەرژوەندیا حوکمەتێ و خەلکێ کوردستانێ دایە.

ئدریس ھەرکی ئەو ژی گۆت: ب رێژا ٧٨% خەلکێ پارێزگەھا دھۆکێ باجا خوە دەت، ل دووڤ دووماھی ئامارا خەلکێ پارێزگەھا دھۆکێ بۆ دانا باجێ ژ ھەر دو پارێزگەھێن ھەولێر و سلێمانیێ باشترە .

ئەڤرۆ نیوز، قائید میرۆ:

پڕۆژێ بجە ئینانا رێیا دھۆک – ھەولێر ل سنوورێ پارێزگەھا ھەولێرێ ژی ھاتیە دەستپێکرن و بەرپرسەکێ وەزارەتا ئاڤاکرن و ئاکنجی کرنێ ژی دبێژیت، ئەڤ پرۆژە دێ د دەمێ خوە دا ب دووماھی ھێت و کەڤیتە کاری.

سدقی ئامێدی، بریکارێ وەزارەتا ئاڤاکرنێ بۆ رێک و پرا بۆ ئەڤرۆ نیوز دیار کر کو ئێک ژ ئەڤان پرسێن حوکمەتا ھەرێما کوردستانێ زۆر گرنگیێ پێ ددەت چێکرنا رێیا د ناڤبەرا ھەولێر و دھۆکێ دا یە و ل سنوورێ دھۆکێ رێژەکا باش یا ھاتیە بجە ئینان و گۆت: ” ئەم یێ خەمەکا زێدە دخۆین بۆ تەمام کرنا پڕۆژێ رێیا سەرەکیا ھەولێر – دھۆک نوکە کار یێ بەردەوامە تێدا، بەری نوکە ل سنوورێ دھۆکێ زووتر دەستپێکر و کارێ کۆنکریتی یێ بەر ب دوماھیێ دچیت”.

ناڤھاتی ئاماژە دا وێ چەندێ کو چەند رۆژەکە ل سنوورێ پارێزگەھا ھەولێرێ ژی دەست ب پڕۆژێ رێکێ ھاتیەکرن ھەر ل سەنتەرێ باژێڕی ھەتا دگەھیتە پرا گۆپالە و کۆمپانیا پڕۆژە بۆ کەفتی یا کارێ خوە دکەت رۆژانە، بێگومان ژڤانەک بۆ تەمام کرنا رێیا سەرەکیا ھەولێر – دھۆک ھاتیە دیارکرن، بەلێ کۆمپانیێ سۆزدایە زووتر تەمام بکەن و ئەڤ سالە دێ قووناغێن سەرەکی ھێنە بڕین.

ئەڤرۆنیوز، عەلی حاجی:
ئەندامەکێ لژنا تایبەت یا دەرمانان ل زاخۆ بۆ ئەڤرۆ نیوز ئاشکرا کر، د بەردەوامیا دووڤچوونێن وان دا ل سەر کلینیک و دەرمانخانان، وان دەست ب سەر چەندین دەرمانێن دەم ب سەرڤەچوویی دا گرت و دو کلینیک و دەمانخانەک ژی ھاتنە داخستن.
خەلات نوونەرێ قایمقامیا زاخۆ زێدەتر گۆت: “د بەردەوامیا دووڤچوونێن مە دا ل رۆژا ١٩/٥/٢٠١٩ مە دو کلینیکێن ھاریکارێن نۆشداری بۆ ماوێ حەفتیەکێ داخستن، ژ بەرکو وان کلینیکا پێگری ب رێنمایێن جڤاتا وەزیران نەدکرن و زێدەتر ژ وی رادێ بۆ ھاتیە دیارکرن ب فرۆتنا دەرمانان رادبوون و ئەڤ چەندە ژی بەروڤاژی رێنمایانە، دیسا ئەم شیاین دەست ب سەر چەندین دەرمانێن دەم ب سەرڤەچووی دا بگرین کو د ناڤ دەرمانخانەکێ دا بوون و ئەو دەرمانخانە ب کوژمەکێ پارەیی ژی ھاتە سزادان و بۆ ماوێ سێ رۆژان ژی ھاتە دائێخستن”.
ناڤھاتی زێدەتر گۆت: “لژنا تایبەت یا دووڤچوونا دەرمانخانە و کلینیکێن نۆشداری ل دووڤ بڕیارێن جڤاتا وەزیران بێ دیارکرنا ژڤانی سەرەدانا دەرمانخانە و کلینیکێن د ناڤ باژێرێ زاخۆ دا دکەت و ئەم شیاینە چەندین کلینکێن ھاریکارێن نۆشداری و دەرمانخانان سزا بدەین و دائێخین ژ ئەگەرێ پێگری نەکرنا وان ب رێنمایێن جڤاتا وەزیران.