ئه‌ڤرۆ:

سه‌رۆك مه‌سعود بارزانی پێشوازی ل مارتین یێگه‌ر بالیۆزێ ئه‌لمانیا ل ئیراقێ كر و دكۆمبوونه‌كێ باسێ دووماهی بزاڤێن دهێنه‌ كرن بۆ ب دووماهی ئینانا قه‌یرانا سیاسی ل ئیراقێ هاته‌ كرن و سه‌رۆك بارزانی ئاماژه‌ ب تێكگه‌هشتنا د ناڤبه‌را ئالیێن كوردی و سوننی و چارچۆڤه‌یێ هه‌ماهه‌نگیێ كر كو ل سه‌ر بنه‌مایێ دستووری هاتیه‌ كرن.

بالیۆزێ ئه‌لمانیا، هێرشێن هێزێن ئیرانی بۆ سه‌ر هه‌رێما كوردستانێ شه‌رمزاركرن و دیاركر كو وه‌لاتێ وی ب گرنگی سه‌حدكه‌ته‌ په‌یوه‌ندیێن خوه‌ ل گه‌ل هه‌رێما كوردستانێ و خواست ئه‌و په‌یوه‌ندیه‌ به‌ر ب پێشڤه‌ بچن بتایبه‌ت د بوارێ بازرگانیدا.

هه‌روه‌سا دوهی ئێكشه‌مبی سه‌رۆك بارزانی پێشوازی ل عه‌لی ره‌زا گۆنه‌ی، بالیۆزێ توركیا ل ئیراقێ كر و هه‌ردو ئالیان دووماهی بزاڤێن پێكئینانا حوكمه‌تا نوو یا ئیراقێ و په‌یوه‌ندیێن د ناڤبه‌را هه‌رێما كوردستانێ و توركیا باسكرن و دووپاتی ل سه‌ر پێشڤه‌برنا په‌یوه‌ندیان د بوارێ ئابووری و بازرگانی دا هاته‌ كرن.

ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، داخواز دكه‌ت پرسا سه‌رۆك كۆمارا ئیراقێ ل دناڤ په‌رله‌مانێ كوردستانێ بهێته‌ ئێكلاكرن و به‌ربژارێ هه‌ڤپشك یێ كوردان بۆ وی پۆستی دناڤ په‌رله‌مانێ كوردستانێ دا بهێته‌ دیاركرن.

دوهی شه‌مبیێ 8 چریا ئێكێ 2022، مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریكرنێ د دیدارا (پرسا كوردی ل رۆژهه‌لاتا ناڤین) د به‌رسڤا پرسیارا چه‌ند پشكداربوویان دا ل دۆر چاره‌سه‌ركرنا كێشه‌یا پۆستێ سه‌رۆك كۆمارا ئیراقێ، راگه‌هاند” هیچ خاله‌كا دستووری و قانوونی نینه‌ كو پۆستێ سه‌رۆك وه‌زیران بۆ شیعان بیت و پۆستێ سه‌رۆك كۆماری بۆ كوردان بیت یان پۆستێ سه‌رۆكێ جڤاتا نوونه‌ران بۆ سوونه‌یان بیت، به‌لێ وه‌كو نه‌ریته‌كی لێهاتیه‌ و تاكو نوكه‌ ژی دهێته‌ په‌یڕه‌وكرن، به‌لێ چاوا ئه‌و نه‌ریته‌ هاتیه‌؟ زورینه‌یا شیعی سه‌رۆكێ وه‌زیران به‌ربژار دكه‌ت و پاشی ل جڤاتا نوونه‌ران باوه‌ری پێ دهێته‌ دان، زورینه‌یا سوننی ژی سه‌رۆكێ جڤاتا نوونه‌ران ده‌تنیشان دكه‌ت. ل ڤێرێ داخوازی ئه‌وه‌  كو پێدڤیه‌ زورینه‌یا كورد به‌ربژارێ خوه‌ بۆ پۆستێ سه‌رۆك كۆماری ده‌ستنیشان بكه‌ت”.

مه‌سرور بارزانی گوت ژی” ل سێ خولێن ئێكێ یێن جڤاتا نوونه‌رێن ئیراقێ كوردان ب ئێكڕێز و ئێكگرتی پشته‌ڤانی ل به‌ربژاره‌كی بۆ پۆستێ سه‌رۆك كۆمارێ دكر، به‌لێ د خولا پێشتر مخابن ئه‌و نه‌ریته‌ هاته‌ شكاندن، ئانكو سه‌رۆك كۆمارا ئیراقێ كو پێدڤی بوو ژئالیێ زۆرینه‌یا كوردی بهێته‌ هه‌لبژارتن نه‌هاته‌ په‌یڕه‌وكرن، به‌روڤاژی ل جڤاتا نوونه‌ران بێی كوردان زۆرینه‌یا شیعی هه‌لبژارتن كر و سه‌رۆك كۆماره‌ك ده‌ستنیشانكر” .

مه‌سرور بارزانی ب پێدڤی زانی ڕێز ل ئه‌نجامێن هه‌لبژارتنان بهێته‌ گرتن و گوت” ئالیێ سه‌ركه‌فتی د هه‌لبژارتنێن ئیراقێ دا ل هه‌رێما كوردستانێ مافێ زێده‌تر یێ هه‌ی كو به‌ربژارێ سه‌رۆكێ كۆمارێ پێشنیاز بكه‌ت، به‌لێ بۆ وێ چه‌ندێ ئه‌م بهێین و بزڤرین سه‌ر هه‌مان نه‌ریتێ كه‌ڤن، ئه‌و مه‌ داخوازكریه‌ كو زۆرینه‌یا خه‌لكێ كوردستانێ به‌ربژارێ سه‌رۆكێ كۆماری ده‌ستنیشان بكه‌ن و ئه‌و كه‌سه‌ ببیته‌ به‌ربژاری هه‌موو خه‌لكێ كوردستانێ و ل جڤاتا نوونه‌رێن ئیراقێ ده‌نگ پێ بهێته‌ دان، ئه‌و جهه‌ ژی په‌رله‌مانێ كوردستانێ یه‌ كو نوونه‌رایه‌یتا هه‌موو خه‌لكێ كوردستانێ دكه‌ت”.

مه‌سرور بارزانی گوت ژی” هه‌موو ده‌مه‌كی گه‌لێ كورد ڕێز ل بڕیارێن ئالیێن شیعی و سوننی ل دۆر دیاركرنا به‌ربژارێن خوه‌ بۆ پۆستێن سه‌رۆك وه‌زیران و سه‌رۆكێ جڤاتا نوونه‌رێن ئیراقێ گرتیه‌، له‌وما د ده‌مه‌كیدا په‌رله‌مانێ كوردستانێ ژی تاكه‌ به‌ربژارێ كورد بۆ پۆستێ سه‌رۆك كۆمارا ئیراقێ دیاردكه‌ت، پێدڤیه‌ حزب و ئالیێن سیاسی یێن ئیراقی ڕێزێ ل بڕیارا په‌رله‌مانێ كوردستانێ بگرن”.

مه‌سرور بارزانی، سه‌رۆكێ حوكمه‌تا هه‌رێما كوردستانێ د چارچۆڤێ پشكداریا خوه‌ دا ل وێ دیداری، د په‌یڤه‌كێ دا گوت” ب درێژیا دیرۆكێ سته‌مه‌كا مه‌زن ل كوردان وه‌كو نه‌ته‌وه‌، ل نه‌ته‌وه‌ و ئایینێن جودا وه‌كو پێكهاته‌یێن ره‌سه‌ن یێن ڤێ ده‌ڤه‌رێ، هه‌روه‌سا ل ئاخا كوردستانێ وه‌كو نیشتمان هاتیه‌ كرن، ئه‌و سته‌مه‌ ب ده‌هان سالان، به‌لكو ل سه‌د سالێن بۆری و هه‌تا نوكه‌ ژی یا به‌رده‌وامه‌، مخابن ل شوینا وێ چه‌ندێ هزر د چاره‌سه‌ریا بنه‌ره‌تی دا بهێته‌ كرن، گه‌له‌ك جاران مژوولی وێ چه‌ندێنه‌ هێجه‌تان ببینن، بۆ وێ ئێكێ ئه‌ڤ كێشه‌یه‌ وه‌كو پێدڤی نه‌هێته‌ چاره‌سه‌ركرن، كێشه‌یا كوردی ل رۆژهه‌لاتا ناڤین ئه‌ڤرۆ كێشه‌یه‌كا جیهانیه‌، پێدڤیه‌ ئه‌م هه‌موو بزاڤا وێ چه‌ندێ بكه‌ین وان گرفت و شاشیان دیاربكه‌ین كو د دیرۆكێدا دژی ڤێ ده‌ڤه‌رێ و مه‌ هاتیه‌ كرن، بۆ وێ چه‌ندێ ڕێچاره‌یه‌كا گونجای بۆ ببینین، ل سالێن بۆری ئه‌و وه‌لاتێن كو كێشه‌ ل گه‌ل كوردان وه‌كو نه‌ته‌وه‌ هه‌بوو نه‌هێلایه‌ كورد هه‌تاكو باسێ كێشه‌یا خوه‌ ژی بكه‌ن، هه‌ر پێشنیازه‌كا به‌رچاڤكربیت بۆ چاره‌سه‌ریێ، پاشی كورد هاتیه‌ تاوانباركرن ب جوداخوازیێ یان كێشه‌ و ئاژاوێ دروست دكه‌ت، ئه‌م وه‌كو هه‌ر نه‌ته‌وه‌یه‌كی مه‌ مافێ وێ چه‌ندێ یێ هه‌ی كو ب دیتنا مه‌ چاوان سه‌قامگیریا ده‌ڤه‌رێ ده‌سته‌به‌ر دبیت و چاوان ئه‌م دشێین فاكته‌ره‌كێ ئاڤاكه‌ر بین، هه‌روه‌سا مه‌ ب خوه‌ مافێ وێ چه‌ندێ هه‌بیت باسێ بیر و بۆچوونێن خوه‌ بكه‌ین ل پلاتفۆرمێن نێڤده‌وله‌تی، ل ڤی ده‌مێ كو ڕێ ب كوردان هاتیه‌ دان ده‌نگێ خوه‌ بگه‌هینیته‌ جیهانێ، یێن شیاین د گه‌له‌ك بواران دا ئه‌و شرۆڤه‌كرنا شاش سه‌باره‌ت نه‌ته‌وا كوردی و خه‌لكێ كوردستانێ هاتیه‌ كرن ڤه‌ره‌ڤینیت، جیهان دیده‌ڤانێ وێ چه‌ندێ یه‌ ئه‌م  دشێین فاكته‌ره‌كێ ئاڤاكه‌ر بین، هه‌ر ژ سه‌رده‌مێ بارزانیێ نه‌مر وتاكو سه‌رۆك بارزانی به‌رده‌وام داكۆكی ل وێ چه‌ندێ كریه‌ نابیت كێشه‌یا كوردی ل گه‌ل حوكمه‌تان وه‌سا بهێته‌ شرۆڤه‌كرن كو ببیته‌ كێشه‌یا نه‌ته‌وان، مه‌ به‌رده‌وام ڕێز ل هه‌موو نه‌ته‌وان گرتیه‌ و ل سه‌ر وی پرنسیپی دێ د به‌رده‌وام بین، كێشه‌یا مه‌ ل گه‌ل نه‌ته‌وان نینه‌ كو دگه‌لدا دژین، به‌لكو كێشه‌ ل گه‌ل هنده‌ك ده‌ستهه‌لاتدار و حوكمه‌تان بوو، كوم خابن ل شوونا هزر د حوكمڕانیه‌كا یه‌كسان و دادپه‌وه‌رانه‌ دا بكه‌ن هزر د چه‌وساندنا نه‌ته‌وه‌یه‌كێ سته‌م دیتی كریه‌، به‌لێ مه‌ نه‌هێلایه‌ ئه‌و ببیته‌ كێشه‌یا د ناڤبه‌را نه‌ته‌وه‌یان دا، هه‌ر ده‌مه‌كی ژی پێدڤی بیت هه‌ر نه‌ته‌وه‌ و پێكهاته‌یه‌كی پێدڤی ب كوردستانێ هه‌بیت، كوردستانێ ده‌رگه‌هێن خوه‌ یێن ڤه‌كرین و حه‌واندین” .

سه‌رۆكێ حوكمه‌تا هه‌رێما كوردستانێ، دیاركر” پشتی په‌یدابوونا شه‌ڕێ داعشێ، زێده‌تر ژ دو ملیۆن كه‌سان ژ ده‌ڤه‌رێن دی یێن ئیراقێ و سووریێ و وه‌لاتێن هه‌ڤسنوور به‌ر ب هه‌رێما كوردستانێ هاتن، هه‌رێمێ ده‌رگه‌هێ خوه‌ بۆ ڤه‌كر، كو هه‌تا نوكه‌ ژی ب شانازی ڤه‌ دبێژین كوردستان بوویه‌ په‌ناگه‌هه‌ك بۆ ئه‌وێن ژ ده‌ستێ تاوانێ و تیرۆرێ د رٍه‌ڤن وكوردستانێ ب جهه‌كێ پاراستی دزانن و به‌ر ب وێ دهێن، ئه‌م منه‌تێ ل كه‌سێ ناكه‌ین، به‌لێ ئه‌ڤه‌ كه‌لتوره‌كه‌ ل گه‌ل مه‌یه‌ و ئه‌و پره‌نسیپه‌ن یێن مه‌ باوه‌ری پێ هه‌ی”.

مه‌سرور بارزانی د پشكه‌كا په‌یڤا خوه‌ دا به‌رچاڤكر” چاره‌سه‌ركرنا كێشه‌یا كوردی دێ بیته‌ چاره‌سه‌ریا كێشه‌یا رۆژهه‌لاتا ناڤین ب گشتی، دخوازم باسێ نموونه‌یا ئیراقێ بكه‌م، هه‌كه‌ سه‌حكه‌ینه‌ روودانێن 100 سالێن بۆری بكه‌ین پشتی دامه‌زراندنا ده‌وله‌تا ئیراقێ هه‌تا نوكه‌ ئایا ئیراقێ وه‌كو پێدڤی سه‌قامگیری بخوه‌ڤه‌ دیتیه‌؟ پێشكه‌فتیه‌؟ شیایه‌ ب یه‌كسانی خزمه‌تا هه‌موو خه‌لكی بكه‌ت؟ بێگومان نه‌خێر، ئێك ژ هوكارێن هه‌ره‌ سه‌ره‌كی یێن هه‌موو وان نه‌هامه‌تیێن ل ڤی وه‌لاتی رووداین ئه‌وه‌ كێشه‌یا كوردی نه‌هاتیه‌ چاره‌سه‌ركرن”.

گوت ژی” كورد وه‌كو نه‌ته‌وه‌ ڕێز لێ نه‌هاتیه‌ گرتن، به‌لێ ل كوردستانێ ڕێز ل مافێن مرۆڤی و نه‌ته‌وه‌ و پێكهاته‌یێن جودا دهێته‌ گرتن، پێكڤه‌ژیان بوویه‌ پێناسه‌كا دیار یا هه‌رێما كوردستانێ، هه‌كه‌ ده‌لیڤه‌كا وه‌سا ب مه‌ هاتبا دان كاربكه‌ین، ڕێز ل مه‌ هاتبا گرتن، دانپێدان ب مافێن مه‌ هاتبا كرن، بێگومان دا شێین پێشكه‌فتنه‌كا گه‌له‌ك زێده‌تر نه‌كو بۆ خوه‌، به‌لكو بۆ هه‌موو ده‌ڤه‌رێ ژی بده‌ستڤه‌ئینین”.

ئه‌ڤرۆ، سالار محه‌مه‌د دۆسكی:

شیره‌تكارێ مه‌كته‌با سیاسی یا پارتی دیموكراتی كوردستان، راگه‌هاند، دڤێت پارتی بۆ قۆناغا داهاتی بهێز و شیانێن مه‌زنتر د مه‌یدانا خه‌باتا كوردایه‌تیێ دا  رۆلێ پیشه‌نگێ خوه‌ بگێریت، خویاكر كو پێشكه‌فتن و هاتنا گه‌نج و ئافره‌تان بۆ پێشڤه‌ خه‌سله‌ته‌كا دێرینا پارتی یه‌.

عارف روشدی، شیره‌تكارێ مه‌كته‌با سیاسی یا پارتی دیموكراتی كوردستان بۆ رۆژناما (ئه‌ڤرۆ) گۆت”  كۆنگره‌  هه‌ر وه‌ك د پشكا حه‌فتێ  و مادێ شازدێ  ژ په‌یره‌وێ ناڤخوه‌یێ پارتی دا هاتیه‌ (بلندترین ده‌سته‌هه‌لاتا حزبی یه‌) هه‌ر چار سالان جاره‌كێ دڤێت بهێته‌ سازكرن، كۆنگره‌ ده‌ستهه‌لاتا هه‌موو گوهۆرینان یا هه‌ی ل سه‌ر ئاستێ (رێكخراوه‌یی، هزری، سیاسی) به‌لكو ئه‌م دشێین بێژین وه‌ك دادگه‌هه‌كێ یه‌ بۆ پێداچوون و هه‌لسه‌نگاندنا چاوانیا بجهئینانا كاروبار و ئه‌ركێن حزبی دناڤبه‌را  كۆنگره‌یاندا، بریاردان ل سه‌ر دارشتنا په‌یره‌و و پرۆگرامێ كارێ داهاتی و هه‌ر گوهۆرینه‌كا دی یا پێدڤی بیت داكو حزب ب هه‌ڤسه‌نگی ل گه‌ل كاودانێن نوو یێن سیاسی، ئیداری، جڤاكی خوه‌ ب گونجینیت و ب ره‌نگه‌گێ سه‌رده‌میانه‌ سه‌رده‌ریێ بكه‌ت”.

شیره‌تكارێ مه‌كته‌با سیاسی یا پارتی دیموكراتی كوردستان گوت ژی” جوداهیا كۆنگره‌یێ 14ێ ل گه‌ل كۆنگره‌یێ 13ێ ئه‌وه‌ یێ یێ 14 د ده‌مه‌كی دایه‌ گه‌له‌ك ئالنگاریێت چونایه‌تی هه‌نه‌ ل سه‌ر ئاستێ ناڤخوه‌یێ كوردستانێ، یان ل سه‌ر ئاستێ ئیراقێ و سیاسه‌تا هه‌رێمی و نیڤ ده‌وله‌تی به‌رامبه‌ر دوزا ملله‌تێ مه‌ وسه‌روه‌ریا قه‌وارێ هه‌رێما كوردستانێ، پارتی وه‌كو هێزا سه‌ره‌كی یا حوكمڕان ل هه‌رێما كوردستانێ و خودان كاریگه‌ری ل سه‌ر دوزا نه‌ته‌وی ب شێوه‌كێ گشتی دڤێ كۆنگره‌یدا دێ بهێزه‌كا دی به‌رامبه‌ر چه‌وایه‌تییا چاره‌سه‌ركرنا ده‌رهاوشتێت ڤان ئالنگاریا نێرینێت خودا  دارێژیت،  گه‌له‌ك یا گرنگه‌ ب بابه‌تیانه‌ دڤی بیاڤێ هه‌ستیاردا ئه‌و گاڤێن هه‌تا نوكه‌ هاتینه‌ هاڤێتن دوی واریدا بهێنه‌ هه‌لسه‌نگاندن”.

ل دور بڕێڤه‌چوونا كۆنگره‌یێ 14ێ یێ پارتی ل دهۆكێ، عارف روشدی گوت” هه‌تا نوكه‌ پارتی دیموكراتی كوردستان كۆنگره‌ ل هه‌موو پارێزگه‌هێن هه‌رێما كوردستانێ و به‌غدا ژی یێن گرێداین، دهۆك وه‌كو بنه‌ستره‌كی دیار د پشته‌ڤانیا جه‌ماوه‌ری دا نه‌هێته‌ بێ باركرن ژڤێ هه‌لكه‌فتا سیاسی پارتی بریاردایه‌ كۆنگره‌ ل ئێك ژ هولێن باژێرێ دهۆكێ بهێته‌ برێڤه‌برن، هه‌روه‌سا رێز و پێزانینه‌كه‌ بۆ خه‌لكێ دهۆكێ و ده‌ڤه‌را به‌هدینان به‌رامبه‌ر وێ قوربانیدانا به‌رده‌وام د درێژاهیا بزاڤا رزگاری خوازیا خه‌لكێ كوردستانێ دا”.

شیره‌تكارێ مه‌كته‌با سیاسی یا پارتی دیموكراتی كوردستان ئاماژه‌كر ژی” پێشكه‌فتن و هاتنا گه‌نج و ئافره‌تان بۆ پێشڤه‌ دناڤ پارتیدا خه‌سله‌ته‌كا دێرین یا پارتی یه‌، چونكه‌ پارتی دوێ باوه‌ریێ دایه‌ نووبوونه‌ڤه‌ د هه‌موو ده‌راڤێن ژیانێ دا (خواسته‌كا خوزاییه‌) له‌وما پێدڤیه‌ به‌رده‌وام لێكتێگه‌هشتن دناڤبه‌را خه‌باتكه‌رێن نفشێ دێرین و خودان سه‌ربور و نفشێ ژ نوو پێگه‌هشتی ژ هه‌ر دو ره‌گه‌زێن نێر و مێدا ب ڕه‌نگه‌كێ ئه‌رێنی دروست ببیت”.

ل دووماهیێ شیره‌تكارێ مه‌كته‌با سیاسی یا پارتی دیموكراتی كوردستان دبێژیت” هیڤیا من ئه‌وه‌ خه‌باتكه‌رێن پارتی ل سنورێ هه‌موو لق و مه‌كته‌ب و ده‌زگه‌هان ب هه‌سته‌كێ به‌رپرسیارانه‌ پشكداربن دپرۆسا هه‌لبژارتنا نوونه‌رێن خوه‌ بۆ كۆنگره‌یێ 14ێ  بۆ وێ چه‌ندێ بشێن پشكدارێن ئه‌رێنی بن د نه‌خشه‌دانانا سیاسه‌تا حزبا خوه‌ بۆ قوناغا داهاتی و دڤێـت بزانین قۆناغه‌كا هه‌ستیاره‌ و پێدڤیه‌ پارتی بهێز و شیانه‌كا مه‌زنتر د مه‌یدانا خه‌باتا كوردایه‌تیێ دا  رۆلێ پیشه‌نگێ خوه‌ بگێریت”.

ئه‌ڤرۆ:

به‌رپرسێ لژنا ناوچا قه‌ره‌ته‌به‌ یا پارتی دیموكراتی كوردستان راگه‌هاند، هه‌ژماره‌كا گوندێن كوردان ل سنوورێ ناحیا قه‌ره‌ته‌به‌ ژ ئه‌گه‌رێ ره‌وشا ئه‌منی یا خراب یێن هاتینه‌ چۆلكرن و ئاكنجیێن وان گوندان یێن به‌ر ب باژێران چووین.

كه‌مال ئیبراهیم، به‌رپرسێ لژنا ناوچا قه‌ره‌ته‌به‌ یا پارتی گوت” ده‌مێ هێزا پێشمه‌رگێن كوردستانێ ل سنوورێ ڤێ ناحیێ هه‌ی، مالێن كوردان د ته‌ناهیێ دا بوون و دپاراستی بوون، به‌لێ نوكه‌ هێزێن ئیراقی تنێ مالێن توركمان و ئه‌ره‌بان دپارێزن، گوندێن كوردان چ ژ روویێ خزمه‌تگوزاری ڤه‌، چ ژ روویێ ته‌ناهیێ ڤه‌ د پشت گوه هاڤێتینه‌”.

ناڤبری ئه‌وژی به‌رچاڤكر” ل باژێركێ جه‌باره‌ چار گوندێن كوردان ب ناڤێن (گلابات ئێك، گلابات دو، گلابات سێ و عێن شوكر) ب تمامی یێن هاتینه‌ چۆلكرن، ئه‌وژی ژ ئه‌گه‌رێ نه‌بوونا ته‌ناهیێ و خزمه‌تگوزاریان، هه‌روه‌سا ل ناحیا قه‌ره‌ته‌به‌ چه‌كدارێن داعشێ رۆژانه‌ لڤینان دكه‌ن و یێن بووینه‌ مه‌ترسی ل سه‌ر ژیانا وه‌لاتیان، له‌وما ب نه‌چاری گوندێن خوه‌ چۆل دكه‌ن”.

به‌رپرسێ لژنا ناوچا پارتی ل قه‌ره‌ته‌به‌ ب پێدڤی دزانیت هێزا پێشمه‌رگه‌ی بۆ پاراستنا مالێن وه‌لاتیان بزڤرنه‌ ده‌ڤه‌رێ و دبێژیت” هێزێن ئیراقی نه‌شیاینه‌ ته‌ناهیێ بۆ خه‌لكی دابین بكه‌ن، به‌ری حه‌فتیه‌كێ ژی گه‌نجه‌كێ كورد ل گوندێ نارین هاته‌ ره‌ڤاندن و هه‌تا نوكه‌ هێزێن ئیراقی هیچ تشته‌ك بۆ رزگاركرنا وی نه‌كریه‌”.

ئه‌ڤرۆ:

په‌یڤدارا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ باسێ ره‌وشا نوكه‌ یا ئیراقێ دكه‌ت و ئاماژێ ب وێ چه‌ندێ دكه‌ت كو نابیت ئه‌ڤ ره‌وشه‌ به‌رده‌وام بیت.

ڤیان ده‌خیل، په‌یڤدارا فراكسیۆنا پارتی دیموكراتی كوردستان گوت” ئه‌م وه‌كو پارتی دیموكراتی كوردستان ل گه‌ل وێ چه‌ندێ نه‌ رێیا دستووری و قانوونی بهێته‌ بكارئینان و مه‌ چو گرفت ل دۆر ئه‌نجامدانا هه‌لبژارتنێن پێشوه‌خت یێن جڤاتا نوونه‌رێن ئیراقێ نینن و پێدڤیه‌ هه‌لبژارتن ل سه‌ر بنه‌مایێ دستووری و قانوونێ بهێنه‌ ئه‌نجامدان و نابیت دانوستاندنێن ئالیێن ئیراقێ ب رێیا تویته‌ری و پۆستێن فه‌یسبووكی بهێنه‌ كرن، به‌لكو پێدڤیه‌ روونشتن و دانوستاندن كرن و رێككه‌فتنه‌ك هه‌بیت ل دۆر وێ چه‌ندێ كو دێ به‌ر ب هه‌لبژارتنان ڤه‌ چین وئه‌نجامێن وێ دێ د قبوولكری بن یان نه‌، هه‌روه‌سا پێدڤیه‌ ئه‌نجامێن هه‌لبژارتنان بهێنه‌ قبوولكرن و جڤاكێ نێڤده‌وله‌تی ژی د هه‌ڤكێشێ دا بیت نه‌كو جیهان پشتا خوه‌ بده‌ته‌ ئیراقێ و تو ژی هزر بكه‌ی شه‌رعیه‌ت ئه‌وا یا ته‌ دڤێت”.

ڤیانێ به‌رچاڤكر ژی” هێشتا یا دیار نینه‌ ره‌وتێ سه‌دری دێ پشكداریێ د كۆمبوونێن ئالیێن سیاسی دا كه‌ت یان نه‌ بۆ وێ ئێكێ ئه‌و بزڤرن بۆ دانوستاندنان، ئانكو دو رێ یێن هه‌ین یان ب فشارا ده‌ره‌كی یان ناڤخوه‌یی بهێنه‌ قایلكرن بۆ به‌رهه‌ڤبوونێ ل كۆمبوونان، هه‌روه‌سا ره‌وتێ سه‌دری چه‌ند مه‌رجه‌ك یێن هه‌ین ژوان ژی هه‌لوه‌شاندنا جڤاتا نوونه‌ران كو هه‌تا نوكه‌ هیچ ئالیه‌ك دژی هه‌لوه‌شاندنا جڤاتا نوونه‌ران نه‌بوو، به‌لێ دڤێت ڤی بابه‌تی شرۆڤه‌كرنه‌كا قانوونی بۆ بهێته‌ دیتن كو زووتر دێ گه‌هنه‌ وێ ئارمانجێ”.

هه‌ڤده‌م دیاركر ژی” سه‌رۆك بارزانی ده‌ستپێشخه‌ریه‌ك هه‌بوو به‌لێ ئه‌و شه‌ڕێ به‌غدا هاته‌ روودان، هه‌روه‌سا ئه‌م ب خوه‌ ژی دزانین هه‌موو ده‌ستپێشخه‌ریێن ئیراقێ ژ هه‌ولێرێ ده‌ردكه‌ڤن، له‌وما ئه‌ڤ ده‌ستپێشخه‌ریا سه‌رۆكی بۆ ڤێ ره‌وشا ئیراقێ یا گرنگه‌ و هه‌كه‌ ده‌ستپێشخه‌ریه‌كا نوو ژ ئالیێ سه‌رۆك بارزانی ڤه‌ هه‌بیت دووباره‌ دێ ره‌وشێ هه‌موویێ گوهۆریت”.

په‌یڤدارا فراكسیۆنا پارتی دیموكراتی كوردستان ل جڤاتا نوونه‌رێن ئیراقێ ئه‌وژی گوت” هه‌كه‌ ب ڤی شێوه‌ی ئیراق بمینیت دێ مه‌ترسی دروست بیت، نابیت ره‌وش به‌رده‌وام بیت چونكه‌ دبیت وی ده‌می جڤاكێ نێڤده‌وله‌تی ده‌ستپێشخه‌ریێ بكه‌ت به‌لێ هه‌تا نوكه‌ ئه‌و چه‌نده‌ نه‌كریه‌، لێ هه‌كه‌ ره‌وش گه‌هشته‌ پێكدادانێ دبیت ئه‌و ده‌ستپێشخه‌ریێ بكه‌ن، به‌لێ كاریگه‌ری نابیت ل سه‌ر ره‌وشا ئیراقێ چونكه‌ ئه‌و پرسه‌كا ناڤخوه‌یی یه‌”.

ئه‌ڤرۆ:

سه‌رۆك مه‌سعود بارزانی، ب هه‌لكه‌فتا سالیادا 61 یا شۆره‌شا ئیلۆنێ په‌یامه‌ك به‌لاڤكر و راگه‌هاند: شۆره‌شا ئیلۆنێ شۆره‌شا ئیراده‌ و باوه‌رێ ب خوه‌بوونا مرۆڤێ كوردستانی بوو و بناغه‌یه‌كێ ب هێز و رێكخستی بۆ به‌رده‌وامیا خه‌باتا گه‌لێ كوردستانێ دژی زۆرداریێ دانا.

د په‌یاما سه‌رۆك بارزانی دا هاتیه‌” 61 سال ب سه‌ر شۆره‌شا ئیلۆنا مه‌زن ده‌رباز دبن. ل وێ شۆره‌شا سه‌رانسه‌ری یا گه‌لێ كوردستانێ هه‌موو ته‌خ و چینێن جڤاكی پشكداری د خه‌باتا نه‌ته‌وی و دیموكراسیخوازی یا گه‌لێ خوه‌ بوون و هه‌موو پێكهاته‌یێن نه‌ته‌وی و ئایینی یێن كوردستانێ ژی مل ب ملێ كوردان ب رێبه‌ریا بارزانیێ نه‌مر دژی سته‌م و داگیركاریێ خه‌بات كر. شۆره‌شا ئیلۆنێ شۆره‌شا ئیراده‌ و باوه‌ری ب خوه‌بوونا مرۆڤێ كوردستانێ بوو و بناغه‌كێ ب هێز و رێكخستی بۆ به‌رده‌وامیا خه‌باتا گه‌لێ كوردستانێ دژی زورداریێ دانا. شۆره‌شا ئیلۆنێ ب بهایێن خوه‌ یێن بلند و ب پێداگیری و خۆراگریا سه‌ركردایه‌تی و پێشمه‌رگه‌ و جه‌ماوه‌ری وه‌كر دۆزا ره‌وا یا گه‌لێ كوردستانێ گاڤێن گه‌له‌ك مه‌زن به‌ر ب پێشڤه‌ بهاڤێژیت وببیته‌ ژێده‌رێ هێزێ بۆ قۆناغێن دی یێن خه‌باتا گه‌لێ كوردستانێ و هه‌روه‌سا ژێده‌رێ ئیلهامێ بۆ خه‌باتكه‌ران ل هه‌موو پارچێن دی یێن كوردستانێ”.

سه‌رۆك بارزانی گوت ژی” ل 61 سالیادا شۆره‌شا ئیلۆنێ دا من پێزانین بۆ رۆل و وه‌ستیانا دایك و ژنان و هه‌موو وان پێشمه‌رگه‌ و خه‌باتكه‌ر و قه‌هره‌مانان هه‌یه‌ كو رۆل د وێ شانازیا نیشتمانیدا هه‌بوو، چ ئه‌و قه‌هره‌مانێن د شۆره‌شا ئیلۆنێ دا شه‌هید بووین یان د ژیانێ دا نه‌ماین و چ ئه‌و رۆلێن سه‌ربلند یێن پشكداری شۆره‌شێ بووین و هێشتا د ژیانێ دا ماین، وان قه‌هره‌مانان دیرۆك بۆ گه‌لێ خوه‌ دروست كر و جهێ شانازیێ و سه‌ربلندیێ نه‌ بۆ هه‌موویان”.

ئه‌ڤرۆ:

دوهی شه‌مبیێ 10/9/2022 ، ب به‌رهه‌ڤبوونا مه‌سرور بارزانی، سه‌رۆكێ حوكمه‌تا هه‌رێما كوردستانێ، ئاهه‌نگا ده‌رچوونا قوتابیێن خولا 17 یا زانكۆیا هه‌ولێر یا نوژداری ب رێڤه‌چوو، كو تێدا باوه‌رناما ده‌رچوونێ ب 692 قوتابیان هاته‌ به‌خشین.

سه‌رۆكێ حوكمه‌تا هه‌رێما كوردستانێ د چارچۆڤێ پشكداریكرنێ د ئاهه‌نگا ده‌رچوونا قوتابیێن زانكۆیا هه‌ولێر یا نوشداری په‌یڤه‌ك پێشكێشكر و ب قوتابیان گوت” هوون كو دێ بنه‌ نوشدار هیڤیدارم و یێ پشت راستم كو دێ هوون ل ئاستێ كارێ خوه‌ و سویندخوارنا بن، نوشداری كار و ئه‌ركه‌كێ گه‌له‌ك پیرۆز و مرۆڤانه‌یه‌، كو پێدڤیه‌ به‌ری هه‌ر تشته‌كی ئه‌نجاما وی رزگاركرنا ژیانا خه‌لكی و پاراستنا ساخله‌میا وان بیت ،ل گه‌ل ده‌رچوونا هه‌وه‌ ژ زانكۆیێ قۆناغه‌ك ژ قۆناغێن ژیانا هه‌وه‌ ب دووماهی دهێت، به‌لێ فێربوون ب دووماهی ناهێت، چونكه‌ فێربوون پرۆسه‌كا به‌رده‌وامه‌”.

سه‌باره‌ت ب بلندكرنا كوالیتیا زانكۆیێ هه‌رێما كوردستانێ، مه‌سرور بارزانی، سه‌رۆكێ حوكمه‌تا هه‌رێما كوردستانێ راگه‌هاند” د ده‌مێ بۆری دا حوكمه‌تا هه‌رێما كوردستانێ ژ پێخه‌مه‌ت پێشڤه‌برنا ئاستێ زانستی و ئه‌كادیمی و زانكۆ و ده‌زگه‌هێن مه‌ یێن په‌روه‌رده‌یی، ده‌سته‌یا باوه‌ری به‌خشینێ ب ده‌زگه‌هان و پرۆگرامێن په‌روه‌ردێ و خواندنا بلند په‌سه‌ندكر، ئارمانجا ڤێ ده‌سته‌یێ بلندكرنا كوالیتیا خواندنێ و په‌روه‌ردێ یه‌ ل هه‌رێما كوردستانێ، د ده‌مێ سالێن بۆری دا دیده‌ڤانێن وێ چه‌ندێینه‌، كو ئاستێ زانكۆیێن مه‌ یێ بلند بووی، به‌لێ بۆ وێ چه‌ندێ بشێین هه‌ڤڕكیێ ل گه‌ل زانكۆیێن جیهانێ بكه‌ین، مه‌ ب پێدڤی زانی وێ ده‌سته‌یێ دابمه‌زرینین، بۆ وێ چه‌ندێ پله‌یێن زانكۆیێن مه‌ ل سه‌ر ئاستێ جیهانێ بلند ببن و ئاستێ خواندنێ ل هه‌رێما كوردستانێ بلند بكه‌ین”.

سه‌رۆكێ حوكمه‌تا هه‌رێما كوردستانێ، گوت ژی” دزانم كو بوارێ ساخله‌می ل هه‌رێما كوردستانێ كێشه‌ و گرفت یێن هه‌ین، له‌وما ئێك ژ ئالیێن گرن گیێن چاكسازیێن كابینا نه‌هێ یا حوكمه‌تا هه‌رێما كوردستانێ، چاكسازیكرنه‌ د بوارێ ساخله‌میێ دا و باشتركرنا كوالیتیا نه‌خوه‌شخانان و چاكسازیكرنه‌ د ئینان و پشكنینا ده‌رمانان دا”.

مه‌سرور بارزانی، راگه‌هاند ژی” من هیڤیه‌كا مه‌زن ب گه‌نجێن ده‌رچوویێن كوردستانێ یا هه‌ی، كو دشێن رۆله‌كێ كاریگه‌ر د پرۆسا گۆرانكاریێ و چاكسازیێ و به‌ر ب پێشڤه‌برنا هه‌رێما كوردستانێ دا ببینن، د پشت راست بن دێ به‌رده‌وام بم د پشته‌ڤانیكرنا هه‌وه‌ دا، دێ پشته‌ڤانیێ ل پرۆژه‌ و هزرێن هه‌وه‌ یێن داهێنه‌ر كه‌م، یێ پشت راستم ژی هه‌وه‌ به‌هره‌یێن زۆر یێن هه‌ین بۆ پێشخستنا كوردستانێ و پرۆسا چاكسازیێ و وان گۆرانكاریێن كوم ه‌ ل هه‌رێما كوردستانێ ده‌ست پێكرین” .

ئه‌ڤرۆ:

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی ل حوكمه‌تا هه‌رێما كوردستانێ رۆهنكرنه‌ك به‌لاڤكر و تێدا راگه‌هاند، PKK نه‌شێت شه‌ڕێ هێزێن توركی بكه‌ت و به‌رده‌وام ده‌ڤه‌رێن سنووری یێن هه‌رێما كوردستانێ بۆ هێزێن توركی چۆل دكه‌ت و هێزێن توركی ب دووڤ خوه‌دا دئینن.

رۆهنكرنا سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی به‌رسڤا وان ده‌نگوباسانه‌ یێن راگه‌هاندنا ب سه‌ر PKK ڤه‌ دژی هێزا پێشمه‌رگه‌ی به‌لاڤ دكه‌ت.

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی، دبێژیت” ده‌مێ چه‌ند رۆژایه‌ جاره‌كادی راگه‌هاندنا سه‌ر ب PKK ڤه‌ ده‌ستدایه‌ هه‌وه‌كا چه‌واشه‌كاری دژی هێزا پێشمه‌رگێ كوردستانێ ووه‌سا به‌لاڤ دكه‌ نكو هێزا پێشمه‌رگێ كوردستانێ  ل چیایێن ئامێدیێ و زاب رێ بۆ له‌شكرێ توركی خوه‌ش كریه‌ بۆ شه‌ڕكرنێ ل به‌رامبه‌ر چه‌كدارێن PKK”.

د وێ رۆهنكرنێدا چه‌ند خاله‌ك هاتینه‌ به‌رچاڤكرن و تێدا هاتیه‌” ل وی ده‌مێ هه‌رێما كوردستانێ دروستبووی  PKK به‌رده‌وام  ژێده‌رێ گه‌فان بوو بۆ خه‌لكێ هه‌رێما كوردستانێ و ب نه‌حه‌قی رێگر بوو ل به‌رامبه‌ر ئاڤه‌دانكرنا ب سه‌دان گوندان”.

د پشكه‌كا دی یا رۆهنكرنێ دا، سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی باسێ ره‌فتارێن دی یێن PKK كریه‌ و تێدا هاتیه‌” PKK رێ ب خوه‌ دایه‌ ناڤونیشانێن ده‌ڤه‌ر و چیا و دۆلێن هه‌رێما كوردستانێ بگوهۆریت و ناڤێن سه‌یر بۆ وان ده‌ڤه‌ران دانیت”.

هه‌روه‌سا دیاركریه‌” چه‌كدارێن PKK د كریاره‌كا نه‌مرۆڤانه‌ و دژی ژینگه‌هێ رابووینه‌ ب مینرێژكرنا رێ و پر و دۆل و كانی و دارستانێن سروشتی یێن هه‌رێما كوردستانێ كو مه‌ترسیه‌كا مه‌زن بۆ خه‌لكێ ئاسایی و كاسبكار و خه‌لكێ گوندان دروست كریه‌. هه‌ر ژ ئه‌گه‌رێ هه‌بوونا نه‌قانوونی یا PKK ل سه‌ر ئاخا هه‌رێما كوردستانێ پشكه‌كا مه‌زن ژ خه‌لكێ ده‌ڤه‌رێن سنووری مۆلك و مالێ خوه‌ بجه هێلایه‌”.

سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی، د خاله‌كا دی یا رۆهنكرنا خوه‌ دا، سه‌رنج بۆ وێ چه‌ندێ ڕاكێشایه‌ كو چه‌كدارێن PKK هۆكارێ له‌شكركێشیا له‌شكرێ توركیایه‌ و دیاركر” PKK نه‌شێت شه‌ڕێ هێزێن توركی بكه‌ت و به‌رده‌وام ده‌ڤه‌رێن سنووری یێن هه‌رێما كوردستانێ بۆ هێزێن توركی چۆل دكه‌ت و هێزێن توركی ب دووڤ خوه‌ دا دئینن. هه‌كه‌  شه‌ڕه‌ك ژی د ناڤبه‌را هێزێن توركی و PKK دا هه‌بیت، پێدڤیه‌ مه‌یدانا شه‌ڕی ل ناڤخوه‌یا توركیا بیت”.

د رۆهنكرنێدا ئاماژه‌ ب وان وێنان هاتیه‌ كرن كو راگه‌هاندنا PKK به‌لاڤكرینه‌ و تێدا هاتیه‌” راگه‌هاندنا PKK ژ دوورڤه‌ وێنێن چه‌ند ترۆمبێلێن پێشمه‌رگێ كوردستانێ به‌لاڤ كرینه‌ و وه‌سا دایه‌ دیاركرن كو هێزا پێشمه‌رگێ كوردستانێ ڕێ بۆ هێزێن توركی خوه‌ش كریه‌، سه‌ره‌رای وێ چه‌ندێ دووپاتیێ دكه‌ین كو ئه‌و هیچ بنه‌مایه‌ك بۆ وێ چه‌ندێ نینه‌، رادگه‌هینین ژی كو مافێ هێزا پێشمه‌رگێ كوردستانێ یه‌ ل سه‌ر ئاخا خوه‌ ده‌ستهه‌لات و ئه‌ركێن خوه‌ بجه بینیت و ئاخ و خه‌لكێ كوردستانێ بپارێزیت”.

ل دووماهیا رۆهنكرنا خوه‌دا، سه‌رۆكایه‌تیا ئه‌ركانێن وه‌زاره‌تا پێشمه‌رگه‌ی پرسیاره‌ك ئاراسته‌ی PKK كریه‌ كو هێزێن PKK ب چ مافه‌كی ل سه‌ر ئاخا هه‌رێما كوردستانێ نه‌ و ده‌ستێ هێزێن توركی ژی ب دووڤ خوه‌ دا ڕادكێشن؟ بۆچی ناچنه‌ ناڤخوه‌یا توركیا و گه‌فان بۆ خه‌لكێ كوردستانێ دروست دكه‌ن؟

ئه‌ڤرۆ:

هه‌تا نوكه‌ ئالیێن سیاسی یێن كوردستانی نه‌گه‌هشتینه‌ رێككه‌فتنێ ل سه‌ر نڤیسینا دستوورێ هه‌رێما كوردستانێ كو پێدڤیه‌كا حوكمرانیێ یه‌ ل هه‌رێمێ، بسپۆرێن دستووری ژی دبێژن، دستوور دێ بیته‌ ئه‌گه‌رێ یه‌كخستن و ب هێزكرنا پێگه‌هێ هه‌رێما كوردستانێ.

د. نه‌جیبه‌ ئیبراهیم، بسپۆرا قانوونا دستووری بۆ رۆژناما (ئه‌ڤرۆ) گوت” هه‌بوونا دستووری و سه‌روه‌ریا دستووری بۆ ده‌وله‌ته‌كێ یان هه‌رێمه‌كێ كاكلكا سیسته‌مێ قانوونی یێ ده‌وله‌تێ یه‌، ژ به‌ر كو دستوور په‌یوه‌ندیێن د ناڤبه‌را ده‌وله‌تێ و وه‌لاتیان دا دیار دكه‌ت و د ناڤبه‌را ده‌وله‌تێ و سیسته‌مێ قانوونا نێڤده‌وله‌تی دیار دكه‌ت مه‌به‌ست ژێ ئه‌وه‌ رێنمایێن بنه‌ره‌تی یێن بلند كو شێوێ ده‌وله‌تێ و سیسته‌مێ حوكمرانیێ و رێیێن چاوانیا پێكئینانا ده‌ستهه‌لاتێن ده‌ستهه‌لاتداران دیار دكه‌ت هه‌روه‌سا ئه‌ڤ رێنمایه‌ روهنكرنێ دده‌ن ل سه‌ر چاوانیا چه‌سپاندنا ده‌ستهه‌لاتێ و چاوانیا بكارئینانا وێ زێده‌بارێ ورۆهنكرنێ ل سه‌ر تاكان و ئازادیێن وان”.

دیاركر ژی” دستوور وه‌كو قانوونا بنه‌ره‌تیه‌ و چارچۆڤێ سیاسی و جڤاكی و ئابووری ددانیت و تاكه‌ لایه‌نه‌ كو ده‌ستهه‌لاتان دیار دكه‌ت و پێدڤیه‌ ئه‌و ده‌ستهه‌لات رێزێ ل دستووری بگرن چونكه‌ ئه‌و پشته‌ڤانیا شه‌رعیه‌تا وان دكه‌ت”.

وێ بسپۆرا قانوونا دستووری خویاكر” دستوور دشێت رێكارێن حوكمرانیێ رێكبێخیت به‌لێ دڤێت نه‌هیچته‌ ڤه‌شارتن ئه‌م یێن ل هه‌رێمه‌كێ دژین كو ل ده‌ڤه‌را رۆژهه‌لاتا ناڤینه‌ كو دشێین بێژین زێده‌تر هێز رێكارێن حوكمرانیێ دكه‌ت”.

زێده‌تر دبێژیت” ئه‌و ب خوه‌ دستوور په‌یوه‌ندیێن نێڤده‌وله‌تی و هه‌رێمی رێك دئێخیت ژبه‌ر وێ چه‌ندێ دستووری سه‌روه‌ریا ره‌ها یا هه‌ی به‌لێ سه‌باره‌ت هه‌رێما كوردستانێ و ئیراق ژی دگه‌لدا یێن كه‌فتینه‌ دناڤ چارچۆڤه‌كێ هه‌رێمی و ڤێ چه‌ندێ وه‌كریه‌ هنده‌ك ئالی ل بن كاریگه‌ریا وه‌لاتێن هه‌ڤسنوور بن كو په‌یوه‌ندیێن وان زێده‌تر ب رێیا حزبان بن” .

ناڤبریێ ئاماژه‌كر ژی كو هه‌بوونا دستووری دێ گه‌له‌ك كێشێن هه‌رێما كوردستانێ چاره‌سه‌ركه‌ت و دێ بیته‌ هۆكار بۆ ئێكرێزیا كوردان و ب ده‌ستڤه‌ئینانا سه‌قامگیریێ ژبه‌ركو دستوور پێدڤیه‌كا نیشتمانیه‌ بۆ ئێكرێزیا ئالیێن سیاسی.

ئه‌ڤرۆ، عه‌زیز هه‌ورامی

ل چه‌ند رۆژێن بهێت دێ 800 ئه‌ندامێن كۆنگره‌یێ 14 یێ پارتی دیموكراتی كوردستان هێنه‌ هه‌لبژارتن، ل سه‌ر ئاستێ ناڤخوه‌یی و ده‌رڤه‌ چاڤ ل سه‌ر ب رێڤه‌چوونا كۆنگره‌یێ پارتیه‌ كو ئێكه‌م حزبا مه‌زن یا هه‌رێما كوردستانێ و ئیراقێ یه‌.

نه‌جات حه‌سه‌ن، جێگرێ سه‌رۆكێ لژنا كۆنگره‌یێ 14 یێ پارتی دیموكراتی كوردستان بۆ رۆژناما (ئه‌ڤرۆ) گوت” ل رۆژا 27 ڤێ مه‌هێ دێ كۆنفرانسێن ناڤخوه‌یی بۆ هه‌لبژارتنا ئه‌ندامێن گۆنگره‌یێ 14 یێ پارتی ده‌ستپێكه‌ن، ب وره‌یه‌كا بلند و دیتنه‌كا نوو ئه‌ندامێن پارتی دێ به‌ر ب سندوقێن ده‌نگدانێ چن بۆ هه‌لبژارتنا ئه‌ندامێن كۆنگره‌ی”.

گوت ژی” ل پارێزگه‌هێن هه‌ولێرێ و سلێمانیێ و دهۆكێ و هه‌له‌بجه‌، هه‌روه‌سا ل پارێزگه‌هێن كه‌ركووك و نه‌ینه‌وا ژی، دێ هه‌لبژارتنا ئه‌ندامێن گۆنگره‌ی هێنه‌ ئه‌نجامدان و ده‌نگدان دێ ب ئازادانه‌ و شێوه‌كێ زه‌لال ب رێڤه‌چیت”.

جێگرێ سه‌رۆكێ لژنا كۆنگره‌یێ 14 یێ پارتی ئاماژه‌كر” رێژه‌یا 25% ژ ئه‌ندامێن گۆنگره‌ی دێ ئافره‌ت بن”. هه‌روه‌سا پتر گوت” دخوازین كادرێن خودان شیان و كاریگه‌ر و شاره‌زایی د دیرۆكا پارتیدا هه‌بیت، سه‌ربكه‌ڤن”.

دیاركر ژی” مه‌ لژنا وه‌رگرتنا سكالایان یا هه‌ی، هه‌ر ئه‌ندامه‌كێ پارتی بخوازیت خوه‌ ب هه‌لبژێریت و رێگری لێ بهێته‌ كرن، دشێت سكالایێ تۆمار بكه‌ت و دێ ڤه‌گۆلین ل دۆر وێ سكالایێ هێته‌ كرن”.

ئاشكراكر ژی” پارتی حزبه‌كا جه‌ماوه‌ری یه‌، له‌وما بابه‌تێ باوه‌رنامێ بۆ وان كه‌سێن خوه‌ به‌ربژار دكه‌ن بۆ ئه‌ندامه‌تیا كۆنگره‌ی نه‌هاتیه‌ جهگیركرن و د په‌یره‌وێ نوو یێ پارتی ژی دا ناهێته‌ جهگیركرن”.

بریاره‌ ل دووماهیا مه‌ها ئۆكتۆبه‌را ئه‌ڤساله‌ یان ل ده‌ستپێكا مه‌ها چریا ئێكێ، كۆنگره‌یێ 14 یێ پارتی دیموكراتی كوردستان ل باژێرێ دهۆكێ برێڤه‌بچیت. ل دووڤ په‌یره‌وێ ناڤخوه‌یێ كۆنگره‌ی تنێ ئه‌ندامێن مه‌كته‌با سیاسی و سه‌ركردایه‌تیێ بێی ده‌نگدان دبنه‌ ئه‌ندامێن كۆنگره‌ی.