ئه‌ڤرۆ نيوز:

شاره‌زايێ سه‌قاى يێ عيراقى سادق عه‌تيه‌ به‌لاڤكر كو ل ده‌ستپێكا هه‌فتيا داهاتى دا دێ پێله‌كا بارانێ عيراقێ و هه‌رێما كوردستانێ ڤه‌گريت.

سادق عه‌تيه‌ دياركر ژى” ل ناڤه‌راستا ڤێ هه‌يڤا دێ پلێن گه‌رمێ نزم بن و دێ گوهۆرين ب سه‌ر ره‌وشا سه‌قاى هێت و پێله‌كا سه‌رمايێ دێ به‌ر ب ده‌ڤه‌ري هێت”.

ئه‌ڤرۆ نیوز:

سه‌رۆك مه‌سعود بارزانى ئه‌ڤرۆ چارشه‌مبى 11/9/2019 پێشوازى ل برایان مەکفیتێرز، جێگرێ سه‌رۆكێ هنارتیێ ئه‌مریكا یێ نوو ل عیراقێ كر.

جێگرێ سه‌رۆكێ هنارتیێ ئه‌مریكا ل عیراقێ زێده‌بارى بلند نرخاندنا رۆلێ سه‌رۆك بارزانى د پرۆسا سیاسى ل عیراقێ و ده‌ڤه‌رێ، راگه‌هاند كو هاتیه‌ بۆ گوهداریكرنا بۆچوونا سه‌رۆك بارزانى ل دۆر ره‌وشا نوكه‌ یا عیراقێ و ده‌ڤه‌رێ و په‌یوه‌ندیێن هه‌رێمێ و به‌غدا.

د كۆمبوونه‌كێ دا ب درێژى به‌حسێ دانوستاندنێن د ناڤبه‌را هه‌رێمێ و به‌غدا هاته‌ كرن و سه‌رۆك بارزانی جاره‌كادى دووپاتكر كو پشته‌ڤانیا دانوستاندنێ دكه‌ن بۆ چاره‌سه‌ركرنا كێشان ل سه‌ر بنه‌مایێ دستوورى، هه‌روه‌سا ره‌وشا سیاسى یا ده‌ڤه‌رێ و گه‌فێن داعشێ هاتنه‌ به‌حسكرن.

سه‌رۆك بارزانى راگه‌هاند كو هه‌رچه‌نده‌ داعش ژ روویێ شه‌رێ به‌ره‌یى یا هاتیه‌ شكاندن، به‌لێ ژ ناڤ نه‌چوویه‌ و مژوولى خوه‌ رێكخستنێ یه‌، هه‌روه‌سا دیاركر كو داعش گه‌فه‌ بۆ سه‌ر هه‌موو لایه‌كى، بۆ هنده‌كا لایه‌نان گه‌فا نێزیكه‌ و بۆ هنده‌كێن دى گه‌فه‌كا دوور مه‌ودایه‌، ئه‌و هۆكارێن داعش ژى دروستكرى وه‌كو خوه‌ یێن ماین و نه‌هاتینه‌ چاره‌سه‌ركرن.

هه‌ر د وێ كۆمبوونێ دا دووماهى پێشهاتێن سیاسى ل عیراقێ و ده‌ڤه‌ری و ره‌وشا كه‌ركووكێ و ده‌ڤه‌رێن مادێ 140 هاته‌ به‌حسكرن، ره‌وشا سووریێ ته‌وه‌ره‌كێ دى یێ وێ كۆمبوونێ بوو، سه‌رۆك بارزانى نیگه‌رانى و تێبینیێن خوه‌ ل سه‌ر ره‌وشا و پاشه‌رۆژا گه‌لێ كورد ل سووریێ ب شاندێ مێهڤان راگه‌هاند.

ئه‌ڤرۆ نیوز:

سه‌رۆك مه‌سعود بارزانى ئه‌ڤرۆ سێشه‌مبى 10/9/2019 ب هه‌لكه‌فتا سالیادا سوره‌شا ئه‌یلوولێ په‌یامه‌ك به‌لاڤكر .

سه‌رۆك بارزانى د په‌یاما خوه‌ دا گۆت” شوره‌شا ئه‌یلوولێ ب رێبه‌ریا بارزانیێ نه‌مر شوره‌شه‌كا سیاسى و جڤاكى و چه‌كدارى و سه‌رانسه‌رى گه‌لێ كوردستانێ بوو كو بناغه‌كێ ب هێز بۆخه‌باتا رزگاریخوازا گه‌لێ كوردستانێ دژى سته‌م و داگیركاریێ دانا”.

گۆت ژى” د شوره‌شا ئه‌یلوولێ دا پێشمه‌رگه‌، كادر، مامۆستا، قوتابى، ئافره‌ت و هه‌موو ته‌خ وچینێن جڤاكێ كوردستانێ ژ نه‌ته‌وه‌ و ئاینێن جودا، ژ هه‌موو ده‌ڤه‌رێن كوردستانێ پێكڤه‌ و بۆ ئێك ئارمانجا پیرۆزا نه‌ته‌وى و نیشتمانى خه‌بات كر و دیرۆك و سه‌روه‌رى تۆماركر، ئه‌و ده‌ستكه‌فت و ئازادیا نوكه‌ هه‌ى، به‌رهه‌م و درێژیا قوربانیدان و خه‌باتا رۆلێن گه‌لێ مه‌یه‌ د شوره‌شا ئه‌یلوولێ دا، هه‌ر د ڤێ شوره‌شێ دا بوو كو ئیراده‌ و خوراگرى و خوه‌شتڤیا نیشتمانى د ناڤ رێزێن گه‌لێ مه‌ دا هند یا ب هێز بوو كو به‌رده‌وام دوژمنێ پرچه‌ك د به‌رانبه‌ردا د هاته‌ شكاندن و ل دووماهیێ وێ ئیرادێ دوژمن ئینا سه‌ر مێزا دانوستاندنێ”.

سه‌رۆك بارزانى د یه‌یاما خوه‌ دا گۆت ژى” شۆره‌شا مه‌زن یا ئه‌یلوولێ هه‌م بۆ بۆ نه‌هێلانا سته‌مكاریێ بوو، هه‌م ژى بۆ پێگه‌هاندنا مرۆڤێ كوردستانى بوو، بۆ وێ چه‌ندێ گه‌لێ كوردستانێ مافێن خوه‌ بنیاسیت و بهایێ بلند یێ مرۆڤانه‌ و كوردپه‌روه‌رانه‌ د ناڤ خه‌لك و كادر و پێشمه‌رگه‌ى دا دروست ببیت، ب جۆره‌كى كو ل به‌رانبه‌ر دوژمنى دا ژى تنێ بۆ جاره‌كێ ژى، شۆره‌ش كریاره‌ك ئه‌نجام نه‌دا كو یا ناكۆك بیت ل گه‌ل بها و قانوونێن شه‌رى”. دیار كر ژى” وانه‌ و بهایێن وێ شۆره‌شا مه‌زن دڤێت بۆ مه‌ هه‌موویان ب بلندى بمینیت و ببنه‌ چرا و رێنیشانده‌ر بۆ داهاتیێ مه‌ و نه‌ڤیێن پاشه‌رۆژێ”.

ئه‌ڤرۆنيوز:

سه‌رۆك مه‌سعود بارزانى ئه‌ڤرۆ دوشه‌مبى 9/9/2019 ل گه‌ل به‌رپرسێن لق و ناوچێن پارتى ل سنورێ پارێزگه‌هێن دهۆك و نه‌ينه‌وا وهه‌رسێ جڤاتێن سه‌ركردايه‌تيا (هه‌ولێر) و (كه‌ركووك – گه‌رميان) و (سلێمانى – هه‌له‌بجه‌) كۆمبوو.

سه‌رۆك بارزانى د وێ كۆمبوونێ دا رۆناهى خسته‌ سه‌ر ره‌وشا سياسى يا هه‌رێما كوردستانێ و عيراقێ و ده‌ڤه‌رێ پشتى ريفراندۆمێ و هه‌ردو هه‌لبژارتنێن جڤاتا نوونه‌رێن عيراقێ و په‌رله‌مانێ كوردستانێ و پێكئينانا كابينا نوو يا حوكمه‌تا هه‌رێما كوردستانێ.

سه‌رۆك بارزانى سوپاس و پێزانين هه‌بوون بۆ رۆلێ ئه‌ندام و كادرێن پارتى كو سه‌ره‌راى هه‌موو گرفتان و وان پێلانێن دژى پارتى دهاتنه‌ كرن، به‌لێ ب هيممه‌ت و خوراگريا ئه‌ندام و لايه‌نگرێن پارتى وه‌كر كو پارتى  ل سه‌ر ئاستێ عيراقێ  كوردستانێ ببيته‌ حزبا هژمار ئێك، هه‌روه‌سا رۆلێ كادرێن پارتى بلند نرخاند كو ب خۆراگرى و باوه‌رى ب خوه‌بوون ل ده‌مێ ته‌نگاڤياندا ل سه‌نگه‌رێ پاراستنا كوردستانێ و هه‌كه‌ پارتى نه‌با نوكه‌ نه‌ هه‌رێما د ما و نه‌ شكۆيه‌ك بۆ گه‌لێ مه‌ د ما.

سه‌رۆك بارزانى د وێ كۆمبوونێ دا سوپاسيا خوراگريا خه‌لكێ كوردستانێ و قه‌هره‌مانيا هێزا پێشمه‌رگێ كوردستانێ د شه‌رێ دژى تيرۆرستان و شه‌رێ به‌رگريێ ژ كه‌رامه‌ت و ئاخا وه‌لاتێ وراگه‌هاند، ئه‌م هه‌موو قه‌ردارێن پێشمه‌رگه‌ى نه‌، چونكه‌ پێشمه‌رگه‌ى هه‌موو هه‌ڤكێش گوهۆرين و كوردستان پاراست.

هه‌ر د وێ كۆمبوونێ دا ئاماژه‌ ب ره‌وشا ژيارا كادرێن پارتى و وان زه‌حمه‌تيێن روو ب روويێ وان دبيت و ب تێرو ته‌سه‌لى به‌حسێ وان گاڤان هاته‌ كرن كو دبنه‌ ئه‌گه‌رێ پێشڤه‌برنا كاروبارێن پارتى و باشتركرنا ژيارا كادران.

ئه‌ڤرۆ نيوز:

ئه‌ڤرۆ رۆژا دوشه‌مبى 9-9-2019 ل سه‌لاحه‌دين سه‌رۆك مه‌سعود بارزانى پێشوازى ل جێمس سۆرنتۆن قونسلێ نوو يێ بريتانيا ل هه‌ولێرێ كر.

د ديداره‌كێ دا كو جێمس سۆرنتون قونسلێ نوو يێ برێتانيا ب مه‌ره‌ما خوه‌ نياسينێ سه‌ردانا سه‌رۆك مه‌سعود بارزانى كربوو ديسان خوه‌شحاليا خوه‌ هه‌مبه‌ر پێشڤه‌چوونا پروسا سياسى ل هه‌رێما كوردستانێ و ده‌ستبكاربوونا حوكمه‌تا نوو يا هه‌رێمێ دياركر و خواست هه‌رێما كوردستانێ يا بهێز و سه‌قامگيربيت زێده‌بارى پێشخستنا په‌يوه‌نديێن هه‌رێمێ و برێتانيا ژى گرنگى پێ بهێته‌دان.

هه‌ر د ڤێ كومبوونێ دا به‌حسا ره‌وشا سياسيا عيراقێ و ده‌ڤه‌رێ بگشتى و كێشه‌يا كه‌ركووك و مادده‌يا 140 يا دستورێ عيراقێ هاته‌ كرن.