ئه‌ڤرۆ نيوز:
سه‌رۆك مه‌سعود بارزانى ئه‌ڤرۆ شه‌مبيێ 7/9/2019 ل گه‌ل شانده‌كێ هه‌ده‌په ب سه‌رۆكاتیا سه‌زاى ته‌مه‌للى هه‌ڤسه‌رۆكێ هه‌ده‌په كۆمبوو و ره‌وشا سياسى يا ده‌ڤه‌رێ و په‌يوه‌نديێن هه‌ده‌په و هه‌رێما كوردستانێ و ره‌وشا هه‌ده‌په ل توركيا هاته به‌حسكرن.
به‌رى كۆمبوونێ، سه‌زاى ته‌مه‌للى، هه‌ڤسه‌رۆكێ هه‌ده‌په راگه‌هاند” مه‌به‌ست ژ سه‌ره‌دانا سه‌رۆك بارزانى، وه‌رگرتنا بۆچوونا وى بوو ل سه‌ر پرسێن گه‌رم يێن ده‌ڤه‌رێ، ژ به‌ركو سه‌رۆك بارزانى بۆ كورد و گه‌لان سه‌ركرده‌كێ گرنگه”.
ته‌مه‌للى گۆت ژى” مه‌سعود بارزانى سه‌ركرده‌كێ گرنگ و پێشه‌نگه، ئه‌و نه تنێ بۆ كوردان، به‌لكو بۆ سياسه‌تا ده‌ڤه‌رێ يێ گرنگه”.
ئاماژه ب وێ چهندێ ژى كر كو ئه‌و دخوازن ئاشتى و سه‌قامگيرى ل ده‌ڤه‌رێ به‌رقه‌رار بيت و بزاڤا چه‌سپاندنا ديموكراسيێ د ده‌ن، له‌وما چاره‌سه‌ركرنا پرسا كوردى ل رۆژهه‌لاتا ناڤه‌راست دێ گاڤه‌كا گرنگ بيت.
ژ لايێ خوه‌ڤه سه‌رۆك بارزانى سه‌ره‌دانا شاندێ ناڤبرى بۆ هه‌رێما كوردستانێ ب گرنگ دا زانين و زێده‌بارى ئاماژه دان كو هه‌ر پارچه‌كا كوردستانێ تايبه‌تمه‌نديا خوه يا هه‌ى، راگه‌هاند” بۆ ده‌ركه‌فتنێ ژ ئالۆزيان پێدڤيه لايه‌نێن كوردى وان تايبه‌تمه‌نديان ل به‌رچاڤ وه‌ربگرن كو ل هه‌ر پشكه‌كا كوردستانێ يا هه‌ى”.
سه‌رۆك بارزانى دووپاتى ل وێ چهندێ ژى كر كو هيچ كێشه‌ك ژوان ژى كێشا گه‌لێ كوردى ژىب شه‌ر و توندوتيژيێ ناهێته چاره‌سه‌ركرن ول دووماهيێ پێدڤيه رێچاره‌يا سياسى و ئاشتيانه سه‌ربگريت.
سه‌رۆك بارزانى ب شاندێ مێهڤان راگه‌هاند كو بۆ هاريكاريا چاره‌سه‌ريا ئاشتيانه يا كێشا كوردى ل توركيا و پشكێن دى، ئه‌وا ژ ده‌ستێ بهێت بۆ ڤێ مه‌ره‌مێ دێ ئه‌نجام ده‌ت، سه‌رۆك بارزانى داخواز ژ شاندێ مێهڤان كر كو سه‌ره‌راى ئالۆزى و هه‌بوونا گرفتێن كوور، ب هيچ شێوه‌كى ژ چاره‌سه‌ريا ئاشتيانه بێ ئومێد نه‌بن و رێ نه‌ده‌ن كو هه‌بوونا ناكۆكيێن سياسى ببيته ئه‌گه‌رێ سه‌رهلدانا ناكۆكيا نه‌ته‌وى د ناڤبه‌را كورد و توركان دا.
ئه‌ڤرۆ شانده‌كێ هه‌ده‌په ب سه‌رۆكاتيا سه‌زاى ته‌مه‌للى هه‌ڤسه‌رۆكێ هه‌ده‌په گه‌هشته هه‌ولێرێ و برياره د ده‌مێ چار رۆژان دا چه‌ندين ديدار و چاڤپێكه‌فتنان ل گه‌ل لايه‌نێن سياسى ئه‌نجام بده‌ن.
نيشاندان