ئه‌ڤرۆ نيوز:
سه‌رۆكێ توركيا ره‌جه‌ب ته‌يب ئه‌دۆگان راگه‌هاند، دێ په‌كه‌كێ ژ ناڤ ئاخا عيراقێ ده‌رێخين ودياركر كو ئۆپه‌راسيۆنا خواكۆركێ ب سه‌ركه‌فتى ب رێڤه دچيت ول گه‌ل به‌رپرسێن عيراقى وئيرانێ ژى ل دۆر وێ ئۆپه‌راسيۆنێ و دهه‌ڤ هه‌لويستين.
ئه‌ردۆگانى د كۆنگره‌كێ رۆژنامه‌ڤانى دا گۆت” د ده‌مه‌كێ نێزيك دا دێ كۆنسۆلخانێن توركيا ل مووسلێ و به‌سرا ڤه‌كه‌ين، بۆ ڤه‌كرنا دو كونسۆلخانێن دى ل كه‌ركووكێ ونه‌جه‌فێ، مه داخوازى ئاراسته‌ى حوكمه‌ت عيراقێ كريه”.
ئه‌ڤرۆ نیوز:
ب سه‌رپه‌رشتیا فه‌رهاد ئه‌مین ئه‌ترووشی، پارێزگه‌رێ دهۆكێ، ئه‌ڤرۆ 6/8/2019 كۆمبوونا (43) یا لیژنا پیشه‌سازی ل پارێزگه‌ها دهۆكێ هاته سازكرن و تێدا 40 پرۆژێن پیشه‌سازی هاتنه په‌سه‌ندكرن.
د كۆمبوونێ دا به‌حسێ ره‌وشا پرۆژێن پیشه‌سازی ل پارێزگه‌هێ و چاوانیا پێشخستنا كه‌رتێ پیشه‌سازی یێ گشتی، ئه‌و ژی ب رێكا پشته‌ڤانیكرنا پرۆژێن وه‌به‌رهێنانێ یێن پیشه‌سازی ل سنوورێ پارێزگه‌هێ هاته كرن.
د لایه‌كێ دیێ كۆمبوونێ دا به‌حسێ داخوازیێن وه‌لاتیان بۆ چێكرنا پرۆژێن پیشه‌سازی ل جهێن جودا جودا ل سنوورێ پارێزگه‌ها دهۆكێ هاته كرن.
پارێزگه‌رێ دهۆكێ ته‌كه‌ز كر كو لیژنا پیشه‌سازی هه‌موو ئاسانكاریان و ل دووڤ رێنمایێن ده‌سته‌یا وه‌به‌رهێنانێ بۆ وه‌به‌رهێنه‌رێن ده‌ڤه‌رێ بكه‌ت بۆ وێ یه‌كێ خودان شیان و سه‌رمایه‌دار پرۆژێن پیشه‌سازی ئاڤابكه‌ن بۆ خزمه‌تكرنا وه‌لاتیێن پارێزگه‌هێ.
ل دووماهیا كۆمبوونێ و پشتی گه‌نگه‌شێن تێر و ته‌سه‌ل ل سه‌ر هژماره‌كا پرۆژێن پیشه‌سازی یێن داخوازكری ژ لایێ وه‌لاتیان ڤه هاتینه كرن، بڕیار هاته‌دان و رازیبوون ل سه‌ر هژماره‌كا داخوازیان هاته كرن و (40) پرۆژه ژی هاتنه په‌سه‌ندكرن.
ئه‌ڤرۆ نيوز:
ژێده‌ره‌كى ژ مووسل بۆ ئه‌ڤرۆ نيوز دياركر پشتى سه‌ره‌دانا ئه‌ڤرۆ سێشه‌مبى 6/8/2019 يا فالح فه‌ياز شيره‌تكارێ ئاسايشا نيشتمانى يا عيراقێ وهژماره‌كا سه‌ركردێن له‌شكرێ عيراقێ وميليشيێن حه‌شدا شه‌عبى بۆ مووسل، ژ ئه‌نجامێ ئالۆزيا كه‌فتيه د ناڤبه‌را له‌شكرێ عيراقێ و حه‌شدا شه‌عبى ل مووسل بتايبه‌تى ل سه‌ر هه‌بوونا بازگه‌هێن حه‌شدى وداخوازا له‌شكرێ عيراقێ بۆ ڤه‌كێشانا حه‌شدا شه‌عبى ل مووسل، و د ئه‌نجامدا حه‌شدێ رێيا مووسل بۆ هه‌ولێر داخستى وئه‌ندامێن وێ مانگرتن كرى د ناڤ مووسل دا، فالح فه‌ياز دياركر، د كۆمبوونه‌كێ ئه‌و گه‌هشتينه رێككه‌فتنه‌كێ كو بازگه‌هێن هه‌ڤپشك د ناڤبه‌را له‌شكرێ عيراقێ وحه‌شدا شه‌عبى ژ خه‌لكێ ده‌ڤه‌رێ بهێنه دانان ب تايبه‌تى ل ده‌شتا نه‌ينه‌وا.
وى ژێده‌رى دياركر ژى كو فالح فه‌ياز ئاماژه‌كر، پێدڤيه رێزگرتن ل سه‌روه‌ريا ده‌وله‌تێ بهێته گرتن ورێز ل رۆلێ له‌شكرێ عيراقێ بهێته گرتن، هه‌روه‌سا رێز ل حه‌شدا شه‌عبى ژى بهێته گرتن ب تايبه‌تى ئه‌وێن خه‌لكێ ده‌ڤه‌رێ.
وى ژێده‌رى گۆت ژى” مانگرتيێن حه‌شدا شه‌عبى مانگرتنا خوه ب دووماهى ئينا وچادرێن خوه ژ رێيان راكرن ئه‌وێن به‌رى نوكه ل ناڤ مووسل داخستين ژوان ژى رێيا مووسل – هه‌ولێر”.
ئه‌ڤرۆ نیوز، حه‌مۆ محه‌مه‌د:
ب مه‌ره‌ما سڤككرنا نه‌خوشیا وان ل سه‌ر وان، ل نه‌خۆشخانا هیڤی یا زارۆیان، جلكێن جه‌ژنێ ل سه‌ر 50 زارۆیێن نه‌خۆش هاتنه به‌لاڤكرن.
ل نه‌خۆشخانا هیڤی یا زارۆیان، ئه‌ڤرۆ 6/8/2019 گۆڤارا بازار ریكلام، وه‌كو كاره‌كێ خێرخوازی جلكێن جه‌ژنێ ل سه‌ر 50 زارۆیێن نه‌خوش به‌لاڤكرن.
سهام ماجد، خودانا ئمتیازا گۆڤارا بازار ریكلام بۆ ئه‌ڤرۆ نیوز گۆت: “مه ب فه‌ر زانی ب هه‌لكه‌فتا هاتنا جه‌ژنا قۆربانی، جلكێن جه‌ژنێ ل سه‌ر زارۆیێن نه‌خوش یێن نه‌خۆشخانا هیڤی یا زارۆیان به‌لاڤ بكه‌ین، مه‌ره‌ما مه ژی ئه‌و بوو كو نه‌خوشیێن وان ل سه‌ر سڤك بكه‌ین و كه‌یفا وان بینین بۆ جه‌ژنێ”.
ئه‌ڤرۆ نیوز:
وه‌زاره‌تا ناڤخوه ل هه‌رێما كوردستانێ بریار دا نابیت ترومبێلێن حكومى بۆ كارێ تایبه‌ت بهێنه بكارئینان.
هێرش ئه‌حمه‌د، رێڤه‌به‌رێ هاتنوچوونا پارێزگه‌ها هه‌ولێرێ راگه‌هاند” وه‌زاره‌تا ناڤخوه بریاره‌كا نوو ده‌ركر كو د نوكه دا كه‌فتیه د وارێ بجهئینانێ دا ولۆگۆیێ حوكمه‌تا هه‌رێما كوردستانێ ژى ل هه‌موو ترومبێلێن حوكمه‌تێ دا هێته دان، تاكو ل پشتى ده‌وامێ بۆ كارێ تایبه‌ت وكه‌سى نه‌هێنه بكارئینان”.
گۆت ژى” هه‌ر ترومبێله‌كا حكومى یا هه‌ر داموده‌زگایه‌كى بیت، پشتى ده‌واما فه‌رمى كارێ تایبه‌ت وكه‌سى پێ بهێته كرن، دێ ڤه‌كۆلین د گه‌لدا هێته كرن وترومبێل هێته ده‌سته‌سه‌ركرن ودێ تووشى سزایێن دراڤى ژى بن، ئه‌ڤجا هه‌ر كه‌س وبه‌رپرسه‌ك بیت”.
ب
ئه‌ڤرۆ نيوز:
ئه‌ڤرۆ رۆژا سێشه‌مبى 5-8-2019 مه‌سرور بارزانى سه‌رۆك وه‌زيرێن هه‌رێما كوردستانێ پێشوازى ل نه‌سرولا ره‌شنوودى قونسلێ نوو يێ كومارا ئيسلاميا ئيرانێ ل هه‌ولێرێ كر و د ديداره‌كێ دا په‌يوه‌نديێن جوراوجور ناڤبه‌را هه‌رێم و ئيرانێ دا هاته به‌حس كرن.
ديسان د ڤێ ديدارێ دا قونسلێ كومارا ئيسلاميا ئيرانێ پيروزباهى ل مه‌سرور بارزانى كر پشتى وه‌رگرتنا ئه‌ركێ سه‌رۆكاتيا وه‌زيرێن كوردستانێ و هيڤى خواست يێ سه‌ركه‌فتى بيت د كارێ خوه دا.
ژلايێ خوه ڤه مه‌سرور بارزانى بخێرهاتنا نه‌سرولا ره‌شنودى كر و هيڤى خواست يێ سه‌ركه‌فتى بيت د ئه‌ركێ وى يێ نوو دا، ديسان وان به‌حس ل پێشخستنا په‌يوه‌نديێن هه‌رێمێ ژلايێ ئاربورى ڤه گه‌نگه‌شه كر و خواست ژ هه‌موو لايه‌كي ڤه په‌يوه‌نديێن هه‌ردو لا به‌ر ب باشتر بچن.
ئەڤرۆ نيوز:
ئەندامەکا لیژنا قانوونی ل پەرلەمانێ کوردستانێ ئاشکرا کر، ئەو پڕۆژەقانوونا ڤەگەڕاندنا پاشەکەفتێ مووچێ فەرمانبەر و مووچەخۆرێن ھەرێما کوردستانێ دێ ئاراستەی حوکمەتا ھەرێما کوردستانێ کەن.
رۆبینە ئۆملیک، ئەنداما لیژنا قانوونی ل پەرلەمانێ کوردستانێ دیار کر، ئەو وەکو لیژنا قانوونی ل پەرلەمانێ کوردستانێ دوھی 4/8/2019 ل دۆر دانوستاندنێ ل سەر چەند پرۆژەقانوونەکان کو ئاراستەی لیژنا وان ھاتینە کرن؛ کۆمبوون.
وێ پەرلەمانتارێ بۆ باسنیوز گۆت: “28 پڕۆژەقانوون ئاراستەی لیژنا مە ھاتینە کرن و بڕیار ھاتیە دان 14 ژ وان پرۆژەقانوونان، پشتی دەستپێکرنا وەرزێ نوو یێ یاسادانانا پەرلەمانێ کوردستانێ، بکەڤنە بەرنامێ کارێ روونشتنێن پەرلەمانی و خواندنا ئێکێ بۆ بھێتە کرن”.
روبینایێ ئاماژە ب وێ چەندێ ژی کر کو ھژمارەکا وان پرۆژەقانوونان، رەھندێن دارایی یێن ھەین، لەو پێدڤیە حوکمەتا ھەرێما کوردستانێ تێبینیێن خوە ل سەر بدەت و گۆت: “ئەو پرۆژەقانوونە بۆ حوکمەتا ھەرێما کوردستانێ دێ ھێنە ئاراستەکرن”.
گۆتژی: “پرۆژەقانوونێن رێکخستنا خانەنشینیێ ل ھەرێما کوردستانێ، چەسپاندنا شایستێن دارایی یێن مووچەخۆران و ڤەگەراندنا پاشکەفتێ مووچەی، دوبارە بکارخستنا ئەو کارگەھێن ژ کارکەفتی، دانا دەرمالێن خواندنێ بۆ قوتابیان و ل گەل چەند پرۆژەقانوونەکێن دی بۆ حوکمەتا ھەرێما کوردستانێ دێ ھێنە ئاراستەکرن”.
وێ ئەنداما لیژنا قانوونی ل پەرلەمانێ کوردستانێ خویا ژی کر، ھەموو ئەو پرۆژەقانوونە ب رێیا سەرۆکاتیا پەرلەمانێ کوردستانێ بۆ حوکمەتا ھەرێما کوردستانێ دێ ھێنە ئاراستەکرن، بۆ وێ چەندێ حوکمەت بیر و بۆچوونێن و پێشنیارێن خوە ل دۆر بدەت.
ئه‌ڤرۆ نيوز:
وه‌زاره‌تا دارايى و ئابوريا هه‌رێما كوردستانێ ژڤانێ به‌لاڤكرنا مووچێ وه‌زاره‌تا په‌روه‌ردێ دياركر.
ل دووڤ وێ ليستا بۆ گه‌نجينيه‌يا وه‌زاره‌تا دارايى هاتيه هنارتن دياركريه رۆژا سێشه‌مبى 6-8-2019 دێ مووچێ هه‌يڤا گۆلانا 2019 هێته به‌لاڤ كرن، كوژمێ مووچێ وه‌زاه‌رتا په‌روه‌ردێ ژى حوكمه‌تا هه‌رێمێ پێدڤى ب كوژمێ زێده‌تر ژ 158 مليار دينارايه.
هه‌ژى گۆتنێ يه ئه‌ڤرۆ رۆژا ئێكشه‌مبى 4-8-2019 وه‌زاره‌تا دارايى ده‌ست ب به‌لاڤكرنا مووچێ وه‌زاره‌تا پێشمه‌رگه‌ى كريه يێ هه‌يڤا 5.
ئەڤرۆ نیوز، نەوزا ھلۆری:
رێڤەبەریا گشتی یا کونترولا کارەبا ھەرێما کوردستانێ دیارکر کو ئەڤ سالە ھەمبەری سالا بوری کارەبا نیشتمانی رۆژانە شەش دەمژمێرا زێدەتر و ل ھەیڤا تەموزا ئەڤ سالە رۆژانە دناڤبەرا 16 بو 17 دەمژمێرا کارەبا نیشتمانی ب وەلاتیان دھێتەدان.
ئومێد ئەحمەد، رێڤەبەرێ رێڤەبەریا گشتی یا کونترولا کارەبا ھەرێما کوردستانێ دیارکر کو دھەیڤا تەموزا ئەڤ سالە رۆژانە دناڤبەرا 16 بو 17 دەمژمێرا رۆژانە کارەبا نیشتمانی بو وەلاتیان دھاتەدان و گۆت: (بو ھەیڤا ئاب ژی ب ھەمان شێوە دێ رۆژانە دناڤبەرا 16 بو 17 دمژمێرا کارەبا نیشتمانی بو وەلاتیان ھێتەدان، ئەڤ سالە ھەمبەری سالا بوری رۆژانە شەش دەمژمێرا کارەبا نیشتمانی ژ سالا بوری باشتربویە).
زێدەتر بو رووداو گۆت: (ئەگەرا زێدەبوونا کارەبا نیشتمانی دزڤریت بو زێدەبوونا بەرھەمئینانا گازێ ل زەڤیێن کورمور و چاکسازی ل ھێلێن وێستگەھێن کارەبێ، زێدەبوونا ئاڤا بەنداڤا دوکان و دەربەندیخان کو بویە ئەگەر رۆژانە پتری 450 مێگاواتێن کارەبێ زێدەبن).
حوکمەتا ھەرێما کوردستان و وەزارەتا کارەبێ پێدڤی ب چوار ھزار و 700 مێگاواتێن کارەبێ یە ھەتاکو کارەبا ھەرێما کوردستانێ شیانێن ھندێ ھەبن کارەبا نیشتمانی بکەت 24 دەمژمێری، بەلێ وێستگەھێن کارەبا ھەرێما کوردستانێ، نوکە تنێ سێ ھزار و 250 مێگاواتێن کارەبێ دھێنە بەرھەمئینان.
ئه‌ڤرۆ نیوز:
سوبه ل ژێر درووشمێ ( شنگال ژ جینۆسایدێ به‌ر ب ئاڤه‌دانی و ژیانێ ) رێوره‌سمه‌كێ به‌رفره‌هـ بۆ سالڤه‌گه‌را پێنجێ یا جینۆسایدكرنا كوردێن ئێزدی ل هۆلا كۆنفرانسان یا زانكۆیا دهۆكێ بهێته سازكرن كو سه‌رۆكێ هه‌رێمێ و سه‌رۆكێ حوكمه‌تا هه‌رێما كوردستانێ دێ پشكداربن.
به‌ره‌ڤان حه‌مدى بریكارێ وه‌زاره‌تا كاروبارێن شه‌هید و ئه‌نفالكریان یا حوكمه‌تا هه‌رێما كوردستانێ تایبه‌ت بۆ ئه‌ڤرۆ نیوز دیاركر، سوبه د رێوره‌سمێن سالڤه‌گه‌را پێنجێ یا جینۆسایدكرنا كوردێن ئێزدی، نێچیرڤان بارزانى سه‌رۆكێ هه‌رێما كوردستانێ و مه‌سرور بارزانى سه‌رۆكێ حوكمه‌تا هه‌رێمێ دێ پشكداربن و گۆتارێن سه‌رۆكاتیا هه‌رێمێ و حوكمه‌تا هه‌رێما كوردستانێ پێشكێش كه‌ن، هه‌روه‌سا نوونه‌رێن په‌رله‌مانێ كوردستانێ و عیراقێ و نوونه‌رێن چه‌ندین وه‌لاتان و پارتێن سیاسى و كه‌س و كارێن قوربانیێن كاره‌ساتێ به‌رهه‌ڤ بن كو دێ ژبلى گۆتاران چه‌ندین چالاكیێن دى هه‌بن كو ده‌ربرینێ ژ ئیش و ئازارێن وێ كاره‌ساتێ و پێكڤه‌ژیانا ل هه‌رێما كوردستانێ كه‌ن.
نيشاندان