ئه‌ڤرۆ:

سه‌رۆكێ حوكمه‌تا هه‌رێما كوردستانێ، مه‌سرور بارزانی، پێشوازی ل جینین پلاسخارت نوونه‌را تایبه‌ت یا سكرتێرێ گشتیێ نه‌ته‌وێن ئێكگرتی ل ئیراقێ كر.

د كۆمبوونه‌كێ دا دانوستاندن ل دۆر دووماهی پێشهاتێن ئیراقێ و پرۆسا هه‌لبژارتنێن جڤاتا نوونه‌رێن ئیراقێ هاته‌ كرن و رۆلێ چاڤدێرێن نێڤده‌وله‌تی و نه‌ته‌وێن ئێكگرتی، د پشته‌ڤانیكرن و سه‌رخستنا پرۆسا هه‌لبژارتنان ب بلندی هاته‌ نرخاندن.

هه‌ردولایه‌ن د خوازیار بوون كو حوكمه‌تا داهاتی یا ئیراقێ، حوكمه‌ته‌كا گشتگیر بیت و بێ جوداهی خزمه‌تا هه‌موو پێكهات و وه‌لاتیێن ئیراقێ بكه‌ت.

ئه‌ ڤرۆ:

سه‌رۆكێ هه‌رێما كوردستانێ ل دۆر سه‌ ركه‌ فتنا هه‌ لبژارتنێن پێشوه‌ خت یێن جڤاتا نوونه‌رێن ئیراقێ، په‌ یامه‌ ك به‌ لاڤكر و تێدا راگهه‌اند، ئێدی ئیراق و هه‌رێما كوردستانێ د قۆناغه‌كا نوو دانه‌.گۆت ژی پێدڤیه‌ ئه‌م هه‌موو پێگڤه‌ خوه‌ بۆ ئه‌رك و به‌رپرسیاره‌تیا هه‌ڤپشك و پێشهاتێن قۆناغا داهاتی به‌ رهه‌ڤ بكه‌ ین.

نێچیرڤان بارزانی، سه‌ رۆكێ هه‌رێما كۆردستانێ، د په‌یاما خۆه‌ دا ئاماژه‌ ب وێ چه‌ندێ كر كو ئه‌ ركێ هه‌ موو هێز ولایه‌نێن سیاسی یێن كوردستانێ یه‌، پێگڤه‌ د ته‌با و ئێكرێز بن، كاری بۆ نوكه‌ و پاشه‌رۆژه‌كا  باشتر بۆ هه‌ رێما كوردستانێ و ئیراقێ بكه‌ین، بۆ ڤێ مه‌به‌ستێ ژی دێ ل گه‌ل هێز و لایه‌نێن ئیراقی د هه‌ڤكار بین.

ده‌قێ په‌ یاما نێچیرڤان بارزانی، سه‌رۆكێ هه‌ رێما كوردستانێ…

وه‌لاتیێن خوه‌شتڤی.. هێز و لایه‌نێن سیاسی ل هه‌رێما كوردستانێ و ئیراقێ.. پیرۆزباهیا سه‌ركه‌فتنا هه‌لبژارتنێن گشتی یێن جڤاتا نوونه‌رێن ئیراقێ ل هه‌موو لایه‌كی دكه‌م، ئێدی ئیراق وهه‌رێما كوردستانێ یێن د قۆناغه‌كا نوو دا و ئه‌نجامێن دووماهیێ هه‌ر چاوان ئێكلا ببن، ئه‌م هه‌موو د سه‌ركه‌فتی نه‌، پێدڤیه‌ ئه‌م هه‌مو پێگڤه‌ خوه‌ بۆ ئه‌رك و به‌رپرسیاره‌تیا هه‌ڤپشك و پێشهاتێن قۆناغا داهاتی به‌رهه‌ڤ بكه‌ین، ئێكرێزی، ته‌بایی و پێگڤه‌یی، كلیلا سه‌ركه‌فتنا مه‌یه‌ كو ده‌سته‌به‌ریا مافێن دستووری یێن هه‌رێما كوردستانێ دكه‌ت، ده‌ستكه‌فت و سیسته‌مێ فیدرالی و قه‌وارێ  وێ یێ سیاسی دپارێزیت، ئه‌ ركێ هه‌موو هێز ولایه‌نێن سیاسی یێن كوردستانێ یه‌، پێگڤه‌ ته‌با و ئێكرێز كاری بۆ نوكه‌ و پاشه‌رۆژه‌كا باشتر بۆ هه‌رێما كوردستانێ و ئیراقێ بكه‌ین، بۆ ڤێ مه‌به‌ستێ ژی دێ ل گه‌ل هێز لایه‌نێن ئیراقی د هه‌ڤكار بین.

ئه‌ركێ هه‌موو هێز  ولایه‌نێن سیاسی یێن ئیراقێ ئه‌وه‌ ب روانگه‌ و خواندن و تێگهه‌هشتنه‌كا نوو و واقعبینانه‌ ب مفا وه‌رگرتن ژ ئه‌زموون و شاشیێن بۆری ل سه‌ر بنه‌مایێ دستووری كێشێن وه‌لاتی چاره‌سه‌ر بكه‌ین. كاری بۆ ئیراقه‌كا سه‌قامكیر وخوه‌شگوزه‌ران بكه‌ین كو تێدا مافێن دستووری یێن هه‌موو پێكهاتان دمسۆگه‌ر وپاراستی بن، باوه‌ری، پێگڤه‌یی، هه‌ڤچاره‌نڤیسی، هاریكاریا هه‌ڤپشك، به‌رژه‌وه‌ندیا گشتی یا وه‌لاتی، هه‌ڤپشكیا راسته‌قینه‌، سازان و یه‌كسانی، دێ مه‌ هه‌موویان كۆم كه‌ت.

سوپاسیا وه‌لاتیان، هه‌موو هێز ولایه‌نێن سیاسی، داموده‌زگه‌هێن ئیداری و ئه‌منی، میدیا و جڤاكێ مه‌ده‌نی دكه‌م كو ل سه‌رخستنا هه‌لبژارتنان دا د هاریكار بوون. سوپاس و ده‌ستخوه‌شی بۆ ئه‌رك و ماندیبوونا كۆمسیۆنا بلند یا سه‌ربه‌خوه‌ یا هه‌لبژارتنێن ئیراقێ، بۆ چاڤدێرێن ناڤخوه‌یی و بیانی و تیمێن نه‌ته‌وێن ئێكگرتی ب تایبه‌تی سه‌رۆك و تیما یوونامی ل ئیراقێ و ئێكه‌تیا ئه‌وروپا و كۆمكارا ئه‌ره‌بی كه‌ چاڤدێریا پرۆسا ده‌نگدانێ كری و پرۆسه‌ ب ئارامی ب ڕێڤه‌ چووی. ئه‌ڤه‌ گاڤه‌كا  گرنگه‌ ل سه‌ر رێیه‌كا راست.

پشكداریا مه‌ د هه‌لبژارتنێن نوێنه‌رێن مه‌ ل به‌غدا، پێگیریا مه‌یه‌ ب بنه‌مایێن دیموكراسیێ، ژ لایه‌كی دی ڤه‌ رێژا پشكداریێ د ده‌نگدانێ دا په‌یامه‌كا رۆهن یا وه‌لاتیانه‌ كو چاڤێ وان یێ ل ژیان و گوزه‌ر‌ان و خزمه‌تگوزاریێن زێده‌تر و ئه‌ڤه‌ مافێ وانه‌. ئه‌ڤه‌ بۆمه‌ هه‌موومان ل حوكمه‌تێ و هێز ولایه‌نێن سیاسی یێن ئیراقێ و هه‌رێما كوردستانێ، پێدڤیه‌ ببیته‌ په‌ند و وانه‌ك بۆ پێداچوونه‌كا جدی و ئاڤاكرنا باوه‌ریێ، هه‌روه‌سا ببیته‌ هانده‌رێ كار و خزمه‌تا زێده‌تر.

ئێدی ده‌مێ وێ چه‌ندێ یه‌ پێكڤه‌ كار بكه‌ین بۆ دامه‌زراندنا حوكمه‌ته‌كا نیشتمانی فیدرالی كو ره‌نگڤه‌دانا خواست و چاڤه‌رێبوونا وه‌لاتیان بیت، دستووری بجهبینیت، ده‌زگه‌هێن ده‌وله‌تێ ب هێز بكه‌ت، گرۆپ و هێزێن ده‌رڤه‌ی قانوونێ كونترۆل بكه‌ت، ل سه‌ر بنه‌مایێ دستووری و هه‌ڤپشكیێ هه‌موو پێكهاتێن ئیراقێ، پرۆسا سیاسی راست بكه‌ت به‌ر ب پاشه‌رۆژه‌كا باشتر بۆ هه‌موویان، وه‌لاتی ب رێڤه‌ببه‌ت.

ئه‌ڤرۆ:

ده‌زگه‌هێ هه‌لبژارتنێن پارتی، راگه‌هاند، پارتی ل دووڤ وێ پلانا بۆ هه‌لبژارتنان دانای، سه‌ركه‌فتنه‌كا مه‌زن تۆماركر و نێزیكی 33 كورسیان بده‌ستڤه‌ئیناینه‌، دیاركر ژی، هێشتا هه‌موو ده‌نگ نه‌هاتینه‌ جوداكرن و ده‌نگێن ده‌نگدانا تایبه‌ت یێن ماین.

نیازی حه‌مه‌ عه‌زیز، په‌یڤدارێ ده‌زگه‌هێ هه‌لبژارتنێن پارتی، گۆت” هه‌تا نوكه‌ 85% ژ ده‌نگان یێن هاتینه‌ جوداكرن و پارتی جاره‌كا دی بوویه‌ حزبا ئێكێ و كورسیێن خوه‌ یێن زێده‌كرین، كو ل هه‌موو ده‌ڤه‌ران كورسی بده‌ستڤه‌ئیناینه‌”.

گۆت ژی” پێشتر پارتی 25 كورسی هه‌بوون، نوكه‌ بوونه‌ زێده‌تر دناڤبه‌را 30 هه‌تا 33 كورسیان، چونكه‌ هێشتا هه‌موو ده‌نگ ئێكلا نه‌بووینه‌ و ده‌نگێن ده‌نگدانا تایبه‌ت یێن ماین”.

گۆت ژی” ب گۆره‌ی وێ پلانا پارتی دیموكراتی كوردستان بۆ هه‌لبژارتنان دانای، سه‌ركه‌فتنه‌كا مه‌زن بده‌ستڤه‌ئینا و هه‌ژماره‌كا مه‌زن یا كورسیان بده‌ستڤه‌ئیناینه‌”.

دیاركر ژی”مه‌ هه‌ژماره‌كا سكالان ل سنوورێ سلێمانیێ و راپه‌رین و هه‌له‌بجه‌ تۆماركرینه‌ ژ ئه‌گه‌رێ هه‌بوونا پێشێلكاریان به‌رامبه‌ر پارتی و ئه‌وێن به‌حسێ سه‌خته‌كاریا پارتی دكر، دیاربوو كوڤ ێجارێ هیچ ده‌لیڤا سه‌خته‌كاریێ نه‌بوو، به‌لێ هه‌ر پارتی ئه‌و سه‌ركه‌فتنا مه‌زن تۆماركر، بگره‌ نه‌كو پارتی سه‌خته‌كاری نه‌كریه‌، د هه‌لبژارتنێن بۆری ژی دا غه‌در ل پارتی هاتبوو كرن و 80 هزار ده‌نگێن وێ هاتبوونه‌ سوتن، به‌لێ ڤێجارێ پارتی ده‌نگه‌كێن زۆر بده‌ستڤه‌ئینان و ئه‌ڤه‌ جهێ خوه‌شحالیا هه‌موو خه‌لكێ كوردستانێ یه‌”.

كۆمسیۆنا بلند یا هه‌لبژارتنان ل ئیراقێ د كۆنفرانسه‌كێ رۆژنامه‌ڤانی دا، ئه‌نجامێن ده‌ستپێكی یێن هه‌لبژارتنان به‌لاڤكرن، ل دووڤ وان ئه‌نجامان پارتی دیموكراتی كوردستان هه‌تا نوكه‌ 8 كورسی ل هه‌ر سێ بازنێن هه‌لبژارتنان ل پارێزگه‌ها دهۆكێ یێن مسوگه‌ر كرین و هه‌ڤركیێ ل سه‌ر دو كورسیێن دی دكه‌ت كو كورسیه‌ك ل بازنێ دویێ یه‌ و كورسیه‌ك ژی ل بازنێ سیێ.

–           بازنێ ئێكێ (دهۆك – ئامێدیێ):

خالد سلیم 25 هزار و 25 ده‌نگ.

خه‌لیل غازی  24 هزار و 75 ده‌نگ.

ئه‌ڤین سه‌لیم  16 هزار و 777 ده‌نگ.

–           بازنێ دوویێ (زاخۆ – سێمێل) :

سه‌گڤان یوسف    27 هزار و 899 ده‌نگ.

زۆزان كۆچه‌ر  21 هزار و 243 ده‌نگ.

–           بازنێ سیێ (شێخان- به‌رده‌ره‌ش – ئاكری):

موه‌فه‌ق سورچی    27 هزار و 528 ده‌نگ.

چیایی ته‌یموور   23 هزار و 528 ده‌نگ.

ڤیان سه‌بری   16 هزار و 405 ده‌نگ.

ل پارێزگه‌ها هه‌ولێرێ ژی پارتی 9 كورسی بده‌تڤه‌ئیناینه‌ ب ڤی شێوه‌ی

نه‌هرۆ مه‌حموود

محه‌مه‌د سه‌دیق

جوان عه‌بدوللا

خدر عه‌لی مه‌نتك

ئامانج مه‌حموود هه‌ركی

رێبوار هادی

له‌یلا ئه‌كره‌م

مه‌ریوان قه‌ره‌نی

سه‌باح سوبحی

ژلایێ خوه‌ڤه‌ مه‌ناف حه‌سه‌ن به‌رپرسێ نڤیسینگه‌ها هه‌لبژارتنێن لقێ 14 یێ پارتی ل مووسل گۆت” پشتی جوداكرنا 80 ژ ده‌نگێن پارێزگه‌ها نه‌ینه‌وا، پارتی 9 كورسی یێن بده‌ستڤه‌ئیناین و نێزیكه‌ ژی ژ ده‌ستڤه‌ئینانا كورسیا 10″.

گۆت ژی” پارتی دو كورسیێن بازنێ ئێك (مه‌خموور، گوێر، قه‌راج) دێ بده‌ستڤه‌ئینیت ئه‌وژی بۆ هه‌ر ئێك ژ ته‌عما لهێبی و ئیخلاس دلێمی و ل بازنێ 2 (باشیك، شێخان، تلكێف، ئه‌لپووش) سێ به‌ربژارێن پارتی سه‌ركه‌فتن ب ده‌ستڤه‌ئینایه‌ ئه‌وژی هه‌ر ئێك ژ شه‌ریف سلێمان، كاڤین مزووری، شێروان دوبه‌ردانی، هه‌روه‌سا ل سنوورێ شنگالێ كو بازنێ سیێ یێ نه‌ینه‌وایه‌ سێ به‌ربژارێن پارتی ب سه‌ركه‌فتینه‌ ئه‌وژی مه‌حما خه‌لیل، ماجد شنگالی و ڤیان ده‌خیل”.

دیاركر ژی كو به‌ربژارێ پارتی ئیبراهیم محمه‌مه‌د ل سنوورێ زومار یێ سه‌ركه‌فتی كو دكه‌ڤیته‌ سنوورێ بازنێ چارێ و ژبلی وان 9 كورسیان، به‌ربژاره‌كێ دی یێ پارتی د هه‌ڤركیێ دایه‌ ل گه‌ل به‌ربژاره‌كێ لایه‌نه‌كێ دی بۆ بده‌ستڤه‌ئینانا كورسیا 10 بۆ پارتی ل سنوورێ نه‌ینه‌وا.

ل پارێزگه‌ها سلێمانیێ ژی پارتی دو كورسی ب ده‌ستڤه‌ئیناینه‌ و ل سنوورێ پارێزگه‌ها  كه‌ركووكێ ژی كوردان شه‌ش كورسی بده‌ستڤه‌ئینان كو دو كورسی پارتی بده‌ستڤه‌ئیناینه‌  ب ڤی شێوه‌ی:

شاخه‌وان عه‌بدوللا

نه‌جوا حه‌مید

ئه‌ڤرۆ:

د كۆمبوونه‌كا جه‌ماوه‌ری یا به‌رفرهه‌ دا، سكرتێرێ مه‌كته‌با سیاسی یا پارتی دیموكراتی كوردستان رۆناهی خسته‌ سه‌ر ره‌وشا نوكه‌ یا ئیراقێ و خه‌باتا پارتی وراگه‌هاند، ئه‌م ژ ژیانا خوه‌ نه‌ د رازی نه‌، به‌لێ به‌راوردكرن ب ده‌ڤه‌رێن دی یێن ئیراقێ، وه‌سا ره‌وشا مه‌ یا خراب نینه‌”.

فازل میرانی، سكرتێرێ مه‌كته‌با سیاسی یا پارتی د هه‌وا هه‌لبژارتنێن پارتی دا بۆ جه‌ماوه‌رێ رۆژئاڤایا دیجله‌ و زومار، گۆت” هه‌كه‌ دوهی هه‌ژمارا مه‌ ژ چه‌ند كه‌سان ده‌رباز نه‌دبوو ل ده‌ڤه‌را زومار و ده‌وروبه‌رێن وێ، ئه‌ڤرۆ ب هزاران پێشمه‌رگه‌ و كادر و ئه‌ندام یێن هه‌ین ل ڤێ ده‌ڤه‌را دوور ژ چیا و هێشتا مه‌ بارزانیێ نه‌مر نه‌دیتبوو و مه‌ ده‌ست ب شۆره‌شێ كر، ل ڤێ ده‌ڤه‌رێ ب هیچ شێوه‌كی خه‌لكی دژی شۆره‌شێ چه‌ك هه‌لنه‌گرت و مه‌ چه‌ندین شه‌هید ل ڤێ ده‌ڤه‌رێ یێن داین”.

میرانی گۆت ژی” كه‌س نه‌شێت بیر و باوه‌ران ب زۆری بكه‌ته‌ دناڤ مێشكێ مرۆڤی دا، جهێ هه‌موو كه‌سان دناڤ پارتی دا یێ هه‌ی، چونكه‌ ژ گه‌له‌ك روویان ڤه‌ پارتی ئه‌و حزبه‌ جهێ هه‌موو كه‌سه‌كی تێدا یێ دبیت، پارتی حزبه‌كا نه‌ته‌وی دیموكراتیه‌، مرۆڤ ل سه‌ر هه‌ر بیر و باوه‌ره‌كی بیت، دشێت دناڤ پارتی دا جهێ وی هه‌بیت”.

فازل میرانی ئاماژه‌ كر” باوه‌ری ل ئیراقێ نه‌مایه‌، ژبه‌ركو ده‌مێ به‌رژه‌وه‌ندیا تاكه‌كه‌سی و حزبی دهێته‌ پێش به‌رژه‌وه‌ندیا گشتی، دێ نیشتمان زیاندار بیت، مخابن سه‌روه‌ری و سه‌ربخوه‌یا ئیراقێ د وه‌همی نه‌، پێدڤیه‌ مه‌ وه‌لاته‌ك هه‌بیت ب گۆره‌ی قانوونێن نێڤده‌وله‌تی وه‌لاتیێن خوه‌ بپارێزیت، ئه‌م ل كوردستانێ ب هه‌مان شێوه‌ی نه‌، كێشێن  د ناڤبه‌را به‌غدا و هه‌ولێرێ دا، كێشێن دناڤ ئێك خێزانێ دانه‌، به‌لێ هه‌كه‌ به‌غدا مافێ هه‌ولێرێ دابین نه‌كه‌ت، دێ كێشه‌ دروست بیت، ئه‌ڤرۆ برایێن شیعه‌ زۆرینه‌یا ئیراقێ پێك دئینن و ده‌ستهه‌لات یا دده‌ستێ وان دا، به‌لێ زۆرینه‌یا شیعی یه‌ و زۆرینه‌یا ئیراقی نینن، چونكه‌ هه‌كه‌ زۆرینه‌یا ئیراقی بن، پێدڤیه‌ مافێن كوردان و ئه‌ره‌بێن سوننه‌ بهێنه‌ دابینكرن”.

رۆهنكر ژی” هه‌لبژارتنێن ڤێجاری گوهۆرینه‌كا دی یه‌ ل ئیراقێ، هه‌ر گوهۆرینه‌كا بهێته‌ كرن، بۆ باشتركرنا ره‌وشا ئیراقێ یه‌ ب شێوه‌كێ رێژه‌یی، پێدڤیه‌ به‌ربژارێن مه‌ خوه‌ دوور بكه‌ن ژ هنده‌ك سۆزا، پێدڤیه‌ به‌ربژارێن مه‌ سۆزا وێ چه‌ندێ بده‌ن فشارێ بێخنه‌ سه‌ر ده‌زگه‌هێن حوكمه‌تێ بۆ پێشكێشكرنا خزمه‌تگوزاریان نه‌كو په‌رله‌مانتار ب خوه‌ سۆزا بده‌ت، ئه‌م ژ ره‌وشا خوه‌ د رازی نینین، به‌لێ ره‌وشا مه‌ ل گه‌ل ده‌ڤه‌ریچن دی یێن ئیراقێ ناهێته‌ به‌رواردكرن، هزار ملیار دینار داهاتێ ئیراقێ بوو و هێشتا وه‌لاتیێن وێ بێ خزمه‌تگوزاری دژین”.

ئه‌ڤرۆ، نه‌وزاد هلۆری

سكرتێرێ‌ مه‌كته‌با سیاسی یا پارتی، فازل میرانی، د به‌رده‌وامیا هه‌وا هه‌لبژارتنێن پارتی دا ل دهۆكێ راگه‌هاند، نه‌ته‌وه‌ و نیشتمان دناڤ ئیسلاما سیاسی دا چاره‌سه‌ر نابیت ژبه‌ركو د ئیسلامێ‌ دا جوداهی نینه‌، به‌لێ‌ ل سه‌رده‌مێ‌ عوسمانیان هه‌تا نوكه‌ جوداهی  دگه‌ل كوردان دهێته‌كرن و كورد نه‌ بچووكترن ژ تورك و فارس و عه‌ره‌بان، به‌لكو دڤێت وه‌كو وان نه‌ته‌وه‌ بیت.

گۆت ژی” مه‌ ریفراندۆم كر و بووچۆنا خه‌لكێ‌ خوه‌ وه‌رگرت بو وێ‌ چه‌ندێ هه‌كه‌ ده‌لیڤه‌ بهێته‌ پێش سه‌ربخوه‌ بین، ئاریشا مه‌ ل ئیراقێ‌ ل گه‌ل ناڤا نینه‌ به‌لكو ل گه‌ل میشكێ یه‌، ئیراقێ‌ پشتی ریفراندۆمێ‌ دژایه‌تیا كوردستانێ‌ ب شه‌ری كر، وه‌كو كه‌نه‌دا نه‌ كر كو ل پارچه‌كا وێ سێ‌ جاران ریفراندۆم هاته‌كرن و هه‌رسێ‌ جاران ژی ریفراندۆم ب سه‌ر نه‌كه‌فت، به‌لێ‌ كه‌نه‌دا زۆری ل وان نه‌كر و تانك و فرۆكه‌ نه‌ئینان سه‌ر وان، ل گه‌ل هه‌موو تشته‌كێ‌ ژی دڤێت ئه‌م كورد خه‌ونا خوه‌ ژبیر نه‌كه‌ین و ل شیانان بگه‌رهین”.

زێده‌تر گۆت”ره‌وشا چو لایه‌نان ل ئیراقێ‌ یا باش نیه‌، ژ به‌ر كو ئیراق ده‌وله‌ته‌كا نیشتمانی نینه‌، به‌لكو یا مه‌زبی و حزبی یه‌، ئه‌و لایه‌نێن د ئیراقێ‌ دا دژین خودان بریار نینن، ئه‌م وه‌كو كورد هه‌ڤپشكین و دڤێت مه‌ پشكا خوه‌ د بریارێ‌ دا هه‌بیت و بزانین چه‌وا ب رێڤه‌ دچیت، خه‌باتا مه‌ دێ‌ یا به‌رده‌وام بیت هه‌تا ل گه‌ل هه‌ڤپشكێ‌ خوه‌ بگه‌هین ئه‌نجامه‌كی كا مه‌ چ دڤێت”.

سكرتێرێ‌ مه‌كته‌با سیاسی یا پارتی گۆت ژی” ل كوردستانێ‌ و ئیراقێ‌ ژی هێرشا ل سه‌ر پارتی بوویه‌ هه‌وا هه‌لبژارتنان بۆ هنده‌ك ژ وان هێز و لایه‌نان، له‌وا گرنگه‌ ئه‌م به‌حسێ خوه‌ بكه‌ین یان ژی ب وێره‌كی به‌حسێ باشی و خرابیێن خوه‌ بكه‌ین، ژ به‌ر كو دژایه‌تیا پارتی شه‌رمزاریه‌كا خراب د دووڤدا دهێت، پارتی هه‌رده‌م ده‌ستكه‌فتان بۆ ملله‌تی دئینیت و پاراستنێ‌ ل سه‌ر دكه‌ت”.

پتر رۆهنكر” دڤێت ئه‌ڤرۆ ئه‌م هه‌موو خوه‌ به‌رهه‌ڤ بكه‌ین بۆ ده‌نگدانێ‌، پارتی به‌ری بچیته‌ دناڤ هه‌ڤركیان دا پیرۆزیێن خوه‌ دبینیت، له‌وما دڤێت كورد و خه‌لكێ‌ ده‌ڤه‌رێ‌ ب هه‌ڤرا ژن و مێر بچنه‌ ده‌نگدانێ‌ و ده‌نگێن خوه‌ بده‌ن”.

ئه‌ڤرۆ:

ل درێژیا هه‌وا پارتی بۆ هه‌لبژارتنێن جڤاتا نوونه‌رێن ئیراقێ، فازل میرانی، سكرتێرێ مه‌كته‌با سیاسی یا پارتی د گۆتاره‌كێ دا ل كه‌رنه‌ڤالێ لقێ دو یێ پارتی ل هه‌ولێرێ راگه‌هاند، سه‌ركه‌فتیێ مه‌زن دڤێت ملله‌تێ مه‌ و وه‌لاتێ مه‌ بیت.

فازل میرانی د گۆتارا خوه‌ بۆ كادرێن پارتی گۆت” ب بۆچوونا من ئه‌ڤ حزبه‌، یان ئه‌و حزب د هه‌لبژارتنان دا ب سه‌ركه‌ڤیت، ل گه‌ل خه‌باتا هه‌وه‌ وه‌بكه‌ن كو نه‌ته‌وه‌ك ب سه‌ركه‌ڤیت قابلێ به‌راوردكرنێ نینه‌، ئه‌وا ئه‌م وه‌كو پارتی خه‌ونێ پێڤه‌ دبینین، ئه‌و به‌رهه‌مه‌یه‌ كو ل سه‌ر ده‌ستێ هه‌وه‌، نه‌ته‌وێ مه‌ ب هه‌موو ژییاتیێن خوه‌ یێن سیاسی و نه‌ته‌وی خوه‌ دگه‌هینیت، ئه‌وژی ئه‌وه‌ كو ئه‌ڤ ملله‌ته‌ هه‌ست ب نه‌بوونا ده‌وله‌ت و كیانێ خوه‌ بكه‌ت”.

گۆت ژی” ئه‌وێن ل سه‌ر ده‌ستێ هه‌وه‌ په‌روه‌رده‌ بووین، نوكه‌ حزب ب رێڤه‌ دبه‌ن، ئه‌ڤجا چ باش یان خراب، مه‌زن یان بچووك، سه‌ركه‌فتی یان نه‌ سه‌ركه‌فتی، دیسا ئه‌ز دبێژم سه‌ركه‌فتیێ مه‌زن پێدڤیه‌ ملله‌تێ مه‌ و وه‌لاتێ مه‌ بیت”.

میرانی ئاماژه‌كر كو وه‌لاتێ مه‌ به‌ری هه‌موو تشته‌كی پێدڤی ب ئارامیێ و خزمه‌تگوزاریان یا هه‌ی، بۆ وێ چه‌ندێ هه‌موو پێكهات، هه‌ر ئێك د بوارێ خوه‌ دا بشێت پلانان بدانیت، چونكه‌ ئه‌ڤ وه‌لاته‌ یێ فره‌پێكهاته‌ و فره‌ئایین و فره‌ ژێیاتیا سیاسی یه‌، هه‌موو ئه‌ڤه‌ د نیشتمانه‌كی دا ب ناڤێ كوردستان یێم كۆمبووین، ئه‌و كوردستانا دوهی ل سه‌ر ده‌ستێ پارتی ئۆتۆنۆمی بده‌ستڤه‌ئینای و ئه‌ڤرۆ ژی ل سه‌ر ده‌ستێ هه‌موویان گه‌هشتیه‌ ده‌ستكه‌فتێن خوه‌”.

خویاكر” بلا ئه‌م وه‌كو خه‌لكێ دی نه‌بین، سویند ژی ناخوین كو به‌رده‌وام د سه‌ركه‌فتی بین، سویند ژی ناخوین كو سه‌ركه‌فتنا خه‌لكێ دی خه‌ونه‌، ئه‌م د بازنه‌كی دا هزر دكه‌ین و پلانان دادرێژین و گاڤان دهاڤێژین كو دبێژنێ بازنێ واقعبینیێ، ئه‌وێن د ڤی بازنی دا گاڤان دهاڤێژن، یێ پشت راستم چ جاران زیاندار نابن و هه‌كه‌ به‌ر ب پێش نه‌چن، به‌ر ب ب پاشڤه‌ نازڤرن، به‌لێ ئه‌وێن خوه‌په‌رست و ژ ده‌رڤه‌ی واقعبینیێ و خه‌لكێ دی قه‌بوول ناكه‌ن، هه‌ر هزره‌كا بكه‌ن و هه‌ر بریاره‌كا بده‌ن و هه‌ر گاڤه‌كا ب هاڤێژن، هه‌كه‌ به‌ر ب پاشڤه‌ نه‌زڤرن، به‌ر ب پێشڤه‌ ناچن، دیرۆكا ئه‌زموونا پارتی ڤێ چه‌ندێ د سه‌لمینیت”.

سكرتێرێ مه‌كته‌با سیاسی یا پارتی دووپاتی ل سه‌ر وێ چه‌ندێ كر كو ده‌ستكه‌فت د زۆرن، به‌لێ نابیت ئه‌م بیژینه‌ ملله‌تێ خوه‌ هه‌ر چ تشتێ وی خواستی، مه‌ یێ بده‌ستڤه‌ئینای، ئه‌ڤه‌ راست نینه‌، خه‌ون و خواستێن ملله‌تێ مه‌ ئێكجار مه‌زنتره‌ ژ بابه‌تێ مادی و به‌رچاڤكی، خواستا ملله‌تێ مه‌ سه‌ربخوه‌ی و سه‌رقامگیریه‌، چونكه‌ وه‌سا هزر دكه‌ین كو بێی سه‌ربخوه‌ییێ، سه‌قامگیری نابیت، ئه‌ڤه‌ ئارمانجا ستراتیژی یا ئه‌ڤرۆ یان سوباهی یا مه‌یه‌، به‌لێ وه‌سا هزر ناكه‌ین كو چونكه‌ ئه‌ڤرۆ بده‌ستڤه‌ نه‌هات،ده‌ستان ژێ به‌رده‌ین، یان بێژین ئه‌ڤه‌ خه‌ونا حێشترێ یه‌، نه‌خێر، پێدڤیه‌ ئه‌م خوه‌ ل گه‌ل پێشهاتێن نوو بگونجینین به‌ر ب وێ ئه‌وا دناڤ مێشكێ مه‌ دا”.

ئه‌ڤرۆ:

په‌یڤدار و ئه‌ندامێ مه‌كته‌با سیاسی یا پارتی، مه‌حموود محه‌مه‌د، د ئاهه‌نگا هه‌وا هه‌لبژارتنێن پارتی ل شاره‌زوور راگه‌هاند، ئه‌م شانازیێ ب بۆری و نوكه‌ یا پارتی دكه‌ین و 75 ساله‌ خه‌لكێ كوردستانێ ل دۆر رێبازا بارزانی یێن كۆمبووین، ئاماژه‌كر ژی كو پارتی و به‌ربژارێن وێ به‌رگریێ ژ مافێن خه‌لكێ كوردستانێ دكه‌ن، له‌وما ده‌نگ ب پارتی بده‌ن بۆ حوكمرانیه‌كا سه‌رتاسه‌ری و پاراستنا قه‌وارێ كوردستانێ.

مه‌حموود محه‌مه‌د گۆت ژی” ئه‌ندامێن پارتی د سه‌ربلندن ب پارته‌كا نه‌ته‌وی و نیشتمانی، كو ب درێژیا دروستبوونا وێ ل سالا 1946 هه‌تا نوكه‌ بزاڤا بده‌ستڤه‌ئینانا مافێ خه‌لكێ چسته‌م لێكری كریه‌”.

گۆت ژی” ئه‌م هه‌موو پێكڤه‌ په‌روه‌رده‌كارێن وێ رێبازێ نه‌ ب كور و كچ ڤه‌، ب زه‌لام و ژن ڤه‌، ب پیر و لاو ڤه‌، ئه‌ندامێن پارتی و په‌روه‌رده‌كارێن رێبازا بارزانی، شه‌رم ژ بۆریێ ڤێ حزبێ و وێ رێبازێ نینه‌، چونكه‌ دزانن ئه‌ڤ رێبازه‌ و ئه‌ڤ حزبه‌ ده‌ستكه‌فتێن مه‌زن بۆ گه‌لێ كوردستانێ یێن بده‌ستڤه‌ئیناین، پارتی ژ پێخه‌مه‌ت ئێكرێزیا خه‌لكێ كوردستانێ هاتیه‌ دامه‌زراندن و هه‌موو سنوورێن جوگرافی و عه‌شائیریو دیالیكتیكی ده‌ربازكرن و تێكهه‌لیه‌ك ل سه‌رانسه‌ری كوردستانێ دروست كر”.

ئاماژه‌ كر” حوكمرانیا باش و ئاڤه‌دانی و پرۆژه‌ ل وان جهان دهێنه‌ بجهئینان  ئه‌وێن پارتی دیموكراتی كوردستان حوكمرانیێ لێ دكه‌ت، پلانێن پارتی پێك دهێن ژ ئاڤه‌دانكرن و بلندكرنا ئاستێ ژیانا خه‌لكی و دابینكرنا خزمه‌تگوزاریا، هه‌روه‌سا پارتی دڤێت قه‌وارێ هه‌رێما كوردستانێ بپارێزیت و ئاخا نیشتمانی ژ پارچه‌بوونێ بپارێزیت، پارتی بۆچوونه‌كا دروست بۆ ژیانێ و سیاسه‌تێ و بابه‌تێن جڤاكی و ئابووری ل ده‌ف هه‌یه‌”.

مه‌حموود محه‌مه‌د دیاركر” پێدڤیه‌ ئه‌ڤ هه‌لبژارتنه‌، ببیته‌ هه‌لبژارتنێن جودا و ئیرادا خه‌لكی تێدا بهێته‌ بكارئینان و كێشێن خه‌لكی بهێنه‌ چاره‌سه‌ركرن و خوه‌شگوزه‌رانی بۆ بهێته‌ دابینكرن، ئیراق ب په‌ترۆل و ئاڤ و چاندنا خوه‌ دشێت دو وه‌لاتێن وه‌كو خوه‌ ب رێڤه‌ببه‌ت، ئاستێ هه‌ژاریێ ل ئیراقێ ژ 30% ده‌رباز بوویه‌ و بێكاری ژی ل هنده‌ك جهان دا ژ 50% ده‌ربازبوویه‌، هه‌كه‌ داهاتی سه‌رئه‌رد و ژێر ئه‌رد ل گه‌ل شیانێن مرۆڤی هاتبانه‌ بكارئینان، ئیراق دا ئێك ژ وه‌لاتێن خوه‌شگوزه‌ران بیت”.

هه‌روه‌سا گۆت” ئه‌وا گرنگ ئه‌م ل ڤی وه‌لاتی دا ب هه‌ناسه‌كا دۆستانه‌ كاردكه‌ین و دخوازین به‌ربژارێن خوه‌ سه‌ربێخین، بۆ وێ چه‌ندێ بچن ل به‌غدا ده‌ستێ دۆستایه‌تیێ بۆ هه‌موو لایه‌كی درێژ بكه‌ن، دخوازین پێكڤه‌ ژیان ل ئیراقێ هه‌ڤشێوێ كوردستانێ بیت”.

پتر رۆهنكر” ب راستی وه‌لاتیێن كوردستانێ هه‌ژی وی چه‌ندێ نینن د نیگه‌رانیێ دا بن، پێدڤیه‌ نوونه‌راتیا خه‌لكی بكه‌ین ل به‌غدا و مافێن وان بده‌ستڤه‌بینین و ئه‌و مافێن بده‌ستڤه‌ هاتین ژی بپارێزین”.

ل دووماهیێ گۆت” خه‌لكێ كوردستانێ ژ درووشمبازیا هنده‌ك حزب و لایه‌نان یێ تێر بووی، كار و كریار و خزمه‌تگوزاری دڤێت، وێ چه‌ندێ ژی د وان دا دبینیت یێن ئه‌زموون د حوكمرانیێ دا هه‌ی، نه‌كو وان یێن تنێ درووشم هه‌ین “.

ئه‌ڤرۆ:

د ئاهه‌نگا هه‌وا هه‌لبژارتنێن پارتی دیموكراتی كوردستان دا ل شه‌قلاوه‌، سیداد بارزانی ئه‌ندامێ سه‌ركردایه‌تیا پارتی گۆتاره‌ك پێشكێكر وتێدا ئامه‌ژه‌كر، پارتی خودان سۆزا خوه‌یه‌ و ئه‌وا پێ چێبووی یا بجهئینای، هه‌روه‌سا گۆت ژی، ده‌نگدان ب پارتی، ده‌نگدانه‌ ب سه‌رۆك بارزانی.

سیداد بارزانی، ئه‌ندامێ سه‌ركردایه‌تیا پارتی گۆت ژی” پارتی به‌رده‌وام باوه‌ری ب هه‌لبژارتنان و پرۆسا دیموكراسیێ هه‌بوو، ئێكه‌م هه‌لبژارتن ژی ل سه‌ر پێشنیازا سه‌رۆك بارزانی بوو د گۆتاره‌كا وی دا ل باژێرێ كۆیه‌ كو پرۆژێ ئه‌نجامدانا هه‌لبژارتنان پێشنیازكر و پاشی هه‌لبژارتن هاتنه‌ ئه‌نجدامدان، هه‌تا ل هه‌لبژارتنان ژی پارتی یا به‌رهه‌ڤ بوو ل مافێ خوه‌ خوه‌ش ببیت و سیسته‌مێ پێنجی ب پێنجی قه‌بوول كر، بۆ وێ ئێكێ ره‌وشا كوردستانێ تێك نه‌چیت”.

سیداد بارزانی دیاركر” ب هێزبوونا كوردستانێ، ژ هێزبوونا پارتی دایه‌، ژبه‌ر وێ چه‌ندێ دوژمن هێرشی پارتی دكه‌ن تاكو كوردستانێ لاواز بكه‌ن، ئه‌م دزانین خه‌لكه‌ك هێرشێ دكه‌ته‌ سه‌ر پارتی، به‌لێ پارتی كێم د ئاخڤیت و پتر خزمه‌تێ دكه‌ت، سه‌ربلندین ب دیرۆكا خوه‌ وه‌كو پارتی، خه‌لكه‌ك شه‌رم ژ بۆریێ خوه‌ دكه‌ت، به‌لێ پارتی شانازیێ ب بۆریێ خوه‌ دكه‌ت”.

سیداد بارزانی ئاماژه‌ ب وێ ئێكێ ژی كر” جهێ ده‌ستێ پارتی یێ دیاره‌ د به‌رگریێ و ئاڤه‌دانكرنا كوردستانێ دا، به‌ری چه‌ند رۆژان چار سال ب سه‌ر ریفراندۆما سه‌ربخوه‌یێ دا ده‌رباز بوون، هنده‌ك كه‌س ئه‌زمان درێژیێ دكه‌ن و دبێژن ژبه‌ر ڤێ چه‌ندێ ریفراندۆمێ سه‌رنه‌گرت، به‌لكو  ریفراندۆم تاكه‌ دیكیۆمێنته‌ د ده‌ستێ ملله‌تێ كورد دا، به‌لێ هه‌موو ده‌مان تشت ژ وێرێ تێك دچیت كو ل ناڤخوه‌یا ته‌ كارخراب ببیت، خیانه‌تا 16 ئۆكتۆبه‌رێ بوو ئه‌گه‌رێ وێ چه‌ندێ یا كو نه‌دهاته‌ چاڤه‌رێكرن، روودای”.

پتر رۆهنكر” نیه‌تا وان ئه‌وه‌ پارتی نه‌مینیت وناڤێ هه‌رێما كوردستانێ نه‌مینیت، به‌لێ قه‌هره‌مانا ل مه‌خموورێ و سحێلا، هه‌ڤكێش به‌رۆڤاژیكر، ده‌ربازكرنا ره‌وشێ رامان ژێ ئه‌وه‌ مه‌ كه‌سه‌ك یێ هه‌ی تنێ ئارمانجا وی بده‌ستڤه‌ئینانا مافێن خه‌لكێ كوردستانێ و پاراستنا كوردستانێ یه‌، جوداهیا مه‌ ل گه‌ل لایه‌نێن دی ئێكجار زۆره‌، پارتی سه‌رۆكه‌ك یێ هه‌ی كو باوه‌ری یا هه‌ی ژ لایێ دۆست و دوژمنان ڤه‌، ئه‌وا پێچیبووی یا بجهئینای”.

هه‌روه‌سا گۆت” ل چه‌ند رۆژێن داهاتی دێ چینه‌ سه‌ر سندوقێن ده‌نگدانێ، داخوازێ ژ دۆست و هه‌ڤالێن خوه‌ بكه‌ن كو بۆ وێ چه‌ندێ ویژدانا خوه‌ بكاربینن، پارتی خودانا سۆزا خوه‌ بوو، ل رۆژێن ته‌نگاڤیان دا یا به‌رهه‌ڤ بوو بۆ به‌رگریێ و ل رۆژێن دی ژی دا ده‌ست ب ئاڤه‌دانیێ كریه‌، ده‌نگدان ب پارتی، ده‌نگدانه‌ ب سه‌رۆك بارزانی و خوینا شه‌هیدان”.

ئه‌ڤرۆ:

نێچیرڤان بارزانی سه‌رۆكێ هه‌رێما كوردستانێ دوهی پێشوازی ل محه‌مه‌د مووش وه‌زیرێ بازرگانییا توركیا كر و په‌یوه‌ندیێن بازرگانی و ئابووری یێن هه‌رێما كوردستانێ و ئیراقێ ل گه‌ل توركیا گه‌نگه‌شه‌ كرن.

سه‌رۆكێ هه‌رێما كوردستانێ په‌یوه‌ندیێن ئابووری و بازرگانی یێن هه‌رێما كوردستانێ و توركیا ب گرنگ و ستراتیژی ل قه‌له‌مدان و پشته‌ڤانییا خوه‌ بۆ وه‌به‌رهێنان و بازرگانیا بیانی نیشاندا و ئاماده‌ییا هه‌رێما كوردستانێ بۆ پێشكێشكرنا هه‌موو ئاسانكاریێن پێدڤی بۆ بازرگانیا توركیا د گه‌ل هه‌رێما كوردستانێ و ئیراقێ نیشان دا.

وه‌زیرێ بازرگانیا توركیا خواستا وه‌لاتێ خوه‌ بۆ پێشڤه‌برنا په‌یوه‌ندیێن بازرگانی و به‌رفره‌هكرنا چالاكیێن ئابووری ل هه‌رێما كوردستانێ دوپاتكر و ئاماژه‌ ب چه‌ند نموونه‌یێن سه‌ركه‌فتی یێن وه‌به‌رهێنانا توركیا ل ده‌ڤه‌رێ‌ كر كو ب هه‌مان شێوه‌ ل هه‌رێما كوردستانێ ژی بهێنه‌ دوباره‌ كرن و ژ وێرێ‌ ژی بۆ هه‌موو ئیراقێ‌ بهێنه‌ به‌رفره‌هكرن.

هه‌ر دوهی وه‌زیرێ‌ بازرگانیا توركیا ژ ئالیێ‌ مه‌سرور بارزانی سه‌رۆكێ‌ حوكمه‌تا هه‌رێما كوردستانێ‌ ڤه‌ پێشوازی لێ‌ هاته‌ كرن و سه‌رۆكێ‌ حوكمه‌تێ‌ ئاماژه‌ ب گرنگیا پێشڤه‌برنا په‌یوه‌ندیان و هه‌ماهه‌نگیێ‌ ل گه‌ل توركیا كر و سه‌رۆكێ‌ حوكمه‌تێ‌ دوپات كر كو هه‌رێما كوردستانێ‌ هه‌رده‌م دخوازیت په‌یوه‌ندیێن باش ل گه‌ل توركیا ل سه‌ر بنه‌مایێ‌ رێز و به‌رژه‌وه‌ندییێن هه‌ڤپشك و هه‌ڤسوییه‌كا باش هه‌بن.

ئه‌ڤرۆ:

جێگرێ سه‌رۆكێ پارتی دیموكراتی كوردستان، نێچیرڤان بارزانی د داخۆیانیه‌كا رۆژنامه‌ڤانی دا، به‌حسێ هه‌لبژارتنێن جڤاتا نوونه‌رێن ئیراقێ و پێدڤیا پشكداریا ده‌نگده‌ران تێدا ب مه‌به‌ستا پاراستن و گره‌نتیكرنا مافێ هه‌رێما كوردستانێ ل به‌غدا دكه‌ت.

نێچیرڤان بارزانی، جێگرێ سه‌رۆكێ پارتی دیموكراتی كوردستان، گۆت” هه‌لبژارتنێن داهاتی گه‌له‌ك د گرنگن بۆ هه‌موو كوردستانێ و ب تایبه‌تی بۆ گره‌نتیكرنا ئه‌و ده‌ستكه‌فتێن كو هه‌رێما كوردستانێ و كوردان ل به‌غدا هه‌ین، ژ ڤێ روانگه‌هێ پارتی ب هه‌موو شێوه‌كی خوه‌ بۆ ڤان هه‌لبژارتنان به‌رهه‌ڤ كریه‌، چونكه‌ مه‌به‌ست ژ ڤان هه‌لبژارتنان و پشكداریا كارا بۆ پاراستنا ده‌ستكه‌فتێن هه‌رێما كوردستانێ یه‌ كو بۆ وان ده‌ستكه‌فتان پارتی رۆله‌كێ سه‌ره‌كی د ڤێ پرسێ دا یێ هه‌ی و پێدڤیه‌ هه‌موو ئه‌ندام و لایه‌نگرێن پارتی ب شێوه‌كێ جدی پشكداریێ دڤان هه‌لبژارتنان دا بكه‌ن و پشكداریا هه‌ر ده‌نگه‌كی گره‌نتیكرنا وان ده‌ستكه‌فتانه‌ و به‌ر ب پێشڤه‌برنا وانه‌ د ئیراقێ دا”.

سه‌باره‌ت زڤرینا پارتی بۆ كه‌ركووكێ و میكانیزما زڤرینا پارتی، گۆت” باره‌گایێن پارتی ل كه‌كووكێ دێ هێنه‌ ڤه‌كرن، به‌لێ پرسا كه‌ركووكێ گه‌له‌ك ژ ڤه‌كرنا باره‌گایه‌كی مه‌زنتره‌ و پێدڤی ب چاره‌سه‌ریه‌كێ یا هه‌ی كو د چارچۆڤێ ئیراقێ دا بۆ بهێته‌ دیتن ژوان ژی پێدڤیه‌ مادا 140 بهێته‌ بجهئینان”.

سه‌باره‌ت په‌یوه‌ندیێن د ناڤبه‌را هه‌ولێرێ و به‌غدا، نێچیرڤان بارزانی گۆت” په‌یوه‌ندیێن هه‌ولێرێ و به‌غدا دباشن، به‌لێ هه‌كه‌ مه‌به‌ست ئه‌وه‌ كو ئایا هیچ كێشه‌ك یان ئه‌و كێشێن هه‌تا نوكه‌ هه‌ین هاتینه‌ چاره‌سه‌ركرن؟ نه‌خێر، هه‌تا نوكه‌ نه‌هاتینه‌ چاره‌سه‌ركرن، ب وێ هیڤیێ نه‌ كو پشتی هه‌لبژارتنان ئه‌و كێشێن هه‌تا نوكه‌ ماین چاره‌سه‌ری بۆ بهێته‌ دیتن”.