بریاره‌ په‌نابه‌رێن عیراقی ژ یونانێ بهێنه‌ ڤه‌گه‌راندن

06/08/2020 12:12

ئه‌ڤرۆ نیوز:

بریاره‌ ئه‌ڤرۆ ژماره‌یه‌كا په‌نابه‌رێن عیراقی و كورد تیدانه‌ ژ یونانێ بهێنه‌ دیپورتكرن بۆ عیراقێ.

بریاره‌ ئه‌ڤرۆ 140 په‌نابه‌رێن عیراقی و وه‌لاتیێن هه‌رێما كوردستانێ ژی دناڤا وان دا هه‌نه‌ ب رێكا قونسلخانه‌یا عیراقێ ل یونانێ دێ هێنه‌ ڤه‌گه‌راندن بۆ عیراقێ و پاشی ل فرۆكخانه‌یا به‌غدا دانن و یێن كورد ژی هێنه‌ ره‌وانه‌كرن بۆ فرۆكخانه‌یا هه‌ولێر و سلیمانیێ.

قونسلخانه‌یا عیراقێ به‌رده‌وام د ناڤنڤیسینا ئه‌وان په‌نابه‌رێن عیراقی دایه‌ كۆ ده‌ستا ژ په‌نابه‌ریا خو دئینن و ژ ئه‌وی وه‌لاتی ڤه‌دگه‌رن.

د چارچوڤه‌یێ ڤه‌گه‌راندنا په‌نابه‌رێن عیراقی و كورد ئه‌ڤرۆ 140 په‌نابه‌ر دێ هێنه‌ ڤه‌گۆهساتن بۆ عیراقێ.

پلێتێن نوویێن ئاهێن خوارنێ‌ گه‌هشتنه‌ دهۆك

05/08/2020 14:17

163

ئه‌ڤرۆنیۆز، سالار دۆسكی:

رێڤه‌به‌رێ‌ رێكخستنا پلێتێن ئاهێن خوارنێ‌ و هه‌ڤده‌م رێڤه‌به‌رێ‌ دابه‌شكرنا ئاهێن خوارنێ‌ ب وه‌كاله‌ت، ئه‌ڤرۆ رۆژا چارشه‌مبی دیاركر كو : سالانه‌ پلێتێن ئاهێن خوارنێ‌ ل به‌غدا دهێنه‌ كوپیكرن و ئه‌ف ساله‌ ژی هاتنه‌ كوپیكرن، ئه‌ف ساله‌ هه‌له‌بجه‌ ژی هاتیه‌ كوپیكرن وه‌ك پارێزگه‌هـ هاتیه‌ هه‌ژمارتن و ئه‌ڤه‌ ژی ده‌سكه‌فته‌ كه‌، ئه‌ڤرۆ 5/8/2020 پلێت گه‌هشتنه‌ هه‌رێما كوردستانێ‌ و پارێزگه‌ها دهۆك، پشتی ده‌واما فه‌رمی ده‌ست پێ‌ دكه‌ت دێ‌ ل سه‌ر خه‌لكی هێنه‌ به‌لاڤه‌كرن و پلێت ب زمانێ‌ كوردی و عه‌ره‌بی نه.

حسێن سه‌بری عه‌بدوالخالق، رێڤه‌به‌رێ‌ رێكخستنا پلێتێن ئاهێن خوارنێ‌، رێڤه‌به‌رێ‌ دابه‌شكرنا ئاهێن خوارنێ‌ ب وه‌كاله‌ت گۆت ژی: ل دووف پلێتا ئه‌رزاقی هه‌تا 1/7/2020 ئاكنجیێن دناڤا پارێزگه‌ها دهۆكێ‌ دا دژین ملیۆنه‌ك و 271 هزار و 258 كه‌سن، ئاواره‌ 293هزار 935 كه‌سن و ئه‌ڤ هه‌ژماره‌ ل به‌غدا هاتیه‌دانان و حوكمه‌تا عیراقێ‌ بڤێ‌ هه‌ژمارێ‌ ره‌فتارێ‌ ل گه‌ل كوردستانێ‌ دكه‌ت هه‌تا بۆ چوونا حه‌جێ‌ و دانا بودجێ‌ ئانكو نوكه‌ ملیۆنه‌ك و 565هزار و 193 كه‌س ل دهۆك دژین، هنده‌ك هه‌نه‌ نه‌هاتینه‌ توماركرن دڤێ‌ ئامارێ‌ دا كو پلێتا ئه‌رزاقی یا مووسل یان مادێ‌ 140 یان به‌غدایه‌ به‌لێ‌ ل دهۆك دژیت و ره‌نگه‌ مه‌ره‌مه‌ك هه‌بیت و نه‌ڤێت پلێتا وی یا ئه‌رزاقی بهێته‌ ڤه‌گوهاستن و هه‌تا بۆ هه‌لبژارتنان به‌غدا ب ئه‌فان ژمارا سه‌رده‌ریێ‌ ل گه‌ل دهۆكێ‌ دكه‌ت و یا باوه‌رپێكریه‌ ل جڤاتا وه‌زیران ل به‌غدا.

حسێن سه‌بری ئه‌و ژی گۆت: رێژا دهۆكێ‌ دبیته‌ 29% لدووف ڤێ‌ ژمارێ‌ یا هه‌ولێر 35% یا سلێمانیێ‌ 37% ئه‌ف رێژا دهۆك گه‌له‌ك یا نێزیكی پارێزگه‌هێن دی یه‌ و ئه‌ڤه‌ به‌لگه‌ رێژا دهۆك بڤی ره‌نگی یه‌ و به‌غدا ئه‌ف ژماره‌ هه‌یه‌.

رێڤه‌به‌رێ‌ دابه‌شكرنا ئاهێن خوارنێ‌ ئه‌و ژی ئاشكراكر كو ل دووف پلێتا ئاهێن خوارنێ‌ سالانه‌ (4) ماده‌ دهێنه‌ دابه‌شكرن (ئار، زه‌یت، برنج، شه‌كر) سالانه‌ ئار(10) هه‌یڤان دهێته‌ دابه‌شكرن، برنج (8) هه‌یڤان، زه‌یت و شه‌كر(7) هه‌یڤان، ئه‌گه‌رێ‌ گیربوونا ئه‌رزاقی ئه‌وه‌ هه‌تا نوكه‌ میزانی بۆ چ وه‌زاره‌تان نه‌هاتیه‌ ته‌رخانكرن.

رێکخراوا ساخلەمیا جیهانی: دڤێت رێکار و قوناغێن بەرهەمئینانا ڤاکسینان بهێنە بکار ئینان

05/08/2020 09:30

ئەڤرۆ نیوز:
روسیا راگەهاند بوو کۆمپانیێن وەلاتێ وێ ب سەرپەرشتیا وەزارەتا بەرەڤانیێ و ساخلەمیێ ل قوناغێن دوماهیێ دانە بۆ درستکرنا ڤاکسینا کورونایێ و ل هەیڤا تشرینا ئێکێ دێ بەرهەم ئینن، رێکخراواساخلەمیا جیهانی دیارکر بەرهەم ئینانا ڤاکسینێ پێدڤی ب بکارئینانا کۆمەکا بنەمایان د پێخەمەتا پشت راست بوونێ ژ هەبوونا هەر کارتێکرنەکێ هەیە، لەورا داخازێ ژ روسیا دکەت کۆ رێکارێن بەرهەمئینانا ڤاکسینان بکار بینن.
کریستیان لیندمیەر پەیڤدارێ رێکخراوا ساخلەمیا جیهانی راگەهاند هەر ڤاکسین و چارەسەرکرنەک بو ئەڤێ مەبەستێ و پشت راستبوونێ دڤێت ل هەموو تاقیکرنان دا دەرباز بیت بەری رێک پێدانێ.
تێدرۆس ئەدهانوم رێڤەبەرێ رێکخراوا ساخلەمیا جیهانی راگەهاند ژمارەیەکا ڤاکسینان نوکە ل قوناغا سیێ دانە، هیڤی دارین ب شیێن ڤاکسینەکێ کاریگەر بەرهەم بینین کۆ رێکێ ل توشبوونێ بگریت ژ کورونایێ.

عیراقێ دێ 200 مێگاواتێن كاره‌بێ ژ توركیا كریت

04/08/2020 10:59

ئه‌ڤرۆ نیوز:

وه‌زاره‌تا كاره‌با عیراقێ راگه‌هاند ل چه‌ند رۆژێن بهێت 200 مێگاواتێن كاره‌بێ ژ توركیا و 450 مێگاوات ژ رێكا خورمه‌له‌ كه‌ركووك دێ گه‌هنه‌ به‌غدایا پایته‌خت و پارێزگه‌هێن دی یێن عیراقێ.

ئه‌حمه‌د موسا عه‌بادی په‌یڤدارێ وه‌زاره‌تا كاره‌با عیراقێ راگه‌هاند ب رێا كۆمپانیا كارله‌وه‌ 450 مێگاوات كاره‌ب ژ رێیا هێلا خورمه‌له‌ كه‌ركوك بۆ به‌غدا و پارێزگه‌هێن ناڤه‌راستا عیراقێ هێته‌ هنارتن، 200 مێگاواتێن دی ژی ژ توركیا ب هێلا سلوپی فایدا بۆ سكرێ موسلێ بۆ ده‌ڤه‌رین عیراقێ ئیته‌ ڤه‌گۆهاستن بۆ ئه‌ڤێ مه‌به‌ستێ ژی د هه‌ماهه‌نگیه‌كا به‌رده‌وام دانه‌ ل گه‌ل توركیا.

په‌یڤدارێ وه‌زاره‌تا كاره‌با عیراقێ ئه‌و چه‌نده‌ ژی راگه‌هاند چه‌ند خاله‌ك بونه‌ ئه‌گه‌ر بۆ كێمبوونا ده‌مژمێرێن دانا كاره‌بێ، ب پله‌یا ئێكێ بلند بوونا پله‌یێن گه‌رماتیێ، كارتێكرن ل سه‌ر به‌رهه‌م ئینانێ دروستكریه‌، ب ئاوایه‌كی ژ 18 هزار و 600 میگاواتان بوویه‌ 16 هزار و 250 مێگاواتێن به‌رهه‌م ئینانا كاره‌بێ.

رێڤەبەریا گشتی یا پەروەردا پارێزگەها دهۆکێ روونکرنەک بەلاڤکر

03/08/2020 22:46

123

ئەڤرۆ نیوز:

رێڤەبەریا گشتی یا پەروەردا پارێزگەها دهوکێ راگەهاندنەک بەلاڤکریە و تێدا هاتیە: ئەم ئاگەهداریا هەموو قوتابیێن خوشتڤی دکەین، کو ئەزموونێن قۆناغا ۱۲ ئامادەیی و ئەزموونێن دووماهیا وەرزێ دویێ، یێن پولێن ( ٤ ـ ۱۱) دێ هێنە کرن و چ گوهۆرین ب سەر دەم و ژڤانێ ئەنجامدانا ئەزموونان ناهێنە کرن، هەروەسا رێڤەبەریا گشتی یا پەروەردێ داخوازێ ژ هەموو مامۆستا و قوتابیێن خوشتڤی دکەت، کو هەموو پێرابوونێن خوە پاراستنێ وماسک و دەست كێشان ل دەمێ ئەنجامدانا ئەزموونان بکەنە بەرخۆ.

خه‌یری بۆزانی: چاره‌نڤیسێ دو هزار و869 ره‌ڤاندیێن ئێزدی دیارنینه‌

03/08/2020 11:39

دهۆك، له‌زگین جوقی

رێڤه‌به‌رێ‌ گشتی یێ‌ كارۆبارێن ئێزدیان ل وه‌زاره‌تا ئه‌وقاف و كارۆبارێن ئاینی یا هه‌رێما كوردستانێ‌ دیاركركو ژ ئه‌گه‌رێ‌ جینۆسایدا ئێزدیان ل رۆژا 3/8/2014ێ‌ ل شنگال 360 هزار كه‌سێن ئێزدی ئاواره‌ بووینه‌ و 1293كه‌س هاتینه‌ شه‌هێدكرن.

خه‌یری بۆزانی، رێڤه‌به‌رێ‌ گشتی یێ‌ كارۆبارێن ئێزدیان راگه‌هاند كو هه‌تا نۆكه‌ 83 گۆرێن ب كۆم هاتینه‌ دیتن و دو هزار و 745زارۆك یێن ماینه‌ بێ‌ سه‌میان هنده‌ك بێ‌ دایك ماینه‌ و هنده‌ك ژی بێ‌ باب ماینه‌ وهنده‌كا ژی دایك وباب نه‌ماینه‌ و 6417 كچ وژن و زارۆك ل جینوسایدا شنگال هاتبوونه‌ ره‌ڤاندن ژلایێ‌ داعش ڤه‌ هه‌تا نۆكه‌ نڤیسێنگه‌ها رزگاركرنا ره‌ڤاندیێن ئێزدی شیایه‌ سێ‌ هزار و 530 كه‌سان ژ هه‌ردوو ره‌گه‌زان رزگاربكه‌ت و هیشتا چاره‌نڤیسی دوو هزار و869كه‌سان دیارنینه‌”.

ئاشكه‌را كركو 68 مزارگه‌هیێن ئێزدیان ژلایێ‌ تیرۆرستان ڤه‌ هاتینه‌ په‌قاندن كو سه‌رجه‌مێ‌ دو هزار و 869 كه‌سێن نه‌دیار ژێ‌ 1308 ره‌گه‌زی مێ‌ نه‌ و 1579 ره‌گه‌زی نێرن”.

توشبوویێن كورونایێ ل جیهانێ ژ 18 ملیۆنان ده‌رباز بوو

02/08/2020 10:39

ئه‌ڤرۆ نیوز:

ژماره‌یا توشبوویێن ڤایرۆسێ كورونایێ ل جیهانێ ژ 18 ملیۆن كه‌سان ده‌رباز بوو ژماره‌یا گیان ژ ده‌ست دانێ ژی ژ 700 هزار كه‌سان نێزیك بوو.

لگۆری داتایێن مالپه‌رێ worldometers ژماره‌یا توشبوویێن ڤایرۆسێ كورونایێ ل جیهانێ گه‌هشته‌ 18 ملیۆن و 26 هزار و 297 كه‌سان، ژ ئه‌ڤێ ژماره‌یێ ژی زێده‌تری 4 ملیۆن و 764 توشبوو ل ئه‌مریكا و زێده‌تری دو ملیۆن و 708 هزار ل به‌رازیل و زێده‌تری ئێك ملیۆن و 754 هزار ل هندستانێ، پشتی ئه‌ڤان ژی هه‌ر ئێك ژ روسیا و ئه‌فریكا باشوور و مه‌كسیك و پیرۆ و چیلی و ئیسپانیا و ئیران و كۆلومبیا و بریتانیا دهێن.

هه‌ر لگۆری ئاماران تانوكه‌ 688 هزار و 974 توشبوویان گیانێ خوه‌ ژ ده‌ست دایه‌ و زێده‌تری 11 ملیۆن و 334 هزار كه‌س ژی ساخ بووینه‌.

ژماره‌یا گیان ژ ده‌ست دانا توشبوویێن كورونایێ ل ئه‌مریكا 157 هزار و 989 كه‌سن كۆ ل رێزا ئێكێ دهێت، به‌رازیل 93 هزار و 616 كه‌سان گیانێ خوه‌ ژ ده‌ست دایه‌، پاشی بریتانیا و مه‌كسیك و هندستان و ئیتالیا و فه‌ره‌نسا و ئیسپانیا دهێن.

عیراق ژی ژ روویێ ژماره‌یا توشبوویان ڤه‌ د رێزبه‌ندا 21 دایه‌، تانوكه‌ 126 هزار و 704 هاتینه‌ توماركرن و ژڤێ ژماره‌یێ ژی 4 هزار و 805 كه‌سان گیانێ خوه‌ ژ ده‌ست دایه‌ و 89 هزار و 275 كه‌س ژی ساخ بووینه‌.

ل رۆژا چه‌ژنێ بلندترین رێژا توشبوویان هاته‌ توماركرن

01/08/2020 10:34

ئه‌ڤرۆ نیوز:

بلندترین رێژه‌یا توشبوویێن ڤایرۆسێ كورونایێ ل پارێزگه‌ها سه‌لاحه‌دین هاتیه‌ تووماركرن، وه‌زاره‌تا ساخله‌میێ ژی بلندترین رێژه‌یا توشبوونێ دئێكه‌م رۆژا چه‌ژنێ دا هاتیه‌ توماركرن.

لگۆری راپۆرتێن وه‌زاره‌تا ساخله‌میا عیراقێ د رۆژا ئێكێ یا چه‌ژنا قوربانێ دا زێده‌تری 3 هزار كه‌سان تووشی ڤایرۆسێ كورونایێ بوون.

فه‌رمانگه‌ها ساخله‌میا سه‌لاحه‌دین به‌لاڤكر، ئه‌ڤرۆ 99 حاله‌تێن توشبوونی ب ڤایرۆسی كورونایێ هاتینه‌ توماركرن.

فه‌رمانده‌كێ بلند یێ سۆپایێ عیراقێ هاته‌ كوشتن

29/07/2020 10:47

ئه‌ڤرۆ نیوز:

فه‌رمانده‌یه‌كێ بلندێ سوپایێ عیراقێ د هێرشه‌كا تیرۆریستی دا بۆ سه‌ر بنگه‌هه‌كێ سه‌ربازی ل پارێزگه‌ها ئه‌نبار هاته‌ كوشتن.

فه‌رمانده‌یا ئوپراسیونێن هه‌ڤبه‌ش، نوچه‌یی كوشتنا ئه‌حمه‌د لامی فه‌رمانده‌یێ لیوا 29 یا فیرقه‌یا 7 یا سوپایێ عیراقێ ل پاژێرێ هیت راگه‌هاند.

فه‌رمانده‌یا ئوپراسیونێن هه‌ڤبه‌ش ئه‌و چه‌نده‌ ژی راگه‌هاند د وێ هیرشا شه‌ڤا بووری دا تیرۆریستان بۆ سه‌ر بنگه‌هه‌كی سه‌ربازی ل باژێرێ هیت ئه‌نجامدا، ژبلی ئه‌حمه‌د لامی، ئه‌فسه‌ره‌كێ دی ژی یێ ب پله‌یا میلازم ئێك و دو سه‌ربازێن دی یێن عیراقی هاتنه‌ كوشتن.

وه‌زیرێ ساخله‌میێ: هه‌تا نوكه‌ چ پێشنیاز بۆ قه‌ده‌غه‌یا هاتنوچونێ نه‌هاتینه‌كرن

28/07/2020 10:51

ئه‌ڤرۆ نیوز:

وه‌زیرێ ساخله‌میا حوكمه‌تا هه‌رێما كوردستانێ راگه‌هاند مه‌ چ پێشنیاز بۆ راگه‌هاندنا قه‌ده‌غه‌یا هاتنوچونێ ل رۆژێن چه‌ژنێ دا نه‌كریه‌، به‌لێ بۆ هه‌ر حاله‌ته‌كی لژنا بلندا به‌رهنگاربوونا كورونایێ بریارێ ل سه‌ر دده‌ت.

د.سامان به‌رزنجی وه‌زیرێ ساخله‌میا هه‌رێما كوردستانێ راگه‌هاند به‌لاڤبوونا ڤایرۆسێ كورونایێ ل هه‌رێما كوردستانێ د قوناغا بلند‌ بوونێ دایه‌.

وه‌زیرێ ساخله‌میێ ئه‌و چه‌نده‌ ژی ته‌ئكید كر به‌ریا نوكه‌ لژنا بلندا به‌رهنگاربوونا كورونایێ بریار و رێنمایی و رێكارێن كورونایێ و قه‌ده‌غه‌یا هاتنوچونێ ده‌رخستیه‌ و بۆ بریاردانێ ل سه‌ر قه‌ده‌غه‌یا هاتنوچونێ، ده‌سه‌لات هاتیه‌ دان ب پارێزگار و ئیداره‌یێن سه‌ربه‌خو.

ناڤبری دا زانین هه‌تا نوكه‌ مه‌ چ پێشنیاز بۆ راگه‌هاندنا قه‌ده‌غه‌یا هاتنوچونێ ل رۆژین چه‌ژنێ دا نه‌كریه‌ به‌لێ بۆ هه‌‌ر حاله‌ته‌كی لژنا بلند یا به‌رهنگاربوونا كورونایێ بریارێ دێ ده‌ت.

نيشاندان 1...272829...90 زێده‌تر

لاپه‌ر 28 ژ 90