ئه‌ڤرۆ نیوز:
جێگرێ رێڤه‌به‌رێ گشتی یێ ساخله‌میا سلێمانیێ راگه‌هاند: ل سلێمانێ دو توشبوویێن دی ب ڤایرۆسێ كورونایێ گیانێ خو ژ ده‌ست دان.
عه‌بدلا ئه‌حمه‌د جێگرێ رێڤه‌به‌رێ گشتی یێ ساخله‌میا سلێمانیێ بۆ كارۆبارێن كارگێری راگه‌هاند: ئه‌ڤرۆ 7/6/2020 ل سلێمانیێ دو توشبوویێن دی ب ڤایرۆسێ كورونایێ گیانێ خۆ ژ ده‌ست داینه.
رێڤه‌به‌رێ گشتی یێ ساخله‌میا سلێمانیێ ئه‌و چه‌نده ژی راگه‌هاند ره‌وشا ساخله‌میا توشبوویه‌كێ دی ژی نه‌جیگیره.
ئەڤرۆ نیوز، زنار تۆڤی:
ل ئێڤاریا 06-06-2020، ل ناحیا فەییدیێ یا سەر ب قەزا سێمێلێ ڤە ل لە پارێزگەها دهۆکێ، نەخۆشخانەکا تایبەت بۆ تووشبوویێن کۆرۆنا یێ هاتە ڤەکرن، ئەو نەخۆشخانە د دەمێ 33 رۆژان دا تەمام بوویە.
نەخۆشخانا لالاڤ، کو یا تایبەتە ب نوخۆشێن کۆرۆنایێ ڤە ل فەییدیێ ژ ئالیێ پارێزگارێ دهۆکێ ڤە هاتە ڤەکرن و ملیۆنەک و 800 هزار دۆلار لێ هاتینە مەزاختن و د دەمێ 33 رۆژان دا هاتیە چێکرن و جهێ 100 نەخۆشان تێدا هەیە و ژ ئالیێ سەرمایەدارەکێ دهۆکێ ڤە هاتیە چێکرن.
ل دەمێ ڤەکرنا وێ نەخۆشخانێ فەرهاد ئەترووشی، پارێزگارێ دهۆکێ د کۆنفرانسەکێ رۆژنامەڤانیدا دیار کر: جهێ دلخۆشیێ یە کو نەخۆشخانەکا 100 تەختی یا تایبەت ب تووشبوویێن کۆرۆنا یێ ڤە ل سەر ئەرکێ خێرخوازەکێ پارێزگەها دهۆکێ بهێتە ڤەکرن، ئەڤە ئێکەمجارە ل سنوورێ بادینان نەخۆشخانەکا خێرخوازی بهێتە ڤەکرن.
ئه‌ڤرۆ نیوز:
سه‌رۆكێ به‌رازیلێ راگه‌هاند رێكخراوا ساخله‌میا جیهانێ رێكخراوه‌كا سیاسیه.
جیر بولسونارو سه‌رۆكێ به‌رازیلێ د كۆنگره‌یه‌كێ رۆژنامه‌ڤانی دا راگه‌هاند رێكخراوا ساخله‌میا جیهانێ دووباره رێك دا ده‌رمانێ مه‌لاریا وه‌ك چاره‌سه‌ریا كورونایێ بهێته بكارئینان، ژبه‌ركو به‌لگه‌یێن پێدڤی نین ل سه‌ر نه‌كارایی یا ئه‌وی ده‌رمانی د چاره‌سه‌كرنێ دا.
سه‌رۆكێ به‌رازیلێ ئه‌و چه‌نده ژی راگه‌هاند رێكخراو بوویه رێكخراوه‌كا سیاسی ب شیوه‌یه‌كی لایه‌نگیریا مامه‌له‌یێ دكه‌ت ل به‌رهنگاربوونا ڤایرۆسێ كورونایێ، هه‌كه رێكخراوا ساخله‌میا جیهانی ده‌ستان ژ ئه‌ڤان كاران به‌رنه‌ده‌ت ئه‌ڤه به‌رازیل دێ خۆ ژێ ڤه‌كێشیت.
ئه‌ڤرۆ ینوز:
وه‌زاره‌تا دارای و ئابووری یا حكومه‌تا هه‌رٍێما كوردستانٍ راگه‌هاند ئه‌وا ل هنده‌ك مالپه‌ر و په‌یجان دهێته گۆتن ده‌ربارێ كێمكرنا موچه‌ی دووره ژ راستیی و بابه‌تێ كێمكرنا موچه‌ی ل كارنامه‌یا كۆمبوونا 3/6/2020 یا جڤاتا وه‌زرێن هه‌رێمێ دا نه‌بوویه.
وه‌زاره‌تا دارای و ئابووری یا حكومه‌تا هه‌رێما كوردستانێ د راگه‌هاندنه‌كێ دا ئه‌و چه‌نده ژی رونكر زێده‌باری خراپیا ره‌وشا ده‌رونی و ساخله‌می و دارای و ئابووری یا وه‌لاتیان، هنده‌ك كه‌س و په‌یج مالپه‌ر و لایه‌ن یاریێ ب موزایده‌یا هه‌ست و سوزا وه‌لاتیێن هه‌رێما كوردستانێ ب گشتی و فه‌رمانبه‌ران و موچه‌خوران دكه‌ن، ئه‌ڤا هاتیه به‌لاڤكرن و گۆتن ل سه‌ر هاتیه كرن دووره ژ راستیێ یه و بۆ هه‌موو لایه‌نه‌كی روون دكه‌ین د كارنامه‌یا كۆمبوونێ دا بابه‌تێ كێمكرنا موچه‌ی تێدا نه بوو.
ئه‌ڤرۆ نیوز:
ئه‌ڤرۆ 5/6/2020 وه‌زاره‌تا ساخله‌میا حكومه‌تا هه‌رێما كوردستانێ به‌لاڤكریه دو وه‌لاتیێن هه‌لگرێن ڤایرۆسێ كورنایێ ل باژێرێ سلێمانێ گیانێ خۆ ژ ده‌ست دان.
د راگه‌هاندنه‌كێ دا وه‌زاره‌تا ساخله‌میا حكومه‌تا هه‌رێما كوردستانێ به‌لاڤكریه و تێدا هاتیه ئه‌و دو توشبوویێن زه‌لام ژیێن وان 64 و 56 سال بوون و ئاكنجیێن باژێرێ سلیمانیێ نه و پشتی ڤه‌مانا وان ل نه‌خوشخانه‌یی ل سه‌ر ئامێرێ هه‌ناسه‌دانا ده‌ستكرد پشكا چاڤدێریا چر گیانێن خۆ ژ ده‌ست داینه.
د راگه‌هاندنا وه‌زاره‌تا ساخله‌مێ دا هاتیه دیاركرن دو توشبوویێن ڤایرۆسێ كورونایێ كوڤید 19 زه‌لامن كر ژیێ وان 64 و 56 سال بوون و ئاكنجیێن باژێرێ سلێمانیێ،
پشتی ڤه‌مانا وان ل نه‌خوشخانه‌یی ل سه‌ر ئامێرێ هه‌ناسه‌دانا ده‌ستكرد پشكا چاڤدێریا چر گیانێن خۆ ژ ده‌ست داینه.
وه‌زاره‌تا ساخله‌میێ دا دیاركرن كۆ زێده‌باری سه‌رخوشیێ ل كه‌س و كارێن وان دكه‌ین و هیڤی دارین وه‌لاتی پێگیر و رێنمایێن ساخله‌میێ بن.
ئه‌ڤرۆ نیوز:
ره‌زا ئه‌ردكانیان وه‌زیری ووزه‌یا ئیرانێ راگه‌هاند ژبوی رێكه‌تنه‌كا نوو دبیاڤێ ووزه‌یا كاره‌بێ دێ ل گه‌ل عیراقێ ئیمزا كه‌ین، كۆ ل سالا بهێت كاره‌ب ژ ئیرانێ بهێت بۆ عیراقێ.
پێدڤیا عیراقێ ب ووزه‌یا كاره‌بێ و نه شیانێن دابینكرنا كاره‌بێ ژ ناڤخوی له‌ورا عیراق سالانه رێكه‌تنه‌كێ ل گه‌ل ئیرانێ دكه‌ت بۆ كرینا كاره‌بێ بۆ دابینكرنا كاره‌بێ بۆ وه‌لاتیان، زێده‌باری سزایێن ئه‌مریكا ل سه‌ر ئیرانێ و چه‌ندین جاران عیراق ئاگه‌هدار كریه ژ ڤه‌دیتنا ده‌رگه‌هێن دی یێن دابینكرنا ووزه‌یا كاره‌بێ بۆ عیراقێ.
دناڤبه‌را عیراقێ ئیرانێ دا چه‌ندین ریكه‌تن هه‌نه د بیخه‌مه‌تا به‌ره‌ڤ پێشڤه‌چوون و مفا وه‌رگرتن ژ شیانێن هه‌رو ئالیان بۆ به‌رژه‌وه‌ندا گشتی .
ئەڤرۆ نیوز:
وەزارەتا ساخلەمیا هەرێمێ راگەهاند: ١٩ حالەتێن نوو یێن توشبوون ب ڤایرۆسێ کۆرۆنا یێ ل باژێرێ دهۆکێ هاتنە تۆمار کرن.
وەزارەتا ساخلەمیا ھەرێمێ راگەھاند ژی: د بەردەوامیا پشکنین و لێگەریانێ لدووڤ گۆمانلێکریان و توشبوویان ، ۱۹ توشبوویێن دی یێن ڤایرۆسێ کۆرۆنا یێ ل پارێزگەھا دھۆکێ ھاتنە دەست نیشانکرن، کو ھەشت زەلام و ھەشت ژن و سێ زارۆکن. گۆتیە ژی: هەموو توشبوویی خۆجهێن پارێزگەھا دھۆکێ نە و ھەموو بەرکەفتیێن توشبوویێن بەرێنە، هەموویان پشکداری د نانخوارنا دەواتەکێ دا کریە و توشبووینە.
ئه‌ڤرۆ نیوز:
سوپایێ عیراقێ ده‌ست ب ئوپراسیونه‌كا سه‌ربازی ل باشوورێ كه‌ركووكێ بۆ نه‌هێلانانا چه‌كدارێن رێكخراوا تیرۆریستی یا داعشێ كر.
عه‌مید یه‌حیا ره‌سوب په‌یڤدارێ فه‌رمانده‌یی گشتی هێزێن چه‌كدارێن عیراقی د به‌یاننامه‌یه‌كێ دا راگه‌هاند ئوپراسیون ب رێنمایێن مسته‌فا كازمی سه‌رۆك وه‌زیر و فه‌رمانده‌یێ گشتی هێزێن چه‌كدارێن عیراقێ دهێته برێڤه‌برن.
ئوپراسیون ل سپێده‌هیا ئه‌ڤرۆ 2/6/2020 بناڤێ قوناغا دوێ یا قاره‌مانێن عیراقێ بۆ نه‌هێلانانا چه‌كدارێن داعشێ ل ده‌ڤه‌رێن كه‌ركووكێ و توخیبێ دناڤبه‌را كه‌ركووك و پاریزگه‌ها سه‌لاحه‌دین ده‌ستپێكریه.
ئه‌ڤرۆ نیوز:
وه‌زیرێ كاره‌با حكومه‌تا هه‌رێما كوردستانێ راگه‌هاند نوكه سی هزار و 200 میگاواتێن كاره‌بێ به‌رهه‌م دئینین كۆ نیڤا پێدڤیانه، هه‌كه وه‌زاره‌تا سامانێن سرۆشتی سوته‌مه‌نیێ دابین بكه‌ت ئاریشا كاره‌بێ نامینیت.
كه‌مال محه‌مه‌د وه‌زیرێ كاره‌با حكومه‌تا هه‌رێما كوردستانێ راگه‌هاند هه‌رێما كوردستانێ پێدڤی ب شه‌ش هزار و 700 میگاواتێن كاره‌بی هه‌یه، نوكه بتنێ سێ هزار و 200 میگاواتێن كاره‌بێ به‌رهه‌م دئینین، كۆ دبیته نیڤا رێژا پێدڤی، هه‌كه وه‌زاره‌تا سامانێن سرۆشتی سوته‌مه‌نیا پێدڤی دابین بكه‌ت ئاریشا كاره‌بێ نامینیت.
وه‌زیرێ كاره‌با حكومه‌تا هه‌رێما كوردستانێ ئه‌و چه‌نده ژی راگه‌هاند: د ژیێ كابینا ئه‌ڤێ جارێ دا گرێبه‌ست ل سه‌ر هزار و 540 میگاواتێن كاره‌بێ هاتیه‌كرن، كۆ 500 میگاوات ل خورمال و 500 میگاوات ل بازیان و 165 میگاوات ل گه‌رمیان و 300 میگاوات كاره‌با ئاڤی ل گه‌ل كۆمپانیه‌كا ئوسترالی و 75 میگاوات كاره‌با تیشكا رۆژێ، بڤێ چه‌ندێ كاره‌با به‌رهه‌م هاتی یا هه‌رێما كوردستانێ دگه‌هته هه‌شت هزار میگاواتان، ئه‌ڤه د ده‌مه‌كی دایه كۆ خاست دڤی وه‌رزی دا دبیته 4200 میگاوات، و د زڤستانان دا دگه‌هته 6500 میگاواتان.
كه‌مال محه‌مه‌د وه‌زیرێ كاره‌با حكومه‌تا هه‌رێما كوردستانێ ئه‌و چه‌نده ژی دازانین ب ئه‌گه‌رێ قه‌یرانا دارایی نوكه نه سوته‌مه‌نیا پێدڤی و نه پاره‌یێ پێدڤی ل به‌ر ده‌ست نینه، به‌لێ قه‌یرانا كاره‌بێ به‌ره‌ڤ پاشتر چوویه باشتر دبیت ژی دڤێ كابینا حكومه‌تێ دا، ب جدی كار ل سه‌ر باشتركرنا كاره‌بێ كه‌ین ئه‌م خو ب خودانێ ئاریشێ دزانین و بزاڤا چاره‌كرنا وێ دده‌‌ین.
ئه‌ڤرۆ نیوز:
پشتی بورینا دو هه‌یڤان ژ داخستنا وێ ب ئه‌گه‌رێ ڤایرۆسێ كورونایێ، مزگه‌فتا پێغه‌مبه‌رێ ئیسلامێ سلاڤێن خودی ل سه‌ر بن، ل مه‌دینێ ل سعودیێ هاته‌ڤه‌كرن.
پشتی ره‌زامه‌ندیا شاهـ سه‌لمان بن عه‌بدلعه‌زیز شاهێ سعودیێ، رێڤه‌به‌ریا مزگه‌فتا پێغه‌مبه‌ری سلاڤێن خودێ ل سه‌ر بن، بریارا ڤه‌كرنا مزگه‌فتێ دایه كۆ ئه‌ڤه بۆ ده‌مێ 74 رۆژانه بوو رێگرتن ژ زێده‌تر به‌لاڤبوونا ڤایرۆسێ كوروناێ هات بو داخستن.
سپێده‌هیا ئه‌ڤرۆ 31/5/2020 ده‌رگه‌هێ مزگه‌فتێ هاته ڤه‌كرن و نڤێژ تێدا هاته‌كرن.
تا نوكه 83 هزار و 384 كه‌س ل سعویدێ توشی ڤایرۆسێ كورونایێ بوون و ژ وێ ژماره‌یێ ژی 480 كه‌س ب ڤایرۆسی مرینه.
نيشاندان