ئه‌ڤرۆ:

جێگرێ سه‌رۆكێ پارتی دیموكراتی كوردستان، نێچیرڤان بارزانی، ب هه‌لكه‌فتا سالیادا دامه‌زراندنا پارتی په‌یامه‌ك به‌لاڤكر و تێدا پیرۆزباهی ل سه‌رۆك مه‌سعود بارزانی و هه‌موو ئۆرگانێن پارتی و مالباتێن شه‌هیدان دكه‌ت و دبێژیت، پارتی خه‌ون و هیڤیێن گه‌لێ كوردستانێ كر به‌رنامه‌كێ سیاسی یێ رزگاریخوازی.

ده‌قێ په‌یاما نێچیرڤان بارزانی، جێگرێ سه‌رۆكێ پارتی دیموكراتی كوردستان…

سالیادا 76 یا دامه‌زراندنا پارتی دیموكراتی كوردستان، ب گه‌رمی ل جه‌نابێ سه‌رۆك مه‌سعود بارزان، مه‌كته‌با سیاسی، سه‌ركردایه‌تی و هه‌موو ئۆرگانێن پارتی و مالباتێن سه‌ربلندێن شه‌هیدان و پێشمه‌رگێن قه‌هره‌مان و كادر و ئه‌ندام و لایه‌نگر و دلسۆز و جه‌ماوه‌ری َپارتی و گه‌لێ كوردستانێ ب گشتی پیرۆز دكه‌م.

بیرئانینا دامه‌زراندنا پارتی دیموكراتی كوردستان، بلند راگرتنا دیرۆكه‌كا گرنگ یا به‌رخودان و خۆراگریا شۆره‌شگێرانه‌ و مه‌ده‌نیانه‌ و رێزگرتنه‌ ل خه‌بات و قوربانیدانا گه‌لێ كوردستانێ كو ل بن سه‌ركردایه‌تی و ئالایێ پارتیدا خه‌بات بۆ ئازادی و رزگاریێ كری و قوربانی داینه‌.

پارتی دیموكراتی كوردستان وه‌كو پێدڤیه‌كا دیرۆكی د سه‌رده‌مه‌كێ دژوار دا ب سه‌ركردایه‌تیا بارزانیێ نه‌مر و ل سه‌ر ده‌ستێ كۆمه‌كا خه‌باتكه‌رێن كوردستانێ هاتیه‌ دامه‌زراندن كو خه‌ون و خۆزی و هیڤیێن گه‌لێ كوردستانێ كر به‌رنامه‌كێ سیاسی یێ رزگاریخوازی و هه‌موو ته‌خ و چین و پێكهاته‌یێن گه‌لێ كوردستانێ كۆمكر.

پارتی دیموكراتی كوردستان به‌رده‌وام هه‌لگرا بیر و باوه‌ره‌كا نیشتمانی ئاشتیخواز و دیموكراسیخواز بوو و ئه‌زموونا سالێن دوور و درێژ ژی، سه‌لمینه‌رێن وێ راستیێ نه‌ كو پێكڤه‌ژیانا ئاشتیانه‌ و هه‌ڤدووقبوولكرن و لێبۆرین ژ بنه‌مایێن سه‌ره‌كی یێن كولتوورێ سیاسه‌تا وێ نه‌، داكۆكیكرن ژ مافێن هه‌موو پێكهاته‌یان ب جوداهیا نه‌ته‌وی و ئایینی ڤه‌، باوه‌ریه‌كا نه‌گهۆر یا پارتیه‌ و قوربانیێن مه‌زن ژ پێخه‌مه‌ت دا به‌خشینه‌.

ئه‌ڤرۆ د ڤێ هه‌لكه‌فتێدا ژ هه‌رده‌مه‌كی زێده‌تر كوردستان پێدڤی ب ته‌بایی و ئێكرێزیا ئالیێن سیاسی و پێكهاتێن وێ یه‌ بۆ به‌رهنگاربوونا ته‌حه‌دیان و پاراستنا ده‌ستكه‌فتێن دستووری و گاڤ هاڤێتن به‌ر ب پاشه‌رۆژه‌كا باشتر، پێدڤیه‌ ل گه‌ل ئالیێن سیاسی یێن ئیراقێ ژی دا هاریكار و پشته‌ڤان بین بۆ ده‌ربازكرنا وه‌لاتی ژ ڤێ ره‌وشا سیاسی یا ئالۆز ئه‌وا كه‌فتیه‌ تێدا.

ئه‌ڤرۆ:

مه‌كته‌با سیاسی یا پارتی دیموكراتی كورستان راگه‌هاند، دشیاندایه‌ رێككه‌فتن بهێته‌ كرن بۆ ئه‌نجامدانا هه‌لبژارتنێن پێشوه‌خت، هه‌روه‌سا داخوازێ ژ هه‌موو ئالیێن سیاسی یێن ئیراقی دكه‌ت، دئاستێ به‌رپرسیاره‌تیا قۆناغێ دا بن بۆ ده‌ربازكرنا كێشان.

دوهی مه‌كته‌با سیاسی یا پارتی دیموكراتی كوردستان به‌یاننامه‌ك ل سه‌ر ره‌وشا ئیراقێ به‌لاڤكر و تێدا هاتیه‌” سه‌باره‌ت ره‌وش و ئالۆزیێن سیاسی یێن ڤێ دووماهیێ ل ئیراقێ، پارتی دیموكراتی كوردستان نه‌رازیبوون و دلته‌نگیا خوه‌ ل هه‌مبه‌ر ره‌وش و ته‌نگه‌ژا سیاسی یا نوكه‌ ل ئیراقێ ده‌ردبریت. یا رۆهنه‌ هه‌ر ژ ده‌ستپێكا راگه‌هاندنا ئه‌نجامێن هه‌لبژارتنێن ئیراقێ، كو ل ئوكتۆبه‌را سالا 2021 هاتینه‌ ئه‌نجامدان و ئه‌و كێشه‌ و ئالۆزی و پێشهاتێن پشتی هه‌لبژارتنان بووینه‌ ئاسته‌نگ ل هه‌مبه‌ر دامه‌زراندنا حوكمه‌تا نوو یا ئیراقێ ل سه‌ر بناغه‌كێ دستووری یێ باوه‌رپێكری ل سه‌ر بنه‌مایێ سیسته‌مێ سیاسیێ نوكه‌ ل ئیراقێ د ئه‌نجامدا وه‌لات گه‌هشته‌ ره‌وشه‌كا سیاسی یا گرتی”.

مه‌كته‌با سیاسی یا پارتی ئاماژه‌ ب وێ چه‌ندێ ژی دا، كو بۆ پاراستنا ئیراقێ ژ وان مه‌ترسیێن كو د قۆناغا نوكه‌ دا روو ب روو دبیت، داخوازێ ژ هه‌موو سه‌ركردێن سیاسی ل مه‌یدانا ئیراقێ دكه‌ت د ئاستێ به‌رپرسیاره‌تیا قۆناغا نوكه‌ دا بن و داخوازێ ژ هه‌موو ئالیان دكه‌ت گاڤێن جدی و پێدڤی و بله‌ز بگرنه‌به‌ر بۆ ئه‌نجامدانا دانوستاندنه‌كا به‌رهه‌مدار و سه‌ركه‌فتی، ل سه‌ر بناغێ پشت به‌ستنێ ب بنه‌مایێن دستوورێ ئیراقێ بۆ رزگاركرنا وه‌لاتی ژ وێ ره‌وشا نوكه‌ تێدا ده‌رباز دبیت.

د به‌یانناما مه‌كته‌با سیاسی یا پارتیدا دووپاتی ل وێ چه‌ندێ ژی هاتیه‌ كرن” ژ پێخه‌مه‌ت ئه‌نجامدانا پرۆسا چاكسازیێ و گورانكاریێن راسته‌قینه‌ و باشتركرنا ره‌وشا نوكه‌ یا ئیراقێ، دشیاندایه‌ رێككه‌فتن بهێته‌ كرن ل سه‌ر ئه‌نجامدانا هه‌لبژارتنێن پێشوه‌خت پشتی وێ چه‌ندێ هه‌موو ئالی رێككه‌ڤن و سۆزا وێ چه‌ندێ ژی بده‌ن، كو دێ ب ئه‌نجامێن دووماهیێ یێن هه‌لبژارتنان وه‌كو خوه‌ رازی بن و ئه‌زموونا هه‌لبژارتنێن بۆری یێن ئیراقێ ژی دووباره‌ نه‌بیته‌ڤه‌”.

ئه‌ڤرۆ، سالار محه‌مه‌د دۆسكی:

ئه‌ندامه‌كا خولا پێشتر یا جڤاتا نوونه‌رێن ئیراقێ راگه‌هاند، دبیت نێزیكبوونه‌ك د ناڤبه‌را موقته‌دا سه‌در و نوری مالكی دا دروست ببیت و رێككه‌فتنه‌ك ل سه‌ر دروستبوونا حوكمه‌تێ د به‌رژوه‌ندیا سه‌دری دا بهێته‌كرن.

نه‌جیبا نه‌جیب، ئه‌نداما خولا پێشتر یا جڤاتا نوونه‌رێن ئیراقێ بۆ رۆژناما (ئه‌ڤرۆ) گۆت” ناكۆكیێن د ناڤبه‌را نوری مالكی و موقته‌دا سه‌در دا ئه‌نجامێ ناكۆكیێن كه‌ڤنه‌ و هه‌تا گه‌هشتیه‌ ئاسته‌كی هه‌ڤدوو قه‌بوول نه‌كه‌ن و تایبه‌ت پشتی سه‌دری ل هه‌لبژارتنێن ڤێ دووماهیێ پتر ژ 70 كورسیێن جڤاتا نوونه‌ران بده‌ستڤه‌ئیناین و حه‌ز هه‌بوو حوكمه‌تا زورینه‌یا نشتیمانی پێكبینیت و نه‌شیا وێ چه‌ندێ بجهبینیت و خوه‌ ڤه‌كێشا و ب ئاشكرا  گۆتیه‌ نابیت نوری مالكی جاره‌كا دی ببیته‌ سه‌رۆك وه‌زیرێن ئیراقێ”.

هێشتا گۆت” نه‌رازیبوویێن سه‌ر جادێ نه‌ ئه‌ون كو هه‌موو ل گه‌ل سه‌دری نه‌ به‌لكو گه‌له‌ك ژ حوكمه‌تێ د نه‌رازینه‌ و ئاستێ خزمه‌تگوزاریێن ل ئیراقێ دهێنه‌ ئه‌نجامدان و سه‌دری شیا جادا ئیراقی ل ڤان كاودانان د به‌رژوه‌ندیا خوه‌ دا ب راكێشیت”.

ئاماژه‌كر” ناكۆكیێن  سه‌دری و مالكی گه‌له‌ك د كوورن و هه‌تا سه‌دری هزرا كوشتنا خوه‌ ژی كریه‌، لێ ئه‌ڤه‌ ناگه‌هیته‌ وی ئاستی شه‌رێ ناڤخوه‌ دروست بیت چونكه‌ ئیران و شیعه‌ هه‌موو بزاڤان دكه‌ن شه‌ر دروست نه‌بیت و ده‌ستهه‌لات دده‌ستی دایه‌ و چه‌ك هه‌یه‌ و سیستانی ژی ناهێلیت، لێ بۆ چاره‌سه‌ركرنا كێشا د ناڤبه‌را هه‌ردو ئالیان دا سه‌دری داخوازا هه‌لبژارتنێن پێشوه‌خه‌ت كریه‌ و دبیت ئه‌ڤه‌ خواستا پشته‌ڤانێن وی بیت لێ دچارچۆڤێ قانوونی دا پشتی ڤه‌كێشانا سه‌دری ژجڤاتا نوونه‌ران و ئه‌وێن هاتینه‌ جهێ وی پتریا وان ژ فراكسیۆنا ده‌وله‌تا قانوونێ نه‌ و دستوور دبێژیت بۆ هه‌لوه‌شاندنا جڤاتا نوونه‌ران دڤێت سێیه‌كا جڤاتێ ده‌نگی ل سه‌ر بده‌ن و رازیبوونا خوه‌ دیاربكه‌ن و هه‌روه‌سا د دستووری دا هاتیه‌ كو سه‌رۆك وه‌زیران یان سه‌رۆك كۆماری ماف یێ هه‌ی داخواز بكه‌ن جڤاتا نوونه‌ران بهێته‌ هه‌لوه‌شاندن و ئه‌ڤ  سه‌رۆك وه‌زیر و سه‌رۆك كۆمار ڤێ جڤاتێ باوه‌ری نه‌دایێ هه‌تا بشێن ڤی كاری بكه‌ن”.

ناڤبری گۆت” ل دووڤ دستوورێ ئیراقێ و سیسته‌مێ ناڤخوه‌یێ جڤاتا نوونه‌ران، جڤاتا نوونه‌رێن ئیراقێ ماف یێ هه‌ی ل  سه‌رانسه‌ری ئیراقێ كۆمبوونێن خوه‌ ئه‌نجام بده‌ت”.

هه‌روه‌سا دیاركر”ب دیتنا من رێككه‌فتن د ناڤبه‌را سه‌دری و مالكی دا دێ هێته‌ كرن و ئه‌ڤ رێككه‌فتنه‌ دێ د به‌رژوه‌ندیا سه‌دری دا بیت و دێ ئه‌ندامێن فراكسیۆنا سه‌دری  ب رێیه‌گێ ڤه‌گه‌رنه‌ جڤاتا نوونه‌ران ودیرۆكا د ناڤبه‌را هه‌ر دویان دا پێشتر ژی ناكۆكی هه‌بووینه‌ لێ ل دووماهیێ دگه‌هنه‌ رێككه‌فتنێ چونكه‌ خالێن هه‌ڤپشك د ناڤبه‌را وان دا هه‌نه‌ و شیعه‌گه‌ری به‌ری هه‌ر تشته‌كی لده‌ف یا پیرۆزه‌ به‌ری ئیراقێ و نه‌وه‌زیر و نه‌ چ به‌رپرسێن وا بۆ ئیراقێ نه‌كریه‌ به‌لكو بۆ خوه‌ دكه‌ن”.

ل دۆر كارتێكرنا ڤان كاودانان ل سه‌ر هه‌رێما كوردستانێ، نه‌جیبا نه‌جیب گۆت” هه‌ر نه‌ ئارامیه‌كا ل ئیراقێ دروست بیت كارتێكرن ل سه‌ر گشت ئیراقێ هه‌یه‌، هه‌ر ئالۆزیه‌كا ل ئیراقێ بیت كارتێكرن ل ئیراقێ هه‌یه‌ و ئه‌ڤه‌ وێ رامانێ ناگه‌هینیت هه‌كه‌ به‌غدا یا ته‌نا بیت بۆ كوردستانێ دێ باش بیت، به‌لكو دڤێت ئێكرێزیا ناڤمالا كوردی هه‌بیت و هه‌كه‌ ئێك رێزبین دێ شێین به‌رژوه‌ندیێن خه‌لكێ كوردستانێ پارێزێن”.

ئه‌ڤرۆ، له‌زگین  جوقی

قایمقامێ‌ قه‌زا شنگالێ ب وه‌كاله‌ت راگه‌هاند، باشترین چاره‌سه‌ری بۆ ره‌وشا شنگالێ بجهئینانا مادێ‌ 140 یێ‌ دستووری یه‌ وئه‌ڤه‌ هه‌شت سال ب سه‌ر كاره‌ساتا شنگالێ ڤه‌ بۆرین وهێشتا یا وێرانكریه‌ وحوكمه‌تا ئیراقێ‌ كه‌یسا شنگالێ ب رژدی وه‌رناگریت.

نایف سه‌یدۆ، قایمقامێ‌ قه‌زا شنگالێ ب وه‌كاله‌ت گۆت” ئه‌ڤرۆ  3/8/2022ێ‌ دێ‌ هه‌شت سال ل سه‌ر جینۆسایدا شنگالێ ڤه‌ بۆرن كو هه‌تا ئه‌ڤرۆخه‌لكێ‌ وێ نه‌شیایه‌ ڤه‌گه‌رنه‌ سه‌ر جهێن باب وباپیران و ناكۆكیێن سیاسی  ل شنگالێ یێن هه‌ین وئاسته‌نگ یێن هاتینه‌ دروستكرن ل به‌رده‌م بجهئینانا رێككه‌فتنا ئاساییكرنا ره‌وشا شنگالێ وهه‌تا نوكه‌ ژی چ خالێن رێككه‌فتنێ‌ بجه نه‌هاتینه‌ و ب دیتنا من باشترین چاره‌سه‌ری بۆ ره‌وشا شنگالێ بجهئینانا مادێ‌ 140 یێ‌ دستووری یه‌ وئه‌ڤ مادێ‌ دستووری ناكۆكیان ناهێلیت ودێ‌ ره‌وشا شنگالێ خوه‌ش بیت هه‌كه‌ ئه‌و مادێ دستووری بجه بهێت وخه‌لكێ‌ شنگالێ ل ریفراندۆما سه‌ربه‌خوه‌یا كوردستانێ‌ ل سالا 2017 ب رێژا 90% گۆتن به‌لێ‌ بۆ سه‌ربه‌خوه‌یا كوردستانێ‌، ل وێ‌ ده‌مێ‌ خه‌لكێ‌ شنگالێ بریارا خوه‌ دا كو ب سه‌ر هه‌رێما كوردستانێ‌ ڤه‌ بن”.

نایف سه‌یدۆ، ئاشكه‌را كركو” ده‌وله‌تێن جیهانێ‌ هه‌تا نوكه‌ دخه‌مسارن د كه‌یسا شنگالێ‌ دا و پێدڤیه‌ سندووقا ئاڤه‌دانیا شنگالێ دروست بكه‌ن و دخوازین ب دروستاهی هاریكاری و پشته‌ڤانیا شنگالێ بهێته‌ كرن و مخابن وه‌كو ده‌ڤه‌ره‌كا وێران سه‌ره‌ده‌ریێ‌ دگه‌ل شنگالێ ناكه‌ن له‌ورا ژی هه‌تا نوكه‌  وێرانكری مایه‌”.

خوه‌یا ژی كركو پێدڤیه‌ لژنێن هه‌ڤپشك ژ له‌شكرێ‌ ئیراقێ‌ و پێشمه‌رگێ كوردستانێ ل شنگالێ بهێنه‌ پێكئینان و پاراستنا ده‌ڤه‌رێ‌ بكه‌ن و سنوورێ د ناڤبه‌را ئیراقی  وسووریێ دا بهێته‌ كونترۆلكرن وهه‌تا نوكه‌ خه‌لكێ‌ شنگالێ ترس هه‌یه‌ چونكو سنور یێ‌ ڤه‌كریه‌ وشانێن داعشێ هێشتا ماینه‌ ل ده‌ڤه‌رێن ئیراقێ‌ و سووریێ و چه‌ند داعش هه‌بیت دێ‌ ترس ددلێ‌ خه‌لكێ‌ شنگالێ دا بیت ونه‌شێن ڤه‌گه‌رن، ژ به‌ركو تیرۆرستێن داعشێ ل سالا 2014ێ‌ د شه‌ڤ ورۆژه‌كێ دا هێرشی ئێزدیان كر و كوشتار دژی وان ئه‌نجامدان و ژن وكچ و زارۆ ره‌ڤاندن و بێ‌ سه‌روشوینكرن وهه‌تا نوكه‌ ژی خه‌لكێ‌ شنگالێ ئه‌و باوه‌ری نینه‌ ڤه‌گه‌رن جهێن خوه‌ ژبه‌ر شانێن داعشێ كو هه‌تا نوكه‌ تاوانێن تیرۆرستێن داعشێ ل به‌ر چاڤێن خه‌لكی ماینه‌ له‌ورا ئاواره‌ دبێژن ئه‌ م ناڤه‌گه‌رنه‌ شنگال”.

نایف سه‌یدۆ ، گۆت ژی”  هه‌شت ساله‌ حوكمه‌تا ئیراقێ‌ كار ل سه‌ر كه‌یسا شنگالێ نه‌كریه‌ وگاڤ نه‌هاڤێتینه‌ بۆ باشكرنا ره‌وشا شنگالێ و هه‌ر حوكمه‌ته‌كا ل ئیراقێ‌ دهێته‌ پێكئینان هیچ تشته‌كێ‌ بۆ شنگالێ ناكه‌ت و ب دیتنا من ده‌وله‌تان كارتێكرن ل سه‌ر بریارا سیاسی یا به‌غدا هه‌یه‌ له‌ورا ژی نه‌شێت ره‌وشا شنگالێ چاره‌سه‌ر بكه‌ت هه‌روه‌سا ژی گه‌له‌ك گرۆپێن چه‌كدار ل شنگالێ دا هه‌نه‌ كو ئاسته‌نگان بۆ ئاساییكرنا ره‌وشا شنگالێ دروست دكه‌ن، له‌ورا ژی ئێدارا شه‌رعی نه‌شێت ل شنگالێ ده‌ست بكاربیت”.

دهۆك، له‌زگین جوقی

سه‌رپه‌رشتی دۆسێیا رزگاركرنا ره‌ڤاندیێن ئێزدی راگه‌هاند،  به‌لگه‌ هه‌نه‌ گرۆپێن چه‌كدار گه‌له‌ك ژ ره‌ڤاندیێن ئێزدی یێن دبن ژیێ‌ 18 سالیی دا پشتێ‌ ژده‌ستێن تیرۆرستێن داعشێ رزگاربووین، چه‌كدار كرینه‌ ،ئاماژه‌كر ژی كو ژ سالا 2015ێ‌ وه‌ره‌ هه‌تا نوكه‌ مه‌ نه‌شیایه‌ چ  زه‌لامان رزگاربكه‌ین ئه‌وژی دبیت د ژیانێ‌ دا نه‌مابن و ئه‌وێن دهێنه‌ رزگاركرن ژی هه‌موو ژن و زارۆنه‌ وچارنڤیسێ‌ زه‌لامان یێ دیار نینه‌.

خه‌یری بۆزانی، سه‌رپه‌رشتی دۆسێیا رزگاركرنا ره‌ڤاندیێن ئێزدی گۆت” حوكمه‌تا هه‌رێما كوردستانێ‌ ب ریێا نڤیسینگه‌ها رزگاركرنا ره‌ڤاندییان به‌رده‌وام كار دكه‌ت بۆ رزگاركرنا هه‌موو ره‌ڤاندیێن ئێزدی نوكه‌ ژی نڤیسینگه‌ه ل هه‌ولێر به‌رده‌وامیێ ب كارێ‌ خوه‌ دكه‌ت ژبۆ رزگاركرنا ره‌ڤاندییان”.

خه‌یری ئاماژه‌ دا وی چه‌ندی ژی” هه‌تا نوكه‌ ئاسته‌نگ ل به‌رده‌م رزگاركرنا ره‌ڤاندیێن ئێزدی یێن هه‌ین  ب تایبه‌تی ژی ل كه‌مپا (هۆلێ‌) ل وه‌لاتی سووریێ چونكو پتریا ره‌ڤاندیێن ئێزدی دناڤ وێ كه‌مپێ دانه‌ كو ئه‌و كه‌مپ دبن ده‌ستهه‌لاتا (قه‌سه‌دی) دایه‌ ئه‌وژی نه‌دهاریكارن دگه‌ل مه‌ بۆ رزگاركرنا ره‌ڤاندیێن ئێزدی هه‌روه‌سا گه‌له‌ك ژ ره‌ڤاندیێن ئێزدی ل وان ده‌ڤه‌ران ماینه‌ وهاتینه‌ ترساندن ونه‌وێرن بێژن ئه‌م ئێزدی نه‌ هه‌روه‌سا  دبیت هنده‌ك ره‌ڤاندیێن ئێزدی زارۆ هه‌بن ونه‌شێن ژبه‌ر زارۆیێن خوه‌ بهێن”.

زێده‌تر گۆت” هه‌بوونا په‌كه‌كێ‌ ل شنگال كارتێكرنه‌كا مه‌زن ل سه‌ر هه‌موو ئاستان كریه‌ وه‌كو ئێمناهیا شنگالێ هه‌روه‌سا هاریكاری ژی نه‌گه‌هشتینه‌ شنگالێ وهه‌بوونا په‌كه‌كێ‌ ل شنگالێ كارتێكرنه‌كا خراب ل سه‌ر كارێ‌ رزگاركرنا ره‌ڤاندیان كریه‌، له‌ورا ئه‌م دخوازین په‌كه‌كه‌ ل شنگالێ نه‌مینیت داكو ئه‌م ژی بشێین پتر كارێن خوه‌ ئه‌نجام بده‌ین”.

خه‌یرێ‌ بۆزانی پتر دبێژیت”به‌لگه‌ هه‌نه‌ گه‌له‌ك ژ ره‌ڤاندیێن ئێزدی ئه‌وێن هاتینه‌ رزگاركرن ل ده‌ڤه‌رین رۆژئاڤایێ‌ كوردستانێ‌ په‌كه‌كێ‌ یێن برینه‌ دناڤ رێزێن خوه‌ دا وچه‌كدار كرینه‌ هه‌تا ل كه‌مپان ژی په‌كه‌كێ‌ گه‌له‌ك ره‌ڤاندی ب رێیێن جودا جودا یێن برینه‌ دناڤ رێزیێن خوه‌دا ئه‌ڤ ژی كاره‌كێ‌ گه‌له‌ك خرابه‌ هاتیه‌ كرن پتریا ره‌ڤاندیێن ئێزدی یێن په‌كه‌كه‌ دبه‌ت ژیێ‌ وان دبن 18 سالیێ‌ دایه‌ و هیشتا زارۆنه‌”.

خویاكر”  ل كه‌مپا هۆلێ‌ ره‌ڤاندیێن ئێزدی هه‌نه‌ هه‌روه‌سا ل وان ده‌ڤه‌ران ژی ماینه‌ یێن سالا 2014ێ‌ تیرۆرستێن داعشێ داگیركرین پشتی نه‌مانا داعشێ ژی ل وان ده‌ڤه‌ران هێشتا ره‌ڤاندی ماینه‌ دناڤ مالێن خێزانێن تیرۆرستێن داعشێ دا ئه‌و ئه‌ره‌بێن بووینه‌ داعش ژی یێن زڤرینه‌ سه‌ر مالێن خوه‌ و ره‌ڤاندیێن ئێزدی ژی دگه‌ل وان ماینه‌ “.

ئاشكه‌را  كر ژی” ب دیتنا من ژ سالا 2015ێ‌ هه‌تا نوكه‌ هێشتا وه‌كو پێدڤی لێگه‌ریان ل سه‌ر گۆرێن بكۆم نه‌هاتیه‌ كرن وهه‌تا نوكه‌ تنێ‌ 339 زه‌لام رزگاربووینه‌ و ژسالا 2015ێ‌ هه‌تا نوكه‌ مه‌ نه‌شیایه‌ چ زه‌لامان رزگاربكه‌ین ئه‌وژی دبیت دژیانێ‌ دا نه‌مابن وئه‌وێن دهێنه‌ رزگاركرن ژی هه‌موو ژن و زارۆنه‌ وچارنڤیسێ‌ زه‌لامان هێشتا  یێ دیار نینه‌”.

ل دووماهیێ گۆت” رۆلێ‌ حوكمه‌تا ئیراقێ گه‌له‌ك یێ خرابه‌ و یا خه‌مسار بوویه‌ هێشتا وه‌كو پێدڤی هه‌ڤكاری دگه‌ل مه‌  نه‌كریه‌ بۆ رزگاركرنا ره‌ڤاندیێن ئێزدی”.

ئه‌ڤرۆ:

سه‌رۆكێ پارتا سوسیالیستا دیموكراتا كوردستانی راگه‌هاند، سه‌ره‌دانا سه‌رۆكێ حوكمه‌تا هه‌رێما كوردستانێ بۆ به‌غدا جاره‌كادی نیشادانا نیازپاكیێ یه‌ بۆ چاره‌سه‌ریا ئێكجاری یا كێشێن ئیراقێ، ناڤبری دیاركر ژی ” ب دیتنا من تنێ پارچه‌بوونا ئیراقێ چاره‌سه‌ریا ئێكجاری یا كێشێن وی وه‌لاتیه‌”.

محه‌مه‌د حاجی مه‌حموود، سه‌رۆكێ پارتا سوسیالیستا دیموكراتا كوردستانی، گۆت” وه‌كو كورد مه‌ كێشه‌ ل گه‌ل به‌غدا نینه‌، به‌لكو مه‌ دۆزه‌ك ل گه‌ل هه‌یه‌، به‌لێ وان كێشه‌ یا ل گه‌ل مه‌ هه‌ی، ب باوه‌ریا من ئه‌و د به‌رهه‌ڤ نینن ب گۆره‌ی دستووری كێشان چاره‌سه‌ر بكه‌ن، چونكه‌ هه‌تا نوكه‌ وان خاله‌كا دستووری ژی بجهنه‌ئینایه‌”.

زێده‌تر گۆت” كۆنفیدرالی یان ژی پارچه‌بوونا ئیراقێ بۆ سێ هه‌رێمان چاره‌سه‌ریه‌ بۆ كێشێن ئیراقێ، چونكی ل ده‌ستپێكا دروستبوونا ده‌وله‌تا ئیراقێ به‌رده‌وام كێشه‌ دناڤبه‌را پێكهاتان دا هه‌بوون، هه‌ر پێكهاته‌كا ل به‌غدا ده‌ستهه‌لاتێ وه‌ردگریت، دخوازیت ده‌ست ب سه‌ر هه‌موو ئیراقێ دا بگریت، له‌وما تنێ پارچه‌بوون چاره‌سه‌ریا كێشێن ئیراقێ دكه‌ت”.

ل دۆر سه‌ره‌دانا مه‌سرور بارزانی، سه‌رۆكێ حوكمه‌تا هه‌رێما كوردستانێ، بۆ به‌غدا و كۆمبوونا وی ل گه‌ل سه‌رۆك وه‌زیرێن ئیراقێ و به‌رپرسێن بلند یێن ئیراقی، محه‌مه‌د حاجی مه‌حموود، دبێژیت” پێشتر سه‌رۆكێ حوكمه‌تا هه‌رێما كوردستانێ پشتی چه‌ند رۆژان ژ پێكئینانا كابینا نه‌هێ یا حوكمه‌تا هه‌رێمێ سه‌ره‌دانا به‌غدا كربوو، ئه‌ڤه‌ژی رامانا نیازپاكیێ یه‌ بۆ رێككه‌فتنێ، نوكه‌ ژی كو سه‌رۆكێ حوكمه‌تا هه‌رێمێ چوویه‌ به‌غدا كاره‌كێ باشه‌، ئه‌ز یێ پشت راستم ل وێرێ دێ بێژیته‌ وان: مه‌ ماف یێ هه‌ی  ل ڤی وه‌لاتی به‌رگریێ ژ مافێن خوه‌ بكه‌ین، جاره‌كادی نیشادانا نیه‌ت پاكیێ یه‌ به‌رامبه‌ر ئالیان، به‌لێ ب دیتنا من به‌غدا گاڤێن جدی ناهاڤێژیت بۆ چاره‌سه‌ریا كێشان، كازمی دخوازیت جاره‌كادی ببیته‌ سه‌رۆكێ وه‌زیران و دبیت نیشادانا نه‌رمیێ ژئالیێ ویڤه‌ هه‌ر بۆ ڤێ چه‌ندێ بیت”.

ئاماژه‌ كر” ئه‌و دادگه‌ها ناڤكری دادگه‌ها فیدرالی یا بلند، یا فیدرالی نینه‌، مه‌ ل ئیراقێ پێدڤی ب دادگه‌هه‌كا دستووریه‌ كو چاره‌سه‌ریا كێشان بكه‌ت، نه‌كه‌ دادگه‌هه‌ك د ده‌ستێ حزبان دا بیت چ بێژن ئه‌و بجهبینیت، ئه‌و دادگه‌هه‌ ده‌ستێوه‌ردانێ د هه‌موو تشتان دا دكه‌ت، د ڤی ده‌می دا نێزیك ببوو ده‌ستێوه‌ردانێ د بابه‌تێ پێكئینانا هه‌ڤژینیێ ل هه‌رێما كوردستانێ دا بكه‌ت، كو كارێ وێ نینه‌”.

سه‌باره‌ت پێكئینانا كابینا نوو یا حوكمه‌تا ئیراقێ، سه‌رۆكێ پارتا سوسیالیستا دیموكراتا كوردستانی گۆت” نوكه‌ هه‌ڤپه‌یمانیا چارچۆڤێ هه‌ماهه‌نگیێ دبێژیت: مه‌ لژنه‌ك یا پێكئینای بۆ دیاركرنا به‌ربژارێ پۆستێ سه‌رۆك وه‌زیرێن نوو، ب گۆره‌ی قانوونێ و دستووری پێدڤیه‌ مه‌زنترین فراكسیۆنا جڤاتا نوونه‌ران به‌ربژارێ پۆستێ سه‌رۆك وه‌زیران پێشكێش بكه‌ت”.

ئه‌ڤرۆ:

سه‌رۆك مه‌سعود بارزانی ل هه‌ولێرێ پشكداری د رێوره‌سمێن هه‌لكه‌فتا رۆژا نیشتمانی یا فره‌نسا دا كر.

ئه‌و رێوره‌سمه‌ ژ ئالیێ كونسۆلخانا فره‌نسا ل هه‌ولێرێ هاته‌ سازكرن و سه‌رۆك بارزانی پیرۆزباهیا رۆژا نیشتمانی یا فره‌نسا ل كونسۆلێ گشتیێ فره‌نسا ل هه‌ولێرێ كر.

ئه‌ڤرۆ:

ئه‌ندامه‌كێ مه‌كته‌با سیاسی یا پارتی دیموكراتی كوردستان رادگه‌هینیت، بێ مه‌رج پارتی ناچیته‌ دناڤ هیچ پرۆسه‌كا سیاسی دا و ئاماژه‌كر كو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ بۆ پێكئینانا حوكمه‌تێ.

جه‌عفه‌ر ئێمینكی، ئه‌ندامێ مه‌كته‌با سیاسی یا پارتی گوت” پارتی یا ڤه‌كریه‌ ل سه‌ر پرۆسا سیاسی ل ئیراقێ و بایكۆت ناكه‌ین و خوه‌ ژی پشت گوه ناهاڤێژین و چاره‌نڤیسێ مه‌ ل ڤی وه‌لاتی ب ڤی شێوه‌یه‌ و دڤێت به‌رده‌وام بین”.

هه‌روه‌سا گوت” ئه‌م بێ مه‌رج د ناچینه‌ دناڤ هیچ پرۆسه‌كا سیاسی دا، و ل ده‌ف مه‌ پێدڤیه‌ رێز ل دستووری بهێته‌ گرتن و سازان و هه‌ڤپشكی و هه‌ڤسه‌نگی د پاراستی بن، وی ده‌می هه‌ر ئالیه‌كێ سووننی، شیعی و كوردی هه‌ڤپشكێ مه‌یه‌ د پرۆسا سیاسی دا و دانوستاندنان دێ دگه‌لدا كه‌ین و دێ بزاڤێ كه‌ین ل گه‌ل رێكه‌ڤین”.

ئێمینكی دووپاتكر ژی” بێ هه‌بوونا حوكمه‌ته‌كا ب هێز ئه‌ڤ وه‌لاته‌ ناهێته‌ ب رێڤه‌برن و هه‌كه‌ ب ڤی شێوه‌یێ نوكه‌ به‌رده‌وام بیت، دێ هه‌رێما كوردستانێ زیاندارا ئێكێ بیت، مووشه‌ك دهێنه‌ ئاراسته‌كرن و درۆنان دهنێرنه‌ مه‌، بودجا گشتی یا ئیراقێ كو ب گۆره‌ی رێژه‌یا ئاكنجیان دهێته‌ دابه‌شكرن، تێرا هه‌رێما كوردستانێ وه‌كو پێدڤی نینه‌، له‌وما ئه‌رك و مافه‌كێ مه‌یه‌، كو به‌رهه‌ڤبوونا ل به‌غدا یا ب هێز بیت”.

ناڤبری دیاركر” بێ مه‌رج ناچینه‌ دناڤ هیچ پرۆسه‌كا سیاسی دا، به‌لكو ل ده‌ف پارتی رێزگرتن ل دستووری و پاراستنا سازانێ و هه‌ڤپشكیێ و هه‌ڤسه‌نگیێ بنه‌مایێن سه‌ره‌كی نه‌ و بێ وان حوكمه‌ته‌كا ب هێز ناهێته‌ پێكئینان و ب رێڤه‌برن”.