ئەڤرۆ نیوز:
وه‌زاره‌تا ساخله‌میا عیراقێ راگه‌هاند: ل عیراق و هه‌رێما كوردستانێ چ حاله‌تێن تووشبونێ ب ڤایروسێ كۆڕۆنا یێ نه‌هاتینه تۆمار كرن.
سه‌یف به‌در په‌یڤدارێ وه‌زاره‌تا ساخله‌میا عیراقێ راگه‌هاندیە: هه‌تا نوکە ل عیراق و هه‌رێما كوردستانێ چ حاله‌تێن توشبوونێ ب ڤایروسێ كۆرۆنا یێ نه‌هاتینه تۆمار كرن، ئه‌و نووچێن به‌حس ل سه‌رهه‌لدانا كۆرۆنا یێ دكه‌ن ل عیراقێ، یێ دووره ژ راستیێ.
ئەڤرۆ نیۆز، قائید میرۆ:
ھەر وەلاتیەکێ ھەرێما کوردستانێ بەری نوکە سەرەدانا ئیرانێ کربیت و بخوازیت ڤەگەڕیت دێ کەڤیتە بن چاڤدێریا نۆشداران بۆدەمێ دو حەفتیان بەرپرسەکێ حوکمەتا ھەرێمێ ژی دبێژیت، خەلکێ ڤەدگەڕیت دناڤا ئوتێلاندا ھاتینە کۆمکرن و بەردەوام پشکنین بۆ تێنەکرن.
کرمانج عزەت، قایمقامێ قەزا سۆران بۆ ئەڤرۆ نیۆز دیارکر”پشتی بەلافبوونا ڤایرۆسا کۆرۆنا ل ئیرانێ ھاتن و چوون دناڤبەرا ھەرێما کوردستانێ و کۆمارا ئیسلامیا ئیرانێ ھاتیە راگرتن و ب چ شێوەیەکی رێک ناھێتەدان خەلک ژ ئیرانێ بھێتە کوردستانێ و بەرۆڤاژی خەلکێ مەژی نابیت بچیتە ئیرانێ، لەوڕا دەرگەھێ کۆمەلگەھا نێڤدەوله‌تی یێ حاجی ئومەران ھاتیەگرتن.
قایمقامێ سۆران ئاشکراکر” تنێ وەلاتیێن ھەرێما کوردستانێ یێن بەری نوکە چووینە ئیرانێ دشێن ڤەگەڕان بۆ ناڤا ھەرێما کوردستانێ ئەو ب مەرجەکی پێدڤیە بۆ دەمێ چواردە رۆژان بن چاڤدێریا نۆشداران بن.
کرمانج عزەت گۆتژی” زێدەتری ٤٠٠ وەلاتیێن ھەرێمێ لڕۆژێن بۆری ل ئیرانێ ڤەگەڕیاینە و ھەموو دناڤا ئۆتێلاندا ھاتینە کۆمکرن و رێک ناھێتەدان بچنە ناڤا خەلکی ھەتا پشتڕاست دبین کو ھەلگرێ کۆرۆنایێ نینە، ئەڤەژی وەک پێنگا ئێکێ بۆ خوە پاراستنێ ل ڤایرۆسا کۆرۆنا.
ئەڤرۆ نیوز:
وەزیرێ ناڤخوە یێ حکومەتا هەرێمێ ڕاگەهاند، مە هەموو رێکار بۆ دەستبسەردانەگرتنا بازاری گرتینەبەر و رێکێ نادەین چ کەل و پەل و پێدڤیێن نۆشداری بچنە ژ دەرڤەی هەرێما کوردستانێ.
ئەڤرۆ شەمبیێ، د کۆنفڕانسەکا ڕۆژنامەڤانی دا ڕێبەر ئەحمەد وەزیرێ ناڤخوە یێ هەرێمێ راگەهاند، دێ هەموو سنورێن نەفەرمی هێنە داخستن و پەیوەندیێن بازرگانی ژی دێ بەردەوام بن.
هەروەسا گۆت ژی، ئەو وەلاتیێن کو ب رێیا حاجی ئۆمەران و دەروازێ باشماخ دەربازی هەرێمێ دبن، دێ هەموو ڕێکارێن قانوونی و نۆشداری بەرامبەر وان هێنە گرتن و ١٤ ڕۆژان ژی دێ ئێخینە بن چاڤدێریێ.
دەربارەی گرانبوونا بهایێ ماسک و دەرمانخانە و جهێن فرۆشتنا پێدڤیێن نۆشداری دیارکر، مە هەموو ڕێکار بۆ دەستبسەر دانەگرتنا بازاڕی گرتینەبەر و رێکێ نادەین چ کەل و پەل و پێدڤیێن نۆشداری بچیتە ژ دەرڤە.
هەڤدەم، سامان بەرزنجی وەزیرێ ساخلەمیا حوکمەتا هەرێمێ ڕاگەهاند، هەتا نوکە چ حالەتەک یان گومانلێکریەکێ توشبووی ب کۆڕۆنایێ نەهاتیە تۆمارکرن.
ئەڤرۆ نیۆز، قائید میرۆ:
بڕیارە ئەڤرۆ لایەنێن کوردستانی یێن کەرکووکێ ل ھەولێرێ کۆمبوونەکێ ئەنجامبدەن و بەرپرسەکێ پارتی ژی دبێژیت، چەندین پێشنیار ھاتینە بەرھەڤکرن بۆ تەناکرنا رەوشا کەرکووکێ.
دکتۆر محەمەد خورشید ، بەرپرسێ لقا پارتی ل کەرکووکێ بۆ ئەڤرۆ نیۆز دیارکر” بڕیارە ئەڤرۆ شاندەکێ لایەنێن کوردستانی یێن کەرکووکێ سەرەدانا بارەگایێ پارتی بدەن ل ھەولێرێ و لدۆر رەوشا نوکەیا کەرکووک کۆمببن، بەری نوکەژی چەندین کۆمبوون دناڤبەرا لایەنێن سیاسی ھاتینەکرن بۆ تەنارکرنا رەوشا ئالۆزا کەرکووکێ.
دکتۆر محەمەد خورشید گۆتژی” چەند پێشنیارەک بۆ ئاسایی کرنا رەوشا کەرکووکێ ھاتینە بەرھەڤکرن و بڕیارە د کۆمبوونا ئەڤرۆیا لایەنێن سیاسی دا بھێنە گەنگەشەکرن، بتایبەتی ڤێ دوماھیێ رەوشا کەرکووکێ زێدەتر ئالۆزی بخۆڤە دیتیە.
ئەڤرۆ نیوز:
پەیڤدارێ وەزارەتا ساخلەمیا هەرێمێ راگەهاند، چ حالەتێن توشبووی یان گومانلێکری ب ڤایرۆسێ کۆرۆنایێ ل پارێزگەهێن ھەرێما کوردستانێ نەهاتنە تۆمارکرن و نینن ژی.
محەمەد قادر پەیڤدارێ وەزارەتا ساخلەمیا حکومەتا هەرێمێ راگەهاند ، هەموو ڕێکار ل دژى ڤایرۆسێ کۆرۆنایێ ژ ئالیێ وەزارەتا ساخلەمی و ئالیێن پەیوەندیدار ڤە گرتنەبەر و رێ ناهێتە دان گەشتیارێن وڵاتێ ئیرانێ بهێنە دناڤ هەرێمێ دا.
ڕاگەهاند ژی ، تیمەکا وەزارەتا ساخلەمیێ کو ژمارا وان ٢٥ کەسن ژ ئالیێ ڕێکخراوا ساخلەمیا جیهانی ڕاهێنان پێ هاتینەکرن ل تەڤایا دەڤەرێن هەرێمێ هاتینە بەلاڤکرن ب مەرەما پشکنینێ بۆ وان کەسێن دهێنە ناڤ هەرێمێ.
هەروەسا گۆتیە، مە ل گەل وەزارەتا ساخلەمیا عێراقێ هەڤبەندیا بەردەوام هەیە و د نوکە دا تەڤایا پێدڤیێن نۆشداری بۆ پشکنینێ ل بەردەستن.
ئەڤرۆ نیوز:
د کۆمبوونا ل گەل شاندێ هەرێمێ دا محەممەد توفیق عەلاوی پێ ڕاگەهاندیە، د پێكئینانا حوکمەتێ دا دێ وەک پارێزگەهێن دی یێن عێراقێ رەفتارێ ل گەل هەرێمێ کەین.
سەلیم شوشكەیی ئەندامێ پەرلەمانێ عێراقێ و ئەندامێ شاندێ دانوستانكارێ هەرێمێ بۆ بەغدا، ب ئاژانسا نووچەیا ئەلعێراقیە راگەهاندیە، د کۆمبوونا عەلاوی و شاندێ هەرێمێ بۆ پیكئینانا حكومەتێ، شاندێ كوردی داخواز ژ سەرۆك وەزیرێن نوو كریە د پێكئینانا كابینا خۆ دا هەرێمێ وەكو گەل تەماشە بکەت نە وەك حزب، د هەمبەر دا ژی عەلاوی ب شاندی ڕاگەهاندیە، هەرێم ژی وەك پارێزگەهێن دی یێن عێراقێ دێ رەفتار ل گەل دا هێتە کرن و پەسەندكرنا بەربژێرێن كورد ژی دێ ب هەمان وێ میكانیزمێ بیت کو بەربژارێن پاریزگەهێن دی یێن عێراقێ پێ دهێنە پەسەند كرن.
ناڤهاتی ئاشكرا كریە ژی ، عەلاوی ب ئەندامێن شاندێ هەرێمێ ڕاگەهاندیە، كو ئەو ب خوە دێ بەربژاران بۆ پۆستێن كابینا خوە دێ هەلبژێریت و ڕێ ژی نادەت چ ژ وەزیرێن نوکە د پۆستێن خوە دا بمینن.
ئەڤرۆ نیوز:
ژ بۆ رێگریکرنێ ل بەلاڤبوونا ڤایرۆسێ کۆرۆنا، وەزارەتا ساخلەمیا هەرێما کوردستانێ، هژمارەکا پێشنیاران ئاراستەی وەزارەتا نافخۆ کریە، ئەو پێشنیار ژی ئەڤەنە:
– رێگریكرن ژ هاتنا وان هه‌موو وەلاتیێن کو ژ ئیرانێ دهێنە هەرێما کوردستانێ ل هەموو خالێن سنوری، چ راسته‌وخۆ و یان نەڕاسته‌وخۆ، هەتا دەمەکی نەدیار ژبلی شاندێن دیبلۆماسیی، كو پشكنینا نۆشداری بۆ بهێتەکرن.
– ئه‌ڤ رێگرییه وەلاتیێن هه‌رێما كوردستانێ ناڤەگریت كو نوکە ل كۆمارا ئیسلامیا ئێرانێ نە، ب مه‌رجەكێ پێگیری ب رێكارێن وه‌زاره‌تا ساخەمیێ بکەن، كو بۆ گه‌ره‌نتی و چاڤدێریكردنێ بۆ دەما 14 رۆژان دێ ڤەکێشیت.
– رێگریكرن ژ هەموو وەلاتیێن هه‌رێما كوردستانێ و عێراقێ بۆ سه‌رەدانا كۆمارا ئیسلامیا ئیرانێ هەتا دەمەکێ نەدیار.
ئەڤرۆ نیوز، زنار:
هێرشبەرێ یانا دهۆک زیاد ئەحمەد ئەوێ بەری حەفتیەکێ هەڤبەستا یانا دهۆک ئیمزاکری بۆ یاریێن خولا کوردستانێ یا تەپاپێ بێ ئاگەهداریا یانێ بەر ب بەغدا چویە و یانا دهۆک بجه هێلایە.
ل دووڤ وان زانیاریێن دەست ب ئەڤرۆ نیوز کەفتین یاریزانێ نافهاتی بێ ئاگەهداریا یانێ چویە بەغدا داکو یاریێ بۆ یانا تەلەبە بکەت د خولا عیراقێ یا نایاب دا و نوکە یانا دهۆک ژی خستیە د ڤالاتیێ دا ژبەرکو پشتبەستنا خوە لسەر ڤی یاریزانی کریە د هێلا هێرشبەریێ دا بۆ خولا کوردستانێ یا نایاب، بریارە بۆ یاریا سوبەهی ژ خولا هەرێمێ بەرامبەر سۆران یانا دهۆک کێماسی د هێلا هێرشبەریێ دا هەیە پشتی چونا هێرشبەرێ وێ زیاد ئەحمەد.
ئه‌ڤرۆ نیوز:
سه‌رۆكێ هه‌ڤپه‌یمانیا نیشتمانیا عیراقی راگه‌هاند: پشتی سه‌رۆك وه‌زیرێ راسپاردی سوزا پاراستنا خونیشانده‌ران دایه، دیارده‌یا ره‌ڤاندنا چالاكڤانان به‌رده‌وامه، ئه‌ڤا جهێ ئاماژه پیكرنێ یه كۆ ده‌سه‌لات بۆ دوماهیئینانا خونیشانده‌ران ب ریكارێن دوژمنكاریی بكار دئینیت.
ئه‌یاد عه‌لاوی سه‌رۆكێ هه‌ڤپه‌یمانیا نیشتمانیا عیراقی د راگه‌هاندنه‌كێ دا دیاركر به‌رده‌وامیا ره‌ڤاندنا چالاكڤانان ئاماژه‌یا ئه‌وێ چه‌ندێ دده‌ت كۆ ده‌سه‌لاتێ ب هه‌ر شیوه‌یه‌كی دڤێت دوماهیێ ب خونیشاندانان بینیت.
ئه‌یاد عه‌لاوی ئه‌و چه‌نده ژی راگه‌هاند: بزاڤێن ره‌ڤاندنێ رامانا وێ ئه‌وه كۆ گوتارا سه‌رۆك وه‌زیرێ راسپاردی بۆ پاراستنا خونیشانده‌ران و بجهكرنا داواكاریێن وان نه دروست بوو، چونكو پشتی ئه‌وێ گوتارا وی چه‌ندین چالاكڤان بێ سه‌رۆشین بووینه.
ئەڤرۆ نیوز:
رێڤەبەریا باژێرڤانیان ل دھۆکێ وەلاتیێن قەزا سێمێلێ ھایدار دكەت، کو دێ بارانە‌كا بھێز ل وێ قە‌زایێ باریت ئە‌گە‌رێ دروستبوونا لە‌ھیان ژی ھە‌یە.
دیار سادق، بەرپرسێ پشکا ژینگەهێ ل رێڤەبەریا گشتی یا باژێرڤانیان ل پارێزگەها دهۆکێ راگەهاند، ل گورەی راسپاردێن رێڤەبەریا گشتی یا باژێرڤانیان ل پارێزگەها دهۆکێ، پشتبەستن ب سەقاناسیا هەرێما کوردستانێ، ئەڤ شەڤە و سوبەهی رۆژا پێنجشەمبی٢٠ شباتا ٢٠٢٠، دێ پێلەکا بهێز یا بارانێ سنورێ قەزا سێمێلێ و دەوروبەران ڤەگریت و چێدبیت لەهی درۆست ببن.
هەروەسا دازانین ژى، رێڤەبەریا وان هەموو باژێرڤانیێن سنورێ قەزا سێمێلێ و دەڤەرێ ھایدار كرینە کو د بەرهەڤبن بۆ پاراستنا سەر و مال و گیانێ وەلاتیان.
بەرپرسێ پشکا ژینگەهێ ل رێڤەبەریا گشتی یا باژێرڤانیان ل پارێزگەها دهۆکێ دیار ژى کر، هەموو تیمێن خوە ئێخستینە د خزمەتا دەڤەرێ دا، دا کو چ بوویەرێن نەخواستى دروست نەبن.
لدووڤ پێشبینیێن رێڤەبەریا گشتی یا سەقاناسی و ئەردهەژێن هەرێما کوردستانێ سوبەهی دێ ئەسمان عەور و باران بیت و ل دەڤەرێن چیایی دێ بەفر باریت.
نيشاندان