دهۆك، له‌زگین و نه‌وزاد:
په‌یڤداری رێڤه‌به‌ریا پۆلیسێن به‌ره‌ڤانیا باژێری ل پارێزگه‌ها دهۆكێ‌ دیار كر، لیژنه‌ك بۆ دووڤچوونێ‌ ل سه‌ر سۆتنا بازارێ‌ په‌رۆكان ل دهۆكێ‌ هاته‌ پێكئینان و دبێژیت: ئه‌ڤ لژنه‌ دێ‌ بهایێ‌ زیانان و ئه‌گه‌رێن دروست یێن سۆتنا بازاری ده‌ستنیشان كه‌ت.
بێوار عه‌بدولعه‌زیز، په‌یڤدارێ‌ رێڤه‌به‌ریا پۆلیسێن به‌ره‌ڤانیا باژێری ل پارێزگه‌ها دهۆكێ‌ دیار كر، ل شه‌ڤا 20/1/2020 ئاگر به‌ربوو دوكانێن بازارێ‌ په‌رۆكان ل دهۆكێ‌ و 50 دوكان هاتینه‌ سۆتن، ژ وانا ژی 15 دوكان ب ته‌مامی هاتینه‌ سۆتن و 35 دوكانێن دی ژی ئاگری زیان یێن گه‌هاندینێ‌، لێ‌ هه‌موو نه‌هاتینه‌ سۆتن و گۆت: “لژنه‌كا ڤه‌كۆلینێ‌ ژ پۆلیسێن به‌ره‌ڤانیا باژێری قه‌ستا جهێ‌ روودانێ‌ كریه‌ بۆ زانینا ئه‌گه‌رێن دروست یێن سۆتنا بازارێ‌ په‌رۆكان ل دهۆكێ‌، لێ‌ گومان دهێته‌كرن شووته‌كێ‌ كاره‌بێ‌ بیت و هیشتا یا پشتڕاست نینه‌ و دێ‌ لژنه‌ پشتڕاست كه‌ت”.
ئاشكرا ژی كر، ئه‌و لیژنه‌ بۆ دووڤچوونا سۆتنا بازاری هاتیه‌ پێكئینان و دێ‌ كوژمێ‌ داریی یێ‌ زیانێن گه‌هشتینه‌ خودانێن دوكان دیار كه‌ت، هه‌موو تشته‌ك دێ‌ هێته‌ نڤیسین ل سه‌ر زیانێن گه‌هشتینه‌ خودانێن دوكانان.
بێواری گۆت: “بۆ كونترۆلكرنا روودانا سۆتنا بازارێ‌ په‌رۆكان پێنج بنگه‌هێن به‌ره‌ڤانیا باژێری دگه‌ل ترۆمبێلێن ئاگرڤه‌مراندنێ‌ به‌رهه‌ڤ بوون و چو زیانێن گیانی نه‌بوون، بتنێ‌ زیانێن مه‌زن یێن دارایی گه‌هشتینه‌ دوكانداران”.
ژ لایه‌كێ‌ دیڤه‌ رائید فه‌لاح، ئه‌ندامێ‌ لژنا دووڤچوونێ‌ ل سه‌ر روودانا ئاگری ل بازاڕێ‌ په‌رۆكان ل دهۆكێ‌ بۆ ئه‌ڤرۆ گۆت: “پشتی ژوورا كونترۆلی یا به‌ره‌ڤانیا باژێری هاتیه‌ ئاگه‌هداركرن، ب زووترین ده‌م تیمێن به‌ره‌ڤانیا باژێری گه‌هشتنه‌ جهێ‌ روودانێ‌ و شیان ئاگری كونترۆل بكه‌ن”.

دهۆك،نیوز:
به‌رپرسێ‌ ئێشێن ڤه‌گر ل رێڤه‌به‌ریا خوه‌پاراستنا ساخله‌میا دهۆكێ‌ دیار كر كو ئه‌نفلوه‌نزا وه‌رزی نه‌ تشته‌كێ‌ نوویه‌، به‌لكو سالانه‌ یا هه‌ی و ل هه‌موو دونیایێ‌ ژی یا هه‌ی، هه‌كه‌ ئه‌نفلوه‌نزا وه‌رزی هه‌بیت پتری 90% ژ حاله‌تان د ده‌مێ‌ حه‌فتیه‌كێ‌ دا ب خوه‌ چاره‌سه‌ر دبن و پێدڤی چاره‌سه‌ریا نۆشداری نابن و د بێژیت: ب تنێ‌ حاله‌تێن دژوار ل نه‌خۆشخانێ‌ دهێنه‌ نڤاندن، ئه‌و ژی ماوێ‌ 10 رۆژان هه‌تا دو حه‌فتیان دهێنه‌ چاره‌سه‌ركرن و 99% ژ نه‌خۆشێن مه‌ نوكه‌ یێن ده‌ركه‌ڤتین و ره‌وشا وان گه‌له‌كا باشه‌ و ره‌وش دبن كونترۆلێ‌ دایه‌.
د. سه‌گڤان حه‌سه‌ن، به‌رپرسێ‌ ئێشێن ڤه‌گر ل رێڤه‌به‌ریا خوه‌پاراستنا ساخله‌میا دهۆكێ‌ دیار كر كو پشتێ‌ 67 حاله‌تێن گومانلێكری یێن ئه‌نفلوه‌نزا وه‌رزی ل دهۆكێ‌ هاتینه‌ تۆماركرن، پشتی پشكنین ل تاقیگه‌هێ‌ بۆ وان هاتینه‌ كرن، ده‌ركه‌ڤت 24 حاله‌ت ئه‌نفلوه‌نزا نه‌، ژ وانا ژی سێ‌ كه‌سان گیانێ‌ خوه‌ ژ ده‌ستدان و ئێكی ژی ل هه‌ولێر گیانێ‌ خوه‌ ژ ده‌ستدا ئه‌و ژی خه‌لكێ‌ دهۆكێ‌ بوویه‌ و گۆت: “ئه‌نفلوه‌نزا وه‌رزی هه‌موو سالان ل هه‌موو دونیایێ‌ په‌یدا دبیت، نه‌ بتنێ‌ ل كوردستانێ‌ په‌یدا دبیت، دو جۆرێن ڤایرۆسێ‌A نه‌، رێژا مرنێ‌ ب ڤی ڤایرۆسی ل هه‌موو دونیایی ره‌نگه‌ كه‌سه‌ك یان دو كه‌س ژ سه‌رجه‌مێ‌ هزار كه‌سان گیانێ‌ خوه‌ ژ ده‌ست بده‌ن، ئه‌و ژی كه‌سێن به‌رگیریا وان یا لاواز یان خۆدان ژیێ‌ مه‌زن یان زارۆكێن ساڤا بن، ده‌مێ‌ تووشی ئه‌نفلوه‌نزایێ‌ دبن ئه‌ڤه‌ ره‌نگه‌ تووشی ئاریشێن سینگ كولبوونێ‌ یان نه‌خۆشیا سلێ‌ ببن، ئه‌ڤه‌ دبیته‌ ئه‌گه‌رێ‌ تێكدانا ره‌وشا نه‌خۆشی، لێ‌ نابیت مرۆڤ خوه‌ بترسینیت”.
د. سه‌گڤان ئاشكرا ژی كر كو هه‌موو سالان ئه‌نفلوه‌نزا یا هه‌ی، هنده‌ك حاله‌ت د دژوارن و ل نه‌خۆشخانێ‌ دهێنه‌ نڤاندن و هنده‌ك ژی د دژوار نینن، لێ‌ ب شێوه‌كێ‌ گشتی ره‌وش ل دهۆكێ‌ د بن كونترۆلێ‌ دایه‌ و ڤاكسین یا هه‌ی و ده‌رمان ژی د دابینكرینه‌ و گۆت: “نه‌خۆشخانێن دهۆكێ‌ هه‌موو ب كارێ‌ خوه‌ رادبن و خزمه‌تێ‌ دكه‌ن و هه‌ر حاله‌ته‌كێ‌ دژوار هه‌كه‌ په‌یدا ببیت ل نه‌خۆشخانێ‌ دهێته‌ نڤاندن و په‌یوه‌ندی ب رێڤه‌به‌ریا خوه‌پاراستنا ساخله‌میێ‌ دهێته‌ كرن، ئه‌م ژی ده‌ملده‌ست ده‌ست ب ده‌رمان و چاره‌سه‌ركرنێ‌ دكه‌ین، نموونه‌ ژ نه‌خۆشی دهێنه‌ وه‌رگرتن و هه‌موو پێرابوونێن نۆشداری دهێنه‌ وه‌رگرتن بۆ پاراستنا ژیانا وی نه‌خۆشی، لێ‌ هنده‌ك ژ نه‌خۆشان ئاریشێن دی یێن ساخله‌میێ‌ هه‌نه‌، هه‌كه‌ ره‌وشا كه‌سه‌كی تێكبچیت ره‌نگه‌ نه‌ بتنێ‌ ئه‌نفلوه‌نزا بیت، به‌لكو ئاریشێن دی یێن ساخله‌میێ‌ ژی بن”.