ئه‌ڤرۆ نیوز:

سه‌رۆكێ ئه‌مریكى دونالد ترامپ راگه‌هاند، رێككه‌فتنا ئاگربه‌ستێ د ناڤبه‌را توركیا و كوردان دا ب شێوه‌كێ باش یا ب رێڤه‌ دچیت و مه‌ چو سوز ب كوردان نه‌داینه‌ بۆ ده‌مێ 400 سالان بپارێزین.

ترامپى گۆت ژى” كورد ژ هنده‌ك ده‌ڤه‌رێن دیاركرى ل سووریێ ب رێیه‌كا زیره‌كانه‌ خوه‌ڤه‌كێشایه‌”.

سه‌رۆكێ ئه‌مریكى ل به‌رده‌م هژماره‌كا رۆژنامه‌ڤانان ل كۆچكا سپى ئاخڤت و گه‌ ف كرن هه‌كه‌ توركیا ره‌فتاره‌كا شاش بكه‌ت، دێ سزا ل سه‌ر هێنه‌ سه‌پاندن.

ل دۆر ڤه‌كێشانا هێزێن ئه‌مریكى ژ رۆژئاڤایێ كوردستانێ گۆت” ل دووماهیێ ئه‌و هێز دێ هه‌ر هێنه‌ ڤه‌كێشان و من نه‌ڤێن هێزێن ئه‌مریكێ ل سووریێ بمینین”.

ئه‌ڤرۆ نیوز:

نوونه‌رێ حوكمه‌تا هه‌رێما كوردستانێ ل به‌غدا راگه‌هاند، ئه‌و ده‌نگوباسێن ل دۆر ره‌تكرنا داخوازیێن هه‌ریمێ ژ لایێ به‌غدا ڤه‌ سه‌باره‌ت بودجێ هاتینه‌ به‌لاڤكرن، د راست نینن و دانوستاندنێن هه‌ردو لایه‌نان د به‌رده‌وامن و لێكنێزیكبوونه‌كا باش یا هه‌ى بۆ وێ چه‌ندێ بگه‌هنه‌ رێككه‌فتنێ، بریاره‌ ژى پشتى موحه‌ره‌مێ، شاندێ هه‌ریمێ سه‌ره‌دانا به‌غدا بكه‌ت.

فارس عیسا، نوونه‌رێ حوكمه‌تا هه‌ریما كوردستانێ ل به‌غدا  د داخۆیانیه‌كا رۆژنامه‌ڤانى دا، گۆت” دانوستاندنێن به‌رده‌وام ل سه‌ر ئاستێ وه‌زاره‌تان و په‌یوه‌ندیێن به‌رده‌وام د ناڤبه‌را هه‌رێمێ و به‌غدا یێن هه‌ین بۆ وێ چه‌ندێ ل دۆر به‌هرا هه‌رێما كوردستانێ د پرۆژه‌ قانوونا بودجا گشتى بۆ سالا 2020 بگه‌هنه‌ رێككه‌فتنێ، د نوكه‌ ژى دا لێكنێزیكبوونه‌كا باش د ناڤبه‌را هه‌ردو لایه‌نان دا یا هه‌ى و دێ د به‌رده‌وام بن هه‌تا دگه‌هنه‌ رێككه‌فتنا دووماهیێ، ئه‌و ده‌نگوباسێن هاتینه‌ به‌لاڤكرن ژى كو حوكمه‌تا عیراقێ داخوازیێن هه‌رێمێ ل دۆر به‌هرا وێ ژ بودجه‌ى یێن ره‌تكرین، د راست نینن و هیچ ده‌نگوباسه‌كێ ژ وى جۆرى نینه‌، چونكى هێشتا رێككه‌فتن نه‌هاتیه‌ كرن”.

عیساى زێده‌تر بۆ مالپه‌رێ فه‌رمیێ پارتى گۆت” بریاره‌ پشتى هه‌لكه‌فتێن موحه‌ره‌مێ، شاندێ حوكمه‌تا هه‌رێما كوردستانێ سه‌ره‌دانا به‌غدا بكه‌ت و ل سه‌ر پرسا به‌هرا هه‌رێمێ ژ بودجه‌ى دانوستاندنان بكه‌ت و ئه‌و پرسه‌ بهێته‌ ئێكلاكرن”.

ئه‌ڤرۆ نيوز:

ئێڤاريا ئه‌ڤرۆ سێشه‌مبى 15/10/2019 په‌قينه‌ك ده‌ڤه‌را گويژه‌ ل چيايێ ئه‌زمه‌ر ل باژێرێ سلێمانيێ روودا و د ئه‌نجامدا كه‌سه‌كى گيانێ خوه‌ ژ ده‌ست دا و كه‌سه‌ك دى ژى بريندار بوو.

سه‌ركه‌وت ئه‌حمه‌د، په‌يڤدارێ پۆليسێن سلێمانيێ د داخۆيانيه‌كا رۆژنامه‌ڤانى دا گۆت” ژ ئه‌گه‌رێ په‌قينه‌كێ كه‌سه‌كى گيانێ خوه‌ ژ ده‌ست دا و كه‌سه‌كى دى ژى بريندار بوو”.

گۆت ژى” هه‌تا نوكه‌ ئه‌م نزانين ئه‌و په‌قين ژ ئه‌گه‌رێ چ بوو، به‌لێ هێزێن پۆليسان ده‌ست ب ئه‌نجامدانا ڤه‌كۆلينێ كريه‌”.

ئه‌ڤرۆ نيوز:

ئێڤاريا ئه‌ڤرۆ ئێكشه‌مبى 13/10/2019 سه‌رۆكێ ئه‌مريكى دونالد ترامپ د به‌رپه‌رێ خوه‌ ل سه‌ر تۆرا جڤاكى يا تويته‌رى به‌لاڤكر كو ل گه‌ل سيناتۆر ليندسى گراهام و چه‌ند ئه‌ندامێن دى يێ كۆنگرێسێ ئه‌مريكى، ب ديموكراتيان ژى ڤه‌، مژوولى به‌حسكرنا سه‌پاندنا سزايه‌كێ گران ل سه‌ر توركيا نه‌.

ترامپى دياركر ژى” ئه‌ز يێ ل سه‌ر هێلێ بۆ به‌حسكرنا ده‌ركرنا بريارا دۆرپێچه‌كا گران ل سه‌ر توركيا، وه‌زاره‌تا گه‌نجينێ يا به‌رهه‌ڤه‌ بۆ ڤێ چه‌ندێ، لايه‌نێن قانوون دانانێ يێن دى ژى دبيت پێدڤى بكه‌ت ئه‌وژى بهێنه‌ سه‌ر هێلێ، ل سه‌ر ڤى بابه‌تى كوده‌نگيه‌كا باش يا هه‌ى، توركيا داخواز كريه‌ كو كاره‌كێ ب ڤى شێوه‌ى نه‌كه‌ين”  گۆت ژى “چاڤه‌رێ بن”.

ئه‌ڤرۆ نيوز:

ئه‌ميندارێ گشتيێ كۆمكارا عه‌ره‌بى ئه‌حمه‌د ئه‌بولغيت هه‌لويستێ خوه‌ يێ توند به‌رامبه‌ر هێرشا توركيا بۆ سه‌ر رۆژئاڤايێ كوردستانێ ده‌ربرى و داخواز ژ توركيا كر، هێرشا خوه‌ بۆ سه‌ر باكوورێ رۆژهه‌لاتا سووريێ ب راوه‌ستينيت، هوشدارى ژى دا كو توركيا دخوازيت نه‌ژادێ كوردان نه‌هێليت و ديموگرافيا ده‌ڤه‌رێ ب گوهۆريت.

ئه‌بولغيت ئه‌ڤرۆ شه‌مبيێ 12/10/2019 د گۆتاره‌كێ دا ل كۆمبوونا ب له‌ز يا كۆمكارا عه‌ره‌بى كو ل قاهيره‌ تايبه‌ت ل دۆر هێرشا توركيا بۆ سه‌ر باكوورێ رۆژهه‌لاتا سووريێ ب رێڤه‌چوو، راگه‌هاند” مه‌ترسيا نه‌هێلانا كوردان ل سووريێ ژ لايێ توركيا ڤه‌ يا هه‌ى”. داخواز ژ ئه‌نقه‌ره‌ ژى كر هێرشا خوه‌ ب راوه‌ستينيت.

گۆت ژى” ئه‌و هێرشا توركيا دێ كاره‌ساتێن مه‌زن بۆ ده‌ڤه‌رێ ل دووڤ خوه‌ ئينيت و گه‌فه‌كا مه‌زنه‌ بۆ نه‌هێلانا كوردان و ئاكنجيكرنا په‌نابه‌ران ل جهێن وان وگوهۆرينا ديموگرافيا ده‌ڤه‌رێ، هه‌روه‌سا په‌يدابوونا رێكخراوێن تيرۆرستى يێن نوو ب تايبه‌ت ل ده‌ڤه‌رێن رۆژهه‌لاتا فوراتێ، كو ژ لايێ توركيا ڤه‌ بووينه‌ ئارمانج و 7 زيندانێن مه‌زن يێن لێ هه‌ين و ب هزاران چه‌كدارێن زيندانكريێن داعشێ د وان زيندانان دانه‌”.

دياركر” 12 هزار چه‌كدارێن داعشێ يێن د زيندانێن باكوورێ سووريێ دا هه‌ين”. به‌رپرسياره‌تيا ئه‌نجامێن ڤێ ره‌وشى ژى خستنه‌ ستوويێ توركيا.