ئه‌ڤرۆ نيوز:

په‌رله‌مانێ كوردستانێ ب نیازه‌ ل حه‌فتییا بهێت كۆم ببیت و ده‌نگی ل سه‌ر پێشنیازا تاپۆكرنا ئه‌ردێن زێده‌گاڤی بده‌ت.

بژار كۆچه‌ر، سه‌رۆكێ لژنا قانوونی ل په‌رله‌مانێ كوردستانێ راگه‌هاند كو بریاره‌ ل حه‌فتیا بهێت په‌رله‌مانێ كوردستانێ روونشتنا دویێ ژ وه‌رزێ نوو یێ قانوون دانانێ گرێده‌ت و تێدا پێشنیازا تاپۆكرنا پارچه‌ زه‌ڤیێن زێده‌گاڤی ل هه‌رێما كوردستانێ دێ هێته‌ په‌سه‌ندكرن و بۆ وار گۆت: “خواندنا ئێكێ بۆ ڤێ پێشنیازێ هاتییه‌ كرن و د روونشتنا حه‌فتییا بهێت دا، په‌رله‌مان دێ خواندنا دوێ بۆ كه‌ت و ده‌نگی ل سه‌ر ده‌ت”.

سه‌رۆكێ لژنا قانوونی یا په‌رله‌مانێ كوردستانێ دووپات كر، كۆده‌نگیا ته‌ڤ فراكسیۆنێن په‌رله‌مانی ل سه‌ر ڤێ پێشنیازێ هه‌نه‌ و گۆت: “ژ به‌ر كو پێشنیازا تاپۆكرنا ئه‌ردێن زێده‌گاڤی د به‌رژه‌وه‌ندیا خه‌لكێ هه‌ژار دایه‌ و هه‌ڤده‌م د به‌رژه‌وه‌ندیا حوكمه‌تێ دایه‌، بێ كێشه‌ دێ هێته‌ ده‌رباز كرن”.

بژار كۆچه‌ر هه‌روه‌ها گۆت: پرسا هه‌ره‌ گرنگ د پێشنیازێ دا كو دێ ده‌نگ ل سه‌ر هێته‌ دان، بهایێ هه‌ر مێتره‌كا ئه‌ردێ زێده‌گاڤێ ب كێمتر ژ پێشنیازا به‌ری نها هاتیه‌ ده‌ستنیشان كرن.

ئه‌ڤرۆ نيوز:

سه‌رۆك مه‌سعود بارزانى هه‌لويستێ خوه‌ ل دۆر ره‌وشا رۆژئاڤايێ كوردستانێ و ئه‌گه‌ر و مه‌ترسيێن روودانا شه‌ر و هێرشا له‌شكرى يا سۆپايێ توركيا بۆ سه‌ر باكوورێ سوريا رۆژهه‌لاتێ فورات راگه‌هاند.

ئه‌ڤرۆ نيوز، نيوار محه‌مه‌د سه‌ليم:

ئه‌ڤرۆ رۆژا ئێكشه‌مبى رێكه‌فتى 6ى چريا ئێكێ 2019 لژنا باژێرڤانى و خزمه‌تگۆزاريێن گشتى و گه‌شتوگۆزا جڤاتا پارێزگه‌ها دهۆكێ ل گه‌ل هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوو، ب مه‌ره‌ما دووڤچوونێن به‌رده‌وام ل سه‌ر ئاريشا ئاڤێ ل پارێزگه‌ها دهۆكێ.

د كۆمبوونێ دا، ئه‌ندازيار فارس حاجى ژ رێڤه‌به‌ريا ئاڤا دهۆكێ بۆ ئه‌ڤرۆ نيوز دياركر كو كارمه‌ندێن وان بۆ سه‌ر كارى د كێمن، گه‌له‌ك خانه‌نشين بووينه‌ و كه‌سێ دى ل جهێ وان نه‌هاتيه‌ دامه‌زراندن و گۆتژى: “ب گۆره‌يى رێنمايان پێدڤيه‌ 20% ژ پارێ بۆ ئاڤێ ژ وه‌لاتيان دهێته‌ وه‌رگرتن بۆ چاره‌كرنا كێشێن ئاڤێ يێن رێڤه‌به‌ريێ بيت، به‌لێ د راستى دا، ئه‌و پاره‌ ناگه‌هيته‌ مه‌ و ئاريشێن مه‌ ژى هه‌ر د هه‌لاويستى نه‌”.

كه‌ريم چه‌مانكى، سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ راگه‌هاند كو ب ئاماده‌بوونا سكرتێرێ جڤاتێ و هه‌رسێ رێڤه‌به‌ريێن (خوپاراستنا ساخله‌ميێ، ئاڤا دهۆكێ و ژينگه‌هێ) كۆمبوونه‌كا به‌رفرهـ ل سه‌ر ره‌وشا ئاڤێ ل پارێزگه‌ها دهۆكێ هاته‌ كرن.

سه‌رۆكێ لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ زێده‌تر گۆت: “دياربوو كو هێشتا كێشه‌ نه‌هاتيه‌ چارسه‌ركرن و ژ دو روويان ڤه‌ يا مايه‌ هه‌لاويستى؛ ماددێن پاقژكرنا ئاڤێ وه‌كو پێدڤى ل به‌ر ده‌ست نينن و ستافێ كارى ژى وه‌كو پێدڤى نينه‌، ژ لايه‌كێ دى ڤه‌ پشته‌ڤانيا ماددى يا ڤى پرۆژه‌يى ناهێته‌ كرن”.

كه‌ريم چه‌مانكى ئاشكه‌را ژى كر كو بزاڤێن وان وه‌كو لژنا باژێرڤانى و خزمه‌تگۆزاريێن گشتى و گه‌شتوگۆزار ل جڤاتا پارێزگه‌ها دهۆكێ جڤاتا پارێزگه‌ها دهۆكێ دێ د به‌رده‌وام بن هه‌تا كێشا ئاڤێ ب ته‌مامى دهێته‌ چاره‌كرن.