ئه‌ڤرۆ نيوز:

سه‌قاناسه‌كێ عيراقى پێشبينيێ دكه‌ت پاييزا ئه‌ڤ ساله‌ پترين رێژا بارانێ ل عيراقێ وده‌ڤه‌رێ ب گشتى بباريت وپێشبينيێ دكه‌ت ل هه‌مان وه‌رز هشكه‌سالى بيت ل ناڤه‌راست ورۆژئاڤايێ ئورۆپا.

سادق عه‌تيه‌، سه‌قاناسێ ناڤدارێ عيراقى د پۆسته‌كێ دا ل به‌رپه‌رێ خوه‌ يێ فه‌يسبووكى پێشبينيێ دكه‌ت پاييزا ئه‌ڤ ساله‌ رێژه‌كا مه‌زن يا بارانێ عيراقێ وده‌ڤه‌رێ ڤه‌گريت.

عه‌تيه‌ دبێژيت” نوكه‌ ره‌وشا سه‌قاى ل باكوورێ ئه‌تله‌سى د بارۆده‌خه‌كێ نێگه‌تيڤ دايه‌ وپێشبينى دهێته‌ كرن ئه‌و ره‌وشه‌ ل وه‌رزێ پاييزێ ژى به‌رده‌وام بيت، ئه‌ڤه‌ ژى رامانا وێ ئه‌وه‌ ل ناڤه‌راست ورۆژئاڤايێ ئورۆپا هشكه‌سالى بيت، ل باشوورێ وى كێشوه‌رى ژى رێژا شه‌هێ دێ بلند بيت، به‌لێ ژ به‌ر زالبوونا بلنداهيێن (بلۆك) كو پێك دهێن ژ چيايێن ئه‌تله‌سى كو ب (ئه‌زوورى) د به‌رنياسن ود كه‌ڤنه‌ ناڤه‌راست ورۆژئاڤايێ ئورۆپا، نزمه‌ پاله‌پستۆيه‌ك دێ به‌ر ب ده‌ڤه‌را مه‌ ڤه‌ هێت”.

وى سه‌قاناسێ عيراقى گۆت ژى” هه‌كه‌ ئه‌و سيناريۆيه‌ به‌رده‌وام بيت، دێ ده‌ڤه‌را مه‌ كه‌ڤيته‌ د ناڤ پاييزه‌كا پر باران دا”.

ئه‌ڤرۆ نیوز:

فراكسیۆنا پارتى دیموكراتى كوردستان ل په‌رله‌مانێ عیراقێ پێشنیازه‌كا نوو بۆ فراكسیۆنێن كوردستانى ل به‌غدا به‌رچاڤ دكه‌ت.

ڤیان سه‌برى، سه‌رۆكا فراكسیۆنا پارتى ل په‌رله‌مانێ عیراقێ د داخۆیانیه‌كا رۆژنامه‌ڤانى دا گۆت” فراكسیۆنا پارتى پێشنیاز دكه‌ت هه‌موو ف اكسیۆنێن كوردستانى ( هه‌ڤپه‌یمانیا كوردستانى) ل په‌رله‌مانێ عیراقێ دروست بكه‌ن، چونكى گه‌له‌ك پرسێن گرنگ د ناڤبه‌را هه‌ولێرێ و به‌غدا یێن ماین وپێدڤیه‌ ب ئێكگرتى پێنگاڤان بۆ بهاڤێژین”.

ڤیان سه‌برى زێده‌تر بۆ باسمیۆز گۆت” فراكسیۆنێن كوردستانى ل په‌رله‌مانێ عیراقێ كو ژ 58 په‌رله‌مانتاران پێك دهێن، ب ئێكده‌نگیێ دێ بسه‌ركه‌ڤن وده‌نگێ كوردستانێ دێ ل به‌غدا ب هێز كه‌ن”.

ئەڤرۆ نيوز:‏

قایمقامێ قەزا شنگالێ دیار کر کو ژ ئەگەرێ جینوسایدا شنگالێ و مانا خەلکی د بن خیڤەتان دا و نەبوونا ‏تەناھیێ ل شنگالێ گەلەک خێزانێن شنگالێ ژێکڤەبووینە ھەر ھندەک ئەندامێن خێزانەکێ یێن چووینە ‏وەلاتەکی.‏

مەحما خەلیل، قایمقامی قەزا شنگالێ بۆ رۆژناما ئەڤرۆ دیار کر کو حوکمەتا عیراقێ یا رژد نینە ل سەر ‏چارەسەرکرنا کەیسا شنگالێ لەورا ژی ھەتا نوکە رەوشا شنگالێ ئالوز مایە و خەلک نەشێن ڤەگەڕن و رەوشا ‏خەلکێ شنگالێ ژی بەر ب نەباشیێ و چارەنڤیسەکی نەدیارڤە دچیت و گەلەک جاران مە بزاڤ کرینە رەوشا ‏شنگالێ چارەسەر بکەین، لێ ئاستەنگ ھەبووینە ژ لایی گرۆپێن چەکدار و حەشدا شەعبی ڤە، چونکو وان نەڤێت ‏رەوش خوەش بیت و خەلک ڤەگەڕن داکو ئەو بەردەوامیێ ب کارێن خوە یێن نەقانوونی بدەن ھەتا نوکە ‏تشتەکێ وەسا بۆ شنگالێ نەھاتیەکرن ئەو ماستەر پلانا ژ لایی حوکمەتا ھەرێما کوردستانی ڤە بۆ شنگالێ ھاتیە ‏دانان گرۆپێن چەکدار و حەشدا شەعبی نە ھێلا بجە بھێت.‏

ژ ئالیێ خوە ڤە سالم سەعید، بەرپرسێ راگەھاندێ ل بوردێ کاروبارێن مرۆڤایەتی ل پارێزگەھا دھۆکێ دیار کر ‏کو ل دەستپێکا سالا (2015) دەمێ ئاوارە ھاتینە دھۆکێ ل دووڤ ئامارێن وان بەری نوکە (27) کەمپێن ئاواران ‏و پەنابەرا ل سنوورێ پارێزگەھا دھۆکێ ھەبوون و نێزیکی 740 ھزار ئاوارە و پەنابەران تێدا د ژیان، پشتی ‏رزگارکرنا باژێرێَ مووسل ئاوارێن وێ دەڤەرێ زڤرینە ڤە و ھندەک کەمپ ڤالابوون و نھا (21) کەمپ ل ‏سنوورێ پارێزگەھا دھۆکێ ھەنە، ب گشتی ئاوارە و پەنابەر ل پارێزگەھا دھوکێ دناڤ کەمپان دا و دەرڤەی ‏کەمپان دا دگەھنە (119.172) خێزانان کو دبنە (596.350) کەس.‏

بەرپرسێ راگەھاندنێ ل بۆردی کاروبارێن مروڤایەتی ل پارێزگەھا دھۆکێ بۆ رۆژنامەیا ئەڤرۆ دیارکرکو ‏‏(109) رێکخراو د ناڤ کەمپێن ئاواران دا خزمەتێن جوراوجور ئەنجام ددەن و (57) رێکخراو د ناڤ کەمپێن ‏پەنابەران دا کو دبنە (166) رێکخراو ژوانا (22) رێکخراوان خوە ڤەکێشاینە یان کارێ وان ب دووماھی ھاتینە ‏کو نھا (144) رێکخراو بەردەوامن دناڤ کەمپان دا، لێ د گەلەک بیاڤان دا ھاریکاری دکێمن وەکی ھاریکاریێن ‏ئاھێن خوارنێ و دەرمان دکێمن ھەروەسا ھاریکاریێن دراڤی ئێک جار نەماینە بۆ نەخۆشان و کێم ئەندامان و ‏گۆت: “پشتەڤانیا زارۆیان یا ھەی، بەلێ یا کێمە و نە ل دووڤ ئاستێ پێدڤی یە”.‏

ژ ئالیێ خوە ڤە حسێن قائێدی، رێڤەبەرێ نڤیسینگەھا رزگارکرنا رەڤاندیێن ئێزدی بۆ رۆژناما ئەڤرۆ دیار کر ‏کو ل جینوسایدا شنگالێ شەش ھزار و 417 کەس ھاتبوونە رەڤاندن ژ وان ژی سێ 548 کچ و ژن بوون و دو ‏ھزار 869 زارۆ و زەلام بووینە ب پشتەڤانیا نڤیسینگەھا نێچیرڤان بارزانی، سەرۆکێ ھەرێما کوردستانێ ھەتا ‏نوکە سێ ھزار و 487 کەس ژ دەستێن تیرۆرستێن داعش رزگاربووینە ژوان ژی 337 زەلام و ھزار 186 ژن و ‏‏940 زارۆیێن کۆر و ھزار و 24 زارۆیێن کچ و گۆت: “ھەتا نوکە دو ھزار و 930 کەس د دەستێن تیرۆرستێن ‏داعش دا ماینە ژوان ژی ھزار و 592 زەلامن و ھزار و 338 ژنن و ھزار و 759 کور و کچ ماینە بێ باب و ‏‏407 ماینە دایک و 359 زارۆ ژی ماینە بێ دایک و باب و دایک و بابێن 220 زارۆیان د دەستێن تیرۆرستێن ‏داعش دانە”.‏