پارێ قوتابيێن كچ و كورێن شه‌هيدان دێ هێنه‌ مه‌زاختن

31/07/2019 17:45

469

ئه‌ڤرۆ نيوز:

ئاخفتنكه‌رێ وه‌زاه‌رتا كاروبارێن شه‌هيدان و ئه‌نفالكريێن حوكمه‌تا هه‌رێما كوردستانێ دياركر ئه‌و دێ ده‌ست ب به‌لاڤكرنا ده‌رماله‌يێن قوتابيێن كچ و كورێن شه‌هيدان دوباره‌ ده‌سپێكه‌ن ل رێڤه‌به‌ريێن گشتى يێن وه‌زاره‌تا وان.

زێده‌تر فوئاد حسێن دياركر ژ ئه‌گه‌رێ قه‌يرانا دارايى ماوه‌يه‌ك بوو ئه‌ڤ ده‌رماله‌يێن هاتن وچوونێ و مانا وان ببوو 50% لێ نوكه‌ بزاڤێن چاره‌سه‌ركرنا وێ ژى دهێنه‌ كرن و رازه‌مه‌ندى ژى بۆ هاتينه‌ دان.

ناڤهاتى ئه‌و چه‌نده‌ ژى دياركر ل ماوێ بهێت ئه‌ڤ ده‌رماله‌يه‌ دێ ل رێڤه‌به‌ريێن وان ل سه‌ر قوتابيێن كچ و كورێن شه‌هيدان هێنه‌ به‌لاڤ كرن و ئه‌و زانكويێن پاره‌ ژ ڤان قوتابيێن شه‌هيدان وه‌رنه‌گرتى دێ راسته‌خو پارێ خوه‌ ژ حوكمه‌تا هه‌رێمێ وه‌رگرن ديسان ئه‌و قوتابيێن پارێ خوه‌ داى ژى دێ ل رێڤه‌به‌ريا شه‌هيدان پارێ خوه‌ وه‌رگرن.

كوێت يا گه‌شبينه‌ د په‌يوه‌نديێن خوه‌ دا دگه‌ل هه‌رێمێ

30/07/2019 17:00

ئه‌ڤرۆ نيوز:

نێچيرڤان بارزانى سه‌رۆكێ هه‌رێما كوردستانێ ئه‌ڤرۆ رۆژا سێشه‌مبى ل هه‌ولێرێ پێشوازى ل د. عومه‌ر ئه‌لكنده‌رى قونسلێ وه‌لاتێ كوێتێ ل هه‌رێما كوردستانێ كر، د كومبوونه‌كێ دا قونسلێ كوێتێ دياركر ئه‌و د گه‌شبينن كو دێ په‌يوه‌نديێن وان دگه‌ل هه‌رێما كوردستانێ و عيراقێ دێ بهێزتربن.

ژلايێ خوه‌ ڤه‌ سه‌رۆكێ هه‌رێما كوردستانێ سوپاسيا هاريكاريێن مروڤايه‌تى يێن مير و حوكمه‌تا كوێتێ بۆ ئاواره‌ و په‌نابه‌رێن ل هه‌رێما كوردستانێ كر و دوپاتى ل بهێزخستنا په‌يوه‌نديێن هه‌رێما كوردستانێ دگه‌ل وه‌لاتێ كوێتێ ژى پشكه‌كا دى يا ڤێ كومبوونێ بوو، ديسان پشته‌ڤانيا خوه‌ بۆ ئينانا وه‌به‌رهێنه‌رێن كوێتێ بۆ هه‌رێما كوردستانێ ژى دياركر.

ئه‌ڤرۆ مۆما 17ێ هه‌ل دكه‌ت

30/07/2019 14:30

114

شازده‌ سالێن پرى كار و خزمه‌تا راگه‌هاندنێ و رۆشه‌نبیرى و زمان وكه‌لتۆرێ ده‌ڤه‌رێ ژلایێ خه‌باتكارێن رۆژناما ئه‌ڤرۆ ڤه‌ پیروز دكه‌ین و ده‌ستى وان هه‌موو هه‌ڤالان دگڤێشین كو دڤان سالان دا بێ ماندیبوون وه‌كو پێشمه‌رگه‌ به‌رپه‌رێن رۆژنامێ زه‌نگین كرین ب نڤیسین و وێنه‌ ونه‌خشێن خوه‌یێن پر بها، سوپاس بو وان خه‌باتكاران چو د به‌رده‌وامبن یان ژى ژ هه‌ر ئه‌گه‌ره‌كى نها دگه‌ل مه‌دا نه‌ مابن.

ل بیره‌وه‌ریا هه‌لكرنا مۆما 17ێ یا كارێ رۆژناما ئه‌ڤرۆ كو به‌رده‌وامیا (10) سالێن خه‌باتا هه‌فتیناما په‌یمان بویه‌ ، پێ نه‌ڤێت باس ل كار و خزمه‌تا بۆرى بكه‌ین، به‌لكو یا فه‌ره‌ نێرینه‌كا كورت ل سه‌ر نها وپاشه‌رۆژێ بكه‌ین ب تایبه‌ت د كاودانه‌كى دا كو رۆلێ رۆژناما كاغه‌زى د مه‌یدانا راگه‌هاندنێ دا به‌رف پاش چوویه‌ وپتر رۆژنامه‌گه‌ریا ئه‌لكترونى هاتیه‌ مه‌یدانێ.

نه‌ یا ڤه‌شارتى یه‌ كو تیراژێ رۆژنامێ د ڤان سالاندا كێم بوویه‌ وه‌كو چاپكریا كاغه‌زى، لێ دیسان به‌لاڤرنا (2000) دانه‌ رۆژانه‌ و گه‌هشتنا وێ بۆ پرانیا مال وجهێن كارى ل سه‌رانسه‌رى ده‌ڤه‌رێ وه‌كو تاكه‌ رۆژناما رۆژانه‌ ب كرمانجى و دناڤ ڤێ قه‌یرانا داراى وكاودانێن دژوار دا ب خوه‌راگریا ستاف و نڤیسه‌رێن رۆژنامێ بوویه‌ و نیشانا گرێدانا خه‌لك و رۆشه‌نبیرانه‌ ب وان ئه‌ركێن رۆژناما ئه‌ڤرۆ پێشكێش دكه‌ت، له‌ورا به‌رده‌وامى بوون پركرنا ڤالاتیه‌كێ یه‌ كو كوردستان ب گشتى و ده‌ڤه‌را به‌هدینان ب تایبه‌ت ژێ دنالن، له‌ورا به‌رده‌وامى بوون ئه‌رك وحه‌ز وهیڤیا مه‌یه‌.

د ناڤ ڤێ هه‌ڤركیا گه‌هاندنا پێزانیان دا كو ته‌كنولوجیایێ شێواز و كه‌توار گوهارتیه‌ ژمه‌ ژى دهێت خاستن نووكرنا و به‌رهه‌ڤیێن هه‌ژى بكه‌ین له‌ورا ئه‌م ب ئومێدین رۆژناما ئه‌ڤرۆ چ وه‌كو ناڤه‌رۆك یان ژى شێوازێ گه‌هاندنێ ل ئاستى َ ته‌كنكیا نوو و هه‌ڤركیا راگه‌هاندنا بله‌ز بیت، ژ بووى ڤێ چه‌ندێ زێده‌بارى به‌رده‌وامیا ده‌ركه‌فتنا رۆژناما كاغه‌زى ئه‌م دێ كار كه‌ین ل سه‌ر به‌رده‌ست كرنا پێزانینێن رۆژنامێ ب شێوازێن ئه‌لكترونى ل سه‌ر سایت ومالپه‌رێن ئه‌لكترونى كو ب زووترین ده‌م و جوانترین شێواز د خزمه‌تا خانده‌ڤایێ خوه‌یێ هێژا دا بین.

رێبه‌ر فتاح، سه‌رنڤيسكارێ رۆژناما ئه‌ڤرۆ

وه‌زاره‌تا خواندنا بلند پيشنيازه‌كا نوو دكه‌ت

29/07/2019 22:50

522

ئه‌ڤرۆ نيوز:

وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ ئه‌ڤرۆ دوشه‌مبى 29/7/2019 دامه‌زراندنا سندووقا دانا قه‌ران بۆ قوتابيان راگه‌هاند.

د به‌ياننامه‌كا وه‌زاره‌تا خواندنا بلند دا هاتيه‌” وه‌كو پشكه‌ك ژ كارناما چار سالىێن كاركرنێ، مه‌ پێشنيازا دامه‌زراندنا سندووقا دانا قه‌ران بۆ قوتابيان كريه‌ كو ئارمانج ژێ هاريكارى وپشته‌ڤانيا قوتابيان بيت بۆ دانا ده‌ليڤا زێده‌تر بۆ خواندنێ”.

ل دووڤ وێ به‌ياننامێ” ئه‌و سندوقه‌ ب پشكداريا حوكمه‌تێ وكه‌رتێ تايبه‌ت وزانكۆيێن ئه‌هلى وهه‌موو ئه‌و كه‌س ولايه‌نێن دێ هاريكار بن پێك هێت وب رێيا جڤاته‌كێ كارێ خوه‌ ئه‌نجام بده‌ت”.

سيسته‌مێ به‌لاڤكرنا مووچێ پێشمه‌رگه‌ى دێ هێته‌ گوهۆرين

29/07/2019 17:45

1987

ئه‌ڤرۆ نيوز:

به‌رپرسێ ده‌زگايێ ره‌وشه‌نبيرى هشياركرنێ ل وه‌زاره‌تا پێشمه‌رگه‌يا يا هه‌رێما كوردستانێ ئاشكرا كر سيسته‌مێ به‌لاڤكرنا مووچێ پێشمه‌رگه‌ى دێ گوهۆرين ب سه‌ر دا هێت.

زێده‌تر ليوا بابه‌كر فه‌قێ راگه‌هاند هه‌تا نوكه‌ بابه‌تێ مووچێ پێشمه‌رگه‌ و چه‌ندين پرسێن دى نوكه‌ گوتوبێژ دهێنه‌ كرن ز كومبوونا ئه‌ڤرۆ رۆژا دوشه‌مبى 29-7-2019 كومبوونه‌كا گشتى دگه‌ل وه‌زيرێ پێشمه‌رگه‌ى كريه‌، ديسان رێڤه‌به‌رێن گشتى دێ كومبوونا ئه‌نجامده‌ن و سه‌روك ئه‌ركان و ژمێرياريا گشتى ل وه‌زاره‌تا ناڤهاتى دێ گرێداى بن بۆ رێكخستنا شێوازێ به‌لاڤكرنا مووچێ پێشمه‌رگه‌ى.

ناڤهاتى ئه‌و چه‌نده‌ ژى دياركر ئێك ژ به‌رنامێن وان يێن چاكسازيێ ئه‌وه‌ رێكخستنا مووچێن ديوانا وه‌زاره‌تێ يه‌ كو دێ بنه‌ سيسته‌مێ ئه‌لكترونى و نوكه‌ كه‌فتيه‌ كارى تنێ ليوا ماينه‌ و ئه‌ڤ سيسته‌مێ ئه‌لكترونيكرنا مووچێ پێشمه‌رگه‌ى دێ هه‌موو هێزێن پێشمه‌رگه‌ى گريت.

هه‌ژى گۆتنێ يه‌ هه‌تا نوكه‌ ب چه‌ندين شێوازێن جودا مووچێ وه‌زاره‌تا پێشمه‌رگه‌ى دهێته‌ به‌لاڤكرن هنده‌ك ل بانكێ و هنده‌ك ژى راسته‌وخو ژ مێرياريێ و هنده‌ك ژى ل فه‌رمانده‌يێن خوه‌ مووچه‌ى وه‌ردگرن.

وه‌زيرێ ئاڤه‌دانكرنێ: ب پێدڤى دزانين هێلا شه‌مه‌نده‌فه‌رێ ل هه‌رێمێ هه‌بيت

28/07/2019 20:15

398

ئه‌ڤرۆ نيوز:

وه‌زيرێ ئاڤه‌دانكرن وئاكنجيكرنێ ل هه‌رێما كوردستانێ راگه‌هاند، د به‌رنامێ كارێن مه‌دايه‌ هێلا شه‌مه‌نده‌فه‌رێ بۆ هه‌رێما كوردستانێ دروست بكه‌ين.

دانا عه‌بدولكه‌ريم، وه‌زيرێ ئاڤه‌دانكرن وئاكنجيكرنێ ل هه‌رێما كوردستانێ ئه‌ڤرۆ ئێكشه‌مبى 28/7/2019 د كۆنگره‌كێ رۆژنامه‌ڤانى دا ل هه‌ولێرێ پلانا چار سالێن داهاتى يێن وه‌زاره‌تا خوه‌ ئاشكراكر وگۆت” دێ بزاڤێ كه‌ين هێلا ئاسنى بينينه‌ د ناڤ هه‌رێما كوردستانێ دا، چونكى ئه‌و هێله‌ نه‌كو تنێ بۆ ڤه‌گۆهاستنێ، به‌لكو بۆ هاتنوچوونێ ژى ب گرنگ وپێدڤى دزانين هه‌بيت”.

ب ڤیدیو: ل سەر رێیا دێرەبوونێ بارهەلگرەک سوت

27/07/2019 17:17

632

ئەڤرۆ نیوز، عەلی حاجی :

بەریا دەمەێ کێم ل سەر رێیا سەرەکیا کومەلگەها دێرەبونێ ژئەگەرێ بلەز هاژوتنا ترومبێلێ ژلایێ شوفێری ڤە؍ ترومبێلەکا باهەلگری دوەرگەریێت و ب ئێکجاری دسوژیت.

کومیسەر بەشیر یوسڤ، ژ راگەهاندنا رێڤەبەریا هاتن و چوونا زاخۆ بۆ ئەڤرۆنیوز ئاشکەرا کر ەریا دەمەکێ ێمل نێزیک دەمژمێر ٤:۳۰ێ ئێڤاری ل سەر رێیا سەرەکی یا کومەلگەها دێرەبونێ ژئەگەرێ بلەز هاژوتنا ترومبێلەکا بارهەلکری یا گازێ ترومبێل دوەرگەریێت و لدووڤ را ئاگر ڤێ دکەڤیت و ب ئێکجاری د سوژیت خوەشبەختانە شوفێر یێ ب سلامەتە و تنێ زیانێن ماددی بەر ب ترومبێلێ گەهشتن داخاز ژشوفێران دکەین لەزاتیێ لسەر وێ رێکێ ب کارنەئینن ژبەر کو ئەو رێیە گەلەک چەپ تێدا هەنە و یا بەرتەنگە.

پارێزگه‌رێ‌ دهۆكێ‌ پیرۆزباهیێ‌ ل میر حازم ته‌حسین به‌گ دكه‌ت

27/07/2019 17:09

200

پارێزگه‌رێ‌ دهۆكێ‌ ب هه‌لكه‌فتا ده‌ستنیشانكرنا حازم ته‌حسین به‌گ وه‌ك میرێ‌ ئێزدیان په‌یامه‌كا پیرۆزباهیێ‌ به‌لاڤكر ئه‌ڤه‌ ده‌قێ‌ وێ‌ یه‌:

به‌رێز میر حازم ته‌حسین به‌گ میرێ‌ ئێزدیان

ب هه‌لكه‌فتا ده‌ستنیشانكرنا جه‌نابێ‌ ته‌ وه‌ك میرێ‌ ئێزدیان، پیرۆزباهیێ‌ ل ته‌ و هه‌موو خووشك برایێن ئێزدی دكه‌م و هیڤیا سه‌ركه‌فتنێ‌ بۆ ته‌ د ئه‌ركێ‌ نوو دا دخوازم و هیڤیدارم د ئه‌ركێ‌ خۆ یێ‌ نوو دا ب باشترین شێوه‌ خزمه‌تا خووشك و برایێن مه‌ یێن ئێزدی بكه‌ی.

دوپات دكه‌ین، ئه‌م وه‌ك كارگێریا پارێزگه‌ها دهۆكێ‌ دێ‌ هه‌ر پشته‌ڤان و هاریكارێن هه‌وه‌ بین و دێ‌ به‌رده‌وام بزاڤان ژی كه‌ین خزمه‌تێن ژ هه‌ژیتر پێشكێشی خووشك و برایێن ئێزدی بكه‌ین و ئێش و ئازارێن وان كێم بكه‌ین.

فه‌رهاد ئه‌مین ئه‌ترووشی
پارێزگه‌رێ‌ دهۆكێ‌
27\7\2019

جڤاتا ئاسايشا هه‌رێما كوردستانێ دانپێدانێن تاوانبارێ هێرشا هه‌ولێرێ به‌لاڤ دكه‌ت

26/07/2019 23:58

198

ئه‌ڤرۆ نيوز:

جڤاتا ئاسايشا هه‌رێما كوردستانێ ئه‌ڤرۆ ئه‌ينيێ 26/7/2019 به‌ياننامه‌ك ل دۆر روودانا ته‌قه‌كرنا رۆا چارشه‌مبى 17/7/2019 به‌لاڤكر وتێدا دبێژيت” رۆژا چارشه‌مبى 17/7/2019 روودانه‌كا ته‌قه‌كرنێ ل رێستۆرانته‌كا باژيرێ هه‌ولێرێ روودا كو د ئه‌نجامدا كارمه‌نده‌كێ كونسۆلخانا توركيا ل هه‌ولێرێ ب ناڤێ (عوسمان كۆسه‌) ودو وه‌لاتيێن هه‌رێما كوردستانێ ب ناڤێن (عوسمان محه‌مه‌د عه‌لى) و (به‌شدار ره‌مه‌زان سالح) بوونه‌ قوربانى”.

دياركر ژى” هێزێن ئاسايشێ ودژه‌ تيرۆرا كوردستانێ شيان د ده‌مه‌كێ گه‌له‌ك كێم دا شه‌ش كه‌سێن په‌يوه‌ندى ب ڤێ روودانێ هه‌ى ده‌سته‌سه‌ربكه‌ن كو سێ كه‌س وه‌لاتيێن توركى بوون ژ وان ژى ئه‌نجامده‌رێ سه‌ره‌كى يێ روودانێ ب ناڤێ (مه‌زلووم داغ)، سێ كه‌س ژى ژ هاريكارێن ئه‌نجامده‌رێن روودانێ وه‌لاتيێن هه‌رێما كوردستانێ نه‌. هه‌روه‌سا چه‌ند كه‌سه‌كێن دى كو په‌يوه‌ندى ب ڤێ روودانێ هه‌يه‌ ژ روويێ قانوونى ڤه‌ د داخوازكرى نه‌ ودووڤچوون ل سه‌ر وان يا به‌رده‌وامه‌”.

هه‌ر د وێ به‌ياننامێ دا هاتيه‌” لدووڤ دانپێدانێن تاوانباران، روودانه‌كا تيرۆرستى بوو و به‌رى چه‌ند هه‌يڤان ژ لايێ به‌رپرسه‌كێ په‌كه‌كێ ب ناڤێ فاتح(بۆتان) ل قه‌نديلى پلان بۆ هاتيه‌ دارێشتن ب ئارمانجا تيرۆركرنا كارمه‌نده‌كێ كونسۆلخانا توركيا ود ئه‌نجامدا تێكدانا ئاسايشا هه‌رێما كوردستانێ، هه‌ر ل دووڤ دانپێدانێن ئه‌نجامده‌رێ سه‌ره‌كى يێ روودانا تيرۆرستى، هه‌ردو وه‌لاتيێن هه‌رێما كوردستانێ تنێ ب گۆمانا وێ چه‌ندێ كو زێره‌ڤانێن ديبلۆماتكارێ توركى نه‌، هاتينه‌ كوشتن”.

https://www.youtube.com/watch?time_continue=618&v=xOWxu6Ui3qU

نڤێسینگه‌ها په‌یمانگه‌هەکا كه‌نه‌دى دێ ل دهۆكێ هێته‌ ڤه‌كرن

25/07/2019 22:01

177

ئه‌ڤرۆ نیوز:

فه‌رهاد ئه‌مین ئه‌تروشى پارێزگه‌رێ دهوكێ ئەڤرۆ پێشوازیا خانم عه‌واتف تركى ره‌شید هه‌فكارا (په‌یمانگه‌ها كه‌نه‌دى حه‌وكه‌مه‌ IOG)وشاندێ دگه‌لدا كر.
دهه‌ڤدیتنه‌كێدا به‌حسێ كار وبه‌رنامێن په‌یمانگه‌ها ناڤبرى ل كوردستانێ ب گشتى وپارێزگه‌ها دهوكێ ب تایبه‌تى وئه‌و خزمه‌تا دبوارێ پێشئێخستنا شیانێن ئافره‌تان دا پێشكێشدكه‌ت وپه‌یره‌وكرنا پره‌نسیبێن دیموكراتى دسیسته‌مێ حوكمرانیێ دا هاته‌ كرن.
به‌رپرسا (په‌یمانگه‌ها كه‌نه‌دى حه‌وكه‌مه‌ IOG) سوپاسیا پارێزگه‌رێ دهوكێ وسازیێن په‌یوه‌ندیدار كر كو دهه‌ڤكاربوینه‌ دگه‌ل تیمێن په‌یمانگه‌هێ وته‌كه‌زكر كو ل ده‌مه‌كێ نێزیك دێ نڤێسینگه‌ها(په‌یمانگه‌ها كه‌نه‌دى حه‌وكه‌مه‌ IOG) ل پارێزگه‌ها دهوكێ هێته‌ ڤه‌كرن ژبو پتر خزمه‌تكرنا ئافره‌تان.
پارێزگه‌رێ دهوكێ خوشحالیا بسه‌ره‌دانێ دیاركر وسوپاسیا (په‌یمانگه‌ها كه‌نه‌دى حه‌وكه‌مه‌ IOG) وكار وچالاكیێن وان كر وئه‌و خزمه‌تا پێشكێشى ئافره‌تان دكه‌ن وپشته‌ڤانیا پارێزگه‌هێ نیشان دا بو هه‌ر هاریكاریه‌كێ.

نيشاندان 1...747576...90 زێده‌تر

لاپه‌ر 75 ژ 90