ئه‌ڤرۆ نیوز:
وه‌زاره‌تا خواندنا بلند وڤه‌كۆلینێن زانستى ل هه‌رێما كوردستانێ، ب گۆره‌ى بریاره‌كا جڤاتا وه‌زیرێن هه‌رێما كوردستانێ، ئه‌ڤرۆ پێنجشه‌مبى 25/7/2019 بریار دا ده‌واما فه‌رمانبه‌ران ل زانكۆ و په‌یمانگه‌هێن سه‌ر ب وه‌زاره‌تێ ڤه ژ ده‌مژمێر 8 سپێدێ ده‌ست پێ بكه‌ت و ل 3 پشتى نیڤرۆ ب دووماهى بهێت.
وه‌زاره‌تا ناڤبرى بریار دا ژى كو مامۆستایێن زانكۆیان ب كێمێ حه‌فتیانه 30 ده‌مژمێران ئاماده‌بوون هه‌بیت ژ بلى ده‌مێ بێهنڤه‌دانا هاڤینێ.
ئه‌ڤرۆ نیوز:
سه‌رۆكێ حوكمه‌تا هه‌رێما كوردستانێ، مه‌سرور بارزانى، ئه‌ڤرۆ پێنجشه‌مبى 25/7/2019 ل گه‌ل شانده‌كێ بلند یێ حوكمه‌تا عیراقێ كۆمبوو و د وێ كۆمبوونێ دا سێ بابه‌تێن گرنگ هاتنه به‌حسكرن.
د كۆمبوونا ئه‌ڤرۆ یا هه‌ردو شاندێن حوكمه‌تا هه‌رێمێ وبه‌غدا، ل دووڤ كوردستان 24، دانوستاندن هاتنه كرن ل دۆر نڤیسینا ره‌شنڤیسه‌كا هه‌ڤپشك وتایبه‌ت ب چاره‌سه‌ركرنا پرسێن د ناڤبه‌را هه‌ولێرێ وبه‌غدا وهه‌ردولا یێن نێزیك بووین بگه‌هنه رێككه‌فتنێ.
د وێ كۆمبوونێ دا دانوستاندن ل دۆر سێ ته‌وه‌رێن سه‌ره‌كى هاتنه كرن ئه‌وژى هه‌ر ئێك ژ ده‌ڤه‌رێن ده‌رڤه‌ى ئیدارا هه‌رێما كوردستانێ وپه‌ترۆل وغاز وكێشێن دارایى.
شاندێ حوكمه‌تا هه‌رێما كوردستانێ ب سه‌رۆكایه‌تیا مه‌سرور بارزانى سه‌رۆكێ حوكمه‌تا هه‌رێمێ پێكهاتبوو ژ قوباد تاله‌بانى جێگرێ سه‌رۆكێ حوكمه‌تێ ورێبه‌ر ئه‌حمه‌د وه‌زیرێ ناڤخوه‌یى و ئاوات شێخ جه‌ناب وه‌زیرێ دارایى وئابوورى وشاندێ بلند یێ حوكمه‌تا عیراقێ پێكهاتبوو ژ فوئاد حسێن جێگرێ سه‌رۆك وه‌زیرێن عیراقێ بۆ كاروبارێن ئابوورى ووه‌زیرێ دارایى وسامر غه‌زبان جێگرێ سه‌رۆك وه‌زیرێن عیراقێ بۆ كاروبارێن وزێ ووه‌زیرێ په‌ترۆلێ وفالح فه‌یاز شیره‌تكارێ ئاسایشا نیشتمانى ومحه‌مه‌د ئه‌لهاشمى رێڤه‌به‌رێ ئۆفیسا عادل عه‌بدولمه‌هدى سه‌رۆك وه‌زیرێن عیراقێ.
ئه‌ڤرۆ نيوز:
وه‌زاره‌تا په‌روه‌ردێ بريار دا ئێدى مۆله‌ت بۆ ڤه‌كرنا باخچێن زارۆيان وقوتابخانێن بنه‌ره‌تى وئاماده‌يى وپه‌يمانگه‌هێن ئه‌هلى نه‌هێنه دان.
ل دووڤ فه‌رمانه‌كا وه‌زارى كو ژ لايێ وه‌زيرێ په‌روه‌ردێ هاتيه ده‌ركرن، بريار هاتيه دان ب راگرتنا پێدانا مۆله‌تێ بۆ هه‌موو باخچێن زارۆيان وقوتابخانێن بنه‌ره‌تى وئاماده‌يى وپه‌يمانگه‌هێن نه حكومى (ئه‌هلى).
د وێ بريارێ دا ئاماژه هاتيه كرن كو هه‌ر ژ ل رۆژا 23/7/2019 هه‌موو ئه‌و مامه‌لێن تايبه‌ت ب وى بابه‌تى ڤه هاتينه راگرتن.
ئه‌ڤرۆ نیوز:
پارێزگارێ شه‌رعى یێ كه‌ركووكێ نووچه‌یێ دروستكرنا لیسته‌كا سه‌ربه‌خو بۆ پشكدارى كرن د هه‌لبژارتنێن ئه‌نجوومه‌نێ پارێزگه‌ها كه‌ركووكێ پشت راستكر و زانیاریێن زێده‌تر ژى به‌لاڤ دكه‌ت.
زێده‌تر نه‌جمه‌دین كه‌ریم دیاركر د به‌رنامێ وان دایه بزاڤێن دروستكرنا لیسته‌كا سه‌ربه‌خو بۆ هه‌موو پێكهاتێن كورد، عه‌ره‌ب، توركمان و كلدان و ئاشوریان هه‌بیت و دێ به‌رنامه‌كێ روون و ئاشكرا ژى بۆ پارێزگه‌ها كه‌ركووكێ دێ وان هه‌بیت.
ناڤهاتى ئه‌و چه‌نده ژى دیاركر نوكه ره‌وشا ئێمناهى و سیاسى و جڤاكى باش نینه و پێدڤیه هه‌موو پێكهاتێن ڤى باژێرى پێكڤه نوونه‌ر هه‌بن و لیسته‌ك هه‌بیت جهێ باوه‌ریێ بیت و دگه‌ل لایه‌نێن دى یێن ژبلى كوردان د گوتوبێژان داینه و ئه‌و ده‌مێ گونجاى به‌رده‌ست هه‌یه لیسته‌كا بهێز دروستبكه‌ین و ئه‌ڤێ لیستێ چو په‌یوه‌ندى ب لیستا به‌رى نوكه یا برایتى یا جڤاتا پارێزگه‌هێ نینه، هیڤى خواست به‌رى هه‌لبژارتنان ره‌وشا كه‌ركووكێ ئاسایى بیت و هه‌لبژارتنێن بێ سه‌خته تێدا بهێنه ئه‌نجامدان.
ئەڤرو (۲۰۱۹/۷/۲٤)لیژنا دوفچوونا بازاری ل قائیمقامیا قەزا دهوکێ، دوفچوونا هژمارەکا خوارنگە ونانپێژیان ل دهوکێ کرن.
یوسف محمەد حەسەن بەرپرسێ لیژنا دوفچوونێ ئاشکراکر دوفچوونا لێنانگەهێن چەند خوارنگەهان هاتیە کرن گوت پشتی هەبونا چەندین کێماسیان بریار هاتە دان سوبەهی خوارنگەهێن پاشا وخان کەباب بهێنە داخستن هەتا وان رێنماێن لیژنا دوفچوونێ بهێنە بجهئینان.
ئه‌ڤرۆ نيوز:
پرۆژه‌يه‌ك بۆ هه‌ڤسه‌نگ كرنا مووچێن پێشمه‌رگه‌ى دگه‌ل هێزێن وه‌زاره‌تا نافخو هاتيه ئاماده كرن و چاڤه‌رێ يه حوكمه‌ت و وه‌زاره‌تا پێشمه‌رگه‌ى دوماهى بريار ل سه‌ر ڤێ چه‌ندێ بده‌ن.
شوان ره‌ئوف بريارده‌رێ لژنا پێشمه‌رگه‌ى د په‌رله‌مانێ كوردستانێ دا دياركر بابه‌تێ هه‌ڤسه‌نگ كرنا ئمتيازات و مووچێن پێشمه‌رگه‌ى دگه‌ل هێزێن وه‌زاره‌تا نافخويا ب دووماهى هاتيه و كاره‌كێ باش بۆ هاتيه كرن و قوناغا ئێكێ ژى ب دووماهى هاتيه و نوكه تنێ مايه حوكمه‌ت و وه‌زاره‌تا پێشمه‌رگه‌ى وه‌ك لايه‌نێن جێبه‌جێكار بوچوونێن خوه يێن دووماهى ل سه‌ر ڤێ چه‌ندێ بده‌ن و پاشان پێشكێشكى سه‌رۆكاتيا په‌رله‌مانى بهێته كرن و ل ڤان نێزيكان ژى دێ سه‌ره‌دانا وه‌زيرێ پێشمه‌رگه‌ى ژى كه‌ن و دگه‌ل جڤاتا وه‌زيران ژى گوتوبێژان ل سه‌ر ڤێ چه‌ندێ كه‌ين.
ژلايێ خوه ڤه جه‌مال ئێمينكى سوپا سالارێ پێشمه‌رگه هه‌رێمات كوردستانێ دياركر ئه‌و دێ پشته‌ڤانيا هه‌ر برياره‌كا زێده‌كرنا مووچێن پێشمه‌رگه‌ى كه‌ن و به‌رى نوكه به‌غدا مووچێن پێشمه‌رگه‌ى نه هنارت بوون و قه‌يرانا دارايى ژى ل كوردستانێ هه‌بوو لێ ژ نوكه دخوزين مووچه و ئمتيازێن پێشمه‌رگه‌ى باشتربن.
ئەڤرۆ نیوز، عەلی حاجی:
د داخویانیەکێ دا رێڤەبەرێ گەشتوگوزارێ ل زاخۆ بۆ ئەڤرۆ نیوز ئاشکەرا کر د ماوێ شەش ھەیڤێن بوری دا رێژەیەکا زۆر یا گەشتیاران قەستا زاخۆ کریە و رێژا ھاتیە تومار کرن یا دلخوەشکەرە و ھێزێن پەکەکێ ژی ب زوری پارەیی ژ خودانێن جھێن گەشتیاری وەردگرن.
چیا ئەمین زێدەتر گوت: ژ بەر ھەبوونا ھێزێن پەکەکێ و توپبارانا بەردواما ھێزێن سوپایێ تورکیا ل ھند ژ دەڤەرێن گەشتیاری، ئەم نەشێین گەشتیاران رەوانەی وان دەڤەران بکەین، سەرەرای ھندێ ژی ھێزێن پەکەکێ بووینە جھێ دلنەرەحەتیێ بۆ وەلاتیان و گەشتیاران، لەورا د نووترین کار دا، ھێزێن پەکەکێ ب زوری گوژمەکێ پارەیی ژ خودانێن جھێن گەشتیاری و کەپران وەردگریت ، ل بەرامبەر ژی دا ئەو گەڤ ژی ل وان دھێتە کرن کو ھەردەما لایەنێن پەیوەندیدار ئاگەھدار کرن ل سەر ڤێ چەندێ ، دێ مەترسی ل سەر ژیانا وان پەیدا بیت.
دا زانین ژی کو وان لایەنێن پەیوەیندیدار ئاگەھدار کرینە و گۆت: ئەم ب ھیڤینە ئەڤ کێشەیە بھێتە چارەسەر کرن و ئەم نوزانین سەرەدەریێ دگەل کێ بکەین دناڤ ھێزێن پەکەکێ دا، چو جھەتەک نینە بشێین دانوستاندنێ دگەل دا بکەین .
ناڤھاتی گوت ژی : د سەر ڤێ چەندێ را ھاتنا گەشتیاران بۆ دەڤەرا زاخۆ رێژەیەکا دلخوەشکەرە و دماوەیێ شەش ھەیڤێن بوری دا 55 ھزار گەشتیاران قەستا دەڤەرێ کریە، ئەڤ رێژەیە ژی رێژەیەکا دلخوەشکەرە و جیاوازیەکا زور ھەیە دگەل سالێن بوری و 20% زێدەتر بوویە ژ سالێن پێشتر، لەورا ئەم پێشبینی دکەین رێژەیا ئەڤ سالە یا ھاتنا گەشتیاران وەکی رێژەیا سالێن 2012 – 2013 بیت و دبیت زێدەتر ژی بیت، ھەر دیسان 90% یا ھاتنا گەشتیاران ژ باشوورێ عیراقێ نە و دھێتە پێشبینی کرن د ماوەیێ بھێت دا ئەڤ رێژەیە زێدەتر ببیت.
ئه‌ڤرۆ نيوز:
ئه‌ڤرۆ رۆژا دوشه‌مبى 22-7-2019 جڤاتا وه‌زيرێن هه‌رێما كوردستانێ ب سه‌روكاتيا مه‌سرور بارزانى دووه‌م كومبوونا خوه ئه‌نجام دا.
د ڤێ كومبوونێ دا جڤاتا وه‌زيران ب توندى روودانا تيرورستيا ته‌قه‌كرنا خارنگه‌هه‌كا هه‌ولێرێ ئيدانه‌كر ديسان ده‌ستخوشى ل ده‌زگايێن ئاسايشا هه‌رێمێ ژى كر كو د ماوه‌كێ كورت دا شيان بكه‌رێن ڤێ روودانێ ده‌سته‌سه‌ر بكه‌ن.
ژلايه‌كێ دى يێ ڤێ كومبوونێ به‌حس ل جێبه‌جێكرنا رێنمايێن بريارێن ئێكه‌م كومبوونا جڤاتا وه‌زيران هاته كرن و هه‌موو وه‌زير هاتنه راسپاردن باشترين شێوه خزمه‌تا وه‌لاتيان بكه‌ن و رێز ل وان بهێته‌گرتن زێده‌بارى ده‌ركرنا رێنمايێن تايبه‌ت بۆ جێبه‌جێكرنا بريارێن جڤاتا وه‌زيران.
هه‌ر د ڤێ كومبوونێ دا سه‌رۆكێ جڤاتا وه‌زيرێن هه‌رێما كوردستانێ رووناهى خسته سه‌ر شاندێ بلند يێ حوكمه‌تا هه‌رێمێ بۆ سه‌ره‌دانا به‌غدا كو برياره نێزيكترين ده‌م دا ده‌ست ب شاندێن هه‌رێمێ و به‌غدا ب زووترين ده‌م گوتوبێژان بۆ دانانا ميكانزمه‌كێ بۆ چاره‌سه‌ركرنا كێشه‌يێن ناڤبه‌را به‌غدا و هه‌ولێرێ دا.
ل دووماهيێ د كومبوونا ئه‌ڤرۆ دا گه‌نگه‌شه ل سه‌ر گرنگيا ئه‌لكترونيكرنا كاروبارێن حوكمه‌تێ هاته كرن، ئاماژه دا وێ چه‌ندێ كو پێدڤيه مالپه‌ره‌كێ ئێكگرتى بۆ هه‌موو وه‌زاره‌ت و فه‌رمانگه‌هێن هه‌رێمێ بكه‌ڤيته كارى بۆ وه‌رگرتنا زانياريان بۆ وه‌لاتيان ديسان ئه‌ڤ چه‌نده بيته پێنگاڤه‌ك به‌ر ب ئه‌لكترونيكرنا هه‌موو كارێن حوكمه‌تێ.
ئه‌ڤرۆ نیوز:
وه‌زاره‌تا دارایی و ئابووری یا حوكمه‌تا هه‌رێما كوردستانێ رۆهنكرنه‌كێ ل دۆر مووچێ فه‌رمانبه‌رێن هه‌رێمێ به‌لاڤ دكه‌ت.
ئاوات شێخ جه‌ناب وه‌زیرێ دارایی و ئابووری یێ حوكمه‌تا هه‌رێما كوردستانێ د رۆهنكرنێ دا دبێژیت:(ئه‌م ل سه‌ر به‌لاڤكرنا مووچێ فه‌رمانبه‌ران د به‌ردوامین، لێ هه‌تا نوكه پاره ژ به‌غدا نه‌گه‌هشتیه).
گۆت ژی:(چو گوهۆڕین ب سه‌ر به‌رنامێ به‌لاڤكرنا مووچێ فه‌رمانبه‌ران دا نه‌هاتینه و هه‌ر ده‌مێ به‌غدا پاره هنارت، ل دووڤ وی خشتێ هاتیه دانان، مووچه دێ هێته به‌لاڤكرن).
ئه‌ڤه د ده‌مه‌كی دایه، كو هه‌یڤانه 454 ملیار دینار بۆ فه‌رمانبه‌رێن هه‌رێمێ و پتر ژ 68 ملیار دیناران ژی بۆ هێزێن پێشمه‌رگێ كوردستانێ د بودجا گشتی یا عیراقێ دا هاتینه جهگیركرن و هه‌تا نوكه هه‌یڤانه وی كۆژمێ پاره‌ی د هنێریت، به‌لێ بۆ ڤێ هه‌یڤێ چه‌ند رۆژه‌كه گه‌هشتنا وی پاره‌ی ژ به‌غدا گیرۆ بوویه.
ئه‌ڤرۆ نیوز:
پارێزگه‌رێ دهۆكێ ب هه‌لكه‌فتا ب ده‌ستڤه‌ئینانا پلا نایاب ژ لایێ یانا زاخۆ یا وه‌رزشی ڤه بروسكه‌كا پیرۆزباهیێ به‌لاڤ دكه‌ت، ئه‌ڤه ده‌قێ وێ یه:
“ب هه‌لكه‌فتا ب ده‌ستڤه‌ئینانا پلا نایاب ژلایێ یانا زاخو یا وه‌رزشی ل سه‌ر ئاستێ ئیراقێ بناڤێ كارگێریا پارێزگه‌ها دهوكێ گه‌رمترین پیروزباهیا ئاراسته‌ی هه‌موو ستافێ یانێ دكه‌ین، بێ گومان ئه‌ڤ سه‌ركه‌فتنه به‌رهه‌مێ ره‌نج وزه‌حمه‌تا یاریكه‌ر وراهێنه‌رایه ونیشانا دارشتنا پلانا هونه‌ری یا ساخله‌م وپشته‌ڤانی وچاڤدێریا كارگێریه.
هیڤی دارین به‌رده‌وام پاراستنا ئاستێ خوبكه‌ن بو وێ یه‌كێ ئه‌ڤ ده‌ستكه‌فته ببیته پێنگاڤه‌ك بو ب ده‌ستڤه‌ئینانا ئه‌نجامێن باشتر وئه‌ڤ سه‌ركه‌فتنه ودگه‌ل كارگێریا نوو یا یانێ ببیته قوناغه‌كا تازه ژكارێ یانا زاخو ، سه‌ركه‌فتنا هه‌وه شانازیه بو هه‌موو پشته‌ڤان وجه‌ماوه‌رێ وه‌رزشی.
دوباره پیروزباهیێ وده‌ستخوشیێ ل هه‌موو ستافێ یانێ وجه‌ماوه‌ر وپشته‌ڤانێن وه‌رزشی دكه‌ین هیڤیدارین ل پاشه‌روژێ سه‌ركه‌فتنێن مه‌زنترب ده‌ستڤه‌بینن”.
فه‌رهاد ئه‌مین ئه‌تروشی
پارێزگه‌رێ دهوكێ
21/7 /2019
نيشاندان