ئەڤرۆ نیوز، لەزگین جوقی:

رێڤەبەرێ فەرمانگەھا ژینگەھا دھۆکێ دیار کر کو دگەل رێکخراوەکا ئەلمانیی پلانەکا ھاتیە دانان دێ ل ڤان نێزیکان دەست پێ ھێتە کرن بۆ بەرھەنگاریا زێدەبوونا حالەتێن سۆتنێ ل دھۆکێ کو ژینگەھا دھۆکێ دگەل رێکخراوا GIZ دگەل رێڤەبەریا دارستان و پاوانێ ل دھۆکێ دێ کارکەن کو ھێلین ئاگرڤەمراندنێ د ناڤبەرا ھەموو زەڤیان دا بھێنە دروستکرن ب تایبەتی ژی ل جھێن دارستان و پاوانێ، ئەڤە ژی بۆ وێ چەندی یە کو ھەکە ھات و حالەتەکێ ئاگری رووبدەت دا بشێن زوو کۆنترۆلێ ل سەر بکەن، چونکو دەمێ ئاگر دگەھیتە ھێلین چێکری ل وی جھی دێ ئاگر کێم بیت و دێ شێن کۆنترۆل کەن، ژ ئالیێ خوە ڤە رێڤەبەرێ ناحیا سنوونێ ژی گۆت: “دو کەسان ژ ئەگەرێ ئاگربەربوونا دەخلۆدانی گیانێ خوە ژدەستدان”.

محەمەد تاھر بریفکانی، رێڤەبەرێ فەرمانگەھا ژینگەھا دھۆکێ بۆ ئەڤرۆ نیوز دیار کر کو نوکە ئەو پێڤە دمژوولن ڤێ پلانی بجە بینن ل شوونا ٥٠٠ دونەم بھێنە سۆتن دێ بتنێ دونەمەک ھێتە سۆتن، ھەکە پلانا بەرھەنگاریا حالەتێن سۆتنێ بجە ھات، چونکو دێ دناڤبەرا ھەموو دونەمێن ئەردی دا ھێلێن ئاگرڤەمراندنێ ھەبن کو رێکەفتن ل سەر ڤێ پلانی ھاتیە کرن و گۆت: “وەسا رێکەفتن یا ھاتیە کرن کو پشتی جەژنا رەمەزانێ دەست پێ بھێتە کرن ئەم بێژین ٩٥% حالەتێن سۆتنێ ب دەست دھێنەکرن، چونکو ھندەک خەلک رەنگە وێ ھزر بکەن بێژن گەلەک یا گەرم بووی و جھێ شووشەیان ئاگر ل ژینگەھێ و دارستانێ دچیت لێ ئەڤە نە ئەگەرە دارستان و ژینگەە دھێتە سۆتن و تێکدان، چونکو ھێشتا پلا گەرماتیێ وەسا بلندنەبوویە دارستان پێ بھێتە سۆتن”.

ناڤھاتی خویا کر کو ھندەک کەس ھەنە دەمێ جگارێ دکێشن قوپکێن خوە یێن جگارێ دھاڤێژن و د ئەنجام دا روودانێن ئاگری پەیدادبن و گۆت: “مە قانوون و رێنما ھەنە و ئەو دەستھەلات ژی مە ھەیە وان کەسان سزابدەن یێن دبنە ئەگەرێ تێکدان و سۆتنا ژینگەھێ، لێ دەمێ ل گۆندەکی یا دەڤەرەکێ ئاگر بەردبیتە ئەردی خەلکێ وی گۆندی دزانن کێ ئاگر بەردایە وی ئەردی، لێ نابێژنە مە، ھەر دەم ژی دەمێ حالەتەکێ سۆتنێ دروست دبیت دەمێ راپورت بۆ مە دھێت یا تێدا نڤیسی ژ لایێ کەسەکێ نە دیار ڤە ھاتیە سۆتن”.
ژ ئالیێ خوە ڤە نایف سەیدۆ، رێڤەبەرێ ناحیا سنوونێ دیار کر کو دو کەسان ژ ئەگەرێ ئاگربەربوونا دەخلۆدانی گیانێ خوە ژدەستدان و گۆت: “پێدڤیە ڤەکۆلینەکا بلەز د سۆتنا دەخلۆدانێ جۆتیاران دا بھێتە کرن و ھەموو کەسێن زەرمەند ژی بھێنە قەرەبووکرن، چونکو ھەکە بەغدا جۆتیاران قەرەبوو نەکەت سالا بھێت جۆتیار نەشێن چاندنێ بکەن، پێدڤیە ئەگەرێن سۆتنا دەخلۆدانی و گیان ژدەستدانا دو کەسان و سۆتنا دو کەسێن دی بھێنە دیارکرن و رێگری ل حالەتێن سۆتنا دەخلۆدانی بھێتە کرن بەری نوکە ژی چەندین جاران مە ئەڤ داخوازا ژ حوکمەتا عیراقێ کریە”.

ناڤھاتی ئاماژە دا وێ چەندێ کو وەسا دیارە وەکو پێدڤی پلان نەھاتینە دانان بۆ رێگریکرنێ ل سۆتنا دەخلۆدانی و گۆت: “ھەکە ھەڤکاریا ماددی و مەعنەوی یا جۆتیارێن سنوونێ نەھێتەکرن، سالا بھێت نەشێن بەردەوامیێ ب چاندنا دەخلۆدانی بدەن، ئەڤە د دەمەکی دا یە کو ئەڤرۆ تیمێن رێڤەبەریا چاندنێ دێ دەست ب چێکرنا راپورتا خوە کەن و دێ بۆ حوکمەتا عێراقی ھێتە بلندکرن، لەوڕا دخوازێن زوو جۆتیار بھێنە قەرەبوو کرن”.

زاخۆ، عەلی حاجی:

سەرپەرشتێ پارکا شەھیدان ل زاخۆ بو ئەڤرۆ نیو دیار کر، پشتی چار گەنجان ل رۆژا ئێکێ یا جەژنا رەمەزانێ زیان ب پارکا شەھیدان گەھاندین، باژێرڤانیا زاخۆ سکالایەکا قانوونی ل سەر وان گەنجان دێ تۆمارکەت.

ئەلند رەمەزان، سەرپەرشتێ پارکا شەھیدان خویا کر، ل رۆژا ئێکێ یا جەژنێ چار گەنج رابووینە ب شکاندنا پشکەکا کەلوپەلێن د ناڤ پارکێ دا و زیان ب پارکێ گەھاندینە و گۆت: “پشتی ڤەگەڕیانا سەرۆکێ باژێرڤانیا زاخۆ ئەم دێ سکالایەکێ ل سەر وان گەنجان تۆمارکەین، ژ بەرکو وان ئەڤ کارە پێکڤە ئەنجامدایە و ب تنێ دڤیان زیانێ ب پارکێ بگەھینن، ئەڤە ژی نەیا رەوایە، ژ بەرکو پارکا شەھیدان جھەکێ گشتی یە و بۆ وەلاتیان یا ھاتیە دروستکرن و نابیت دەستدریَّژی ل سەر بھێتە کرن”.

گۆتژی: “بھێنڤەدانا جەژنێ بوو و دەوام نەبوو، ژ بەرڤێ چەندێ ھەتا نوکە چو سکالا نەھاتینە تۆمارکرن، لێ ھەردەما دەوامێ دەستپێکر سکالایەک ژ لایێ باژێرڤانیا زاخۆ ل سەر وان گەنجان دێ ھێتە تۆمارکرن و ب رێیا قانوونێ ئەو کەسە دێ ھێنە سزادان، ھەموو بەلگێن پێدڤی ب وێنە و ڤیدیۆ مە ل بەر دست ھەنە و وێنێن وان کەسان ژی ل دەڤ مە د پاراستینە و بڕیارە د دەمەکێ نێزیک ژی دا سەرۆکێ باژێرڤانیا زاخۆ پەیامەکێ ل دۆر ڤێ چەندێ بەلاڤ بکەت”.

ئەڤرۆ نیوز، رەمەزان ھەرنی:

ل ھەرێما کوردستانێ رۆژ بۆ رۆژێ رێژا کرێچیان زێدە دبیت ژ بەر کو ھەتا نوکە چۆ کرێچیەکی خانی وپارچە زەڤی شوقە وەرنەگرتینە و چاڤەرێ دکەن کابینا نوو یا حوکمەتا کوردستانێ رەوشا وان بەرچاڤ بگریت .

بەرھەم سەردار قەرەداغی، سەرۆکێ کومەلا کرێچیێن کوردستانی بۆ ئەڤرۆ نیوز دیار کر کو ئەو ھیڤی خوازن کابینا نوو یا حوکمەتا ھەرێما کوردستانێ ببیتە ئەگەرێ خوەشکرنا ژیانا کرێچیان و قەیرانا کرێچیاتیێ بھێتە چارەسەرکرن، ژ بەر کو ل ھەرێما کوردستانێ رۆژ بۆ رۆژێ رێژا کرێچیان بەر ب زێدە بوونێ ڤە دچیت .

ناڤھاتی خویا کر کو وان پروژەک بەرھەڤکریە دشیاندایە ب رێیا وی پروژەی ئاریشا کرێچیان چارە بکەن کو ب رێیا ھژمارەکا کۆمپانیان کو پشتەڤانیا خوە نیشاندایە، دخوازن ئێکەیێن ئاکنجیبوونێ دروست بکەن بۆ کرێچیان ب قستێن دەمدرێژ کو قستەکێ گەلەک کێمە کێمترە ژ ١٠٠ دولاران ھەموو کرێچیان دشیاندایە وان قستان بدەن و گۆت: “دخوازین کابینا نوو یا حوکمەتا کوردستانێ پارچەکا ئەردی دابین بکەت بۆ دروستکرنا وان شوقە و جھێن ئاکنجیبۆنێ، چونکی ئەو کومپانی د بەرھەڤن ھەموو پروژەکی و خزمەتگۆزاریەکێ دابین بکەن ھەکە ئەرد بۆ بھێتە دابینکرن”.

ل دووماھیێ بەرھەمی دیار کر کو ل ھەرێما کوردستانێ ٩٠ ھزار ئەندام ھاتینە تومارکرن وەک کرێچی پتر ژ ٢٠٠ ھزار خێزانێن کرێچی ل کوردستانێ ھەنە و چاڤەرێ دکەن کابینا نوو یا حوکمەتا ھەرێما کوردستانێ رەوشا کرێچیان ل بەر چاڤ بگریت و رەوشا وان باشتر لێ بکەت.