ئهڤرۆ نيوز:
فهريقێ روكن قاسم نهزال، فهرماندێ ئۆپهراسيۆنێن بهسرا راگههاند كو ژ دهمژمێر 05:00ى سپێدههيا ئهڤرۆ دهرگههێ سنورى يێ ئوم قهسر هاته ڤهكرن و هاتنوچوون ب رهنگهكێ فهرمى تێدا هاته كرن.
چهندين جاران ل ڤان رۆژان ژ ئهگهرێ خوهنيشاندانان و ژ لايێ وان ڤه دهرگههێ سنورى يێ ئوم قهسر دهێته گرتن و وهكو لايهنێن شولهژێ ژى ددهنه دياركرن ئهڤێ چهندێ كارتێكرنهكا مهزن ل سهر رهوشا بازارى و كارتێكرنێن بازارى ل سهر گرتنا وى دهرگههى.
ئهڤرۆ نیوز، نهوزاد هلۆرى:
هژمار و رێژا چونا گهشتیاران ژ ههرێما كوردستانێ بۆ توركیا بهر ب كێمبوویێ یه، دهستهیا گهشتوگۆزار یا ههرێما كوردستانێ ژى دیاركر، ڤێ یهكێ پهیوهندیهكا ئێكسهر ب شهر و روودانێن د ناڤبهرا توركیا و رۆژئاڤایێ كوردستانێ ههیه.
نادر روستایى، پهيڤدارێ دهستهیا گهشتوگۆزار ل ههرێما كوردستانێ بۆ ئهڤرۆ نیوز گۆت: (ژ بهركو وهلاتێ توركیا وهلاتهكێ گهشتیارى یه و ههڤسنووره ل گهل ههرێما كوردستانێ، د ههموو وهرزێن جودایێن سالێ دا وهلاتیێن ههرێما كوردستانێ ب مهرهما گهشتوگۆزارێ قهستا توركیا دكهن).
زێدهتر گۆت: (پشتى روودانێن رۆژئاڤایێ كوردستانێ و شهر و ئالوزییان د ناڤبهرا لهشكرێ توركیا و هێزێن كوردى دا، رێژا چونا گهشتیارێن ههرێما كوردستانێ بۆ 70% كێمبویه، دیسان ژبلى گهشتیاران رێژا كومپانیێن گهشتیارى ژى بۆ توركیا كێمبویه ژبهركو گهشتیار كێمن).
ناڤبرى دیاركر ژى كو وان ژ نێزیك دووڤچوون ل سهر ئهگهرێن كێمبوونا رێژا گهشتیاران ل ههرێما كوردستانێ بۆ توركیا كریه و زێدهتر گۆت: (ههر سال ل وهرزێ زڤستانێ رێژا گهشتیاران كێم دبیت، بهلێ ئهڤ ساله ئهگهرهكێ دى زێدهبویه و كارتێكرنهكا زۆر ل سهر كریه كو ئهو ژى هێرشا توركیایه بۆ سهر رۆژئاڤایێ كوردستانێ، بۆ نموونه چونا گهشتیاران ب رێیا كومپانیێن سلێمانیێ بۆ توركیا ب رێژا 90% كێمبویه، ل ههولێرێ ب رێژا 70% كێمبویه، ل دهۆكێ هێشتا رێژه يا ديار نينه، ب گورهى دووڤچوونێن مه پتر كومپانیێن گرێداى بارزگانى و خواندنێ دچنه توركیا، د بهرامبهر دا چونا گهشتیاران بۆهندهك وهلاتێن دى زێدهبوویه بۆ نموونه چونا گهشتیاران ژ ههرێما كوردستانێ بۆ دوبهى زێدهبوویه).
ئهڤرۆ، نیوار محهمهد سهلیم:
جڤاتا پارێزگهها دهۆكێ هندهك رێنمایێن تایبهت بۆ ب كرێ گرتنا فرۆشگههێن قوتابخانان دهركرن و ئاشكهرا كریه كو بۆ سالا نوو یا خواندنێ 2019-2020 كار پێ بهێته كرن.
جمبهد شوكری، سهرۆكا لژنا پهروهرده و خواندن و ئهوقاف و كاروبارێن ئاینی ل جڤاتا پارێزگهها دهۆكێ د داخۆیانیهكێ دا بۆ رۆژناما ئهڤرۆ دیاركر كو ب مهرهما بهرژهوهندیا گشتی و ل دووڤ بڕگا (8) یا ماددێ (6) ژ قانوونا ژماره (3) یا سالا (2009) و ژ پێخهمهت رێكخستن و باشتركرنا كارێ ب رێڤهبرنا فرۆشگههێن قوتابخانان و پاراستنا ساخلهمیا قوتابیان چهندین رێنمایێن تایبهت ب كرێكرنا فرۆشگههێن قوتابخانان دهركرن.
ب گۆرهی نڤیسارهكا جڤاتا پارێزگهها دهۆكێ كو دانهك ب دهست رۆژناما ئهڤرۆ كهفتیه چهندین رێنمایێن تایبهت بۆ ب كرێكرنا فرۆشگههێن قوتابخانان دهركرینه.
ب گۆرهیی ڤان رێنمایان، پێدڤیه كارێ سهرزێدهكرنا ئاشكهرا بۆ كرێكرنا فرۆشگههێن قوتابخان ل دووڤ قانوونا ژماره (32) یا سالا (1986)ێ بهێته كرن و ژبلی ڤێ قانوونێ چ رێ بۆ كرێكرنا فرۆشگههێن قوتابخانا نههێنه كرن و رێڤهبهرێ قوتابخانێ ئهندامێ لژنا خهملاندنا كریا فرۆشگههان بیت. دیسا بجهئینانا خالا ئێكێ ژ ئیمزاكرنا گرێبهستا ههتا 1ی تهباخێ ل ههموو سالان بهێته بجهئینان.
ههر د ڤان رێنمایان دا هاتیه كو ههرسال پشتی ب دووماهی هاتنا سالا خواندنێ و ب پشكداریا لایهنێن پهیوهندیدار و ل گهل لژنا پهرورهده و فێركرنێ ل جڤاتا پارێزگهها دهۆكێ پێشنیازێن نوو بهێنه بلندكرن بۆ وهزارهتێ دا كو ئاشنا بیت ب تایبهتمهندیا پارێزگهها دهۆكێ بهری یێن دی دهركهڤن.
ههر د وێ نڤیسارێ دا ئاماژه ب وێ چهندێ ژی كریه كو ههكه ل سهر كهسهكی دیار ببیت كو فرۆشگههـ یا فرۆتیه كهسهكێ دی، رێكارێن قانوونی بهێنه وهرگرتن و فرۆشگههـ ژێ بهێته وهرگرتن و دوسالان ماف نهبیت پشكداریێ د تهندهران دا بكهت. داخواز ژی كریه كو ههر كهسێ تهندهر بۆ دكهڤیت ژی پێدڤیه پشتهڤانیا دهزگههێن ئهمنی ل گهل خوه ببهت.
دایه زانین ژی كو دڤێت پتر راگههاندن بۆ سهرزێدهكرنێن فرۆشگههان بهێته كرن و د پتر ژ دهزگهههكێ راگههاندنێ دا بهێنه بهلاڤكرن دا كو ئهوێن حهز ههیین پشكدار ببن زووتر بهێنه ئاگههدار كرن.
تهكست ل سهر وێ چهندێ ژی هاتیه كرن كو ئهڤ رێنمایه ل جهێن دیار بهێنه ههلاویستن دا كو بۆ قوتابیان روون و ئاشكهرا بیت. دایه دیاركرن ژی كو بۆ سالا خواندنێ یا 2019- 2020 دێ كار پێ هێته كرن.
جمبهد شوكری، سهرۆكا لژنا پهروهرده و خواندن و ئهوقاف و كاروبارێن ئاینی ل جڤاتا پارێزگهها دهۆكێ، داخواز ژ پهروهردهیێن پارێزگهها دهۆكێ كر كو پێگریێ ب ڤان رێنمایان بكهن ژ بۆ بهرژهوهندیا گشتی و قوتابیان.
ئهڤرۆ نیوز:
جێگرێ سهرۆكێ پهرلهمانێ عیراقێ، بهشیر حهداد راگههاند، خوهنیشادانێن عیراقێ یێن توندتر بووین و ل چهند رۆژێن داهاتى دێ گوهۆرینێن مهزن ل عیراقێ روو دهن.
بهشیر حهداد گۆت” ئهڤرۆ خوهنیشادانێن عیراقێ توندر بوون و ڤێ چهندێ ژى رهوش پتر ئالۆزكر”.
جێگرێ سهرۆكێ پهرلهمانێ عیراقێ زێدهتر بۆ كوردستان 24 گۆت” خوهنیشادانێن عیراقێ یێن بووینه سیاسى و ل چهند رۆژێن داهاتى ژى دا عیراقێ دێ گوهۆرینێن مهزن بخوهڤه بینیت، بهلێ ناهێته زانین ئهو گوهۆرینه دێ بهر ب چ ئاراستهكى بهن”.
هیڤى خوست ژى ههر گوهۆرینهكا ل عیراقێ روو بدهت، ب كێمترین زیان ئێكلا ببیت.
ئهڤرۆ نيوز، نيوار محهمهد سهليم:
سەرۆكێ زانكۆیا دهۆك پ. د. مصلح دهۆكی دیاركر كو ل رۆژا 7/11/2019 زانكۆیا دهۆك دێ ئاهەنگا دەرچوونا گەرا 24 یا قوتابیێن بەكالوریوسێ ل یاریگەها دهۆك یا وەرزشی گێریت.
پ. د. مصلح دهۆكی ئەو چەند ژی دیاركر كو ژ 18 كۆلیژان پتر ژ چار هزار قوتابیان ل سالا خواندنێ 2019-2018 ژ زانكۆیا دهۆك دەرچووینە و دێ د ئاهەنگا دەرچوونێ دا د پشكدار بن، ئەو چەند ژی دیاركر كو ئاهەنگا دەرچوونێ ل ڤی دەمی دێ گێرن دا قوتابیێن ل خولا دوویێ دەرچووین پشكداریێ د ئاهەنگێ دا بكەن.
ئهڤرۆ نيوز:
سهرۆكێ حوكمهتا ههرێما كوردستانێ، مهسرور بارزانى، ئهڤرۆ ئێكشهمبى 3/11/2019 سهرپهرشتيا كۆمبوونا لژنا بهرههڤكرنا پرۆێ قانوونا چاكسازيێ كر.
د كۆمبوونێ دا كو قوباد تالهبانى، جيگرێ سهرۆكێ حوكمهتێ بهرههڤبووى، دانوستاندن ل دۆر رهههندێن گشتى يێن وێ قانوونێ و تايبهتمهنديێن قانوونى و كارگێرى هاته كرن، دووپاتى ل وێ چهندێ هاته كرن كو پێدڤيه لهز د بهرههڤكرنا پرۆژێ قانوونا چاكسازيێ بهێته كرن وهكو ئێك ژ كارێن بهراهيێ يێن كارناما كابينا نههێ يا حوكمهتا ههرێما كوردستانێ و هنارتنا وێ بۆ پهرلهمانێ كوردستانێ بۆ پهسند كرنێ.
سهرۆكێ حوكمهتا ههرێما كوردستانێ دياركر، چاكسازى پرۆسهكا گهلهك گرنگه و پێدڤيه ب زووترين دهم پرۆژه قانوونا چاكسازيێ بهێته بهرههڤكرن و ئاراستهى پهرلهمانێ كوردستانێ بهێته كرن، گۆت ژى” پێدڤيه دادپهروهرى د چاكسازيێ دا ههبيت و نابيت هيچ كهسهكێ ههژى مافێ وى بفهوتيت، بهلێ د ههمان دهم دا رێ ژى ب كارێ نه قانوونى و نهرهوا ناهێته دان”.
لژنا بهرههڤكرنا پرۆژێ قانوونا چاكسازيێ وهكو پشكهكا گرنگ يا هێلێن گشتى يێن كارناما كابينا نههێ ب بريارا جڤاتا وهزيران و ب سهرۆكايهتيا وهزيرێ داد هاتيه پێكئينان.
ئهڤرۆ نيوز:
ژێدهرهكى ژ وهزارهتا دارايى و ئابوورى ل ههرێما كوردستانێ نووترين پێزانينێن ل دۆر بهلاڤكرنا مووچێ فهرمانبهرێن ههرێما كوردستانێ بهرچاڤكرن.
بهرپرسهكێ وهزارهتا دارايى وئابوورى ل ههرێمێ بۆ باسنيوز راگههاند كو بهلاڤكرنا مووچێ فهرمانبهرێن ههرێما كوردستانێ دێ بهردهوام بيت.
وى بهرپرسێ وهزارهتا دارايى رهتكر كو كێشه كهفتبيته پرسا بهلاڤكرنا مووچێ فهرمانبهران، راگههاند ژى” وهكو ههيڤێن بۆرى دێ ل رۆژێن داهاتى دهست ب بهلاڤكرنا مووچێ ههيڤا 8 يێ فهرمانبهرێن ههرێما كوردستانێ هێته كرن”.
ئهڤرۆ نيوز:
سهرۆكا لژنا راپهراندنێ ل جڤاتا سووريا ديموكرات ئهڤرۆ شهمبيێ 2/11/2019 راگههاند كو د بهرههڤن دانوستاندنێ ل دۆر چوونا هێزێن كوردى بۆ ناڤ رێزێن لهشكرێ سوورى دا بكهن.
ئيلهام ئهحمهد، سهرۆكا لژنا راپهراندنێ ل جڤاتا سووريا ديموكرات گۆت ژى” هێزێن كوردى دێ پشكداريێ دانوستاندنان دا كهن ههكه ديمهشق پێشنيازهكا فهرمى بهرچاڤ بكهت”.
دووپاتكر ژى كو كوردێن سووريێ دخوازن ل گهل ديمهشقێ ل سهر مێزا دانوستاندنێ ل دۆر وى بابهتى روونن.
ئهڤرۆ نیوز:
لژنا دووڤچوونێ ل قایمقامیا قهزا دهۆكێ ئهڤرۆ پێنجشهمبى 31/10/2019 سهرهدانا چهندین دهرمانخانان ل باژێرێ دهۆكێ كر.
کاوار رەشید، ئهندامێ لژنا دوفچوونێ، ل دووڤ بهرپهرێ قایمقامیا قهزا دهۆكێ، راگەهاند، ئەڤرو ئێڤاری ل سەنتەرێ باژێرێ دهوکێ دووڤچوونا چەندین دەرمانخانا هاتە کرن و لژنا دووڤچوونێ ژ نێزیک ئاگەهداری بهایێ دەرمانان ودەرمانێن ئکسپایر وقەدەغەکری بوون.
گوت ژى” د وێ دووڤچوونا ئهڤرۆ هاتیه ئهنجامدان، دەرمانخانا (ئاراس) هاتە داخستن ژبەر هەبوونا دەرمانێن قەدەغەکری وژێدەرێ وان نە یێ دیار”.
هژمارا تهلهفونا گازندان ل لژنا دووڤچوونێ ل قایمقامیا قهزا دهۆكێ: 07501612622
ئەڤرۆ نیوز، نهوزاد هلۆرى:
ب مهرهما زێدهتر خزمهتكرنا كهسوكارێن شههیدێن شهرێ داعش، ئهڤرۆ ل ئاڤاهیێ رێڤهبهریا گشتى یا باژێرڤانیان ل پارێزگهها دهۆك تیروپشك بۆ بهلاڤكرنا 26 پارچێن ئهردى ل سهر كهسوكارێن شههیدان هاته كرن.
نيشاندان