ئه‌ڤرۆ نيوز:
ئه‌ندامه‌كێ سه‌ركردايه‌تيا پارتى ديموكراتى كوردستان راگه‌هاند، د ره‌وشا نوكه دا ئه‌نجامدانا هه‌لبژارتنان ل كه‌ركووكێ يا مه‌ترسيداره ودڤێت ل گه‌ل به‌غدا ل دۆر وێ چه‌ندێ رێك بكه‌ڤين.
خسرۆ گۆران، ئه‌ندامێ سه‌ركردايه‌تيا پارتى ديموكراتى كوردستان گۆت” دڤيت پرسيار بكه‌ين سه‌باره‌ت هه‌لبژارتنێن جڤاتێن پارێزگه‌هێن عيراقێ چ گاڤه‌كێ ب هاڤێژين؟ دڤێت سه‌باره‌ت كه‌ركووكێ وئه‌و تێبينيێن هه‌ين ب پراكتيكى ل گه‌ل به‌غدا دانوستاندنان بكه‌ين ود به‌رژه‌وه‌ندي كوردان دا بهێنه چسپاندن، چونكى ده‌ستهه‌لات ب سه‌رۆكاتيا جڤاتا وه‌زيرێن عيراقێ هاتيه دان وبۆ هه‌يه ل هه‌ر پارێزگه‌هه‌كێ هه‌لبژارتنان پاش بێخيت وهه‌مه بريار ژى هاته دان ل كه‌ركووكێ نه‌هێنه ئه‌نجامدان، وى ده‌مى دڤێت كورد خوه رێك بێخن، هه‌كه نه ب ڤێ ره‌وشێ هه‌لبژارتن ل كه‌ركووكێ مه‌ترسيه، چونكه كوردان هه‌بوونا ب هێز ل وان ده‌ڤه‌ران نينه وده‌ستهه‌لاتا به‌رى 16 ئوكتۆبه‌رێ نينه وگه‌له‌ك ئاواره ل باژێرێن دى يێن هه‌ين”.
خسرۆ گۆران زێده‌تر بۆ مالپه‌رێ فه‌رمى يێ پارتى گۆت” سه‌ره‌دانا سه‌رۆك بارزانى بۆ به‌غدا ده‌رگه‌هه‌كێ نوو د ناڤبه‌را هه‌ولێرێ وبه‌غدا ڤه‌كر وهاتنا عادل عه‌بدولمه‌هدى ژى ب شێوه‌كێ ئه‌رێنى ره‌نگڤه‌دايه، ئه‌وا گرنگ ل گه‌ل به‌غدا ئێكلا بكه‌ين ودانوستاندنێ ل سه‌ر بكه‌ين دو خالن، يا ئێكێ پرسا په‌ترۆلێ وپشكا هه‌رێما كوردستانێ ل عيراقێ ئێك ژ ئه‌ركێن سه‌ر ملێ حوكمه‌تێ و وه‌زاره‌تێن دارايى وپه‌ترۆلێ كو ل گه‌ل به‌غدا ئێكلا بكه‌ين، يا دويێ ژى ئاساييكرنا ره‌وشا ده‌ڤه‌رێن ڤه‌قه‌تيايه”.
نيشاندان