ئه‌ڤرۆ:
وه‌زاره‌تا ده‌رڤه یا ئه‌مریكا رادگه‌هینیت، ل گه‌ل دانوستاندنێن بهرفرهه یێن ئالیێن سیاسی یێن ئیراقی داینه ژ پێخه‌مه‌ت دانانا نه‌خشه‌ڕییه‌كێ بۆ پاشه‌ڕۆژێ.
دوهی سێشه‌مبی 11/10/2022، نێد برایس په‌یڤدارێ وه‌زاره‌تا ده‌رڤه یا ئه‌مریكی د به‌یاننامه‌یه‌كێدا ل دۆر ده‌ربازبوونا ساله‌كێ ل سه‌ر ئه‌نجامدانا هه‌لبژارتنێن جڤاتا نوونه‌رێن ئیراقێ ل 11/10/2021، دبێژیت” پشتی ده‌ربازبوونا ساله‌كێ ژ ئه‌نجامدانا هه‌لبژارتنێن گشتی ل ئیراقێ كو تێدا وه‌لاتیێن ئیراقی ده‌نگێن خوه داین، بۆ وێ چه‌ندێ حوكمه‌ته‌ك بهێته پێكئینان كو ده‌ربرینێ ژ خواستێن ئیراقیان بكه‌ت، به‌لێ سه‌ركردێن سیاسی یێن ئیراقی نه‌شیاینه ناكۆكیێن خوه چاره‌سه‌ر بكه‌ن”.
وه‌زاره‌تا ده‌رڤه یا ئه‌مریكی ب ڕێیا په‌یڤدارێ خوه‌ڤه ئاماژێ ب وێ چه‌ندێ دكه‌ت كو ئه‌مریكا ل گه‌ل دانوستاندنێن بهرفرهه یێن ئالیێن ئیراقی یه ژ پێخه‌مه‌ت دانانا نه‌خشه‌ڕییه‌كێ بۆ پاشه‌ڕۆژێ.
ده‌مێ ساله‌كێ یه هه‌لبژارتنێن پێشوه‌ختێن ئیراقێ كو ل 10/10/2021 هاتبوونه ئه‌نجامدان، ده‌ربازبوو، به‌لێ ژ ئه‌گه‌رێ ناكۆكیێن ئالیێن ئیراقی و ڕێككنه‌كه‌فتنا هێزێن سیاسی، هه‌تا نوكه حوكمه‌ت نه‌هاتیه پێكئینان.
موقته‌دا سه‌در ل 29/8/2022 ڤه‌كێشانا خوه ژ سیاسه‌تێ ڕاگه‌هاند و لایه‌نگرێن خوه كو ده‌مێ چار هه‌فتی بوون ل جاده‌یێن ده‌ڤه‌را كه‌سك ل به‌غدا دمان، تووشی شه‌ڕێ ڕاسته‌وخوه ل گه‌ل ئالیێن دی یێن شیعی بوون و زێده‌تر ژ 20 كه‌سان هاتنه كوشتن و پتر ژ 300 كه‌سان برینداربوون، ل رۆژا 30/8/2022 موقته‌دا سه‌در، ڕێبه‌رێ باسكێ سه‌دری، د كۆنگره‌یه‌كێ ڕۆژنامه‌ڤانیدا لایه‌نگرێن خوه ژ جاده‌یان ڤه‌كێشان و مانگرتنا وان ب دووماهی ئینا.
نيشاندان