ئەڤرۆ نیوز:
هەردو حوکمەتێن ئیسرائیل و ئیمارات رێككەفتن کو حەفتیانە 28 گەشتێن ئەسمانی یێن بازرگانی دناڤبەرا هەردو وەلاتان دا بهێنە ئەنجامدان.
وەزارەتا ڤەگوهاستنا ئیسرائیلێ دیار كر: بەرپرسێن هەردو حوکمەتێن ئیمارات و ئیسرائیلێ رێككەفتنەكا تایبەت بۆ ئەنجامدانا گەشتێن ئەسمانی یێن بازرگانی دناڤبەرا هەردو وەلاتان دا ئیمزا كر، حەفتیانە هەردو وەلات دێ 28 گەشتێن ئەسمانی یێن بازرگانی ئەنجام دەن.
ئەڤرۆ نیوز:
وەزارەتا خواندنا بلند و ڤەکۆلینێن زانستی دەمێ بەردەستبوونا زانکۆلاین بۆ دەمێ ٢٤ دەمژمێران درێژ کر.
عەباس ئەکرەم پەیڤدارێ وەزارەتا خواندنا بلند و ڤەکۆلینێن زانستی راگەهاند: ژ پێخەمەت پێدانا دەرفەتا زێدەتر بۆ دەرچوویێن پۆلا ١٢ یێن کو هەتا نوکە فۆرما زانکۆلاین پر نەکری، وان بریاردایە دەمێ زانکۆلاین بۆ ٢٤ دەمژمێرێن دیتر درێژ بکەن.
هەروەسا دیارکریە: دێ بۆ دەمێ ٢٤ دەمژمێرێن دی پێشکێشکرنا فۆرما زانکۆلاین یا بەردەست بیت، ئەڤە دووماهی دەرفەتە و ئێدی دەمێ رێپێدانا پرکرنێ ناهێتە درێژ کرن.
ئه‌ڤرۆ نیوز، زنار تۆڤی:
جڤاتا وه‌زیرێن هه‌رێما كوردستانێ راپۆرتا سێ هه‌یڤێن قانوونا چاكسازیێ ره‌وانه‌ى په‌رله‌مانێ كوردستانێ كر، ئه‌ڤرۆ دێ رێكارێن قانوونى هێنه ته‌مام كرن، پاشى ئه‌و راپۆرته دێ كه‌ڤیته به‌رده‌ستێ په‌رله‌مانتاران.
عه‌بدولحه‌كیم خه‌سرۆ، سكرتێرێ لژنا بلند یێ چاكسازیێ ل هه‌رێما كوردستانێ راگه‌هاند: سه‌رۆكێ جڤاتا وه‌زیران ل ده‌مێ هاتنا وى بۆ په‌رله‌مانێ كوردستانێ راپۆرته‌ك پێشكێش كریه و دێ وێ راپۆرتێ ب هووركاریان ڤه بۆ په‌رله‌مانى هنێریت، راپۆرتا چاكسازیێ راپۆرته‌كا گشتگیره و هه‌موو واران ب خوه‌ڤه دگریت، وه‌كو قانوونا چاكسازیێ ژ ده‌رماله و مووچێ خانه‌نشینیێ و هه‌موو وان مینحه و ئیمتیازاتێن د بوودجێ گشتى یێ هه‌رێما كوردستانێ دا دهێنه دان.
ناڤهاتی گۆت ژی: ئه‌و راپۆرته ژ ئالیێ جڤاتا وه‌زیران ڤه هاتیه په‌سه‌ند كرن، هاتیه ره‌وانه‌كرن بۆ په‌رله‌مانى و تێدا هووركاریێن وان برگه و مادان و ئه‌و پێنگاڤێن خستینه به‌رچاڤ یێن بۆ چاكسازیێ هاتینه هاڤێتن، چونكى ل 1/7/2020 قانوونا چاكسازیێ كه‌فتیه وارێ جێبه‌جێكرنێ، پشكه‌ك ژ برگه و مادان ب ته‌مامى هاتینه جێبه‌جێ كرن، ب تایبه‌تى د وارێ خانه‌نشینیێ دا، هه‌روه‌سا قه‌رێن بازرگانى و هه‌موو مامه‌لێن وێ به‌ره‌ف دووماهیێ ڤه دچن، بابه‌تێ دیتر پێداچوونه ب مه‌له‌فێ فه‌رمانبه‌ران كو تایبه‌ته ب دوباره‌كرنا هژمارتنا خزمه‌تێ، ڤێ پرۆسێ قۆناغه‌كا باش برییه، هه‌تا نوكه پێداچوون د مه‌له‌فێ زێده‌تر د 207 هزار فه‌رمانبه‌ران دا هاتیه كرن، ده‌رباه‌رى چاكسازیا خانه‌نشینیێ پێنگاڤێن باش هاتینه هاڤێتن، ب تایبه‌تى ل ده‌ركرنا په‌یره‌وێ سندۆقا خانه‌نشینیێ و ئاماده‌كرنا رێنمایێن ئارمانجا سندۆقا خانه‌نشینیێ، هه‌روه‌سا دوباره پێداچوون ب هه‌یكه‌لبه‌ندیا رێڤه‌به‌ریا خانه‌نشینیێ، كو دێ بیته رێڤه‌به‌ریا گشتى بۆ سه‌رجه‌م خانه‌نشینێن شارستانى و سه‌ربازى و ئه‌منى.
سه‌باره‌ت پلێن بلند، عه‌بدولحه‌كیم خه‌سرۆ دبێژیت: د دووماهى كۆمبوونا جڤاتا وه‌زیران دا، پرۆژه بریاره‌ك ده‌رچوویه، بۆ راگرتنا مووچێن وان هه‌موو پلێن بلند یێن هاتینه خانه‌نشین كرن و پۆستێن خوه نه‌دیتین، پشكه‌ك ژ وان خه‌لكێ تێكۆشه‌رن و خه‌بات كریه، وه‌كو رێزگرتن پۆست پێ هاتیه دان، ئه‌و رێزلێنانه دێ یا به‌رده‌وام بیت، به‌لێ ب ره‌نگه‌كێ دیتر، چونكى مه قانوونا به‌ركار هه‌یه و لدووڤ وێ قانونێ دێ رێز لێ هێته گرتن.
ئه‌ڤرۆ نیوز، زنار تۆڤى:
هونه‌رمه‌ند عه‌مه‌ر گوندى، د دیداره‌كێ دا بۆ ئه‌ڤرۆ نیوز دیار كر: نوكه ئه‌و مژوولى كلیپ كرنا سترانه‌كێ یه ب ناڤێ دینێ و دینۆ، كو ئه‌ڤ سترانه ژ ئه‌لبۆما وى یا سالا 2009 یا ب ناڤێ ” ناڤێ ته چیه” یه، وى ل وه‌لاتێ ئه‌لمانیا ئه‌ڤ سترانه كلیپ كریه، هه‌روه‌سا ئه‌ڤ سترانه ژ په‌یڤ و ئاوازێن هه‌لبه‌ستڤان یوسف رۆمانى نه، وى ئه‌ڤ سترانه ب شێوى دویت ل گه‌ل خانما سترانبێژ فه‌یرۆز شاه گۆتیه، كو سترانبێژه‌كا باكورێ كوردستانێ یه، كارێ وێنه‌كرنێ و ده‌رهێنانێ ژ ئالیێ كچا وى ژینێ ڤه هاتیه كرن، لێ ژبه‌ركو فه‌یرۆز شاه ل توركیا بوویه، له‌وما ل ده‌مێ چێكرنا كلیپێ نه‌شیا ل ئه‌لمانیا به‌رهه‌ڤ ببیت، سترانبێژه‌كا فارس ب كارێ فه‌یرۆزێ رابوویه د وێ كلیپێ دا و ل ڤان نێزیكان دێ وى كلیپێ به‌لاڤ كه‌ت.
ناڤهاتى گۆت ژى: ئه‌ڤه ده‌مێ یازده سالانه وى چو ئه‌لبۆمێن نوو به‌لاڤ نه‌كرینه، لێ لدووڤ شیانێن خوه ئه‌و دێ ئه‌لبۆمان ژى چێكه‌ت، هه‌ر چه‌نده نوكه بازارێ چێكرنا ئه‌لبۆمان نه‌مایه، لڤان سالێن بورى ژى وى هژماره‌كا سترانێن سینگل تۆمار كرینه و به‌لاڤ كرینه و دیسان چه‌ندین كلیپ ژى چێكرینه، د هه‌مان ده‌مدا ته‌له‌فزیۆنا دهۆك و وار گه‌له‌كا خزمه‌تا من كریه و هندى د ژیانێ دا مابم دێ خزمه‌تا هونه‌رێ كوردى كه‌م، دیسان هه‌موو مه‌زاختیێن چێكرنا ستران و كلیپێن خوه ژ كیستێ خوه دكه‌ت، هه‌تا نوكه د وارێ هونه‌رى دا وه‌كو پێدڤى هاریكاریا وى نه‌هاتیه كرن، پشتى ڤێ كلیپێ وى لبه‌ره هنده‌ك كارێن دیتر یێن هونه‌رى تۆمار بكه‌ت و به‌لاڤ بكه‌ت.
ئەڤرۆ نیوز:
ناسر شبلی وەزیرێ ڤەگوهاستنا عیراقێ راگەهاند: رۆژانە 270 فرۆكێن مەدەنی د ئەسمانێ عیراقێ دا دەرباز دبن و بەرامبەر دەربازبوونا هەر فرۆكەكێ حوکمەت 450 دۆلاران وەردگریت.
ناڤهاتی گۆتیە ژی: هژمارا فرۆكێن مەدەنی، یێن کو رۆژانە ئەسمانێ عیراقێ بۆ گەشتێن خوە بكار دئینن گەهشتیە 270 فرۆكان، كۆمپانیا فرۆكەڤانیا عیراقێ دەست ب كاری كریە ل سەر گرێبەستێن تایبەت ب رادار و پەیوەندیان.
هەروەسا گۆتیە: رۆژانە حوکمەتا عیراقێ 121 هزار و 500 دۆلاران بەرامبەر دەربازبوونا وان فرۆكان وەردگریت.
ئەڤرۆ نیوز:
سه‌رۆك مەسعود بارزانی، د پەیامەکێ دا سۆتنا بارەگایێ لقا پێنج یێ پارتی دیموکراتی کوردستان ل بەغدا شەرمزار کر و دیارکریە: ئەو چاڤەرێنە حوکمەتا عیراقێ پێرابوونێن پێدڤی بگرنە بەر.
سه‌رۆك بارزانی دیار کریە ژی: ئەڤرۆ شەمبیێ، تاقمەکێ تێکدەر سفکاتی ب ئالایێ کورستانێ و ئالایێ پارتی کریە و ئەو هێرش و دەستدرێژیە و ب چو رەنگان ژ پێگەهێ کوردان و پیرۆزیێن بلند یێن گەلێ کوردستانێ کێم ناکەن، لێ ب روونی پاشکەفتن و بێ فەرهەنگی و عەقلیەتا تاقمەکێ تێکدەر بۆ هەموو ئالیان دیار دکەت.
بارزانی ئەو ژی ئاشکرا کریە: ئەو چاڤەرێنە حوکمەتا فیدرال پێرابوونێن پێدڤی ل بەرامبەر وێ هێرشێ بگرنە بەر و دیسان ئەوێن دخوازن هێرشێ بکەنە سەر پارتی و سفکاتیێ ب پیرۆزیێن گەلێ کوردستانێ بکەن، دێ باجا کریارێن خوە دەن.
ئەڤرۆ نیوز:
حوکمەتا عیراقێ بریاردا ب سێ قۆناغان هەموو كەمپێن ئاواران دائێخیت و كەمپێن دناڤ هەرێما كوردستانێدا، دێ ل دووماهی قۆناغ هێنە داخستن.
دكۆنگرەكێ رۆژنامەڤانی یێ هەڤپشك دا ل هەولێرا پایتەخت، هەر ئێك ژ رێبەر ئەحمەد وەزیرێ ناڤخۆیێ هەرێما كوردستانێ و خالد بەتال نەجم وەزیرێ پلاندانا عیراقێ، وەزیرا كۆچ و كۆچبەران ئیڤان فایق راگەهاند: هەموو ئاوارێن پارێزگەها ئەنبار ڤەگەریاینە سەر مال و مولکێن خوە، ل دەمەكێ نێزیك و ب سێ قۆناغان دێ پرۆسا داخستنا كەمپێن ئاواران هێتە كرن و ل قۆناغا دووماهیێ دا دێ كەمپێن دناڤ هەرێما كوردستانێ دا هێنە داخستن.
ئەڤرۆ نیوز:
ب فەرمانا سەرۆك وەزیرێن عیراقێ وەزیرەكێ بەرێ یێ توركمان كو نوونەرێ حوکمەتێ بوو ل پەرلەمانێ عیراقێ ژ پۆستێ وی هاتە دوورخستن و هەموو دەستهەلات ژێ هاتنە وەرگرتن.
میدیایێن عیراقی بەلاڤكرینە، مستەفا كازمی سەرۆك وەزیرێن عیراقێ (تورهان ئەلموفتی) ژ سەر كاری وی لادایە و هەموو دەستهەلاتێن وی ژێ وەرگرتینە.
تورهان بەری نوکە وەزیرێ دەولەتێ بوویە بۆ كاروبارێن پارێزگەهان و د نوكە دا نوونەرێ حوکمەتێ بوویە ل پەرلەمانێ عیراقێ.
ئەڤرۆ نیوز، زنار تۆڤی:
ئەڤرۆ پێنجشەمبی، مالباتا غازى ئالیخانى د پەیامەکێ دا راگەهاند: ئەو دخوازن هەلویستەکێ ب کریار هه‌مبەرى تیرۆکرنا وى هەبیت، سوز ژى دا ل سەر رێبازا وى د بەردەوام بن، غازی ئالیخان رێڤەبەرێ ئاسایشا گۆمرکا سەرزێرى ل پێنجشەمبیا بورى هاتبوو تیرۆرکرن و سازیێن ئێمناهیا هەرێمێ ژى پەکەکە ب تیرۆرکرنا وى تۆمەتبار کریە.
ئەڤرۆ ل سەر گۆرێ وی و ب بەرهەڤبوونا کەسوکارێن وی، سلێمان ئالیخانى، د پەیاما مالباتا غازى ئالیخانى دا، داخواز ژ سەرۆک بارزانى و سەرۆکێ هەرێما کورڕستانێ نێچیرڤان بارزانى و جڤاتا ئاسایشا هەرێمێ کر، کو هەلویستەکێ ب کریار هەبیت هه‌مبەرى تیرۆرکرنا غازى ئالیخانى کو ل ئاستێ مێرخاسیا وى بیت.
هەروەسا سلێمانی سوز دا، کو مالباتا وان دێ ل سەر رێبازا غازى ئالیخانی یا سه‌رێ خوە ل سه‌ر داناى، یا بەردەوام بیت.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ راگەهاندنا رێڤەبەریا گشتی یا هاتنوچوونا پارێزگەها دهۆکێ، بۆ ئەڤرۆ نیوز دیار کر: د روودانەکا ترافیکێ دا چار ترۆمبێلان لێکدا.
ناڤهاتی زێدەتر گۆت: ئەڤرۆ پێنجشەمبی 2020/10/15 ل دەمژمێر (5:40) خولەک، ل سەر جادا سەرەکی یا سێمێلێ و ل نێزیکی کولیژا چاندنێ چار ترۆمبێلان لێکدا و د ئەنجامدا سێ کەس بریندار بوون و زیانێن مەزن ب وان ترۆمبێلان کەفتن.
نيشاندان