ئه‌ڤرۆ نيوز:
د روونشتا ئه‌ڤرۆ نيڤر دا په‌رله‌مانتار په‌روا عه‌لى ل نا هولا په‌رله‌مانێ كوردستانێ گول پێشكێشى په‌رله‌مانتارێن ژن و ده‌سته‌يا سه‌رۆكاتيا په‌رله‌مان و سه‌رۆكێن فراكسيونان كر.
په‌روا عه‌لى گۆت: دوهى رۆژا جيهانيا ژنان بوو، ئه‌ڤرۆ ژى سه‌رۆكێ په‌رله‌مانى به‌حسێ قاره‌مانيا ژنا كورد كر ب تايبه‌ت ژنێن شه‌رڤان و ژنێن پێشمه‌رگه، من ژى وه‌ك په‌رله‌مانتاره‌ك دخواست بۆ وێ قاره‌مانيا ژنا كورد ب دانا گولان پێشوازيێ ل رۆژا جيهانيا ژنان بكه‌م.
ئەڤرۆ نیۆز، قائید میرۆ:
ئەڤرۆ فڕۆکەیێن ھەڤپەیمانان ل قەزا شەرگات، کاروانەکێ ترۆمبیلێن داعش کرە ئارمانج و د ئەنجامدا 62 ترۆمبێل ھاتینە ژناڤبرن و ھژمارەکا زۆرا چەکدارێن داعش ھاتنە کوشتن.
غەیاس سورچی، کارگێڕێ مەلبەندێ ئێکەتی نیشتیمانی کوردستان ل مووسل ب ئەڤرۆ نیۆز راگەھاند” پشتی ھێرشا ئەڤرۆ ھێزێن پێشمەرگەی بۆسەر رۆژئاڤایێ کەرکووکێ، ھێزەکا مەزنا تیرۆرستێن داعش کو ل 62 ترۆمبێلا پێکھاتبوو دخواست ل باژێڕێ مووسل بەرەف قەزا حەویجە بچن و پشتەڤانیا ھێزێن خوە بکەن لھەمبەر ھێرشا پێشمەرگەی”.
غەیاسی گۆتژی” پشتی ئەف ھێزا مەزنا تیرۆرستێن داعش گەھشتیە نێزیک قەزا شەرگات، ژلایێ فڕۆکەیێن ھەڤپەیمانان ھاتنە بوردۆمانکرن و د ئەنجامدا، ھەر 62 ترۆمبێلێن تژی چەکدار ھاتنە ژناڤبرن و چەکدارێن ناڤا ترۆمبێلانداژی ھژمارەکا کێم رزگاربوون و یێن دیژی ھاتنە کوشتن.
ئه‌ڤرۆ:
پشتی یانا ریال مەدرید ژ سەرجەمێ شەش خالان تنێ خالەک دەستڤەئینای تووشی خوسارەتیا پێنجێ بوی د خولا ئسپایا کو ڤێ جارێ سەرکێشا خولێ بۆ ھەڤرکا خوە یانا بەرشەلونە بجە ھێلای پشتی سەرکەفتن ل سەر رایو ڤالیکانو تومارکری، مالپەرێن جیھانی پێنج ئەگەر ل دۆر پاشڤەزڤرینا ئاستێ یاریکەرێن یانا مەلەکی دیارکرن.
١_ ھێلا ناڤین یا تیمێ چ ئاستەکێ ھوسا پێشکێش نەکر د یاریا بەرامبەر ئەتلەتیکو بلباو دا و ئەو ئاستێ ژ یاریکەر ئیسکو دھێتە خواستن پێشکێش نەکر و یارامێندی ژی بویە بارگرانی ناف تیمێ دا و تونی کروس یێ ئەلمانی ژی د خرابترین ئاستێ خوە د ڤێ یاریێ دا پێشکێش کر.
٢_ ھێرشبەرێن یانا مەلەکی ژ دەرڤەی خزمەتا یانێ دا بەرامبەر بەرەڤانێن یانا باسکی و کەریم بنزیمای د ماوێ ٨٠ دەقیقەیان دا ئاستێ وی یێ خراب بوو و ستێرا یانێ کرستیانو رۆنالدو کو دھێتە نیاسین قورتالکەرێ یانێ چو تشتێ ژ ھەژی ناڤێ یانا ریال مەدرید پێشکێش نەکر تنێ گارس بێل نەبیت ئەوێ تنێ چەند بزاڤ کرین بۆ تومارکرنا گۆلەکێ کو گرنگترین ژ وان بزاڤا ئەوا شووتا وی ب ئاسنێ گۆلێ کەفتی.
٣_ ئەو ئاستێ بلند یێ گۆلچیێ یانا ئەتلەتیکو بلباو جورکا ئیرایزوس یێ ٣٤ سالی د ڤێ یاریێ دا پێشکێش کری کو ھەمی ستێرێن یانا ریال مەدرید بێ بار کربون ژ تومارکرنا گۆلەکێ.
٤_ ھێلا بەرەڤانیا یانا باسکی د باشترین دەمێ خوە دا بوو ب درێژاھیا یاریێ کو چو خەلەتی نەکرن کو دبیتە جارا ئێکێ ڤی ئاستێ باش بەرەڤانێن بلباو ل ڤی وەرزی پێشکێش دکەن کو بۆ یاریکەرێن یانا ریال مەدرید یا ب ساناھی نەبوو ب گەھنە دەڤەرا پەنەلتیا یانا بلباو ژ بەر بەرەڤانیا چر یا تیما ھەڤرک.
٥_ د ڤێ یاریێ دا یاریکەرێن ئەتلەتیکو بلباو ب پشتەڤانیا بھێزا جەماوەرێ خوە یاریکەرێن وێ ب زاخەکا مەزن یاری دکر و دیسان ھێزا لەشی یا ڤان یاریکەرا گەلەک یا باشبوو د ڤێ یاریێ دا کو د ماوێ ھەمی یاریێ دا وەستیانا یاریکەرێن وان دیارنەدکر .
ئه‌ڤرۆ نيوز:
جێگرێ فه‌رماندێ گشتيێ هێزێن چه‌كدار ل هه‌رێما كوردستانێ راگه‌هاند كو ئه‌و خه‌لكێ كه‌ركووك پشت راست دكه‌ن كو دێ به‌ره‌ڤانيێ ژ كه‌ركووك كه‌ن هه‌تا هه‌موو ئه‌ردێ وێ رزگار دكه‌ن و گۆت: “چاڤه‌رێ حه‌شه‌د شه‌عبى و له‌شكرێ عيراقێ ناكه‌ين دا كه‌ركووك ئازاد بكه‌ن”.
ئه‌ڤرۆ هێزێن پێشمه‌رگێ كوردستانێ ل ميحوه‌رێ رۆژئاڤايێ كه‌ركووك پێشڤه‌چوون كرينه و هه‌تا نڤيسينا ڤى نووچه‌يى 20 كيلۆمه‌تر ژ وێ ده‌ڤه‌رێ هاتبوونه رزگار كرن و ب گۆره‌يى عه‌ميد سه‌رحه‌د قادر هژماره‌كا زێده يا كه‌له‌خێن چه‌كدارێن داعش كه‌فتينه وان ده‌ڤه‌ران.
كوسره‌ت ره‌سۆل، جێگرێ فه‌رماندێ گشتيێ هێزێن چه‌كدار ل هه‌رێما كوردستانێ، ب به‌ره‌يێن شه‌رى بۆ ده‌زگه‌هێن راگه‌هاندنێ راگه‌هاند كو ئه‌ڤرۆ سپێدێ زوو پێشڤه‌چوونێن پێشمه‌رگه‌يى بۆ ئازادكرنا چه‌ندين ده‌ڤه‌رێن دى يێن رۆژئاڤايێ كه‌ركووك ده‌سپێكريه.
گۆتژى: “د ڤێ هێرشێ دا ژبلى پێشمه‌رگێ كوردستانێ چو هێزه‌كا دى يا پشكدار نينه”، ته‌كست ژى كر: “ل ده‌ڤه‌رێن كه‌ركووك و حه‌وێچه چاڤه‌رێ حه‌شه‌د شه‌عبى و له‌شكرێ عيراقێ ناكه‌ين”.
ئه‌ڤرۆ نيوز:
ئه‌ڤرۆ سپێدێ هێزێن پێشمه‌رگه‌يى، پۆليس و ئاسايش ب پشته‌ڤانيا فرۆكێن شه‌رى يێن هه‌ڤپه‌يمانا هێرشه‌كا به‌رفره‌هـ كره سه‌ر چه‌كدارێن داعش ل ميحوه‌رێ باشوورێ كه‌ركووك.
عه‌ميد سه‌حه‌د قادر، رێڤه‌به‌رێ پۆليسێن قه‌زا و ناحيێن كه‌ركووك بۆ رووداو راگه‌هاند: “د هێرشێ دا 20 كيلۆمه‌تران پێشڤه‌چووينه و د به‌رده‌وامن د پێشڤه‌چوونێ دا، به‌لێ ژ ئه‌گه‌رێ دانانا بۆمبێن چاندى، ب هشيارى پێش ڤه دچن”.
سه‌رحه‌د قادر گۆتژى: “چه‌كدارێن داعش چو به‌ره‌ڤانى نه‌مايه، گه‌له‌ك كوشتى ژى يێن هه‌ين و يێن ب جهـ هێلاين”.
رێڤه‌به‌رێ پۆليسێن قه‌زا و ناحيێن كه‌ركووك ئاماژه ب وێ چه‌ندێ ژى كر كو نوكه گوندێ سمايلاوا، بلنداهيێن پشت سمايلاوا، سه‌خره ب ته‌مامى هاتينه كونترۆلكرن و پێشڤه‌چوون ل ميحوه‌رێ مه‌لا عه‌بدولا يا به‌رده‌وامه”.
زاخۆ:
خواندنا دویێ یا پرۆژێ پارێزگەھبوونا زاخۆ ئەڤرۆ دێ ل پەرلەمانێ کوردستانێ ھێتە ئەنجامدان، ئەندامەکێ لیژنا پارێزگەە و ھەرێمان ل جڤاتا نوونەرێن عیراقێ ژی دبێژیت ھەتا نوکە حوکمەتا ھەرێمێ چو داخوازی بۆ پارێزگەھبوونا زاخۆ ئاراستەی حوکمەتا عیراقێ نەکرینە ، قایمەقامێ زاخۆ ژی دبێژیت پشتی کومبوونا وان ل گەل جڤاتا وەزیران، چو دەستھەلاتێن زێدەتر ب دامودەزگەھێن دەڤەرێ نەھاتیە دان.
عەلی ھالۆ ئەندامێ پەرلەمانێ کوردستانێ ل سەر لیستا پارتی دیموکراتی کوردستان ژ زاخۆ بۆ (ئەڤرۆ) گوت” وەکو بزاڤا ئێکێ مە داخوازا خواندنا دویێ یا پرۆژێ پارێزگەھبوونا زاخۆ کریە، بزاڤەکا دی ژی نوکە ئیمزایێن نێزیکی ١٠٠ پەرلەمانتاران بۆ ھەمان مەرەم دھێنە بەرھەڤکرن و ھەتا نوکە مە ئیمزایێن ٤٠ پەرلەمانتاران یێن کومکرین، لێ ھەکە ئەو ژی سەرنەگرت، دێ پەنایێ بەینە شێوازێن مەدەنی ب رێیا رێکخراوێن مەدەنی و وەلاتیان”.
شرین عەبدولرەحمان ئەنداما لیژنا پارێزگەە و ھەرێمان ل جڤاتا نوونەرێن عیراقێ ل سەر لیستا پارتی بۆ ئەڤرۆ گوت” حوکمەتا ھەرێمێ چو نڤیسار نەداینە جڤاتا نوونەرێن عیراقێ ل دۆر ڤی بابەتی، ھەتاکو کاری ل سەر بکەین”.
ژلایێ خوە ڤە خەلیل مەحموود قایمقامێ قەزا زاخۆ دیارکر” دووماھی کومبوونا مە ل گەل جڤاتا وەزیران ل ھەرێما کوردستانێ پشتی بریار دەرکەفتی دوێ کومبوونێ دا دۆپاتی ھاتبوو کرن کو دامودەزگەھێن حوکمەتێ ل زاخۆ ببنە رێڤەبەری و د ھەمان دەم دا لیژنەیەک بھێتە دروستکرن بۆ چەوانیا ب رێڤەبرنا وان رێڤەبەریان” زێدەتر گوت” دیارە ھەتا نوکە چو قانوون پێ دەرنەکەفتینە، لەوما ھەتا نوکە سەرەدەری ل گەل مە دھێتە کرن وەکو قەزا”.
پەرلەمانتار عەلی ھالۆ ئەگەرێ گیرۆبوونا خواندنا دویێ یا پرۆژێ پارێزگەھبوونا زاخۆ بۆ ھەبوونا خواندنا گەلەک پرۆژە قانوونان ڤەدگەرینیت، ھەکە بزانین کێمتر خەمی ھەبیت دوێ گیرۆبوونێ دا، دێ رێکارێن قانوونی گرینە بەر ھەتا کو بکارین دەرباز بکەین و گۆت” مە ٤٠ ئیمزایێن پەرلەمانتاران یێن کومکرین بۆ خواندنا دویێ یا پرۆژەی”.
عەلی ھالۆی تەکەز ژی کر کو پشتی ھەلەبجە، زاخۆ باژێرێ ئێکێ یە ببیتە ئیدارەیا سەربخوە و کۆیە و کەلار ژی ڤێ داخوازیێ دکەن، لێ ژبەر کو ھەتا نوکە چو باژێر وەکی زاخۆ د بەرھەڤ نینن بۆ ڤێ چەندێ ب ئەرد و ستراتیژی و رووبەر ڤە ، ئیدارەکرنا وێ دێ بیتە پالپشت بۆ دەڤەرێن دی”
خویاکر ژی” سنۆربوونا زاخۆ ل گەل دو وەلاتان نابیتە رێگر و چو رێگریێن قانوونی و جۆگرافی نینن، ھەموو مەرج ژی ل خواندنا ئێکێ یێن دەربازکرین”.
شرین عەبدولرەحمان دبێژیت” ھەکە حوکمەتا ھەرێمێ و سەرۆکێ حوکمەتێ د پشتەڤان بن و مینا ھەلەبجە کار ل سەر بھێتە کرن، دێ مینیت فشارێ دروست بکەین، ھەتا کو دانپێدان پێ دھێتە کرن”.
ئەڤرۆ نیۆز ،سالار دۆسکی:
رێڤەبەرێ پەیوەندی و راگەھاندنێ ل وەزارەتا ئەوقافێ، مەریوان نەقشەبەندی، بۆ ئەڤرۆ نیۆز گۆت: “نەبوونا ئێک مەرجەعێ ئیسلامی ل کوردستانێ ھۆکار بۆ حزبا ئیسلامی دزڤریت، ئێکەتیا زانایان وەزارەتا ئەوقافێ ب مەرجەعێ خوە نابینن، جھێ ڤێ چەندێ ھەر ئێکێ ب خوە رێکخراوەکا زانایان یا ئیسلامی یا (سیبەر) یان د ناف حزبێن خوە دامەزراندینە و فەتوا و تەعليماتا ژ دەرڤەی کوردستانێ وەردگرن”.
هنده‌ك كه‌س ل كوردستانێ كو سه‌ر ب لايه‌نێن ئيسلامى نه، ره‌خنه‌يا وێ چه‌ندێ ل وه‌زاره‌تێ دگرن كو ئێكه‌تيا زانايان و وه‌زاره‌تا ئه‌وقافێ نه‌بووينه مه‌رج، نه‌قشه‌به‌ندى د به‌رسڤا وان دا گۆت: “هه‌ر حزبه‌كا ئيسلامى بۆ خوه مه‌رجه‌عه‌ك دروست كريه و كريه ژێده‌ر، پێگريێ ب رێنمايێن وه‌زاره‌تێ و ئێكه‌تيا زانايان ناكه‌ن”.
ئه‌ڤرۆ نيوز:
مه‌سعود بارزانى سه‌رۆكێ هه‌رێما كوردستانێ راگه‌هاند كو ب درێژاهيا مێژوويا خه‌باتا گه‌لێ كورد، به‌هرا ئافره‌تان ئازار و نه‌حۆشى و خۆراگرى بوويه و دبێژيت: “ئه‌و رۆلێ ئافره‌تان د ژيان و خه‌باتا گه‌له‌ك كوردستانێ دا ديتى، جهێ شانازيێ يه و ئه‌م هه‌موو قه‌ردارێن فيداكارى و خۆراگريا ئافره‌تێن كوردستانێ ينه”.
بارزانى د په‌يامه‌كێ دا ب هه‌لكه‌فتا 8ى مارس، رۆژا جيهانى يا ئافره‌تان، ئاماژه ب وێ چه‌ندێ كر كو د ده‌مه‌كى دا كو بيره‌وه‌ريا 8ى مارس يا دهێته كرن، گه‌لێ كورد يێ د شه‌ره‌كێ دژوار دا ل گه‌ل درنده‌ترين جورێ تيرۆرستان و دبێژيت: “د ڤى شه‌رێ زالمانه يێ ب سه‌ر گه‌لێ مه دا هاتيه سه‌پاندن، خووشكێن ئێزدى باجا ژنبوون و كوردبوون و ئێزدبوونا خوه دا و مه‌زنترين تاوان به‌رامبه‌ر هاته كرن”.
بارزانى ته‌كست كر كو ئافره‌تێن كوردستانێ نمونا خۆراگرى و فيداكاريا ئافره‌تێن جيهانێ نه و دبێژيت: “نمونا وه‌سان كو د ئێك رۆژ دا ته‌رمێ سێ كوڕێن خوه يێن شه‌هيد گرتنه باوه‌ش و وره‌يا پيلايى يا خوه ژ ده‌ست ناده‌ن و هێشتا ئاماده‌يى قوربانيدانێ نه”.
ده‌قێ په‌ياما سه‌رۆكێ هه‌رێما كوردستانێ ب هه‌لكه‌فتا 8ى مارس، رۆژا جيهانى يا ژنان:
ب ناڤێ خودێ مه‌زن و دلوڤان
ژنێن کوردستانێ میناکا خوەراگری و فەداکاریا ژنێن جیھانێ نە. میناکێن وھا کو ل یەک رۆژێ دا تەرمێ سێ زارۆک و گەدەیێن شەھید ھمبێز دگرن کو ئورە و مۆرالا خوە پۆلایینی ژ دەست نادن و ھێ ژی ئامادەیێ قوربانیدانێ نە، دیرۆکا تەڤگەرا رزگاریخوازا کوردستانێ ژی تژەیە ژ میناکا دایکێن شەھیدێن ب ڤی ئاوایی. ھەر ژ بۆ ڤێ یەکێ ئەو دلێری و قەھرەمانیا ل پێشمەرگە تێ دیتن نە سەیرە و نە دووری ل چاڤەرێکریە ژ بەر کو پەروەردەیا شیر و دەستێن وان دایکێن ئازا و مەزنانن. نھا ل دەمەک دا بیرانینا سالڤەگەرا ھەشتێ ئادارێ دکن کو گەلێ مە ل شەرەکی دژوار دایە ل گەل درندەترین جوورەیێ تەرۆریستان. ل ڤێ شەرێ زالمانەیا ل سەر گەلێ مە دا ھاتیە سەپاندن خوشکێن مەیێن ئێزیدی باجا ژنبوون و کوردبوون و ئێزیدیبوونێ دان و مەزنترین تاوان ل بەرانبەری وان ھاتە کرن. داییکێن مە شەھیدێن مەیێن قەھرەمانێن ئەزیز و خوەشدڤی ژ دەست دان. ل ڤێ شەرێ دا بەشەکی زێدەیێ ژنێن کوردستانێ تووشی دژواریا کۆچبەریێ بوون. ب درێژاھیا دیرۆکا خەباتا گەلێ مە بەشا ژنێن مە ئازار و دژواری و خوەراگری بوویە. ئەو رۆلا ژن ل ژیان و خەباتا گەلێ کوردستانێ دا دیتیە جھێ شانازیە و ئەم ھەموو قەرزدارێ فەداکاری و خوەراگریا ژنێن کوردستانێ نە. ئەرکێ سەر ملێ مە ھەموویانە بەرسیڤا مەزنا ئەرک و ماندووبوونا ژنێن کوردستانێ بدین و ماف و داخوازیێن وان بنپێ نەکین و رێز ل ئیرادەیا وان بگرین و کار ژ بۆ میسۆگەرکرنا وەکھەڤیا د ناڤبەرا ژن و زلاامان دە بکین. ب ھەلکەفتا رۆژا جیھانییا ژنان پیرۆزباھیێ ل ھەموو ژنێن کوردستان و جیھانێ دکم. پیرۆزباھیێ ل ژنێن کۆبانێ دکم کو ب دلێری و خوەراگریێ ل شەرێ تەرۆریستان دە ھەموو جیھانێ سەرسام کر. پیرۆزباھیێ رۆژا جیھانییا ژنان ل دایکێن شەھیدان و ژن و کەچ و خوشکێن شەھیدێن مەیێن سەربلند دکم و ھێڤیا شادیێ ژ بۆ وان دخوازم.
مسعود بارزانی
سەرۆكێ هەرێما كوردستانێ
8ـی 3ـی 2015
ئه‌ڤرۆ نيوز:
نوكه شانده‌كێ بلندێ وه‌زاره‌تا پێشمه‌رگه‌يى ل حوكمه‌تا هه‌رێما كوردستانێ به‌ر ب به‌غدا ب رێ كه‌فتن بۆ كۆمبوونێ ل گه‌ل وه‌زاره‌تا به‌ره‌ڤانيا عيراق و دانوستاندن ل سه‌ر بودجێ پێشمه‌رگه‌يى و شه‌رێ دژى رێكخراوا تيرۆرستى يا داعش.
د داخۆيانيه‌كا نڤيسى دا كو وێنه‌ك بۆ ده‌زگه‌هێن راگه‌هاندنێ هنارتيه، سكرتێرێ رۆژنامه‌ڤانى يێ فه‌ريف جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه‌يى ل حوكمه‌تا هه‌رێما كوردستانێ دبێژيت: “هه‌ر نوكه شانده‌كێ بلندێ وه‌زاره‌تا پێشمه‌رگه‌يى ب سه‌رۆكاتيا فه‌ريق شێروان عه‌بدولره‌حمان و فه‌ريق جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه‌يى ب فرۆكه‌كا تايبه‌ت يا وه‌زاره‌تا به‌ره‌ڤانيا عيراقێ به‌ر ب به‌غدا ب رێ كه‌فتن”.
هاتيه ژى: “مه‌ره‌م ژ سه‌ره‌دانا وان، كۆمبوونه ل گه‌ل لژنا كارێن بلندێن هه‌ڤپشك و بابه‌تێ بودجا هێزێن پێشمه‌رگێ كوردستانێ ب گۆره‌يى قانوونا 2015 و هه‌روه‌سا دانوستاندن ل سه‌ر كاودانێن شه‌رى دژى گرۆپێ تيرۆرستى يێ داعش و چاوانيا هه‌ڤكاريى و هه‌ماهه‌نگيێ”.
ئه‌ڤرۆ نيوز:
ب مه‌ره‌ما پاراستنا روونشتڤانێن چه‌ند گۆندان، هێزه‌كا پێشمه‌رگێ كوردستانێ ل چه‌ند ده‌ڤه‌رێن ميحوه‌رێ گوێر ده‌ست ب پێشره‌ويێ كر.
حاكم جه‌مال جه‌لال ئێك ژ فه‌رماندێن هێزێن پێشمه‌رگێ كوردستانێ، ل ميحوه‌رێ گوێر بۆ باسنيوز گۆت: “هێزێن پێشمه‌رگه‌يێ كوردستانێ ل هه‌ردو ده‌ڤه‌رێن “سوفه‌يه، خاله‌ند” كو ژ روويێ له‌شكرى ڤه سه‌ر ب ميحوه‌رێ گوێرن، پێشڤه‌چوون كريه و سێ كيلۆمه‌تران چووينه پێش كو گه‌هشتينه سه‌ر رووبارى”.
زێده‌تر گۆت: “ب ڤێ چه‌ندێ ژى دێ شێين وان ده‌ڤه‌ران باشتر پارێزين، به‌لێ نوكه ناڤبه‌را مه و داعش گه‌له‌ك يا كێم بوويى”
ئه‌وى فه‌رماندێ پێشمه‌رگه‌يى ئاماژه ب وێ چه‌ندێ ژى كر كو ل ده‌مێ ئه‌نجامدانا وێ پێشڤه‌چوونێ رووى ب رووى به‌رسڤدانه‌كا كێم يا چه‌كدارێن داعش ل وان ده‌ڤه‌را بوون و نوكه هه‌موو جهێن ستراتيژى ل ميحوه‌رى ل بن كونترۆلا هێزا پێشمه‌رگه‌يى نه”.
نيشاندان