ئه‌ڤرۆ نیوز، ره‌وان نهێلى

عه‌ره‌فات كه‌ریم په‌رله‌مانتاره‌كێ كورد ل په‌رله‌مانێ عیراقێ رادگه‌هینیت كو نێچیرڤان بارزانى د سه‌ره‌دانا خوه‌ یا چاڤه‌رێكرى دا بۆ به‌غدا دێ بێژته‌ به‌رپرسێن حكومه‌تا عیراقێ كو هه‌رێم نه‌شێت رۆژانه‌ 300 هزار به‌رمیلێن نه‌فتا كه‌ركوكێ بهنێریت.
هه‌ڤده‌م عاسم جیهاد په‌یڤدارێ وه‌زاره‌تا نه‌فتا عیراقێ راگه‌هاندیه‌ كو ستافه‌كێ ئه‌ندازیارى به‌رده‌وام یێ وێ بزاڤێ دكه‌ت كو هنارتنا نه‌فتێ بگه‌هته‌ وى ئاستێ یێ كو هه‌ولێر و به‌غدا ل سه‌ر رێككه‌فتین كو 550 هزار به‌رمیلێن رۆژانه‌نه‌.
هه‌روه‌سا زانا رۆستایى ئه‌ندامێ لژنا قانوونى ل په‌رله‌مانێ عیراقێ رادگه‌هینیت كو حوكمه‌تا عیراقێ ب مه‌رجێ پابه‌ندبوونا هه‌رێمێ ب رێككه‌فتنا د ناڤبه‌را هه‌ولێر و به‌غدا ل دۆر هنارتنا نه‌فتێ دكه‌ته‌ مه‌رجێ هنارتنا بودجێ هه‌رێمێ.
رۆستایى دیاركر كو به‌غدا ب ئاشكرا گوتیه‌ هه‌تا كو حكومه‌تا هه‌رێما كوردستانێ پابه‌ند نه‌بیت ب رێككه‌فتنێ و 550 هزار به‌رمیلێن نه‌فتێ راده‌ستى كۆمپانیا سومو نه‌كه‌ت، ئه‌و ژى پابه‌ند نابن ب رێككه‌فتنێ و پشكا هه‌رێمێ ژ بودجه‌ى ناهنێرن.

ئه‌ڤرۆ نيوز، ناجی به‌ده‌ل:

د.جوتیار محه‌مه‌د ره‌شید ماموستایێ زانستێن سیاسی ل زانكویا دهۆكێ بو ئه‌ڤرۆ دیاركر هه‌رێما كوردستانێ نه‌ ده‌وله‌ته‌ لێ د سه‌ره‌ده‌ریكرنێ دا مینا ده‌وله‌ته‌كێ ل گه‌ل دهێته‌كرن و ئه‌لمانیا ژی هزره‌كا تایبه‌ت هه‌یه‌ ل سه‌ر كوردان و دوپاتی ل سه‌ر هاریكاریكرنا هه‌رێمێ كرینه‌ .

ناڤبری ئه‌و چه‌نده‌ ژی دیاركر لگوری بنه‌مایێن یاسایا نیڤ ده‌وله‌تی دا سه‌ره‌ده‌ریكرن ل گه‌ل هه‌رێمێ دڤێت ب رێكا حكومه‌تا فیدرال بیت لێ نها بێ موله‌ت وه‌رگرتنا مه‌ركه‌زی یێ هاریكاریا هه‌رێمێ دكه‌ن ب تایبه‌تی ژلایێ سه‌ربازی ڤه‌ بو به‌رهنگاربونا تیرۆرێ و پاراستنا ئاخا هه‌رێمێ.

د.جوتیاری گوت ژی: دقوناغێن بهێت دا هه‌ر ده‌ما ئاریشه‌یه‌ك په‌یدا بیت ل په‌یوه‌ندیێن هه‌رێمێ و به‌غدا،جیهان یا بێ ده‌نگ نابیت ل سه‌ر ئه‌وێ ئاریشه‌ییێ و دێ پشته‌ڤانیێ ل كوردان كه‌ت ئه‌و ژی ل سه‌ر رۆلێ وان یی دیار ل شه‌رێ دژی تیرۆرێ و بو هه‌مویان ژی دیار بو دڤێت جوداهیێ ل سیاسه‌تا خودا بكه‌ن ل گه‌ل عیراقێ و هه‌رێمێ ئه‌وا ل گه‌ل هه‌ریمێ جودایه‌ ژ یا ل گه‌ل به‌غدا دهێته‌كرن و د پلانێن خوییێ ستراتیژی جهـ بگرن .

ماموستایێ زانكویی ئه‌و ئێكه‌ ژی دیاركر ئێك رێزی و هه‌لویستیێ یا كوردان ل سه‌ر پرسێن نه‌ته‌وایه‌تی و سیاسه‌تا سه‌رۆكێ هه‌رێمێ یا گرنگه‌ و پێدڤیه‌ هه‌مو پارت و لایه‌نێن سیاسی یێن كورد پشته‌ڤانێ ل سیاسه‌تا نهایا سه‌رۆكی هه‌رێمێ بن داكو پینگاڤ هاڤیتن بو پاشه‌رۆژێن گه‌شتر بهاڤێژین و راگه‌هاندن ژی پتر خو ئه‌كتیڤ بكه‌ت بو ده‌رئێخستنا دوزا كوردایه‌تیێ و گه‌هشتن ب مافین ره‌وایێن خو .

ئه‌ڤرۆ نيوز:

سه‌رۆك بارزانى د پشكا دويێ يا ديدارا خوه‌ دا ل گه‌ل رۆژناما حه‌يات يا له‌نده‌نى ئاماژێ ب وێ چه‌ندێ دكه‌ت كو ئه‌ڤه‌ ژ سه‌رده‌مێ زه‌ينه‌فونى و هه‌تا نوكه‌ چو كه‌س نه‌شيايه‌ خوه‌شيێ ب داگيركرنا كوردستانێ ببه‌ت و ئاماژێ ب وێ چه‌ندێ دكه‌ت كو ئه‌و نابيته‌ پشكه‌ك ژ كێشا دناڤبه‌را ئه‌مريكا و ئيرانێ دا و كيش ژ وان هاريكاريا وى دكه‌ت دێ سۆپاسدارێ وان بيت.

مه‌سعود بارزانى سه‌رۆكێ هه‌رێما كوردستانێ ديار كر كو ئه‌ڤه‌ ژ سه‌رده‌مێ زه‌ينه‌فونى و هه‌تا نوكه‌ چو كه‌س نه‌شياينه‌ خوه‌شيێ ب داگيركرنا كوردستانێ ببه‌ن و دبێژيت: “نه‌ ل سه‌ر ده‌مێ به‌عسيان و نه‌ژى عوسمانيان و نه‌ عه‌باسيان و نه‌ژى ئه‌مه‌ويان، نه‌شيايه‌ ل كوردستانێ به‌رقرار ببن، ئه‌ز ئه‌ڤێ نه‌ وه‌كو خوه‌ مه‌زنكرنه‌ك دبێژم به‌لێ ئه‌ڤه‌ ژ ئه‌نجامێ وێ سه‌ربۆرا مه‌يه‌ و ب تنێ كورد دشێن ل كوردستانێ ب ئارامى بژين”.

ئاماژه‌ ب وێ چه‌ندێ ژى كر كو هه‌ر ده‌مێ ترسه‌ك ل سه‌ر وه‌لاتى هه‌بيت، ئه‌و دێ چيته‌ به‌ره‌يێن شه‌رى و ب ئه‌ركێ خوه‌ د زانيت و دبێژيت: “مه‌ نه‌دخواست ڤه‌گه‌رينه‌ سه‌رده‌مێن شه‌رى، گه‌له‌ك يێن تووشى شه‌ران بووين و بهايێ وان دزانين، مه‌ گه‌له‌ك بزاڤ كرن ژى خوه‌ د ڤى شه‌رى هه‌ل نه‌ده‌ين، نه‌لێ وه‌سان چێنه‌بوو”.

زێده‌تر گۆت: “مه‌ گه‌له‌ك نه‌خوه‌شى ديتن، ئه‌ڤجا مه‌ ڤيا، ره‌وشا وه‌لاتيێن خوه‌ خوه‌ش بكه‌ين و ئابوورا خوه‌ پێش بێخين و په‌يوه‌نديێن خوه‌ ل گه‌ل هه‌ڤسۆيێن خوه‌ خوه‌ش بكه‌ين، به‌لێ وه‌سان دياره‌ هێشتا نه‌حه‌زێن مه‌ د رژدن ل سه‌ر نيه‌تێن خوه‌ يێن خراب، ژ به‌ر هندێ ژى دڤێت ل به‌ر سينگێ وان ب راوه‌ستين”.

ل دۆر پرسياره‌كێ كا ئه‌و ڤه‌گه‌ريايه‌ رۆلێ جه‌نراليێ، سه‌رۆك بارزانى د گرنژيت و دبێژيت: “ئه‌ز له‌شكره‌كم ژ پێشمه‌رگێ كوردستانێ”.

حه‌يات پرسيار ژێ كريه‌ ژى كو ئه‌و دشێت د ئێك ده‌م دا هه‌ڤالێ جۆ بايدن و قاسم بى، سه‌رۆكێ هه‌رێما كوردستانێ د به‌رسڤا ڤێ پرسيارا وان دا دبێژيت: “كێشا ملله‌ته‌كى يا د ده‌ستێ من دا، هه‌ڤالينيا من ل سه‌ر هه‌لويستێ وايه‌ به‌رامبه‌ر وێ كێشێ، ب چو ره‌نگان ئه‌ڤه‌ نه‌ بابه‌تێن كه‌ساتى نه‌. من كێشا خوه‌ يا هه‌يى و نابمه‌ پشكه‌ك ژ كێشا ئه‌مريكا و ئيرانێ يان ژى يا ئيرانێ به‌رامبه‌ر ئه‌مريكا، ئه‌ز يێ د شه‌رێ چاره‌نڤيس ساز دا ل گه‌ل دوژمنه‌كێ دڕنده‌ ناڤێ وى داعشه‌، هه‌كه‌ سوله‌يمانى يان ژى بايدن هاريكاريا من بكه‌ن، دێ سۆپاسدارێ وان بم.

ده‌رباره‌يى هاريكاريكرنا ئسرائيل ژى گۆت: “نه‌ مه‌ داخواز ژێ كريه‌ و نه‌ژى وان گۆتيه‌ مه‌ و هه‌كه‌ تشته‌كێ ژ ڤى ره‌نگى هه‌بايه‌ دا ته‌پێزانينێن باشتر هه‌بن ژ لايێ وان كه‌سێن ب نهێنى سه‌ره‌ده‌ريێ ل گه‌ل دكه‌ن و هێرشێ دكه‌نه‌ سه‌ر وان كه‌سێن ب ئاشكه‌رايى په‌يوه‌نديێ ل گه‌ل دكه‌ن”.

سه‌رۆك بارزانى د پشكه‌كا دى يا ئاخفتنا خوه‌ دا ئاماژێ ب وێ چه‌ندێ ژى دكه‌ت كو ب كێمى هه‌تا نوكه‌ سێ هزار چه‌كدارێن داعش يێ ل شه‌رى هاتينه‌ كوشتن.

بۆ خواندنا پشكا ئێكێ ب كورتى ڤێره‌ كليك بكه‌:

بۆ خواندنا ده‌قێ پشكا ئێكێ ژ ديدارا سه‌رۆك بارزانى ل گه‌ل رۆژناما حه‌يات يا له‌نده‌نى ب زمانێ عه‌ره‌بى ڤێره‌ كليك بكه‌:

بۆ خواندنا ده‌قێ پشكا دويێ ژ ديدارا سه‌رۆك بارزانى ل گه‌ل رۆژناما حه‌يات يا له‌نده‌نى ب زمانێ عه‌ره‌بى ڤێره‌ كليك بكه‌:

ئه‌ڤرۆ نیوز:
به‌ری ده‌مه‌کێ کێم فرۆکێن شه‌ری یێن هه‌ڤپه‌یمانان ب دژوواری بنگه‌هین داعش ل نێزیک خاری تۆپبارانکرن.
ئه‌ڤرۆ ده‌مژمێر 1:30 ده‌قیقه‌ فرۆکئن شه‌ری یێن هه‌ڤپه‌یمانان زێده‌تری 20 جاران ل گۆبجه‌لیل و به‌عشیق و به‌رتلا هێرشێن ئه‌سمانی کرینه‌ سه‌ر چه‌کدارێن داعش.
ئه‌ڤرۆ دو رۆژه‌ گه‌له‌ک ب دژوواری ئه‌و ده‌ڤه‌را مه‌سیجی نشین دهێته‌ توپبارانکرن.