ئه‌ڤرۆ نيوز:

ماجيدا تميمى ئه‌نداما جڤاتا نوونه‌رێن عيراقێ د داخۆيانيه‌كا رۆژنامه‌ڤانى دا راگه‌هاند كو چو كۆژمێن پاره‌يى ژ مووچێ وان فه‌رمانبه‌ران ناهێته‌ بڕين ئه‌وێن زێده‌ترى ئێك ميلۆن و 500 هزار ديناران وه‌ردگرن.

فرياد ره‌واندزى، وه‌زيرێ ره‌وشه‌نبيرى  و لاوان ل حوكمه‌تا عيراقێ به‌رى نوكه‌ ئاشكه‌را كربوو كو كێمكرنا مووچان ژ پلێن تايبه‌ت ب تنێ د گرت، ئانكو ژ سه‌رۆك كۆمارى هه‌تا رێڤه‌به‌رێن گشتى و ئه‌وان فه‌رمانبه‌ران ژى يێن سه‌ر ب سه‌ر هه‌رسێ سه‌رۆكاتيان و گۆت: “ئه‌وان فه‌رمانبه‌ران ژى دگريت يێن مووچێ وان ژ مليۆن و نيڤان زێده‌تر”.

د ڤێ داخۆيانيێ دا ماجيدا ته‌ميمى گۆت: “فه‌رمانگه‌ها بودجه‌يى ل وه‌زاره‌تا دارايى، ل سه‌ر داخوازا فه‌رمانبه‌ران ئه‌و برگه‌ يا ژ ناڤبرى ئه‌وا بڕيار بوو د بودجه‌يى دا بهێته‌ دانان كو يا تايبه‌ت بوو ب بڕينا مووچێ وان فه‌رمانبه‌رێن زێده‌تر مليۆنه‌ك و 500 هزار ديناران وه‌ردگرن”.

زێده‌تر گۆت: “جڤاتا وه‌زيران بۆ ڤێ مه‌ره‌مێ ژى پشتى په‌سه‌ندكرنا بودجه‌يى دێ ئاراسته‌يێن پێدڤى بۆ بودجه‌يى كه‌ت، به‌رى نوكه‌ بووچه‌يه‌ك هه‌بوو بۆ وێ چه‌ندێ كۆژمه‌كێ پاره‌يى ژ مووچێ ئه‌وان فه‌رمانبه‌ران بهێته‌ برين يێ د سه‌ر مليۆن و 500 هزار ديناران دا وه‌ردگرن، ئانكو پلێن رێڤه‌به‌رێن گشتى و د سه‌ر دا، به‌لێ ئه‌ڤرۆ رۆژا دوشه‌مبى ب فه‌رمى ئه‌و پێشنياز هاتيه‌ ره‌تكرن”.

حوكمه‌تا عيراقێ د چارچوڤێ رێگرتنه‌ به‌ر بۆ چاره‌كرنا كێشا دارايى و كێمكرنا كورتئينانا بودجا گشتى يا سالا داهاتى يا وه‌لاتى، ل چاڤه‌رێ يه‌، مووچێ پلێن تايبه‌ت و مووچێن زۆر كێم بكه‌ت و هه‌ر ده‌مێ كێشا دارايى چاره‌ بوو و پارێ زێده‌ كه‌فته‌ به‌ر ده‌ستێ كوژمه‌كێ پاره‌ى ل جهێ وى پاره‌يى بده‌نه‌ وان.

ئەڤرۆ:

د ديداره‌كێ دا بۆ رۆژناما ئه‌ڤرۆ كو ئه‌مير ئه‌ترووشى به‌رهه‌ڤكريه‌ تێدا ئاماژه‌ ب وێ چه‌ندێ هاتيه‌ كرن كو نەرازیبوونا ماموستایێن ھەرێما کوردستانێ ل دور وەرگرتنا ئابوونێن ھەیڤانە ژ لایێ ئێکەتیا ماموستایێن کوردستانێ ڤە کو ھەیڤانە سێ ھزار دینار بوون وەکر کو چاڤخشاندنەک د ڤێ بریارێ دا بھێتە کرن و ل دووماھیێ بریار ھاتە لادان و ئابوونێن ھەیڤانە بۆنە ب تنێ ھزار دینار و دو ئابوونێن و سالان پێکڤە ھێنە وەرگرتن. لێ سەرۆکێ ئێکەتیا ماموستایێن کوردستانێ لقێ دھۆک دیار کر کو پشتی ئابوونە بووینە ھزار دینار، ئێدی ھاریکاری بۆ ماموستایان نامینن یان ژی دێ گەلەک کێمتر لێ ھێن.
مەکتەبا تەنفیزیا ئێکەتیا ماموستایێن کوردستانێ د دووماھی کۆمبوونا خوە دا بریار دایە ئابوونێن ھەیڤانە یێن ژ ماموستایان دھێنە وەرگرتن ژ سێ ھزار دینارێن ھەیڤانە ببنە ب تنێ ھزار دینار، بەلێ ل دەستپێکا سالا 2015 دێ ئەڤ بریارە کەڤیتە د وارێ جێبەجێکرنێ دا و دێ ئابوونێن دو سالان پێکڤە ھێنە وەرگرتن کو 24 ھزار دینارن و ل گەل ھندێ ژی دێ ناسنامێن ماموستایان ھێنە نووکرن و ھزار دینار بۆ ڤێ چەندێ ژی ھێنە وەرگرتن، ئانکو د ل مەھا ئێک ژ سالا بھێت دێ ھەر ماموستایەکێ ئەندام د ئێکەتیا ماموستایێن کوردستانێ دا 25 ھزار دیناران وەکو ئابوونە دەتە ئێکەتیا ماموستایێن کوردستانێ و ڤێ چەندێ دەنگێن نەرازیبوونێ یێن ماموستایان ژی بلندکرینە.
بێوار عەلی حەمو ماموستایەکێ دھۆکێ یە دیار کر، ئەڤە پتر ژ دو سالانە ئەو بوویە ئەندامێ ئێکەتیا ماموستایێن کوردستانێ لقێ دھۆک و ھەیڤانە ژی ئابوونێن خوە ددان، بەلێ چو جاران ھاریکاری ژ وان وەرنەگرتینە و گۆت: کەسێ ئەز ئاگەھدارنەکرینە کو بەرامبەر وان ئابوونان وی ماف ھەیە جاران و د ھندەک ھەلکەفتان دا دێ شێت ھاریکاریێ ژ ئێکەتیا ماموستایێن کوردستانێ وەرگریت و گۆت: یا ژ من ڤە دانا ھاریکاریا دادی تێدا نینە، چونکو گەلەک ماموستا ھەنە چو ھەلکەف بۆ چێنابن و نەشێن چو پارا وەربگرن و ب چو رەنگەکی مفادار نابن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک تایبەت بۆ ئەڤرۆ دیار کر، بەری دو سالان کونفرانسێ ئێکەتیا ماموستایێن کوردستانێ ھاتبوو کرن و پاشی کۆنگرە ژی ھاتیە کرن و تێدا بریار ھاتبوو دان کو ل دەستپێکا سالا 2015 ئابوونێن ماموستایان ببنە ھەیڤانە ھزار دینار و ئابوونێن دو سالان پێکڤە بھێنە وەرگرتن و ناسنامە ژی بھێنە نووکرن و گۆت: نھا ئەم یێ کار د ڤێ بریارێ دا دکەین و دێ کەڤیتە کاری.
ناڤبری دیار کر، وەرگرتنا سێ ھزار دینارێن ھەیڤانە وەکو ئابوونە نەرازیبوونێن مەزن ژ دەڤ ماموستایان دگەھشتنە مە و من باوەرە پشتی بووینە ھزار دینار ئەڤ نەرازیبوونە نامینن و دێ پتر ب دلێ ماموستایان بیت و گۆت: ئەم وەکو لقێن مەزن دھۆک و ھەولێر و سلێمانیێ ل گەل ڤێ بریارێ ینە، بەلێ لقێن بچووک یێن قەزایان نەشێن ب ھزار دیناران کارێ خوە یێ ھەیڤانە ئەنجام بدەن، چونکو ھەیڤانە چو داھات نەبن، کارەکێ ب زەحمەتە بھێتە کرن.
وەھبی یونس، سەرۆکێ ئێکەتیا ماموستایێن کوردستانێ لقێ دھۆک خویا کر، پێشنیازا مە ئەوە کو د شەش ھەیڤێن ئێکێ دا ژ سالا 2015 چو ھاریکاری بۆ ماموستایان ناھێنە کرن، بەلێ پشتی ھینگی رەنگە ھندەک ھاریکاری بھێنە کرن، بەلێ ئەو ھاریکاری ژی دێ د کێم بن و گۆت: ل گۆرەی ناسنامان مە نێزیکی 17 ھزار ئەندامان ھەنە، بەلێ ئەندامێن کارا یێن کو ھەیڤانە ئابوونا ددەن و ب ئێکەتیا مە ڤە د گرێدای، ب تنێ ھەشت ھەتا نەە ھزار ئەندامانە و وەکو دی ژی ھەیڤانە ئەندامێن مە د زێدەبوون و کێمبوونێ دانە.
وەھبی ئاماژە دا وێ چەندێ، ژ وان ئابوونێن د ئەڤ سالە دا ھەیڤانە د گەھشتە بەردەستێ مە، د ئەڤ سالە دا 100 ملیون دینار ژ لایێ مە ڤە ل سەر ماموستایێن دھۆکێ ھاتینە بەلاڤکرن و د گەلەک بیاڤان دا ھاریکاریا ماموستایان ھاتیە کرن، بۆ نموونە بۆ وەغەرکرنێ ملیونەک و 100 ھزار دینار داینە ماموستایان، ھەروەسا ھاریکاری بۆ داوات و شەھیان و بوونا زارۆیان و خانی ئاڤاکرنێ و ھندەک بیاڤێن دی ھاریکاری ھاتینە کرن و گۆت ژی: پشتی ئابوونە دبنە ھزار دینار، مەحالە ئەڤ ھاریکاریا نھا بھێتە کرن و دێ گەلەک کێمتر بیت.
سەرۆکێ ئێکەتیا ماموستایێن کوردستانێ لقێ دھۆک دا زانین، مە چو داھات و بودجە نینن، ب تنێ مە چاڤ ل ئابوونایە بۆ ب رێڤەبرنا کارێ خوە و گۆت: ئەڤە داخوازیا ھەموو ماموستایانە کو ئابوونە ببنە ھزار دینار، بەلێ ب راستی ژی بەرامبەر کێمبوونا ئابوونان ھاریکاری ژی دێ گەلەک کێمتر لێ ھێن.