ئه‌ڤرۆ نيوز، ناجی به‌ده‌ل:

سه‌باح عه‌لی شه‌ریف ئه‌ندامێ جڤاتا پارێزگه‌ها دهۆكێ و سه‌رۆكێ لیستا ئێكگرتوو بۆ ئه‌ڤرۆ نیوز گۆت: “بڕیاره‌ ل حه‌فتیا بهێت دلشاد شه‌هاب به‌رپرسێ فايلا دانوستاندنی یێ پارتی ديموكراتى كوردستان ل گه‌ل لیستێن دی یێن جڤاتا پارێزگه‌هێ و ب تایبه‌تی ل گه‌ل ئێكگرتوو ل سه‌ر پرسا به‌لاڤكرنا پۆستێن پارێزگه‌هێ كۆم بن”.

سه‌رۆكێ ليستا ئێكگرتوو ل جڤاتا پارێزگه‌ها دهۆكێ ئاشكه‌را كر كو ئه‌وان وه‌كو ئێكگرتوو خوه‌ به‌رهه‌ڤكریه‌ ژ بوو ئه‌وێ كۆمبوونێ دخوازيێن خوه‌ ژی دیار كرینه‌ ئه‌و ژی جێگره‌كێ پارێزگارى ل گه‌ل چه‌ند پۆستێن ئيدارى و رێڤه‌به‌رێن ناحيا و قايمقامانن.

سه‌باح عه‌لی دازانین ژى كو ئه‌وا داخواز دكه‌ن ب گوره‌يی پیڤه‌رێ ده‌نگ ب ده‌ست ڤه‌ ئینانا كورسیێن جڤاتێ یه‌ كو ئێكگرتوو لیستا دويێ یه‌.

هه‌روه‌سا ناڤبری گۆتژى: “مه‌رج نينه‌ ئه‌و هه‌موو تشتێن ئه‌م داخواز دكه‌ین ب ده‌ستڤه‌ بينين، به‌لكو ئه‌ڤه‌ دێ بنه‌ بابه‌تێ دانوستاندنێ د ناڤبه‌را مه‌ دا”.

دلڤین محه‌مه‌د سه‌لیم ئه‌نداما جڤاتا پارێزگه‌ها دهۆكێ ژ لیستا ئیكه‌تیێ بۆ ئه‌ڤرۆ نیوز راگه‌هاند: “ئه‌م ژی چاڤه‌رێينه‌ بۆ دانوستاندنان و دخوازين جێگرێ پاریزگاری ب مه‌ بهێته‌ دان و هه‌كه‌ نه‌ هێته‌ دان، دڤێت قایمقامێ ناڤه‌ندا دهۆكێ ب ئێكه‌تى بهێته‌ دان”.

دلڤینێ ئه‌و چه‌نده‌ ژی دیاركر كو هه‌تا نها ئه‌و نه‌هاتينه‌ ئاگه‌هدار كرن كو دانوستاندن دێ كه‌نگی هێنه‌ كرن.

نازك محه‌مه‌د عه‌لی ئه‌نداما جڤاتا پارێزگه‌هێ ژ لیستا گۆڕان بو ئه‌ڤرۆ نیوز گۆت: “هه‌تا نها چ روونشتن نه‌هاتینه‌ كرن بۆ پارێزگه‌ها دهۆكی ل سه‌ر ئاستێ لیستان و ب نێرینا من بابه‌تێ دهۆكێ ل سه‌ر ئاستێ بلندێن پارته‌یایه‌تیێ دهێته‌ به‌حسكرن و هاتیه‌ گرێدان ب پاریزگه‌ها سلیمانیێ و هه‌له‌بچه‌ و هه‌ولێرێ ڤه‌”.

نازك محه‌مه‌د ئه‌و چه‌نده‌ ژی دیاركر كو ل دهۆكێ چ روونشتن نه‌هاتینه‌ كرن، به‌لێ پشتی چاره‌كرنا پرسا پاریزگه‌هێن سلێمانیی و هه‌له‌بچه‌ و هه‌ولێر دڤێت دهۆك ژی بهێته‌كرن چونكو نابیت ل پارێزگه‌هه‌كێ پارته‌كێ به‌هر هه‌بیت و ل پاریزگه‌هه‌كا دی پارتێن دی بێ بار بكه‌ت.

دا زانين ژى كو هێشتا ژ بوو ئاماده‌كرنا داخوازيێن خوه‌ وه‌كو ليستا گۆڕان ل پارێزگه‌ها دهۆكێ ئه‌وان چو كۆمبوون نه‌كرينه‌.

ئه‌ڤرۆ نيوز:

ئه‌ڤرۆ مه‌سعود بارزانى، سه‌رۆكێ هه‌رێما كوردستانێ، ب هه‌لكه‌فتا هاتنا جه‌ژنا رۆژوويێن ئێزدى په‌يامه‌ك به‌لاڤكر و تێدا سه‌ركه‌فتنا شه‌رێ ده‌ڤه‌را شنگال و ب ئێكگه‌هشتنا هێزێن پێشمه‌رگه‌يى وه‌كو جه‌ژنانه‌ ديارى گه‌لێ ئێزدى كر.

ئاماژه‌ ب وێ چه‌ندێ ژى كر كو هه‌ر ده‌ما جاره‌كێ بۆ وان ده‌رفه‌ت دروست بيت و كينا خوه‌ به‌رامبه‌ر كورد و كوردستانێ ده‌ربكه‌ن، ل دووماهيێ دێ باجا تاوانێن خوه‌ ده‌ن و دڤێت تيرۆرستێن داعش ببنه‌ سه‌ربۆر بۆ هه‌موو دوژمنان.

ئه‌ڤه‌ ژى ده‌قێ په‌ياما سه‌رۆكێ هه‌رێما كوردستانێ يه‌:

ب ناڤێ خودێ مه‌زن و دلۆڤان

خۆشحالم كو د هه‌لكه‌فتا جه‌ژنا رۆژيێن ئێزدى دا سه‌ركه‌فتنه‌كا مه‌زن يا پێشمه‌رگه‌يێ كوردستانێ ب ديارى پێشكێشى خووشك و برايێن ئێزدى جكه‌ين و ئه‌ڤه‌ ژى باشترين پيرۆزباهى يه‌ لێ دكه‌ين.

ده‌سپێكرنا ئۆپه‌رسيۆنا رزگاركرنا ده‌ڤه‌را شنگال ل رۆژا ئالايێ كوردستانێ و گه‌هشتنا پێشمه‌رگه‌يى بۆ چيايێ شنگال ل 18\12\2014 رامانا خوه‌ هه‌يه‌. بلا هه‌موو دوژمن و نه‌حه‌ز بزانن هه‌كه‌ جاره‌كێ بۆ وان ده‌رفه‌ت دروست بيت و كينا خوه‌ به‌رامبه‌ر كورد و كوردستانێ ده‌ربكه‌ن، ل دووماهيێ دێ باجا تاوانێن خوه‌ ده‌ن و دڤێت تيرۆرستێن داعش ببنه‌ سه‌ربۆر بۆ هه‌موو دوژمنان.

هيڤيدارم ب ئێكگه‌هشتنا ڤێ سه‌ركه‌فتنا مه‌زن و جه‌ژنا رۆژيێن خووشك و برايێن ئێدزى ببيته‌ ئه‌گه‌رێ ساربوونا برينێن مه‌ و ئه‌و عه‌زيزێن گه‌لێ كوردستانێ ژى ژ وێ چه‌ندێ پشت راست بن كو سه‌رێ دوژمان دێ كه‌ڤيته‌ ژێر پێيان.

هزار سلاڤ ل گيانێ پاكێ شه‌هيدێن هه‌رده‌م ساخ. دوعايێن ساخبوونا ب له‌ز بۆ برينداران دكه‌م و ده‌ستوچاڤێن هه‌موو پێشمه‌رگێن قاره‌مان ماچ دكه‌م كو ئه‌ز دزانم چو قاره‌مانيه‌كا مه‌زن تۆماركريه‌.

مسعود بارزانی
سەرۆكێ هەرێما كوردستانێ
19ـی 12ـی 2014

ئه‌ڤرۆ نيوز، نيوار محه‌مه‌د سه‌ليم:

رێڤه‌به‌ريا گشتيا كه‌شناسيا هه‌رێما كوردستانێ راگه‌هاند كو دێ ل ده‌سپێكا حه‌فتيا بهێته‌ پێله‌ك ب سه‌ر هه‌رێما كوردستانێ دا هێت و پلێن گه‌رماتيێ دێ هێنه‌ د بن سفرێ دا و به‌فر و باران ژى دێ باريت.

پشكا پێشبينيا ل رێڤه‌به‌ريا گشتيا كه‌شناسيا هه‌رێما كوردستان د به‌ياننامه‌كێ دا كو دانه‌ك بۆ ئه‌ڤرۆ نيوز هنارتيه‌ هاتيه‌: “ل رۆژا ئه‌مبى رێكه‌فتى 20\12\2014 ژ ئه‌گه‌رێ كارتێكرنا فشارێن نزمێن ده‌ريا ناڤه‌راست و فشارێن بلندێن توركيا ئه‌سمانێ هه‌رێمێ دێ يێ نيڤ ئه‌ورى بيت و ل گه‌ل بارينا بارانێ ب ره‌نگه‌كێ هوور ل هنده‌ك ده‌ڤه‌رێن چيايى و سنورى ل باكوورێ رۆژئاڤايێ هه‌رێمێ، پاشان رۆژا ئێكشه‌مبى و دوشه‌مبى 22 و 23 ئه‌سمانێ هه‌رێمێ دێ بۆ ئه‌ورێن بچووك هێته‌ گوهۆڕين”.

ئاماژه‌ ب وێ چه‌ندێ ژى كريه‌: “رۆژا سێشه‌مبى رێكه‌فتى 23\12\2014 ژ ئه‌گه‌رێ كارتێكرنا ده‌ريا سپى يا ناڤه‌راست ئه‌سمان دێ ب تمامى بيته‌ ئه‌ور و باران دێ ره‌نگه‌كێ هوور ل ده‌ڤه‌رێن چيايى باريت و ل هنده‌كان ژى دێ به‌فر باريت ب تايبه‌ت جهێن بلند، ژ ئه‌نجامێ ڤێ چه‌ندێ ژى هه‌وايه‌ك كو دێ ژ ناڤه‌راستا ئه‌ورۆپا و جه‌مسه‌رێ باكوورى كارتێكرنێ ل سه‌ر هه‌رێمێ كه‌ت، پلێن گه‌رماتيێن ل ده‌ڤه‌رێن چيايى دێ چنه‌ د بن سفرێ دا”.

دايه‌ زانين: “كارتێكرنا ڤان فشاران ل رێكه‌فتى 24\12\2014 دێ ل سه‌ر هه‌رێمێ ب لاوازى هێنه‌ ديتن و پاشان ئه‌سمان دێ هێته‌ گوهۆرين و ب تنێ پلێن گه‌رمێ دێ وه‌كو خوه‌ مينن كو ل دهۆك 3 پله‌ و سلێمانيێ 4 پله‌ و هه‌ولێر 5 پله‌ و كه‌ركووك 6 پله‌”.

ئەڤرۆ نیۆز، قەیس ئیسماعیل:

ژ ئەگەرێ تێک چوونا رەوشا جادا بەر ب قوتابخانا نیوار دچێت دایک و بابێن زارۆیان گه‌فێن بایكوتکرنا خواندنێ دکەن و داخاز دکەن ب زووترین دەم لایەنێن پەیوەنديدار چاره‌سەریەکێ بۆ ببین، ھەروەسا ماموستایان ھەمان گازندە ھەبوو ل سەر ڤی بابەتێ و داخازا ڤەگوھاستنێ دکەن بۆ قوتابخانەکا دێ دا ژ ڤی ئارێشێ قورتال بن، وه‌لاتیەکی دیارکر ئەف قوتابخانە پێش وەخت زیندایەکا رژێما بەعس بوو و پەروەردا دھۆکێ گوھارت بۆ قوتابخانە ماوێ 12 سالانە  و چەندین جارا ھاتیە نوژەنکرن و ئاریشە ئەو جاددا د ناڤبەرا پارچێن ئەردێ یێن خەلکێ دەرباز دبیت و پار باژیرڤانیا دومیز 30 ترۆمبێلێن تێکەلی فەرشکرن.

سه‌فه‌ر ئيسماعيل دیارکر کۆمپانیەکا تورکی رابوو ب کێشانا ھێلێن ئاڤێ بۆ ڤێ تاخێ و ئەف ئاریشە دروست بوو و پترێ هزار قوتابیان د ناڤ ئاڤاھیێ ڤێ قوتابخانێ دا دخوونن .

ژ لایێ خو ڤە رێڤەبەرێ پەروەردا سێمێلێ، عه‌بدولا حسێن، دیارکر وان پەیوەندی ب لایەنێن پەیوەنديدار ڤه‌ کريه‌ بۆ چارەسەرکرنا ڤێ ئاریشێ ب زووترین دەم و داخاز ژ خەلکێ کر د بھێن فرەەـ بن و ھاریکار بن چونکو نوکە ئەو يێ د حالەتێ  شەری دا و ئالیەتێن باژێرڤانيێ ژى د کاری دانە ل بەروکێن شەری و کار دێ گیرۆ بن، بەلێ خزمەت دێ ھەر يا بەردەاوم بیت بۆ خەلکى.

1 of 8