ئه‌ڤرۆ نیۆز:
د هه‌ڤدیتنه‌كا تایبه‌ت دا ل گه‌ل كه‌نالێ زاگروس یێ ئه‌سمانى فازل نه‌بى بریكارێ وه‌زاره‌تا دارایى عیراقێ راگه‌هاند، بودجا سالا نوو یا عیراقێ 2015 خالبه‌ندا په‌یوه‌ندى ب پێشمه‌رگه‌ى ڤه ل بودجا عیراقێ زێده‌كریه.
هه‌روه‌سا ئاشكراكر، كێشه‌یێن دارایى هه‌موو هاتینه چاره‌كرن ل گه‌ل عیراقێ و بتنێ كێشه‌یا په‌ترۆلێ مایه ئه‌و ژى ل گوڕ پێشبینیا وى نه‌رماتى ژ ئالیێ به‌غداڤه بهێته كرن و پێشڤه‌چوون دێ هه‌بیت.
ئه‌ڤرۆ نيوز:
سه‌رۆكێ لژنا پێشه‌سازى و سامانێن سرۆشتى راگه‌هاند كو هاتنه خوارا بهايێ پانزينێ په‌يوه‌ندى ب رێكه‌فتنا هه‌رێم و به‌غدا ڤه نينه و دا زانين كو حه‌فتيا بۆرى ل گه‌ل جڤاتا په‌ترۆل و گازێ دانوستاندن كريه.
شێركۆ جه‌وده‌ت، سه‌رۆكێ لژنا پێشه‌سازى و وه‌زه و سامانێن سرۆشتى ل په‌رله‌مانێ كوردستانێ بۆ خاك دياركر كو ل حه‌فتيا بۆرى ل سه‌ر بهايێ په‌ترۆلێ ل گه‌ل جڤاتا په‌ترۆل و گازێ دانوستان كريه و داخوازا كێمكرنا بهايێ په‌ترۆلێ كريه.
د به‌رسڤا وان دا، جڤاتا په‌ترۆل و گازێ ل هه‌رێمێ بۆ ئاشكه‌را كريه كو هه‌تا كاودانێن دارايى يێن هه‌رێمێ ئاسايى نه‌بن، ئه‌و نه‌شێن بهايێ پانزينێ كێم كه‌ن هه‌ر وه‌كو دكتور شێركۆيى به‌حسكرى.
ئاشكه‌را ژى كر كو هاتنه خوارا بهايێ په‌ترۆلێ په‌يوه‌ندى ب رێكه‌فتنا هه‌ولێر و به‌غدا ڤه نينه هه‌ر وه‌كو جڤاتێ بۆ ڤێ لژنا په‌رله‌مانى گۆتى.
پشتى قه‌يرانا دارايى ب سه‌ر هه‌رێما كوردستانێ دا هاتى، بهايێ په‌ترۆلێ ژى ژ 500 ديناران بوويه 900 دينار و ب گۆره‌يى چاڤدێران ژىئه‌ڤێ پێنگاڤا حوكمه‌تێ ژى كارتێكرنه‌كا راسته‌وخۆ يا ل سه‌ر ژيانا وه‌لاتيان كرى.
ئه‌ڤرۆ نيوز:
ره‌وانگه‌ها مافێن مرۆڤى ل سوريا ئه‌ڤرۆ رۆژا ئێكشه‌مبى توركيا تۆمه‌تبار كر كو رێ يا دايه چه‌كدارێن داعش هێرشێ د سه‌ر ئاخا وێ را بكه‌ته سه‌ر كۆبانێ يا هه‌ڤسنور ل گه‌ل توركيا و ژ لايێ خوه ژى ڤه توركيا ڤان تۆمه‌تان ره‌تدكه‌ت.
ره‌وانگه‌ها مافێن مرۆڤى ئاشكه‌را كر كو ترۆمبێله‌كا مينرێژكرى ل “ده‌رگه‌هێ پينار” يێ سنورێ كۆبانێ ل رۆژا شه‌مبى ته‌قى و ئه‌ڤ ته‌قينه‌يه توركيا پشت راست كرى كو يا ل وێرێ روودايى، به‌لێ ره‌تكر ژى كو ل سه‌ر ئه‌ردێ وان هاتبيته ئه‌نجام دان. سه‌رۆكێ ره‌وانگه‌هێ رامى عه‌بدولره‌حمان توركيا ب “دره‌وين” وه‌سفكر و گۆت: “داعش د رێيا سنورێن وێ را ئه‌ڤ كرياره ئه‌نجام دايه”.
رامى زێده‌تر گۆت: “گه‌لێ سوريا بۆ دو كاران د ناليت؛ ئيران رێ دده‌ته چه‌كداران پشته‌ڤانيا رژێما سوريا بكه‌ن و توركيا ژى رێ ب كه‌سانێن بيانى دده‌ت هه‌ڤكاريا داعش بكه‌ن”.
د هه‌مان ده‌م دا ئه‌ڤ تۆمه‌ته ئاخفتنكه‌رێ ب ناڤێ PYD ژى، نه‌واف خه‌ليل، خستنه پال توركيا و گۆت: “چه‌كدارێن داعش هێرش ژ دو لايان ڤه دكر، به‌لێ ل رۆژا شه‌مبى ژ چار جهان ڤه كر”.
د به‌رامبه‌ر ڤێ چه‌ندێ دا، به‌ياننامه‌كێ ژ حوكمه‌تا توركيا راگه‌هاند كو ئێك ژ هێرشێن خوه‌كوژى ب ترۆمبێله‌كا پرى مين ل لايێ سنورى په‌قى يه، به‌لێ ره‌تكر كو ئه‌و ترۆمبێل د سنورێن توركيا را چووبيته كۆبانێ.
د به‌يانێ دا هاتيه: “ئه‌وێن دبێژن ترۆمبێله‌ك د ده‌رگه‌هين سنورى يێن توركيا را چوويه كۆبانێ و خوه ته‌قانديه “دره‌وه. به‌رى نوكه چو به‌رپرسێن توركيا رانه‌گانديه كو ترۆمبێله‌كا مينرێژكرى ل ناڤ توركيا بيت”
توركيا يا دودله د هه‌ڤكاريكرنا هێزێن هه‌ڤپه‌يمانان دا دژى داعش ئه‌وا روويه‌كێ مه‌زن ژ عيراق و سوريا گرتى، د هه‌مان ده‌م دا هێزێن چه‌كدارێن كورد و پێشمه‌رگه شه‌ره‌كێ دژوار ب پشته‌ڤانيا هه‌ڤپه‌يمانيا نێڤده‌وله‌تى ل گه‌ل دكه‌ن.
ئەڤرۆ:
فەرماندەکێ ھێزێن پشتەڤانیا پێشمەرگێ کوردستانێ ل کۆبانێ دیار کر کو ئەو ھاتینە ئاگەھدارکرن ئەڤرۆ 1\12\2\2014 یان سوبەھی ڤەگەرنە ھەرێما کوردستانێ و گۆت “دوھی 29\11 ھێزێن پێشمەرگەی ب دژوارترین رەنگ بەرسڤا ھێرشێن داعش داینە”.
لیوا عەبدولقھار مەجید دۆسکی، فەرماندێ ھێزێن پشتەڤانیا پێشمەرگێ باشوورێ کوردستانێ ل کۆبانێ ئاشکرا کر، ئەو ھاتبوونە ئاگەھدارکرن کو ل 27\11\2014 ڤەگەرنە ھەرێمێ لێ وەسا چێ نەبوو، و بۆ ئەڤرۆ گۆت “ئەم ھاتینە ئاگەھدارکرن ئەڤرۆ 1\12 یان سوبەھی ڤەگەرینە ھەرێما کوردستانێ”.
دۆسکی خویا ژی کر، شەرێ ھێزێن کوردی د گەل تیرۆرستێن داعش ل کۆبانێ یێ بەردەوامە و شەڤا بۆری ژ سێ لایانڤە تیرۆرستێن داعش ھێرش کرینە و ل لایێ رۆژ ھەلات شەر ھەتا شەڤا ل دووڤ دا ژی یێ بەردەوام بوو، پێشمەرگەی ژی ب دژوارترین رەنگ بەرسڤا ھێرشێن وان دایە و گۆت “ب تنێ دوھی 29\11\2014 نێزیکی 100 تۆپ و مۆشەکان مە تێوەرکرینە”.
وەکو دیار ٢٨/١٠/٢٠١٤ ١٥١ پێشمەرگێن ھێزا پشتەڤان یا ئێک و دو یێن سەر ب وەزارەتا پێشمەرگەی ڤە ب چەکێ گران و ب رێیا تورکیا دەربازی رۆژئاڤایێ کوردستانێ و باژێرێ کۆبانێ بوون.
ئه‌ڤرۆ نیۆز،عه‌دنان رێكانى:
ژێده‌ره‌كێ له‌شكرێ بۆ ئه‌ڤرۆ نیۆز راگه‌هاند، ئه‌ڤرۆ ل ده‌مژمێر 7 ئێڤارى شه‌ڤگه‌ره‌كا چه‌كدارێن داعشێ كو چه‌ند كه‌سه‌كا پێكهاتبوون ل گوندێ سه‌هله‌ج ژێریا سكرێ مووسل ب مه‌ره‌ما هێرشه‌كێ خوه نێزیكى بنگه‌هێن پێشمه‌رگه‌ێ هه‌رێما كوردستانێ كرن.
عه‌قید زوبێر گولى ژ هێزا پێشمه‌رگێن زێره‌ڤانیێ هه‌روه‌سا خوه‌یاكر، هێرشا چه‌كدارێن داعشێ ل نێزیكى قوتابخانا گوندێ سه‌هله‌ج هاته تێكشكاندن، و ته‌رمێن 8 تیرۆرستان هاتیه دیتن و ل گۆڕ پێزانینان 2 یێن دى برینداربوون.
عه‌قید زوبیر گولى دوپاتكر، هه‌ڤده‌م به‌رهنگاربوونا پێشمه‌رگه‌ى بۆ به‌رسینكگرتنا تیرۆرستان فرۆكێن ئه‌سمانى یێن هێزێن هه‌ڤپه‌یمان ژى دبرێن كوژه‌ك داوه‌شاندنه جهێن چه‌كدارێن داعشێ.
ئه‌ڤرۆ نیۆز:
پشتى وێ شه‌كه‌ستنا له‌شكرێ عیراقێ ل سه‌ر پێشڤه‌چوونا چه‌كدارێن داعشێ بخوه‌ڤه دیتى، ئه‌مریكا بزاڤان دكه‌ت ستراتیجیه‌ته‌كا نوو بۆ پێكهاتێ له‌شكرێ عیراقێ ب دانیت.
به‌رپرسه‌كێ پله بلندێ ئه‌مریكى ئاشكراكر، ستراتیجیا نوو یا ئه‌مریكى ب ئارمانجا پێكئینانا له‌شكرێ عیراقێ زێده‌تر كاره‌كێ خوه‌به‌خشى یه ب رێیا مه‌شق و راهێنانكرنێ كو دبیت حه‌فت لیوایان بخوه‌ڤه بگریت، و ژمارا چه‌كدارێن هه‌ر لیوایه‌كێ ژى 45 هه‌زار له‌شكران ده‌رباز نه‌بیت.
به‌رپرسێ ئه‌مریكى بۆ رۆژناما واشنتۆن پۆست راگه‌هاند، كو ئه‌مریكا دڤێت چه‌ند لیوایه‌كان یێن دیاركرى دناڤ پێكهاتێن له‌شكرێ عیراقێ دا پێك بنیت ل جهێ هندێ كو ب شێوه‌كێ گشتى له‌شكره‌كێ نوویێ عیراقێ بهێته دامه‌زارندن.
ئه‌ڤرۆ نيوز:
بريكارێ وه‌زاره‌تا دارايا عيراقێ گۆت: “17% ژ پشكا هه‌رێمێ د پرۆژێ قانوونا بودجا گشتيا عيراقێ دا جێگير بوو و گه‌له‌ك ژ وان برگێن دژى هه‌رێمێ هاتينه لادان و هنده‌ك برگه ماينه، ئه‌و ژى دێ رێكه‌فتن ل سه‌ر هێته كرن ل گه‌ل هه‌رێمێ و دێ ب ره‌نگه‌كێ دى هێنه نڤيسين و يێ ب باوه‌ره ل ده‌مێ پشتى ده‌ستكاريێن سوبه‌هى دێ پرۆژه ب دلێ هه‌موو لايه‌كى بيت.
فازل نه‌بى، بريكارێ وه‌زاره‌تا دارايا عيراقێ راگه‌هاند كو دوهى ئێڤارى جڤاتا وه‌زيرێن عيراقێ كۆمبوونه‌ك ساز كر و د وێ كۆمبوونێ دا وه‌زيرێ دارايى يێ عيراقێ هشيار زێبارى، خواندنه‌كا گشتى يا پێدڤى ب پرۆژێ قانوونا بودجێ كر و جهێ ره‌زامه‌نديا جڤاتا وه‌زيران بوو.
گۆتژى: “هنده‌ك تێبينى هه‌بوون، دا كو بشێين وان تێبينيان ل گه‌ل يێن وه‌زاره‌تا دارايى ل حوكمه‌تا هه‌رێما كوردستانى ب گرنگى وه‌ربگرين، ب فه‌رمانا زێبارى مه په‌يوه‌ندى ب وان ژى كريه”.
ئاماژه ب وێ چه‌ندێ ژى كر كو ئه‌ڤرۆ ئه‌و دێ دووباره كۆم بن دا كو مفاى ژ وان تێبينيان وه‌ربگرن و د كۆمبوونا رۆژا شه‌مبيا داهاتى دا، دووباره كۆپيه‌كا پرۆژێ قانوونا بودجێ نوو پێشكێش بكه‌ن دا كو ژ لايێ جڤاتا وه‌زيران ڤه بهێته په‌سه‌ندكرن”.
نه‌بى گۆت: “وه‌زاره‌تا دارايى ب ڤى كارى ڤه گه‌له‌ك ماندوو بوو، كارێ شه‌ش هه‌يڤان مه ب دو حه‌فتيان كر، ئه‌ڤه داخوازيا جڤاتا وه‌زيران بوو و زێبارى ژى د ڤێ چه‌ندێ دا يێ سه‌ركه‌فتى بوو، ئه‌و تێبينيێن گه‌هشتينه مه ل پێش سالێن بۆرى كێمتر بوون”.
فازل نه‌بى ته‌كست ل سه‌ر وێ چه‌ندێ كر كو 17% ژ پشكا هه‌رێمێ د پرۆژێ قانوونا بودجێ گشتيێ عيراقێ دا جێگير بوويه و گۆت: ” مه گه‌له‌ك ژ وان برگێن دژى هه‌رێمێ لادان، و هنده‌ك برگه ژى ماينه ئه‌و ژى دێ ل گه‌ل هه‌رێمێ رێكه‌فتن ل سه‌ر هێته كرن دا كو ب ره‌نگه‌كێ دى بهێنه نڤيسين، ل وێ باوه‌رێ مه پرۆژێ قانوونا بودجه‌ى كو دێ سوبه‌هى ده‌ستكارى ل سه‌ر هێنه كرن دێ ب دلێ هه‌موو لايان بيت”.
ئه‌ڤرۆ نیۆز:
رێڤه‌به‌رێ ئاسایشا پارێزگه‌ها كه‌ركووكێ هه‌لو نه‌جات بۆ تۆڕ روودا راگه‌هاند، ئه‌ڤرۆ سه‌رۆكێ هه‌رێما كوردستانێ مه‌سعود بارزانى سه‌را به‌رۆكێن شه‌رى و پێشمه‌رگه‌ى دا و ل گه‌ل سه‌ركردێن هێزێن پێشمه‌رگه‌ى و پاراتسنا ئێمناهیێ كومبوو.
هه‌لو نه‌جات هه‌روه‌سا رونكر، سه‌رۆكێ هه‌رێما كوردستانێ ل گه‌ل وه‌زیرێ پێشمه‌رگه‌یێ هه‌رێما كوردستانێ موسته‌فا سه‌ید قادر سه‌را به‌رۆكێن شه‌رى دا ل میحوه‌رێ گوێر و مه‌خمور و كه‌ركووكێ دا، پاشى ل گه‌ل سه‌ركردێن له‌شكرى كومبوو.
رێڤه‌به‌رێ ئاسایشا كه‌ركووك هه‌روه‌سا خوه‌یاكر، كومبوونه‌كا له‌شكرى یا توكمه هاته كرن و به‌حسێ ره‌وشا شه‌رێ دژى چه‌كدارێن داعشێ هاته كرن، زێده‌بارى پێدڤێن هێزێن پێشمه‌رگه‌ى بۆ به‌رسینكگرتنا داعشێ ژى هاتن كرن.
ئه‌ڤرۆ نیۆز، قائید میرۆ
ئێڤاریا ئه‌ڤرۆ ب ئه‌گه‌رێ ته‌قینا خانیه‌كێ تی ئێن تی كری ل گونده‌كێ نێزیكی ناحیا زوممار چوار پێشمه‌رگه شه‌هیدبوون.
غه‌یاس سورچی، كارگێڕێ مه‌ڵبه‌ندێ ئێكه‌تیێ ل مووسڵ بۆ ئه‌ڤرۆ نیۆز دیاركر، ده‌مژمێر پێنجی ئێڤاریا ئه‌ڤرۆ، ل گوندێ گرگاڤر یێ نێزیك ناحیا زوممار، خانیه‌كێ تژی تی ئێن تی په‌قی و د ئه‌نجامدا، چوار پێشمه‌رگه شه‌هیدبوون و دو پێشمه‌رگه‌ژی برینداربوون.
سورچی گۆتژی” ئه‌ف خانیه به‌ری نوكه ژلایێ چه‌كدارێن داعشڤه هاتبوو بۆمڕێژكرن، پشتی پاقژكرنا گوندی پێشمه‌رگه تێدا هاتبوونه ئاكنجیكرن، به‌لێ هه‌موو یێ تی ئێن تی كریبوویه و ئه‌ڤرۆ هاتیه په‌قاندن، لێ دیارنینه تیرۆرستا ب كۆنتڕۆلێ په‌قاندیه یان به‌ر ینوكه هاتیه كۆنتڕۆلكرن، چونكو ده‌مێ په‌قینێ پێشمه‌رگه تێدابووینه.
ئه‌ڤرۆ نيوز، نيوار محه‌مه‌د سه‌ليم:
ئاخفتنكه‌رێ ب ناڤێ وه‌زاره‌تا دارايى و ئابوورى ل حوكمه‌تا هه‌رێما كوردستانێ راگه‌هاند كو وه‌زيرێ دارايى و ئابوورى دێ ل ڤان نێزيكان نڤيسينگه‌هه‌كا خوه ل دهۆك ڤه‌كه‌ت و هه‌ر دو حه‌فتيان جاره‌كێ ل دهۆكێ روونيت و مامه‌له‌يێن وه‌لاتيان برێڤه به‌ت.
دلێر تارق، ئاخفتنكه‌رێ ب ناڤێ وه‌زاره‌تا دارايى و ئابوورى ل حوكمه‌تا هه‌رێما كوردستانێ، بۆ خه‌ندان گۆت: “رێباز حه‌ملان وه‌زيرێ دارايى و ئابوورى، هه‌موو رۆژێن سێشه‌مبى دێ ل هه‌ولێر مامه‌له‌يێن وه‌لاتيان برێڤه‌به‌ت و هه‌ر دو حه‌فتيان جاره‌كێ ل سلێمانيێ ژى ل نڤيسينگه‌ها خوه يا تايبه‌ت مامه‌له‌يێن وه‌لاتيان برێڤه به‌ت”.
ئاخفتنكه‌رێ ب ناڤێ وه‌زاره‌تا دارايى و ئابوورى ل حوكمه‌تا هه‌رێما كوردستانێ زێده‌تر گۆت: “ل ڤان نێزيكان دێ نڤيسينگه‌هه‌كێ ل دهۆك ژى ڤه‌كه‌ت و حه‌فتيێ دو جاران دێ مامه‌له‌يێن وه‌لاتيان برێڤه بت”.
نيشاندان